نيران قلبي

part 11

نيران قلبي
بقلم هدى
البارت الحادي عشر

---------

- وصل يمي وكال

- ششععننندج واكفه هنا؟

- هاا آآآ

بقيت امتمت

- هااا؟

- شسمه انطيت السفريات للولد يوزعون بيهن

- وشكو طالعه هم يفوتون ياخذوهن

- مو اني عمه حنان كالت طلعي وبعد مااطلع التوبه ،

ابتسم تك خد ودار وجهة
- يلا فوتي واذا شفتج انتي او وحده من البنات هنا مايصير خير

- اي

فتت للهول وكعدت المطبخ هوسة كلها تشتغل بي...

رحت اريد اشرب مي شفت اسير واكف بباب المطبخ ، بيان جانت تغسل مواعين

- بيان هذا اسير بالباب مدري شيريد متروحيله

- ماتولين لخاطر ربج شوفيني غركانه بالغسل روحي شوفي شيريد فشله واكف هنا

- هم صدك

رحت للباب جان داير وجهة هسة انتبهتله لابس دشداشه سوده وبأيده سبحه...

- اسير رايد شي؟

- ها شمم اكلج وين امي اريدهة

- بالغرفه يمكن حروح اصيحلهة

- اي بسرعه

رحت للغرفه لكيت عمتي

عمه اسير واكف بالباب يريدج بسرعه

- ها يمه ،اي تعاي وياي

- اجيت

مشيت وراهة راحت يم اسير مدري شحجه وياهة وراح

شويه واجه جايب 2 كراتين مال مي

- تعاي شمومه اخذي وحده من ابن عمج

- اي عمه ..

رحت اريد اخذها منه مديت ايدي حتى يحطها

- تكدرين تشيليهة خاف ثكيله؟

- لا وين الثكل انطيني

اخذتها وفتت حطيتها بالمجمده

رحت يم بيان ساعدتها ، بس هي من الموجودين اعرفها الباقي مااحتك بيهن امي واخواتي مااعرف وين راحن

اختنكت بالمطبخ صعدت لغرفة بيان لكيت بيها بنات مااعرفهن ، رحت لغرفة ايسر دكيت الباب وفتت

لكيت فناء كاعده وانس يمها نايم
- ها شمم تعاي

- اختنكت جوه وصعدت هنا

- خوش

- اكلج اكو بنات بغرفة بيان مشايفتهن قبل

- هذني بنات خالتهة شكد حقنه مينجرعن نصيحه لتحتكين بيهن

- مثل دالي يعني

- هههههههه اي بالضبط والله زين اذا لكيتي وحده منهن زينه

- هههههههه

- شوفي الحض بدال مانشتغل كاعدات نكص بالعالم

- والله نعسانه كعدوني من الستة علمود نجي انوب اريد احج

- اي لعد ابقي نايمه يم انو واني نازله

- تمام

نزلت فناء واني بقيت اتكلب ماكدرت انام فتحت الفون شويه وسديته مابي شي جديد

كعد انس يصيح اريد اسكته مايسكت شلته ونزلت للهول
جانن كاعدات عماتي واخوات مرت عمي وامي وليال يمهن رحت للمطبخ لكيت فناء واكفه

فناء اخذي هذا المكروص مايسكت

- يا حبيبي جيبي

- هاج

انطيته الهة بس شالته سكت

- مانمتي

- لا ماكدرت ، هسة شنسوي ؟

- ماعدنه شي روحي كعدي

- تمام اكلج ماشفتي رنيم

- قبل شويه نزلت ما شفتها بعد

- اهاا

طلعت من المطبخ وكعدت بالهول يم امي شويه واجت رنيم مدري منين وكعدت

صاحتلي فناء ورحتلها

- ها حبي

- فدوه اخذي انس خلي يم عمتي

- تمام ، اكلج هذني مايتغدن

- لا وين هسة وكت غده احنه نبقه لمن نفرغ ونطلع الموجود

- ياا لعد والطبخ مال الثواب وينه

- مو يوزعون وكلمن ياخذ لجماعته لو يبقه شويه لو ماكو

- خوش

اخذت انس انطيته لمرت عمي ورجعت لمكاني

اجت مرت عمي عباس كالت سون چاي وضيافه
جايين خطار من غير محافضة

طبينه كلنه للمطبخ وصارت هوسه ماكو محط رجل
رغم المطبخ جبير

طلعت استكاين حطيتهن عالطبله وبقيت واكفه
مرت عمي جانت واكفه يمي كالت

- بناتي وحده منجن تخابر واحد من الولد

- عمه اني مافارغه شوفي البنات

شفت البنات كلهن مخبوصات كلتلها
- عمه اني اخابر

طلعت فوني من جيب البنطلون وطلعت للهول
اتصلت بـ تمار مغلق

رحت لـ اسير اتصلت مرتين ميجاوب
بالمره الثالثه جاوب

- الوو منو

- اسير اني شمم تعال للبيت عمتي تريدك

- شكو يابيت

- بيتكم ماادري بس بسرعه تعال

- استغفر الله ، جاي جاي

سد الخط من يمه و رجعت للمطبخ

- عمه خابرت اسير هسة حيجي

- اي عفيه حبيبتي

عفتهن وصعدت لغرفة بيان مااكو شي اسوي بالمطبخ بس خنكه

لكيت رنيم كاعده وحدها

- ها رنرن كيفك

- زينه

- وين جنتي الصبح دورت عليج ماكو

- زينه

- هيووو شبيج دا اكلج وين جنتي تسمعين من خشمج؟

- شكو شمم شتردين

- لا والله خاف متقبلين

- سكتي بربج

- شبيج؟

- مبيه شي

- رنيم؟

- بعدين شمم بعدين مو وكتها

- تمام

عفتها ونزلت ولا وحده من البنات موجوده

طلعت لبره وتفاجأت كلهن متجمعات يم الباب فاتحات شويه ويباوعن مااعرف المن

بقيت واكفه بعيد عنهن احاول افهم شكو

مااحس الا صارت مراكض وكلها تصيح اجه اجه
ثواني وكلهن طبن بس اني بقيت صافنه الباب بقة مفتوح واني بمكاني

اندفع الباب وفات اسير اني هنا بس يكولولي بزز اوكع

- ليشش واااكفه هناااا

- هاا ااا

صاح بصوت كمزني
- شششنوووو

- مووو اني

- شنو مو انتي لعد الواكف يمي جني ؟

- لا  مو هيج بس

- لا تبسبسين مو محذرج اني ماتوصلين لهنا
فوتيييي يلا واذا شفتج هنا اكسر رجلج

درت وجهي عنه والدمعه بطرف عيني مااريد تنزل

شفت البنات واكفات يم باب الهول يباوعن

- خزرتهن وفتت ، ماما خل نروح فدوه

- يا يمه ليش مو هاي بنات شكد وياج شعندج رايحه

- مااريد ضجت

- لا مانروح كعدي وسكتي

- ماامااااا

خزرتني حيل وكالت
- شمم روحييي

عفتها ورحت للممر مالكيت كراسي شايليهن
كعدت بالكاع وكمت اشهك

كرهته شايف روحة وعبالك هو ولي امري
ردت اخابر بابا بلكي يقبل يرجعني
دورت فوني ماموجود
شهالحض يربي ، مااريد افوت لجوه

بقيت كاعده بمكاني حاضنه رجليه وحاطه راسي بحضني اختنكت من الشال فتحته وخليته على راسي بأهمال

غمضت عيوني وصحاني صوت قريب مني

- ليش كاعده هنا؟

ماجاوبت

- بيج شي

- معليك

- هاا

- اييي

- ليش جنتي واكفه يم الباب

- ماواكفه بس طلعت ادور عالبنات ولكيتهن متجمعات يم الباب بقيت واكفه بعيد عنهن انوب من اجيت هن شردن

- ليش ماكلتي لسانج انبلع

- اكو واحد منطاني مجال احجي وهسة ديسأل

- ههههههههههههه اي مو اني محذرج من الطلعه ولكيتج واكفه كلت هاي تعاندني

- هااا ، تنهد وطلع جكاره

- منين جبتي رقمي

- شسمه اخذته من فون عمتي

- اهاا ، بعدنه اصدقاء؟

- يمكن

ذب الجكاره وطلع ثانيه دار وجهة راح شويه بعيد عني ورجع كعد

- عافتني

رنيم ..

بيوم العاشر من محرم جنت ببيت عمي
طلعت لبره شفت الباب مفتوح رحت اسده

تفاجات بـ رضا جان واكف ويمه عزيز واكفين بالشارع يم ايسر

طبكت الباب وركضت لفوك فتحت فوني ورحت لأيلاف

- ايلاف موجوده ، وينج محتاجتج

- ها رنيم شكو

- ايلاف عزيز شجابه هنا

- منو عزيز

- ايلاف ركزي عزيز منو يعني

- هاا وين

- لج يم بيت عمي هو ورضا شفتهم واكفين يم ايسر

- اهاااا

- ها شنو

- والله يا اختاه هاي سالفة محيره ، ايسر ابن عمج صديق رضا و كايله تعال النه مادري شنو

- اي وعزيز شعليه

- دصبري مو رضا راد يروح واجه عزيز كال اله ردت اروح لأيسر عازمني كال يلا اروح وياك

- هذا العرفته يااختاه

- يعني انتي تدرين زوجج المصون صديق ابن عمي وماكلتي

- والله البارحه عرفت ونسيت اكلج

- زين هسة شلون

- شعندج بعد

- ماادري انصدمت حتى مكالي راح يجي لبغداد

- تكبرين وتنسين ههههههه

- اراسله؟

لا ابد لتراسلين شتگليله مثلا

- مادري اتعارك

- انچبي لا

- اوكِ

نهيت المحادثة وطلعت من الغرفه رحت للحمام
ورجعت لغرفة بيان لكيتها متروسه بنات
كعدت بعيد عنهن وحدي

صفنه تجيبني وصفنه توديني لمن مليت ونزلت للهول
كالت مرت عمي

- رنيم روحي رتبي الاستقبال وطلعي محد بيها

- اي عمه رايحه

رحت للاستقبال جان بابه خارجي

عزلته وطلعت
واني اريد اسد الباب انفتح باب الشارع
التفتت وشفت ايسر ورضا وعزيز

سلم عليه ايسر ورضا

- دكتور هاي بت عمي رنيم

جان يباوعلي مثل المتفاجئ

- اي اعرفها شلونج رنيم

- الحمدلله

حچه ايسر بأستغراب
- منين تعرفها

- رنيم جانت من احسن الطالبات عندي

- اهاا هيج ، بت عمي كليلهم خل يحضرون جاي

- انشالله

فتت لكيتهن مسويات جاي كلتلهن يصبن 3 لايسر

ورحت لغرفة بيان البنات بعدهن بالغرفه شويه وكلهن نزلن بقيت بس اني مالي خلك اجت شمم رادت تعرف شبيه ماحجيت

بقيت كاعده اتصفن لمن كالت بيان اريد انام كمت من الجربايه ونزلت

راسي مصدع شربت جاي شويت صرت احسن

للمغرب طلعت للهول ولا وحده موجوده من البنات

مااحس الا البنات تتراكض من بره شويه وصار واحد يصيح

ماركزت بالموضوع رحت للمطبخ اسوي وياهن زلاطه وتجهيزات للحجه

اجت شمم حجت وي امي وراحت

- رنيم كومي شوفي اختج وين راحت

- وين يعني اكيد بغرفة بيان

- دكومي شوفيها مدري شبيها

- اهو تمام ، رحت لغرفة بيان ملكيتها طلعت لبره سمعت صوتها بالممر

شفتها من بعيد ورجعت كلت لماما بالغرفة نايمه
وكملت شغلي

شمم ..

- عافتني

حچاهة ورديت بفهاوه
- ها؟

- تردين اكمل

- اي كمل

- لتقاطعيني

- تمام

- جنت احب بت خالتي وهي تحبني وعلاقة 3 سنوات بس امي رافضه الموضوع نهائي
حاولت اقنعها تخطب مره ومرتين وما قبلت

- ليش

- مو كلنه لتقاطعين

- ها اوك

تكول بنات اختي اعرفهن مو راحه مااريد تتورط بيها
قررت اخذ مشيه واخطبها من ابوهة بس امي كالت اذا خطبتهة ماارضه عليك

اجلت موضوع الخطوبه لمن اقنع امي
بهاي الفتره ميسم كلش تعبتني

انت متحبني ، متريد تخطبني ، تتحجج بأمك
مو امي موافقه ليش هي رافضه
جذاب
تضحك عليه

وهواي كلام بحيث مللتني حتى كمت ماافتح نت
لمن اخطبها صدك

دزتلي عالخط

ها حتعوفني بعد متريدني مو ،نذل اكرهك

رزلتها وحاولت اقنعها بضروفي الا ان اقتنعت

بقيت فتره مافتحت موضوع الخطوبه وي امي
كامت تلح خلي اخطبلك علي ذوقي
واريد ازوجك اذا اكللها اريد ميسم تصيح وتغير الموضوع

وبيوم جنت راجع من الشغل تعبان

- شنو تشتغل

- لا اله الا الله ، محلل اكمل لو لا

- لا كمل بعد مااقاطع

جنت راجع تعبان مريت من يم غرفة امي وسمعتها تحجي وي وحده

- اي خيه انشالله الاسبوع الجاي مشيته ، يا لو تشوفينهة گمر يمشي عالكاع تخبل ولو هو اسوري ماعايز جمال اكيد انتي اول المعازيم ، الله وياج

فار دمي اكيد جانت تحجي وي خالتي حتى توصل لميسم شي ماصاير

- يوووومم

- ها يمه الله يساعدك

- يمممه جنتي تخابرين منو

- خالتك ليش

- شكلتيلها

- يا ليش تسأل غير سوالف نسوان

- اي سوالف النسوان مالتج ليش مدخله اسمي بيها

- ي شنو يعني مو انت راح تخطب كاعده ابشر خالاتك

- اخطب؟!!

- اي شناقصك وماتتزوج

- يمهههه انتي انتي تعرفين السبب وتعمدتي تسمعين خالتي

- اي تعمدت حتى بتها تفك ياخة منك

- هي مو بت اختج ليش هيج تكرهيها

- ليش اكرهة اصلا مااعترف بيها

- لا اله الا الله الصبر يا ربي الصبر

طلعت من يمهة واني حاير شلون احل هاي السالفه

نمت وكعدت المغرب جهازي مابي شحن
شحنته ورحت تغديت

رجعت للغرفه اريد ابدل واطلع فتحت الجهاز بي 5 مكالمات فائته وهو بأيدي
دكت ميسم يا الله اكيد عرفت بالسالفه

رديت عليها وجاوبتني بصوت باكي وبي شهكه

يتبع...

رأيكم؟
توقعاتكم؟

لتنسون التصويت 🌟