أنتقام للعشق

البارت السادس

#أنتقام للعشق 🥀
البارت السادس
بقلم: نور حيدر
noorhaidar18

مساء الخير عليكم متابعيني🦋🌿..

الله كريم نكول بس هذا روتين
صح نمشي فوك الكاع بس أحنه ميتين 🖤🥀..

فاتن /

ولك ذبيتني عند اهلي و ماسئلت و كلت هاي شبيها ما بيها شمحتاجة بس جنت توصل فلوس بيد امك  لو مو أمير جان مارجعتني لهذا البيت و اني هم رجعت غصباُ ما عليه هنا علمود ابني و الله مو علمودك رجعت ..

كتله بغصه و هو يباوعلي و عيونه مدمعه : بعد كل هاي السنين الي عشته وياك و حبيتك و خليتك تاج على راسي تاليه تروح تشمرني و تريدني هسه انسه لا والله مراح انسه و جرحك ترك ندبة بكلبي و مراح تروح أبد ...

محمد : ادري شتحجين اني وياج والله ادري أني  غلطان بس سامحيني كتلج جانت وقت عصبية و تندمت ليش ما تفهميني شكد حاولت ارجعج و انتي اصريتي ما ترجعين بعدين بقيتج على راحتج كلت هيا هسه ترجع بس مرت اشهر و انتي ماكو و اني انتظرج..

ولج جنت اجي اكعد ابيتكم مع انو ماجنت حاب اروح هناك بس علمودج اروح اكعد و انتظر ساعه و اكثر  و انتي ما تجين لو اظل اصبر اسمع كلام امج الي مثل السم عليه ..

حجه بأنفعال : لا تسوين نفسج بس انتي الي عانيتي و انجرحتي  صح كسرتج و خذلتج اني بس ردت اصلح غلطي وره يومين اجيتج و ما قبلتي رفضتي أنتي  ..

مصدوومه من كلامه حسسني اني الي عفته و اني الي غلطانه كتله : يعني قصدك هسه اني الغلطانه مووو خوش لعد  ماشي غلطانه هسه خليني وحدي ..

فرك وجهه بأثنين ايديه و رجع لزم ايدي : حبيبتي فاتن افهميني خل اشرحلج ..

وخرت ايده و اني دموعي تنزل كتله بهدووء : كاافي محمد وخر من يمي شفهم منك وشتشرحلي خل اني الي احجيلك..

كتله بخنكة : ولك اياام ما نمت بيها و دمعتي مانشفت ابد جنت مقهوره منك و مخذوله و من عرفت بنفسي حامل رجعت انت تريد ترجعني بس بأيد امك ما كلفت نفسك ترجعني أنت..

و من رفضت ما تعبت نفسك و رجعت و طلبت مني ارجع وياك لا كلت خلوها على راحته  و مرت اشهر و اني يم اهلي و بطني تكبر و اتعب اكثر ..

اكل ما اكل و ما انام جانن اصعب ايام بحياتي مريت بيهن و انت و لا يمك تذب فلوس يم غسان و تمشي و ما تكول هاي شلونه تاكل تشرب ..

ابجي من التعب و من القهر انت الي كسرتني و خليتني هيج و الله بوقته عرفت اني شكد رخيصة عندك و مااسوه ربع دينار ..

اني جنت اعرف ماتحبني صح جنت زين بس لا جنت تقوم بواجبك فقط و اني جنت هايمة بيك و بحبك بس هسه صار كله ماضي ..

و من شعرت بألم الولادة و راح اجيب اتمنيتك انت وياي بس ما أجيت اخر شي يلا و من ردت اطلع من المستشفى يلا كلفت نفسك و كلت ترجع وياي و هم علمود ابنك يصير كبالك ..

اخذ ايدي و باسه و كال : فاتن اني احبج و الله من  رحتي يم اهلج وابتعدت عنج عرفت شكثر اني احبج و حياتي فارغة بدونج و ماتسوه  كافي حني اربع سنين وانتي ما منطية فرصه و لا الج حتى نعيش حياتنه
اربع سنين و انتي مانسيتي ..

ابتسمت بأستهزاء : بعديش هاا بعد ما نزعت حبك من كلبي و هسه تحجي والله لو يمر دهر على الي صار مراح انسااه مو بس اربع سنين ..

واني كاعد اقووم بواجبي حتى لا اكون مقصره وياك كدام ربي و كدام احد ماريد اتحاسب و اني باقية يمك فقط علمود امير هو الوحيد الي يربطنه سووه ..

عفته و كمت و اني كارهه روحي ماكدر انسه الي سواه اني شنو ذنبي اتذكر بيومه من دخل عليه للغرفة و كال
: لمي ملابسج و روحي لهلج

: ليش محمد شكوو اهلي بيهم شي

صيح بوجهي : اهلج مابيهم شي بس احنه الي بينه اخوج كسر اختي و ذله و خله الناس تحجي عليه و اني ماريد احد يذكرني بيه و من اشوفج اشوف اخوج كدامي..

كتله بأنهيار :انت صدك تحجي اني شكوو بأخوي شحسبالك لعد اني قابله بلي سواه لا والله ما قابله ..

محمد :كافي حجي فاتن ترى اعصابي تعبت والله روحي يم اهلج ابقي هناك و من ارتاح عود ارجعي

مصدومة منه رحت اقتربت عليه لزمته من كتفه و كتله  و هو داير و جهه عني : محمد صدك تحجي انت لو تشاقه

كال بجمود و هو بعده داير وجهه عني : كلامي مابيه شقه روحي فاتن ..

كتله بصياح : دير وجهك و حجي وياي لو اني هيج ماعندي قيمة يمك و حتى ما تباوع عليه ..

دار وجهه و صارت عيني بعينه و كال بقسووة عمري مراح انساها : رووحي فاتن
وشدد بلكلمه ..

: ولك اني شكوو اخوي الي كسره مو اني كسرته و ماراضية على الي سواه اني شنو ذنبي لو تريد تكسرني حتى تصير وحدة بوحدة مثل ما أخوي كسر اختك أنت  هم تكسرني ..

حجه بهدووء : مو هيج فاتن

عطت بوجهه : لا هيج الحجي ونص لعد شنو تفسيره بس خووش اني ما اترجاك و اكول فدوه بقيني لا بلعكس بعد الي سمعته اني امشي وبكرامتي هم و ماعيش يم واحد ما يعرف يتصرف و يمشي عصبيته على حياته ..

خزرني : فاااتن

: لا فاتن و لا شي اني ماشية و خليت الك كلشي ..

درت وجهي عنه وأني مكسوره و مصدومة من الي حجاه معقولة هانت وياك العشرة هنت عليك تكلي هاي الكلمة روحي لهلج .

اخخخ لعد اني شكد رخيصة عندك و ما تهتم بيه .. رحت لميت ملابسي بجنطة و اتصلت بغسان يجيني صح قريبين عليه بس تعبانه كلش و الجنطة ثكيلة ..

ضليت كاعده  على الجرباية وهو كبالي كاعد على القنفة و منزل راسه و يهز رجله دليل على عصبيته ..

ظليت أباوعله و دموعي تنزل مامصدكه هذا محمد الي عرفه الهادئ و الرزن والشخص الطيب هيج يطلع منه الي جان يكول انتي تاج راسي و انتي حبيبتي و ام بيتي هيج بسهوله شمرني و عافني .

سمعت موبايلي يدك  رفعته و جاوبت غسان كال : اني جوه يلا تعاي ..

كتله و صارت عيني بعين محمد الي  رفع راسه منتظر الإجابة مني ..
كتله بخنكة : يلا جاية ..

كمت من مكاني و لبست شالي بأهمال و لبست العباية خليته على متوني ..

وكف كبالي و كال : فاتن افهميني بس ارتاح ارجعج

ماحجيت شي جانت العبره خانكتني و اذا حجيت كلمة وحدة راح ابجي ..

اخذت الجنطة هو خل ايده يمنعني كال : أني انزلة الج ..
باوعت بوجهه حسبالي يكلي لا ترحين بس خاب ظني مره ثانيه بيه ..

دفعت أيده وكتله بكره : ماريد اي شي منك كافي الي جاني منك لحد هسه ..

عفته و اخذت الجنطة  ونزلت  صار كبالي غسان كام على حيله و هو مثل  الي فهم السالفة اخذ الجنطة و هو ساكت ..

اجت عليه جوري تبجي : فاتن ليش ترحين عفية ابقي

كتله بخنكه : اخوج يا جوري كسرني مثل ماكسرج اخووي يعني صارت وحده بوحدة بلعافية عليه ..

انصدمت من يمي و عفته اني و مشيت اخذني غسان و صلنه للبيت شافتني أمي  مصدومة رحت حضنته و ضليت ابجي و حجيت الهم كلشي ..

أبوي و غسان سكتو و كالو مالنه عين نحجي لان ابنه سوه هيج أبتهم و كسرها و نزل راس عمه ..

صح أنتي مالج دخل بس بعد ساعة عصبية .. بس امي ضلت تحجي عليه و تغلط و حتى دعت عليه

اني خفت و ماقبلت  تدعي  صح سوه بيه هيج بس يبقى زوجي و أبوي بيتي  وماريد يصيرله شي مو زين ..

وبيومه كرهت شهاب و اعتبرت ماعندي اخ اسمه شهاب
لان دمر كلب و كسره و دمر بيتي و اهلي نزلو راسهم كدامي عمي و الولد ..

يعني دمر العائلة كله .. كرهته بوقته وحقدت عليه

......

جماره /

كاعده بغرفتي و اكلب بموبايلي دخلت على حساب غيث و اني اشوف صورة اله نشره قبل ساعة

ماعفته ابد بس اباوع عليه و ابتسم هايمة بحبه اني
حجيت وي الصورة : ولك حس شبيك حبيتك و الله
شبيه اني و ماتحبني ..

دخلت على التعليقات و كل وحده تكتبله منور و تخبل و فدووه شنو هذا الجمال..

وهو متونس يرد عليهن عيونج الحلوة لو منور بوجودج
و باقي الردود

طفرت و الدمعة بطرف عيني اغااار كلش عليه
والله احبه بس هو ابد ماعده كل مشاعر
تجاهي حتى متغير وياي مو مثل قبل ..

جان زين وياي بس هسه حتى لا بلعكس
واني ادري بيه يغازل و يرقم وعنده  سوالف
مكسره ..

بس شسوي بكلبي احبه مو بيدي..
ضليت اشوف التعليقات و اني شايطه كلش
قههرر كون يمي ذني الي يعلقن و اكمشهن
من عطوبتهن و اسحل الكاع بيهن

....

زينب/

طلعت من بيتنه اريد اروح لبيت عمي ابو غسان
اشوف جوري من الي صار بعد ما وصلت ..

وصلت  وفتحت الباب و دخلت جوه  
دخلت و صار  كبالي ليث  باوعتله
و دنكت راسي و ردت امشي ..

تذكرت الي صار قبل كم يوم عبرت من يمه
بس سمعته  صاح عليه : زينب اوكفي.

وكفت و ظليت اباوعله مستغربه
لان صاح عليه ضليت واكفة بمكاني
و هو اجه اقترب من يمي..

كال بهدووء : شلون صرتي من بعد ذاك اليوم

انصدمت اول مره يحجي هيج وياي و بهدووء  كتله : بخير الحمدلله

كال : خووش الحمدلله حسبالي راح يصير بيج
و تعال اني اتحمل المسؤولية..

اصلا ماستغربت من كلامه و لا انصدمت ..
انصدمت بس من سئل على حالي حسبالي
متندم على الي سواه طلع خايف لا يصير بيه شي
ويتحمل هو المسؤولية .

باوعت عليه ولكيته يباوعلي منتظر مني الإجابة 
ابتسمت بوجهه و كلت اله و اني ماريد ابين اله اي شي
: مابيه شي الحمدلله وانت مالك اي دخل بلي صار
أني جنت تعبانه شووي و هم مايصير اتعب زيادة
معليك أنت ..

: اها خووش
راد يمشي و رجع باوعلي و كال : زينب اريد اكلج شي..
باوعتله وكلت: شنو شتريد تكول

: ابتعدي عني ممكن حتى لا يصير بيج مثل
ذاك اليوم و تكرهيني اكثر و اني ماريد هيج شي

: شقصدك ليث شنو ابتعدي عني اني شمسويتلك

باوع عليه صفن و رجع كال بهدوء
: أنتي شخص انفرض عليه..

ذب هاي الحجاية و عافني و طلع ..
وخلاني أفكر بكلامه شقصده اني انفرضت عليه
شبيه ليش مايحس بيه ويحس بحبي و الله حبيته
وتمنيته الي بس صح مو كل الي نريده يصير النه ..

درت وجهي و رحت دخلت للبيت
وأني افكر بكلامه اووف يا كلبي ماتجيب لنفسك
غير الوجع و الهم و القهر تحب شخص مايحبك
شجاك بس كلي ..

....

ليث/

ذبيت الحجي عليه و مشيت ردت احجي وياها
بعد بس ماكدرت لان عرفت شنو نهايته
تاليتي هم ارجع اصيح عليه واعصب منه
وهيا تتعب و تتمرض نفس ذاك اليوم ..

أني من شفته و تذكرت الي صار كلت
خل اعتذر منها لأن هيا شنو ذنبه اصلاُ
بس ماعرف ليش من شفته غيرت كلشي
وبس سئلت على حاله و حتى لا تكول اني
مهتم بيها كتله همزين حتى لا يصير بيج شي وينذب
براسي ...

أني من اشوف زينب اضوج و اعصب اطلع من البيت كله اذا شفته موجوده بيها لان اتذكر الي صار كله
اني ما اكرهه و لا شي بس همه السبب خلوني
هيج اتعامل وياها و اضوجه حتى مرات
ينكسر خاطري عليه و كله تلاحظ هذا شي
حتى هيا بس تسكت و ماتحجي ..

تسئلون هسه أنت ليش هيج وياها و تتعامل هيج
أني شخص احب اكون على حريتي و ماريد احد
يفرض شخصيته عليه حتى لو أبوي يكون
اريد اكون نفسي بنفسي اريد اني اختار
شريكة حياتي و تكون حبيبتي و ام بيتي ..

و أهلي فرضووا عليه من طفولتي و قيدوني
بزينب كالو زينب الك و ماتكون لغيرك ..
طبعاً هذا الشي أمر من جدي بوقته
جنت اني طفل ومافتهم شي سكتت عنهم

بس بعد كبرت وعرفت كلشي ورجعوو فتحو
وياي الموضوع من صرت مرحلة اولى..

جان جدي يكلي : زينب كبرت و اجوها خطابة
كتله : الله يوفقه ان شاءالله..
اذا خوش ناس ليش لا و انت كلت ياجدي كبرت
وهيا القرارالاول والاخير الها بكيفه..

جنت اني ناسي على شنو يلمح جدي و كال : هاا جا وانته يا ليث

: أنه شبيه جدي

: هياا غير الك البنت و اصلاً انه كلت لابوها يرفض
لان هيا الك من الطفولة ..

اني هنا ماضل عقل براسي طفرت من مكاني
ونسيت منو الي كدامي نسيت جدي و أبوي
وأخواني الكبار كاعدين ..

كتله بصياااح : أنت على اي اساس تقرر بكيفك

ماحس غير ضربه على خدي باوعت لكيت
أبوي كبالي و عصبي مصدوم اول تالي أبوي
يرفع ايده عليه و كدام الحاضرين

استهضمت  كلش و انقهرت صح غلط الي سويته
بس جنت عصبي ..

كتله : مشكور يابه وكثر الله خيرك تالي وكت
تضربني  كدام الناس ..

كال بصياح : وأكسر راسك بعد شلون ترفع راسك على جدك يلا رووح اعتذر منه..

كتله بقهر :أني ماسويت شي غلط على اي
اساس انتو تقررون بكيفكم لعد أني شنو
دوري حتى البنية الي اريدها تكون شريكة
حياتي و زوجتي أنتم تختاروها لعد شبقيتولي هاا..

كتله بأنفعال: حتى حرام عليكم كطعتوا
بقسمة البنيه و ماتعرفون شنو جوابه والله شنو حجاية
حجاها جدي من صغرنه ولازم هذا الشي يصير ..

حجه جدي : ولك ليث تالي عمرنه ناخذ بشوركم
انه حجيت حجايه و ماتصير ثنين زينب الك يعني الك ...

رصيت أسناني بغضب وضربت ايدي على الطاولة الي يمي بقووه صيحت : مو الي افهمووو اني رجال و الي حرية الاختيار  كبرت عااد بطلووو السوالف التعبانه
كااافي يا امة محمد كااافي حتى الله مايقبله ..

محمد من شافني هيج ضليت اصيح و فقدت كلش
وشاف أبوي و جدي شلون مصدومين من يمي
ومن أنفعالي لان أني بلعادة هادئ و ما عصب
  بس بهيج مواضيع لا اتنرفز و ماشوف كدامي بعد اكره  احد يتحكم بحياتي لعد اني شنو هنا ..

جرني من أيدي و طلعني بره و اني اصيح
وداني للحديقة و دفعني بقووة ردت اوكع
بس اتوازنت و كفت كتله بصيااح: ليشش طلعتني

حجه : ولك أنت  شفت نفسك شجاك و هيج تحجي
وين احترامك لابوك و لجدك اكو شخص محترم
هيج يسووي..

حجيت بغضب و أني اشر على بيتنه : وهمه خلوو بيها احترام  اني تالي وكت يجبروني على شي ماريده ..

: ولك احجي وياهم بلتفاهم و يقنعون مو هيج حتى همه راح يعاندون و تعال شبيه زينب و ماتقبل بيه

صيحت و كتله : عمي مابيها شي بس اني ماريده زوجة الي اعتبره اخت فقط كافي عااد ..

: هسه اسكت لا تضل تصيح تروح هسه تبوس راس جدك و أبوك و اعتذر منهم و احجي بلتفاهم ..

حسيت على نفسي و اتندمت هدئت نفسي  : مااشي ..

دخلت جوه و لكيت أبوي  وجدي بعدهم كاعدين أبوي باوعلي بطرف عينه  ماقابل على الي سويته..

رحت بست راس جدي و كتله :أعتذر جدي بس عصبت شووي ..

هز راسه و كال بهدوء :مصار شي

ورحت بست راس أبوي و اعتذرت منه عفتهم ردت اصعد فووك لان لعبت نفسي  و لا يجيبون الموضوع مره ثانيه...

هستوني ردت اصعد بس وكفني صوت جدي من كال
: ترى ما حسبالك بسوايتك هااي و ضليت تجوعر علينه
وتصيح اكلك هاهيه ما تصير الك ترى مو انه الي اخلي جاهل مثلك يمشي كلمته عليه ..

كمل كلامه بأمر :زينب الك مو لغيرك لو طال الزمن فهمت لو لا ..

باوعت عليه بغضب ردت احجي بس شفت محمد خازرني و يأشر براسه حتى اصعد كورت قبضة أيدي بقوووه لا اعصب مره ثانيه واجيب العيد ..
صعدت لغرفة و اني شاب نار من سوالفهم
وعاداتهم هاي الي ماتخلص ...

وظل جدي يوميه  يلمح الي و يكلي الك الك يا ليث مثل الي عاند جدي و ركب راسه الاعناد ..
واني اسكت حتى كمت من اشوف جدي موجود اصعد فوك لغرفتي لو اطلع من البيت ..

وحتى كمت اضووج من اسم زينب و سيرته من يجيبوه تذكرني بأمر جدي و فرض شخص اني
ماريده ... صح هيا ماله ذنب بس كله سبب جدي
وحكمه عليه و كمت من اشوفه اذب قهري بيها
واطلع حركة كلبي عليه ..

تعاملي وي الكل زين الا هيا لا ..*

رجعت للواقع و اني استغفر ربي تعبت من هذا التفكير كلش ...

فتحت موبايلي و فتحت الانستا ابتسمت
واني  أشوف الرساله ..

كتبت : شلونج مشتاقلج
ردت عليه : وأني اكثر بس ماعرف هيج أني عزيزة  عليك

: هسه عرفتي موو ليش ماكو من البارحة ادزلج و ماتجاوبين
: اسفه بس جنت بيت جدي و اليوم يلا رجعت وجانت لمة بنات فا ماكدرت اجاوبك..

: اهااا خوش لعد اخذي راحتج اني هسه راح اطلع
وبليل نتراسل اني وياج و عندي موضوع لازم احجيله الج ..

: شنوو بس لا بخصوص بنت عمك

ابتسمت دومها تفهمني ؛ايي بس ماكدر احجي هسه

:أنتظر بس كلي اعتذرت الها لو لا

كتبت الها :هاااا

: ماطول كتبت هاا يعني ماسويت الي كتلك عليه ليش ليث حرام عليك البنيه خطيه شنو ذنبها يمكن هيا هم انجبرت عليك وماتريدك و انجبرت للعادات والتقاليد

: والله ماادري يا نرجس ماعرف شكلج

: اوك لا تحجي شي هسه بليل و احجيلي يلاا باي..
: باااي .

سديته منها واني افكر بهاي الأبنية..
هاي وحده اسمها نرجس من البصرة اتعرفت عليه صارلي ثلاث اشهر ..

مره كاعد بغرفتي واكلب بلانستا و اجاني اشعار متابعة
دخلت على حسابه عده متابعين بس مو كلش هواي
ماعرف ليش اجاني شعور اريد اتابعه هم ..

وصدك انطيته متابعة و شوي واجتني رساله منها
و كاتبة : شكرا على رد المتابعة
كتبت : عاددي تدللي .

وره اسبوع نشرت صورة و هيا كتبت : منور الله يحفظك..
وضلت يوميه تعلق على صوري و مرات تسوي بشقه و تعيب عليه .
كمت اني استمتع من اشوفها تعلق .. بس بعدها بطلت يوم يومين ماكوو هيا..

حتى كمت يومية انشر صوره حتى بس تعلق بس هيا ماكو و اصدقائي يكلولي : ليث شدعواك هلكد صور كافي لطلاط ..

ماكدرت على نفسي و دخلت راسلته : خيرج شوو ماكو هاي الايام  افتقدناج ..

هاي اول مره بحياتي اراسل بنيه و هيج اهتم بيها
بليل و اني اريد انام اجتني رسالة منها كاتبة : افتقدناج منو لعد !

:قصدي اني و الصور مفتقدين لتعليقاتج ..

: هههه والله جنت تعبانه و هم ماكو نت
: سلامتج ماتشوفين شر
: ربي يسلمك الشر مايجيك

وظلينه بوقته نتراسل للصبح و اتعرفت عليه عمره ٢١ سنة مرحلة اولى ومن البصرة ..

صارت الي صديقة عزيزة عليه كامت تحجيلي عن ايامه و شلون تكضيه لو تحجي عن الجامعة ..

واني هم كمت احجيله كلشي يدور ابالي حبيت اشاركه يومياتي و روحاتي و اصور الها ..

حتى ملابسي مرات اصور  الها و اكله شألبس هذا لو هذا يعني مرات البس على ذوقه ..
وحجيت الها على بنت عمي زينب و عقدتي من هذا الشي و هيا تنصحني و تكلي تفاهم وي اهلك ..

انت مالك ذنب و هيا  هم وخطيه تجرح بيها
كتله اني ماكدر اضم عليه اي شي
ذاك اليوم من درت زينب و كعت بسببي و زعلت
وطلبت اعتذر منها  ..و ماتحملت زعله.

حبيته كلش و تعلقت بيها اول وحده تدخل لكلبي..
حبيت اسلوبه و اخلاقه و حتى من اطلب منها اسمع صوته ما تقبل تكول تبقه غريب عليه شنو ادزلك..

حبيت احترامه لنفسه مو مثل بعض البنات
من تطلب منه شي ادز كلشي الك ..

حبيته و ردته الي حلالي و عشقته حب طاهر
صورة ماطلبت منها لان احسه تخصني
وماريد تتأذى حتى مني ..

وهيا هم طلعت تبادلني نفس الشعور و تحبني الي
وتمنيت تصير الي ...

.....

جوري/

مرت الايام  ومر شهر واني قهري يزيد يوميه اشوف الصورة وانقهر واحقد و اكعد بليل ابجي  على غبائي..

كل ماكول انسى ارجع اتذكر ايامي وياه
وحبي اله واهتمامي كله تكلي انسي ياجوري

بس والله صعبه الحب الاول عمره مراح ينسي
خاصة من عيشج فووك الغيم و حسبالج
صرتي كلشي بلنسبة اله وتالي هو الي يوكعج
ويطيحج من سابع سما للكاع..

شهاب الي غركني بحبه  وحنانه ماتوقعته هيج
يسوي بيه  و لا واحد توقع ..

مرت ايامي و اني حقدي يزيد عليه خاصة
من شفت الصورة اكول  ايي هسه عايش مرتاح
وي زوجتة و أبنه و اني هنا اريد بس اخذ حقي
وعايشة بنار ..

واجه اليوم الي ماجنت اظن راح يجي و يتحقق الي بالي ..
اجه اليوم الي  كلت مستحيل يجي..
وجدد حزني و قهر الايام و سهر الليالي
الايام الي شهدت  على دموعي و وجعي
وحركة كلبي و صوتي الي راح من البجي
والمعاتب ..

اجه اليوم الي اجدد حقدي و كرهي لهذا الشخص  واجه الوقت الي اكدر انتقم بيه واخذ حقي
وارجع كبريائي الي انكسر كدام الناس
وارجع حبي الي راح  وةثقتي بنفسي ارجعه
ارجع كلشي ضاع من يمي ..

كاعدين بالصاله اني وابوي واخوي شاهر ..
جبت الجاي الهم وقدمت لابوي ولاخوي

ابوي ابتسم الي :الله يحفظج بنيتي

ابتسمت اله:ويحفظك النه بويه

كعدت يمهم وظلو يسولفون بينهم واني كاعده اشرب جاي وصافنه فكره تجيبني وفكر توديني

سمعت ابوي يحجي وياي :ها بويه

:شبيج شو احجي ماتجاوبيني

:اعتذر بويه بس صفنت شووي

حسيته عرف على شنو صفنت وباوع على اخوي .. واخوي دنك راسه ماحجه شي

ومانشوف غير اخوي غيث يركض واجه علينه وكف وهو يلهث من التعب

باوعناله شبيه هذا .. حجه ابوي وياه :شبيك ولك شجاك ليش هيج تركض

باوعلي غيث ورجع باوع على ابوي وشاهر ووجهه احمر

حجه بغيض وانفعال :بوويه شهاااب اجه اليوم و رجع هنا

صدمه جبييره بلنسبه الي ... وكفت على حيلي وماحس بس صوت الاستكان وكع وانكسر

باوعتله لكيته مكسور وطشار مثل كلبي ..

باوعولي كلهم ... ابوي ايده ظلت ترجف وكال :شش شعنده اجه هذا

شاهر حجه بعصبيه وبقسووه :اليوم شيخلصك مني شهاب الكلب اجيت وجابك الله ..

طلع بره ولحكه .. وابوي كال بأستعجال وخوف : ولك غيث الحك اخوك لا يسوي شي امشينه خل نروح

طلعو كلهم ... وبقيت اني كعدت على القنفه ساكته ماحجيت شي بس صدمتي ماتقل عليهم

من سمعته اجه اتذكرت الماضي وعيوني غوركت بس مانزلتهن ماكدر شي يمنعني انو ابجي ..

وبلحظات رجع حقدي وكرهي وقساوتي اله من جديد وتذكرت كل السنين الي عشته وياه...

حجيت بغصه وبنبره كلها كره : شجابك شهاب وشعندك راجع ..

noorhaidar18

يتبع ..

انتهى البارت اتمنى يعجبكم 💜🌸
لا تنسون الايك +التعليق ✔
وشنو توقعاتكم بلبارت  الجاي وشيصير

والتفاعل  ترى كلش مو زين وقليل اتمتى منكم  المشاركه و التصويت و تعليقات هيج حلوه
وتفاعلو بلفقرات 🙄🖤..

وها الي يسئل عن النشر ترى بين يوم ويوم نشر راح يكون يلا قراءة ممتعة  و لا تكولون قصير ترى ٣٣٨٠ كلمة  اطول بارت هذا ترى🌿