أنتقام للعشق

البارت الثالث

#أنتقام للعشق 🥀
البارت الثالث
بقلم: نور حيدر
noorhaidar18

اي يا ذخر همي
اتجاوزتك وكملت
مجبر جنت مو بطل
ليش استلذ بالنصر
وادري اني مو نشمي
غصبا عليه عشت
من انت مو يمي
كلت على هجرك حلو
وكالولي عفيه وكفو
بس النتيجه شنو؟
كدام ناسي صدك
اني ربحت الحرب
بس خسرت حلمي 🥀💔...

رائد ابو فتيان...

...........
(

علقو على الفقرات مو تنسون 😁💜)

مو مصدكة من الي كاعد أشوفة مصدومه ظليت بمكاني ..
شهااب واكف كبالي ومبتسم هذا شجابه هنا وشيسوي ..

كلت بصووت يرجف : ش شهااب شتسوي هنا

أبتسم وكال : سامحيني جوري

دمعت عيني وأني اشوفه كدامي ردت اروح احضنه واعاتبه على السواه بيه

بس بلحضة وحده رجع كرهي وحقدي اله ردت أنتقم ..

مشيت واني بيدي السجينة رحت اله وامشي بخطوات هادئة وهو بعد مبتسم الي .

وصلت يمه ورفعت السجينه وصارت بوجهه هو عقد حاجبه وباوعلي ..

واني بسرعه وبدون سابق إنذار ضربته .. طعنته بكلبه ودموعي تنزل طعنته مثل ماطعني بكلبي وعافني و انطاني ظهره و راح ..

هو بسرعه وكع بلكاع واني كعدت اضحك بهستريا والدم مله ايدي و وجهي

صرخت بقووه : كتلته وأخذت حقي ...

شهكت بقووة فزيت من حلمي الي حلمت ..
ظليت أتنفس بسرعه أريد الهوه يصول لريتي رفعت أيدي أثنينهن مابيهن شي لا دم و لا شي ثاني

كمت من الجرباية و دموعي تنزل أريد اخذ حقي بس شلون و هو ماكو ماموجود ..

رحت غسلت وجهي بماي بارد بس كلبي ناره أبد ماتبرد موجره توجر ..

رجعت أتمددت وخليت راسي على المخدة و دموعي تنزل دون أمر ..

أمسح بيهن ويرجعن ينزلن ضليت أباوع على السقف واخذتني الذكريات للماضي ..

*
كاعده بلغرفة وماحس غير الباب انفتح بقووة كمزت من مكاني واشوف جماره جايه كبالي

:بسم الله شبيج ولج هيج مدرعمه ولا احم و دستور

حجت بسرعه : ولج يلا بدلي بسرعه خل نطلع

: يااا وين نطلع ولج

:لج بلكوه قنعت شهاب يطلعنه يونسنه ونفتر بلسوك وكال يلا نروح وصيحي جوري وياج

ابتسمت اني وكتله ؛خل اكول لأبوي

؛لا تخافين كتلهم وحتى شاهر يروح ويانه تعرفين شهاب مايفارك شاهر ومايطلع إلا وياه

: ايي صحيح

رحت بدلت بسرعه ولبست عباتي نزلت جووه وطلعنه بسرعه لكينه الي يسوق شاهر وشهاب بصفه ..

صعدنه ليوره سلمت على شهاب وهو رد السلام .

رحنه للسوك وظلينه نفتر اني وجماره وهمه ورانه يمشون ..

مدري وين راح شاهر وبقه بس شهااب وهو هم اجاه اتصال وعافنه كال ابقن هنا وهسه اجيجن .

شو مشو همه ومانحس غير واحد اجه وظل ورانه ويذب حجي ويتغزل وظل يحجي ..

: أروح فدووه لثكيل بس انطينه نضره ..

باوعتله وخزرته وكتله : ماتسحتي انت لا تخليني هسه الم الناس عليك

: بوويه شنو هاي العيون اموت اني

مانحس غير انجر من ياخته ..
باوعت لكيت هذا شهاب سحله وطيحه بلكاع كاله : تريد تموت حاضر

وجهه احمر ويخزر بيه نزل بيه بوكسيات ويضرب بيه وماكو حتى بساعته انقهرت على الولد ..

اعرف بشهاب شراني وعصبي اذا احد داسله على طرف بس ما حسبالي هيج ابد متت من الخوف اني ..

العالم ماحركت ساكن اسمعهم يكولون خلوه طبه مرض يستاهل الي يجراله ليش يتحرش بنات الناس ..

اجه شاهر وشاف الي صار وكوم شهاب من يمه كاله ؛ ولك شبيك اتخبلت ردت تموت الولد وياك

زمخ بعصبيه : خليه يموت ابن القندرة يتحرش بعرضي وساكت

فتح شاهر عينه بقوووه وكال بدون مايعرف السالفة : أنا اخوك يتحرش بعرضي لا والكفل زينب ما يمشي سالم من يمنه ..

شو هذا راح شاهر وظل يضرب بيه لحد ماجت ناس وشرطه وياها ..

سحبو الولد من جوه ايد شاهر وهذا مدمي ومغمي عليه اني كلت هاهيه يموت هذا ..

شالو ونقلوو الشرطة ورادو ياخذون شاهر وياهم بس وقفهم شهاب وكال : وين ماخذيه مو احنه الغلطانين هو الجلب الغلطان شلون يتحرش بعرضنه ونسكت تريدنه .

حجه الشرطي: ما كلنه اسكت بس لو لازميه وجايبيه النه

: كثر خيركم حكنه احنه ناخذه بيدنه وهسه عوفو أخوي

: مايصير هو كسر الولد ولازم ناخذه ونشوف هذاك خاف صار بيه شي ومن يصحى لو هو او احد من اهله ينتازلون عن القضية

:جاا اذا هيج الحجي اخذوني أني لان اني الي كتلته وعوفو أخوي خل ياخذ اهلنه لعد يبقن هنا وحدهن

هما تفهمو الوضع وعافو شاهر واخذو شهاب وظل يصيح عليهم شاهر بس ما سمعوله واني وجماره ظلينه بس نبجي ..

هو باوع عليه وابتسم وهز راسه عود أهدي اخذو ومشوو ..

باوع علينه شاهر وزمخ بوجوهنه : أمشن انكلعن وراي لسيارة ..

خفنه ومشينه وراه صعد بلسياره واحنه هم ..

ظل يصيح علينه ويكول بعد اني اطلع وياجن ماتكعدن مو كلنه اوكفن هنا بس هو حقه يتغزل بيجن اذا انتن تتمضحكن لرايح والجاي .

كام يغلط علينه ويحجي واحنه ساكتين بس اني خايفه وكلبي يوجعني على شهاب دموعي تنزل خايفه لا يسووه بيه شي ..

نزلنه وراح شاهر يركض كال لأبوي ولعمي وطلعوو وعمي يحجي ويكول ما تجيبون غير التعب و المشاكل ااخ منكم ..

ظليت فوك بغرفتي و كل ساعه انزل اعرف شكو بس ما ينطون خبر ..

اصعد وانزل وكلبي احسه يريد على ساعه يوكف . ادعي وابجي انو مايصير بيه شي

اجو اهلي و كالو مقدمين شكووه واهل الولد كالو نتنازل بس الولد ما قبل واصر يبقه بلسجن لحد مايطلع هو من المستشفى ..

واسمع عمي يكول همزين الله ستر و ما مات الولد جوه اديكم جسمه كله مكسر ..

صعدت فوك للغرفه وابجي وظل شهاب أسبوع كامل بلسجن مع أنو قبله بيومين الولد طلع من المستشفى بس ماقبل انو ينتازل بس أبوه ظل يحجي عليه يكله فوك ما أنت غلطان ..

وصدك بيومه طلع من السجن ودزلي ورقه بيد واحد من الجهال الي يشتغلون ..

كاتب بيه تعاي للبستان أريد اشوفج ..
وصدك لبست عباتي ورحت ركض شفته متكئ على شجرة التكي وصافن ..

انتبه على خطواتي وباوعلي ابتسم بهدوء وشكله تعبان كلش وعيونه حمر ..

رحتله بلهفة وكتله :ليش هيج سويت شهاب

ابتسم وكال : كلشي اسويه علمودج أنتي وبس

: بس أذيت روحك وانسجنت أسبوع كامل حتى تعبان أمبين عليك

: لو أنسجن طول الدهر علمودج قابل . ولج شترديني اسمعهم يتغزلون بيجن واسكت والي قهرني وشب النار بيه من تغزل بعيونج

ااخخ لو عفتوني أموته بس هم مراح أرتاح بس خووش اخذ المقسوم ..

: شهاب لا تسوي هيج بعد فدووه ترى والله شبعت بجي عليك

: ما وعدج والله لان الي يأذيج يعني يسرع بموته ..*

غمضت عيوني بألم وأني اتذكر كلهن ذني باوعت لكيت الشمس بدت تشرق ..

تعوذت من الشيطان ورحت توضيت وتوجهت لله سبحانه وتعالى صليت و بقيت فتره كاعده بمكاني اطلب من الله الصبر والقوة .

رجعت نمت بمكاني و اني تعبانه كلش نمت وماحسيت على اي شي وحتى كعدوني لجامعة بس بقيت نايمه لان ماعندي امتحانات وحسيت بنفسي صدك محتاجه اليوم ارتاح ..

بقيت على وضعي و متمدده على السرير ل ١١ الصبح لحد ما صعد أخوي غيث عليه..

اجه كعد يمي و كال : شكو شبيج ولج شو لا مداومه اليوم و هم ما نازله بيج شي !؟

أبتسمت اله : مابيه شية

باوعلي بأستغراب : متأكدة جوري

هزيت راسي واني مبتسمة اطمنة : لا تخاف مابيه شي ..

حاولت اغير السالفه كتله بشقه : صدك شعجب متنازل اليوم وصاعد لغرفتي

: شسوي لعد أخوج شاهر التحق اليوم و يوصي بس بيج وهم جدج اجه وصارله ساعه يكول صيحولي جوريتي ..

: جدي اجه

: ايي اجه يلا انزلي يريد يشوفج

عافني وطلع واني كمت من مكاني غسلت وجهي و غيرت ملابسي ..

نزلت جوه ولكيت حبوبتي وجدي كاعدين وأمي يمهم كاعده ..

رحت سلمت عليهم وبست راسهم وحضني جدي وباسني من راسي : هلا بالغالية ولج ما مشتاقه لجدج ما كلتي خل اشوفه

: اعتذر جدي بس جنت نايمة ..

سمعنه صوت غيث من بعيد كال : الحب اجيتج يعمري

دخل وهو رافع ايده و غمز : هلا بالجمال هلا بلحب كله

ابتسمت و باوعت على حبوبتي غطت وجهه بلشيله عود تستحي ..

راح هو وحضنه و كال ؛ اموت اني على الي يستحي شلونك يحلوو اخبارك

ضربه جدي بعوجيته : اكعد ولك غويث عوف مريتي ..

باوعتله حبوبتي و كالت : شني بس لا تغار .. عوف الولد خليه يتغزل جا بس أنت تتغزل بجويريه

كاله جدي : هااا هيج صار الحجي يا ام سلمان

: اي هيج خليه يتغزل معليك بيه ..

غيث رجع شبكه و كال : اي عوفه خطيه عدها جفاف حبوبتي ..

ضحكنه عليه و هيا ضربته : مو صوجك ولك ..

حبوبتي اكثر واحد تحبه هو غيث لان يشاقيه و يكعد يمه و متعلق بيه حيل ..

التمينه كلنه وسوالف و اللمه وابوي اجه و صبينه الغده و كعدنه كلنه على سفره وحده بس جانت وحشه على شاهر ...

جدي كال : أبو محمد

التفت أبوي عليه و كال : ها بويه امر

: ما يأمر عليك عدوو بس مو تنسه باجر العشه ووصي اخوانك و ولدهم كلهم خل يجون

: ان شاءالله بوية و اصلاً اني انطيتهم خبر يجون و كالو ان شاءالله

هز راسه و سكت .. هاي عدنه لازم كل أسبوع او اسبوعين من يريد جدي نسوي عشه يمنه و نلتم كلنه عمامي و وولدهم ونسوانهم كلنه ننجمع بأمر من جدي لان يحب يشوف عائلته كله يمه ملتمه أبيته ..

اووف لا هله هم راح تجي زهراء وتعاي شوفيها واني مابيه حيل لسانه استغفر الله تذب حجي مثل السم .
وهم عمتي أم غسان تعاي شنتحمل تكبره لو شنو ..

خل اعرفكم على عائلة عمي أبو غسان ..

أبنه غسان الجبير وعمره ٣٢ سنة دكتور جراح متزوج وحده غريبة علينه بس تكون امها صديقة ام غسان اسمه  اسراء الله يرحمه  حبابه جانت و ماكو مثل كلبه متوفية قبل ٦ سنوات توفت أثناء و لادته لبنته سما
وغسان بطل مايريد يزوج لان يكول شعرفني اخذ وحده تكون حنينه على بنتي ..

والثاني شهاب عمره ٣١ سنة دارس هندسة اتصالات وهسه هو مسافر مانعرف عنه وين هو و بأي مكان مسافر و راح ومحد يعرف وينه ..

ميت عدل ماندري شنو اخباره بس شاكه اني بغسان يعرف كلشي بس ساكت مايحجي اي شي ...

والثالثه فاتن ٢٨ سنة متزوجة اخوي محمد و تعرفونه ..

والاخيرة جماره وهم تعرفونه بعمري و حجيت عنه ...

يمهم بنت خالتهم زهراء ٢٣ سنة تدرس تربية انكليزي عايشة يمهم من طفولته اهله متوفين بحادث سير واخذته مرت عمي ام غسان و ربته يمهه لان ماعدهه لا عمام و خوال ماعده بس هيا ام غسان ..

فا ربته و حسبته حاله حال جماره وفاتن وحتى عمي ما فرق بيناتهم و الولد يعتبروها اختهم مو بنت خالتهم

بس اني اضوج منه و اكرهه و هيا كذلك تحب الكل و زينه وياهم كلهم الا وياي تكرهني ..

لان جانت تحب شهاب وعترفتله شكم مره بس هو ابد مابادله هذا الحب يكله اعتبرج اختي انتي
هيا حلوه وناعمه بس عندي اشوفه العجوز الساحره ..

و اول الشمات هيا و عمتي ام غسان من عافني شهاب لان حتى مرت عمي ماردتني رادت بنت اخته اله ..

وهيا اصلا تكرهنه كلنه تحس نفسه فووك و احنه جوه لان بنت شيوخ لعد احنه شنو يحضي ..

..

صعدت فووك و ضليت اقره و خلصت اني و وقت العشه كمت توضيت وصليت

نزلت ساعدتهم وتعشينه و اخذت كوب جاي وصعدت فوك اكمل قرايتي احس كومه اشياء براسي و متراكمات عليه .

رحت فتحت كنتوري و طلعت بوكس احمر حجمه وسط خليته بلكاع وكعدت بصفه ..

فتحته وجان اشوف كل الاشياء القديمة و من الماضي بيهن ..

طلعت منها اشياء هواااي .. شفت صورة طلعته من جنه صغار اني و جمارة و زينب والولد كبار يعني واكفين ورانه ..

انتبهت على شاهر شلون مبتسم و خال ايده على كتف شهاب و هو كذلك مخلي ايده على كتف شاهر و مبتسمين
واني كاعده بلكاع و لازمه لعابتي بيدي ..

الصورة الثانيه من جان عمر سنتين و اخوي محمد لازمني بيدي ..

ضليت اكلب بلغراض و جان اشوف دفتر ااخ هذا دفتر ذكرياتي ..

اخذته و ضليت اقره بيه واني بين الي اضحك و بين الي اجرلي نفس مثل الي مختنكه من الي أتذكره..

وصلت لصفحة كاتبه بيها نجاحي من السادس بمعدل يقبلني طبية ..

واخيرا نجحت و حققت حلمي و حلمه رادني اصير دكتوره و صرت الحمدلله واخيرا راح نكون سووه اني وياه ..

غمضت عيني و اني اتذكر هذا اليوم من رحت بشرته على نجاحي ..

الماضي *

رحت اركض ولازمه عباتي حتى لا توكع من راسي
وانفضح شيخلصني ورافعه اطرافها بسبب التراب

اركض فرحانه للبستان رحت وصلت للمكان الي نلتقي بيه
كعدت بلكاع واني منتظرته سندت راسي على جذع الشجرة مال التكي

واباوع على الساكية مال النهر وصوت العصافير يخبل
والهوى يجنن

وخرت العباية من راسي وخليته على كتوفي وظل الهوى يلعب بشعري

فرحانه وكلبي يدك بسرعه مامصدكه وأخيرا راح نجتمع اني والعشك

سمعت صوت خطوات اجت بأتجاهي ابتسمت وعرفته اجه

كعد بصفي بس شوي بعيد عني .. باوعتله لكيته مغمض عينه وساند راسه على الشجرة

ابتسمت وكتله بفرحه :شهاااب باركلي نجحت ومعدل الي تريده

فتح عينه وباوعلي وعيونه فرح بيهن :اعرف يروحي شفت النتيجة الف مبروك الج والي هم رفعتي راسي ومفتخر بيج

ظليت اضحك من الفرحه وهو مبتسم ويباوعلي ..
اتقدم باتجاهي واخذ عباتي وخلاها على راسي :كتلج لبسي العباية لا احد يجي

:شهاب كلي يمته

ابتسم وكال قريب ان شاءالله..*

رجعت للواقع و احس كلبي يريد يوكف من كد ما شايل بكلبه حجي و ذكريات و سوالف بس المن يحجيهن

لصديقة كلبي جمارة ماكدر تبقى اخته و تحبه و اني اصلاً ماريد احجي لان راح نرجع الماضي كله ...

كلبت الصفحة الثاني و جانت اخر ورقه اكتب بيها و عنوانه الخذلان ضليت اقره بيها

ودموعي تجري تذكرت الي صار وبيها من عافني و انهزم بيوم خطوبتنه ..

سديته كبل و اني اشهك رحت رجعت البوكس لمكانه وسديت الكنتور ليش طلعته ليش مو اريد انسه ليش هيج اتذكر ..

رحت خليت راسي على المخده و للصبح واني احاول انام بس ماكدر ..

لحد ما صارت الساعه ب ٦ الصبح يلا نمت وكدرت عيني تاخذ غفووة ..

كعدت ثاني يوم متأخره و جان بوقته عطله اكوو ..

فا كعدت اساعد وياهم نحضر بلعشه كمت رتبت البيت و الصاله و امي و فاتن يطبخن و اجت زينب و امها يساعدنه ..

شكد احب مرة عمي ام فارس حبابه وطيبة كلب مو مثل عمتي ام غسان تكرهنه كلنه و تحس نفسه هيا و بس ..

علاقتي عمتي ام فارس بأمي كلش قوية وهم هنا قريبات من بعيد ..

بدينه نشتغل و العصر هيج و اجت عمتي ام غسان و جمارة و زهراء رحت سلمت على ام غسان

: شلونج عمه

حجت بدون نفس : هلا زينه و انتي

: الحمدلله

عفته و درت وجهي لان ما استغرب تصرفاته ابد هيا هاي و مراح تنعدل ..

كمنه صار المغرب و اذن صلينه و خلصنه و بدينه نصب العشه لزلم اجو الولد كلهم هنا ..

و فارس و غيث و ليث و شاهر ينكلون بلاكل .. وغسان ومحمد الكبار بقوو يم الزلم يرتبون السفره

نكلو الاكل وخلصو ونكلنه الاكل لنسوان احنه هم
خلصنه و لمينه السفره و جماره سوت جاي لنسوان و اني كاعد اصب لزلم ..

دخل ليث جووه للبيت وصعد لغرفته فووك شووي ورجع بس وجهه احمر و مبين عصبي لان كام بس ينتير و يصيح حتى الولد استغربوو ..

حجه وياه فارس بهدووء : شبيك ولك مو جنت مساع شحلاتك

حجه بنتر : كلشي مابيه ..

شو ما نسمع غير صوت الصياح من النسوان .. كلنه كمزنه ولد و بنات نشوف شكووو

رحت و جان اشوف زينب واكعه يم الدرج وكوه اجر النفس وعيونه ووجهه احمر و تبجي ..

مانحس غير فارس صاح بصوت عالي : وخرووو

ابتعدنه كلنه وهو كعد يمه بخووف ضل يضرب على خده بخفه : زينب يروحي تسمعيني

صاح : كلاص ماي

رحت بسرعه جبت و انطيته اله .. هو رش شوي على وجهه اشو هاي شهكت شهكه مثل الي ميت ورجع عاش..
رجعت كامت تبجي وتشهك بلبجي و هذ فارس شافه هيج و كام يحضن بيه

اني اول مره اشوف فارس هيج يحجي بحنية هسه يلا صدكت كلام زينب من كالت ماكو احن من كلبه ..

لزمت ايده وهزت راسه بأي و كامت تبجي هو حضنه و ضمه لصدره ..

رجع باوعله : شنو رجعتي اختنكتي ما اخذتي دواج

حجت بصوت متقطع : لا اخذته بس تعبت شوي وهسه احسن

باوعت وجان تصير عيني على ليث من بعيد يباوعله بتوتر غمض عينه ورجع باوعله ..

دار وجهه و طلع شكيت بالسالفه يمكن الي صار بيه بسببه هو ..

هيا كالت لاخوها فارس : اريد اروح للبيت أخذني ..

هز راسه و ساعدها حتى تكوم راحت جماره جابت حجابه و عبايته لبستهن و مشت وياه ومدنكة راسه

اخذه وطلعو من البيت حزنت على حالته كلش ..

....

زينب/

تعرفتم عليه منو اني و شكد عمري بس اريد اعرفكم اكثر عن نفسي ..

اني ماعندي لا اخت بس اني وحيدة اهلي و عندي اخ واحد اكبر مني فارس ..

اخوي وصديقي و حتى ابوي لان حنين كلش عليه و مايبخل عليه بأعز شي

يكول انتي الوحيدة عندي واريدلج الاحسن و ماالي غيرج ..

حتى اكثر اسراراه يمي ويحجيلي كلشي واني هم بس شي واحد ما حجيتله ..

وهو حبي ل ليث ابن عمي اموت عليه من فكيت عيني لهاي الدنيا و اني ماشفت غيره

من كالو زينب لليث و ليث لزينب وتسميت بأسمة بعد اسمه انختم بكلبي ..

بس هو ابد مايبادلني هذا الشعور بلعكس شخص حنون وي الكل و بارد و جامد وياي..

شخص قاسي ماكو بكلبه رحمة وياي حتى مرات يفشلني كدام البنات لو يسلم على الكل بس عليه لا

ماعرف ليش وشكو بس الي اعرفه يكرهني و الغبية اني مستمره بحبي أله ..

اليوم عزيمة عند بيت عمي كلعادة يعني . فا كلت الجوري اريد شاحنتج كالت بغرفة ليث

اول بداية ارتبكت و خفت لا يدخل و يشوفني ويسوي مصيبة على راسي

بس بعدين تشجعت و كلت عليش يحجي اني اخذ الشاحنة و اطلع بسرعة

والله صعدت فووك ودخلت لغرفته شفت الشاحنة و أخذته بس الي وقفني صورة ليث ضليت واكفة متأملته و اباوع عليه و أبتسم على أبتسامتة الي بلصورة

ماحس غير الباب أنفتح درت وجهي و جان أشوفة كبالي و يباوعلي مثل الي مستغرب وجودي هنا بغرفتة ..

كال بحدة : شعندج هنا و شتسوين

كتله بتوتر : ها اا اجيت اخذ شاحنة جوري

رفعت الشاحنة عليه و هو شافه و رفع حاجبة كال بأمر : ثاني مره بعد لا ادخلين لهاي الغرفة ما مسموح

انجمعن الدموع بعيوني كتله : اصلا اني ما ميتة على شوفة غرفتك و لا اريد ادخله بس كتلك على الشاحنة

أبتسم بأستهزاء : واضح .. يلا اذا خلصتي كلامج طلعي بره

كتله بغصة : انت ليش هيج تتصرف وياي اني شمسويه الك ..

اقترب مني و يخزر بيه : شسويت شو فهميني كتلتج لو جريتج من شعرج و كتلج طلعي لا تبالغين هواي

دمعة طاحت من عيني .. هو عاط بوجهي ؛ شلوون بلا شحجيت اني هسه و تبجين ..
اكلج شي ابقي احسن شي انتي و اني اطلع حتى كرهت الغرفة من وراج

طلع و عافني واني ضليت ابجي و اشهك بمكاني نزلت جووه وابجي

احس كلبي راح يوكف و التنفس بده يقل عندي ضليت كوه اجر النفس اختنكت كلش

كعدت بلكاع و افرك بصدري اريد هوى ماكووو اني مرات تجيني الحالة من انقهر و اضوج بس اخذت علاجي اني قبل لا اجي ..

انتهيت وكعت وغمضت عيني ماحس بشي كمت اسمع اصواتهم بس ماكدر احجي راح اموت اريد اكللهم ماكدر اتنفس اختنكت ..

سمعت صوت فارس يحجي وياي بجيت بلزايد حسيت نفسي وحيده و اجه سند الي ..

ماحس غير شي بارد و انذب على وجهي شهكت بقووة احس رجعت للحياة من جديد..

ضليت حاضنه فارس و شفت من بعيد ليث يباوعلي حسيت بعيون ذنب بس دار وجهه عني و مشه

طلبت من فارس ياخذني للبيت و فعلا وداني للبيت و صعدني للغرفه تمددت على الجربايه و غمضت عيني تعبانه اريد انام ..

noorhaidar18
يتبع ...

انتهى البارت اتمنى يعجبكم 💜🌸
لا تنسون الايك + التعليق ✔
واعذروني على التأخير بس كتلكم اني من قبل جان عندي ضرف و هسه رجعتلكم ..
والقصة هاي البارتات الثلاث جان تعريف عن الماضي و عن الابطال و ان شاءالله بعد بارت واحد و تبدون تعرفون القصة اكثر و تعرفون الابطال كلهم و الشخصيات يعني اصبرو عليه 😁💜