عذريتي مقابل برائتي الجزء 2

البارت الأول الجزء2

البارت  الأول 

تمنيتك نجم كل ليله اباوع بيك

واضوج هواي لمن تقرب الغبشه

وانام من الصبح أحلم بطاريك

وساعات النهار تصير وحشه

ويرد الليل يرجع وآنه أرد ليك 

مثل طير بمسيه ويرجع لعشه

وإذا جاسك برد بعيوني أدفيك

عين أتغطى بيها وثانيه الفرشه   

دارين - شفتهم نزلوا من فوك ظليت صافنه هذوله شنو من نفسيات ولا كأنه سنان جان حي

يرزق وعلي الي راحوا  بعمر الورد فاتوا من يمي وطلعوا راحوا على بيتها ال منتهى

حترك كلبي ابن الاوادم هسه جان يكول حلقوم شو هسه راح للثوم ورحت  انطيت ألمي

لعمتي ورحت لفراشي اريد أنام ما كدرت ألوب كلت احسن حل أروح اشوفهم بعيني

حتى أطلع فرقد من كلبي من اشوفه ويا غيري كمت سحبت وطلعت من الغرفه ورحت

أمشي بهدوء وصلت يم الحديقه طليت على البيت من الشباك شفت فرقد يسوي بالسبلت

ومنتهى واكفه يمه متت من الغيره   بدي افترسها بس شلون ما اعرف ردت ارجع

بس شفت منتهى تعدل بروحها كلت والله إلا أخرب عليها اللحظه

دخلت بيتها بدون استأذان واني أصيح فرقد

وهو جاوبني - تعالي هنا شكو

أجيت يمه كتله - بارق يبجي عليك تجي عليه لو اجيبه يمك

كال - لا ما عندي شي هسه أجي عليه

كالت منتهى روحي هسه يجي وراج

كتلها - لا هسه نروح اني وفرقد  بروقي مات يجي عليه

وهي رادت تموت جان تغمني بدون ما يشوفها فرقد واني طلعت لساني ألها بس اني  غبره

كبل شافني فرقد

كال - شبيج بابا والله انتي مو صاحيه

كالها  وهو يضحك   ما عفته ابد إلا من كال لمنتهى والله ما اعرف أسوي باجر أجيب واحد

يعرف ويسوي

وطلعنه من يمها دخلنه للبيت وكال شو صنطه  مو كلتي بارق مات بجي

كتله - يجوز تعب من البجي ونام اذا انت ساعه وما اجيت اعتيادي ينام

كال - ها تعب ياريت لو تتعب امه وتجي يمي أضيع تعبها بحبي وبكلبي

كتله - يا كلب ما شاء الله يرحب بكل وحده هو وبغداد ترحب بكم سوه

كال - ولج غير بغداد ميته على وحده هي النفس الي يصعد وينزل

كتله - هذا حجي ليل يمحي النهار

وعفته ودخلت للغرفه واني ضربات كلبي تسمع الدول المجاوره أفكر بكلامه وبغزله

وبحركاته أموت عليه و دائمآ اسأل نفسي ليش على الرغم ما دائمآ يأذيني وكل مره

يدوس على كلبي بس احبه واعشقه وشكد اريد ابتعد عنه ما أكدر

نمت وكعدت الصبح على صوت قمر وهي واكفه فوك راسي

وتصيح - كومي يلا نايمه لازم حضرتج عروس يلا نظفي باجر كعدة الصلح الي اجيتي انتي

مثل البومه وخربتي حياتنه

وعمتي تكول ألها يمعوده صوتج الطفل نايم خطيه

وهي تلعلع بصوتها كمت ما حجيت وياها وهي بدها تاكلني رحت غسلت وتريكت وبديت

اشتغل وياهن بس الحجي ما أخلص منه يبسمرن بيه بس اني ما اهتم ألهن وأخاف احجي

بنفس الوقت لا يضربني كعد ابني رحت عليه وجبته اسويله حليب

وبدت قمر عيني انتي مو لكيتي ابنج حجه وكل ساع لازمته انطي لأمي  وكومي اشتغلي

كتلها ترى دا اشتغل وياجن بس ابني شلون ما أوكل ابني

كالت - انطي لأمي توكله لو ما فالحه بس تغرين الزلم

كتلها - عيب هذا الحجي شنو تغرين الزلم

ردت منتهى اي قبل من شفتج ويا طارق جذب والبارحه انتي مطلكه شكو تركضين ورا فرقد

ضحكت وكتلها والله انتي المفروض ما تحجين مو كاعده ادورين رجال وانتي بعدج السنه

ما طالعه مال زوجج وابنج بس الظاهر خرفيتي

كتلها هيجي لو هجمت عليه وضربتني اني هم عفت أبني بالكاع وهجمت عليها وصارت

مكافش اجتي عمتي كامت اصيح علينه  وتغلط وأخذت ابني الي ميت يجي بالكاع

وتكول لقمر شكو كل ما تنجمعن تكب العيطه والله بعد ما اتحملجن

كالت قمر عدنه وحده راح تموت شلون ماكو رجال بحضنها وهي مطلكه تركض ورا الرجال

ورايحه ماخذته من  زوجته بنص الليل

كتلها - ليش اني قمر الي زوجها عافها وهذا فرقد وطارق كاتلين رواحهم عليه واني

الي ما اريدهم

وهذا جان أكبر غلط مني لأن ما تعلمت من اغلاطي القديمه وهسه دا اوكع نفسي بأغلاط

أكبر كل شي نحسب اله حتى المكر بس مكر الثلاثي الي عندي ماكو مثله

قمر تخبلت وهجمت عليه بس هاي المره وياها منتهى وعمتي صيح وأبني يصرخ  

أخذت الموبايل وتصلت على فرقد

وهي تكله لفرقد شوف فرقد اني بعد ما أتحمل نسوانك تعال شوف صوتهن ومكافشهن

والظاهر كال افتحي مايك

فتحت عمتي وجان يكول فرقد اسمعن اكلجن والله اليوم الي تريد روحها لا شوفني وجهه

بس ارجع احسبن الله ما خلقجن

وسد الموبايل اني حالتي يرثى لها أخذت ابني من عمتي واريد أروح للغرفه

وجان صيح قمر تعالي وين رايحه والشغل

كتلها والله انعل أبو الشغل وكل شي ما اسوي واريد من الله واحد يحجي حتى هسه احرك

روحي وابليكم

ظلت قمر تغلط وسب بيه وعمتي سكت بيها دخلت لغرفة عمتي واني أبجي على حالي

ما اعرف شوكت أخلص من هذا القهر وقررت بس يجي فرقد يشوفلي حل اني ما أظل

هيجي معلكه  ظليت بالغرفه وما طلعت بس على  الغده من جابوا لعمتي غده وكلت بارق وغسلتله

ورجعت نام بارق واني نمت يمه ما صحيت غير على فرقد وهو يغرد فوك راسي

ويكول - كومي يا محترمه اصعدي فوك عندي حجي  وياج

كمت ردت احجي بس خفت وبنفس الوقت ما أريد يضربني كدامهن صعدت قبله ظليت واكفه

قريب على الباب حتى درب الطفره سهل دخل للغرفه وكام ينزع ملابسه وهو يسأل اي

دارين شبيج وياهن

كتله ما بيه شي هن دائمآ يضربني ويغلطن عليه

كال - هاااا هن وانتي شجاوبتي عليهن

كتله - شوف اني بعد ما أسكت مثل ما يسون اسوي

كال - هو سؤال واحد انتي كلتي فرقد وطارق كاتلين روحهم عليه واني ما اريدهم

بصراحه خفت منه اكول حجيت نكرت

كتله - لا ما كلت

اتقرب عليه وخله الموبايل قريب على وجهي وشفت فيديو من كلت هذا الكلام

شفت قمر  ومنتهى بالفيديو عرفت الي صورت حياة الحيه

كتله - منو انطى الك شبسرعه نقلن الحجي حتى بعدك بملابس الدوام

كال - هو هذا الهامج اول شي ما سمعت منهن والمقطع الفيديو وصل الي واني بدوام

كتله - اي كلت لأن يعايرني ويكولن مطلكه ومتكدر ظل بدون رجال مثلك انت دائمآ تكول هيجي

كال - هسه ما فهمت شنو غاثج  كلامي لو كلامهن

كتله - كل شي بعد ما أتحمل أصبح على المشاكل وامسي وأنام على حركة كلبي

تقرب عليه وهو مثبت نظره بعيوني ويكول منو يحرك كلبج حبي غير احرك أهله

كتله - انت محد يحرك كلبي غيرك صدكت الناس كلها إلا اني ورحت ازوجت عليه هذا كله

شسمي مو حركان كلب

كال - صحيح بالبدايه ما صدكتج بموضوع طارق بس بعدين عرفت غلطي وموضوع زواجي

من منتهى كالت اريد أخذ ابني واسافر وامي هنا كلبت الدنيا عليه على راح تأخذ ابن

اخوك وتروح وهي بنفسها كالت بس اريد عقد   حتى اكعد يمكم بيتي واريد اربي ابني

ما أريد رجال 

كتله - والله خوش فلم متريد رجال وازوجتك وكل شويه تجيك للغرفه خطيه مبنيه متريد

ليش تجبرها مو متريد

كال - تعرفين ليش اجتي ماكو داعي لكل كلامج وشفتي بعينج هسه يلا كولي نعقد باجر

راح يجي سيد بالكعده مال الصلح ويا طارق

سكتت ما جاوبت لأن بصراحه من أجي يمه انسى كل كلمه اريد اكولها لأن عنده عليه سحر

طاغي يسحرني بنظراته وبنبرة صوته وكلامه الي يأخذني بي بعالم بس اني ويا بي

وحبه ما أكدر اوصف شعوري يمه

كال ها سالمين شتكولين

كتله - براحتك شتريد سوي

كال - اموت على ربج باجر نعقد وهذا الاسبوع نعقد محكمه حتى نسوي جنسيه

كتله - اريد أروح للصالون

كال - يدلل الحلو هسه اخابر على حوراء وتروحين وياها

خابر على حوراء  وهو  يحجي وياها نزلت أخذت ابني وصعدت  خليته عند أبو

كال - بدلي اله لأن حوراء متكدر تجي اني أوديج يمها ومناك روحن وبارق يظل يمي

بدلت لبارق وهو بدل وأخذه ونزل واني هم بدلت شفت الثلاثي المرح شافني مبدله

ظلن يحجن اني سويت حركة مال الغيره وطلعت وهن محتركات وصلنه لبيت حوراء

وهي طلعت تهلي وترحب وطلع أبو كرار هم سلمنه عليه وهي جتي ويانه وصلنه للصالون

وراح دخلنه وبين حفافه وصبغ وخصل وتنظيف بشره صار الليل وأبو كرار وفرقد حركوا

الموبايل على حوراء خلصنه واجى فرقد علينه ويا بارق اخذته منه وصعدت وحوراء

وصلناها لبيته وبرجعه لبيتنه كل ساع يكول الله شنو كمر عطفي عليه وخلي هسه نعقد

وخلي نعرس الليله

كتله - على باجر مو هسه يلا بروقي راح ينام

كمل الطريق وهو يتوسل بيه واني ما أهتم اله بس كلبي أحسه راح يطير من الفرحه

يارين - بعد ما تعبت واني أدور شغل ماكو  وماهر يريد نطلع من البيت واحنه قربنه نخلص

فلوس وين نروح ما اعرف أحس الحياة ما نصفتني واني مسؤوله على أمي وجهال معتز

وأفكر اذا ما حصلت شغل شلون ارجع واكول الله ما يعوف أحد رجعت للبيت لكيت هوسه

بابنه والناس ملتمه ولأن احنه جديدين بالمنطقه بعدنه ما نعرف أحد اجيت على أمي

وهي تلطم على وجهه وتعيط

كتله -شكو شصاير

كالت - لج خطفوه  ولج يارين خطفوا هشام ابن معتز

جانت بمثابة الضربه على رأسي الي صحتني على زماني الي حسستني اني قصرت ويا

ذوله الأطفال وجان ما ألهم أحد بس اني

كتلها - شمدريج نخطف منو كلج

أكثر من ولد شاب واكف كالوا احنه شفنه سياره وكفت يمه وسحبوا ودخلوا لسياره

وراحوا والي انتبهوا عليه أنه السياره ما بيها أرقام

جانت أوقات عصيبه منعرف منو سوه هيجي كامت تتزاحم الأفكار براسي منو خطفه عمار

لو ماهر

استقريت على عمار  كلت ماكو غيره سوه بيه هيجي حتى ينتقم مني بعد الي سويته بي

اتصلت على عمار موبايله مغلق  دخلت أمي للبيت وهي حتى صوتها راح من كد ما عيطت

كالت - ولج يارين من خطفه وشلون شنسوي منو النه

كتلها - ماكو غير لو عمار لو ماهر

كالت - لج يمه اتصلي عليهم هذا طفل ما يعرف شيسوي هسه تلكي ميت بجي

كتلها - عمار موبايله مغلق بقى ماهر هسه اتصل عليه

اتصلت على ماهر موبايله يدك وما يرد  واتصلت أكثر من  5مرات كام يرفض المكالمه

عفته وكتلها راح أروح على بيت عمار

كالت - أمي أجي وياج اريد أبوس ايد عمار حتى يرجع ابن معتز هذا طفل شنو ذنبه

كتلها يلا بين ما تبدلين  وبدلي لشهوده بس اجيب سياره وأجي

طلعت أركض وكفت على الشارع وكفت يمي سياره

والسايق كال - أختي محتاجه شي اني جيرانكم تريدين اوصلج لمكان

كتلها - اي عفيه بس هسه أمي تجي تكدر تجي يم بابنه

كال  - تدللين

واني رجعت لكيت أمي لابسه عبايتها وياها بنت معتز طلعنه وصعدنه ويا أبو السياره

واحنه ندعي وننذر ابن معتز ما بي شي وامي وجهه صار أصفر

من كال  أبو السياره هاي مو اول حالة خطف طفل صير هاي رابع حاله صير بالمنطقه ومحد

يعرف منو

أمي سألته والأطفال الي نخطفوا رجعوا لهلهم

كال - لا والله محد رجع واكو بيهم لكوهم بطب العدلي

أمي كامت أدك على وجهه وتلطم وتكول حظه مثل حظ أبو راح الطفل وكله مني اني دزيته

للمحل لو ما دازته جان محد خطفه

وصلنه لمنطقه الي ساكن بيها عمار ودليته على البيت وكفنه ونزلنه من السياره

ظليت أدك بالباب  الجرس  طلعت ام عمار من شافتنه تفاجأت بينه

حتى سلام ما سلمت كتلها وين عمار

بعدها ما مجاوبتني دخلت بسرعه واني اصيح عمار وين انت عمار

وأمه وامي ورايه

وأمه تكلي شبيج يارين يمعوده نايم يم زوجته  وين رايحه اني مو كتلج والله أخلي يطلكج

ليش سوين هيجي هسه هو يعند أكثر لج يمه اني والله احجي ويا   ويطلكج

رحت على غرفة فاتن دفرت الباب انفتح دخلت بس الغرفه مظلمه وأم عمار فتحت الضوه

صار بوجهي عمار لابس برموده وفانيله تعلاكه  ويفرك بعيونه

صاح بيه بصوت قوي شكو شبيج هاجمه على الغرفه وداخله عليه عبالك داخله بيت ابوج

بعدني اريد احجي كامت تغلط فاتن

والله من دخلت جنت ناسيه فاتن بس من غلطت عليه انتبهت عليها ويا ريت ما شفتها

وجهه وركبتها وايدها مشوهات لعبت نفسي منها وهي انتبهت عليه

كامت تعيط وتكول ها جايه تشفين بيه تريدين تاخذين عمار لك والله اموتج وما تاخذي

اني العصبيه عمت عيني كتلها هو عمار منو يريده بس انتي لأن مقعده ومشوهه

اني حجيت وهو هجم عليه وخنكني ويكول مقعده ومشوهه بس شريفه ما انكشفت على غيري

مو انتي الي مني للمحامي عبالج ما أدري كل شي اعرف بس بعدني ما متفرغ الكم والله

إلا اخليج تجين تبوسين أيدي حتي اخليج خدامه هنا

أمي جرت ايده وباستها وتكله فدوه بس رجع هشام والله طفل وما اله ذنب

بعد ايده من ركبتي وكال هشام منو

كتله الي خطفته ترجعه فهمت والله هسه أروح اشتكي عليك بالداخليه

كال - تكدرين كل شي سوين لأن هناك هوايه اكو لواحيك ولوكيه يشكوج بس ها مو بلاش

لازم اكو مقابل وانتي ما شاء الله خير من تقدرين ال يوكف وياج

رجعت أمي تتوسل بي وتكله يمه عمار بس كلي هشام وينه انت عندك بنات وهم تخاف عليهن

وهو يكول والله العظيم ما اعرف منو هشام اذا ما اعرفه شلون اخطفه بس كلولي

كتله - هشام ابن اخويه معتز انت خطفته حتى تعاقبني

كال - بأبا انتي مخبله شنو خطفته حتى اعاقبج عليمن اجيبج يمي واحبسج واعاقبج على

طريقتي  مو اخطف طفل مخبله انتي اني ضابط مو رئيس عصابه

كتله - شوف والله اذا ما جبت هشام إلا أطلع أفضحك

كال - انتي بنت ابوج سويها وشوفي الله شخالق كتلج ما اعرف عليه شي  

وامي تتوسل بي وتكله عيني هذا طفل شعليه

وهو يكول بمكان ما تجون اتهموني بي روحوا شوفوا وين عليمن تجون عليه وضيعون وقت

هذا الحجي كله بالكوه نفهم لأن فاتن تغلط وسب بيه وأم عمار تصبر بينه

وعفنه عمار يهدئ ويتوسل بفاتن حتى تسكت طلعنه من بيته ورحنه عل  مركز الشرطه

وقدمنه شكوه بس ما قبلوا كالوا لازم يعبر 24 ساعه يلا نقدم شكوه  رجعنه على امل

راجع للبيت بس ما كو فص ملح وذاب رجعت اتصل على ماهر وهو يفصله بقيت أتأمل برقمه

واكول ويا نفسي ياريت يدري مجرد مروري على رقم موبايله او اسمه بموبايلي يبعث

الطمأنينة والسلام في نفسي وكانني أحمي نفسي بي ، بقينه هذاك اليوم بقلق اذا تندك الباب نطلع نركض

وأكثر الأحيان يكونون الجوارين يجون يسألون اذا اجانه خبر بس ماكو كأنه ننتظر سراب شي

ما موجود الليل كله واحنه كاعدين ما نمنه غير البجي وندب الحظ على هذا الطفل الي راح

ضاع ومنعرف يرجع لو لا منعرف شوكت نمنه حسيت على الباب راح يتكسر وامي هم كعدت

كالت ولج أمشي شوفي منو عسى خبر عن هشام

طلعت شفته ماهر لأن أطول  من الباب فتحت الباب بدون سلام

كال - شكو تتصلين عليه شنو ما عندج كرامه مو كتلج كل شي انتهى بينه وبس طلعوا من

البيت شنو احساس ماكو

كتله - انت خطفت هشام صح

كال - يا هشام شنو صديقج الجديد بعدني ما متعرف عليه نعتذر منج ومنه بعدنه ما حصلنه

الشرف عذرونه

كتله - لا تغشم روحك هشام ابن اخويه معتز

كال - تحجين الصدك لو تكذبين

طلعت أمي تتوسل بي وتكله  اذا هشام عند رجعه 

وهو يحلف ويكول والله خاله لو شيصير ما اخطف طفل وعلى شنو اخطفه أحمله ذنب مو ذنبه

اني الي غلط بحقي انتي وبنتج هذا الطفل شنو ذنبه

كالت  أمي اريد اعرف منو خطفه وشصار بي هسه

رجع كال انتوا تشكون بأحد شوكت نخطف

حجيتله كل الي صار وكتله البارحه انخطف حدود 10 الصبح

كال - تعالي ويايه شنو بعد 24 ساعه يلا يشكون شنو الناس تموت يلا يتحركون

رحت ويا للمركز وقدمنه شكوه وكالوا من يستجد شي نبلغكم رجعنه للبيت ومر اليوم الثاني

وماكو اي خبر عن هشام إلى ان خابرني عمار

كال تعالي اريدج بس بدون ما تدري امج

كتله - خير شتريد لو تموت ما أجي عليك وانساني احسن

كال - انتي غبيه تعالي على شغلة هشام بسرعه اجتي اخباريه لكو طفل ميت تعالي

شوفي هو لو لا

من كلي هيجي رجلي بعد ما حسيت بيهن أريد أروح وما أريد اريد اشوف هو  لو لا بس اتمنى

يطلع مو هو لأن خطيه ما شاف شي من حياته  وطفل وجانوا يمنه مكسورين لا اب ولا ام

آخرها يموت ذنبه بركبة منو

ما كلت لأمي اني رايحه لعمار كتلها خابروني على شغل وطلعت رحت على عمار أخذني

وطلعنه على الطب العدلي وياريت لو ما رايحه طلبوا من عدنه نروح لثلاجة الأموات

بصراحه تملكني الخوف عمار الي أكرهه لزمت ايده وعصرتها قوي

وهو انتبه عليه وعصر أيدي وكال لا تخافين اني وياج ما اعوفج بس تعالي شوفي هو لو لا

دخلنه لو لعبت نفسي من الريحه أحس نفسي راح أتقيئ وصارت عندي دوخه

اجى واحد وبيده لفه وياكل وهو يحجي ويا عمار واني متعجبه شلون ياكل واله نفس وهو
بهيجي مكان

ويكول - سيدي تريد جثة الطفل

عمار جاوبه - اي الطفل اجتي اخباريه بي نريد نشوفه حتى  نتعرف عليه

هم يحجون وصارت أصواتهم بعيده عني واحس عيوني غوشت وهذا الي ياكل سحب مثل

الجرار بس جبير

وكال هذا تعالوا شوفوا

عمار يجر بيه واني أحس روحي مثل لعبه بيد عمار هو يمشي بيه اني شفت هشام

نايم بالثلاجه وبعدها ما حسيت بشي

دارين - رجعنه للبيت والثلاثي موجودات بالمطبخ اول ما دخلت شافني لو الامه انكلبت عليه

اول وحده حجت قمر الي اعتبرها مو حماتي عبالك ضرتي

كالت قمر - اكلج انتي صدك مستحين انتي اهلج من انطوج خبز ما انطوج تربيه بعدها السنه

مال حماج ما عبرت وانتي رايحه تحفين وتعدلين روحج راح تموتين باجر الكعده مال الصلح

حتى تلحكين شوفيلج واحد

رجعت منتهى تكول ترى عيب عليج احترمي الميت لا تحترمينه النه كولي اكو اثنين ماتوا

من هذا البيت

ضحكت كتلها شوف منو يحجي اكلج منتهى جان استحيتي انتي من رحتي زوجتي حماج

والسنه الي تحجين بيها بعدها ما عبرت وانتي ست قمر عيب تكولين شوفيلج واحد

واني متربايه أكثر منج

كبت العيطه قمر تحجي ومنتهى واني هم اصيح عليهن واجتي عمتي من عرفت رايحه

للصالون كامت تعد وصف وياهن وصارت هوسه ما ألها أول ولا آخر

دخل فرقد وكام يصيح علينه على أنتن متستحن وصوتجن واصل لشارع وتربيه ما عدجن

وعمتي كامت صيح على فرقد على انت متستحي وشلون ماخذ دارين للصالون وما احترمت

عمتها ولا حماها الميت وانت شنو خركه بيدها شتأمر ست دارين تنفذ شبيك ميت عليها

كاللها - اني اخذتها للصالون هي متريد بس اني جبرتها لأن باجر أعقد عليها شنو كفرت

والمات  الله يرحمه شنو نموت ورا

هو كال هيجي لو الامه نكلبت عمتي كامت تغلط وتفشر عليه وعلى فرقد وكلمه منها على

كلمه منه وعمتي كامت تدعي على فرقد وتكله أن شاء الله تلكاها بعافية ابنك وما اشوف

الراحه بعينك

وهو كام يصيح عليه على اصعدي فوك شعندج واكفه أخذت منه بروقي وصعدت أركض

وهو بقى يغلط ويصيح عليهن بس اسمع عمتي ترد الباقيات وين راحن ما اعرف

صعد عيونه تجدح نار أخذ ملابس وطلع بدلت لابني واني هم بدلت وظليت كاعده انتظر يرجع

فرقد ماكو ما رجع وبارق جوعان كلت اني عليمن خايفه انزل أوكل ابني نزلت ماكو أحد

شافني فرقد صاح شنزلج

كتله بروقي جوعان

ما حجى شي وكلت ابني واني اكلت وأسمع عمتي بعدها تدردم أخذت ابني صعدت فوك

بغرفتي  نيمت ابني واني بقيت أتنظر فرقد ما اجى نمت وكعدت ثاني يوم على الهوسه

الجوه ذكرت اليوم الكعده ويجن الحبيبات بروقي بعده نايم غسلت وبدلت حطيت مكياج

خفيف نزلت والمطبخ هوسه من كرايبهم وحتى حوراء موجوده سلمت بيهن الي جاوبن وبيهن

لا وكفت يم حوراء حجت خالتهم

كالت - عيني مرة فرقد ترى عيب مكيجه ونازله احترمي عدكم حزن شنو فرقد من تالي وكت

صاير ميكدر يحجي

ما جاوبت عفتهن  يحجن محتركات اجتي بنت عمته كالت ابنج فوك يبجي صعدت جبته واجيت

كالت حوراء اجى السيد لبسي عبايه وروحي للغرفه لبست عباية حوراء ودخلت للغرفه

وبروقي على كتفي أخذ مني فرقد بس عيونه بكصته

كعدنه و الموجودين  السيد وأبو كرار واحد من كرايبهم ما اعرفه وبده السيد بالعقد وكمل العقد
باركولنه وهمه طلعوا راحوا بالاستقبال واني رجعت للمطبخ واني اساعدهم بالمطبخ ودي

وجيبي ومحد عاجبه والثلاثي يذبن سمهن عليه ويحرضن النسوان كرايبهم عليه

والحجي عليه واني أسكت بيه حوراء على اسكتي ترى يريدنج تحجين حتى فرقد

يرزلج كدام الكل واني كوه ساكته سمعت فرقد يصيح بأسمي رحتله يريد ينطيني بارق

وبلشت عمته شلون مرتك المكياج تارس وجهه ومتستحي وانت المفروض منك تفهمها

مو تسكت عليها

وعمتي ترد عليها عيني اليوم هو عاقد عليها خاف تزعل وهو ميتحمل زعلها ورا ليل وين يروح

وهو تخبل عليه كام يحجي عليه كدامهم وحصلت رزاله ناشفه

وتقرب عليه وأخذت منه بارق  وكال   روحي مسحي المكياج بسرعه

راح هو على ضيوفه شويه وسمعنه أنه طارق اجى وبعد ما علت الأصوات بالاستقبال بين طارق

وفرقد ودخلت الناس الجايه وعمامهم صالحوهم بس

فرقد كال - اني ما عندي شي ويا بعد بس لساني ما يخاطب لسانه ونبقى ولد عم بالأسم وبس

راح طارق وأبو واخو والناس الباقيه بقت تغدت وراحت بقوا بس من ولد عماتهم يم فرقد

واثنين من عماتهم يمنه واني ويا حوراء والثلاثي بالمطبخ نغسل ونعزل وأبني يبجي يمي

وهو كوه يخطي عفت الشغل لو تخبلن على انتي كل ساع عايفه الشغل علينه

كتلهن عفيه ترى ابني يبجي واني وياجن من الصبح

بس ويامن تحجي ويسمع انطيت ابني حليب ورجعت وياهن وهو من البجي تعب ونام

بين ما خلصنه شغل صار المغرب ورجعنه للعشى اشتغل وياهن وكعد ابني ويبجي انطي ياكل

وأرجع أكمل صبوا  العشى لو قمر تخبلت ما أدري شبيها فاتت من يمي وتغلط واني منا

تعبانه ردتها حجه وانهديت بيها وصوتي عالي اجى فرقد ضربني وغلط عليه كدامهن

وكال - اصعدي فوك وبعد ما اريد اشوف وجهج جوه

صعدت ابجي وأبني يبجي ما أدري أسكت ابني لو أسكت روحي دخلت لغرفتي واني انعل

الساعه السوده الي رجعت بيها هنا هم مشاكل ورجع هو نفس اسلوبه مال الضرب والغلط

أخذت ابني على حمام غسلتله ورجعت للغرفه ندكت الباب دخلت حوراء وظلت تحجي عليه

وتكول - انتي تبقين غبره ولج اسكتي متعرفين سكتين هسه هيجي زين

كتلها - هو فرقد يتغير رجع نفس الشي

كالت - كومي سبحي وحضري نفسج ولا شمتين أحد بيكم   احجي ويا بهدوء مو بصوت عالي

ترى ما تاخذين لا حق ولا باطل منه بصوتج العالي أخذت بارق ونزلت

اني هم رحت سبحت بعد يوم متعب رجعت للغرفه لبست خفيف وحطيت مكياج كملت

كلت اذا أنزل ويشوفوني يسون مشكله خلي اكعد بالغرفه واسكت

من الانتظار نمت كعدت وفرقد يكعد بيه

ويكول - نايمه وابنج مات بجي كومي

كعدت أخذت ابني واسكت بي وهو يباوع عليه ويهز براسه

كتله - خير شكو 

كال - بس اريد اعرف انتي متعوفين اسلوبج الهمجي مال الغلط

كتله - بس كلي شسويت من الصبح لليل واني كلها تغلط عليه واني أعبر اسوي روحي 

ما سمعت واشتغل ساكته بس كلي شسوي احرك روحي

كال وانتي من نازله مكيجه وانتي تعرفين هم يردون زله عليج ليش سوين هيجي وخليتي

الكل تكول فرقد ما يكدرلها وما محترمه حزنهم لج البارحه من كلتي اريد أروح للصالون ما

حجيت شي ومن رجعتي من الصالون شفتي شصار واليوم اي احترام ما خليتي ألي

كتله - وهذا الهامك مو هامك من يغلطون عليه وانت من تغلط وتضرب كدامهن وماكو الي

اي احترام شتكول

كال - مال اغلط واضرب بدون سبب مو صوتج بنص الإستقبال ولد عمتي كاعدين شتردين 

اسوي يعني والي يغلط عليج اتحملي وانتي تدرين قمر اطلكت بسببج شتردين يسون

يحطوج على روسهم

كتله واني دموعي تجري - اتحمل بس كلي بربك شتحمل

انت من تحجي اني مو اتحمل

اني من اتوسل بيك مو اتحمل

اني من أي كلمه تكولها واني أنفذ مو اتحمل

اني من أشتاق الك وانت مو يمي مو اتحمل

اني من اتمنى تكون ويايه وانت مو يمي مو اتحمل

شتريد اتحمل بس كلي

كال  - انتي أويلي انتي والله محد كاسر ظهري غيرج محد مخليني اتحمل بس انتي

أروح فدوه لدموعج كافي هذا الحب كله بكلبج وما تحسسيني بي أويلي على هذا الحب

واروح فدوه لكلبج حبي

ضحكت كال أروح فدوه لليضحك بس بروقي ما بي نومه ترى أبو بروقي يطالب بحقوقه

ويطالب بشوط إضافي

كتله - كعد المغرب ئيس حبيبي

كال ولا تخافين شوكت ما ينام اني حاضر

ظل فرقد ويا بارق يريد بارق ينام ماكو صارت الساعه ب 2 نام فرقد من التعب واني وبروقي

الفجر يلا نمنه 

يارين - من شفت هشام نايم بالثلاجه بعد ما حسيت بشي من وعيت الكانوله بيدي وعمار

واكف فوك راسي حسيت على حجم المصيبه الي اني بيها والطفل الي راح وما اله ذنب

وامي شلون راح تستقبل الخبر أكيد راح تنهار وهي روحها من الدنيه جهال معتز وهم يحبوها

ما ينامون إلا  بحضنها  خلص المغذي بس العجيبه دموع ماكو أحس حتى دموعي نشفت

ما اعرف شلون راح اكول لأمي كومني عمار

كال - أمشي للبيت هسه لأن محد ينطي الجثه

كتله - شنو سبب الوفاة عمار

كال - مبدئيآ سبب الوفاة مخدري وماخذين اعضاء من جسمه

هنا حسيت الدنيا شكد حقيره ويانه يعني ليش الفقير والما عنده أحد حتى بالموت يموت أبشع

موته ليش دنيا تلطش بينه اي شي الناس اسوي ألنه لازم ندفع ثمنه غالي

من عمار إلى ماهر شوكت نرتاح ومنحس بهم بعد من سوء حضنه حتى جهال معتز ما سلمنه

عليهم

هاي الأفكار الي جانت دور براسي طول الطريق من رجعني عمار للبيت وصلت وباب البيت

شفت ماهر واكف

من نزلت من سيارة عمار وشافني ماهر لو تخبل 

يتبع

حبيباتي رجعت وياكم وأن شاء الله ما أقصر وياكم
والنشر بين يوم ويوم
وأحب أشكر كل الي علقوا وتعليقاتهم الحلوه الي تنور صفحتي بالواتباد
واختاريت أكثر تعليقات عجبتني اول تعليق فديت حبيبة عمري الي تعلمنه الإجرام 



والتعليق الثاني  حبي اني الي ابوس ايدج العفو وان شاء الله أكملها



دمتم في آمان الله وحفظه

تصويتكم يسعدني