أنتقام للعشق

البارت الخامس

#أنتقام للعشق 🥀
البارت الخامس
بقلم : نور حيدر
noorhaidar18

مساء الخير عليكم متابعيني🦋🌿...

يا من هواه أعزه وأذلني
كيف السبيل الى وصالك دلني
انت الذي حلّفتني وحلفت لي
وحلفت أنك لا تخون فخنتني

وحلفت أنك لا تميل مع الهوى
أين اليمين وأين ما عاهدتني
تركتني حيران صباً هائماً
أرعى النجوم وأنت في عيشٍ هني

لأقعدنّ على الطريق وأشتكي
وأقول مظلوم وأنت ظلمتني
ولأدعونّ عليك في غسق الدجى
يبليك ربي مثلما أبليتني

(علقوو على الفقرات مو تنسون 😁💜)

مصددومة ما كدر اصدك شهااب حب حياتي و طفولتي عافني  وحدي ..

ضليت على وكفتي ماكدر اتحرك و لاكدر انطق كلمة وحدة حسيت ايدي على  كتفي باوعت لكيت جمارة  واكفة وراي و دموعه تنزل كالت بشهكة : جوري

ماحسيت على نفسي الا و أني واكعة بلكاع صارت الدنيا سوودة بعيني ماشوف اي شي غير صياحهم حتى يكعدووني ..

اخر شي حتى اصواتهم راحت حسيت نفسي عفت هاي الدنيا  ماكو اي شي غير ظلاام ماكو اي نور ..

فزيت بووجع بكلبي باوعت لكيت نفسي بلغرفة ومتمدده على  جربايتي ..

ضليت اتذكر الي صار و كلت بهمس : معقولة جنت احلم ماكو اي شي

ابتسمت و اني حسبالي هذا كله حلم مو حقيقة كمت من مكاني و احس راسي مصدع كمت وكفت كدام المراية ..

وانصدمت من شفت شكلي بعدني بلفستان و التسريحة خربانه  والمكياج ..

مصدوومه كلت بخووف : يعني هذا كله حقيقة شهاب عافني

طلعت ركض من غرفتي و نزلت جوه و جان اشوف الكل كاعد  ابوي الي متمدد على القنفه و مغمض عينه..

و شاهر كاعد كباله و غسان يشوف ضغط ابوي .. عمامي كاعدين بلجهة الثاني

اخواني بلكاع و منزلين روسهم و اهلي كلهم ملتمين و الحزن مخيم عليهم ..

وكفت كبالهم و حتى بدون حجاب دخلت عليهم من صدمتي  و همه انتبهو عليه اجت امي طفرت عليه و جابت شال غطت جسمي بيه لفته عليه و حضنتني : يمه لا تنقهرين الله ياخذ حقج منه

حجت ام غسان بشر : لا تدعين على ابني

هيا امي دارت وجهه وخزرته .. اما اني ضليت على نفسي وضعي مصدومة و اباوع على ابوي الي صافن و مو ويانه ..

عفتهم ورحت لأبوي كعدت بلكاع كباله و لزمت ايده هو انتبهلي و نهض من مكانه عدل كعدته  و صار كبالي و يباوع عليه عيونه حمر ..

كتله و دمعة  طاحت من عيني : بابا شهاب وينه

لزم وجهي بأثنين ايديه : بويه عووفيه و انسيه مثل مانساج و عافج

هزيت وجهي بلنفي و مامصدكه الي يحجووه : مستحيل هو كال اني  ماعوفج و لا راح اتركج للحد ما الموت ياخذني

صااح شاهر بعصبية : عسن المووت اخذااه و لا كسرج و كسرنه ..

اهله كلهم سكتوو ما عدا امه : يما اسم الله على ابني لا تدعي عليه

غسان بعصبيه : يمااا كافي  رحمه لموتاج

: اني شكلت و تصيح عليه كتلهم لا تدعون على ابني كفرت خوما كفرت

صاح بيها عمي ابو غسان  : اسكتي لا وحق الحق اسوي شي ما يعجبج ...

سكتت هيا و اني بالي مو يمهم اصلا  أبالي كلمة وحدة فقط هيا شهاب عافج ..

حجيت بخنكة : جذب شهاب يحبني و مراح يعوفني ..

باوعت عليهم و الخنكة بصدري كتلهم ودموعي تنزل : ايي ايي شهاب مراح يعوفني هو حلف برووحه و بأهله كال مااعوفج و ماخليج وحدج مراح اكسرج و لا راح انزل دموعج

شفتهم يباوعولي و مدنكين صارت عيني كبال شاهر الي دمعه نزلت من عينه كمت بسرعه عليه و كتله : شاهر اخوك و ابن عمك حلف مراح يعوفني و كالي احبج و ماخليج وحدج...

ما حس غير شخص جرني بقووة لكيته محمد يعت بيه و يصيح عليه: ولج كاافي عليش هذا الحجي شهاب عافج و وله مانعرف وين راح عافج وانطاج ظهره و ما كال بنت عمي و سمعته من سمعتي راح و خلاج وحيدة هنا هو الي كسرج هسه و نزل دموعج هذا الي جنتي فرحانه بيه كافي لا تخلين امالج بيه  ..

وخرت من يمه و كتله : جذذب ما عافني شهاااب اني اصدك بيه و كال الي .. يعني جذب هسه على ساعه يجي ..

باوعت على غسان رحتله بسرعه و كتله بترجي : غساان فدووه كللهم شهاب راح يجي هسه فهمهم

غسان بهدووء كال : عوفج من شهاب و انسي اني اخووه و اكلج مراح يرجع شهاب عافج و مراح يجي فا انسي ..

مصدوومة من يمهم و من كلامهم صرخت بوجوهم كلهم و عطت دمووعي تنزل  و هسه عرفت صدك شهاب عافني و مشه :كااافي شنو هذا الكلب الي عدكم كل ساعه انسي و انسي هو لعبة حتى انساها هذااا شهاااب الي كال راح اخلي ايامج بس فرح و سعادة عمرج مراح تشوفين الحزن و الي يكسرج اكسره

امووته الي يرفع صوته عليج اني راح اكوون سماء الج و انتي نجمة الي ... الموت ياخذني منج

حجيت واضحك من الصدمة : تاليته هذا الحجي كله طلع جذذب!؟

: هذا كلامه و وعوده الي كلهن جذب بجذب عافني و وكسرني و ذلني و خله الناس اليوم تتشمت بيه والي يكرهني فرح بكسرتي

كسر كلبي وراح شهاب كص جنحي و خلاني اوكع من السما للكاع ..

عفتهم ركض و صعدت للغرفتي قفلت الباب عليه و كعدت بلكاع ابجي و اشهك مرن كلهن ابالي ضحكاته و حبه الي و حنانه و الاهتمام ..

ضليت اضرب على خدي و كصتي و ضليت اصرخ و اني اتذكر اليوم فرحتي نكلب الى حزن و كأبة ..

اتذكر النسوان شلون فرحانات و متشمتات  اضرب بوجهي بحركة كلب: اااخ ولك شهاب كسرتني موتتني بعملتك اليوووم ... شسويت الك شهاب وهيج تطعني بظهري..

كمت من مكاني و اني أصرخ و ابجي شفت نفسي بلمراية بعدني على نفس الفستان بس المكياج ساح الكحله و المسكارا .

بحركة كلب ضليت اخرب بلتسريحة و املش شعري الماشه كامت توكع وياها خصلات شعر..

لحد مافليته كله و المكياج ضليت امسح بيه وابجي .. رحت غيرت ملابسي لان لعبت نفسي من الفستان كرهته ..

ضليت ابجي بحركة رانة كلمته بأذني :والله ماعوفج انتي الي و ماتصيرين لغيري ..

كمت بحركه و قهر : جذاااب شهااب انت كسرتني ولك الله لا يوفقك

كمت اركع و اكسر بكلشي كدامي لحد ما حسيت الباب مال غرفتي يندك بقووة و اسمع صوت ليث واخواني : افتتحي الباب جووري فدووه

صرخت عليهم و كلت :كافي فدووة عوفوني وحدي خلوني

غيث : جوري فدوه لا تسوين شي بنفسج

بجيت و كتله : ماسوي اي شي هو منو اليستاهل و أذي نفسي عليه لا تخافون اريد ابقه وحدي..

شوي و سمعت صوت اقدامهم و صار هدووء .  كعدت بلكاع و اني ميته تعب من البجي و الصراخ

بس دموعي ماتقبل توكف ليش ياربي اني شسويت وهيج يصير بيه و الله حبيت شهاب حب طاهر ماسويت شي غلط ...

غلطي شنو بس جان حبيته و حب صادق لا زعلته و لا خنته تاليه شهاب كسرني هاي الكسره و بيوم فرحتي بأحلى يوم بحياة كل بنية انكسر بيه و فرحتي هيج تروح ..

الفرح بسببه انكلب الى حزن و مأساة و فاتحة صارت اهلي أبوي الي انكسر و عيونه تبجي بسببه ..

ليش ولك شهاب كسرتني و عفتني ليشش ااني شسويت الك ماكاعد اصدك الي سويته لا والله ما اصدك ..

ضليت على هاي الحالة ابجي و احجي وحدي مثل المخبلة اريد استوعب الي صار ماكو .

شفت الساعة صارت ب١٠:٢٢م كمت من مكاني و اخذت شال شتوي جبير و طويل شمرته على راسي و غطيت بيه كتوفي  ..

فتحت الباب ما شفت احد نزلت جوه هم ماكو احد كله ماشية  و مطفين الاضوية بس ضوه خفيف ..

مشيت بهدووء و رحت للمطبخ و طلعت من باب المطبخ ..

طلعت من البيت كله و الجو جان كلش بارد لان بوقته جان شهر الثاني و الجو يكون بيه بارد..

باوعت على السما مغيمة و كاعد تلمظ اول مره اطلع بهيج وقت و جنت اخاف اطلع بليل بس اليوم مجان بكلبي اي خووف  ..

بنص الليل و رحت للبستان وحدي و متأملة اشوف شهااب هناك بلكت اشوفه و احجي وياااه ..

رحت و شهااب ماكوو كعدت بلكاع يم الشجرة و ابجي : هسه يجي شهاب ادري بيه مراح يسويه

وكعدت كعدت بمكاني و ماتحركت و الجو كل ما يزيد بلبردوه ..

ضلت تاخذني الصفنة هنااا و دموعي تنزل  و اشهك وكل ما اتذكر كلامه وياي و وعده الي و اني فرحانه انو هذا الشخص راح يكون حبيبي و زوجي ..

وعندي ثقة بيه و اصدك بكل كلمة يكولة اضل اضرب على خدي و على كصتي واصرخ : غبيية شجاج وصدكتي بيه شجاج و حبيتي و أمنتي بيه

ماحس غير صوت الرعيد قووه و ضربة قووية اني كمزت من مكاني و صرخت : الله يكسرك شهاااب مثل ما كسرتني و موتتني اليوم   اشووفك بيك يوم و اشوف انكسارك بأيدي الله ياخذ حقي منك ..

كمت ابجي و دموعي تنزل مثل الشلال على خدي و السماء اعلنت نزول الأمطار...

كامت تمطر بقووة وجهي وجسمي  و ملابسي  كلهن اتنكعن بلمااي و شعرري هم اتنكع صرت عبارة عن ماي ..

حسيت بلبرد و التعب ردت اكووم بس رجعت وكعت عضامي احسهن اتكسرن ماكدر اكووم بجييت بحركة ورفعت راسي و كلت : ربي شهااب كسرني كسره ماكدر على حمله ساعدني يااارب و اخذ حقي منه ..

حسيت نفسي كبرت وصار عمري ٥٠ سنة من التعب و القهر الي شفته و انجمعن عليه بيوم واحد عمري و حياتي ماشفت هيج ما يكول عمري ١٩ سنة  ..

خليت ايدي بلكاع حتى اسند نفسي و اكو و فعلاً كووه يلا كدرت اكووم مادري ليش احس عظامي تكسرن يمكن من البرد حتى كمت اعرج بمشيتي ..

وصلت للبيت و اني تعبانه و المطر قوووي و جسمي كله و ملابسي نكعن ..

وصلت للبيت لكيت الاضوية كله مشتغله و صيااح اسمع من بعيد ..

دخلت من باب المطبخ الخارجي  و صار كبالي شاهر دخل للمطبخ هو شافني و مثل الي انفزع و الخووف بعيوني صاااح بقووه : جووري  لكيييته

دخل غيث شافني و طلع يصيح : بوووية لكينه جووري اجت

يمكن جانو يدورون عليه حقهم بنص الليل طلعت و خافو حسبالهم سويت شي لو شردت..

اني عيوني كوه مفتحته و تعباانه احس نفسي راح اوكع كلهم التموو بلمطبخ و امي تلطم على صدره من شافت حالتي .

اجه شاهر ركض عليه و حضني  بقووة اني ضليت ابجي و اشهك بحضنه كتله : شااهر شهااب كسرني و عافني

كال بصوت مبحوح : الله يكسره مثل ماسوه بيج  ..

ضليت ابجي لحد ماتعبت و سكتت هو باوع عليه و خايف كال : اااخ يابعد اخوج شبيج كليلي و ليش هيج نكعانه وين جنتي ولج كلوبنه ماتت حسبالنه بيج شي ..

كتله و اني ارجف من البرد و هو لاحظ رجفتي صااح : جيبووو غطه

كتله ؛ تعباانه شاهر تعبانه احس نفسي راح اموت

اجت فاتن جابت الغطى و غطتني و هيا تبجي على حالتي و أمي اجت و حضنتني احتاجيت حضنه كتله بأنكسار : يمه لا تعوفيني فدووه

كامت تبجي: اااخ ولج يمه شلون اعوفج حسبي الله ونعم الوكيل بلي سوه بيج هيج

اجه محمد ساعدني و اخذني صعدني فوك و دخلني للغرفه و اجت وراه فاتن و امي يساعدني .

كومتني أمي  للحمام و اجت فاتن جابتلي ملابس و دخلت غيرت ملابسي و اني ارجف من البرد طلعت و لكيت فاتن و اكفتلي اخذتني و كعدتني شسورت شعري و نشفته و هيا تبجي و تكول : أسفة جووري

محسسه نفسه الذنب بلي سواه اخوها .. اني ما حجيت وياها لان تعبانه و احس صوتي راح من البجي و الصراخ .

خلصت و امي اخذتني نومتني بفراشي و اجت نامت بصفي و غطتني طفت الضووه فاتن و سدت الباب و طلعت ..

ضلت امي نايمة بصفي و تلعب بشعري و تقرالي ايات حتى انام بس اني هيهات يجيني النوم لو عيني اغمضهن ...

بقيت نايمة بلفراش ماتحرك ايااام لا نوم و لا أكل احس نفسي انسليت سل عافيتي راحت اخذها شهااب و راح...

كل يوم يجي و يمر عليه اكول هسه شهاب يرجع و يصحح خطأه بس مر أسبووع و نص و شهاااب ماكو

وأني راح الأمل  مني و بعدني بلفراش و ما أنام و لا أكل  كلهم يجون عليه و يدخلون لغرفتي بس اني ما انزل حتى جوه باقية بلغرفة .

يجون اخواني و زينب  يغيرولي جو و يجيبون اكل ياكلون يمي بس اني مو وياهم ..

بيت عمي اهل غسان مايجون مادري يحسون بالذنب ماعرف علاقتنه انكطعت وياهم ..

وبيت خالي ابو زياد  تجي ميامين بت خالي و تساعدني و تكعد يمي ماتعوفني هاي اخت بلنسبة الس ماعافتني ابد ..
وحتى زياد الي معافني ورجع و صار الي اخو وصديق ..

لحد ما اجه شاهر و محمد يتوسلون بيه انزل ..
محمد ؛ خووويه فدووه كافي ارحمي حالنه وارحمي حالج حرام الي تسوويه انزلي جوه يمنه ترى والله اشتاقينه لضحكاتج و لصوتج الي جان يرج البيت رج  وين جوري الي نعرفه ...

شاهر : ولج جوري الي باعج بيعيه كافي هو سافر وشاف حياته انتي هم انسيه صح صعبه بس شنسوي مانكدر غير انو نمشي حياتنه و الي راح عمره مراح يرجع .

محمد ؛ جووري ابووي ولج اكل ما ياكل لان مايشوفج كدامه ولج أبونه تعب ترضيه انتي ..

جنت مو وياهم و لا على كلامهم بس فززني كلام محمد كلشي و لا أبوي هذا دنيتي و عمري أبوي  الي جان ما يخليني ازعل هسه اني ازعله و اكسره بسبب شهااب ..

كلت بهدوء  : روحو هسه اني انزل و راكم .

همه فرحوو و طلعو عافوني على راحتي كمت اني من مكاني و هستوني من نهضت حسيت بدووخة مو طبيعيه ..

وماحس غير ظلم المكان و ماشوف كلشي و حتى صوتت ماكو وكعت و سمعت بس صوت الوكعة ...

فتحت عيني لكيت نفسي بمكان كله أبيض و شفت أخواني كلهم و اكفين بعيد عني و احد يمسح على راسي باوعت بتعب و عيوني مغوشه شووي و وضحت الصوره عندي لكيته أبوي يمسح براسي و يبجي و يمسحه بلشماغ ..

كتله ؛ بووية أني وين

من شافني حجيت كال : كعدت ولكم

فزو اخواني عليه ملتمين و يتحمدون بلسلامة الي
ليث كال ؛ ولج طيحتي كلوبنه صارلنه يومين

استغربت من كلامه ؛ يومين شنوو

غيث : صارلج يومين بلمستشفى هبووط حاد عندج و اهنيار عصبي و فقر دم لأن  متاكلين

شاهر : من نزلنه منج شفناج اتأخرتي فا صعدت فاتن و هيا الي شافتج

مصدومه يومين اني بس نايمة و محاسه بحالي .. باوعت على أبوي الي يبجي و بسببي كال : ليش هيج بوية كسرتيني و أذيتيني بيج اذا صارلج شي لا سامح الله  اني وين اروح ماعندي غيرج انتي عيوني الي اشوف بيها ليش تردين تعمين عيوني ولج أنتي فرحتي ..

كتله بشهكه وبجيت من كلامه و حسيت نفسي حقيرة و شيلت اهلي حمل و حزن مالهم دخل  :اسم الله عليك بوية فدوه سامحني واعذرني  ما جنت بوعيي

كال : اوعديني بوية ترجعين مثل قبل ماريد أشوف جوري الضعيفة اريد بنيتي ترجع مثل قبل و ترجع ضحكته و ضحكتنه وياها..

مسحت دموعي و كتله : اوعدك بابا راح ارجع جوري القديمة ..

وفعلا طلعت من المستشفى  ورجعت طبيعي مثل قبل أنزل واكل جوه و اضحك وياهم و اسولف حتى بس ينسون وحسبالهم ارجع طبيعي وهمه مدري صدكو مدري سووه نفسهم مصدكين انو اني تغيرت و رجعت طبيعي بس نظراتهم حزن على حالي و شفقة ...

ومرت الأشهر ورجع كل شخص لطبيعة حاله بس ابد ما نسو وظلو بس يدللون بيه و مايردوني ازعل و بيت عمي ابو غسان رجعت علاقتنه وياهم طبيعي و عادي لان همه مالهم دخل ..

مرت الاشهر واني حسبالهم نسيت واضحك وياهم و الناس تحسدني على قوتي بس همه شافو الظاهر ماشوفو الي بداخلي بعده مكسور و الزمن ماعرف راح يجبر هذا الكسر لو لا ..

كل مايصير الليل و اني دموعي ماتنشف و من تطلع الشمس امسحهن و وارجع ضحكتي و ابتسامتي الهم و من اصير وحدي تبدي الذكريات و الهموم تجتاحني ..

وصارت مشاكل و هموم و مشكلت محمد و فاتن الي ماخلصت لحد يومنه هذا اتذينا كلنه بسبب شهااب ..*

.
رجعت للواقع و اني دموعي تنزل و لازمه بيدي البدلة عفته و اخذت عباتي و الصورة بيدي و رحت للبستان كعدت هناك وفرغت  طاقتي ابجي و الصورة خالته كبالي واحجي وياها حسبالي هو كدامي احجي بحقد و قهر مدفون من سنين : ولك تضحك و تبتسم و عايش حياتك و اني دافنه نفسي هنا .. متزوج أنت  و عندك طفل يشيل اسمك و اني بعدني لنقطة الصفر بعدني مثل ما اني ..

شفته مبتسم حقدت اكثر : فرحان مووو و تبتسم و اني هنا كوه عليه ابتسم علمود اهلي و لك شربتني المر و الويل و كسرتني اني يوميه اكول الله ياخذ حقي منك اريدك تنكسر مثل ما كسرتني بس شوو نفسك وصاير احلى و عايش حياتك و عايفنه هنا مكسورين  ...

ظليت احجي و ابجي لحد ما مليت كمت من مكاني و لبست العباية و رجعت للبيت صعدت فووك لغرفتي و جان أشوف  شاهر كاعد على الجرباية و عيونة مركزهن على فستاني و يهز رجله بتوتر ..

كتله : شاهر يمته اجيت

رفع عينه عليه و بدون أي مقدمات كال ؛ شكوو شبيج جوري ليش مطلعه هذا الفستان و ليش اصلا بعده عندج كليلي شبيج

رحتله و ماحجيت شي بس انطيته الصورة و كتله :أخذ شووف

هو اخذه مني و من شافه كام على حيله من الصدمة و يباوعلي و ساعه يباوع على الصورة كال بصدمة :معقولة شهاااب متزوج

بجيت و كتله : شفت شاهر شسووه بيه

هو اجه حضني و كال : الله لا يوفقك يا نذل اشش معليج يعمري عووفيه خل يولي

حضنته و شهكت  كتله : اني ما زعلانه على شي بس على عمري الي راح و شبابي الي كضيته بقهر و بجي

كتله واشهك : والله حتى شيبت من وراه شعري صار ابيض من الحزن

ضل يهدي بيه و اني نار و مشتعله بكلبي بسبب الي شفته ...

.....

فاتن /

كاعده بلغرفة ارتب بملابس امير  شفت محمد دخل للغرفه باوعتله ورجعت ارتب الملابس ما هتميت لوجوده..

هو اجه وكعد بلكاع كبالي ظل يباوع عليه و اني مشغولة بس توترت من نظراته ..

كال  بهم :ماكافي يا فاتن ما تحنين

كتله بهدووء: على شنوو احن

لزم ايدي و باوعتله شفت بعينه حزن و حنية و حب صارلي شكد مشايفتهن او اكول اول مره بحياتي اشوفهن : كافي فاتن فدووه حني شنوو ما نسيتي ماعرفتج هيج قاسية سنين و اني اعتذر على الي سويته و كتلج متندم بس انتي ابد ما تنطين فرصة  حتى ما تباوعين بوجهي مو اني محمد حبيبج و زوجج و ابو بيتج ماكول خلص كافي عاد ..

فجر كلشي جنت ضامته بكلبي و الماضي الي عشته كلته بغصه :شحن فهمني و شنسه و لك أنت عيشتني ذنب مالي دخل بيه بس شنو اني اخت الي كسر كلب اختك  بس كلي هذااا منطق هاااا أني  شنوو ذنبي ..

: ولك حبيتك وادري انت جنت ما تحبني عيشتك أمير  ماكلت يوم الك لا كلشي تريده اكلك سمعاً و طاعة جنت امووت عليك افرح من اشوف أبتسامتك و بس على شنوو على الي سوواه شهاب بجوري أنت بعتني و ذبيتني و صرت فلسين ما اسوه ..

واني الي جنت اعتبرك سندي و ابو بيتي و أبوي و وكلشي بدنيتي تاليته ٩ أشهر ذابني عند أهلي  و ماتسئل عليه ليش فهمني شسوويت و تعرف كلش زين جنت اول شخص معترض الي سواه شهاب و حتى اهلي ماقبلو بلي سوواه و انقهرو منه و أبوي تخربط ايام بلمستشفى بقه ..

ولك ذبيتني عند اهلي و ماسئلت و كلت هاي شبيها ما بيها شمحتاجة بس جنت توصل فلوس بيد امك  لو مو أمير جان مارجعتني لهذا البيت و اني هم رجعت غصباُ ما عليه هنا علمود ابني و الله مو علمودك رجعت ..

يتبع...
💔💔

noorhaidar18
انتهى البارت اتمنى يعجبكم💜
لا تنسون الايك +التعليق ✔

اعتذر  جان لازم البارحة انشر بس مجان عندي نت و هسه يلا صار  وهذا البارت  ٢٩٨٣كلمة لا تكولون قصير 💜