.
.
فترة صعبة وتاخذ من الروح
غيرتي على الطفل الي ببطني كأنو اعرف راح افقدة
احجي ويا عبالك فعلا اكو شخص كدامي
شمة راحت لبغداد اخذتها غلا لمستشفى أهلية الها بيها شراكة من زمن ابوها فحوصات كاملة عدها تكيس بالمبايض
مو مشكلة صعبة بإستخدام الأدوية والمداومة عليهن تنحل بس مرحلتها شوية صعبة ورجعت ميتة قهر وتبجي حتى بيبي الي ماتواطنها بعيشة الله كعدت تصبرها وتهون عليها بنفس اليوم وداها قصي يم أهلها ترتاح
خلة موبايلة ع الكاونتر وطلع
دخلت ع مكالمة الطوارئ سجلت رقم ماما خابرتها
تقريباً 7 مرات أو أكثر ماردت
رجعت الموبايل لمكانة
رحت ورة البيت أريد اكعد وحدي
بقيت نص ساعة هناك كعدت بالثيل وآخذ انفاس عميقة
هسة اني بنص شهر السادس اذا أولد بالسابع مابقة إلا أيام قليلة رجعت للبيت
جهزت عشة وعمة دعاء وياي أني اسوي خفايف وهي واكفة ع الطباخ تكلي
دك آصف هورن راح مصطفى فتحلة الباب
دخل السيارة بالكراج ومصطفى رجع يلعب طوبة
نزل يمشي برهاوة ماخذ راحتة يفر بسويج سيارتة مسلطن والجگارة متوكع من حلگة
اجة للمطبخ باس راس عمة واني عبالك هوة بالمطبخ
أو شي مينشاف حتى مباوعلي
صبينة عشة البنات نقلن المواعين بقيت اني ومصطفى سوةتعشينة وفاطمة غسلت المواعين ، سويت جاي
باجر سفر حلا للبنان علمود رجلها
فتحضر ملابسها واحتياجاتها
يرحون وياها عمة دعاء وآصف
بالليل صعدت لغرفتي
دخل آصف يرفع بشعرة نزل جنطة السفر من ع الكنتور بوجهة للحمام من طلع حاجاني
آصف.جهزيلي الجنطة
حور.ماشي
نزلت من فراشي رحت فتحت الكنتور
كعد هو ع السرير واني اسمع شيريد اطبگة واحطة بالجنطة ترستها ملابس وعطور مكينتة ومحفضتة ، بعدين فتح القاصة طلع ضبات فلوس خلاهن بالجنطة
اجة حضني ونومني على أيدة درت وجهي عنة لزك راسة بشعري وحضني حيل حاولت اوخرة ماقبل
الفجر ساعة خمسة صليت ونزلت احضرلهم ريوك
كعدو كولهم حتى فاطمة وقصي وبيبي
بدت عمة توصينة اني وفاطمة ع البيت بغيابها
طلعو يوصلهم قصي يم الباب فاطمة تبجي
يبقون هناك عشر أيام وبيبي تدعيلهم ورافعة شيلتها تطلب من رب العالمين ترجع حلا مثل قبل وأحسن
ودعناهم طلعو من البيت واني رجعت انام
كعدت ثاني يوم ساعة 9
غسلت ونزلت شمة راجعة للبيت وكدورتها ع النار طابخة
كعدت صفاوي وتريكنة سوة
جانت ايام هادئة وحلوة شمة ساكتة حلا مو هنا وهم تخاف من بيبي فاطمة
نخابرهم يومية نطمن عليهم
وآصف فرحنة بخبر حلا عمليتها ناجحة وكولشي تمام
اقلها راح يخف اللوم عني وبلكي ترجع وياية نفس قبل
يوم 25/3/2015 رجعو من السفر
حلا ع كرسي متحرك لازم متوكف ع رجلها الا بعد 7 أيام
بنفس اليوم اجت شمة جابوهم من المطار
دخلو للبيت وبيبي فاطمة طشت ع حلا جوكليت وتبوس بيها وفاطمة تبجي اني بقيت بمكاني بس الله يشهد فرحانتلها بس ماتقدمت بإتجاها خطوة لأن لا أني انسة ولا همة ينسون الصار بينة احنة الثنين موقليل
جهزنة الغدة اني وشمة وغلا
صارت الساعة 12 صبينة ودخلنا للديوان
بس لمن دخلت كلت السلام عليكم ماحجيت أكثر
جنت لابسة دشداشة مخصرة اسود نص ردان
وشعري حاطتلة بوند احمر صح قصير بس لايكلي
رجعت للمطبخ وهمة راحو يتغدون هواية اشياء تصلحت جان لازم يرجعون وياينة اني ومصطفى مثل قبل
بس الحقد يعمي العيون ويموت الگلب فيصير الأنسان آلة متحكمها المشاعر يمشيها الشر ويبرمج عقلهم وأجسامهم
تصير الأذية والكره طابع فطري عبالك معجون وي طينتهم وهذا الشفتة صار بيهم
بقينة للعصر كاعدين كل شوية جاي ماي
عماتي كولهن وجهالهن وخوات عمة والبيت هوسة
والبنات من يسمعن ويغلسن واني الطايحة بيها
لحد الليل الا فضت شوية ارتاحينة
خوات عمة راحن وعمة سوزان هم راحت
شوية خفت الهوسة واني يمكن شربت شريط كامل حب وجع راس من الصبح لسة متت
ورة العشة طلعو الجنط ينطون الهدايا الجايبيها وياهم
اني ومصطفى كاعدين بالحديقة
اجة سجاد ابن عمة رضاب يصيح راح يوزعون الهدايا
مصطفى كيف وراد يكوم لزمتة
مصطفى.عوفيني خل اشوف هديتي
حور.متروح ابد متأكدة مجايبين النة
عاند الا يروح عصبت علي ولزمتة من اذاناتة سكت بس زاعلني وراح كعد وحدة ، اجت سبأ كالت يردون جاي
رحت للمطبخ ومصطفى اجة وراية
دخلت عمة دعاء للمطبخ انطت علاكة لمصطفى وعلاكة الي مصطفى رفعلي حاجبة وباس عمة
حور.شكراً عمة
دعاء.الشكر لله
عافتنة وطلعت مصطفى يكمز فتح العلاكة
عطر وقميص وبنطرون وساعة
علاكتي مفتحتها عفتها اصعد وأشوف شبيها
جهزت الجاي ووديتة يم شمة هي تصب
كول واحد يمة علاكتين حتى عماتي
يعني الهدية مالتي ومال مصطفى بس من عمة آصف مجايب النة شي
أخذت العلاكة وصعدت للغرفة سبحت وبدلت لبست تراك
وأخذت علاكة عمة اشوف شبيها
علبة مكياج وعطر وتراك وبنطرون اسود
بعدني فاتحة العلاكة دخل آصف وراية الضاهر منتضرني شوكت اصعد حتى يجي
آصف.حضريلي ملابس جيبيهن وراي للحمام
حتى معرف يسلم الدارس المثقف حضرتلة ملابس ودزيتهن
طلع لابس بس البجامة ينشف بشعرة
حط عطر ومشط باوعلي
آصف.حضري ملابسج باجر نروح لبغداد
مابقة شي للشهر السابع كم يوم هناك توليدن أحسن
حتى غلا تهتم بيج لأن انتي مريضة خاف تجيج النوبة وانتي تولدين بسبب الألم ويغمى عليج وانتي أصلاً وضعج مو زين متتحملين
حور .اني اريد هنا أولد يم عمة وبيبي
ماروح لبغداد
آصف.مو بكيفج
حور.لا بكيفي
آصف.انتي الخسرانة ردت أجيبلج امج
صدكت راح يجيبلي ماما لمعن عيوني بلهفة
رحت يمة وعيني بعينة
حور.صدوك آصف اشوف ماماا
آصف.اي
حور.اي لعد أروح اهم شي اشوفها شكراً
آصف.عفو
يلا طفي الضوة أريد انام ولطلعين صوت
حور.اي رايحة اني يم مصطفى
آصف.رجعي ماكو طلعة
حور.ماشي
رحت تمددت وافكر راح التقي بماما واحضنها بقوتي
وتشوف الطفل وتشيلة سعادة قوية غمرتني
الصبح اول مكعدت غسلت ونزلت سويتلهم ريوك بعدين طلعت ع الحديقة نضفتها وراها البيت
كعد آصف سويتلة ريوك وصعدت أحضر ملابسي
أخذت وياية صورة بابا اكيد ماما معدها صورتة وتشتاقلة
ضميتها بالجنطة وحطيتها ورة الباب فكرت بمصطفى لازم آخذة وياية يشوف ماما نزلت الآصف
حور.آصف أخذ مصطفى ويانة
آصف.لا يبقة هنا
حور.ليش خلي يشوف ماما
اكيد هو مشتاقلها
آصف.گلت يبقة هنا لتجادلين
غلطت علي بگلبي ورحت
تغدينة وبعد الغدة آصف گال جهزو نفسكم
بيبي فاطمة وعمة دعاء وفاطمة بوسوني
صفاوي بقة يبجي ميريدني أروح
أخير شي قنعتة كوتلة راح اجيب وياية طفل
مصطفى.تجيبينة وياج
حور.اي والله
مصطفى.شوكت
حور.هيج فترة قليلة ويكولك خالو
مصطفى.يلا جيبي بسرعة ورجعي
حور.ماشي
حضنتة حيل بوستة
عمة نطتني جنطة بأيدي
دعاء.هاي الملابس لبسيهن لمن تروحين تجيبين
حور.شكراً
اي وحدة غيري جان راحت وياها
هي لحد الآن ما أذتني يمكن آصف ماقابل تجي وياية
ويمكن بقت علمود حلا الله أعلم
طلعنة البغداد ساعة 2 اني وآصف
وغلا وبنتها بسيارتها
اول مركبت نمت وراسي ع الجامة
حطيت العباية ع وجهي احجب الضوة
اجت عيني ع سيارة غلا لابسة قميص نص ردن
وتوربان حمرة حمرة اضافرها سمائي وطوال لابسة مناضر وتسوق سيارتها
باوعت ع نفسي واستهزائت يقتلونة ويستعمرونة تنبهذل ونصير ناس ثانية تحت مسمى الحب الله يلعنك آصف
آصف.هاج هاي مخدة صغيرة حطيها تأذيج الجامة
حور.الجامة متأذي
آصف.حطيها وبلا فلسفة
اخذتها وحطيتها غمضت عيوني ونمت
كعدني باوعت للساعة الألكترونية 5 ونص
آصف.هاج عصير وكيكة شربي
أخذت العصير شربتة والكيكة مدري وين حطيتها
بقيت كاعدة لحد ما وصلنة للبيت جانت الساعة 7 ونص
صراحة مو بيت فيلا تصميمها فخم وبديع
المنطقة هادئة وراقية
والله اني لو منها ابد ماازوج
فوكاها ذابحة نفسها ع آصف وتباوعلة بلهفة وحب
دخلنة للبيت الحديقة تقريباً 200 متر وبيها مسبح ونافورة مليان والجهة الثانية من الحديقة بيها مراجيح وزحليقات وبيت جبير من لايلون مال أطفال كومة العاب
بعدين دخلنة للداخل ما شاء الله كولش راقي
والأثاث والترتيب وتنسيق الألوان بديع
آصف راح يسبح وهي جهزتلة ملابسة دلتني ع حمام ثاني دخلتلة ماجان يقل عن فخامة البيت واسع وبي بانيو وكابينة صغيرة زجاجية والمرايات ع طول الحمام
سبحت لبست تراك تيشيرتة كودري باف ربع ردن اسود مشطت شعري وهوستة يصير احلة أخذت شوية من حمرتها لكيتها ع رف الحمام
حطيت لخدودي وشفايفي
طلعت من الحمام رجعت للأستقبال البيت هدوء وهمة ماكو شوية وطلع آصف حط موبايلة ع الشحن واشرلي اجي رحت يمة
حور.ها
آصف.تعاي اوديج لغرفتج ارتاحي
حور.ماشي
دخلني لغرفة مؤثثة أثاث كامل
حتى غرفة أخشاب والكنتور فارغ
واضح الفرشة جديدة وحتى البطانية
رحت نمت لأن حيل تعبانة هو طلع
كعدوني الساعة 11 ونص غلا دكت الباب وصاحتني
طلعت من الغرفة جانت واكفة منتضرتني
لابسة فستان بنفسجي صلوخ قصير فوك الركبة بشبر ونص مكياج كامل وشعرها مشسورتة تجنن
بقيت صافنة عليها
غلا.لتصفنين لأن نازعة الأسود ترى اني ماحبة
وحتى ع بابا لبست للأربعين ونزعتة وآصف يدري بية ماحب الأسود فعاذرني
حور.لا اكيد براحتج هالشي يخصج الج
غلا.يلا تعالي آصف جاب عشة
متت جوع مقبل يطلع الا تنامين وترتاحين
أخذتني للمطبخ آصف كاعد ع طاولة خشبية جبيرة
تكفي عشرين شخص وعشاهم بيتزا وكص وكباب ومقبلات
أكلت شوية لأن مستحية ماكدرت أخذ راحتي
والا اني حيل جوعانة آصف أخذ ماعون فارغ
خلة قطعتين بيتزا ولفة كص ومقبلات خلاهن كدامي
تذكرت لمن جان يسويلي اللفات
آصف.يلا اكلي ذني
حور.شبعت
آصف.يلا حور لاتعبيني
أكلت قطعةبيتزا ونص لفة كص وهمة يشربون جاي
كولش شبعت بعدت الماعون عني غلا صبتلي الجاي خلتة يمي ، بتها بجت راحت تجيبها حجيت وية آصف
حور.آصف شوكت اشوف ماما
آصف.مو هسة
حور.شوكت يعني
آصف.يوم الولادة
حور.حيييل هواااي هيج
أريد اشوفها هسة
آصف.لتخليني ابطل وماخليج تشوفينها ابد
حور.لا لا عادي
جنت حيل متقيدة وممرتاحة رجعت للغرفة
واتمنيت أرجع لبيتنة حتى لو هناك يأذوني مرتاحة
اتذكر هاي الأيام ينكسر گلبي علية من عرفت لعبتهم عيشوني بفترة مرهقة ومتعبة
غربوني
ألموني
عيشوني بكذبة
عيشوني بألم
ثاني يوم أخذتني غلا وياها للمستشفى
الصبح اجت للبيت مرية بالأربعين عرفتها مربية لحور
طبعاً الطفلة من شافتها ضحكت وفتحت اديها حتى تروحلها رغم هي متعلقة بأمها غلا حيل حنينة
والمرية واضح عليها هم حبابة وتحب حور
فحوصات كاملة من ساعة ثمانية لحد 11 رجعنة للبيت
أحس نفسي انتهيت صارلي فترة طويلة مطالعة من البيت
وفجائة نطلع ممتعودة
رجعنة للبيت المرية طابخة غدة ومنضفة
صبت غدة وراحت كعدنة نتغدة وآصف ماعرف وين جان
اول مادخل للبيت باوع لغلا بأهتمام
آصف . ها شگالولج ع حور
كامت هية وكفت يمة وباست خدة
غلا.ماكو شي حبيبي
إن شاء الله سهلة وإذا كولش تأذت أو اغمة عليها نولدها عملية قيصرية لتخاف
آصف.شرحتي حالتها بالضبط
غلا.اي وطمنوني برد گلبك
يلا تعال تغدة
كعد يمي مال علية لزم أيدي باس راسي
سحبت أيدي من ايدة وبعدت راسي
تنهد وكعد عدل غلا تباوع علينة
كملت اكل رحت للغرفة اجة نام يمي وحضني
يجر حسرات ويباوعلي حضني حركت جسمي بقوة حتى ابعدة عني كرصني بزندي حييل هدأت
آصف.لتصيرين حيوانة
غمضت عيوني حتى مااشوفة دارني علي باس رگبتي
عقجت وجهي ابتعد درت وجهي ونمت
الساعة 2 تذكرت مشاربة دوة مالتي
أخذت الشريط وطلعت للمطبخ شربت مي ودا أرجع
شفت باب غرفة مفتوح
يم غرفة غلا مباشرتاً لمحت بي نفس السرير الي اشترو للطفل توجهت بخطواتي للغرفة فتحتها نفس السرير
اكو كنتور صغير لون نيلي وحليبي والغرفة بلون أزرق مال اطفال فتحت الكنتور ونفس الجهاز الي اشترو وراوتة النة غلا
رحت للغرفة بعصبية دفرت الباب فز آصف
حجيت بعصبية واحس شرار يطلع من عيوني
حور.ملابس ابنيي وسريرة شيسون هنااااا
آصف.لج شبيييج
حور.جاوبني بسرررعة
طلعت غلا نعسانة لزمني من زندي وجرني للغرفة
أحس اصابعة نبتت بأيدي قفل الباب بوجه غلا
هي دكت الباب وحجت
غلا.شكو
آصف.روووحي منا
اندارلي يحجي وياي
آصف.غبييية زماالة غير علمود الطفل من ينولد وين ينام شيلبس عقلج وين ؟؟
حور.غير نرجع لبيتنة شي مو معقول شكو جايبين سرير وكنتور لأبني
آصف.هذا كنتور حور خلينة بي ملابس الطفل
تقربت يمة وابجي
حور.والله گلبي ممطمن والله خايفة
آصف لو تشوف گلبي شبي جان رحمت حالي
الله يخليك لتفجعني وتكسر گلبي شمخلي بالك احجيلي
مهدلي احجي لتخليني مثل المخبلة المافاهمة شي
آصف ارحم ضعفي ووحدتي والله ماعندي طاقة
آصف.عقلج هواي جاي يصورلج ينرادلج طبيب نفسي
كعدت بالكاع وابجي ممصدگتهم
راح هو للفراش واحس جمرة وكعت ع گلبي
حطيت أيدي ع بطني وامسد عليها
حور.حباب ماما اذا اخذوك من عندي ابقة ابجي لتسكت
أبجي أبجي حتى يرجعوك الي والله اني أكثر وحدة تحبك
لتقبل تشرب حليب ماشي ماما وهاي غلا معدها حليب بصدرها فيرجعوك يمي والله اموت بدونك
وأني هم راح ابقة ابجي حتى يرجعوك الي بس اني ميهتمون بية وبدموعي انتة لا يخافون عليك
آصف.كاااافي خبال ابنج الج منو ياخذة
غلا تربي ابنج لو تربي بتها المريضة تحتار بيمن
شوية قنعني كلامة هي اليوم خلت بتها يم مربية
وبتها مريضة عدها فتحات بالقلب ومحتارة بيها
شتسوي بأبني قابل
مسحت دموعي ورجعت لمكاني
حور.متاخذون ابني
آصف.لا
shthra
دخلو لصفحتي وضيفو قصة (مجنونتي نيار )
وتفاعلو وياها 💜😍
يتبع............