عشك أبن الغربية

بارت 17

بقلم " فاطمه الدليمي" 💙

صدفة مريتي بدربنه... ❤
صدفه .. طحتي بعشكَنا ..❤

.................

احمد : شفته كاعد بالهول ..بقيت اتنحنح
احم .. احم .. احم ... احم .

حسين : وسموا.....

احمد : سموا بكَلبوا لابو تحسين ان شاء الله ..
عود زعلان ميرد عليه ..كمت اغنيله ..

:يمه الحلوو  عذبني ..
ومررمرر حالي  يايمه..
وظل شاغل بالي ..يايمه
. ومانعرف شراح يصير بالتالي..

حسين: لا اله الا الله ... وتالي ..

احمد: محمد رسول الله .. التالي ربَو  عالي .

وهذا الحلوو كَاتلني يعمه .. وما ادري شنو فلمه .

حسين : يول استقر شوية ..
يله تعال فهمني شمصخم ..

احمد:   انطيني الامان واحجيلك ..
حسين : وبعدين ..وياك .

هالة: دخلت للهول انطي العصير لحسين .وهذا احمد شكد يضحك .. انوب لازك عليه.
ذكرني بسوالف مصطفى ..
والحلوة ماد اصبع ايدة الخنصر ع اساس يريد يصاحبه.

احمد: امان امان اريد ...اشو خل نتصاحب جيب اصبعك ..

حسين : يابه امان بس احجي مو راح انجلط..

احمد: عجل هيله جيبيلي انه هم عصير شني بس لحسين .. ورايه شرح وتقديم عروض بعد اخيج كومي جيبي ..

حسين : استغفر الله ..يابه احجي .

احمد: يول شبيك مستعجل ع رزقك ...
هيلة وين صرتي ..فضينا ..

هالة: رحت اجيبله عصير .. اشو هذا توني طلعت كام يصيح وراي ..
اي .. اي جبتلك.. تفضل..

احمد : ادري قابلةطالب منج باجه .. هنه شربتات ..
ورحتي نمتي واخرتيني ع الشرح..
ع كلاً  بسم الله .. راح ابدي بس محد يقاطني..
ويطير الفكَرة .

حسين : ترة وصلت حدها وياك.. يله كتهن وحدة وحدة

احمد : اهوو شكوو نطيت .. مو اجتني الفكرة ..
جذب والله راح احجي ..بس منين ابدي هنه كومه..

هالة: من يمي طفرت روحي .. خفت لا حسين يخلي العصير براسه..
اله خزرة يله حجه ..

احمد : يله اسمعوني.. انتوا من رحتوا لشهر الدبس ..يووو اقصد العسل ...

ورة يومين هذا زياد ابو الوصخ .. اجاني هاد للمختبر ..
ويحجي .. ويصيح .. ع اساس احنه محرضين فرات ونحلة عليه..

عاد اني شون متحمل عليه  .. اجه بوكته .. لزمته من ياخته وضربته بوكس ..

بس حرامات   طلع مامنوا فايدة اشو هذا بساع انجطل وتكوم بالكَاع ...

حسين : عزة بعينك بس لاصار بي شئ.

احمد: مو جاي اكول لحد يقاطعني .. يابه شبيكم..
لاكلشي ماصار بي ..
اغم اثاري .بس لسان ...  والله لاتشوفوا .. انه ضربتوا وانقهرت عليه .. يعني مو كَد العركات شكو مدخل نفسك ..

حسين : عجل وابو تحسين .. شبي . . صاير ادمي براسي ويدور حكَوك..

احمد: هذا مثل الذبانه بكلشي حاشر نفسوا ..  من شاف العركه .. ع اساس جبير واجه يفازع ..
     اخ شكد مشتهي اكَتله .. بس حرامات دخلني عمار جوه .. وطردهم ..
حرامات .. بعد هي صارت قابل يوميه تنعاد. .لومحصل فد كفخه ..
كله من ورة عمار الهتلي ..

حسين: خرب بيك .. انوب تريد تبلينه ويا هذا العار.
وسالفة زواجك..

احمد : ابو الوصخ محد .. جايبه بكفختين معدل راسه بيهن ..
اوف يزواجي ...
ورة العركه ... ..  المغرب اتصل عليه رقم غريب..
جاوبت .ولان صوت بنية تبجي..

كلشي مافهمت .. بس بكَر اندعم وراح يموت..
بسرعة رحت لبغداد بدون ما اخبر احد..

حسين : اي .. خطية ميستاهل هساع شون صار ..

احمد : يا اخي شبيك جايك بالطريق .. لاتسبق الحدث..

عاد وصلت للمستشفى .. لكَيت بس اختوا لبكَر كَاعدة تبجي وهو بالعمليات ..محد يمهم وهي خابرتني ..

الحمدلله طلع بكَر من العمليات .. بس رجله مكسورة..
وعنده رضوض بجسموا ..
ولازم ميمشي .. يبقى كاعد ع السرير ..

وانتَ مو تعرف همه مزاعلين ويا كرايبهم ..
وانه بقيت يموا ...
لهذا تزوجت اختوا.. ريان ..قابل ابقى طاب طالع عليهم وانه غريب 
مايجوز ..  كلام الناس ميرحم ..
لهذا تزوجتها .وظلينا انه وياها انداري بي ..

حسين: كفوو منك زين سويت ... منو يدري بزواجك..
شون قبلوا..

احمد :   كَفوك الطيب  بعد    انه ترباتك      بس فرات وعمار يدرون .. لان همه جانوا الشهود..

بكَر بالبدايه مارضى ... بس انه  كوه قنعتوا يكول ما اريد اظلمكم انتَ واختي ..بهذا الزواج..

قابل نسيت فضلهم ويانا بغداد.. كرايبنا ماسووا سوايتهم .. رغم همه غربه ..

وهساع انتَ فهمني  الباب شدخلوا .. ومفلشوا ..

حسين : غير من وراك خابرني ابو تحسين .. الي مايسوالو كَشر بصل .. يعلمني العيب .. والتربية ..
انوب انتَ سديتوا للموبايل .
وظليت انه مثل الاطرش بالزفه .. كلشي ما اعرف
ولا انتَ اجيت وفهمتني من البدايه .

احمد : خلي خلي ابو الوضخ .. هم تكَظبوا ايدي .. وانه اعلمه لو يطلع جده من الكَبر هم ما اعوفوا..
قابل  خبل .. انتَ عصبي واجي كَبالك .

حسين : عوفك منوا .. هساع مرتك وين .. وانتوا زواجكم شرعا وقانونا مثبت ..

احمد: اممم وانتَ. عليش هلكد تسال قابل تحقيق..
بعدني مامثبتوا بالمحكمة ..بس عقد سيد ..

حسين : حباب تثبتوا .. وتجيبهه تعيش هين .. يمنه ..وبكر هم جيبوا  خل يكَعد .. بيتك.. اقلها قريب .. احسن ما يوميه رايح لبغداد ...

احمد : ان شاء الله .. اي ست هيله سمعينة حسج ....انتِ ويانا لا
شفتي الفلم كَلوا .. شنو رائيج..

هالة: جنت كَاعدة يمهم بس مستمع... الا احمد حجة وياي...
رائي من رائي  حسين .. جيب ريان تعيش ويانا..

احمد : وانتِ شكو مستعجلة تلحكين تتكَاونين وياها ..
وتبقن مناكر.. ..وتعال يحسين واحمد افزعوا..

حسين.: دكوم احسلك .. والله ماترهملك كل جارة ..

طليعة : هاا يول .. ابو المشاكل ..شوكت اجيت..

احمد: يا هله بطلوع .. عجل امي وين ظلت عليهة خل تجي وتكتمل عصابتكم....

طليعة : انجعم  احسلك  زعمن حجه ..
انه عمتك .. مو اخيتك.. ..تعال هين انتَ منهي التزوجتهة ..

احمد : بالله غير سمعتي كل الحجي ..وهساع ترديني اعيدوا .. مو انه اعرفج .. ماشاء الله عليج اذان عبالك رادار ...
تزوجت ريان اختوا لبكَر.

طليعة : مو انه اعرفكم مابيكم حظ ..
واحد متزوج.. كَطمة..وهساع انتَ اخذت العوصه ..
وهذاك الفاهي كلهن .. مجموعات بمرتوا..

صدك لو كَالوا اذا فات الفوت  ماينفع الصوت
بعد شحجي .

هالة:  احجي بيني وبين نفسي خرب بحظي هسة اني طلعت كَطمه. والله مبينه هلطلوع مبينه مو هينه ..
عود كل وحدة مطلعتلهة لقب ..

فرات: هااا عمه ترة سمعتج هساع انه فاهي ..
ما اكول غير صوجي .. لو اكلج طلوع ومطول لساني ..مثل احمد .. جان ماكلتي فاهي..

طليعة: فاهي ونص .. لو مو فاهي جان ماخليت اخوها يجي ياخذها..

فرات : شسويلهه اولي وتالي ترد لبيتهه ..

حسين : يعني هساع مرتك ماكو هين؟؟

فرات: لا من احمد ضربوا لزياد .. اجه ماخذهه ..
والله غير سالفتوا سالفه .

احمد : خيولي ابو الوصخ..

حسين : هساع لزكت ابو الوصخ وابو الوصخ ..
لعبت نفسي..
اسمعوا اثنينكم .. بعد صلاة العشا نروح لبيتهم فرات .يرجع مرتوا .. وانتَ تعتذر من زياد .فاهمين .
مهما يكون نسابا .

فرات: ما اروح . قابل انه دزيتهة لو طردتهه .هي راحت برضاتهه.

حسين: والله انه كَلت كلمه ومتصير اثنين.. مفهوم .

احمد : عيعع انه ما اراضي اخاف يصير بيه وصخ.. اتنكَس ..

هاالة: صدك ضحكت عليه ... من يعيب ع زياد . يحجي ولا يهتم . ولايضحك ..

حسين: صدك ماتستحون..
وانتَ فرات مو نسيبك ... اشوفك فرحان ع كتلتوا .

احمد: اي بالله فرحان ومكَيف .  لان ضربتوا . ع اساس نسيبوا .. وميريد الناس تكول تكَاون ويا .

فرات: جذاب اصلا لو ما انتَ ضاربوا جنت انه راح اضربوا.. .. لان يستاهل ..

طليعة : انه من البدايه كتلكم . مايوالمونا .. بس محد اخذوا لكلامي ...
حلاتوا للثوب ركَعتوا منوا وبي ..

فرات : يوو عمه .. شببج وياها هو بس زياد ندري ..
هواي يتفيك .. ويبيع مثاليات .

طليعة : اي والله وكَت وطلع للفاهي لسان ..

ام حسين:  يولوا سدو الموضوع كافي ..
ماتكولون اكَو عروس كاعدة هين .. تلكيتوها بمشاكلكم ..
كَومي يمه كَومي وياي نسوي عشا .. وادليج ع غراض المطبخ .. هذوله .مامن وراهم بس وجع الراس..
تعلمي عليهم .

هالة: همزين امهم فكرت بيه .. عبالك نسوني ..
والله حبيت سوالفهم ماتعرف مدري يتشاقون مدري يتعاركون ..

حسين: ماكو داعي تسون شئ لان اليوم عشانا ع احمد ..

احمد: بسم الله  يمكن صار عندي صداع وكمت ما اسمع زين ..

فرات:   لا لا كلشي مابيك سمعت كلش زين ...ديلة كَوم خسرك عشا ..

احمد ؛  يول مو كافي الفندق جان عليه .. هنوب العشا ..

حسين :هاا وباجر من يجي بكَر ومرتك .. الذبيحه عليك ..

احمد: ترة زودتوهه .. الذبيحه شكوو .. خليهة لما يحبلن ويخلفن  يله نذبح.. .عصفورين بحجر واحد  احسن مايوميه   ذابحين .  قابل كَصاب ..

حسين: يول راح يزيدن وبعد اخليك تصرف..

احمد: اكَوم اجيب عشا احسلي .. هنوب تاخذون كل فليساتي وتخلوني .. افر براسي..

...........

هالة: هذا احمد هم طلع ابو فليس امر من مصطفى ..
َكمت من يمهم رحت  للغرفتي ..

ورة شويه اجه حسين ..

حسين : ادري بعمتي زودتهه ويا هالة .. خطيه كلشي ماحجت بقت ساكته ..
ورة شويه راحت للغرفه .. ..

هاا يولي .. شو هنا جيتي... بس لا زعلتي من عمتي

هاالة: هله بحبيبي .. لا والله عليش ازعل ..
اصلا مبينه .كَلبها طيب ... بعدين اني مو صرت من عدكم .
. بس كَلت اريد اخابر امي .. واحجي وياها شوية .

حسين : يمه فديت مريتي العاقلة
هساع شكَول  ..يمحله الصدفه الجمعتني بيج .

لو رحمه للسواه للانفجار ...

هالة :  تقدمت عليه وطوقت ركَبته بايدي .
هههه والله يا حبيبي ..
كول رحمه للعيطه .. الي عطتهه بيه وخرعتني ..

خلتني اوافق بدون تفكير.

حسين: هههه والله انقهرت عليج ..
بس شسويلج جبرتيني .. مو يكولون ..

أختار بعناية من تزرعهم بكَلبك ....لان اختيار البذرة اسهل .. من اقتلاع الشجرة ..

وانه اختاريتج .. بدقه وتركيز ..
وهساع اروح عندي شغل مو وكت دلعج .... خلي بليل .. احلى ..

هالة : اوي فشلتني .. ابو الحكم .. روح الله وياك ..
حته بليل هم كلشي متحصل اروح انام يم امك ..ويوسف.. ..
بحجه اشتاقيت  لامي ..

وانتَ ابقى وحدك..

حسين : وجعوي بكَلب عدوج .. بعد لاتكولين هاي الكلمه .. ما احبهة ..

اشتاقيتي لامج موو.. ..وكرصته من خشمهة ..

هالة : يابه دعوف خشمي .. مو راح افقدك حاسة الشم من وراك..

حسين :: هههههه عود  اذا فقدتيهه انه اكلج شون الريحة .. اوصفلجياها ..

هالة: ما اريد وصفك مشكور .. ..
صدك بس سؤال قبل لاتروح..
بيت بكر شسوولكم  بغداد .. ومتنسون فضلهم ..

حسين: امم اليوم شكو .. اليوم العلمي لكشف الاسرار وما ادري.

هالة: ههه اي .. الله احجيلي ..

حسين : من ارجع هساع مستعجل اريد اطلع ..
هالة: اي واني ابقه انتظر .. الفضول يشتغل الف..

حسين : يوو نسيت اليوم مشتاقة لامج .. وتروحين يم امي .. عجل .. من تشبعين منهم عود تعالي احجيلج..
يلة اودعناج..

هالة: هذا صدك طلع.. بسيطه يحسين ..
خل اخابر امي احسلي ..

..............

ام محمد : جنت كَاعدة انه وتغريد .. وبالي يم هالة .. شكد مشتاقتلهة ..
همزين خابرت عليه..

يمه والله مشتاقتلج .. شوكت تجينه ..
البيت خالي بدونج ..
رحتي وراحت ضحكت البيت  وياج .

مصطفى : سمعت امي جانت  تحاجي بهالة وتتشكه .
صحت عليه لعد اني جيس حب هنا .. مو خطيه سيبويه جان معيشكم ع اجواء الفرح .

ولج لاتصدكين جذب والله توهه جانت تضحك ..

ام محمد: امشي ولي .. شكو اجيت ... ماتكول نسوان ويحجن .

مصطفى : والله عدجن غرف واكعدن احجن .. مو كاعدة يمي تحجين..

هالة: هاا يمعودين وينكم .. شو نسيتوني ...
ولك صوفي عوفه عاد .

مصطفى : ولج قزومه مشتاقين.. 
شلونج اخبارج..

هالة:هههههه  زينه الحمدلله .. وانتَ شلونك ..
شلون دراستك .. قربت امتحاناتك..

مصطفى : لا عاد هنا تخاربنا.. امشي ولي مو مال واحد يسال عليج .. بكلشي مدخله الامتحانات.

ام محمد: خيولي يمه معليج بي .. شوكت تجينه .. كَلبي مفرفح ع شوفتج ..

هالة: اللع كريم .. اشوف .ع مجال حسين . يله مع السلامه سلمي ع الكل بعدين احاجيج..

ام محمد : الله وياج يمه ..
اوف يهاله ..  البيت بدونهه ميسوه شي..

مصطفى : اي كَومي ابجي بعد ..
هي كل بنيه مصيرهة تتزوح وتولي لبيت زوجها .

هسه انتِ مو تزوجتي ...
لو عليج حلال وع هالة حرام ..

ام محمد: كوم من يمي .. ترة بعد ما اتحمل لسانك .

مصطفى : اصلا كايم بدون ماتكولين هسة تفتحين الحزينه ..

صدك تغريد... عود غرديلهه بالانكليزي ... بلكت تنسى هالة ..

تغريد : ههههه  ناسيه الانكليزي .. نحجي عربي احسن ..

مصطفى : عود سويتج فهيمه ..

.........

🌛🌹 انتظروني 🦋💥بالبارت💥 🦋القادم 🌹🌜