سلام عليكم
اسفة امس مانشرت جنت طالعة من البيت
البارت 14
لم اسمح لآهاتي تنطلق الا عندما شعرت بأحساس الأم..الذي لا شعور بعده لا حب لا غرام..
هو شعور صادق ثابت لا تغيره الأيام...
حتى بعد اللحد وألم الفقدان...
يبقه شعور الأم الأصدق...👌
كتله بخوف جلال بتنه ماتت وتخفي عني ماتردون اشوفها مو هيج...وسكت وعيونه دمعت..وكالي بويه كولي يالله...
ردت اطلق صرخة لزم حلكي حيل ودفن وجهي بصدره خنكني حتى لا اصرخ..وكال غزل يابه بطنج..هذا امر الله والعوض عليه....
مابيه حيل ابجي واصرخ وبطني تموتني..بس ظليت ابجي ودموعي جمر..لا يالله رحمتك بيه تعبت وتالي حتى ريحتها ماشمها...
وخرت جلال عني احاول اوخره عني واريد يترك حلكي ودموعي اطيح على ايده..كال لا تصرخين غزل امر الله هاي ماكاتبها النه...
وامي وام جلال يبجون بصوت ليش ما مسموحلي ابجي وياهم..لازم حلكي خايف لا اصرخ يخافون على بطني...
ودموعي تنزل مو يكولون الي كلبها مفجوع بظناها ماتنزل دموعها بس تنوح هسة انه مامسموحلي انوح وظلت تطلع نوحاتي على شكل دموع...
امي اجت وكلتله اوليدي عوفها خلي تبجي عليها عالأقل تحجي وهي خانكتها دموعها وعبرتها..كال غزل عمري طير بالجنه لا تجزعين عليها...وخر ايده عني....
وبس وخر كتله بدموع وتعب عفية اشوفها واشمها الله عليكم..دفنتوها لو وينها جيبوها اريد اشوفها...
جلال كال بحزن:بويه الله يرحمها ماريدج تشوفينها تتعلقين بيها..وتعبج واجرج مايروح ويم ربج..وصبري الصبر جميل
كتله بعتب:ماسامحك والله ماسامحك ماخليتني اشوفها..وحجيت هيج من حزني وفجعتي بيها..وظليت ابجي بصوت خافت وامي هنوب لزمت حلكي....
نفس الشي لزمو بطني لو حلكي لو لساني روحي كلها تنتفض وتنفسي يعله ويهبط بعنف..اريد الطم صدري عليها بس اريد اشوفها.......
طلع جلال وعيوني تباوعلي بكسرة وكلبي مفجوع..واجت كعدت بصفي عمتي وكالت يمه الله يصبرج..وباست راسي..ولا كلمات الدنيا تجبر بخاطري ولا تنسيني فجعتي...
وامي حاظنتني وتبوس بيه وتمسح دموعها ودموعي وتهدي بيه...اجت اخت جلال هم كامت تبجي من شافتنه نبجي ويهدون بيه يمكن عرفت انه عرفت......
وكالت اصيح لدكتورة تشوفها..وطلعت وانه ابجي بصوت خافت مكدر اطلعها بجيتي وحسراتي بطني تموتني ألم......موقف ولا انساه اتذكره تفصيل تفصيل خذت روحي ولجمت كلبي للموت.......
جبر....
جنت صافن نايم بالطوارئ وماكو احد وياي ومانتبهت لجيتها وشوي وباوعت الها بالباب واشرتلها تجي..لأن صوتي مو بذاك القوة مابيه حيل...
واجتني بسرعة وطاحت عليه وحظنتني وكامت تبوس بجتفي وتردد اسفة زعلتك جبر..والله ولا ازعلك بعد بس لا تسوي بيه هيج مرة ثانية...
رفعت ايديه وحطيتهن على ظهرها الي حنته عليه وحطت راسها على صدري..بعد ماباست جتفي ماعرف مو وقت احسبهن عود بعدين....
كتلها بتعب سلطانة خايفة عليه..هاي انتي لو من غبت فرمتوج...وضحكت وتألمت واكح وهنوب صدري متنك...
اخخ هسة وكت الجكارة اجت براسي...صار اسبوع مامدخن...
سلطانة كالت بدموع:جبر اسفة زعلتك اسفة حيل والله متت خوف عليك خفت يكتلوك وماشوفك بعد..خوما اذوك كسرولك شي..وكامت تتفحص صدري وايديه....
وانه لازم ابتسامتي..ومشتاقلها مووت... اشتعل مهيمن شو صايرات حمر الخدود من اللطم عليه لو شنو..مابيه حيل ارفع نفسي وابوسها بهالخدود....
سلطانة بدموع:شيأذيك وين..سودة عليه..ضربوك عسه ايدهم كسر كون ومايكومون منها
كتلها بوجع:كلشي يوجعني..كلبي ومشاعري وشراين هذا الكلب ابن الكلب الي خلاني مافكر بغيرج وانه بين ايدين الموت
سلطانة:اسم الله عليك وعلى كلبك..بيه ولابيك
كلت:لا متأكدة انتي سلطانة وينه مهند خل يجي يشوفني ويصحيني بماي..وينها الممرضة الحلوة تشوف نبضي
سمعت ممرضة حلوة اشو هاي عقدت حواجبها جانت تبجي..وكالت هاي يا ممرضة حلوة..تباوع للحلوات جبر وانته بهالحال...
لزمت ضحكتي:اي قابل حجر انه..رجال وعندي كلب هم اريد اشوف نعمة الله..والي خلقه ربي وجمال خلقه...وبت الكلب ضربت على صدري...
سلطانة:لعد شكو دزيت عليه وانته متمتع بشوفة الحلوات هنا..تستاهل كون كاسرين ظلوعك..تستاهل
صحت:اخخخخخ بت الربل..توج تبجين عليه وتنوحين هسة انكلبتي...بس بداخلي حبيت غيرتها...
سلطانة:ماتستاهل وابجي عليك عبالي حزين ومشتاقلي طلع يباوع للنسوان هنا..وينه مهند يرجعني
لزمتها وكتلها تعاي ولج..واريد ازمها قوي مابيه..ودخلت ممرضة غير هذيج مساع..ورجعت سلطانة خطواتها عليه...
اجت علينه البنية..وجيكت المغذي وراح فتحت المجرات مال مكتب بنص الردهة...وسمعت سلطانة اتمتم....
كلت خلي احركها بالغيرة شوي:لا يالحمزة هاي البنية الحلوة اليوم خفارتها ميخافون عليها اهلها بالليل خفارة..اشتعل مهيمن
سلطانة:اي مكيف استاذ جبر ماشي..اشبع بشوفتها الليلة..بعد ولا اجيك باوعلهن عدل..وطلعت من صدك زعلانة الخبلة....
اشو نكلبت هنوب هي زعلت واضحك بصوت خافت واكح جني شايب مسكرب وطايح من السطح وصدره مجييم ومزنجر....
كتلها اختي لو سمحتي صيحي لهاي البنية راح تجيب قوات الرد السريع عليه الليلة يشخلوني تشخل...
ضحكت البنية وكالت ليش..زوجتك هاي شبيها خطية...كتلها الحكومة يابه مو زوجتي..ابتسمت وراحت وراها....
سلطانة....
فور دمي مقهورة عليه وابجي وشعوري ماينوصف وتعبت تعب سنين عليه من القهر وهو يباوع للحلوات ويكول احبج..وين الحب...
وظليت ابجي من الغيرة اي متت غيرة واحتركت روحي من كلامه شلون يكول حلوة..ياربي ليش اجيتله ميستاهل...
ومسحت دموعي اجت وراي البنية وكالت حبيبتي زوجج يصيح عليج يمكن محتاج شي..كتلها خلي يدبر نفسه بنفسه....
ودرت وجهي عنها وادور مهند وينه اريد يرجعني بعد ولا ارجع يمه جبر العوينجي..وانه ميته قهر وشفته يحاجي شباب على مقاعد بالممر الثاني....
شافني كام وعافهم واجاني وكال هاااا ترجعين..كتله اي واهز راسي..وسكتت وبالسيارة كال مهند شبيج سلطانة معبسة وتنافخين...
كتله ماكو شي ظلو باوعو انته واخوك للحلوات خاف يفوتونكم..ضحك بصوت وكال شفتي الممرضات يموتن وحدة زحفتلي...
هسة يزحفن لجبر..شتكولين زوجج..راد يكمل كتله مهند عفية كافي خل يسوي الي يريده والله يعرفني متبرية من لساني....ولو اغرد عليه شيفكه....
رجعت للبيت ورحت اطل على عمي شلونه..وكتله شتحتاج عمي..كال سالمه يابه وعمتي يمه كالت شلون جبر....
كتلها يزهو بالنصر كلشي مابي ويباوع للحلوات ابنج عمه كلشي مابي لا تخافين صاحي مية مية...ضحك عمي..وعمتي همين...
خجلت من حسيت شكلت وضحكو عليه عمي وعمتي..كتلهم تصبحون على خير..ورحت يم البنات وهمه وجهالهم...
وصارت عركة عليه شلون ماجانو يتعاركون على جبر ومهند..والزعاطيط يكولون خالو دبر وين...ضحكوني كتلهم اي والله كبر مو جبر.....
مريم:سلطانو انجبي لا تحجين على اخوي..شبيج عليه رحتي فرحانة رجعتي بوزج متر كدامج
كتلها بقهر:مابيه شي..ماتردين تنامين..خلي نفرش بالهول وانام كلنه سوى
مريم:اريد انام يم ابوي بالديوان..كل احنه تنامين يمنه لو تنامين بغرفتج بحدج
عكرت وجهي:لا اخاف ابحدي..صار جم يوم مانام بحدي..خل اروح اخابر امي اشوف غزل
مريم:اي خطية سودة عليه غزيله لو عرفت شحالها كلها عرفت بس هي...
كمت وجبت مبايلي وحطيت تلفون جبر عالشحن مهند كلي جبر يريده..واتصلت على امي..وردت وصوتها مبحوح...
كتلها شلون غزل بجت وكالت عرفت ماتت بتها وماراضية تهجع ومابيها قوة وصوت وتبجي عليها..خايفة بطنها تتأذه...
متت قهر واحس اختنكت والله..بس لا اصخن هسة افف مليت من سالفة الصخونة هاي تاليها يطلع بيه مرض جاايد وراح امووت...
كتلها باجر اكل لعمي ومن يطلعوها اجي يمكم كالت وزوجج بهالحال كتلها مايطلع باجر ولا عكبه مهند باقي جم يوم بالمستشفى بسبب حالته....
ختمت المكالمة من امي وافكر بغزل كلش مقهورة عليها وخابرت هدى اسأل عنهاكالت مالي خلك كلش غزل كاسرة واهسي..كتلها باجر لو طلعوها نروح يمها.....
ورحت اريد اخذ فراشات للبنات وشفتهم فارشين..وفرشتلي يمهم..وطفينه الضوى بدون سوالف لأن عمي تعبان...
ماكدرت انام وافكر بجبر هسة هالممرضة بعدها موجودة هناك لو راحت يالله ليش محتركة عليه خل يباوع وين ميريد...
تذكرت تلفونه عالشحن ورحت جبته..صاير شحنه 70..فتحته وانه اعرف رمزه حاطه بأسم أياد..كتله ليش أياد كال اسم ابننا ان شاء الله...
وعرفت منه هاي صديقة متوفي بمرض بالقلب خطية وهو يحبه ويريد يسمي على اسمه...
شفت الرسااايل كوووووكة والاشعارات تارسته فيس بوك وتلي وتساب وكومة برامج عنده..بس انه كلشي مسحلي...
جبر وصلت بي حتى صورة حساب وتساب ميقبل اخلي مال بنية..اضوج من تحكمه شنو سجن خوما سجن كلشي لا تسوين...
ويكول من اكون يمج تلفون تنسينه..والله العظيم حتى يوتيوب كال الغي كتله ليش هيج جبر اتشك بيه لو شنو خوب كلي لا تتنفسين....
بس برنامج القصص بالكوة مقنعته مابي شباب بس بنات ومامصدك وكال مسحي..مسحته ومن يكون ماموجود افتحه واقرأ شسوي وين اروح وقصة اقراها من وراه هم يعتبر هاي جريمة لو شنو....
مافتحت رسايله بس لفتني دردشة الهانكوك..وتساءلت منو هاي..وفتت عالدردشة..وحدة كاتبة اله...عمووو وينك..ماترد...وراجعت الدردشة السابقة....
كاتبة عموو تعال اطفيني نااار شاعلة بيه..عزززااا بعينج طفوج بنهر دجلة ومليان تماسيح جوعانة كون...شنو هاي جديدة جبر..والله لكلب حياتك كبر اسود....
بس ماشفته راد عليه بس اول الدردشة دازتله عموو شلونك..دازلها بس عيوون تباوع بس وممجاوب على رسايلها...
كمت اغلي اكثر هي عايزة وكملت..ولو تلفونه عنده هسة اخابره ولساني شيسكته...وظليت افتش برسايله ماكو شي...كله جماعته ويغلطون غلط عابتلهم وهذا موسى اللزكه...
شوكت الله يقرض هالنماذج وج انه مرته حلاله وبالتفك تصير بينه شلون تقبلين على نفسج...وين الحلال والحرام وين الضمير والخوف من الله....
طاح حظج وحظ امثالج الله ياخذكم ويقرضكم انتم والشواذ الله يكطعكم الله يخسفها بيكم عارات البشرية....
ظليت ادعي على هالنماذج وانه ميته قهر..خابرت مهند مكدرت اتحمل..وطلعت من الديوان واجاني صوته هامس...
كال هاي انتي شحنتي التلفون مالته..كتله وينه اريد احاجي..كال نام واذا اكعده يمكن اخذلي طراك منه..بالكوة نام من كلياته...
كتله خوش وهاي الممرضة يمكم لو شنو..اسمع شخير ضحكته وكال مخابره علمود الممرضة..كتله لا تصير سخيف مهند وتضحك عليه...
كال اي الممرضة شابكته ونايمة يمه.. خطية اخوي طلع معوز حنان..وطلعت الممرضة اسمها جنان بس يالله مو مشكلة...
كتله تضحك عليه..الا اكل لمرتك مهند زحفتله وحدة بالمستشفى..وكتله باي..وسديته منه..وصار شحن الفون 60..حطيته بالديوان عالشاحن الي بي....ورحت انام.....
وراح انكتل على فتحة الرسايل مالته بس مو مشكلة المهم ارتاحيت ماعنده زيادات وناقصات جبر يحبني ولا مرة راسلني او حجه وياي بالرغم بت عمه....
اتذكرت من باسني بالحضيرة بهذيج الايام شكد احتقرته حركته الوصخة ماحبيتها..اهووو هسة شرجعني لهذيج الايام...خلي انخمد.....
جبر.....
طلعت المخبلة وزعلت وسوتها..ولا تلفوني يمي ولا بيه حيل اكوملها..وانتظرت مهند..اكيد راح يرجعها للبيت..واجه وسألته...
وكال سلطانة طفحانة غيرة شايفة هالممرضة..ضحكت ورجعت الكحة استغفر الله..وكتله مهند جكاير..كال تريد الدكتور يشمرني بره المستشفى بجلاقين....
يجي مؤمل يمك يبات ويبط راسك تتحمل مؤمل..كتله وشبي..جيبلي جكاير راح انفجر اذا مادخن راسي سطرني صار جم يوم مامدخن...
كال جبر كافي مو مراهق انته عوفه هل اليومين شيصير انته مريض وطلعت من الموت هسة عوف الجكاير...
سألته عن جلال اجاني لحظات ومو طبيعي..كال خطية مرته سوت عملية وجابت وبنته توفت هاليوم وره ساعات من ولادتها....
لا كلش ضجت وانقهرت على جلال وغزل..وكتله مادري خابره اليه..كال خاف نايم خطية.. من الألم مامرتاح بنومتي تعبت من النومة...بس احسن من كل ليلة...
وجسمي نحلان وعبالك مكسره كل عظامي..وهنوب سلطانة راحت ماطولت يمي وانه مشتاقلها ايام مشايفها....
بس تغير مزاجي كلش ايام صعبة عليه جانت شفت الموت والحمدلله طلعت بسلامة..ومن شفتها خايفة عليه ومهتمة نسيت كل هذا الصار بيه....
وألم كلياتي كلش ضوجني بس احسن من امس..كعدت الصبح وكلت لمهند خابرلي جلال خلي اعزي وخابرته وعزيته والله قهر بس الحمدلله غزل مابيها شي...
راح مهند يجيب ملابس ويجيب امي وتلفوني..واجوني الشرطة ياخذون افادتي وكالو واحد من الي جانو ويه شاهين مات الفجر لأن حالته خطرة...
كلش انقهرت..على الي سوه بيه بس ماجنت اتمنه موتهم ابد مهمى يكونون عارات بس اهلهم..مثل ماعاشو اهلي الرعب هسة اهلهم ميتين رعب لا يموتون الشاهين وذاك الثاني...
مهند كال حالتهم كلش عالمحك واحد ايده مطحونة طحن بالكسور ورجلينه....بس شاهين الضربة براسه وبغيبوبة....
وكعدو يحجولي عن الفلوس رجعت..يافلوس والله انقهرت من جانب على جلال بنته توفت شحال كلبه هسة..ومن جانب انقهرت على شاهين اشفقت عليه...
ومالحك صار ضحى اجت الناس يزوروني..وخابرلي ابوي وكال سلطانة راح تروح ويه اختها بيت ابوها كتله خلي تروح...
غزل محتاجتهم بهالوقت اكيد صعبة عليها الحال وهي تعبت وراح كل التعبته...وخابرتها انه...
سلطانة...
كمت الصبح كفكفت ويه البنات البيت واجه مهند وانطيته ملابس لجبر وتلفونه وراح..وكلت للبنات راح اعوفكم اليوم بحدكم راح ابقه يم غزل...
كالو نروح احنه لجبر ونجي لغزل..وراحو كل خواته يشوفنه..ورحت اطمن على عمي وصحته..وكتله عمو خابر جبر اروح يم غزل....
وخابره وقبل اروح..وصعدت جهزت ملابسي ودك تلفوني..شفته جبر..مارديت..ورجع دك..ورديت وكلت نعم...
جبر:تعاي صفكيني راشدي
سلطانة:لا حشاك..شنو ردت
جبر:ماعرفتي تخابريني بنفسج وتكليلي رايحة لأهلج..شنو راح اكص ركبتج
سلطانة:لا مو هيج بس خفت ماتقبل فكلت لعمي
جبر:سلطانة ترا كلش طاكه عندي وماكدر اتحرك بدون ماتألم ومالي خلك الدنيا..فخليج وياي ورد..وليش رحتي واصيحلج ماترجعين
سلطانة:مو يمك ممرضات باوعلهن براحتك كبل همين وياهم
جبر عصب:اشو كمتي تاكلين تبن..شنو اكبل وياهم هل كثر ماعندي غيره وسرسري اروح العب على بنات الناس..مو وجه واحد يشاقة وياج..وتفوووو عليه اليتصل عليج..ولو ما غزل ماخليج اطلعين شبر...
وسداه بوجهي..انقهرت وتهضمت..هو حتى ولد عمي مامسموحلي اكعد اسولف وياهم وهو يضحك ويه الحلوات ويسولف...
ضجت ودزيتله رسالة..ماقصدت مثل ما انته فهمت..اعرف انته طلعت من ازمة صعبة ونفسيتك تعبانة واسفة على كلامي الضوجك...بس انته همين ضوجتني بشقاك انته زوجي مايحقلي اغار بس انته يعني....
ليش انتو كلشي مسموحلكم والمرة لاء بسجن جبر خوما سجن شنو فرقي عالمحكومين نسيت تلفوني فرغته بسبب غيرتك وحرام عليك هيج تختبر غيرتي......
ودزيتله جرايد شكثر كتبتله..وهو قراهن ومارد..وعشر دقايق دز رسالة وحدة...سلطانة تحبيني لو هاي غيرة تملك مرة لزوجها؟؟؟
ماعرفت شجاوبه اجذب عليه يعني..ظليت افكر شكتبله..وكتبتله اخر شي...شتريد تشوف شوف انته زوجي والي وبس واغار اي اغار....
سديته ورحت جهزت عبايتي وخابرت محمد يجي ياخذني..وشوي واجه ورحت لبيت اهلي..ونسوان عايلتنه كلهم هناك وبيبي كاعدة حاطه راس غزل بحضنها....
وتواسيها وخطية غزل ساكته لا بجي لا دموع ولا صوت بس تتنفس..وعيونها وارمة تخوف صايرة مدري من كثر البجي مدري مضاعافات العملية...وسمرانة ماعبالك غزل الكطن...
سلمت عالكل..ورحت بست غزل وكتلها حبيبتي الله يعوضج عمري انتي الحمدلله على سلامتج وربي يجبر بخاطرج بالصبر ولأخوي جلال...
مجاوبت وهالشي خله دموعي تغرغر بعيوني..وماخليتها تنزل غزل محتاجتنا مالازم نبجي ونقويها بدل الضعف والدموع...
اخذت هدى على صفحة والنسوان شكد بطرانات كاعدات دك سوالف على راس غزل وهي مبينة مصدومة ومجاي تبجي...
والله منظرها يمرد الكلب سودة عليه..كتلها هدى شلونها..كالت شلونها منيلها لون حتى سكتت مكامت تبجي وهالشي مخوفني سكوتها يخوف...
بقينه يومين انه وهدى يم غزل ونهتم الها..ومو مثل قبل جمعتنه مابيها غير الحزن..خابرت جبر جم مرة بالهيومين والحمدلله تحسن...
باجر يطلع من المستشفى..وكال مهند يجي عليج كتله اخلي محمد يجيبني من الصبح..كال خوش...
كمت كعدت يم غزل شوي كامت تاكل بس قليل وجلال يجيها بالليل ونخليهم بحدهم واسمعها تبجي ومن يطلع يوصي امي ماتخليها تبجي...
خطية شكد خايف عليها..امه تجي يمها همين واعتذرت منها على تطويل لساني كالت مو مشكلة يمه انتم بناتي..مدري مرة تصير زينة مرة تدخل وتحجي...
مو بيدهم هاي اغلب العمات هيج..والحمدلله عمتي ام جبر مو متلونة وهي نفسها ماتتغير وياي وشكثر تحبني مثل بناتها دوم تكول انتي ومرت مهند بناتي مو جنايني....
وام جلال سباعية من تجي هي تكوم غزل بحدها وتاخذها للحمام اكلها انه تكول لا ارتاحي...وعصرتها ودهنت كل جسمها بزيت زيتون...
وتكعد توصي بيها انتي مرة نفسه وموزين عليج هيج وهيج ولا تاكلين هيج ولا اطلعين بره بالليل..واخذي سجين بيدج ومدري شنو....
هاي العادات انه وغزل مانآمن بيها بس هدى بله تصدك..وحتى بنات عمامنه من يجيبن مسحه وحديده يحمونها حارة تصير جمر ويصبون عليها ماي وملح ويبخرون الطفل بالبخار....
ولا آمن بسوالف قبل هواي اشياء خاطئة نعتقد بيها ومالها اساس مجرد خرافات مثل العطر يفرق بين الاحباب...
كله بطيخ وجذب..وحتى عروسة مايخلونها تخلي عطر بيوم عرسها يكولون يسوي فراق بينج وبين زوجج..عوووع لعد عروس شنو تحط...
غزل ترست روحها عطر وحتى انه وهدى كذلك كله خرافات وجذب وتضيع حياتنه بالجهل لا اكثر..همه حتى عباد الصنم جانو يتبعون شيسون ابائهم....
قال الله تعالى في كتابه
((بسم الله الرحمن الرحيم...وَإِذَا قِيلَ لَهُمُ اتَّبِعُوا مَا أَنزَلَ اللَّهُ قَالُوا بَلْ نَتَّبِعُ مَا أَلْفَيْنَا عَلَيْهِ آبَاءَنَا ۗ أَوَلَوْ كَانَ آبَاؤُهُمْ لَا يَعْقِلُونَ شَيْئًا وَلَا يَهْتَدُونَ ))
يقول أمير المؤمنين علي بن أبي طالب "لا تربوا أبنائكم كما رباكم آبائكم، فإنهم خلقوا لزمان غير زمانكم"
المهم يوم ثاني اخذني محمد للبيت جبر طلع واجه يمنه والحمدلله مابي شي..وذبحو اله ذبيحة وعمتي طشت جكليت ونساتل..ومهند يكلها يمه هاي حصو مو جكليت زرف راسه...
وظلت تبجي وحضنها وباس راسها وكلها يمه بلا بجي طلعت بسلامة كافي بجي..كلتله يمه دموع الفرح هاي ومو مصدكه الله خلصك...
وهو حاضنها من ركبتها..باوعلي وغمزلي..يمه خجلت ليش عود الغمزة..وظليت اباوع للبنات خاف شافنه ومهند شهيرة والله...
وكلنه تحمدنه اله بالسلامة دخلنه للديوان ولد عمامي كلهم اجو وشوي طلعونه احنه البنات اجو زلم..واليوم ماخلصو الخطار بالرغم اجوه بالمستشفى...
خلص الخطار وطاح حظنه انه والبنات..ومرتين خابرت هدى اطمن على غزل..كالو زينة احسن من اول...
وبالليل شفت مهند ويه جبر دخلو يريد يروح فوك يرتاح..وكل لمهند ترا مو مكرم اكدر اروح بحدي مابيه شي...
رحتله كتله اساعدك..ابتسم ولازم ظلوعه..وكال لا ماحتاج مساعدة بس خاف استاحش بحدي فوك..ضحكت وكتله تريد مساعدة وماتعترف...
ولزمت ايده من زنده ومشينه للدرج هو قادني مو انه ضحكت هو طويل بالنسبة لطولي..صعدنه لفوك..كال اروح بحدي للغرفة...
كلت انزل يم البنات ارتاح انته..كال تعاي وين رايحة اريدج يمي..هزيت راسي بأي..ودخل للغرفة وراح انسدح عالسرير وبعدها ظلوعة توجعه...
كال اخخخ بويه راح ابقه هيج اتألم..مدري ليش رحتله بخوف وكتله شيأذيك سودة عليه بيه ولا بيك...لزم صدره وكال اموتني سلطانة...
وولزم كف ايدي بيده..وجسمي كزبر عبالك اول يلزم ايدي..وكال سلطانة مشتاقلج بكد رحمة الله..مو الي راح تفهمينه لاااء مشتاق لوجهج ولصوتج...
سكتت وماعرف شكو اكو شي يقمت على صدري ويخنكني من يكول مشاعره اليه اضووج والله..ومن اشوفه يباوع لوحدة غيري امووت غيره وقهر....
مجاي افهم نفسي وماعرف شريد..بس لا يكلي مشتاقلج او احبج اختنك ويخيم على كلبي حزن وقمته...ياربي رحماك هالشعور تعبني...
كتله:جبر انته تعبان يالله نام وارتاح..وغطيته وطخيت برجله بدون قصد كال اخخخ..كتله اسفة وحطيت ايدي على صدره وهم كال اخخخ...
وكام يتألم اشو ولازم صدره..خفت عليه وردت اصيح مهند وكلي تعاي لتصيحين لأحد مابيه شي..اريدج انتي يمي...ورحت يمه....
جبر....
من شفت اهتمامها بيه لا صرت متألم وكلشي يوجعني ولازم نفسي ما اضحك وهي مهتمة وخايفة..صدك مسكين ياجبر...
وتريد تصيح لمهند كتلها تعاي اريدج انتي يمي..واجتني..واخذتها لحظني نومتها بصفي..وكالت اخاف اوجعك...
كتلها شنو ضايجة مني كالت شنوووو لا والله مضايجة..بس انته مريض وتتوجع..رفعت نفسي واباوع بوجهها...
كتلها والله مشتاقلج يابت الناس..وردت ابوس خدها وخرتني وكالت جبر انته مريض اتركني...
كتلها والله مخبل الي يتركج سلطانة ياهو يتركج..اشو هاي فهمتني غلط وكالت لاء مو انته مريض وجسمك يوجعك وانه معذورة من الصلاة....
ضحكت عليها وكتلها صايرة تفكيرج منحرف يابه ماقصدت الي ابالج..واضحك وهي حسيتها خجلت وكالت لاااء مو هيج يالله انته مستفزز...
وكامت ورادت تفلت لزمتها وكتلها ولج تعاي والله ماقصدي شي وياج انه رجال قصدي شريف وانتي نيتج راحت رون سايد....
سلطانة:والله انته ابو دروب تفرها عليه مو وخر عني اتركني
ضحكت من كلبي:وروح الغوالي ماقصدي شي لج بويه ياهو ظلوعه مرضره ويفكر هيج..هههههههه
كالت انته تسوي نفسك متألم وكلشي مابيك..وطلعت فلتت شلون بالشردة هاي..وين تنامين قابل بالشارع تجين لعشج حبيبي....
عبرت جم يوم وصرت احسن بهواي من اول والم بظلوعي خفيف بس وين قبل..وسلطانة صايرة حبابة وياي مو مصدك هاي هي تغيرت من هالحادثة...
بس هم مرات اضوجني بفعايلها وياي..وساكت شكول واحس تعبت واكول ماريد اهتمام يجي بالعتب..ماريده وصار عادي عندي كلش...
والذهب الباعته هي وامي من رجعن الفلوس رجعت جبتلهم مكانه..وشاهين توفه الله يرحمه ماكلت غير هيج ابد ماشمتت بي...
وبقه بس هذا الثالث ورجله كسر مضاعف...ورفعت عليه قضية خلي يتأدب الكلب حتى ميفكر يفجع اهل بأولادهم....
سلطانة....
كاعدة يم مريم وجاي نسولف تلفوني طفه مابي شحن انطي علاوي تلفونج..فتحته وحطيتله برامج الاطفال..واحنه نسولف لاحظت علامة اتصال...
كلبي وكف من شفت الدقيقة المحسوبة بالمكالمة والرقم صدمة..هاي رقم مساع دك عليه رقم غريب..واخذته بسرعة انشدهت ودست سبيكر....
واسمع صوته رجال يكول الوو ردي ليش تتصلين اذا ماجاوبين..مدري ليش خفت وانه ممسويه شي..وبدخلة جبر للهول خفت يفهمني غلط سديته بسرعة..وضميت التلفون وراي....
بسرعة سحبه مني وكال شكو ضميتي..ومريم جفصت وكالت هي مالها علاقة علاوي متصل عالرقم...................
غزل...
مرت ايام حزينة عليه وكآبة كلش مووتني ومراضية اتقبل الموضوع وانه ليهسة عند امي جلال راد ياخذني ماقبلت كتله اريد ابقه يم امي ماريد اروح هناك...
وهو كال براحتج لمن تشوفين نفسج احسن كليلي واجي آخذج..ماريد اروح مالي خلك احد ولا اريد اشوف وجه احد...
كمت ادخل للحمام ولازمة بطني..ودخلت وقبل لا استعمله شفت حية رمادية ورفيعة متت خوف منها ومن رهبتي جيت اطلع رجلي زلكت...
وطحت عالأرض ويه طيحتي..رفعت ايدي واشوف كووومة دم عالأرض وظل ينزل مثل النافورة...وفوك خوف الحية خوفة الدم............يتبع
توقعكم......
والمتفاعلين Doha567665
#اساور التميمية