.
قبل العرس بيوم تجمعنة يم جدو اني والبنات
نريد نقنعة حتى نروح للصالون
قبل بس كال منير ياخذجن من الصالون للقاعة
حتى محد يعرف
وفعلا ثاني يوم الضهر بس عمة دعاء وماما يدرن
اخذنة بدلاتنة ومستلزماتنة بجنطة جبيرة
شالتها فاطمة من الحماس وأخذنة منير
دخلنة للصالون من 1 ونص
تسريحة ومكياج خفيف
يعني ما اوفرنة تقريباً الساعة ب 3 آصف اتصل علينة وحدة وحدة بنفس الوقت غلقنة تلفوناتة
بس شنو الوجوه صارت صفر
شكلنة تغير جذرياً
جنة فرحانين بنفسة
أخذت ع الوحدة 45 واحنة نوديلها بوسات بالهوى
الساعة 4 ونص اتصل منير
كول وحدة لابسة فستانها ومسوية تسريحة
طبعاً فستاني فدشي الفتحة طلعت رجلي وشلون الماروني لاكلي وحمرتي مارونية
وشعري خليتة مفتوح طولة جوة الورك
حطينة الشالات على وجهنة
لبسنة عباية راس وطلعنة
وصلنة للقاعة جانت شمة طالعة جنن
لاعبالك عمرها 27 ولا كأنو متزوجة من قبل
خلصنة الوقت كولة ركص لدرجة كعبي انكسر
ونزعت الحذاء وبقيت حافي
تلفونات مدخلت للقاعة بس تلفون عمة وتلفون العروس الي جان عد فاطمة تاخذلها بس صور
طبعاً تلفون عمة اني وحور نصور بي
وبيبي فاطمة كول شوي تكول كعدن
ماما لبستني كلادتها عين زركة
وتباوعلي عبالك اني العروس
دخل قصي وأخذ عروستة
دعيتلهم الله يوفقهم ويديم حبهم
طلعنة من القاعة سياراتنة برة
حذائي بيدي رغم لابسة عباية راس بس رجلية مبينة
حور.ماطلع هيج ماكدر
دعاء.يلا السيارات بالباب بسرعة نركب
حور.عمة هسة ابنج بالباب يسويلي طرطارة
دعاء.شلعتي گلبي كومي
حور.اذا حجة وصيح لو شافني معلية
مو بعدين تسكتون وتذبوها براسي
طلعنة وضليت وراهن امشي
الحمد لله مشافني لحد ما صعدت بالسيارة
هي عالية إلا ارفع رجلي فكولها بينت
حسيت ضربة قوية صارت على ضهري وصوتة بأذني
آصف.صعدي خرة بالكـ... اني اعلمج
صعدت واحس ضهري نفك من قوة الضربة
صعد بالسيارة طبك الباب حيل راد يلزمني مد أيدة
بس عمة دعاء لزمتة وتتوسلة
آصف.قاااابل كـ..... أحنة رجليها بيض حمر يتلامعن
وطالعتلي بدون حذاء عود شنو مودة هاااي
تعالو شوفوني لابسة حجل
حور.اني ماردت أطلع بس شسوي يعني
حذائي انكسرت
آصف.وليش انكسرت؟؟ اكيد من الهز مووو
طالعات للصالون اني أعلمجن نوصل للبيت
شاربي ازينة إذا ماربيتجن دور صالونااات علية
دعاء.كااافي خبلتنة طمهن وارتاح وريحنةة
اعوذ بالله منك شالع گلبي حتى طعم الفرحة ضيعتة
آصف.اي خل اعوفهن على حل شعرهن موووو
سكتنة أباوع الكيات دك وركص
بس سيارتنة صياح وعرك
ومبين بس نوصل نتكفخ
وصلنة للبيت نزلن ماما وعمة ردنة ننزل صاح محد تنزل
دخل السيارة للكراج وهنة راحن يطببن أقاربنة والخطار
الكراج ضلمة ودخل سيارتة للأخير واني والبنات
حتى النفس كطعنا ، وكف السيارة فتح الباب من جهتنا
آصف.وحدة وحدة تنزل اول ما تنزل الوراهة تولي بسرعة
اول شي نزلت فاطمة
آصف.رفعي الشال عن وجهج
رفعت الشال صفكها راشدي والثاني
جر شعرها ودفعها راحت للبيت تبجي
بعدين نزلت اني وكفني على صفحة وصاح لحلا
اكيد اني بالأخير غير يريد يجرم بية
همينة ضربها راشديين وجر شعرها خربت التسريحة وراحت
اني واكفة الشال على وجهي والعباية على راسي
وحافية ومنتضرتة ، طلعت حلا من الكراج نهائي
جر الشال حيل وطاح ويا شعري
بلعت ريكي وباوعتلة ورث جكارة
ضربني راشدي وثنين وتلاثة
بعدين بأيدة ضربني عشوائي على جسمي
عبالك ساطور مو أيد وكعت للكاع لأمة نفسي
أبجي وأشهك وهو مستمر يضرب
صرخت وحط أيدة على حلكي
لمن حسيتة طفة جكارتة برجلي
كمت الوب بروحي
جر الحجل مالتي كطعة وضمة بجيبة
وكفني من شعري نفضة حيل خرب التسريحة
حسيت الماشات نامن براسي
صرت بالكوة اجر النفس
انشمرت السيارة بطابوكة اجت بالجامة الأمامية
وطابوكة ثانية ما لاحت السيارة
باوعت شفت أموني واكف كدامنة
دموعة توكع ويشمر حجار
بعدين اجة يركض دفر آصف برجلة
وآصف شالة عبالك ريشة
كعدة ع السيارة طبك أدي ثنينهن بأيد وحدة
ضربة راشدي لحد الآن أحس صوتة بأذني گد ما قوي
حور.عوفة آصف عوفة
عليك الله اذا ضربتة
نزلة بالكاع لوة اذاناتة حيل
وماعرف شحجة بأذنة
اباوع عيون أمين الخوف بيهن أكثر من خوفي
بس يكابر ويبين نفسة ما يخاف بس دموعة ونضراتة اكبر دليل
وكفت نكثت ملابسي جريت كلنس مسحت وجهي
ومخلية أخوية وراية وآصف يباوع بأستمتاع
أحس الجوية مو برجلي أحسها بگلبي تنگد
دخلنة اني وأمين كولهم بالمطبخ يصبن
ماما تباوعلي عرفتني باجية دارت وجهة تكمل صب
دعاء.حور انتي والبنات بدلن ونزلن نصب العشة بسرعة
حجت هيج حتى اصعد لأن وضعي مخربط
غرفة ماما مملية نسوان
صعدت فوك لغرفة حلا
لكيتها هي وفاطمة تبجي
بجيت وياهن
حلا . بطليهن هاي السوالف
همزين خلاج بالأخير حتى مايضربج
حور.والله بطرانة
حلا.لابطرانة ولا بية شي هذا الصح
رفعتلهن شعري خدودي حمر والآثار مبينة
شافتها سكتت
حور.بعدج ماشفتي شي
نزلتلهن البدلة لحد خصري
راويتهن أدية وضهري وبطني بيها آثار أيدة حمر
شهكن وفتحن عيونهم
حور.مو بس هاي
طلعت رجلي وراويتهن مكان حرك الجكارة
تفاجئن واجتي حلا حضنتني
حلا . آسفة
حور. عادي
حور.والله ظلم
حور.الله كريم
يلا أريد ابدل حتى ننزل نساعدهن
وازيدجن من الشعر بيت كطع الحجل مالتي واخذة
حلا.أخذة أخذة
حور.اي
فاطمة.شنو مو بكيفة كولي لعمة مي خلي تكلة
يطيجيا مالتج
حور. اي شي بسرعة حتى ننزل
لبست فستان قصير اسود يصير ذبة وحدة من البداية للأخير باف نص ردان فتحت شعري
طلعنة من الغرفة جان أمين واكف يم باب غرفتهم
صاحلي
أمين.تعاي حوري أحاجيج
نزلن البنات واني رحتلة
اشرلي ادنك نزلت لمستوا
باس خدي مرتين ومسح شعري
همس بأذني
أمين.من اكبر أحاميج
حضنتة حيل ودكات كلبي صارت اسرع
طريقتة بالكلام ونبرتة بيها نبرة توعد
بستة ونزلت وهو طلع برة يتعشة وي الزلم
جان العشة صواني تمن وفوكاه حشو ولحم قطع كبار
مركة بيتنجان ومركة فاصولية
وقواطي ببسي ولبن وفواكه
نزلت هنة مكملات صب اني شلون اعشق أكلات الاعراس
دنكت لأذن ماما حجيت
حور.ماما أريد ماعون كامل ألي
ومركتين وببسي ولبن
وكوليلي أخذيها لأخوانج حتى اصعد اكل
مي.هاي من شوكت حبيتي الأكل
مو اتوسلج حتى تاكلين مثل الأوادم
هسة راح اصبلج ماعون
حضرتلي ماما صينية
والبنات ياكلن بالمطبخ
باوعت بس بنات عمي
الجمعة ماتتكرر واني مااستحي منهن
كعدت اكل وياهن
شكد أكلت لدرجة بعد مااكدر اتحرك
حور.ببسي ببسي
حلا.حتى يصرف
متنة ضحك شهكت وماما دك على ضهري
نطوني ببسي ولبن شربتهن عبالك مفجوعة
بس احنة طول اليوم ابددد مماكلين شي
حلا.نضم صينية لليل
فاطمة . ضمي ضمي
وماما وعماتي ميتات ضحك
خلصنة عشة وشلنا المواعين بقت بالمطبخ نغسلهن بالليل
فتحنة ديجي اذكر بوقتها طلعنة اغنية أيرانية
"زينو زينو"
وبدينة نركص بدون توقف من الساعة 10 لحد 12 ونص
النسوان الكبار داخن وكالن كافي نريد ننام
رحنة للمطبخ واجن بنات أقاربنة يساعدنة ماعرفهن
اندكت باب المطبخ تفاجأنة
لأن الزلم الغربة راحو والأقارب لو بالمضيف البرة
لو بيت عمو ازهر
فاطمة.منو
آصف.صيحيلي حور
البنات باوعن بأستغراب
يعني المفروض يصيح خواتة مو أني
فاطمة.حور طلعي لآصف
اشرتلها لا خزرتني
لأن ندري عادي عندة يفتح باب المطبخ ويجرني
طلعت ورديت الباب وراية
حور. ها
آصف.تعاي
جرني من ايدي للحديقة باب البيت مسدودة
دفعني قوي استغربت
آصف.منيلج هذا الحجل منو جايبلجيا
هسة شفتة ماعندج هيج شي وهذا ذهب مو فالصو
منين جبتي
حور.مالتي
آصف.منين جبتي بت الخوش اوادم
حور.بيوم الي اشتريت فستان العرس
لمن رحت اشتريتة
آصف.اوكلج خرا عفتج نص ساعة لعبتي لعب
هذا النعل كطعتة وإذا شفتج لابسة حجل بعد
سوالف السـ...... هاي رجليج اكسرهن
حور.ترة زودتها والله
آصف.مو اكول خطية قبل شوية شبعت كفخات
زوركتها ليش تخليني اطيح حضج
سكتت اجة قرب يمي
خلة شعري ورة أذني
باس راسي وجر حسرة
مد أيدة بجيبة طلع مالتي الحجل
آصف.باجر اصلحة وارجعة ماشي
حور.ماشي
ردت أروح وكفني لزم وجهي بأيدة
قرب وجهة باس عيوني
آصف.بجيتج
حور.مو جديدة عليك
آصف.باوعولج عيونهم أكلتج اكل
رجليج بيضة وفر ولابسة حجل مصبغة اضافرهن احمر
لو مو الشامة برجلج ماعرفتج
حور.هالكد مركز
آصف.ركزت بالبنية الماعجبني تصرفها
تمنيتها تركب بسيارات أهل العروس
بس تخيلي ركبت بسيارتي تاليها طلعت حوريتي
بس اني أذيتج زايد
الي أريدة منج بردي گلبج بأي شي
حتى ارتاح كسري شككي الي يعجبج
حور.وأموني
باوعلي بأستغراب
حور.أمين أخوية اذا اني برد گلبي مااعتقد يبرد گلبة
جاي اشوفة اكبر من عمرة وتصرفات تغيرت
شافك وانتة تأذيني أكثر من مرة
هواي اشياء سوو
اول شي ضربوك برجلك
مزكو تايرات سيارتك
مزكو الكشن
هسة كسر الجامة
مااريد اتخيل شي اكبر من ذني
فأبتعد عني الله يخليك
آصف.مااكدر
انتهى نقاشنة بهذي الكلمة
ولمن دنك باس راسي وطلع
رجعت للمطبخ اساعدهن
بضحكة وسالفة وتعزيل الطرمة صارت الساعة ب 3 ونص كعدنة نرتاح
فتحت تلفوني جايتني اشعارات واتساب
آصف دازلي اغنية فتحتها وخليت هيتفونات بأذني
""ماياخذني الا الموت ... الا الموت
وغيره مايفركنا ، معاك العمر كله يا
عسى يومي قبل يومك
وعد ما غيب عن عينك... ماغيب
وعد مرخص محبتنا ، حبيبي ساعة الفرگـــة
أبيها آخر همومك ""
نهاية الأغنية كاتب ماياخذني الا الموت