أنتقام للعشق

البارت السابع

#أنتقام للعشق 🥀
البارت السابع
بقلم: نور حيدر
noorhaidar18

مساء الخير عليكم متابعيني 🦋🌿 ..

إلمن اجيت ؟
تأخرت ،
صاير بِـ عيني جنازة
مَرات يرجَعلك بَشر
بَس إنتَ مَ معتازة "💔🥀..

.

صدمه جبييره بلنسبه الي ... وكفت على حيلي وماحس بس صوت الاستكان وكع وانكسر

باوعتله لكيته مكسور وطشار مثل كلبي ..

باوعولي كلهم ... ابوي ايده ظلت ترجف وكال :شش شعنده اجه هذا

شاهر حجه بعصبيه وبقسووه :اليوم شيخلصك مني شهاب الكلب اجيت وجابك الله ..

طلع بره ولحكه .. وابوي كال بأستعجال وخوف : ولك غيث الحك اخوك لا يسوي شي امشينه خل نروح

طلعو كلهم ... وبقيت اني كعدت على القنفه ساكته ماحجيت شي بس صدمتي ماتقل عليهم

من سمعته اجه اتذكرت الماضي وعيوني غوركت بس مانزلتهن ماكدر شي يمنعني انو ابجي ..

وبلحظات رجع حقدي وكرهي وقساوتي اله من جديد وتذكرت كل السنين الي عشته وياه...

حجيت بغصه وبنبره كلها كره : شجابك شهاب وشعندك راجع ..

نهضت  بسرعة من  مكاني درت وجهي و جان أشوف
كبالي فاتن واكفة و دموعة تنزل..

اجت  اقتربت عليه و كالت بخنكة : صدك الي سمعته

سكتت ماحجيت شي وياها لان اني اريد اصدك
ولحد هسه مامصدكه شهاب رجع هنا ..

كالت بقهر  و صدمني : شعنده راجع على شنو يجي
شحسباله من يرجع راح يستقبلوه لو ينسون الي سواه
المن رجع بس اريد افتهم شكووو راجع ..

سمعنه صوت جدي  اجه علينه و كال : لو شيصير
يبقون ذوله اهله و لازم يرجع

كتله بصدمة : جدي شتكول شنو يرجع

: اي لعد يضل طول عمره عايش بلغربة خليه يرجع
ونفتهم منه السالفة و غلط هو احنه نعاقبة بس يبقى
ابنة و مانريده بعيد علينه  ..

كتله بخنكة : شنو نسيت الي سوواه لعد ..

هز راسه بلنفي  : لا بنتي اني مانسيت اي شي
بس صار كله ماضي و كل شخص يعيش حياته ..

مستغربة او مصدومة من كلام جدي معقولة مسامحينة
على الي سواه شنو نسوو شنو سوه بيه  هاهيه يعني
شهاب يرجع و يعيش حياته هو و عائلته هنأ

اجه سؤال ابالي جا و أني و حقي منو ياخذه إلي
اذا أنتم كلتو خل يرجع و تتناسون و عادي ..

كتله : ما مصدكة الي تحجي ..

عفته و صعدت فوك لغرفتي سديت الباب و قفلته عليه
و اني ارجف معقولة يحجي صدك جدي ما ياخذون حقي منه ..

حجيت : ولج جوري ياحق تحجين عنه يبقه ابنهم يعني مثلا شراح يسون هو بس انتي الي طحتي بيها
و محد ياخذ حقج غيرج لا تعتمدين عليهم ..
اهله و راح ياخذونه بلاحضان  ونسوو كلشي صار..

ضليت افتر رايحة راجعة بلغرفة  متوتره و كلبي يدك بسرعه انخبصت خبص راح اتخبل المن رجع

حجيت بخنكة: ولك  شهاب عليش ترجع تريد تحرك كلبي من جديد تريد تذكرني بكلشي و هسه شي اكيد جاب مرته و ابنه وياه..

كعدت  بلكاع و كلت بهدووء : حرام عليك الي تسويه بيه والله حرام لا الله و لا رسوله و حتى هاي الناس
ما ترضى بلي تسوويه بيه ..

......

جمارة /

كاعدين بلاستقبال اني و أمي و أبوي و سما بنت غسان كاعده بلكاع تلعب ..

جنت أباوع على التلفزيون و مندمجة و أمي تسولف وي أبوي ..

شوي و دخل علينه غسان واكف يباوعلنه انتبهت عليه ..

كتله : غسان شبيك واكف

انتبهو عليه الباقيين كاله أبوي : شمالك ولك ما تسلم
و هيج واكف صافن علينه شكوو صاير شي

اني خفت لان بس يباوعلنه

كال بهدووء : بوية خطار أجوو عليك

أستغرب أبوي : خطاار منوو همه و وين كاعدين

: راح اخليهم يدخلون عليك

استغربنه اني و أمي خطار على أبوي و يدخلهم يمنه شكوو شصاير ..

ابوي : ولك شنو ادخلهم هنا وديهم للمضيف وهسه اجي..

كال بصووت عالي  : تفضلل أدخل

ردنه نكوم أني و أمي خاف زلم غربة و مصدومين من حركة غسان بس توقفنه من شفنه الي دخل علينه..

وكفت على حيلي و أني أشوف اخوي كبالي واكف
كلت بصدمة : شهااب

أبوي و امي مصدوومين من الي شافوه هذا شهاب معقولة رجع ماصدك ..

واكف يباوعلنه بهدووء و لازم بيده طفل يباوع مستغرب علينه...

أبوي كال بهدووء و مصدوم : شهااب هذا أنت

أبتسم شهااب و كال : بوية شلونك

دموعي كامت تنزل مصدومة مامصدكه هذا شهاب اخوي رجعع.

بعد غياب خمس سنين رجعلنه شهااب بس متغير كلش
يباوع علينه واحد واحد و مايكدر يتقرب علينه
يمكن مثل الخايف نصده و ما نريدة ..

امي كالت بشهكة : يمه شهااب رجعت ..

باوع على أمي ابتسم و اقترب عليه كعد
بلكاع يم رجله واخذ ايدها باسه و كال :
شلونج يالغالية مشتاقلج

اخذته أمي بحضنه و ضلت تبوس بيه
وتبجي و تكول : ااخ يمه ولك كسرت كلبي
ليش هيج عفتنه و مشيت سنين
ماتسأل و تكول اهلي خل ارجعلهم
أشوفهم ولك كلبي محترك عليك وعلى فركتك..

حجه أبوي بهدووء كال :
على شنو يرجع على سواد الوجه

باوعله شهاب و أبتسم بهدووء
راح اقترب عليه و باس راسه و كال :
شلونك ان شاءالله بخير

سكت أبوي ما جاوبة يباوع عليه و دمعه بطرف عينه
أبوي هم مشتاقلة و كلبه جان طاك عليه
مرات اشوفه يباوع على صورة شهاب ويتحسر
بس هم شايل عليه على الي سواه ..

باوع عليه و أبتسم كال : جمارة

اني كال هيج و رحت ركضت حضنته
وكمت ابجي هو باس راسي و كال :
اشش يابعد اخوج لا تبجين

: اشتاقيتلك شهااب

: و أني اكثر ياروح شهاب و هسه اني
رجعت و اريد اشبع شوف منكم

رفعت راسي عليه كتله :
بعد ماتروح و تعوفنه مووو

: لا بوية شعندي بعد راجع اني هنا باقي..

حجت أمي و هسه انتبهنه كالت : شهاب هذا
الجاهل منوو ..

ابوي ركز نظرة على الجاهل و رفع حاجبة
و جنه مثل الي فهم كال بصوت مقهور :
لا يكون شهااب ولك

راح شهاب و لزم ايد الطفل و قربه على
أمي و أبوي ..

كال بهدوء : هذا الطفل يكوون أبني علي
حفيدكم ...

مثل الضربة على راسنه شهااب متزوج و عنده أبن
يعني سافر هناك و تزوج ما معقولة لعد و جووري

أبوي كام بعصبية و كال : شتحجي ولك شنوو أبنك
كاعد تشاقة اكيد أنت .

هز راسه بنفي و كال : لا بوية ما أشاقة هذا ابني..

صاح أبوي و كال : ولك طايح الحظ نسيت شسويت
انت سافرت و عفت بنت عمك مكسورة وراك
تاليته ترجع من سفرك و تجيب ابنك وياك تطلع
متزوج يا شهااب فهمني احنه شسوينه الك
وهيج تكسرنه و لك شسوت بنت عمك المسكينة الك ..

: بوية كلشي قسمة و نصيب و بنت عمي اعرف
اني كسرته ..

قاطعه أبوي بعصبية : جاا من تعرف ليش عفته
وخليت الناس تتشمت بيها ..

سكت ما جاوبة بشي رجع كال أبوي بأستهزاء :
لعد مرتك وين  شو ماهية مابينت وياك لو
ماحبت ترجع هنا لو عافتك و انهزمت
مثل ما سويت انت والله يعلم
من اي شارع جبته وياك كلي امه وينها..

كال شهااب و وجهه احمر :
بووية لا تحجي هيج امه ماتت و راحت
الى رحمة الله  ..

كالت أمي : شنوو ماتت

دنك راسه شهاب و كال : اي ماتت اثناء الولادة

باوعت لطفل مكسور خاطري عليه اتيتم
و هو صغير ما شاف من حنان أمه و دلاله
و لا يعرف أمه مسكين يباوع علينه مستغرب

الطفل يجنن ابيض و دبدوب خدوده
حمر و اشكراني و عيونه لونهم بني فاتح ..
هذا اكيد يشبه امه و طالع عليه .

كعد أبوي على القنفه و كال بتعب :
ليش هيج شهاب سويت و لك نزلت راسي
يم عمك و بنته و هسه شكله أبني متزوج
وعنده  أبن روح شهاب من وين مااجيت
ارجع اخذ أبنك و ارجع ..

سمعنه صوت ورانه بصدمه حجت : شهااب
التفتنه وشفت زهراء و اكفة مصدومة ..

هو ما اهتم الها راح اتقدم على ابوي و كعد بلكاع
يمه باس ايديه اثنينهن كاله :
بووية ادري و الله كلشي سويته جان ضدي
وغلط مني بس كافي ٥ سنين و اني عايش بغربة
وكل مااحن الكم اكول خل ارجع و اشوف اهلي
جنت مشتاق اسمع صوتك و اشوفك أنت وأمي
بس اكول ادري مراح تستقبلوني ..

جنت وحدي بلغربة و تعبان و مشتاق لهلي و ناسي
والله الغربة اخذت من حيلي هواي و هاي يمكن
حوبة بنت عمي جوري الي انكسرت بسببي

جنت تعبان من الغربة و الحنين الكم و تعبت
مالي احد هناك بس اني و أبني علي
اني ربيته و صرت اله ام و أب بنفس
الوقت و اني اكثر شي رجعني هنا أبني علي

ماريده يتغرب مثلي و يصير وحيد و من يكبر
يسئل عليكم و يكول ليش ماعندي اهل ..
كافي هو انحرم من أمه  ماريد ينحرم منكم ..

كلت ليش يبقى هناك و هو عنده جد وجده
وعمام ماريد يتغرب هناك و اني هم تعبت
وردت اجيكم و اشبع من شوفتكم ..

: بووية بداعة اعزاز كلبكم كاافي
ضل يبوس بأيديه و دنك راد يبوس رجله ..

بس لزمه أبوي و رفع راسه و شفنه دموع أبوي
تنزل حضنه و كال : ولك ليش هيج شهاب
ليش كسرتنه و مشيت ما كلت أمي و أبوي شيصير
بيهم ماكلت راح انزل روسهم ما كلت راح اخسرهم
ولك ما كلت راح ينكسرون بفراكي ليش هيج ..

: أسف بووية اروحلك فدووة سامحني
خل الدنيا كله تزعل عليه الا أنت  ما تحمل
زعلك و غضبك عليه  ...

باوعله أبوي و مسح دموعه : هذا بيتك يبقى
انت و أبنك بس لا تظن اني بعدني ما شايل عليك
لأن  جوري تبقى بنتي هم و هيا اذا سامحتك
اني بساعتة اسامحك و ارضى عليك ..

كمل كلامة :بس كلي وين جنت مسافر و ليش هيج سويت ليش عفت بنت عمك بيوم خطوبته

دنك راسه شهاب و كال : جنت مسافر بأيران عايش هناك ..
كال أبوي : ايي و ماكلت ليش كسرة بخت بنت عمك ..

: بعد بوية صارت مو اله تعرفون الزمن راح يعرفكم بس مو هسه

حجه بقهر : هاهيه ماتريد تحجي لان تستحي من الي سويته بس شوف من ترضى وتسامحك بنت عمك عود بذاك الوقت اني اسامحك ..

كام من مكانة و كال بهدوء: الله كريم بوية..

باوع أبوي على علي و أبتسم : جيبه خل أشوفة

اخذه و انطاه لابوي اني اباوع عليهم و دموعي تنزل..
ظل يباوع على أبوي و مستغرب و ساكت ..

أبتسم و حضنه و كال : هلا بيك  بوية بهذا بيتك ..

ضلينه ساكتين و راحت امي اخذته و ظلت تبوس بيه
و مثل الي حبووه و دخل كلبهم و هو صدك
على جماله وشكله البريئ ينحب ..

ضل يحجي وياه شهاب و يفهم بيه انو هذوله اهله
و هذا يصير جده و امي حبوبته و هو ابتسم
من كاله هيج ..

جان غسان و اكف و بعدين كال أبوي : غسان اخذ اخوك هو و أبنه  خل يرتاح ..

هز راسه غسان و باوع بنظرة لشهاب و أشر براسه
اخذ أبنه  شهااب بس امي كالت : يمه بقيه يمي
خل اشبع منه فدوه لعمره..

ابوي : خل يروح هسه يرتاح و بعدين اشبعي منه
غير باقي يمج لو الك رجعة ثانية شهاب..

باوعله بطرف عينه و كال شهاب :
لابوية ماكو هيج شي

اخذ ابنه و صعد فوووك ...

......

غسان /

صعدت فوك و هو وراي  شايل أبنه بحضنه
وراي يمشي و صلت لغرفته و كفنه شفته يباوع
على البيت ما نزل عينه ..

كتله بهدوء : شبيك هيج تباوع على البيت
ابتسم : البيت مغيرين منه هوواي

: طبعا يتغير اذا انت ما دخلتله صارلك ٥ سنين
: اي صح بس اشتاقيت هواي

كتله بأستهزاء : جا اذا هيج تشتاق عليش رحت
باوع عليه و كال : جنك ما تعرف

: بس أنت اتسرعت

كال ويريد يعوف السالفة: مو جنك طولت بلوكفة ترى تعبان و اريد انام
حتى علي تعب و كام يغفي ..

هزيت راسي بيأس من يمه كام يغير بالسالفة
فتحت باب غرفتة و دخلت و هواي دخل وراي

باوعت عليه شلون صفن بيه و كال : بعده نفسه
بس نظيفة ..

: ايي أمي تدخل عليه و تنظفة كل أسبوعين هيج
من تشوفه اترب و تغير فراشة ..

هز راسه و راح خله أبنه على الجرباية 
لان نايم بحضن أبوه حطه على الجرباية و غطاه
كعد بصفه ظل يباوع عليه و يسمح بيده
على شعر ابنه باس راسه و كام بهدوء من مكانة..

كتفت أيدي و ظليت صافن على تحركاته
هو أنتبه عليه و كال : شبيك صافن ..

كتله : هلكد تحبه يعني ادري سؤالي بايخ
بس حبيت اعرف ..

أبتسم برود و كال : هذا هم سؤال ينسئل
يعني هسه اكلك اني تحب بنتك سما ..

كمل كلامه : بس راح اجاوبك احبه طبعا
هذا روحي هو الي صبرني بلغربة علموده اني
صبرت على كلشي و اجيت لهنا علموده هو وبس
حتى يعيش يم اهله و ناسة ماريد يبقى هناك
بلغربة ..

: بس على هذا الشي اجيت لو على شي ثاني

رفع حاجبة و كال : شقصدك غسان ..

أبتسمت : وجوري ماجيت هنا علموده

: ليش اجي علموده ترى صار كلشي من الماضي
و جوري ماضي و انتهى و مستحيل نرجع سوه
ادري بيها هسه كارهتني و ماتريد حتى شوفتي
و راح تنقهر من اجي و تريدني ارجع اصلاً ..

: وشعرفك يمكن يصير العكس و تقبل برجوعك ..

كال بهدووء و صفن : محد يعرف جوري اكثر مني
اعرفه كلش زين  ...

صفن و كال: انت شايف  شلونه متغيرة لو بعدها جوري
القديمة..

: والله يا شهاب ماريد ازيده عليك بس البنية
مو مثل قبل مو جوري الي نعرفة لسانه شطوله
لو الي تضحك و فرحانة ..

هسه جوري شخص عازل نفسه ما تختلط هواي
صوته ما ينسمع و كل ابيتهم حتى بيتنه ما ادخله
بس من أبوي يطلب أنو يشوفه كامت ما توصل
لهنا ..

هز راسه و كال : و صارت دكتورة  خوش عفية عليه
شافت حياته و ماوكفت على شخص بس شعجب
ما تزوجت لحد ..

: و أنت عادي عندك تزوج نسيت حبك الها !؟

: كتلك مستحيل أني و ياها نرجع سوه والله يوفقه بعد ..

رجع باوع على أبنه : أني عندي هسه أبني اهم شي بحياتي ..

سمعنا صوت صيااح بره و هوسة باوعت على شهاب
الي مستغرب كتله : هذا شنو الصوت

أبتسم و كال : أجه شاهر

باوعتله بأستغراب : هاا

باوعلي و كال : شحسبالك يعوفوني و خاصة شاهر
درو بيه اجيت و هسه أجو يردون يصفون الحساب
الي عدهم يلا خل ننزل ...

كام من مكانه و طلع وطلعت وراه و اني مستغرب
حالته بس مبتسم و صاير هادئ وبارد  عكس قبل ..

نزلنه جوه و شفنه أمي و جمارة و زهراء واكفات خايفات كتلهن : شعدجن واكفات شكوو

أمي : روح شوف أبوك بيت عمك جايين هادين
ما يستحون ما يكولون بيت عمنه و نجي نهد عليهم ..

:يما كافي فدووه شهل حجي ..

: وأني حجيت الصدك خو عمك ما استحى
و كال أخوي  عيب عليه هيج اسوي خل ننسى
الي صار ..

شهاب : يمه كافي فدووه خل نروح و نفهم السالفة..

لزمت أمي شهاب من كتفه و كالت : اكعد يمه هنا
و أبوك يتفاهم وياهم لا يتعاركون وياك مابيه حيل
هستوك اجيت من السفر ..

وخر شهاب ايد أمي و كال بحدة :شنو يمه جاهل
أني و تخافين عليه اروح اتفاهم وي ولد عمي
والي يسووه خل يسوه لان يردون ياخذون حق
أختهم مو اكثر من هيج شي ..

راح و عاف أمي و أني رحت وراه طلعنه وشفت
أبوي يحجي وي عمي و غيث و شاهر واكفين
بس أمبين عليهم التوتر و العصبيه ..

خاصة شاهر كل ساعه يكمز ويحجي بصوت عالي..

شاهر بعصبية : عمي خل يطلع شهااب عدي حساب
قديم ويااه و خل يطلع لو خايف ..

اتقدم شهاب و حجه بصوت عالي و مبتسم:
هذااا أني أجيت يا أخوي و أبن عمي
أجيت حتى اتصفي حسابك وياي و ما خايف
وكف كباله و يباوعله...

شاهر من صار عليه قريب شهااب ظل يباوعله
وصافن عليه جنه هسه اتأكد أنو شهاب كدامه
و شهاب هم يباوع عليه و ما نزل عينه عليه ..

مانحس غير شهاب طاح بلكاع و صار فوكاه
شاهر و يضرب بيه بوكسيات و يغلط عليه ..

ردت اروح اساعده بس أبوي منعني و هذا شهاب
ساكت و مابادر حتى يدافع على نفسه
و شاهر يصيح ويغلط ..

: ولك شعندك أجيت حسبالك نسينه و رجعت
حسبالك نستقبلك بالأحضان  نسيت شسويت أنت
و هسه تجي تكلي أخوي أني مو أخوك ..

أني شهاب الي اعرفه دفنته قبل ٥ سنين
ولك جاي بكل عين صلفة بعد الي سويته بأختي..

لزمه من ياخته و كال بعصبية و صياح :
حلفت بألله اخذ حق أختي من بين أيديك يا عار
ولك كسرت أختي أنت
اختي جانت وردة و هسه
ذبلت من وراك صوته كمنه مانسمعه بلبيت ..

يحجي بحركان كلب و اني واكف أباوع عليه
عيوني غوركت لان شفنه الي عاشته جوري
و أبوها مسح دمعة من عينه و غيث ظل يهز
برجله و منزل راسه  و أبوي يباوع و ساكت
محد من عدنه كلنه خل نوخر شهاب من ايد
شاهر  كلنه يتصافون من يمهم ..

حجه بحركة و مقهوور : ولك أختي ٥ سنين دمعتها
ما نشفت من عيونها الماضي ما عافها أبد
أختي شكم مره بمره طاحت مريضة بلمستشفى..

جوري ذبلت و ابتسامتها اختفت اختي كامت
تمثل علينه انو هيا مرتاحة وسعيدة و الناس
حسبالهم نست و كله حسبالهم جوري نستك
و عايشة مرتاحه ..

عيونه غوركت و كال : بس محد يعرفه كدي
أختي عايشة بعدها على الماضي التعيس
تذكر كل الي سويته و انت هسه راجع ..

ورجع كمل يضرب بيه و يصيح و شهاب بس
مغمض عينه من الألم بس ساكت ..

لحد ما صاح عمي أبو محمد : شااااهر كاافي ..

هو سمع صوت أبوه و توقف باوع على شهاب و نهض من مكانة و كال بتهديد : و الله اذا شفتك مقترب
من باب بيتنه اكطع رجيلك فهمت ..

مسح شهاب الدم الي بحلكه و أبتسم :
يصير خير يا شاهر ..

،كال عمي بحده و هو يباوع على شهاب
و شهاب كذلك مانزل عينه من عمي يباوعله
بهدووء : يلا خل نمشي

مشوو همه و اني كمت اساعد شهاب و كتله :
شتحس يوجعك شي ..

هز راسه بلنفي  و اختفت أبتسامتة دخلنه جووه
و شهكن البنات من شافن شكل شهااب ..

زهراء بخووف : شهاب بيك شي ليش هيج صار بيك..

امي اجت عليه و كالت : جعل ايديهم الكسر ان شاءالله
الله لا ينطيهم شسوو بيك هاي كله علمود جوري
شكول عليه ان شاءالله تبقى طول عمره مكسورة
مثل ما صار بيك هيج ..

باوعله شهااب بحده و كال بعصبية :
يمااا لخاطر الله كافي لا تدعين على البنية
هياا شكووو اصلا قليل الي يسووه ..
البنية ظلمته وياي و كسرت بخته و تجين
انتي هسه تدعين عليه ادري بيج تكرهيها بس مو هيج
ترى عندج بنيه  و بعمر زواج لا يصير بيها شي
بسببنه ..

راح صعد فووك و اني وراه و أبوي ظل يصيح على أمي ..
دخل بغرفتة و اني دخلت يمه شفته كعد على
طرف الجرباية ودنك راسه و خله ايده على شعره..

كتله : شهاب بيك شي انت بخير !؟
كال و هو بعده منك راسه : غسان خليني وحدي
وسد الباب وراك اريد أرتاح..

عرفتة يريد يبقى وحده و يعيد تفكيره
ويصفي ذهنه اعرف أخوي مسوي نفسه هادئ
بس داخله يحجي العكس  الله يعين على الايام
الي تجي ...

طلعت و سديت الباب و راي و دخلت لغرفتي
شووي و جت بنتي سما عليه ..

ابتسمت الها : هلاا بابا تعاي
وفتحت ايديه الها و هيا اجت حضنتني ..

بسته من خدها  :شلونه حبيبتي

: زينة بابا
: هاا يروح بابا احجي

كالت بطفولة : اريد اروح لبيت جدوو لماما زهرة..
ابتسمت الها : ماما زهرة !؟
ماشي حبيبتي اخذج الها بس انتي تحبينه

هزت راسه و ابتسمت : ايي احبه هوااي
: اكثر مني
ضحكت هيا و سكتت ابتسمت الها و حظنته..

من ماتت امها و اني حالتي تعبت صرت اهتم
بسما هواي  بس انشغلت و ماكدرت
و أمي تتعب  فا جمارة ادير شؤونها ..

ومرات ابات بلمستشفى وشغلي هوواي ..
و بيت جدها اهل امها يطلبون تجي يمهم
يحبونها خاصة حبوبتها تكول من اشوفها
أشوف بنتي اسراء و صدك هيا تشبها ..

فا تروح هناك و متكفلة بتربيتها هناك زهرة
تكون بنت عم زوجتي و اختها بلرضاعة
لان يتيمة الأم ..

اخذت بنتي و رحت طلبت من جمارة تنام يمها
لان عندي شغل و اروح العيادة هم ..

مرات استحي اطلب منهم و احس انو اني وبنتي
ثقل عليهم صح اني ابنهم و عادي و همه ما يحجون
بلعكس يخلونه يمهم لان اتعب شغل و اجي لليل
حتى مو هواي اشوفه ..
بس ارتب اوقاتي علموده مالي غيرها بهاي الدنيا
و بيها ريحة امها هيا الي تذكرني بأسراء

اني تزوجت اسراء و هيا عمرها ١٧ سنة و بقت
وياي ٤ اسنين عرفته انسانة طيبة كلش
واخلاق و حنونة فا حبيته و دخلت لكلبي
لان ماشفت مثله مره قايمة بكل الواجبات
و تحبني و تحترمني و مهتمة بيه بس جانت
تعبانة  و الحمل مو زين عليه بس هيا اصرت
بس ما جنه متوقعين تعوفنة و تروح بولادتها..

موتها كسرني كلش و عرفت اني خسرت انسانة
جانت بلنسبة الي سند جنت من اتعب اجي اشكيله
كل تعبي و هيا تبادلني بأبتسامة هادئة يزيح كل همي
وتعبي..

........

فارس/

جنت كاعد يم الشط و افكر احب اكعد هنا
هدووء ماكو لا صوت انسان يزعجني و لا صوت
سيارات و ازعاج اريد اصفي ذهني ..

الشط قريب على البستان و ماكو احد بيه
محد يجي فا حبيت يصير المكان خاص الي ..

طلعت من جيب دشداشتي باكيت جكاير
وطلعت جداحة و ورثته..

ظليت ادخن و افكر قطع صوت افكاري
صوت الموبايل رفعته شفت زينب الي تتصل..

جاوبته: هلو زينب  رايدة شي..
بس صدمني جاوبه كتله : شنو شهاب رجع
صدك تحجين ..

سكتت و هيا تحجي رجعت كتله بهدوء:
وعمي ابو محمد و الولد شسوو من عرفو ..

أبتسمت : اهاا رايحين و هادين خوش لعد
يلا سدي الخط اني شوي و ارجع بااي..

سديته من يمه و كلت : شهااب شكو شذكرك
بينه مو انت ردت تبتعد ليش رجعت ..
رجعت و جبت كلشي وياك ..

ابتسمت بهدوءو كلت :
اجييت و راح تجيك المشاكل من اهلها
ومن جوري هم الله يساعدك ..

كمت مكاني و ذبيت الجيكارة و دزت عليه :
ايي شعدنه احنه قابل نشووف شيصير ..

رحت صعدت بلسيارة و شغلته ..
شغلت المسجل و شغلت الاغنية الي احبه
ابتسمت واني استمع الها و أفكر بلي شاغلة التفكير..

يتبع...
noorhaidar18
انتهى البارت  اتمنى يعجبكم 💜

لا تنسون الايك +التعليق ✔
بس صدك التفاعل كلش قليل  ليش هيج أنتو الي تشاهدوون صوتو لا تغلسون و علقو تعليقات حلووه
على الفقرات 💜💜
والنشر هواي تسئل و كلت اني بين يوم ويوم نشر و موعدنا بليل  يكون ..