.
.
جان هذا خبر صادم
انفجعت عمة دعاء وعبالك اليوم مات عمو سلمان
صعبة تشوف بتها متحطمة ومنتهية هيج
والبنية مو مثل الرجال شائبة وحدة تنتهي
وخصوصاً الي صار برجلها شي حساس وواضح
حلا.الله لايطيج حووور الله ياخذج
خربتي حيااتنة نهيتينا
اجت شمة تركض واني متعجبة كمية الحقد العدها
شمة.وج كومي گطعيها بردي گلبج
كامت هي رغم ماتكدر تتحرك ذيج الحركة
حلا.وج حور اكرررهج جيبيلياها
فاطمة.كاافي لج مو گلت ناخذج للبنان ورجلج ترجع أحسن من قبل وانتي شمة خفي حقدج
والنار التردين تشعليها بيها توج بيج
ماخذة لكمتج من حلگج ركدي شوية.
آصف واكف ويحك شعر لحيتة
يباوع لأختة وحقهم والله شبة ادمرو
بيومها محد تغدة حتى اني مكدرت اكل شي
رجع مصطفى ووضعة اسوء حتى يبجي
طلعت فلوسي عندي 55 الف انتضرت صارت الساعة
4 خليتة يبدل ملابسة مشطتلة وكعدت احجي ويا
حور.صفاوي تروح للكراج تركب منا كيات مو تكسي
تنزل هناك تركب لسيارات بغداد ماشي وبعدين تركب للجادرية تندل بيت جدو
بس توصل كوللهم اني شردت وخلي يودوك مكان ثاني
مصطفى.اني ماعوفج وحدج
حور.لا معليك بية روح
مصطفى.اخاف أروح
حور.انت رجال والرجال ميخاف
مصطفى.ماروح ماما گالت ابقة يمج
حور.مو بكيفك هسة تروح يلا كوم
مصطفى.ماروح گتلج
ضل هنا طاح حضك ادب سز
والله اذا شفتك اجيت تبجي بعد اكطعك
يلا ولي
مصطفى.شبييج انتي شبيج مخبلةة
حور.لتصيح
مصطفى.يلا أريد انام تعبان
سويلي عشة طيب روحي
غميتة وطلعت تمنيتك امين طاح حضك
رجعت فتحت الباب
حور.تروح لو لا
مصطفى.نمت ماسمعج
نزلت تلگتني شمة متخصرة
شمة.يلا ولج طلعي نضفي الكراج
جنت ضايجة وتعبانة روحي طالعة
وهاية كاعدة تتفستق براسي
حور.وخري عني لا اجي أطلع حرگة گلبي بيج
ولي منا احسنلج
اجت يمي رادت تضربني زهكت بيها
حور.لتكملين نقصج بية وخري لا احط هاي السجينة بگلبج مو ضالة مدگة لقصي وتتبخترين ع راسي
آصف.بگلب من ؟
حلا.والله عدكم سوابق تسوينها
جانو استوهم مبدلين يطلعون للدكتور
وحتى قصي طالع وياهم
آصف.بگلب من جاي احجي وياج هيييي
حور.عادي هيج طلعت مو قصدي شي
خزرني آصف وطلع وحلا اكلتني بنضراتها
شمة.تعاي ساعديني
حور.ساعدي نفسج
طلعت للحديقة واذكر ذيج الأيام
شكد جنت أضوج ومعاجبتني العيشة هنا
بس لا بالعكس هسة أتمناها
گاعدة وعيني للسمة اندكت الباب وراحت تفتحها شمة
عماتي سوزان وهاجر ورضاب
شكد متغيرات ومبين عليهن الحزن لفقد عمو
طلعتلهن عمة دعاء وهنة يسألن على حلا
شافني كاعدة بالحديقة اجن يمي
ارتبكت من عدهن اول مرة اقابلهن بعد وفاة عمو
رضاب.ليش كاعدة هنا
اجت حضنتني وباست خدي
دعاء.اني فايتة قبلجن اكمل صلاتي
هاجر.احنة هسة نجي وراج
سوزان.منو سوة بيج هالعملة احجي
زينو شعرج شوفي الحقد هيج مالي گلوبهم
انتي شعليج اكيد مأذينج ومطلعين روحج
حور.عمة اني مبية شي بس صفاوي
ديطلعون وي الفلاليح
رضاب.شنووو
هاي منو طلع هالقرار
حور.بيبي
رضاب.شنو ضربها زهايمر لو اني مشتبها
والله اذا ماوكفتنها عد حدها نكلب البيت ع روسهم
حجت وي عماتي وخازرتهن وهي شخصيتها قوية
وراحن للداخل
اجت يمي طواطة عبست وجهة بحركة حزينة
جانت شايلة بيدها جنطة امها
فتحتها وطلعت قلم حاجب لونة جوزي حلو
زهراء.هاج أخذي الج
فرحت وأخذنة منها
حور.عفية طواطة شكرا
زهراء.روحي عود جبتلجيا تكوليلي طواطة
أروح يم امي أحسن
حور.لاطو.. زهراء تعالي اشاقة وياج
زهراء.شتردين
حور.روحي بعدين احاجيج
اخذتة ووكفت كدام المرايا
اكو شعر حواجبي يجكجك خطيتة بالجوزي وخففتة
بين طبيعي حلو وشكلي احلى رفعت الشال شوية عن عيوني وأخذت القلم ضميتة بنص الملابس
نزلت وعماتي يحجن بصوت علي وي بيبي
رضاب.شوفي يمة تبطلين مصطفى من الفلاحة
خير ع خير مابطلتي ماخلي بيت اطبلة ماحجي شسويتي بي وافضحكم والله
يتامة وشبعو قهر تهجولو ونلعب بيهم لعب
اتقي الله ابن ابنج مو عدوج وهيج تسوين
فاطمة.محد يدخل ويخلي كلمتة فوك كلمتي
هاجر.عمي شبيها الدنيا الذابحين روحكم عليها
باجر عگبة لافين روسنة وميتين
وماكو غير شبر واربع اصابع
وبهذا الوكت بس الي الله يحبة
يهيئلة كبر وناس دفنة
فاطمة.شنو متانيات موتي ولجن
رضاب.الولد ييمة كعدي يم اخيتة وكافي
اتقي ربج
فاطمة.يلا كافي شو
اني ردتة يتأدب خلنة بالبيت وإذا سوة شي ازرف عيونجن
رضاب.خو مو كاعدين ودگون على اختة
وتردونة يسكت وگلي لشمة خلي تكف عن حور
ترة كلشي ندري
سوزان.اي عاد شمة خلينة ساكتين عنها
لانطلع الخياسة مالتها وتضل تتبجبج
اني واكفة يم شمة واسمع الكلام
هي ارتبكت وكامت تشيل الحاجة وتذبها
فرحت الحمد لله مصطفى بعد مايطلع للزرع
همزين ماخاطرت ودزيتة لبغداد وحدة
يمة يخطفون أخوية
صعدت فووك للغرفة فتحت الضوة
وشمرت نفسي علي حضنتة
هو دار وجهة عني ورجع نام
حور.ولك اكعددد بعد متروح للزرع
مصطفى.شنوو
حور.والله عماتي هسة كالو
طفر علية حضني فرحان
مصطفى.اموت عليج احبج بكد الهوى
حور.حتى اني اعشقك
مصطفى.يلا هسة أريد انام نعسان
حور.يلا نام اجيت ابشرك
الحمد لله هم وانزاح من صدري
رجعو بالليل من الدكتور وگايللهم لازم تعدي فترة تتحسن رجلها ويلتحم العضم بشكل تام لأن صاير عدها مو بس كسر تهشم بنسبة قليلة وإذا يردون يسافرون اقل شي بعد 8 شهور
فتحو عماتي موضوع صفاوي
وخابرو ابو حسن بعد ميمر علي
رضاب.خلي يروح لبيت ازهر اذا ماتردونة
سوزان.صح
دعاء.لاخلو هنا متعود ويم اختة
رضاب.بكيفكم بس خطية يتيم لاتشمرون غضبكم بي
قصي.ليش عمة شفتينة مسويلهم شي
رضاب.حور بنية مزينينها عمي هاي ماصايرة
الله مايرضاها شو بس عدكم سامعتها
سجنتو امين كافي لتضلون دورون ثارات
بالتالي محد يندم غيركم
وهاي كعدتهم بالمطبخ كاعدين يتعشون عود ليش مو يمكم بشنو انتم احسن منهم ولد عم جد واحد مستوى واحد وكضيتو عمركم بهذا البيت سوة
حلا.تساوينة بيهم مجرمين ذولة
رجلي انتهت وكتلو ابوي
رضاب.المجرم مو بس اليكتل
آصف.كااافي
رضاب.الي يحث ع الكتل هم مجرم
آصف.كافي عمة يلا اكلو
رضاب.من كثر الدك يفتك اللحيم
وهاي النتيجة حتى عشاكم ماريدة
يلا يمة كومو
بالكوة قنعو عمة تبقة وماتترك الأكل
واني واكفة منتضرة طواطة تجي حتى المرة الثانية تجيبلي وياها صبغ حواجب اسود حتى يبينن
استحي اوصي عمة
خلصو عشة غسلنة المواعين اني وياها
حور.زهوري
زهراء.ها
حور.اريد صبغ حواجب اسود حبابة جيبيلي المرة الثانية
زهراء.عدنة صبغ ابوي يصبغ بي شعرة وشواربة
أجيبة الج
حور.عفية حبابة لتنسين
دارت وجهة وسوت حركة بأيدها
زهراء.على عباالي عود
ثاني يوم صفاوي بقة نايم ل 11 وعماتي يمنة
جان الوضع اهدء من كل يوم
عماتي وبيبي كاعدات بالمطبخ واني يمهن
عمة دعاء بغرفتها قلما تطلع بس تقرة قرآن وتصلي لعمو
الي مر على وفاتة 17 يوم
فاطمة.اليوم طلعن جهزنها يبوو يهالبت بكلشي عسرة
المهم بسكوت بسكوت ماريد واحد يشوف الجهاز
اني لو مااخاف الله جان حتى جهاز ماكو الها
رضاب.يمةة
فاطمة.المهم جيبنة اسود هدوم طلعة وبيت شالات وعبي راس آصف گال ماريد تراكات جيبن دشاديش
طالعة من عينة فرد نوب يحجي من ورة خشمة ولايريدها
سبحان الغيرك أگلة كتلت روحك عليها يگلي هاي قبل
رضاب.هسة عوفي هذا الموضوع
شكد خلالج فلوس
فاطمة. مليونين ذهب و مليون تجهيزات
رضاب.تلاثةة عمي وين لاكينها هاي حتى الله مايرضاها
مو هاي شمة المطلكة طيتوها 7 مدري 8
غير الصالون والبدلة خذنهن من قصي
وبعدين هاي الثلاثة شجيب بيها
خطية يمة يتيمة وأول فرحتها حرام
فاطمة.هو الگال تلاثة لا اكثر ولا أقل
رضاب.شلون بعد الله مايگلبها
واحنة المنة وبينة جاي نضلمة
ضلن عماتي ضايجات وصح الفلوس حيل حييل قليلات تفاليس اصلا مايسون بس محجيت شي ولابينت اول شي هسة عدنة مصيبة عمو وسجن أمين والشي الثاني أريد شوف بعد وين يوصلون
طلعن الضهر للسوك ورجعن تقريباً ساعة 7
دخلن كل وحدة بيدها جنطة حجم متوسط لغرفة بيبي
حتى مابيهن نشعة عروس أو ملابس عروس
والجنط مضمومة جوة العبي
صاحن علية ورحت يمهن
رضاب.تعاي عمة شوفي هدومج
جانت مقهورة وماعاجبها الوضع
بيبي فاطمة كاعدة على سريرها وتباوع
فتحن الجنطة الأولى كولها اسود
7 دشاديش لأن معندي ولا دشدادشة
عباية راس وحدة جاهزة وحدة قماش
3 صايات اسود 5 تراكات
والجنطة الثانية ملابس طلعة 3بناطير 4قمصان
تنورتين حذاء وجنطة
سيتات عرايس وملابس داخلية هم لونهم اسود
والثالثة طلعن علبة مبين مال ذهب
وجادر صلا وسجادة وقرآن وجوة قطع قماش سود
وقطعة بيضة صغيرة خلنها بيدي وابتسمن
رضاب.وهذا الذهب زودنا من عدنة 300 وهم مابي شوفة
شسوي عمة هذا نصيبج
فتحن العلبة ذهب عراقي باون خفيف
وتراجي ام الحلقة ومحبس ناعم
وحلقة خليجي صب
هزيت راسي أي اجت عمة هاجر حضنتني
هاجر.ذني ميكبرن بخت لاتزعلين
انتي لبستي ذهب وشفتي ودللتي
بس كلشي يروح ويجي بوكتة
شوفي شجبنالج راويها رضاب
رضاب.هاي هدية من عدنة شوفي
فتحت علاكة طلعت لوشنات جسم
ومكينة براون وتوربان عطر ومعطرات ثنين
4 اقلام حمرة فونديشن ومسكارا وشدو وقلم كحل وحاجب
حور.شكراً عمة
همست واني فشلانة صارت لمة
رضاب.العفو حبيبتي راح اضمهن يم بيبيتج
وباجر نودي القطع للخياطة وانتي يمة خرخشي جيبج
أريد 45 للخياطة
و150 ملابس نوم وجم روب
فاطمة.محلفني آصف غير ذني ماطي ربع بعد
رضاب.بكيفج ، اني راح اخذ الباون ابيعة واجيبلها هدوم
أخذت العلبة وطلعتة
رضاب.عمة شتسوين بالحديدة المخسفة هاي ماتنعد ع الذهب اهم شي لبسي تضلين وراهم مجرودة
كلامها صح وبعدين اني مالبس ذهب
حتى هية خفيفة ومالها قيمة
حور.اي عمة
فاطمة.عوفيها اني اطيج ميتين
رجعتها عمة للعلبة
رضاب.كثر خيرج
طبكن الملابس وضمنهن واني طلعت
قصي وآصف واكفين يحجون شافني آصف صيح
آصف.شمخلية لحواجبج روحي مسحي لااقندرج
صعدت للغرفة مسحت حواجبي وبجيت
يربي شنو هالشلعان گلب ولشوكت اتحمل
مو كل انسان الة طاقة تحمل تعبت والله
دخلت للغرفة واني اسمع طواطة من الدرج تصيح
زهراء.حووووور
حطيت أيدي على أذاني
حور.هااا
اجت وبيدها علبة
زهراء.هذا الصبغ اليوم وصيت امي علي واشترينا الج من السوك تعاي احطلج
حور.كولي والله وأخيراً
اجت يمي
زهراء.وين اكو شعر بحواجبج حتى اصبغة تضحكين علية
حور.شون ابوج يصبغ لحيتة الي تجكجك
هاي اكو شعر دا احس بي خفيف صبغي
زهراء.هاا
حور.اي يلا ابدي
لبست الكفوف وخلتلي الصبغ
ربع ساعة وغسلتة
والله أخذن لون مدري الجلد تصخم
بس احسن من ماكو
زهراء.خطي شوية بالقلم
طلعتة وخطيت طلع شكلة لابأس
حور.عفية شكراً
زهراء.عفو اني نازلة
حور.براحتج
نزلت وخرت الشال عن راسي
شكد عماتي توسلن يشوفنة ماقبلت
أحس راسي يحركني أو يحكني يبزز
حكيتة حيل وعقجت وجهي بالم
باوعت بالمراية متقشط وأحمر صاير
مثل النار تسعر بي
لبست غير شال ونزلت يم عماتي
رجع آصف صاح بية اغسل وجهي حجت عمة
رضاب.شبييك صبغتلها حواجبها عندك شي
واني قررت قبل العرس ادگلها تاتو
آصف.حتى أشد گرون فد مرة تسوي تاتو
وبعدين شنو ناسية اخوج
رضاب.ماناسية اخوي
بس هاي هم بت اخوي ويتيمة ومكسور خاطرها
والحي ابدة من الميت
آصف.هاي آخر مرة أسمح لأي من يكون يدخل
ماشي عمة
رضاب.مو غربة حتى تكول اتدخل اني عمتها
آصف.سوي اليعجبج بس هي التاكلها توكع براسها اني اكيد ماراح احاسبج بس احاسبها يعني هيج انتي تضرينها
وانتي لج صعدي فوك ماريد اشوف خلقتج هنا
صعدت لغرفتي واجت وراية عمة رضاب
قفلت الباب اني استغربت
حور.ها عمة
اشرتلي اس
فتحت الموبايل مالتها خابرت وحطت الموبايل على أذني
سمعت صوت ماما تبجي واني بجيت وياها
مي.ماما حوري
حور.ها ماما حبيتي وياج ليش تبجين بعد عمري
مي.ماكدر بدونكم ماكدر راح اتخبل
يومية بالكاظم أريد گلبي يبرد ماكو ولج تعبت يمة
حور.ماما والله مابينة شي الله يخليج اهدي
مي.وأمين البسجن ولج بالأسبوع مرة
شفتة مرة وحدة مو هو مو وليدي مبدلينة
جارمين بي
شهكت ولطمت خدي
حور. ليش ماما ميشوفو طفل
مي.خالج يريد يرفع دعوة على مدير السجن
لأن كايللهم هو معترف بسرعة شكو تضربونة
لو مامعترف حقكم هو جاي من البصرة معترف
حتى قبل لايتسفر
حور.الله لاينطيهم إن شاء الله
ماما داري اخذيلة اكل وملابس
مي.وانتي حور ماما ديري بالج ع نفسج وعلى اخوج
ماشي حبيبتي
حور.ماشي ماما مو تقطعين بية خابريني دوم
مي.كل اسبوع اخابرج ياعيون امج
حور.ماما بوسيلي امين
مي.ابوسة وانتي ماما بوسيلي صفاوي
وانتبهي علي اخوج بعدة صغير
حور.ماشي ماما
مي.مع السلامة يعمر ماما
لتخلين بالي عندج
حور.مع السلامة ماشي ماما إن شاء الله
سدت ماما التلفون وبعد ماسمعت صوتها
لمدة سنة ونص ومعبالي تطول هالكثر