نيران قلبي
بقلم هدى
البارت السابع والعشرون
---------
شمم ..
- هاا ؟!
- كومي اكو اشخاص منتضريج
- ماليش اذا يخطبوني كللهم متزوجه
- تأدبي لا افكس عيونج
- لا والله غير تكلي منو همه
- غسلي وتعاي للهول
- تمام
كمت من مكاني غسلت ودخلت للهول اتفاجأت بوجود ثنين زلم ويمهم اهلي وعمي
- السلام عليكم
ردوا السلام وكام واحد منهم اجه يمي
كلش يشبه تمار عقلي بقة يضرب اخماس بأسداس
- انتي شمم؟
- ايـي!
- هههههه اني خالج منتضر
- صدگ !!!
- اي ، ولج شكد كبرانه عفتج عمرج شهر هسة متزوجه
جاوبه اسير
- وحامل هم
- اي لاعبين لعب بغيابي شنهاي عمي
باسني من راسي وحضني
انتبهت لأسير عيونه صارت بكصته...
حچه خالي الثاني
- دعوفهة خل تجي يمي
- هسة اني لازمهة ماتروحين يابه لا يلوحنه طشار
رحت سلمت عليهم وكعدت
- شوكت اجيتوا اشو مادري
- صارلنه يومين هنا بس محد كالج
- اهاا الحمدلله ؏ السلامه ، لعد وين خوالي اسعد وسرمد
- عد خالتج ام ايلاف...
بقيت كاعده اسولف وياهم كلش يونسون وخاصتا منتضر
يحجي اجنبي احنه نبقه صافنين ويضحك علينه لو يحجون بالالغاز هو وامير...
شكد كلنالهم ابقوا للعشه ماقبلوا
كلت لماما اريد اروح وياكم
- ليش صاير شي؟
- لاا بس اغير جو والله مختنكه
- اي تعاي بس شوفي رجلللج
- اممم عود اكله
- شمم صيري عاقله بعد كم شهر تصيرين ام وانتي بنص عقل
- يا ماما شكلت اني
- روحي كليله بسرعه خل نمشي
- اوكِ
- احمم اسيرر
- عيوني؟
- ااا اريد اروح وين اهلي هنا خنكه
اخذله صفنه وكال
- ايي شكو بيها واني اروح وياج
- هاا؟
- روحي بدلي وتعاي
- ماشي ، رحت للاستقبال جريت جبه من الي يمي وطلعت
- ها يلا امشي
- وين اهلي؟
- راحو
طلعنه بالسياره واسير كل الطريق يضحك واني معبسه
- شمم
- ها
- فكيها عاد
- شنو هي
- سلامتج
- والله مو بأيدي كلما اضحك اتذكر بابا واحس نفسي مذنبه
- مايصير هيج ياشمم كلنا حنموت والموت حق
- اترجاك قدر وضعي
- براحتج
- امشي سريع صارلنه ساعه ماواصلين
- مو زين عليج السرعه
- ههف
وكف يم محل حلويات جاب علاكه ومشة
طبينه لبيت اهلي المغرب
- شسالفه وين جنتوا
- اسير يمشي بطيء خايف ؏ ابنه
- هههه مبين خايف على ابنه مو عليج
- مامااا
- فوتي يمه وين رجلج
- شمدريني يمكن بالسياره ، اكلج رنيم ليش ماتجي اشو كلش كطعت
- باجر تجي البيت مابي احد والمسؤوليه عليهة خطيه
- اهاا
اجه اسير
- شعندج واكفه ماتفوتين
جاوبته امي
- غير منتضرتك كالت ما افوت الا يجي
باوعتلها بصدمه وباوعت لأسير شفته مبتسم
رديتله الابتسامه بمجامله
وطبيت بسرعه
- السلام عليكم
- وعليكم السلام
نزعت الجبه والشال ورحت لبيان بالمطبخ جانت تسوي عشة هي وليال
- هلو
- هلا شعندج هنا
- جايه لبيت اهلي
- لا قصدي شعندج بالمطبخ انتي مريضه
- لا بالله وانتي مو مريضه ماتنجبين
- طلعي حبابه لا توكعين
- لا انتي طلعي تعبتي
- ماتعبت شمسويه اني واتعب
تدخلت ليال وگالت بملل
- اهووو تتعازمن عالطلعه يابه طلعن ثنينجن واني اكمل
دفعتنه من المطبخ وسدت الباب
- ولج شتعرفين تسوين انتي خل نجي وياج
- ماعليج هسة تجي ماما
عفناهة وكعدنه يمهم
وره العشة تجمعنه وخلصوهة شقة وضحك شويه كدرت اغير جو
واتمنيت بابا ويانه...
- يلا شمم ترحين؟
- لا خليني
گال بنتر
- بررااااحتج ، شوكت اجيج؟
- بكيفك
- باجر اني بالدوام اذا رجعت بالليل اخذج
- اوكِ
وكف وكال
- اني رايح تصبحون على خير...
بعد ما راح اني نعست ورحت انام
توني دا اغفه وصلتني رساله من اسير
مكتوب بيها..
شمني وأسرني بين ضلوعك
انهّ وَحدي بين إيدك وروحَك
خذني ليك وضُمني بيك
روحي مشتاگه لاديك
روحي بس يمك تعيش
وگلبي بس يمك يدگ
خذني ليك ولاتكابر
انه وحدي المشتريك
بـ لمسه منك انه اموتن بين ايديك...
وي كل كلمة مكتوبه تنزل دموعي
هذا الشعر كتبناه اني وياه من جنه سوه بي اسمي واسمه
سديته بدون مااجاوب ونمت
الصبح كعدت بالعشره جانت رنيم جايه وديسون غده
- صباح الخير
- صباح النور
- وين اخوالي!!
- ضاجو وطلعو خو ما يبقون بالبيت
- اهاا
كاعدين بالمطبخ واندكت الباب راحت امي تفتح
وطلعوا خوالي اسعد وسرمد جايين
سلمنه عليهم وعلى نسوانهم
مرت اسعد الجبير عراقيه مبينه مسمومه وشايله خشمها
عدهة بنات بكد ليال واصغر وولد جبير باقي هناك مااجه
مرت خالي سرمد فلسطينيه كلش محبوبه اسمها جيهان
اصغر من خالي بهواي بس تحبه
عدهم بس ولد واحد عمره تقريبا 8 سنوات...
رجعنه للمطبخ اني والبنات واجت ورانه جيهان
- بـتحتاجو مساعدة؟
- لا يعمري ارتاحي
- رح ظل عدكن بيجوز تحتاجو اشي
ردت احجي جاوبتها رنيم
- والله دتشوفين هذني كل وحده بطنها للحلك ويموتن عالشغل
- انا فاضيه قعدوا انا بكمل عنكن
- يلا روحن
- تمام
قبل الغده رجعوا خوالي وتمار وعزيز
صارت اللمه تخبل
خابروا اسير كال بالدوام مااكدر اطلع...
كملنه الغده وكعدنه نصولف وي الچاي على كوله امي چاي وچذب
خالي منتضر شرب الجاي وكال
- دايمه انشالله يوم زواج تمار للمره الثانيه
- سالمين خاليي ليش مو انتَ تتزوج صرت شايب
گالت امي
- اي والله ماتحاجي امنيتي ازوجه
- هاي مو يمي خلي فادي يتزوج واني وراه الكبير اولاً
- لازمك اني كايلك انتضرني؟
- هدو يا جماعة الخير مو هيج اتفقنه شبيكم خوالي
- اسكت انتَ
- تدلل ياب
مر الوقت للعصر عزيز ورنيم راحوا
واني اجاني اسير بالليل
- تكدرين تصعدين للغرفه؟
- لا هنا مرتاحه
- اهاا
گلب شعره وكام ينفخ بعصبيه
- باجر راح يجون جماعة ايسر هنا
- اي عادي اني اكعد من وكت
- يجون من الصبح
- شنو عماله؟!!
عرفت قصده يريدني ارجع للغرفه
- هاا لعد شسمهه اني اصعد خاف يجون من وكت
- اي امشي
ساعدني وصعدنه لفوك بدلت دشداشتي بتراكسود وتمددت
قرب اسير يمي سويت روحي نايمه
حضنّي ونام
وره كم يوم رجعوا اخوالي للسويد
ودعناهم ورجعنه
اجة الدوام اسير ماقبل اداوم بس عاندت الا اروح وبيان كذلك
وداومنه اول ايام خلصت طبيعيه بعدين كمنه نتعب وهواي ايام ماداومنه
دخلت بشهر الخامس من الحمل
ورحنه اني وبيان نسوي سونار
اخذنه اسير
اني دخلت قبل بيان
- تعاي نامي هنا
- اي
تمددت والدكتوره حطتلي ماده ؏ بطني
- شكد عمرج انتي
- دخلت بالـ22
- والله عبالي 18 هههههه
باوعت عالجهاز وعكدت حواجبها
- هاا دكتوره شكوو؟!
- هذوله ثنين ديتعاركون ههههه
- شنو
- حامل بتؤام انتي
- والله!
- اي والله بنيه وولد هسة اسمعج النبض
سمعتني دكات كلبهم واني كلبي كام يدك بالدقيقه الف
شعور يجنن دمعت من الفرح
- دكتوره وضعهم شلونه
- كلشي تمام
خلصت الفحص وطلعت لبيان
- هاا؟
- طلعتت حاملل بتؤام ولج
- يااا مبروكك
- الله يبارك بيج شوكت دورج
- فد شويه مابقه شي
- تمام
- لج هسة اسير يطير من الفرحه
- اي
- شبيج
ردت اكول مابيه صاحوا اسمها
- كومي يلا
- ايـي
فاتت بيان وتأخرت واني ايدي على خاف اكو شي كلبي
بعد مرور وقت طلعت وهي تبجي
- خييرر!
- ههههههئ
- هاي بجيه لو ضحكه شسالفه؟
- شمم حامل بولد
- يا لعد شبيج تنوحين
- مو شسمه سمعت نبضه وبجيت
- اوي غير تستقر
- خابري اسير خل نرجع
- انتي خابري
- شمم فكيها عاد
- اهوو
خابرته وبسرعه جاوب
- هااا بشري
- حامل
- ادري حامل شبيج انتي
- اي حامل بـ بت ولد
- تحششين حضرتج
- الله عليك هسة وقت تحشيش
- شو انطيني بيان انتي سالفتج تعبانه
- هاج يريدج
حجت وياه بيان واني لزمتني دوخه كمت مااركز
- يلا امشي حيجينه
- منو
- ابوجج
- شنو !!
من كالت هيج عبالك ذبت عليه تيزاب
- ياا والله مو قصدي بس ضوجتيني طلعت بدون قصد
- امشي
- شمم!
- امشيي كتلج راسي موتني
اخذنه اسير واني الدوخه والم راسي موتني
طول الطريق مغمضه
- بيج شي؟
- لاا
- مبين تعبانه
- شويه
- اها ،.شتردون عشه؟
- اني وصلني للبيت اريد انام
- لا شلون اتعشي وارجعج
- لا لا ارجع هسة احسن
- براحتج
وصل بيان وجاب عشة ورحنه للبيت
كوه مشيت مسافة البيت وصلت للهول وردت اوكع
لزمني اسير
- ااالله ، شبييج
- دايخه كلش
شالني بحركه سريعه وصعدني للغرفه
تمددت عالجربايه
- اسير
- عيونه
- اريد اسمي ابني هاشم
- بسس تمار يريد ابنه هاشم
هزيت راسي وكلت
- براحته
مالي خلك احجي جان كلش بنفسي اذا حامل بولد اسمي هاشم
- اذا تردينه هاشم عادي شعلينه بتمار؟
- لا خلص ماكو فرق بينه هو اسم
- تتعشين؟
- اريد انام
- تعشي اول يمكن نزل ضغطج
لو اكلج خل اجيب الجهاز واشوف ضغطج
راح جاب مال الضغط وسوالياه
- مثل ماتوقعت ، بلا كلام تاكلين
اندكت الباب واجت فناء مرتبه صينيه الاكل الي جبناه
اكلت ونمت
واني نايمه حسيت ايد تتحرك على بطني
فتحت عيوني لكيته اسير
- صح النوم
- ساعه ابيش؟
- بالوحده
- حيللل شكد نمت
- نوم العوافي ، ترجعين تنامين لو كافي؟
- لا شينومني
- كومي بدلي وتعاي نباوع فلم
- ماشي
بدلت ملابسي الي رحت بيهن للدكتوره ونمت بيهن
رجعت لكيته مشغل فلم وحاط حلويات وكرزات
- تعاي
- منين طلعن ذني
- موجودات بالثلاجه من زمان
كعدت يمه وهو يسولفلي عن قصة الفلم عجبني واندمجنه
نضحك وياهم ونضوج وياهم
بعد ساعتين انتهة الفلم وجانت النهاية سعيده
باوعنه بوجه بعض واحنه مبتسمين
- هاا؟
- هاا
- ااا مانعست انتَ
- لا
- ودوامك
- ماكو باجر
- اها اني نعست
- نامي ام قيس
- شنو
- ابني اسمه قيس
- وليش ماادري
- هسة دريتي؟
- ايي، لعد البنيه اسميها شمس
- اختيار حلو
- وانتَ هم ، يعني اختيارك حلو
- فهمت
- تصبح ؏ خير
- انتي الخير
ثاني يوم عمتي
جابت ملابس اطفال لبنت وولد حيل حبيتهن
وماما اجتني العصر شافتني
مرت فتره وخلصنه سنه دراسيه بطلاع الروح
بنهاية الشهر الخامس بيان ولدت
ونور هاشم الدنيه روحي صارت بي
بقت بيان ببيت عمي واني 24 ساعه مكابلة الطفل
حتى من يجي تمار يطردني ومااطلع
لمن حسيت على روحي شلت هاشم من مكانه وطلعت
لاكتني فناء
- يامعزايه وين موديه الولد
- شنو غير ابن اخوي
- لج لا يدفرج ويصيرلج شي لو تدوخين وتوكعينه
- يا شسالفه ترا اعرف اشيله
- طبچ حريشي
- وين انوسي خل اشيله عالواهس
- يايا بلا انتي شكل وحده حامل بتوم وبشهر الثامن هم
- لا تحسديني
- روحي كعدي لتبقين تفترين
- اي
مرن كم يوم الوضع عادي وبيان رجعت وي تمار
المغرب ردت اصعد للغرفه صاحت بيه عمتي
- ولجج چم مره اني ناهيتج من الصعده ماتشوفين بطنج شكبرها شعندج صاعده
- عمه كل غراضي فوك شسوي
- دنزلي ومن يجي اسير ينزلج التردينه
- اي اي
خليتها تعبر من يمي وصعدت للغرفه صليت ونزلت
واني عالدرجات الاخير انلوت رجلي ووكعت
- اخخخ
- يممهه شبييجج
- عمهه وكعتتت
- عزه بعينجج مو كتلج لتصعدين
- اههئ عمه مو وكتهااا حموتت
كومتني هي وفناء للغرفه الجوه وخابرت اسير
دقايق وصار يمنه
- هاا شلون وكعت
- يمهه اكللها...
رادت عمتي تحجي اشرتلها وغيرت الفكره
- اكللها لا تنامين المغرب لا يصيرلج شي ماتسمع الحجايه هسة كعدت حلمانه وحالهة حال
- تحتاجين مستشفى
- لا مابيه شي..
بقيت متمدده بمكاني والالم يروح ويرجع للفجر الالم زاد وبطني موتتني حرت شأسوي بقيت اصيح
- صخام بوجهي خاف عدها ولاده
- يا ولاده يمه بعدها بالثامن ، لبسيهاا شالل بسرعههه
لبستني شال واجت اسير شالني للسياره وطار للمستشفى
اول مادخلنه حطوني بالسديه واجت دكتوره فحصتني كالت عمليه حالا
اشوف اسير انخبص يروح منا ويجي منا
كمل الاجرائات ودخلت للعمليه
قبل لا ادخل لزمت ايد اسير
- اسيرر حموتت انيي
- لااا لاا مابيجج شيي حتطلعين بالسلامه وتربين جهالج
- لا اني حاسه حروح وره بابا
- شيلي الفكره من بالج انتي زينه
- ادعيلي
دخلت لغرفة العمليه بنجوني واني بعدني صاحيه
- شنو اسمج؟
- شمم
- شحتسمين اطفالج
- شمس و قَـ... بعدني ممكمله ورحت لعالم ثاني
كاعده واطفالي بحضني لابسين ابيض شفت بابا جاي من بعيد ومبتسم
رديتله الابتسامه وركضت اله بس اكو حاجز مااكدر اوصل يمه
باوعت لأيده لكيته شايل طفل صغير
باوعلي نضره اخيره واخذ الطفل وراح
بقيت اصيح وراه ومارجع !!!
---
صحيت من البنج لكيت يمي اهلي والوجوه مكلبه
شافتني ماما كعدت اجت يمي مبتسمه
- الحمدلله ؏ سلامتج شموم ، جبتي بنيه ملاك ونازل عالارض
جاوبها تمار
- علكيفج يمه ششفتي منها وصارت ملاك
- شعليك انتَ ماتروح لمرتك باقيه وحدهة
- غير اجيت اشوفكم شمحتاجين وهسة رايح
اسمع حجيهم بس مامركزه وياهم الالم موتني
حچه اسير
- شلون صرتي؟
- زينه وين جهالي
- احم هسة..
اجت عمتي شايله طفله ووكفت يمي
- تكدرين تشيليها؟
- ايـي انطيني
حطتها بحضني شفتها شكد صغيره وتتحرك بين ايديه
- شموسه يروحي
- انطيني خل اشيلها
- اخذها ، وين قيوسي؟
ذكرت قيس وانگلبت الوجوه
- هاا ؟ ابني وين ، ماتحجون!!! اسير ، ماما؟
ابنييييي ويييين
- علكيفج يمه لاتنفتح عمليتج
- ماما شبيكم متجيبون قيس
- ابنج اجه تعبان وصغير لأن قبل وقته وانتي واكعه ؏ بطنج
- ايـي؟
- مات
- للللاااا لاااا حبيييبيييي ولييدديي جيبوووو
- ولجج عمليتتجج لتتننفتحح
- خليهااا تنفتحح عسانني اموتتت ، جيبوللييي ابننيي
والله ححسييتت حيموتت حلمتتت ببااباا اخذه وياههه
صاحوا الممرضه حطتلي مهدأ بالمغذي ونمت واني مقهوره
بعد مرور وقت كعدت واول ماذكرت ابني مات كمت اصيح وهم ضربوني مهدأ
بقيت ؏ هالحاله يومين كلما اكعد ينطوني دوه حتى مااسوي شي وينفتح الخياط
باليوم الثالث طلعوني من المستشفى وبقيت ببيت عمي لأن بيان يم اهلي وتصير هوسة
اول ماكعدت جريت الجنطه الي يمي لكيت بيها ملابس طفل اخذتهن وبقيت اشم بيهن واشهك كوه عمتي جرتهن مني....
حالتي النفسيه صارت زفت مااكل ولا اسوي شي
تجيني اوقات اعيط من الالم والقهر
حتى بنتي مارضعتها وباقيه لو عد عمتي لو فناء
مر اسبوع واني على هالحال وبيوم اجتني ماما رزلتني
- انتيي شنووو بحياتيي ماشايفهه مهمله مثلجج لج شوكت تعقلينن وتنتبهين لبيتج لشوكت ابقه اعلم بيج وانصحح راسج بي عقل لو حجارر هااا؟
لج كافي انتي ماشايفته للطفل وهسة هو طثر بالجنه وانتي كاتله نفسج عليه
هامله روحج وبنتج ورجلج
حتى البت شوفيها ماتقبل تشرب الممه
- ماما
- لا مااماا ولاا لطام كومي كدامي هسة تسبحين وتصحصحين وتجين لبنتج كافي دلع
جرتني للحمام سبحت وطلعت
وحطت شمس بحضني
من شفتها حسيت بالذنب لأن هملتها وصحيت ؏ نفسي
قربتها يمي وكلت
- سامحيني يروح امج مااعتنيت بيج
اخوج عافني بس انتي ماعوفيني
رضعتها ونامت ماما راحت واجه اسير شافني حاطتها بحضني ابتسم
- ها شلونكم
- زينين
- دومم انشالله
كعدت شمس بالليل تبجي كلت لأسير
- اطلع اريد ارضعها
- اي رضعيها عادي
- لا مااكدر
- اغمض عيوني
- لااا
- زين راح ادير وجهي من تكملين كولي
- اوكِ
دار وجهة وبقه يحسب
- واحد ، اثنين ، خمسه ، سبعه ثمانيه، تسعه،
تسعه وربع، تسع وثلث، تسعة ونص
دار وجهة وگال
- ماخلصتيي؟!
- اسسيييررر
-----
ثاني يوم اجت امي الي العصر ووياهة ليال ورنيم
- يمه فدوه شهالجمال تتربه بعزكم
- يوم الالج وتجيبين دزرن
- يا شلي بيهم 2 كافي
- ها ولج خاف حامل وخايفه نحسدج
- يا وين يحضي غير لو اكو انتي اول وحده تعرف
- اممم خوش
رفعت راسي لأمي الي گالت
- اكلج ليال راح تبقه يمج شكم يوم تساعدج
- ماكو داعي عمتي وفناء يساعدني
- مو دوم يايمه البت هم تمل اختج موجوده وتساعدج
- وين تبقه يمه هنا ولد
- ماعليهة شي تنام بغرفة البنات والصبح وياج قابل شكو
- خوش خليها
راحن وبقت ليال يمي ومرن كم يوم هي وياي
ساعدتني بكلشي واني رجعت لغرفتي بعد ماجنت بغرفة عمي وعمتي...
- لولو حبابه نزلي للمطبخ دفي مي لشموسه خلص مايهة
- تمام
راحت ليال وتاخرت جوه واني كاعده ابدل لشموسه دخلت ليال معصبه
ووجهة احمر
يتبع...
ها ههلو شلونكم
رأيكم؟
توقعاتكم؟
لتنسون التصويت 🌟
ورجعوا اقروا الشعر مال اسير وشمم ترا حلو 🌚😂
احبنكم 💕❕