مُختَـصر
مرت ١١ أشهر بدون صفاء ..
صفاء مو مجرد شهيد ..
-صفاء من ٢٠١١ يتظاهر ،
من چانوا اغلب الناس يشوفون اليتظاهر بطران ، هو چان يطلع للشغل من الصبح للعصر ومباشرة يروح للتحرير لأي تظاهرة تصير
واكثر من مرة چان يطلع يتظاهر لوحده من محد يلبي الدعوة غيره ..
-صفاء من صارت ثورة تشرين ،
وتعيّن معيد جامعي بعد ما تعب وإشتغل بمختلف الأعمال من بائع كتب لحمّال لعرضچي وغيرها ، من تعيّن وره اسبوع صارت الثورة ، گالوله اذا تبقى تتظاهر نقطع من راتبك ، گاللهم اخذوا الراتب كله وبس خلوني اتظاهر
-صفاء ما چان يمنعه دخله المادي البسيط من انه يساعد الناس المحتاجة ، بالعكس چان يشارك وياهم كل الي بإيده
-صفاء من چان يتعب برسم لوحاته ، ما چان يبيعها على الناس ، لأن يگول "عيب أتكسّب من الفن" ف چان يتبرع بيها لمدارس ولدور أيتام ..
ويگول الي يريد يشتري لوحة يروح يدفع لدار الأيتام ويكفل يتيم مقابلها اني ما اريد أربح شي .
-صفاء اليتيم من الطفولة ، چان يكفل أيتام ..
-صفاء فتح بيته للنازحين ولكل واحد محتاج ، نشر رقمه وعنوانه وگال بيتي مفتوح الكم انتوا تجون واحنا نخدمكم
___________
-صفاء ما چان يهمه شنو دين ومذهب ومعتقدات المقابل ، يهمه إنسانيته وعلى أساسها يتعامل ويه الناس
-صفاء چان يحب الخير للكل ،
وبوحدة من قصائده يگول :
( اكتب للوطن ، للناس
اعزف للوطن ، للناس
احزن من يمسهم غيض
افرح من صدگ للناس
صوت الناس ، صوتي انه
يحزن الناس ، حزني انه
انه انذر نبع عمري لصحاري الناس
اني اهجس ورد روحي ، حدايق ناس )
-صفاء إنعرضت عليه أكثر من وظيفة براتب قوي ، بس مقابلها چان راح يبيع ضميره ووطنيته ، فرفضها بدون تردد رغم انه هالراتب چان ممكن يخليه يرتاح ويغيّر حياته
-صفاء رغم هو خريج الجامعة التكنولوجية وتعبان على نفسه ، بس من ما لگه تعيين ظل يطالب بحقه وبنفس الوقت يطوّر نفسه ويشتغل أي شغلة شريفة تعيشه ، ظل يبحث ويقرا ويثقف نفسه ..
اليوم ، كل الناس الي تعرف صفاء وحتى الي عرفوه بعد إستشهاده .. تغيّرت حياتهم بعد ٢٨/١٠/٢٠١٩ ..
صفاء ترك كسر وجرح مستحيل يطيب
وماكو شي يعوّض لحظة وحدة من حياته
بس كلنا ثقة لو صفاء يگدر يرجع ويگول كلمة
چان طلب منّا نكمل مسيرته ورسالته ومبادئه ومواقفه الي چان يسويها ،
صفاء ما يريدنا بس نحبه ونحزن عليه
يريدنا نقتدي بيه ونخليه حي بداخل كل واحد منّا بأفعالنا
بإختصار ،
الشهيد #صفاء_السري فكرة أكثر من كونه مجرد إنسان ، ولذلك فالفكرة لا تموت !
إبن ثنوة راح يبقى حي بداخل كل عراقي غيور ويحب وطنه.
.
*الصورة خلال ثورة تشرين ، آخر أيام قبل إستشهاد صفاء.
.
#ابن_ثنوة_مايموت
ملاحضة :- احنى منفرق بين الشهداء لڪـن صفااء كان ثوري منـہ قبل صفاء وما ادراك ما صفااء
مچنت اࢪيـد انشرلة ههيج بارت بسـہ ؏َـن قريب انشر الافضل
dr_kokaIQ 🇮🇶 ..،