نيران قلبي
بقلم هدى
البارت الواحد والعشرون
---------
درت وجهي عالباب سديته
والتفتت انصدمت بلي شفته !!
اسير نايم بدون تيشيرت ويمه دالي حاضنته من ضهره!! ماستوعبت لمن قربت يمهم
هنا ماتحملت وبقت دموعي تتسابق
ليش اسير لأن حبيتك !!
ركضت فتحت الباب ودخلت لغرفة بيان وبجيت لمن تعبت
هدأت نفسي ونزلت لجوه حاولت ابين ماكو شي بس رنيم حست عليه وجرتني للهول
- وخريي شتردين
- شبيج نزلتي من فوك مدري شلونج
- مابيه
- انجبي، تعاي فوك..
صعدنه لغرفة بيان وانهديت بالبجي
- رَ..رنييـ..م شفته شفته وياهة والله
- عزاا منو ولج
- اسير ودالي بالغرفه
- دالي !! مو كاعده جوه
- لا والله شفتها نايمه يمه اهئ
- متأكده
دخلت بيان
- هاي شكو
- شمم شايفه اسير ودالي بالغرفه !
- ياااااا هسةة اروح اكتلها هاي الحقيره
- تعاي تعاي شتسوين
- اروح اسحل دالي هاي سوالفها اعرفهن
حچيت بأستغراب
- شقصدج يعني؟
- والله انتي غبيه مو تدرين بيها تحب اسير اكيد من شافتج صعدت
- شدراني اني من شفتهم فقدت
- دكومي كدامي عدلي روحج وخل نسحلها
- زين اني شنو موقعي هنا
- انتي مو من العائله ديري وجهج
- والله صوجي خفت عليج
طلعت رنيم وطبگت الباب
- تعاي انتي شسوي لعيوني
انطتني بيان كريم رتبت وجهي وطلعنه
صارت كبالنه دالي طالعه من غرفة اسير تبجي
ردت اروح اكتلها وبيان لزمتني
- ختولي روحي حاجي اسير
- اي وخري
نزلت بيان واني رحت لأسير
طبيت چفت
- لا اله الا الله ، انتي لزكه؟
جان واكف عالمرايه يعدل نفسه مامنتبهلي
- لا اني بت عمها
- شمم !!
- منو اللزكه
- هيج
تقدمت يمه واني مچتفه ايديه وعيوني يجدحن
- خير انشالله شنو هالنظره
- سؤال واحد جاوبني بصراحه ، دالي شعدها يمك
- ماكو شي سئلتني سؤال وطلعت
- اسييرررر احجي الصدكك
- من تحجين عدل اگلج ، وكافي عصبيه
- اصلا اني ممعصبه لو معصبه جان حرگتكم بتيزاب انتَ وياهة من شفتكم سوه
- يعني شفتيها يمي
- اي نعم
- وشنو توقعج بعد الشفتي
- اني اريد الجواب منك
- تثقين بيه؟
- ممم يعني مو كلش
- والله يامحفوضة السلامه هاي دالي صارلها سنتين تركض وراي ارزلها وماتيأس من خطبتج اجت تتوسل حتى اعوفج وهم طردتها وهسة استغلت الفرصه واجت يمي ضربتها وطردتها، اعتقد جانت تعرف حتصعدين
بس لعبتها اجت لصالحي
- شلون بلا
- شوفي نفسج وتعرفين ليش ، حتطكين من الغيره
- لا منو كال بس ضجت لأن اني زوجتك وتعتبر خيانه الي
- لج اني عندي نحله شسوي بفضلاتها؟
- احسك دتتغزل بـ دالي ترا فضلات النحله عسل
- شكد تدققين هية حجايه مشيها ، هسة مزعلانه؟
- لا ، بسسس
- بس شنو
- انطيني طريق
- تفضلي
- باي حروحح انتف دالي
- تعاييي
ركض وراي ليم الدرج جرني للغرفه وقفل الباب
- يحح هاي ليش
- حتى متتخبلين وتفضحينه
- فتحه حباب فدوه
- وعد ماتسوين شي
- وعد وعد
فتح الباب ووكفت يمه
- اني راح اسكت لخاطرك بس انتَ لازم توكفها عد حدهة
- اكيد عبالج اسكتلها؟ بس خل يخلص اليوم ؏ خير
- ههههههههه محح
- هاا هيج صارت
- حنزل باي
نزلت لكيتهم راجعين للهول
كعدت يم رنيم دالي تباوعلي بحقد واني ابتسم
نزل اسير وكعد يمي
جان يحجي وي تمار ابتسمت وحجيت من بين سنوني
- اسير اذا تباوع عالجهة الثانيه ماتطلع سالم
- ايباخ شتسوين
- اني شمم يعني شتتوقع
- كلشي اتوقع منج
- بضبطط
- راح اغمض عيوني وانتي مشيني هاا
- خوش ههههههه
بقينه يمهم للعشة ورجعنه
بابا فات ينام واحنه كعدنه بالهول
تمار وبيان كاعدين سوه واني ورنيم لازمات الفون
وماما كاعده كبال تمار وصافنه بي
- خيرج يمه شو تباعيلي ترا احب مرتي مااريد اتزوج
- يا شعليه بيك بس داكول صدك لو كالو ثلثين الولد عالخال وانتَ تشبه خالك منتظر حتى بحركاته
- ههههههه،صدك شخبار اخوالي
- وين ادري اني بالشهر مره احصلهم لو مرات خالتك تخابرهم
- ماناوين يرجعون؟
- لا بعد استقرو بالخارج صارلهم 20 سنه شيرجعهم
- أيييابه حتى اشكالهم ناسيهة
- اي چان عمرك 6 سنوات من راحو
- اني مشايفتهم بس بالصور بس شلون صكوك خوالي يشبهوني
اخوالي 4 طالعين للخارج من چان عمري اشهر
الجبير "اسعد" حالياً عمره بالخمسين
سرمد هم خمسيني
فادي اربعيني
منتظر عمره بنهاية الـ30
گال تمار وهو يرفع ايده
- الله ينطيني من الثقة العندج شويه
- آمين
- فلك طركم الا تذكروني بيهم كومو نامو
- يا ماما هو منو الي كال تمار يشبه خالو منتظر
- انتي بالذات تسكتين لسانج طوله مترين
- اكوم انام احسنلي ، رنيمه كومي وياي
احاجي رنيم وهي مركزه بالفون ضربتها ؏ راسها
- هااوو وجع
- كومي خزيتينه متوازيه تراسلين عزعوز
- روحي معليج بيه
- طبج طوب ، تصبحون ؏ وجهي
- صباحنه مصخم لعد
- يارب صباح تمار اسود گولو آميين
- بيش طالبه الولد يمعزايه فوتي نامي
- تأمرين أمر ام تمتم الورد
رنيم ..
قرب العرس
وطلعنه جهزنه كلشي اني وعزيز ماقبل اطلع وي ماما
سألت ايلاف ؏ المحل الي اخذت منه فستانها بالحنه
جنت مقرره اسوي مثل حنة ايلاف وكلت للبنات ياخذن مثل لون فستاني
- اكلج ايو انتي تجين؟
- طبعاً شلون ما اجي غير رضا يشويني
- ههههههههه ليش
- عرس صديقة وبت خالتي وما اجي وين صايره
- شعجب اني كلت ميخليج تطلعين لأن حامل
- لا اصلا هو جابلي فستان
- خوش ، انتي عاد شوكت تجيبين
- اني ماادري بيا شهر انوب شوكت اجيب
ثاني يوم طلعنه اني وعزيز اختاريت فساتين للحنه الاول لونه رصاصي
والثاني قصير لونه بين البنفسجي والوردي
جان اختيار عزيز حتى تفاجأت لأن اختاره قصير
شافني متفاجأه ضحك وكال
- اذا مااخذته حتكولين هي حنة بنات ليش تحرمني
- يااا شوكت حجيت اني
- خاف تحجين اعرف هالسوالف
اخذت وياهن احذيه ورجعنه ، وصلني وراح للكوت
اول ماطبيت اجن البنات نفشن العلاليك
- ديلا بلا جايبه فستانين هسة احنة يا لون ناخذ
- جيبن رصاصي والثاني بعدين ابدل بي حتى اتميز
- اوي عيني ، بلا هذا دوق منو؟
- الرصاصي ذوقي والثاني ذوق حَبيبي
- طاح حضج وحضه هم ذوق هذا
- انجبي لج
- اكول بيان شتكولين نخلي اسير وتمار يختارولنه
- حتى يجيبولنه عبايه اسلاميه مو
- هههههههههه صح صح
- بلا انتن خطاطيبجن يختارولجن اني منو يجيبلي
ضربتها شمم ؏ راسها وكالت
- انتي ماما تجيبلج يثوله
- اههووو ترا اني مو صغيره صرت اول متوسط شبيجن كلما احجي تضربني
- تعاي لولو ختولي شمم تغار منج
- بس انتي احبج فديتج مرت اخوي
- نفس العقل انتي ومرت اخوج
كالتها شمم وصارت المخاد تنذب عليها من كل جهة
شمم ..
العصر طلعنه اني واسير للسوك حتى اشتري لعرس رنيم
وبيان راحت وي تمار بنفس الوقت
بالكوه اخذت فستان اقتنع بي اسير
لونه رصاصي وبي لمعه فضيه طويل وبينصل
بي ردان طوال وعلى طولهن فتحات بالطول يعني ردان بس بالاسم
رجعنه للسياره وطول الطريق اسير يحجي
- ماترحين صالون ، رگص ماكو ، اذا دخل عزيز ماتوكفين يمهم....الخ
اني اسمع واهز براسي
- وعد؟
- اسير بربك حنة اختي وتريدني مااركص "چا شوكت اركص
عاف كل الكلته وركز عالـ چا
- صايره تحجين بالـ چا عيني
- من عاشر القوم اربعين يوم صار منهم
- ههههههههه حلو
- اي شو غلست
- على شنو مو كلنه ركص ماكو انتهى
- چتفت ايديه ودرت وجهي للجامه
وصلنه يم البيت من نزلت كال "سوي مثل ماكتلج"
ماجاوبته فتت للبيت وهو راح
لكيت بيان راجعه قبلي
- هاا
- هاا؟
- وجعا شصار
مديت ايدي وعددتلها
- لا تركصين ، لا ترحين صالون ، لاتطلعين كبال عزيز ، لتحطين مكياج هواي ، وانتي
- مثلج تماماً هههههههه
- يا حضي اخوي جان حباب يمكن انعده
- انننن هو اكو واحد ميكول هيج ، تعاي شجبتي
- شوفيني مالتج
- ذبيتهن بالغرفه
- صاعده اشوف اخذي هاي
رنيم ..
قبل 3ايام من الحنه كلش صخنت وكضيتها نايمه
عزيز كلساع يخابر يسألني شلون صرتي
ثاني يوم اجاني من الصبح قلقان
- ها رنيم ماتحسنتي
- لاا
- عمه مااخذتوهة دكتور
- لا ماتقبل ابد جبنالهة ادويه وبعدها ؏ هالحال
- هسة اخذج ماتبقين نايمه
- لا فدوه مابيه شي خل نكمل العرس واروح
- يابه انعل ابو العرس خل نأجله لمن تطيبين شتفيدنه الهوسه ، عمه جهزيها خل نروح
- عزيزز
- سكتييي
كومتني ماما بدلت كوه ورحنه للمستشفى
كالو عندي فقر دم حاد
شكلي كانوله وكتب ادويه راح عزيز يجيبهن
وجاب مشاوي
- اكلي حتى تشربين دواج
جنت جوعانه حيل اكلت نصه ولعبت نفسي
- ماتاكلين؟
- والله اكلت هواي الحمدلله
- شلونج هسة
- احسن بس راسي موتني
- تاخذين العلاج وتتحسنين
- شوكت نطلع
- يخلص السيروم ونطلع
- تمام
بعد فتره خلص السيروم وطلعنه
- تنزلين لو اشيلج
- لا اكدر انزل
طبينه للبيت وماما تلكتنه
- ها شطلع
- بيها فقر دم حاد وحرارتهة مرتفعه
كعد عزيز يعلم ماما ؏ وقت الدوه واني فتت للغرفه
تمددت عالجربايه شويه ودخل عزيز
- ها حتنامين
- اي تعبانه
- خوش ارتاحي ، اني العصر ارجع
- تمام
مااعرف شگد نمت
كعدت ولكيت الكل متجمعين يمي وجهي صاير عباره عن عرگ
- هاي شكو
- يمه جنتي نايمه وتهذين خفنه عليج
- شلون صرتي بابا؟
- احسن
تلمست ماما وجهي وكالت
- اي زين فكت الصخونه كومي سبحي تصيرين زينه
- تمام الساعه شكد؟
- 8 بالليل
- حييل
- يلا سبحي بين مانسوي عشة
گال عزيز وهو يگوم
- عمه لا تتعبون نفسكم اني رايح اجيب
- لا ماكو تعب نسوي احنه احسن
- زين لعد خل اجيب لحم و نسوي مشاوي عالفحم
- خوش فكره عدنه لحم؟
- اي اكو
طبيت سبحت وطلعت لكيتهم بره مجهزين المنقله ديحطون اللحم بالسيخ
اندكت الباب طلع اسير عازمينه وجايب وياه فواكه واشياء نواقص للشوي
حطولي كرسي كعدت عليه وحيل تونسنه
شمم كلساع ذابه حجايه وتمار يردها
اجه بابا وكف يمي
- شلون صرتي رنوم
- بوجودكم صرت زينه
كملوا شوي ودخلنه تعشينه
گال تمار وهو يتذوق الاكل
- والله زين عزيز طلعت تعرف تشوي
- اعجبك بالشوي
- واني خوش اتسوك مو هههههههه
- لووززز
اباوعلهم شلون متفاهمين وعلاقتهم حلوه دعيت ربي يحفظ عائلتي
جنت افكر شلون بعد يومين راح اتزوج وابعد عنهم
خايفه مااتأقلم
خلصنه اكل والبنات نضفن بقو كاعدين واني رحت للغرفه كضيتها اتصفن
طبت شمم تأفأف
- راحو ؟
- اسير راح وعزيز بابا ماخلاه يطلع
- اهاا ، وين بيان
- مادري يمكن فوك
- اكلج اذا رحت حتضوجين عليه؟
- لا يابه ليش اضوج اصلا حطبگ جربايتي وجربايتج وانام احح
- آآه ، راح اسكن بالكوت عادي عندج؟
- اي واذا هياتهة الكوت شمرة عصا
- كومي منا مو صوجج
بعد يومين
اليوم الحنه ردت اروح للصالون
كلت لشمم تجي وياي، اسير مايقبل توسلتله وماخلاهة
بيان ، تمار مايقبل
ايلاف حامل
فناء ماتكدر
ايست منهن وحرت منو اخذ اخر شي خالتي كالت اروح وياج
رحنه ساعه 11 سويت المكياج وردي فاتح
رجعنه بالـ3 ونص
البنات مكملات كلشي وكلها مبدله
اجن بنات عماتي سلمن عليه وكعدن
ايلاف كالت عندي مفاجأه من تكملين اشوفج
فتت ابدل ووياي بيان وشمم الي لابسات فساتين رصاصي
فناء وايلاف هم لابسات رصاصي
ساعدني بالفستان وطلعنه
عزيز بواسط ويجي باجر ردنه نسوي العرس بقاعة بس مكدرنه لأن الطريق طويل...
كعدت بمكاني تفاجأت بشروق موجوده
اجت باركتلي وكعدت يمي
- شكد حقيره ايلاف مكالتلي حتجين
- هههههههه اي كلنه نسويها مفاجأه
- احلى مفاجأه
شغلن البنات دي جي وبدن يركصن
هالمره ليال ماخذه الساحه
بيان وشمم ممنوعات من الركص اجن كعدن قريب مني وشمم تأشر لـ ليال حتى تكعد وتكلها اني اعلمج...
بدلت بفستاني الثاني وركصت وي شروق
وخلصت الحنه جانت كلش حلوه
بدلت ومسحت المكياج وطلعت اساعدهن بترتيب العشة الي هو لفات جابهن تمار من السوك
لكيت المطبخ هوسة وكلهن يشتغلن ميحتاجني فـ رجعت
خابرني عزيز حجينه شويه ونمت بدون عشة
- رنيمم رنيمه گعدي ررنننيييممم
- بسم الله شكووو وجععع بكلبجج متخليني منخمده
- دكومي الساعه بالـ9
- شروق نعسسسانه والله
- اتعشي ونامي
- جيبيلي لفه
- كومي غسلي وجهج واكلي
- كااييمهه الواحد ماينام بهالبيت
دخلت شمم وگالت
- هيج مستعجله عالروحه هسة صار بيتنه كخه عيني
- هو شكلت اني بس اريد انام متخلوني
- دوليي تنبل 24 ساعه نايمه
- ماكاعده ببيتج عود من انام عندج طرديني
- هدو اللعب شباب لتصير مكافش
- هاي شبيج شروق متدرين احنه هيج دنودع بعضنه
- وخري خل اتسمم
- تفضلي يالعروسه النائمه
- هاي منين جبتيها هههههههههه
- والله مدري وين سامعتها
غسلت وجهي واكلت لفه صحصحت شويه وطارت النومه
بقيت سهرانه وي البنات لحد الاذان صلينه ونمنه
تسريع...
اجت الزفه اخذني عزيز وطلعنه
قبل لنطلع اجو بابا وتمار ودعوني
وبابا كال لعزيز "رنيم بأمانتك"
انطاني ظرف فلوس
وماما لبستني كلاده
وتمار جايبلي ست اساور
كال مني ومن بيان
مشينه للكوت وحد وياي من اهلي بقيت ابجي بالسياره چنه بس اني وعزيز بيها وهو بقه يواسيني
وصلنه بعد طريق ساعتين وتعب
هناك جانو كرايبه هواي ببيتهم كعدوني بالهول
ماطولت هواي وكمت للغرفه
بعدها صارت هوسات مال زلم وهو فات...
نزع سترته وعلكها
- اخخ متتت تعبب
جان محطوط ؏ وجهي البركع كوه اشوف من جوه
تقدم بأتجاهي وبعده ما واصل
اندكت الباب حيل
وصوت غيداء تكول
- عزيييز الحگ...
يتبع...
رأيكم؟
توقعاتكم؟
باچر ماكو بارت وحيصير النشر بين يوم ويوم 🌚
لتنسون التصويت 🌟
احبنكم 💕❕