أنتقام للعشق

البارت الثاني

#انتقام للعشق🥀
البارت الثاني
بقلم : نور حيدر

المهم رديت بس مغوركة عيوني ..
رجعت احضن حياطيني ،
رجعت و روحي توجعني !!
واحس بس غرفتي التگدر تواسيني !!
بچيت من المخدة لـ آخر أحلامي ..
لحد ما غوشت عيني !!

......

(علقو على الفقرات مو تنسون  😊💜)

كعدت الصبح غسلت وجهي ولبست بنطرون وقميص تحت الركبة سمائي لونه ..
مشطت شعري ولفيت الحجاب اخذت كتبي وعباتي نزلت جوه شفت ليث منتظرني ..

: صباح الخير

:هلا صباح النور يلا خل اوصلج حتى لا اتأخر اني ..

سمعت صوت امي :يمه تعالو اكلو شي وروحو

كتله :اني مااشتهي

ليث: لعد يلا خل نمشي ..

رحنه صعد هو وصعدت اني بصفه وكتله ؛صدك ليث خل نروح لبيت عمو ابو فارس

رفع حاجبه : ليش شعندج رايحه .. اريد امشي اني عندي شغل لا اتأخر

باوعتله بهدوء وكتله:مو شسمه

: شنو شسمه ماتحجين شبيه

:احم مو زينب راح تروح ويانه ..

باوعلي سكت ثواني و رجع حجه بغيض : وليش تروح ويانه مو اخوها الي يوصله شكو بعد ..

: مو هو اتصل البارحه فارس على شاهر وكله عندي شغل واطلع من الصبح اخذو زينب وياكم ونسيت اكلك
.

:استغفرالله اني اريد امشي وانتي اتأخريني ..

؛شبيك ليث ترى تدري احنه كلنه بنفس الكلية بعد عليمن هذا الحجي و أخرك ..

اتصلت على زينب وكالت جاية .. شفته طلعت من باب بيتهم واجتنة بسرعه مثل المخبوصة ..

فتحت الباب وكعدت وره كالت : صباح الخير

رد هو برود قاتل وشكله جامد : صباح النور

درت وجهي  عليه ابتسمت : شلونج زنوبة حبي

:هلا حبيبتي تمام

باوعت على ليث وكالت بأبتسامة ومرتبكة : شلونك ليث

حجه بنفس نبرتة البارده : زين

شكد استحيت من طريقة كلامه وياها وحتى مكال انتي شلونج باوعت عليه لكيته مدنكة راسه وتفرك بيديها ..

زينب بنت عمي ابو فارس ..

عمي ابو فارس ماعنده غير ولد وبنية ..
فارس عمره ٢٨ سنة متخرج كلية ادارة واقتصاد وحب يكعد ويشتغل بشغل العائلة ومعتمدين عليه بأبسط الامور وحتى محمد معتمد عليه ..
هذا الشخص ماينعرفلة اصلا بكيفة بوقت الي يعجبه يضحك وبوقت الي يعحبة لا ..
وقليل الكلام اصلا قليل نشوفة لهذا المخلوق ..
اكل لزينب الله يساعد كلبج على هيج اخو بارد وماحسه يهتم بيج .

هيا تبتسم وتكلي بلعكس ماكو احن من كلبة اول مره ماصدكت اني ..

وهيا الصغيره عمره ٢١سنة مرحلة ثانية تدرس علوم بايلوجي ...
هادئة وحبابة وماكو مثل كلبة الطيب ..  وكله يحبونه يحبون هدوئه ونزاكته ..
الا شخص واحد ينفر من يشوفه واكيد عرفتوه ليث حتى مرات تلاحظ وتسكت ..

وصلنة للجامعة ونزلنه ثنينه .. يم الباب وشفنه جماره منتظرتنه ..

اجت علينه ومبتسمة :هلاا صباح الخير شو اليوم جايات سوه..

زينب : ايي فارس عنده شغل واجيت وي جوري

كتلهن: يلا هل نمشي وبعدين نتشاوف

جماره: ماشي يلا باي ..

جماره بنتي عمي ابو شهاب عمره ٢٣ سنة تدرس صيدلة صديقتي المقربة كلش صح فارق عمر بس مو جبير..
اخوات احنه قبل لا نكون بنات عمي اختي وصديقتي وبئر اسراري هااي ..

كل وحدة راحت على قسمه رحت اني ودخل علينه الدكتور وظل يشرح واحنه كلنه وياه يحجي واني اكتب الملاحظات المهمة والي احتاجهن ..

اتذكر اول دخولي بعالم الطب بمرحلتي الاولى شكد عانيت واستصعبت وحتى ردت اترك هذا الشي واغير قسمي بس اخواني وابوي شجعوني وماعافوني خاصة شاهر ابد ماتركني وظل يرزل بيه من عرف اريد اترك القسم ..

*الماضي
شاهر : شبيج انتي تخبلتي شنو تكولين اريد ابطل واعوفه لج بابا هيا الشغلة لعبة

كعدت بلكاع يم جربايتة واناشغ من البجي: كتلك مااروح بعد يعني ماروح صعب والله صعب وماكدر اتحمل اني وين والطب وين

باوعتله برجاء : عفية شاهر غير قسمي فدوووه

كعد يمي بلكاع وحضني وظل يمسح بشعري يمكن عرف شنو شعوري بهاي اللحظه لان جانت هاي السنة صعبه عليه كلش بسبب الي مريت بيه ..

من دخلت اول مرحلة الية جانت صعبة عليه لان قبل فترة طلعت من القوقعه الي جنت عايشة بيها وجانت حالتي كلش صعبه فا طلعت منا ودخلت لطب ..
حسيت انتهيت تعبت كلش وطاقتي خلصت ..

باوعلي ومسح دموعي بيده وكال بحنية : ادري تعبانه بس مو من الدراسة من الي صار وياج والضغوطات الي شفتيهن بس اني اعرف اخيتي قووية وكدها وراح تهزم كل الصعوبات وتوكف على رجليه من جديد

نزلت راسي : ماكدر شاهر خايفة

حجه : شوو رفعي راسج

رفعت راسي وعيوني مغوركة بلدموع ..

باوعلي بهدووء وكال ؛ يروحلج فدووة الي نزلهن  الج انسسي كلشي جوري صح صعبه بس انسي والايام كفيلة بنسيانج ..

كتلة برجاء: شاهر عفية ماكدر

ابتسم : لا تكدرين انتي الشيخة جوري انتي جوريتي الي اعرفه قوية وعنيدة وتهزم اي واحد يكله ماتكدرين
هذا امتحان الج وانجحي بيه لا تنهزمين وخلي الهدف كبال عينج ..

من حجه هيج اتذكرته هووو وخليته كبال عيني وسويته حتى وتحدي لازم انجح بيه ..

مسحت دموعي بسرعة وابتسمت اله : ان شاءالله اوعدك شاهر راح اكدر وارفع راسك وراس ابوي وتفتخرون بيه ..

ابتسم :احنه من زمان فخورين بيج

*

ابتسمت وظليت ارجع اكتب وتركيزي كله يم الدكتور خلصت المحاضرة وبدت وحده وره الثانيه  .

انتهى الدوام على خير اتصلت بل بنات منتظراتني بلحديقة ..

رحت لكيتهن كاعدات جمارة : ها يحلو خلصتي ..

: ايي خلصت

دك الموبايل وشفته ليث جاوبته :هاا خوش منتظرنة مااشي اجينه ..

باوعت لزينب : يلاا ترى منتظرنه ليث ..

انخبصت زينب وكامت بسرعة : هاا اي يلا ..

باوعت على جمارة وكتله: وانتي منو يجيج..

:غسان لو السايق ..

:تجين ويانه احسن شي شوفيه اذا بعده مواصل عليج روحي ويانه ..

:خوش لعد خل اتصل عليه ..

اتصلت عليه وكال الها روحي وياهم لان يتأخر عنده عملية ولازم يسويها ..

:يلا لعد اتصل عليه ليث منتظرنة ..

رحنه وشفته منتظر صعدت يمه كدام والبنات ليورة ..

باوع من المراية وابتسم : يا هلا ست جماره ويانه اليوم واكول ليش السيارة منورة ..

ابتسمت اله وكالت ؛ مشكور عيني ليث هذا نورك  راح اتعبك لان توصلني لبيتنه..

ابتسم : تعبيش هو انزلجن يم باب بيتنه وكل وحده تتوكل على بيتهم ..

جماره : ياا صدك ليش خو وصلنه على بيتنه

: بت الاوادم هو غير باب حوشكم بنص بيتنه بطلي عجوزية جماره ..

ضحكت عليهم وهو حرك وبقت جماره تلغي وي ليث واني ابتسم على كلامهم بس صوت وحده ماسمعته ..

درت وجهي وجان اشوف زينب صافنة على ليث وامبين عليه ضايجة لان ماحجة وياها بكلمة ومامعبره اصلا ..

رجعت لمكاني واني ضايجة عليه واعرف شنو حالته هيا ..

وصلنه للبيت ونزلنه ونزل ليث ودخل للبيت باوعت عليهن وكتلهن :بنات شرايجن ننجمع اليوم

زينب :اي والله  صارلنة فترة مامجتمعين بس وين..

جماره : شرايجن تجن يمي ونجتمع ..

اختفت ابتسامتي وكتله بنرة هادئه : لا تعالن يمي اليوم نجتمع سووه

باوعت عليه جماره ومثل الي فهمت قصدي كالت بهدوء : ماشي مثل ما تحبين يلا بااي ..

مشت زينب واني دخلت للبيت وعرفت انو جماره ضاجت بس صعبة عليه بيت عمي مطابتلهم صارلي هواي بس مرات من يطلب من عمي انو يشوفني لان يظل يسئل عليه ..

يعني بلسنة حسنة اذا رحت واجيتهم اكثريته ابيتنه او ابيت عمي ابو فارس وهمه متفهمين وضعي ..

يعني وين جنت ٢٤ ساعة يم جماره اظل وهسه ماكدر ادخل عليهم صعبة كلش اختنك اذا دخلت ووصلت يمهم ..

دخلت للبيت وشفت ليث كاعده على القنفة وبعده بنفس ملابسه وخال ايده على خده وصافن مثل الي يفكر ..

رحت وكفت يمه وصحت عليه : لييث

هو انتبه عليه و كال : ها جوري شرايده ..

؛ شبيك صافن وليش كعدت هنا مارحت فوك ترتاح تبدل ..

: هاا ايي بس حسيت بتعب وكعدت شوي

:ليث شبيك ليش صافن

: لا ماكو شي بس اجت حسبة ابالي لا يضل بالج

كتله ؛ليث ليش هيج تتعامل وي زينب مو خطية

عقد حواجبة وكال : وشمسوي اني وياها كاتلها لو مصيح عليه شسويت حتى تكولين خطية

؛ تصرفاتك وياها تحجي برود وبس تخزر بيها و حتى سلام ما تسلم

: اني هاي تصرفاتي  وي الكل

: لا تضحك على نفسك هاي تصرفاتك بس من تشوف زينب وي الباقي لا عادي تضحك وسوالف وشقه واكبر مثال قبل شوي شقاك وي جماره وعايف حتى البنية ماكتله شلونج واليوم الصبح تحجي بنتر وياها شمسويتلك البنية شو بس انت هيج تتعامل وياها ..

وكف على حيله وخزرني حجه بحدة : اكلج انتي لا تظلين تتمسلتين بلحجي هاي تصرفاتي عاجبه اهلا وسهلا مايعجبه خل تركع راسه بلحايط واذا تردين ركعي راسج انتي هم ...

وصل يمي وخزرني ودفعني من يمه ؛ شوو وخري خل اروح انطمر احسن شي ..

ظليت واكفه مصدومة منه هذا شجاااه اووف من ليث من يعصب هذا هادئ بس من يعصب ينطبق عليه مثل هدوء ما قبل العاصفة الله لايشوفكم من يزهك ..

صعدت فوك دخلت لغرفتي غيرت ملابسي وكعدت شوي ارتاح نزلت جوه لكيت امي وفاتن يحضرن بالاكل ..

سلمت عليهن وساعدتهن ظليت انقل الاكل واحطه بلسفرة ..

كعدنه كلنه ماعدا ليث ماموجود أبوي باوع وكال : جا ليث ماكو وينه

غيث : بوية صعدتله حتى ياكل بس مايقبل يكول اريد انام ما اشتهي ..

ظلينه ناكل محمد باوع على غيث هو ياكل : اكلك غيث

رفع راسه وكال ؛ هاا

محمد : اني سامع التوأم اذا واحد يصير بيه شي الثاني يحس ويضوج وهم يتعب مثله

باوعله غيث ورافع حاجبة يريد ينتظره يكمل : ايي

: شوو اخوك التوأم مايشتهي ياكل ومنزل بقه فوك بغرفته  شو انت عادي نزلت وظليت تاكل وحتى خلصت الاكل كله  مابقيت علينه شي ..

امي حجت : قل اعوذ برب الفلق  ولك محمد جوز عن اخوك خل ياكل لا تحسده

: ماشاءالله  عمي ماحاسدين بس حبيت استفسر يعني ..

باوعله غيث و كال : توأم غير متماثل احنه ..

ورجع دنك وظل ياكل ولا كأنو السالفة تخصه  .. ضحكنه عليه وكملنه اكلنه ..

خلصنه كلشي وصعدت فوك ارتاح وقتت موبايلي ب٣ حتى انام واكعد هيج وقت

وصدك غفيت وكعدت على صوت المنبه رحت غسلت وجهي  وكعدت اقره  واني خايفة وافكر يمكن باجر الدكتور ينطي درجات الاختبار وخايفة ..

ظليت اقره لحد ماحسيت بتعب شفته الساعه  ب٦ ..

كمت من مكاني واني ميتة تعب وعظامي متكسرة ..

نزلت جووه وساعدت فاتن بتحضير العشة خلصنه وكعدنه نتعشه كلنه ماعده ابوي ومحمد طالعين  لان معزومين ..

خلصت وكلت الفاتن البنات راح يجن خل نحضر شي وصدك حضرنه عصاير وكرزات وعدنه كيك مسويته فاتن يخبل طعمه حضرته بمواعين   شووي وسمعت صوت جماره بره تحجي  ..

: يا اهل الدار هل من احد هنا ..

فاتن : اووف منه و لا تعقل ابد عود كبرت

ضحكت :  شلعيج بيها اصلا الي محليه دمها الخفيف ..

هزت راسها بيأس .. واني طلعت الهن لكيتهن كاعدات بلصالة .. اخذتهن ورحنه على المطبخ

جماره : الله شنو هاي الحبشكلات عاشت ايديكم ..

جوري : يلا خل ناخذهن ونطلعهن بره نكعد ..

اخذنه الحلويات والعصائر وطلعنه بره الجو  جان كلش حلوو ويرد الرووح ..

ظلينه سوالف وضحك  وبعدين ظلينة نرجع للماضي ..

جماره : زنيبة تذكرين من جنتي تلعبين دعبل وي الولد وظليتي تضحكين عليهم وتاليته همه ضحكو عليج واخذوهن منج واجه عليج ليث يصيح بيج ويرزل لو شويه راد يضربج لان انتي مشاركته ونصهن دعابلة..

ظل يحجي ويكلج : فاهية غبية ليش اخذوهن هسه اريد دعابلي وتعارك وياي اني جوري لان احنه راس العصابة

ضحكت زينب  وكالت  : اي كله من وراج حصلت راشدي واني صغيره من ليث

كتله واني مبتسمة : يلا كبرتي ونسيتيه

حجت جماره واخذها الحماس ونست روحها كالت بأبتسامة : جووري تذكرين شهاب من كتلني لان تعاركت  

وسكتت ما كملت كلامه وظلت تباوعلي .. ظليت صافنة عليه وخلتني اتذكر هذيج الأيام  .

حجت فاتن وهيا راصة على سنونها : جماره عوفي ذكرياتج هسه واكلي ..

هيا ظلت تباوعلي جماره واني اخذتني هاي الذكرة لووين لأيام طفولتي وضحكتي وفرحتي ..

*

جان عمري ١٠ سنوات
وتعاركت وي جمانه علمود اللعابة فا هيا من قهره ضربتني على راسي واني ظليت ابجي ..

اجه شهاب لان قريب علينه وجان بوقته عمره ١٥ سنة ظل يسئل بيه شبيج وليش تبجين

أشرتله على جماره وهو عرف وراح تعارك وي جماره وظل يرزل بيها ويصيح وتاليته ضلت  تبجي جماره

وكلبناها مناحه اني وياها وهو احتار ويانة اخذنه لمحل حلويات واشترالنه وسكتنه وهو يباوع علينه ومبتسم

..*

وعيت على نفسي من صوت زينب وهيا تصيحني : ها زينب

؛ شبيج احجي وياج وما تردين عليه

: اسفه بس جنت افكر للامتحانات

ابتسمت وكالت : الله كريم

باوعت مالكيت لا فاتن و لا جماره : لعد ذني وين راحن

: مادري بس فاتن صاحت على جماره وراحن

؛ اها انتظريني لعد خل اجيب ماي الي اجيبلج وياي عصير شي

: لا ماريد شربت

هزيت راسي ورحت للمطبخ  واني ظليت افكر اااخ منج جماره شرجعتيني بكلامج هذا  .. لنقطة الصفر جانت هواي ذكريات عندي اريد بس مااذكرهن بس الناس والمكان كله يذكرني ..

وكل ما اتذكر ازداد حقد وقسوة وكلبي كل ماله ويزيد قسوة وكراهية ..

وصلت يم باب المطبخ واني اسمع فاتن تحجي وي جماره : انتي شبيج اكو وحده عاقلة تحجي هيج بس اني ويامن احجي للماعنده عقل

: هااي شبيج فاتن والله نسيت واخذتني السوالف يعني شنو اني متعمدة حتى اذكرها

: ولج انتي شلون تجيبين اسمه وتذكرينه والناس ناسيتة  اصلا

حجت جمارة بصدمة : يعني هسه افتهم جوري وتريد ماتذكره وتنساه  بس انتي ليش فاتن تره هذا اخووج ليش كلبج يقسه عليه

حجت بقهر : شلون ترديني ارجع احن اله وكلبي مايقسه وحياتي ادمرت بسببه ولج اخوج هذا دمرني ودمر حياتنه كلنه ويااه وانتي تكليلي ليش هيج ..

: بس مهما يصير يبقى اخوج وهو مجان متقصد يأذيج وتدرين كلش زين هو يحبج وانتي جنتي اقرب وحده  اله

حجت بهدوء  فاتن : انتي كلتيه جنت يعني شي صار من الماضي بس انتي ابقي هيج ضالة بس منتظرته

: اي شعندي غيره اخووي وشما سووه يبقى اخووي واحبه واتمنى يجي اليوم قبل باجر

حجت بعصبية فاتن : عليش يجي  على سواد الوجه الي سواه و الي نزل راسنه وراس ابووي

ظليت اسمع كلامهم وماتحملت اكثر من هيج وجمارة شي عادي يبقه اخوها وتحن اله شما سووه

قويت حالي ودخلت عليهن للمطبخ هنا سكتن كبل وظلن يباوعلي بصدمة وخايفات خاف سمعتهن ..

كتلهن بأبتسامة : شعدجن هنا شو يالخوات ما مرتاحه بوكفتجن هاي شنيي تحشن بينه  .

ابتسمت جماره  : عشتوو اذا اني احش بيج بس  فاتن كتله اريد كيك من الي سوته شو حبيته

ابتسمت فاتن : اييي ماتدرين بهاي جوعية شو امشن خل نروح يم زينب خطية عفناها وحده

مشينة وظلن يسولفن واني بالي مو يمهن أبد هيجت عندي الذكريات جماره صح اني مناسية بس من يجي واحد ويذكرك بيهن تختلف ..

قويت نفسي كدامهن لان اني بطبعي ماحب أضعف كدام احد واشوف الشفقه بيعونه بس يم شاهر اضعف واظل أبجي حتى ..
لان مو بس اخوي هو ابوي وصديقي وكلشي بلدنيا ..

لحد مامشن وصلناهن ورجعنه للبيت عزلنه الهوسة اني وفاتن ومنتبه انو تباوعلي ..

خلصنة وردت اصعد بس لزمت ايدي وكالت بقهر : جوري لا تضوجين من الي حجته جماره وخاف ذكرتج بأشياء جنتي ناسيتة بس هيا ماتقصد

كتله بهدووء: ناسية !؟
شنسه فاتن بس مع ذلك ماهتميت وعادي ومشايلة بخاطري على جماره هاي اختي ترى ..

ابتسمت  بوجهة وصعدت فووك دخلت لغرفتي وسديت الباب وراي وكعدت على الجرباية وظليت صافنه وأفكر  حسيت شي انجمع بعيوني ..

: شنو جوري بس لا تردين تبجين لا عيب لا تبجين على شي ما يستاهل ترى

رحت على ميز المراية وفتحت المجر وطلعت منها  القلادة رفعته وصارت كبال عيني ..

اباوع عليه بقهر وبحقد هاي الي جنت ابد ما انزعة من ركبتي  هسه صارلج خمس سنين مشموره بلمجر ..

بس  مابقيته لغير شي واحد بس حتى يزيد كرهي وانتقامي ..

سنين ماعشت بيهن مرتاحة .. جانت القلادة عبارة عن شكل وردة بيها اوراق ..

نرجع للماضي *

رحت اركض ولازم الشهادة بأيدي رحت للبستان ولكيتة يم شجرة التكي واكف يباوعلي من بعيد ومبتسم

رحت بأتجاهه اركض واني رافعة  الشهاده  وصلت يمه واني فرحانه وبنفس الوقت فحطت من الركض  ظليت اتنفس بسرعه واضحك ..

هو حجه بضحكه وكال  : بوية على كيفج اهددي

كتله بضحكه : باركلي نجحت راح اروح للخامس ..

أبتسم بفرحة : الف مبروك يرويحتي عفية عليج يا فخري انتي ..
بس هاا ترى زاد الحمل عليج وذبي جهدج بلخامس  صعبه راح تكون حتى تنجحين من اول دور وترحين لسادس والله يتممه علينه  

ابتسمت  اله وأني فرحانة :اييي ان شاءالله

طلع من جيب دشداشته علبة حمرة على شكل قلب وكال : أفتحيه بوية

فتحت وجان اشوف سلسال ذهب عبارة عن وردة صدك حبيته :الله تخبل

: هاي الج حتى تكونين اسم على مسمى صدك جوري
هاي هدية نجاحج بوية ..

: مشكور بس شعرفك نجحت شنو جمارة حجتلك

هز راسه بلنفي وكال : أني اشتريته  من اول يوم إمتحان  الج .

انصدمت منه وكتله : شدراك انجح يمكن اوكع بمادة او أرسب

: لا اسم الله اني عندي ثقة بيج انو انتي كدها وراح تنجحين

ابتسمت اله وكال : شوفي بوية هاي هديتج توصل بيد جمارة حتى لا احد يشك بشي ويكلولج منين

هزيت راسي واني فرحانه .. ظليت شووي وياه بعدين رجعت ..

صدك ثاني يوم اجتني جماره وكالت كدام اهلي هاي هدية نجاحج ..

وظليت لابسة هاي القلادة وماذبيته لحد ما صرت بلسادس ..

*

رجعت للواقع واني اباوع عليه وحاقده .

سمعت الباب يندك خليت القلادة على الميز و رحت فتحتة وشفت شاهر واكف ومبتسم ..

: شاهر شعجب منايم لحد هسه غير باجر عندك شغل

أبتسم وكال : عادي ادخل

: اي تفضل

ابتعدت من الباب وهو راح اني سديت الباب وظليت واكفة اباوعلة

هو وكف وراح يم ميز المراية وشفته شال القلادة بيده وظل يباوع عليه ويرجع يباوعلي ..

حجه بهدووء : شعده هنا ليش محتفظة لحد هسه بيها جوري

رحت اخذته من يمه ورجعت ضميته بمكانه وكتله بهدووء : هيج ماكو شي مجرد خليته ذكرى

كال بهدوء بس امبين عليه ضايج : شنو بعدج جوري تحنين اله

رفعت راسي عليه وهنا بعد ماكدرت اتحمل خليت دموعي تنزل : شتكول شاهر شنو حنيت انت من كل عقلك تحجي

: جا شنو الي يخليج تحتفظين بذني الذكريات الي مايجيبن بس الهم والغم على كلبج ..

ظليت ابجي بحركة : أنت كلت هم وغم يعني من اشوفهن ارجع اتذكر ايامي واحزن على عمري الي راح هيج واظل احقد واكره كل ذني ابقيهن يمي حتى يزيد كرهي اله

بس ما تصورت انت اقرب شخص الي هيج  تحجي ..

اجه شاهر وشبكني و كاال : اسف يبعد اخوج بس من حركت كلبي عليج والله تعبان لتعبج أني وخاصة من سمعت كلامج أنتي  وفاتن كلت هسه تظل وحده وتذكر  

ابتعدت عنه ومسحت دموعي : لا تخاف عليه كلشي مابيه

ابتسم بوجهي وظل شوي يمي ويحجي وياي وينصح ..
جانت بدايتة علاقتنة يعرف شاهر وجمارة لان شاهر جان اعز صديق عند شهاب وهو كذلك حان يحسبه اخوو وكد الثقة  ويموت عليه  . 

راح شاهر وبقيت وحدي ظليت افكر اخر شي تعبت ونمت ..
noorhaidar18
يتبع ...

هاي تشبة قلادة جوري 👇🥀

انتهى البارت اتمنى يعجبكم💜
لا تنسون الايك + التعليق ✔
واتمنى منكم المتابعة ودعم القصة ومنشنوها عد اصدقائكم واهلكم حتى يزيد التفاعل 😊💜

وغلسووو على الأخطاء الاملائية😁