چِنت أنقل المُصابين بوحدة مِن لَيالي القَمع بالتُكتُك مالتي وعيوني تدَمع وگَلبي ينعصُر عَلى ابناء وًطني العِراق شلون يِروحون واحد ورا الثاني وينقَتلون بكل دَم بارد...
لأن جاي يطالبون بوطنهم وبحقوقهم البَسيطة!...
فَ جاي نصعِد بالمُصاب لَحتى نحطة بالتُكتُك قُبل لا نفُقدة..
ما احس الا الطَلقة تِدخل بصًدري واوگع ع ارض..
بذيچ اللَحظات ما چِنت افكر بَس بعائِلتي منو الهُم واني المُعيل الوحيد الهُم...
والعِراق ...
تذًكرت أُمي وهي تگُلي من بين دموعها: يُمة تروح وترجع بالسلامة يحفظك الرحمٰن دير بالك على نفسك...
وهنا وچان اتذكر زوجتي وحبيبتي وهي تگلي من بين شهگاتها: حبيبي راح اشتاقلك اذا رحت وعفتني منو النا اني وابنا الي جاي بالطريق...
جَسدي راح يودع هالحياة الي بيها امي وزوجتي وابني الي بعد شهر ينولد...
بس روحي..روحي تبقى هنا معلگة بالتحرير وساحات انتفاضتنة...
اريد اگول لأمي تفتخر بأبنها كَونة ضحة بنفسة فِداء للوَطن.. وزَوجتي وابني واختي اريدهم يفتخرون بية..والعراق يفتخر بأبنائة الي استشهدوا وضحوا عَلمود يرجع النا سالماً مُنعماً...
_____________________
اريد اسأل فد سُؤال..شنو ذنب الشباب الي جاي ينقتلون بكل دم بارد، وشنو ذنب الامهات الي جاي تخسر ابنائها، وشنو ذنب الزوجة الي تتأرمل، وشنو ذنب الاطفال الي جاي تتيتم؟!
ذنبهم انو طالبوا بوطن، او طالبوا بحقوقهم البسيطة مو...
اي صح طالبوا بوطنهم الي سرقوا الحَرامية...
لحد الان شكم صَفاء خسرنة وشكم عُمر وشكم مُهند وشكم ثائر وشكم احمد وشكم ريمون وشكم هِشام وشكم سارة وشكم رِهام وشكم نور وغيرهم وغيرهم من الشُهداء الي تجاوز عددهم الالف شهيد... مو واحد او اثنين لا الف...
وكل هذا وما اكتفوا ... بل زادوا بقمعهم واغتيالاتهم وخطفهم ...
اكو للأن مَخطوفين ما ردوا لأهلهم ولا عرفوا شصار وياهم او حتى بس طريق وصل لحتى عوائلهم تعرف هل هُم عًدلين او مًيتين ...
مِثل المُتظاهر علي جاسب وغيرة هواي.....
بس ان شاء الله كل شهيد وكل جريح يطلع حقهم...
والرب ما ينسانا وراح ياخذ حقنا من كل واحد افسد بالعراق واجرم وقتتتل...
وما راح نسكت عن دموع الأمهات الي تنزل بسبب فقدان ابنائهن واشتياقهن الهُم ...
وطبعا نـًسّْيـت اگول انو ثورة اكتوبر احلى شي صار بالعراق وهي شي عظيم بالنسبة لِكُل عِراقي ثائر وان شاء الله تنتصر ويرجع عِراقنا الحلو ...
بِقلمي ✍️
Kawthar Aqeel.
دُمتُم بِخير ومُحبين للوُطن.♡