نيران قلبي
بقلم هدى
البارت العشرون
---------
- منو گال؟
- اسير لتغشم روحك
- جنت اثول
بانت على ملامحي علامة الاستغراب هو ضحك وگال
- اي شبيج ، چنت اثول باليوم الي رفضتج بي ، من رجعنه من يمكم امي تعاركت وياي وتصايحنه بعدها من هدأت ذكرت الي سويته واستحيت من عمي ، بقيت افكر بيچ ومن وقتها واني اراجع كل تفاصيلچ وماكو غيرج يحتويني
- تفكر بيه اني !!
- لا ابوي
- شسمه ممكن توخر خل نگعد؟
- تعاي نگعد هنا
كعدنه عالتخم وكمل
- بقيت افكر ويمكن ندمت ضل الموضوع ببالي كم يوم وامي رجعت تزن فوك راسي خل اخطبلك شمم واتزوج انوب كالت اخطبلك غيرها عادي
فكرت انو لازم استقر ساعه اكول اخطب شمم ساعه ابطل بس امي لعبتها صح
اجت كالتلي سمعت مرت عمك تريد تخطب شمم لعماد بالعيد
والله شمم حبابه وتخبل وعماد يستاهل وانتَ ضل صرت شايب ومامعرس
هنا حسيت اخر فرصه الي حتروح كلتلها بدون تفكير
- روحي خطبيها
- ياهية
- شمم يمهه
- يااا صلواتت تدلل العصر اروح
- خوش
اجتكم العصر وعاد انتي ماقصرتي سلگتينه بالانتضار
- هااا وين صفنتي
- نعسانه
- ايباخ صارلي ساعه احجي وي الحايط؟
- لا سمعتك شأكول مثلا
- لا تكولين روحي كملي نومتج ، اني رايح عود اذا راسلتج جاوبي مو تغلسين
- انشالله
طلع واني الابتسامه شگت حلكي والله وجبتي للدرب ياشمم ، طلعت من الاستقبال لكيت بيان ورنيم وليال واكفات
بس فتحت الباب ليال وكعت جريتها من اذنهة
- شدتسوين
- والله معليه سألي هذني
- كومي منا لا اشلع اذنج
- اي شمم اتفقتوا لا
- شنتفق عيني ، يااا دولن طايحات الحض...
فتت للغرفه بدلت ونمت ، كعدت على اتصال من اسير
- هلو اسير
- ها شمم نايمه؟
- اي داحاجيك بالحلم
- بطلي سوالفج البايخه
- مأذيتك؟اكيد لا فـ بكيفي
- اخ من لسانج
- شبي ينگط عسل مو
- روحي نامي يمكن طاگات فيوزاتج
ذبيت الفون بدون مااسد الاتصال ورجعت نمت
لمن كعدت لكيت المكالمه عابره الساعه واحنه حجينه 5 دقايق !!
دزيتله رساله
- هاي ليش مسديت الخط
- بكيفي
- خوشش
رنيم ..
- ماماا عزيز يكول عكب باجر نعقد محكمه
- بيها الخير يمه
- وشسمه يمكن نطلع مناك لواسط نختار غرفه
طفرت شمم
- اروح وياكم
- وين ترحين يمصخمه اسير مايقبل
- اننننن ، اي صدك احنه معاقدين محكمه اكله نروح وياكم
حجينه اني وامي
- انجبييي
مرن يومين واجانه عزيز من الصبح جان بايت بفندق
راح ويانه بابا وكملنه العقد
بعدها عزيز لح على بابا نرجع ويا لواسط
بابا كال اني عندي شغله هناك اكملها ونرجع
طلعنه بالـ12 وصلنه قبل الـ2 يم بيتهم
استقبلتنه امه فرحانه ومجهزه غده
بابا وعزيز كعدو بالاستقبال واني كمت وي الحجيه اساعدها
- عمه انتي وحدج بالبيت
- جانت بايته يمي غيداء ساعدتني بالغده وراحت
اها
بقينه نصب وهي تحجيلي عن بناتهة وابو عزيز الله يرحمه ، نقلنه الاكل وبدينه ناكل
رادت عمتي تسوي چاي ماخليتها وسويته اني
كعدنه بجهة اني وعمتي نسولف
وبابا وعزيز بجهة
للـ4 بابا طلع وكال ساعه وارجعلج
- اكول شوكت نختار الغرفه؟
- اساسا اني جايبها بس كتلج هيج حتى تجين
- ياااا !!
- كومي اشوفج
كمت وياه الغرفه بالطابق الثاني،جانت كلش حلوه لونها ابيض ونيلي ووياهة كرسي نيلي"تخم"
- تجنن هذا ذوقك؟
- اييي
قرب مني وحصرني يم الحايط
- عزيز !
- هاا
- وخر حباب
- تؤ تؤ
- ترا اصيح
- صيحي بس امي هنا ومتكدر تصعد
راد يوخر الشال اندفرت الباب
كمزنه ثنينه
- يااا مفعوص وين حاصر البت عبالك مااجيك
- هاي شصعدج يمه
- صعدت برجليه ، تعاي يمهه لايسوي بيج شي هذا
- جرتني وطلعنه التفتت لعزيز وضحكت
شويه ونزل ورانه يخابر
- ها تجي..اي موجودين..هههههه خوش..انتضرك ضلع
- منو هذا
- هسة تعرفين...
كعدنه بالهول نص ساعه ودخل ولد
- السلام عليكم
- وعليكم السلام
وكف عزيز ووكفت يمه..
- رنيم هذا جَواد ابن خالي وضلعي
- تشرفت
- منوره بيتج مرت اخوي
- نوركم هذا
كعدنه اني وعزيز وهو مقابيلنه
حسيت نفسي شايفته بس ماادري وين
باوعت لعزيز وردت احجي كال
- عرفتي؟
- لا بس شايفته
- هذا ابو مصادري الخاصه
- يا مصادر
- جان يجيبلي اخبارج
باوعت على جَواد بصدمه! اي اي شايفته العام بمطعم
- ههههههههه ولك عزيز سويتني ضابط استخبارات
- هاي شنو انتو صدك تحجون
- مو جنت اكلج اعرف كلشي عنج ، جَواد جان يجيبلي معلومات
ضليت اباوع لعزيز والتفت على جَواد ، بقو يضحكون عليه شردت يم عمتي جانت بغرفتها
- ها رنوم تعاي
رحت يمها شويه واجاني عزيز كال سوي چاي
طلعت سويته وانطيته اله
- اكلك شو بابا تأخر
- بعد وكت ليش مستعجله
- مو هيج بس نعست
- اي نامي بالغرفه
- لا لا انتظر بابا
- ههههههه براحتج
بعد ساعه رجع بابا سلم عليهم
وكال
- يلا نمشي
- اي
- بعد وكت عمي ماتبقون لباجر
- لا بعد عمك عندي شغل تمار مايكدر وحده
- براحتك ، عدكم سياره؟
- اي جبت من المعرض
طلعنه وبالطريق ذكرت بيتنه القديم كلت
- بابا فدوه خل نروح لمنطقتنه القديمه
- مانلحك بويه الدنيه ليل
- ميخالف بس دقايق حباب
- تدللين
اخذني للمنطقه شفت البيت منظفينه وباقي بس تراب
دمعت وذكرت ايام الطفوله هنا
اخذت صور للمنطقه ورجعنه
- شحتسوي بالبيت يبقه فارغ؟
- ناوي اعرض القطعه للبيع والله كريم
- خوش
نمت بالطريق من التعب
ماكعدت الا يم باب البيت
دخلت للبيت كلت لعزيز وصلنه
وكملت نومتي
شمم ..
كاعده بالغرفه اكلب بفوني مابي شي جديد مليت منه
رنيم جانت بسابع نومه اخذت فونها وتصفحت بي
دخلت عالاستوديو لكيت صور لبيتنه القديم ومنطقتنه
ماحسيت على نفسي واني ابجي حيل
دخلت بيان
- شمم شو...
شافتني ابجي سكتت
- شبيج !!
- مابيه
اجت كعدت يمي
- شمم صاير شي
- لا اهئ
- متعاركه وي اسير؟
- لاااا
- لعد شننووو
شوفتها صور البيت
- شنو هاي
- بيتنا الي بالكوت
- يا وتبجين عليه
- ايي
- كبر وكفتي كلبي
حچيت واني اشهگ
- سكتييي عني
حضنتي وحجت
- هو شي صار وراح وحيصيرله سنه هسة ذكرتي
- وخري خل انام
- براحتج
عافتني وطلعت واني نمت
ثاني يوم راسلني اسير
- موجوده؟
- ايي
- العصر اجيكم
- ليش
- شنو ليش شمم شبيج
- تمام تمام
كمت ادور بملابسي ماكو شي زين،صعدت لبيان
كالعاده دخلت چفت
جانو بيان وتمار واكفين
تمار يعدل بتشيرته وبيان ترشله عطر
بس فتحت الباب ثنينهم صاحو
- شششممممم
- يا صلوات هيج اني معروفه
- شوكت تبطلين هالحاله
- لمن اتزوج
- وشوكت تتزوحين وتفكينه
- لمن ابطل هالحاله
- لا ربحنه
- اكول انت ما تطلع اني جايه ؏ بيان
- طالع
- اكلج بنبن انطيني فد شي من جرودج (ملابسج) ماعندي
- ليش
- اخوج حيجي واذا فتت بتراكسود امي تشويني
- اختاري من الكنتور
- طلعيلي انتي حبابه
- شتردين؟
- اي شي داشوف ذوقج الخايس
- اتجاوزج بأخلاقي
- ديلا عيني
طلعتلي ثوب مال بيت طويل ومرتب
- اووو زين طلع عندج ذوق
- شعبالج عيني
- حنزل ابدل باي
بدلت ورتبت شعري اجت ماما كالت اسير اجه
صرت نادره حطيت كيك وعصير واخذته
- سلام
- وعليكم السلام
طلعت امي واني كعدت يمه
- شلونج
- الحمدلله ، وانتَ
- بخير كلش
- دوم ، ماتاكل
- منو مسوي
- هاي بيان ال...
ردت اجفص انوب كلت
- الحلوه ههههههه
- اها
اكل منها وطلع فونه بعد ماحجه
اني هم شلت فوني وراسلت بيان
- اكول بنبن
- هااا
- وجع
- بكلبج شكو
- هو سؤال
- اي؟
- شسمه تمار شنو يكلج
- شيكلي يعني غير بيان
- لا ولج يعني يتغزل بيج وهاي
- شمم وين كاعده انتي
- يم اخوج
- عقلج بي شي؟
- لاا دكولي هو سؤال
- اي يابه يتغزل ليش
- تمام ماكو شي
عفتها وحجيت وي اسير
- احمم اسير
- نعم
- انت ليش مو رومانسي وماتتغزل
شفته انصدم وفتح عيونه على وسعهن
ضحكت وكتله
- شبيك هو سؤال
- صدك تحجين
- ايي
عدل كعدته وحجه
- اني اكلج
لأن اني مااحب ابين مشاعري لأحد
واعتبر الغزل شي مو مهم لأن الحب بالكلب
كلمة عمري وحَبيبي مو مقياس للحب او غيره عرفتي
- مممم حلوو
- عمري تكومين نطلع
- ها صارت عمري وطلعه
- هههههه مو انتي تردين
- لا لا خليك طبيعي
- كومي بدلي نتعشه بره
- اوكِ دقايق
- والدقايق تصير ساعات
- لا والله هسة اروح طياره
ركضت لبست فستان طويل وكلوش وشال واخذت جنطتي وطلعتله
- كملتتت
- جيد ، شوفي بيان تطلع ويانه
- ختولي تمار يطلعها
- آآه !! خوش مرت اخو
- اعجبك ههههههه
كلت لماما حروح
وطلعنه بسيارته ورحنه تعشينه بمطعم
ودخلنه للسوك اشتريت كم حاجه ورجعنه
- ماتدخل وياي؟
- لا حرجع انام باجر دوام
- بكيفك
- سلميلي على عمي
- يوصل
فتت للبيت تلكتني بيان
- بذاته ليش ماعزمتيني
- اصلا اسير كال صيحيها وكتله ختولي
- نذله مو بيدج
- ديلا عساس تمار حيقبل تجين ويانه
- عود من اطلع وياه لزكي بينه غير اشلع اذانج
- ما ميته عليكم اسير يطلعني
- الله يرحم ايام زمان
- ههههههه
بدلت وطلعت للهول لكيتهم جايبين عشة مال مطعم
- ايباه طگو بيت هويشم كامو يجيبون دلفري
رحت اريد اكعد تمار وخرهن عني
- ولي ولج مو جنتي بمطعم ماشبعتي
- شو دوخر هو الاكل يتفوت
- بفلوسي ماانطيج
- اقطك والله
- هاج هاج لعيون الغوالي
- هو اني ليش احبك غير مدللني
لا تكلولي بابا بالشغل !!
- لا راح لعمي عباس
- اهاا ، انطيني ببسي من يمك
فتح حلكه وسوالي حركه بسنونه،سمم
- سد حلكك مو متعجب سنونك بيض
- كومي منا لا اربيج من جديد
- كايمه قبل لتكول ماميته ؏ اكلك
مرن 4 ايام طبيعيات
واليوم كال بابا نروح نشوف عمي فاضل
شويه مريض
ماكلت لأسير راح نجيكم
بدلنه ورحنه كلنه
هناك هم لكينه عمي عباس وعائلته دخلو للغرفه يشوفون عمي واني انسحبت بدون لينتبهون
وصعدت لفوك، ادري اليوم اسير بالبيت ويمكن نايم
وصلت يم الغرفه
دكيت الباب ودخلت بسرعه زين من كدرت ادكه وماجفتت
درت وجهي عالباب سديته
والتفتت
انصدمت بلي شفته !!
يتبع...
رأيكم؟
توقعاتكم؟
احبنكم 💕❕