'' عدت للأنتقام ''
للكاتبة زهراء المياحي
وهي الگلوب الماتحب المن تدگ
~'~'~'~~'~'~'~'~
وسام: السلام عليكم
شهد: شلت علي على صدري وگمت وگعت المخده بالگاع دخل والابتسامه شاگه وجها يباوعلي مبتسم مثل قبل متغيرت نضراته دخلت وياه مرته سلمت؛ عفتهم بدون سلام ودخلت لغرفتي لازمه ابني وشابگته على گلبي
لارا؛ ها وينج؟
شهد: ليش اجة عمه صاير بيها شي ليش اجة؟
لارا: ماعرف
شهد: نيمت علي ونزلت جوه؛ أسمع وسام يسولف أشوية واجه ابوي من الشغل سلم عليهم وكعد يسولف وياهم ؛ جريت حسره وصعدت تمددت يم علي؛ فزيت المغرب يبجي شلته ورضعته ونزلته
هو يريد يلعب مبين يا الوگيح؛ شلته اعضض بخدوده تريد امك تاكلك مو؟ بسيطه هسه اموت خدودك عض عض؛ ماكو صوت وين راحوا؟ يجوز رجعوا لبيوتهم شلت علي وحطيتة بالاستقبال ورحت اشرب مي صعدت فوك لغرفة لارا دتلعب
لارا: شنو
شهد: قاطعتها روحي بسرعة علي وحدة بالاستقبال اني راح اسبح
لارا: اي اي رايحه
شهد: دير بالج مو تشيلي خاف ينمتن.. عفتها وطبيت سبحت وخلصت نشفت شعري ونزلت.. لارا وينج دخلت للاستقبال شفت وسام كاعد يلاعب علي ويسولف وي لارا جمدت بمكاني صرت بموقف لا اكدر ارجع ولا اكدر ادخل هو من شافني اختفت الابتسامة من وجها احس نتهيت اريد اطلع هو حجه
وسام: شلونج شهد
شهد: رجفت اريد احجي ماكدر
وسام: لارا روحي جيبيلي مي عطشان
لارا: اي رايحة بس قبلها هاي دوكة المي يمك واذا تريد تحجي شي تكدر تكول لارا طلع اشويه
وسام: هههههه هااا لوتية عرفتيها
لارا: اني مو صغيره
شهد: راحت لارا واني بلعت ريكي دخلت هو بتسم لزم اصابع علي
وسام: ماشاء ألله ابنج حلو وو...
شهد: صفن لحظة وحجه
وسام: نفس لون عيونج..
شهد: سكتت
وسام: اي.
شهد: لتفتلي باوعلي بتعب
وسام: ماعرف شكول بس يعني متحسين من تباعدنا نجح ويانة القدر بس من صرت خطيبج وتقربت منج حياتنا خرربت صح هسة اني مو قريب منج ويجوز تكرهيني وماتحبيني بس اكول لو نسد الماضي ونبدي صفحة جديده
شهد: سكتت دنكت هو صاحلي اكعد رحت كعدت يم علي
وسام: ماعرف بس... ليش تزوجتي؟
شهد: انت مو تكول نبدي صفحة جديدة؟
وسام: اي صح بس اريد اعرف الخللل مني؟
شهد: لا ابدا الخلل مو منك
وسام: يعني حتى العقل ميستوعبها ابن عمتج الي عاقد عليج ويحبج..
شهد: من كال يحبج كلبي دك بسرعه
وسام: ترحين تعوفين ورة كم شهر تزوجين سولفي منو رضىٰ بيج بهاي الحالة؟! منو رضىٰ محد والدليل انتي طلكتي..
شهد: اني اعرف شي وانت تعرف شي ثاني وسام
وسام: صح انتي احسن مني وتعرفين كل شي صدك تحجين شهد اشكد حاولت اتواصل وياج ونرجع سوية بس من تزوجتي انتهىٰ كل شي.. وهسة.. حسبالج ماناسيج اني
شهد: وسام من هسة شنو تريد تكول وضح كلامك ماحب احد يحجي باللوفات
وسام: أريد سبب واحد؟ اكرهج بي
شهد: ماكو شي هيج؛ خوزر الي
وسام: يعني القصد جنتي مراهقة وتردين تلعبين مو؟
شهد: هسة شتريد توصل واذا اكلك احبك شراح تسوي؟
وسام: نتزوج
شهد: نتزوج؟!!! صدك تحجي كمت وكفت شلت علي...تدري اني تطلكت بس محكمه وشيخ بعد يومين واطلك والزم عده
وسام: وره متخلص العده نتزوج
شهد؛ هزيت راسي بنفي؛ عاط بيه
وسام؛ ليششش؟ يا قاسيه الگلب بعدني احبج ومانسيتج
شهد: لان بكل بساطة انت متزوج وبعد ثلاث اشهر يصير عندك طططفل؛ تتتقبلهااا ؟؟
وسام: يعني هااي العالم تبطل.. اني صح غلطت بس..
شهد: شوف اني اذيت اهواي ناس ومتندمة بس هسة لا قسمت بعد اترك الناس بحالها وشيصير يصير ومستحيل اتقرب من مرتك بعدك مصالك اهواي متزوجها وراح تولد افرح بابنك مثل مافرحت بابني اني... وسام كلشي تبدل وماعاد رجع لحاله
وسام: اخر كلام عندج!!!
شهد: هزيت رأسي؛ هو سكت أخذت علي وطبيت للغرفة دخلت ارجف حطيت علي علىٰ الجرباية وابجي كعدت ورة الباب حاطة ايدي علىٰ حلكي يررربي شهل المصيبة الي اني بيها طلع بعده يحبني ضليت ابجي ساعه ونص عيوني ماشافت الراحه؛ فز علي يبجي؛ شلته و دموعي تصب؛ بس انت الي تحبني ومراح تاذيني
.............................
شهد؛ وره يومين؛ اجه الشيخ وسلام واهلي بقيت وره الباب كاعده؛ تطلكت شيخ ولزمت عده الطلاك قبلها جنت متفقه وي مريم على اجازتي لان حتصير بالثلاث أشهر اكثر؛ المدير حسام من عرف اني حتطلك گال شگد ميعجبها خلي تاخذ اجازه؛ وهذا الي خوفني؛ حسباله اصير سهله من اتطلك خلاص؟
_بقيت اول شهر الي؛ بالبيت مطلعت حتى للطارمه كله بغرفتي متمدده والعب علي لو ادرس لارا؛ لو انظف البيت اغير ديكوراته؛ وارسل مريم؛ وره هل الشهر كام سلام كل أسبوع يدز العاب ل علي؛ وكل لعبه افتحها الگه بيها مبلغ مالي؛ 200 ساعات 500 وتوصل لل860 الف دينار؛ شوي ويسويها مليون؛ وصيت امي اشترتلي خزنه صغيره بيها رقم سري؛ وحطيت بيها كل الفلوس الي يدزهن هو؛ باجر عكبه الله العلم شيصير؛ اقلها اضمن لابني مبلغ مالي
_اخر لعبه جابها طلعت امي وي لارا يسون عشه واني فتحته بيها ورقه وعلبه صغيره؛ فتحت الورقه مكتوب بيها
-ما اخذتي لا حاضر ولا غايب ولا اثاث حتى ملابسج وعطورج ومكياجي وذهبج بقن هنا ما اخذتيهن اقلها بس هاي اخذيها
شهد؛ عگدت حواجبي فتحت العلبه؛ الگلاده الذهب المنقوش بيها اسمي شهد؛ جريت حسره لبستها العب بيها واباوعلهم
_تقريبا أسبوع وصار قرار المحكمه يشوف سلام علي؛ القرار هو سلام اله حق يشوف علي ثلاث مرات بالشهر؛ بس لان اهلي متسامحين اهواي وياه وحسين مكسور خاطره على سلام؛ ف شوكت ما يعجبه سلام يجي يشوف علي؛ ف حطيت جنطه صغيره اله لبسته ملابسه ضايجه!! اخذه حسين وراح بقيت ضايجه ابجي اشتاقيتله وهو مصارله ساعه من راح وي ابو ؛ للمغرب وجابه يبجي؛ طلعت اباوع من شباك المطبخ هو شايله ومتبهذل شاله حسين يسولف وياه وهو يهز براسه اسمه يگول يمته تزوج ضحك سلام گله وين ماصارت القسمه
حسين؛ اذا هيج حتبقه حيتبهذل علي وياك
سلام؛ شنسوي يا خويه قابل بس احنا هيج كل العالم متبهذله
حسين؛ دوامك يمته؟
سلام؛ عگب باجر اروح للموصل
شهد؛ دخل حسين شايل علي اخذته ابوس بي؛ صعدت فوگ بدلت ملابسه وابوس بخدوده؛ عمري حبيبي الحلو اشتاقيتلك؛ احجي وياه وهو يشرب الحليب ويضحك؛ ولك ست أشهر عمرك شهل الصلافه عليمن طالع ها ولك عليمن طالع؟ اعضك على الكياته الشايلها ولك اني يوميه اتخيل احطك بخبزه واكلك؛ دخلت لارا تضحك تلعب وياه وهو يعوف الحليب ويباوعلها ويضحك
لارا؛ حفرغ جنطته
شهد؛ كعدت تفرغ بالجنطه؛ طلعت لعبه
لارا؛ حلوه افتحها؟
شهد؛ اي
لارا؛ شنو هاي؟
شهد؛ فتحتها؛ فلوس
لارا؛ المن؟
شهد؛ يحط فلوس بطنها حاطتهن بالخزنه اني
لارا؛ صدك؟
شهد؛ اي فلوس ل علي
لارا؛ ليش متگليله ما اريدهن؛ جاي استلم راتب
شهد؛ هزيت راسي بنفي؛ هو ابو ويگدر كلشي يجيب اله؛ باجر عكبه كلشي يصير؛ من هسه خلي ل علي راتب اقلها
لارا؛ حسين يگل لامي شهد بهذلت سلام حتى زواج متوفق بي
شهد؛ وشگالت؟
لارا؛ معليك اهم شي هسه مرتاحه
شهد؛ ابتسمت؛ الاشهر الفاتت وضع الموصل تقريبأ زين گدروا يحررون اغلب المناطق؛ بس اسبوع وداعش اجاها دعم من مقراتها بسوريا وشنت قصف على منطقه موصليه جانت بيد الجيش والحشد؛ وراح ضحيتها فوگ ال 130 جندي عراقي سواء من الفرق الذهبيه لو الحشد الشعبي لو فرق التدخل السريع؛ وهنا المفروض يرجع سلام لبغداد بس نفقد اثره؛ وگتها حسين وابوي يخابرون؛ ماكو؛ اختفى اثره؛ أسبوعين اهلي تعبانين گالو علي يتيتم ؟
_وام سلام تخربطت بالمستشفى؛ امي ولارا راحولها لان خطيه معدها احد؛ تگول لارا شفنا سوسن وزوجها شهم يگول ندور علي ماكو؛ غلست على گلشي؛ اخذت ابني بحضني والعب بي لحد منام؛ تمددت بصفه افكر مجاني نوم؛ دموعي تجري نصدمت ليش ابجي! على شنو ابجي اني؟ تخبلت
للصبح ماگدرت انام بس ابجي حاولت وحاولت بس ماگدرت گلبي الحقير دائماً يشفق على الناس حتى لو اذوني؛ هل المره فرشت مصلايتي ودعيت يرجع سلام ما بي شي سالم؛ خطيه امه؛ خطيه علي اني ما اتمنالها لعدوي؛ يفتح ابني عيونه بلا ابو؟؟ واربي وحدي؟ اصلا سلام جان ميت على فكره طفل متخبل وصار ولد اول طفل اله؛ ما صدك كل ساع يشتريله شي رغم مو عمره رغم مو قياسه بس يموت علي؛ ما ردت علي ينحرم من هاي النعمه
_للفجر ابجي واصلي وادعي ربي يستجاب دعائي ادعي والاسبوع الثالث مره وسلام مفقود؛ وكل الي بالبيت تعبانين اولهم أني كل ماتذكر گلبي ينمرد؛ اباوع لعلي وابجي بعده طفل وراح يتيتم؛ كل يوم تصيبني حراره بجسمي وبليل تزداد اكثر؛ دعيت لربي ياخذني ولا ياخذ سلام؛ احس رغم كلشي اني مقصره عن ابني بس سلام اب مثالي ويستحق يحبه يستحق يعيش باقي عمره وياه
_واجانا حسين فرحان گال سلام رجع لاهله سالم مابي اي شي الحمدلله؛ بس جان وي الدواعش بمقراتهم؛ وطلع عاف الموصل جاب كل الاحداثيات لبغداد؛ وهنا العميد من شاف سلام قدمله ترقيه جبيره؛ على بسالته وتضحياته وشلون قدم حياته تضحيه و فداء لوطنه وشهرين وعشر أيام عيش اهله بقلق وخوف علمود وطنه؛ وهنا استقال من گونه جاسوس للتنظيم واشتغل بمنصب ثاني بالمكافحه الارهاب؛ بقسم سري؛ بس بغداد مو بالموصل....
_ثلاث ايام من جيته لبغداد واجالنا يشوف علي؛ نظفت الاستقبال ورتبته وعطرته؛ حضرت كيك وعصير؛ امي طالعه وي خالتي وامير بيته وابوي طالع بس لارا وحسين؛ حسين صعد يسبح ولارا يم علي؛ حطيت الكيك والحلويات بالاستقبال افتر ليش جهزت هذا؟ يبووو عليج شهد شبيج؛ اخذت حجله علي وحطيتها بالاستقبال وكعدت لارا يمه؛ دگ الباب صحت حسين؛ وكفت وره الباب اسمعهم دخل هو يضحك سلم على حسين وراح شبگ علي يبوس بي ويلعبه اسمع ضحك علي
سلام؛ يمته يگول بابا؟
لارا؛ ههههه شلقصه بعده سبع اشهر؛ تشوفه وكيح وحرك كلش؛ ويضحك على اي شي واليف مايستغرب من احد بس بعده
سلام؛ فدوه هاي صفات ابو
شهد؛ اسمعهم وره الباب يسولفون؛ گلبت بعيوني ضحكت؛ شوف المغرور صفات ابو؛ لا بله كلشي علي طلع؛ عفتهم وصعدت فوك تمددت راسلتني مريم
مريم؛ متحمسه للدوام الأسبوع الجاي؟
شهد؛ دزيتلها رساله؛ اي
...................
_لبست الجاكيت الجوو موت بررد وهاي بعد أسبوع ندخل سنة جديده بوست علي علىٰ كيف ونزلت طلعت السايق ينتظرني وصلت للشركة احس بشرتي تجمدت برد جريت الكرسي وكعدت فتحت الحاسبة واثاوب انتظر علىٰ متحمل حطيت رأسي علىٰ المكتب نعسانه
شهاب: شعجب مبكره
شهد: فزيت لتفت شهاااب؟! هاا اي مو نمت من وكت وهيج
شهاب؛ عاش من شافج ان شاء الله خير غيابج
شهد؛ تسلم
شهاب: اني لحد الان منايم تعبااان
شهد: متاخذ عطلة مو المدير من كرايبك؟
شهاب: بس عندي شغل اهواي
شهد: هسة شوف فادك التلفون من تسهر علي
شهاب: منو كال أني أسهر علىٰ التلفون؟
شهد: رفعت حاجبي مستغربة؟! لعد يعني هيج أكول خو ليش تسهر مايفيد حتىٰ لو شي مهم تسهر علي نظم وقتك
شهاب: هههههه صاررر أسمع كلامج وأشوف... صارلي أشكد منايم من وكت وصعب اعدل نومتي
شهد: اممم... دنكت اكتمل تحميل الحاسبة ربطت الاسلاك والتلفون هو صار وراي وقرب
شهاب: لنشوف شغلج حلو لا
شهد: ابتسمت؛ اكيد شغل زين
شهاب: حتى لو شغلج مو زين شحدي اكول لا
شهد: ابتسمت هو اقترب مني صاري وراي توترت ورجعت الكرسي هو حس وابتسم
شهاب: اني رايح اجيب كهوة تردين؟! بلكت اشرب واصحصح
شهد: لا شكراا تسلم... راح هو جريت نفس رفعت حاجبي... شريد يسوي هذا... جنت ولا أشوفة ابد من يوم العرس لحد هسه ياله طلع؛ تذكرت حظي شكو شي اكرهاا وماريدة يقترب مني يكوم يحوم علي احس واحد سلم رفعت راسي المدير
شهد: وعليكم السلام.. راح هو صعد فوك اني دنكت وهذا ليش يسلم علي شعندة... نزلت راسي افكر
سيف: صباااح الخير
شهد: لتفت السيف ببتسامة صباح النوررر... هاي شنو وينها مريم
سيف: مثل متعرفين متاخررة وتركض منا منا مكدرت تحط مكياجها فجابت المكياج وياها وراحت للحمامات
شهد: والله احس نفسي بجامعة مو شركة
سيف: اي هي ترجعج الف قرن ليورة... الله يساعدني عليها
شهد: هههههه
سيف: صدك والله يعني مينكسر خاطرج علي تعبان وحدة متكفي؛ شرايج بثنين؟ بيناتنا الحجي منسولف لاحد
شهد: من هسة كول شناوي تحجي؟
سيف: يعني اكول اريد اتزوج وحدة ثانيه
شهد: اسكت لا تسمعك
سيف: يعني وحدة تحبها مريم وهي تحب مريم شوفي يعني وحدة تكعد مريم من وكت وحلوة وبعد تعرفين تساعدها بالمكياج
شهد: سيف بعد عينك عني لا اشمرك بالملف بالله اني شكووو ليش تباوع علي
سيف: شبيج شهد ماكايل شي.. مريم تحبج
شهد: وانت شكوو شعليك واذا تحبني
سيف: يعني اتزوجج بس تديري بالج على مريم
شهد: ايااا جذاااب هسة تجي مرريم واسولفلها كل شي
سيف: لا حباابة تصلخ جلدي
شهد: خو اتزوجك واساعدها بصلخ جلدك
سيف: هههههه هههههه يمه ما اريد
شهد: اجة شهاب مبتسم من شافني اضحك وي سيف اشو هذا وجها انكلب ١٨٠ درجة تقرب صبح علىٰ سيف
شهاب: هاا ضحكونا وياكم
سيف: هيج شغلة ماكو شي
شهد: رفعت حاجبي هو عينة بعين سيف رجع باوعلي ابتسم ابتسامة مصطنعه وراح...
مريم: هااا هااا صبااح الخيررر ولج تاخرت شوفي ضبط وياي الفونديشين؟! لو مبين اكثر حاطة
شهد: لا لا حلو هذا مرتب اي هيج حلو
سيف: الفو دايشن يادايفس
مريم: حبيبي شدسوي؟
سيف: صدك جذب مريم شنو تحجين فرنسي لو اسباني شنو كلتي هستوج؟! فودانيت؟ فودنيشن؟
شهد: الفونديشين؟؟
سيف: يااااا؟؟ وعلمتي شهد هم تحجي مثلج؟؟
مريم: هههههه لا حبيبي هذاا اسم كريم اساس
سيف: اللهم ان كان سحراً فابطله
شهد: نفجرت اضحك؛ هما يضحكون علي؛ والله مشتاقتلكم شكد؛ بالبيت شكد ضوجه؛ احس من اجتمع وياهم تجيني راحة اشكد حلو يكون عندك أصدقاء خالين من المصلحة والجذب والنفاق
مريم: اي تجين تتغدين ويانة؟
شهد: اي اجيت
مريم: شعجب مانزل شهاب اليوم
شهد: والله ماعرف
مريم: روحي صيحيله
شهد: شنو؛ اني شعلي؟
مريم: هسة يكول ماصحتولي ولج حتى يخلي الحساب علي
شهد: ههههه عادي اني ادفع
مريم: لا ولج بعدين بالبيت يعيرني كل ماروح لبيت اهلي لا ولج لا صيحي
شهد: مريم اني شعليه
مريم: اني رايحة صعدي صعدي صيحيله ما كتلج طبي علي تزوجي
شهد: صعدت فوك دكيت الباب هو صاح... ادخل.. ويثاوب دخلت شفتة حاط رجل علىٰ رجل وحاطهن فوك المكتب والگاع كلها طائرات ورقية يسوي ويشمر بالگاع هو من شافني غلس حط ايده وره راسه
شهاب: شرفتنا ست شهد نعم شنو تردين اضيفج
شهد: خرب يومج مريم خلتيني بهذا الموقف؛ هاا تجي تتغدة ويانة؟
شهاب: سيف موجود؟
شهد: هزيت راسي؛ بنعم
شهاب: ماريد
شهد: اني من سمعتة ماتعبت نفسي ولا سئلته داطلع صاحلي وعدل كعدته
شهاب: تعرفين ليش ماريده؟
شهد: يجوز بيناتكم خلاف اني ماعرف
شهاب: اي... ليش تضحكين وياة الصبح؟
شهد: رفعت حاجبي لدرجة اجتلي ضحكة... شنو قصدك؟!
شهاب: لا تغشمين نفسج قصدي تعرفينا كلش زين
شهد: صفنت بي مايهم... اني نازلة اذا حاب هلا بيك نزلت جوة اخذت الاكل وكعدت يم مريم
مريم: ليش ميريد يجي؟
شهد: يكول ضايج من سيف
مريم: عززا هو رجلي اكو واحد يضوج منا اشو حباااب
شهد: لان الصبح شافنا اني وياة نضحك
مريم: عادي اصدقاء
شهد: والله ياامريم اني اشوفة بدة يمثل دور الغيور بدون سبب
مريم: يجوز يطلع يحبج
شهد: عادي هم اخوج يحبني... وابو التكسي الي اخذني هم يحبني وابو الاسواق عينة علي القصد كل الزلم هيج يحبون الخارج ميعرفون الجوهر الي جوة... صفنت ماعدا شخص واحد سلام الي حبني ويعرف شنو بداخلي من حقد وكره ويعرف شكد ماذيه ناس ويعرف الجوهر بداخلي؛ لتفت اله جريت حسره
مريم: وين راح بالج؟
شهد: خلص الدوام وكفت انتظر السايق ماكو بقيت بالنص ساعة واكفة انتظره ماكو عبرت سيارة شهاب وكف
شهاب: امشي الظاهر حيتاخر عليج السايق امشي
شهد: هااا لا هسة اتصل علي واشوفه
شهاب: ليش تحسسيني اني مسوي عليج فضل؟
شهد: مو بكل بساطة من يشوفوني اخواني صاعدة سيارة واحد غريب.. جان قاطع كلامي
شهاب: علساس كلش السايق واحد عرف دصعدي
شهد: سكتت؛ فتحت الباب وصعدت هو حرك يسوق فتح اغنية واني دايرة وجهي لللجامة
شهاب: صدك شنو الشي الي يضحك من السبعة الصبح اني اعرف الناس من تكعد ضايجين وما
بيهم حيل يحجون بس انتي ليش؟! تضحكين
وي سيف؟
شهد: لتفت الة.. ليش تهتم بالموضوع اهواي عادي اصدقاء
شهاب: زين ليش متضحكين وياي هيج؟! يعني حسبالي إحنا أصدقاء
شهد: شيخلصني لتفت اله؛ شهااب عادي المووضوع ليش هيج تتحسس من هيج موضوع؟!
شهاب: يعني نگدر نگول غيره أصدقاء
شهد: ههههه غيره اصدقاء؟
شهاب: لعد منو يغار؟
شهد: حسيتة يريد يكول بس المرتبطين اني غلست
شهاب: مجاوبتي
شهد: سكتت عنىٰ هو وكف السيارة يم شجرة بيها ضل وشارع راقي لتفت الة شهاب؟! ليش إحنا اهنا بيتي مو هنا
شهاب: لا مو نسيت شي هسة اجيبه
شهد: راح نزل من السيارة ويباوعلي سد الباب قوي وصعد بنطرونة لتفت الي بنضرة وراح شبي هذااا شديحاول يوصل؛ قررت اعوفة واخذ تكسي بس هسة شيكول علي بقيت خمس دقايق واجه
شهاب: اسفين علىٰ التاخير
شهد: حط تلفونة بالجكمجة أني درت وجهي... ساق ساكت
شهاب: عندي موضوع وياج شنو انسب وقت نحجي بي
شهد: باجر بالشركة
شهاب: وليش بالشركة؟ ليش مو بمكان عام احلىٰ
شهد: اهلي ميقبلون
شهاب: اوكي.. مثل متردين بالشركة بالشركة
شهد: وصلني للبيت تشكرت منة ونزلت واخيرا وصلنا واخيرا جان شمرت نفسي من السيارة
كعدت ثاني يوم شفت السايق صعدت وسئلتة.. عيني ليش ماجيتني البارحة؟!
السايق: مو واحد كلي تكدر تروح لان ست شهد راح تروح وي عائلتها للبيت... ليش البارحة ماجوي اهلج عليج؟
شهد: لا لا اجوي بس جنت اريد اعرف منو سئلك هييج
السايق: شاب يطلع عمره بداية ال٣٠ هيج ابيض طويل
شهد: اوكي اوكي.. عرفتك يعني هيج سوة بس حتىٰ يوصلني لك شهاب اني سوالفك مو علي محد يكدر يلحكني بالحيلة واعرف كلش زين شنو وين تريد توصل... وصلت للشركة شفت مريم تفتر مشغولة... صباح الخير
مريم: صباح النور.. اكولج الملف الازرق يمج لو عد سيف؟
شهد: لا هذا يمي حطيته جنطتي علىٰ المكتب ونزعت الجاكيت وكعدت انطيتها الملف شغلت الحاسبه
مريم: اكولج البارحة شهاب سئلني عنج
شهد: وشكلتيلة
مريم: يعني سئلني عن حياتج الشخصية وكال اني نيتي زينة وياها بس كتلة هي مطلقة
شهد: ضربت كصتي بقوة... لج ليش تكوليلة مطلقة لان الشباب من يسمعون بمطلقة يحومون عليها مثل الذبان
مريم: هاا؟ المهم هو سكت وبعدين كتلة عدها طفل وكال شنو شغل رجلها كتلة ماعرف بس بالموصل بالحشد... كال اهووو بالحشد حقها تطلك
شهد: ليش شبيهم الي بالحشد ؟؟ وشبيهم الجيش والمكافحه الي بالموصل؟ لو ما هو مجان هو هسه متمدد براحته وسهران على تلفونه ويفتر بسيارته شوگت ما يعجبه؛ وعلى گولته يطكطك شرب شوگت ما يحس بملل
مريم: ليش احسج تدافعين عن زوجج؟ لان هو هناك دوامه
شهد: اول شي هو طليقي مو رجلي وثاني شي هو جندي يحافظ علىٰ امن العراق وامانه وثالث شي ما ادافع عنه
مريم: اسفة عصبتج بس..
شهد: انتي مالج اي دخل هذااا شهاب مايعرف يحجي زين... تربىٰ بالدلال وميعرف يستخدم السلاح يجوز فيحجي عليهم لان مو كدهم اني اتعجب من ناس تحجي علىٰ ناس دفعت حياتها لاجل تعيش
مريم: اي صح كلامج...بس صدكيني حسيت بكلامج تدافعين عن طليقج
شهد: شوفي بس المراة الموخوش المو اصل هاي تحجي عن طليقها المراة من تطلك تبقىٰ حافظة
سر بيتها ورجلها الي امن عليها لو كل وحدة تفضح رجلها هااي تعرفين شنو هااي وحدة مامسؤلة وحدة اصل ماعدها اهلها ماعرفوا يربوها زين...المثقفة والفاهما بس هي الي تحفظ سر بيهتا حتىٰ الرسول محمد اوصانا بحفظ اسرار الناس لان امانه واذا اخلفتي الامانة راح تخسرين كل شي بحياتج اولها راحتج.
مريم: صح هي مرت عمي من تطلكت فضحت عمي ولج حتىٰ راحة بيت اهلها مامرتاحة محد يطيقها يتمنون اهلها يخلصون منها اخر شي دزوها برة بغداد يخلصون منها ومن مشاكلها.
شهد: بقيت صافنة علىٰ كلامها لازم اخلي حدود بيني وبين شهاب لان حيل أدخل بحياتي وصارت ماصخة...صار وقت الغدة ورحت كعدت يم سيف ومريم
شهاب: هلا شهدد ممكن دقيقة من وقتج
شهد: جريت نفس لتفتت لمريم هي هزت راسها وگامت هي وسيف؛ بقيت كاعده ضايجه
شهاب: شهد اريد اعترفلج بشي اني احبج
شهد: منصدمت من كلامة لان باين علي جر ايدي وحطها بين ايدية جريت حسره شابك ايدي حيل؛ اريد ابعده لزمهن قوي
شهاب: احبج واريد اكلج من زمان
شهد: وخرت ايدي عنه؛ شهاب اني مامناسبة الك
شهاب: ليش؟
شهد: شهااب اني من تطلكت شرطت علي المحكمة مارتبط لان راح اخسر حضانة ابني
شهاب: زين متكدرين منا منا والله اكو حل
شهد: لا ماكو اي حل
شهاب: زين هذا طليقج مرتبط؟
شهد: ليش؟
شهاب: اذا طليقج مرتبط هسة يعني يسقط حقة والحضانة تروح الج ماكو هيج كلام
شهد: شهااب تراا طليقي عندة سلطة كلشي يسوي القاضي نفسة يصير اخو صديقة
شهاب: مدام شرط عليج بواسطة يعني اني اكدر اسوي واسطة تذلة
شهد: هزيت راسي بنفي؛ منو گال اني اريد اذله؟؟ هو ضحك؛ لاتتامل بشي مراح يصير نهائياً
شهاب: اعتبره رفض؟
شهد: اني ماريد ارتبط باااي احد اريد اصب اهتمامي بابني ماكفني الي صار من تزوجت
شهاب: ماشي براحتج
شهد: هو گام على حيله وطلع؛ ابتسمت؛ واخيرا خلصت؛ لتفت احس جسمي كله تجمد؛ اطرافي كامت ترجف من الصدمه اريد استوعب الي داشوفه گدامي؛ واگف يباوعلي برود؛ وعينه على شهاب اختفت ابتسامتي مر شهاب من يمه هو باوعله من فوگ ليجوه؛ رجع باوعلي برود رفع حاجبه؛ گمت سندت نفسي هو قرب علي اريد احجي قاطعني عيونه حمره دم
سلام: ناويه تخسرين ابنج من البدايه؟ وهاي خسرتي
شهد: لاااااا اوووكف اريد امشي ماكدر اجتي مريم علي
مريم: شهددد شههددد هذااا منو شبيج تررجفين عززا شهدد سيف تعال سيف
شهد: كمت ارجف ماتحمل الي صاررر احس ضغطي ارتفع بطني كامت توجعني وگعت على وجهي الهث الدنيا صارت گلها سوده گدام عيوني
مريم: امشي ناخذها للمستشفى
شهد: فزيت اني بالحديقه الوره للشركه هي تشمر علي مي؛ واني اشهگ؛ حطت العصير بحلگي دموعي تصب ؛ مررريم حياااخذ ابني مني حيااخذذ ابني مني وولج مررريم بعد ماااشوفة كمت ابجي ركض حسام وشهااب شالني من ايدي دفعتة... كلة بسببك كلة بسبببك ياااحقيررر كلة بسببك كتلك بعدد عني كمت تحوووم علي تررريدني اخسررر ابني بالله اراويك انجوم الظهررر اذااا ابني ماارجع لحضني؛ گمت سندت نفسي لتفت اله؛ انتتت جنتتتت متعمد هيج تسوووي ياا شهااااب بعددك مشايف مني شي ارويك نجوووم الظهررر اذا علي ابني ما رجع الي
مريم: عيب الشركة منا شيكولون علينا كوومي كوومي لاتبقين كاعدة بالگاع
شهد: ساعدتني اوگف ودموعي تصب؛ حسام لتفت لشهاب ضايج.. شهاب بعد محجة كلمه وحدة ضاج وتوتر
حسام: ليش مجيتي كلتيلي الي؟
شهد: شهكت لتفت الة انت الثاني وخر عنييي كلكم نفسس الشي واذا خسرت ابني هاي الشركه اهدمها على روسكم؛ عفتة ومشيت ارجف لازم اسوي حل ابني يروح مني مستحيل ابني يروح مني مستحيل اموت بلا ابني
يتبع......
رايكممم؟؟؟