البارت الاربعون
رواية...جولييت واسرها..غياهب الإنتقام
بقلمي...نور سمو العراق
💔💔💔💔💔💔💔💔💔💔
تنبية احبتي....احتراما لاخونا السوريين الي متابعيين ويانه اكييد ودا الاحظ حسن اخلاقهم وقوفهم مع جولييت وتعاطفهم وياها علئ حساب بنت بلدهم شام...
ياريت انتم احبتي هماتين تقتدون بيهم وتبتعدون عن الشتم والسب لان شام ايضا مضلومه ولا تفشلوني مع احب بلد احسن ناس وهم اهل سوريا...
اقتضئ التنويه...💔
.........................................
لم أكن أعرف أنّ للذاكرة عطراً أيضاً، هو عطر الوطن سوريا...💔
.........................
وقار...
الوطن هو البيت الثاني والاب الكبير الي يحتوي اولاده انسان بدون وطن مثل بقايا متهالكه من البشر
الانسان يعتز ويكبر بوطنه واذا ضاع الوطن ضاع الانسان وراحت قيمته بين الناس...
شويه واندك الباب رحت فتحت الباب اني محد جان من الولد...
شفت ثنين نسوان وحده سمينه خشنه لهجتها تختلف والثانيه ناعمه وحلوه استغربت هذن منوو
كالت بتوسل...يابنتي تؤبري البي بدي فوت للحمام ازا ممكن
ابتسمت بهدوء...اي خاله اهلا وسهلا تفضلي
دخلت هي،والبنيه.... البنيه دخلتها بالاستقبال والمره فاتت للحمام
اباوع للبنيه شكد حلوه وشابه لابسه صايه شويه قديمه وشال اسوود ولابسه جنطه قديمه
كلتلها بتساؤل...انتم من سوريا
ابتسمت بحزن...اي نحنا من سوريا ..تهجرنا واجينه لهوون بس ابل لا نجي لهون كنا باليبيا
جريت نفس...الله يساعدك وان شاء الله يرجع وطنكم بخير وامان...
تنهدت بضيق...تسلمي يا ألبي وان شاء الله يرجع وطنكن متل أبل واحسن
هزيت راسي بضياع...اميين
اجت المره الثانيه وكعدت علئ القنفه كالت...ممكن تعطينا مي يا بنتي
وكفت بمرح...اي خاله ادللي
رحت دا اجيب اجت جولييت دتغسل المرتضئ ماكل سيريلاك
اخذت المي كالت باستغراب...المن هذا وقار
ابتسمت...هاي اجن لاجئات سوريات ودا اخذه الهن
حسيتها توترت يمكن لان جاسر جان متزوج سوريه
غسلت الابنها واجت ورايه سلمت وكعدت
انطيتهن مي وكعدنه شويه جولييت كلتلها...شعجب طالعيين بهيج وقت انتم ساكنين قريب منه
جرت نفس وردت من خلف بوابات الحزن...والله يا بنتي نحنا اعدين بجامع بس مو هوون بعيد شووي
بس نحنا نجي هوون مشان ناخذ مصاري من العالم وكمان ازا حدا عندو ملابس ئديمه يمكن تفيدنا
جولييت...
من كالت وقار نازحين من سوريا عبالك انضربت بوكس علئ بطني انرعبت بسرعه رغم ما الي حق
شام زوجتة من زمان ويمكن ميته بس اني يعني اخاف يتذكرها وبعدها يحاربني لان مزاجه اكيد يتغير
او عندي احتمال ثاني يمكن يكونون اقاربها واجو يسالون عنه
المشكله مو بس ان حتشاركني بي المشكله اكبر من هيييج
اني اخت قاتل بنتها وهماتين ماخذه حبيبها منها
يعني خسرت بنتها وخسرت زوجها وحلقة الحزن تدور علينه تلاثتنه اني وهي وجاسر
شنو حيكون موقفه لفتاتة المدلله شام بعد ما فقد الامل برجوعها وما حفظ امانتها الي انقتلت علئ ايد اقرب الناس الي وهو اخويه عاصم
صعبه ياربي صعبه لا هو يكدر يتقبلني ولا هي تكدر ومعذورين الصار مو شويه
بس للاسف اني ما اكدر اواجهه خجلانه منها ومن نفسي،ومن جاااسر ...
ياربي ليش هيج اخويه ليش هيج كسرني وحتئ واني مظلومه احس مظلوميتة شام اكثر مني
ساقني رجليه بدون اراده مني ودخلت شفتهن مره كبيره والثانيه صغيره بس مو شام لان شام اعرفها وحافظه تفاصيلها اكثر ما حافظه تفاصيل وجهي...
سألتها وين ساكنين وشعجب طالعين بهيج وقت وهي جاوبتني الحاجه هي الي طلعتهن
رديت سالتها بحزن...الله يرزقكم خاله زين بس انتي وهل بنيه
جاوبت بعد نفس طويل...لا في عنا بعد بنات كتير بس كل وحده منا شغلتها نحنا نجي علئ ازقاق
وفي عنا بنات يكونوا بالسيطره يمسحوا سيارات الماره وهييك الحمد لله المهم نحنا عايشيين
همست الحمد لله ربي يرزقكم ان شاء الله...
خليت وطلعت بره رحت فتحت كنتوري عندي ملابس جديده لان اني من تزوجت ما ضليت هوايه وعاصم كتل اخو جاسر وبنته وابو
لذلك نيشاني كله جديد اخذت كم قطعه جديده منهم وخليتهن بعلاكه...
وهماتين خالتي صبريه كل ما تجي تنطيني،فلوس رغم ما اخذ بس هي تصر ...
حسبتهن جانن خمسين الف ضميت خمسه وعشرين واخذت خمسه وعشرين وطلعت
وخطيه ريهام هماتين جابت المقسوم و وقار انطت فلوس هي مساعده وما بيها شئ،
اهل سوريا ناس طيبه وبلدنا الثاني،من بعد العراق
جاسر يموت علئ اهل سوريا يكول مو لان شام زوجتي
بس هم أهل نخوه ومن احنه تبهذلنه بسبب الاوضاع هم احتضنونه ...
يارب يحفظهم ويحفظ بلدهم ويرجعهم سالمين غانمين ...
وقار حجت ويه نوال كلتلها...عندج مساعده ذول نازحيين من سوريا
هزت ايدها بتذمر...خلي انطي المجاديه العراق وانوب انطي المجاديه سوريا والله يالله ناس بطرانه
ريهام ردت عليها...الصدقه تدفع البلاء وتزيل الهم وتفتح باب فرج
وبعدين انتي زوجج متوفي وتستلمين راتبه خلي اله صدقه جاريه من راتبه خطيه حتئ الله ينور قبره
ردت بملل...بناته احق بالصدقه
الحجي وياها ضايع عاد خليناها ورحنه انطيناهم المقسوم وهنه تشكرن منه كالن ان شاء الله كل شهر نمر الكم وان شاء الله انتم ما تقصرون
وقار اخذت رقم البنيه وجاوبتها ببتسامه...فدوه الكلبج شكد حبيتج اني احب اهل سوريا من وره مسلسلاتهم وخاصه باب الحاره
هيج اكزكز علئ اكلكم يجنن اريد اتعلم اكلات شاميه
رد بضحكه...يا عمري انتي ان شاء الله اتصلي فيا وبعلمك علئ الكبة اللبنيه والكوسا باللبن ومهلبيه وكل شئ بدكيا...
صارن صديقات هي و وقار ويه مجاي يطلعن دخل جاسر سلم عليهن ودخل بدون ما يباوع الهن
وهنه ردن بخفوت ...وعليكم السلام...
خلن وراحن واني مدري شبيه روحي فرت من بين اضلاعي مقهوره علئ شام ياربي هل بنات ذكرني بيها
شلون اذا اجت وكلتله جاسر وين بنتي شنو حيكون رده الله يعينهم موقف اصعب من الصعب...
سمعت صوته بعد ما صاح عليه جنت لابسه ثوب اسوود شويه قصير مو كووولش بس شويه ولابسه شال اسود حزينه علئ بابا...
دخلت شفته شايل مجتبئ ويلعب بي باوعلي كال...هذن منو الي جانن هنا
رديت بعد ما بلعت ريكي...ذن لاجئات من سوريا يردون مساعده
هو جان شايل مجتبئ وشايل اللعبه مالة مجتبئ بسرعه وكعت من ايده بضياع
بلع ريكه بغصه...ليش ما كلتيلي جان ساعدتهم
جريت نفس وببتسامه متوتره...لا اني انطيتهم و وقار وريهام وحتئ ماما رضيه وخالتي
عقد حواجبه باستغراب...وانتي منيلج فلوس؟
ابتسمت بذبول...مو خالتي صبريه كل ما تجي تنطيني عشره واني جامعه خمسين الف انطيتهم خمسه وعشرين وضلت عندي خمسه وعشرين
هو راح نزل مجتبئ بسريره وفتح الكنتور مالته اجه اتقرب مني وخله الورقه كدامي كال...هااج هاي مكان الخمسه وعشرين
هزيت راسي بنفي...لا اني انطيتها صدقه عن اطفالي واصلا اني شسوي بالفلوس
جاوبني بملل...ميخالف اخذيها
هزيت راسي بنفي
باوعلي وجر نفس...اموووت واعرف انتي عليمن طالعه عنوديه من اكلج اخذيها يعني اخذيها...
ابتسمت بقلق...بس اني كتلك ما اريد والصدقه دفعتها من عندي ماكو داعي تعوضني
هز راسه باسئ...مو تعويض هي الج
همست...ما اريد
تقرب مني وسحب الثوب مالتي من ناحية الصدر وخله الورقه بصدري
عطت من ايده الخشنه لامست بشرتي الناعمه لزمت ايده بخجل...جاسر عوووفني
باوعلي بخبث...عوووفي ايدي انتي
همست بقلق...لااااا انت وخر ايدك انت متستحي هاي دائما هييج تسوي
رفع حاجب ببراءه عود هو مسكين...شمسوي ؟
دا اريد اوخر ايده مني بس هم مصر علئ هيج شئ همست بتعب...جاسر وخر ايدي توجعني واني لازمه ايدك
غمزلي...عوفي ايدي
جاوبته بنفي...لا ايدك مو راحه
ضحك...قابل شسوي اكرصج
عقدت حواجبي...كووولشي تسوي،وخرررر
تنهد...اوخر بس بشرط اريدج تاخذيها
هزيت راسي بأي هو وخر ايده وهي ضلت بصدري ما طلعته
كال بخبث...يالله اشكريني بوسه حضنه اي شئ
ابتسمت...لا انت لازم تحضني وتبوسني وتشكر مني لان قبلت اخذ منك
عاد هو ما صدك هجم عليه بسرعه من بوسه الحضنه ولشكر ولازم وجهي ويبوس شفايفي بعنف...مشكوره ام مجتبئ سويتي فضل من اخذتي الورقه
دفعته وطلعت واني اخفي ابتسامتي،ومسحت شفايفي بسرعه وكلبي ينبض يالله هو يحبني لو مجرد غريزه
ياربي لا تحيرني اخاف بس مجرد شهوه ...
اي اني غريزه وشام الحب...
ياربي ارحم ضعفي وقلة حيلتي يارب يتيمه وفقدت ابوويه وحتئ امي وما الي غيرك يسندني ويفرحني بهاي الدنيا ...
حنن گلبه عليه وعلئ اطفالي،ما الي احد غيره من بعدك يارب...
............................
وقار ..
ريهام رادت تروح للدكتوره تراجع عن الحمل كلتلها اروح وياج ...
كالت...يالله حبيبتي حضري نفسج
والله صدك خابرت جابر كال...روحي
بدلت وكملت وانتظرت ريهام تكمل بس،وين ريهام تكمل اجه صلاح لو يجي ابليس،ما يطلع...
شويه وطلعت ريهام لابسه جبه اسلاميه لونها جوزي من فوك من جوه اسود عبالك نفس التنوره ولابسه شال اسود وحذاء وجنطه...
وصلاح هماتين مبدل رحنه للدكتوره وصلاح كال...اخذ فره وارجع عليكم ...
شويه وصاحت الدكتوره باسم ريهام طبعا احنه حاجزين علئ الموبايل ...
دخلت ريهام واني،دخلت وياها فحصتها كلتلها...ماما رحمج نضيف بس افضل ما تحبلين هسه لان انتي هسه مسقطه اخذي وقت وتالي،اتهيئ للحمل
وسوت الها فحوصات طلع دمها ناازل حييل فكتبت الها تحليل كلتلها هذا تسوي بمدينة الطب حتئ يعرفون هاي الحاله شنوو
وهماتين ريهام عندها طكع زرك بجسمها هي الدكتوره من شافتهن كلتلها اي اخذي هذا التحليل افضل للاطمئنان وان شاء الله ما بيج شئ
اما اني من طلعت ريهام سولفتلها عن حالتي كالت اصعدي افحصج ماما
اني بصراحه خفت واستحيت اول مره امر بهيج شئ
كلتلها ميصير تحليل اشعه اي شئ بس ما احب تكشفين عليه
ضلت تضحك كالت..شبيج حبيبتي ترئ،فحص عادي وان شاء الله ما ااذيج
صدك فحصتني بعدني ببداية الفحص وصرخت بقووه عاد يمكن شردت المريضات
جرت نفس كالت...كومي حبيبتي كومي
كعدت يمها واني ارتب بملابسي والدمعه بعيني كالت...ماما شوفي الغشاء مالتج مطاطي اكو انواع من الغشاءات اكو مطاط اله بعمليه اكو لا لازم اكثر من مره ويعني هيج شئ بس انتي ماما غشائج ميحتاج تدخل طبي لان اكثر من مره يتمزق
بس احتمال زوجج حذر وياج فحاولي تسلمين نفسج وان شاء الله مابيج شئ
تشكرت منها وخليت وطلعت لكيت ريهام منتظرتني كالت...صلاح منتظرنه بره بسيارته يالله نروح
خلينه وطلعنه شفنه صلاح طابك بسيارته جان فات واحد باوع لريهام كال ..اروح فدوه لهل عيووون
هي خطيه ارتبكت ضلت متعرف شتسوي وهو لحد الان يغازل بيها شافه صلاح من بعيد
ونزل بسرعه من السياره سحبه من ياختخ ذاك باوعله باستغراب وما يشوف نفسه اله علئ الارض
وكف بغضب...ليش تضربني
هجم عليه صلاح وهو يغلط عليه.. لك كلب حيوان اشوفك من بعيد وانت تضايقها ابن الكلب ما جابته امه اليتعده علئ عرضي ..
ريهام خطيه جانت تجرجر بصلاح وتتوسل بي.. فدوه صلاح كافي حتموته بيدك
العالم التمت وضلت تفارغ بيهم وذاك الولد دخلوا يغسلون اله بالسوبر ماركت وريهام سحبت صلاح واخذته للسياره
عاد هو سحب ايده منها بغضب ومشه كدامنه هي باوعتلي متفاجئه واني هماتين
صعدنه بالسياره هي كعدت وره لان زعلانه واني هماتين
اول ما شغل السياره دار وجهه عليها كالها بسخريه...الشوفير مالجن اني تعاي اكعدي بالصدري
دارت وجهها زعلانه....هنا مرتاحه
هو نزل من السياره وفتح الباب باوعلها وهي متكتفه سحبها من ايدها وهو يضحك علئ تصرفاتها ...
وكفها بعد معاناة ورفض كبير منها
كعدت بالصدر ودارت وجهه زعلانه منه
ضل يسوق ويباوعلها كلها...اريد اعرف شغله وحده شبيج زعلتي
دارت وجهه عليه...يعني حلوه تدفع ايدي كدام العالم عبالك اني مكيفه هذا يغازلني العالم شتكول عليه
باوعلها بحب...الي يكول عليج كلمة وحده احط النعال بحلكه ...
بس اني شويه جنت ضايج اني اتخبل من واحد يتقرب منج وهذا شفته يغازلج انهاريت
وانتي ماكو داعي تزعلين مني من تشوفيني ضايج احضنيني بوسيني حتئ اهدء شويه مو تزعليين
ضربته علئ كتفه...هااا هااا خويه صلاح شجاك شطحت علئ الترابي وين تبوسك بنص الشارع
باوعتلي وهي تبتسم باستهزاء...شفتي اخوح وقار بسرعه يزعل ويتعصب مدري شبي
باوعلها وسحب ايدها وباسها...ترئ اني احسن واحد بخواني
جان فلاح الله يرحمه عصبي،نار ونوال من يلزمها يسكطها...
جاوبته...وتقارن ريهام ويه نوال صدك تحجي هي نوال شنو هل عرمه فلاح يحجي كلمه هي تردها عشره
باوعلي بالجام مالة السياره كال...وجاسر اووويلي من يگوم يخبط عمان وشمان ويحرگ الاخضر واليابس ...
هسه دعينه من مرته شايفته من يلزم جعفر سكران لو من لزم داوود من نشر صورج والله عبالك مسلم وكع بيد كافر ...
اله اني عطوف ورحيم بس هم بيه خيط خبال من اخواني ...
اردف بعتب...شلون بالله اعووف اخواني يتخبلون الوحدهم ما يصير
ضحكت ريهام...بس لا تخلي حرگتك بيه اني اتحسس واضوج وانقهر بسرعه
تقربت منها واني ابوسها...اوووي فديت حماتي حساسه طالعه عليه...
صلاح ضربني بخفه علئ ايدي ..وخري من مرتي محد يراضيها غيري
ضحكت...راضي عيني راضي بس اني محد يراضيني
هو رجع اخذ ايدها وباسها كال...والله من كثري حبي الها ما احب واحد غيري يتغزل بيها حتئ لو مو ذنبها بس هييج اني انسان اغار اتخبل شلون بالله احرگ روحي...
هي ضحكت...لا يابه شلون تحرك روحك انوب اضل بدون رجل هو انت وسويت ختمات يالله حصلتك ههه...
ضحك عليها وكف بنص الطريق اشتره الها واليه غزل البنات عوود يراضيها واني وياها علئ الواهس...
وصلنه للبيت وهي راحت للمطبخ تساعد جولي،واني كعدت بالاستقبال...
كعدت علئ القنفه خابرت جابر كتله بدلع...الووو
رد بسرعه...فديت الالو وراعيته
ابتسمت...فداک کلي يکلي
همس بذوبان...مشتاق لحضنك يحلوو
عضيت شفايفي بخجل ...ان شاء الله اليوم راجعه حبيبي
كال...اي،صدك رحتي للدكتوره وشنو كالتلج
جريت نفس...اي رحت وكالت ماما غشائج مطاطي بس ما يحتاج تدخل طبي ان شاء الله بالمرور الوقت تكونين طبيعيه
جر نفس ...اي ان شاء الله شوكت اجي اخذج
جاوبته بحب...وره العشا اذا تريد تعال تعشا يمنه
رد عليه بشكر...تسلمين يگلبي بس معزوم اليوم عند اصدقائي ان شاء الله غير مره وان شاء الله باليل اجيج
همست...عافيات يروحي اهلا وسهلا بيك من بيت صديقك البيتنه
قفلت الخط ودخلت نوال كعدت يمي كالت...اممم جنتي تخابرين بجابر
جاوبتها بضيق...اي
تنهدت بمكر...صدك طلعتي مو بنيه
فزيت من مكاني ...شنوووو انتي صدك متستحين شنو هل كلام اني لو صدك مثل ما تدعين جان ما لكيتيني هسه موجوده جان غسلوا عارهم جان جابر اتهمني
بس اني اشرف منج ومن عشيرتج
وكفت بزعل.. يمه يمه منج أم اللسان ولج اني شحجيت وشكلت اني اصلا شدخلني،حتئ ما ادري
غير سمعت من جولييت هيج دكول انتي،مو بنيه وسترج جابر ...
فتحت عيوني بصدمه...احترمي نفسج نوال اشرفلج وبعدين جولييت شعرفها شنو الي يدور بيني وبين جابر
رافعت اكتافها بمعنئ ما ادري ...
دفعتها وطلعت دا اعارك جوولي شفت جاسر واكف استعذت بالله من الشيطان الرجيم واتراجعت
ما اريد تسبب الها بمشاكل واعرف جاسر ما يرحمها بس والله تعبت من التفكير محد يعرف غيري اني وياه شلون نوال عرفت ومنين ياربي دخيلك ...
صبوا عشا ما قبلت اكل ومبين الضيق علئ وجهي حتئ جاسر سألني اخاف جابر مضوجني
جاوبته لا محد مضوجني بس اني،ما اعرف شبيه
اجيت اكوله علئ،جولييت بس خفت من نتائجها وهماتين خفت اضلم جابر وجولييت اخاف هاي،نوال تجذب
بس منين عرفت والله عجيبه يارب دخيلك شنو هل مشكله
بعدها اجه جابر وخليت ورخت بس ما بينت اله اني ضايجه بالعكس جنت طبيعيه....
..................................
شهد ...
زوجة ابويه كالت لبابا يردون يخطبون شهد ناس معروفين وخوش ناس ...
بس ابنهم متزوج ومطلك يعني هي زوجة اخوو وهاجرها
باوعلي كال بملل...تردينه
استغربت شنو هو جيس مصقول واريده شهل سؤال التافهه
نزلت راسي عود مستحيه كتله...بكيفك
جاوبته زوجة ابويه...زوجها يمعود زوجها هم البنات للممات زوجها قبل لا تجيبلنا مصيبه
رد من وره خشمه...باجر خابريهم وكليلهم تعالوا اخطبوا
عاد اني فزيت من مكاني ورحت اركض وفرحانه وهي تصييح ...طاح حضج وين الخجل وين الانوثه والله اله يردونج ثاني يوم
دخلت الغرفتي،وحضنت بزونتي واني اركص وياها مثل جاك وروز ومتخيلتها جعفر ومغمضه عيوني
وهي تتمزرك من بين اديه تريد تنهزم وبعدها خلت وشردت كبر لفها ولا تخلي واحد يعيش اللحظه...
خابرت جعفر وكتله...بابا وافق اتزوجك
رد بحب...شلونه هو وما يوافق اكيد يوافق وهو الممنون ابو صادق اني لو من بالعراق عشره جاا هسه امريكا تغار منه
ضحكت...فديت الواثق
كال..ان شاء الله الخطوبه هذا الاسبوع
يالله شكد فرحت واخيرا راح انجمع بحبيبي جعفر شكد احببه اموت عليه اعشقه شكد حلوو والله اله اخلي يبطل عرگ...
نمت واني احلم شلون استعد للخطوبه وشلون اركص وامشي وتعيقل علئ مرة ابوي ههههه
......................
جولييت...
جاسر كال حضري نفسج اخذج للدكتور واخذ مجتبئ لحد الان عندي حسرة بداخلي
وهل حسره بسبب موت ابويه لان مات وما حضرت فاتحته ولا حضرت دفنته
كل يوم اخذ موبايل جاسر واخلي السماعات واطلع لطميات رثاء علئ الاب واضل ابجي،منا لمن كووولش ادووخ وانام
وهاي صار كم يوم ما ينطيني الموبايل يكول عيونج انعمن كافي بجي...
توسلت بي بست الگاع بس ردت ياخذني الامي ما قبل والموبايل مالتها هماتين ما قبل ينطينياه
اني حسيت هل موبايل بي شئ ليش لعد اخذه مني تسللت لغرفته هو جان طلع وفتشت الكنتور كله ماكوو
الدروج كولهن فتشتهن ماكوو تالي شسويت صعدت علئ الكرسي ودورت فوك الكنتور هماتين ماكوو
ياربي هل رجال حيجلطني مدري وين يضم الشئ يخفي
اكو خانه بالميز جانت مقفوله شكد حاولت ماكو ما نفتحت والمفتاح ماكوو
عاد شسويت. رحت جبت سحين وفتحته شلون يعني صار سايف حتئ لو ينقفل يضل مفتوح ...
دورت لكيت جيس،بي صور كلهن صور شام وبنته وحده من الصور الهم جماعيه كاتب عليها...
ماتجين
محضر اضلوع احتياط
الشبگتج مو بس ادين...
رجفت شفايفي بالم و وجع هل كد يحبها ياربي اذا شافها شلون حتكون اللهفه بعيونه
دمعت عيوني بوجع مسلوب من روحي ورجعت اباوع للصور اثار انتباهي صوره اليه
درتها لكيته كاتب...تتعبك مزاجيتي ويتعبني تعبك وكلانا متعبين ولا راحه لاحدنا الا بالاخر...
شهكت وحطيت ايدي علئ شفايفي بنحيب...اي والله ياجاسر تعبانه من مزاجيتك واحنه واحد محتاج للاخر طيب جروحي يابو مرتضئ،ولا تجرحني محد بقه غيرك وانت الگشه الحاطه امالي،عليها
رجعت الصور المكانهن ورجعت ادور علئ الموبايل لكيته مخلي بزاوية الميز اخذته بسرعه ورجعت سديت باب الميز وخليت وطلعت بسرعه...
اجت ماما رضيه كالت جاسر يكول خلي تحضر نفسها راح اجي اخذها...
صدك بسرعه حضرت نفسي دورت بالموبايل علئ شئ مهم ماكوو واصلا اني مو هلكد اعرف ابحوش بالموبايلات
حضرت نفسي وحضرت مجتبئ وطلعنه بعد ما هو اجه اخذنه
وبعدها رحت للدكتور سوالي اشعه كال ينراد الها تجبيس وجبسوها..
ورجعنه اخذنه مجتبئ كال الدكتور...عنده نقص بالكالسيوم وتلف بالاعصاب وانطانه علاج وكورسات رياضه
رجعنه للبيت ومجتبئ،مطلع راسه من الشباك ويعيط من جام السياره صاير يحجي ابو لسان و وكح حييل
جاسر كال بتهديد...لا تسبحين علئ ايدج والله اذا سبحتي ما تلومين غير نفسج مو يوميه مجبس اني
رديت بقهر...لعد شلون اضل وسخه
باوعلي بطرف عينه...اني موجود واسبحج
رفعت حاجب ورجعت حضنت مجتبه يسبحني هو منحرف مو محرمني علئ نفسه
دخلنه للبيت واشوف نوال وجهه مخطوف واصفر وكل شويه واتصل موبايلها وهي دكول...بس اصبرلي كم يوم واني ادبرهن لا تفضحني
استغربت شبيها هاي صار كم يوم هيج بس تخابر ومخطوف لونها ...
دخلت لغرفتي شدخلني،بيها اصلا حاولت ابدل بالكوه يالله كدرت ابدل من وره ايدي،...
شويه انفتح الباب وهو عيونه تجدح نار وشرار خفت منه يا ربي شكو شمسويه حتئ هيج هجم
همست بخوف..شكووو
هجم عليه ولزمني من شعري بقسوه...انتي فاتحه الكومدي مالتي
هزيت راسي بنفي وخوووف
هزني بقووه وشعري حسيته انشال من جذوره...جذب لا تجذبيين احجي،وياج جاوبي بصدق لا تجذبين لا احرگ عشيرتج
بلعت ريكي،واختفه الكلام...ردت اشوف امي خابرت لو لا
سحبني من شعري بكل عنف وشمرني علئ السرير رفع اصبعه بتهديد...كلبه حيوانه ما تصير الج جاره بسيطه بسييطه اله اندمج واخليج تعرفين منو جاسر
تقرب مني،واني رجعت بخطوات خايفه لزمني من فكي بكل عنف ...اني من احجي شئ كم مره كتلج ما اريد اعيده ولا اريد تناقشين ليش تحبين تستفزيني
همست بعبره...والله ما سويت شئ بس شفت الموبايل
صرخ بوجهي بكل غضب...هذا الموبايل بي صخام بوجهج انتي ليش تحبين النكد ليش ما تاخذين الحجي تحبين المصايب انتي ليش تبحوشين
رمشت بعيوني بكل خووف...اءء مصايبيش
زمجر بوجهي عبالك اسد ولكه فريسته...انجبي صوتج ما اسمعه
اني الكلب الي متعاطف وياج اصلا انتي مو وجه عطف انتي تحبين الرزايل والاهانه
والله بعد من تمدين ايدج علئ شئ اكسرها مثل ما كسرتي القفل...
نزلت راسي وماحجيت رجعت باوعتله هو رمقني بنظره غاضبه وخله وطلع ...
واني رجعت النوبة البكاء يعني ليش يحرمني من امي وحتئ ما يقبل اخابرها لييش والله تعبت والله
هو شنو الضامه عني حتئ ميقبل اتواصل ويه ماما تعبت منه والله ...
ضلينه تقريبن يومين وهو زعلان حتئ ما يباوع الوجهي ولا يقلد الي ابببد عبالك لا شئ اني
ونوال مدري شبيها وجهه ما يكصه السيف وكل شويه واجتها وحده وكالت هاي صديقتي
واخر شئ اجت مره هدت علينه هي ورجال كبير ومن كعدوا وياها
كالت اطلب نوال عشرين مليون وكل مره دكول اوفيج وكولشي ماكو
عاد جعفر من سمع تخبل شلون عشرين مليوون والمن وين ودتهن لزمها كطعها تكطع
واجت امها واخوها اخذوها وهي ما خلت كلمه ما فشرتها علئ جعفر
وكال جعفر والله اله اطلكها ما دام مره متحترم نفسها عندها راتب ومطلوبه المن مخلصتهن والله اله اطلكها....
وبعدها جاسر علن عن خطبة جعفر الي صدمنه كلنه خالتي ام فلاح تخبلت كالت شنو يتزوج انوب اثنين نسوان لجعفر حتئ نشيل من البيت
بس جعفر مصر لذلك صارت الخطبه بهذا الوقت وعزموا...
كلت اروح اعتذر من جاسر الان اخذت الموبايل من دون علمه بس من شفته مزيد بطنكورته عفته احسن ما احصل راشدي،مو صح...
............................
شهد ...
اليوم الخطبه عيوني لحد الان ما نايمه ولا شفت النوم من كد ما فرحانه
وفرحت اكثر من نوال طلعت من البيت
طبعا اجت وقار ورضيه اخذني للصالون حجزن وهماتين اجرن اليه بدله لونها بنفسجي كيبور بس،تجنن
اني ردت فستان بس ام الصالون مقبلت كالت ...انتي صغيره وجسمج ناعم اذا تجيبين فستان تضيعين ويه الجهال
جيبي بدله احسن واسويلج تسريحه مفتوحه ومن كدام شويه عاليه حتئ تطلعين طوويله
صدك هنه اجن اخذني للصالون وجابن البدله وخلن وراحن واني ضليت وحيده بالمستشفئ
انقهرت حييل وحسيت بغربه لا ام لا اخت بس اني والبنات كلهن وياهن اخواتهن وامهاتهن بس اني لااا
حاولت استغنئ عن هذا الاحساس وضليت اراسل بجعفر اجت وحده من امهات الصالون كالت.. انتي شنو زبونه
جريت نفس وجاوبتها...لا خطوبتي اليوم
كرصت خدي وهي تضحك ..يمه فدوووه ولج بعدج نونو وينج وين الزواج
ضحكت...لا ماخذتخ علئ حب
ضربتني علئ خدي علئ كيف كالت...عزا. بعينج وينج وين الزواج راح ادخل بالتلاثيين واكول بعدني صغيره
بعدها كالت..منو جاي وياج اشو وحدج
تنهدت بضيق...محد الكل مشغول وامي نايمه بوادي السلام
باوعتلي بقهر وجرت نفس...كومي حبيبتي اليوم اطلعج ملكه ولو انتي حلوه وملامحج ناعمه بس اضيفلج لمسات تجنن...
رحت وياها نمت علئ الكرسي وهي ضلت تمكيج بيه وبعدها شغلن اغنيه وكلتلهن عوفن كل الي بيدجن تعالن اركصن...
عاد هنه ما صدكن يركصن ويهوسن هذن امهات الصالون والعرايس كلها تضحك وفرحانات
اني اخذني الحماس وكمت ذبيت لحم وياهن اهز بخصري تعجبن عليه كل شويه و وحده ضربتني وكالن..هنيال الماخذج صفيناز متلحكج
انوب وحده من العرايس كالت عليه اول مره اشوف عروس خفه مثل هاي
رديت عليها احسن ما اصير مثلج بومه خلي اونس نفسي احسن
رجعت كملت مكياجي وخطيه هي لبستني البدله ورجعت سوتلي تسريحه
تعجبن عليه كالت خلي اصورج اخليج بالكتلوك لان حيل اهتميت بيج كتلها..صوري صوري بس ما الكاهن باليوتيوب
ضلت تضحك واخذتلي كم صوره وخابرت جعفر دز ابن اجه اخذني هو وقار وحتئ وقار كالت تجننين طالعه نيال جعفر والله
ضحكت بخجل منها مو من جعفر ونزلت راسي وبعدها رحت البيت اهلي زوجة ابويه من شافتني ترعوصت مدري شبيها
يمكن لان طالعه حلوه عود عبالها حطلع محلوه لان محد ويايه متدري اني صاحب امهات الصالون وكلهن جبت ارقامهن...
.............................
جولييت ...
اليوم خطبت جعفر اني مقبلت اروح واصلا ما ردت اروح بس ماما رضيه كالت يكول جاسر خلي تمشي احسن الها لان محد حيضل بالبيت ...
ياربي والله ما اريد اروح شنو يعني،والله ابويه بعده ترابه اخضر واصلا ما عندي شئ اسود البسه
رحت يم ريهام لكيتها تحضر بروحها ضليت اشكي،يمها كالت هذا عندي فستان والبسي لا تعاندينه وهو عصبي
وخطيه تخرب خطبة جعفر من وراج ...
اخذت منها الفستان ورحت لبسته طلع كووولش،حلو عليه لان اني وريهام نفس الجسم ...
شسورت شعري وبعدها لفيته وبدلت للاطفال الحمد لله فتحت الجبس
لبست حجابي وطلعت ما ردته يشوفني وصلنه الاهل العروس
اخذتنه خالتي صبريه الطريق كله تدك وتركص ومسدسها مطلعته من السياره رغم هو فارغ بس كل شويه وصاح بيها جاسر وكلها اكعدي حجيه لا تبلينه
كعدت بقهر...خايب شكد حقنه المسودن كل شويه وكال اكعدي صبريه شتريد من صخميه دخليني اركص افوخ كلبي
شافت جعفر طالع من الجام ويهووس بيده هي ما صدكت طلعت نص جسمها ومسدسها بيدها وتهوس وتصيح...جان صاحبها واخذها وجان صاحبها واخذها
جرتها ماما رضيه بعتب...ولج اسكتي فضحتينه لا تسويلنه مشكله
باوعت عليها...جاااا انه مجذبه غير صاحبها
بعدها وصلنه للبيت بيتهم تعبان وبي بالوسط دكان صغير جعفر فتح الباب عبالك من اهل البيت...تفضلوا تفضلوا اهلا وسهلا ...
استقبلنه ابوها دخل عمي الشيخ ابو جابر وجاسر وجابر وصلاح وجعفر وبعد ناس من العشيره واحنه النسوان
دخلنه شفنه العروسه جانت ناعمه حييل وصغيره بس ما شاء الله شكد حلوه ورقيقه وبييضه
ضلينه كاعدين شويه وصاحوا هلهلوا صار الدك والركص والهلاهيل اني نزعت حجابي لان محد عندهم
وبعدها دخل جعفر يعقد هو والشيخ وعمي عكاب ...
هم طلعوا وضل بس جعفر تالي رحنه يمهم لكينه كاعد هو وشهد بس شويه بعيد عنها
كعدناهم علئ القنفه وضلن يدكن ويركصن وصبريه ذبت لحم وجعفر يكلها ...بعد روحي صبوره اخدمج بيوم عرسج
احترينه وبيتهم ضيق كنالهم تعالو بالصاله عاد طلعنه بالصاله وضلت وقار تصور بيهم لان جايبين كاميرا
صبريه كل شويه وكلتله...بوسها ولا تخاف من امها
اول مره هو ما باسها واشو هذا اخذله دقيقتين وضل كل دقيقه بايسها وهي ذايبه لا دكول ولا تحجي بس فاتحه حلكها تضحك...
ولازمه جعفر من ايده وهو كل شويه وكال. راح اخذها وروح البيتنه لا عرس ولا بطيخ
وصبريه اخذتها منه...ياااا والله لا يمه لااا انريد عرس وطكطكه اريد اداري روحي منا العرسك بلكي واحد ينعجب بيه ويخطبني لان مقرره ادك تاتو
هو يرد عليها بنذاله...حلوه بدوون تاتووو صبورتي
وهي كل شويه وباسته ...خاب اندارلك سبع فدوات جاا شماله ابو اللول ما عنده ذووق
وانوب جاسر خابر جعفر كله...تطلع لو شلون بس لا ناوي تبات هنا اليوم
رد عليه جعفر...الله يخليلك ام مرتضئ بس شويه والله دافع فلوس صالون وبدلات وما شبعت شوف
عاد ضل شويه ولازم ايد شهد شكد حبيتهم وتمنيت الهم السعاده ان شاء الله ربي يدومها عليهم وما يطلع الهم فد عارض ولو نوال حاده اسنانها...
المهم يمكن خمسين اتصال،وتالي،سواه صامت انوب صلاح خابر علئ ريهام وشلعناه شلع يالله طلع من شهد
انوب يوصل للباب ورجع باسها واخذناه سحل موتنه وهي خطيه مكيفه وهماتين متريده يروح ...
المهم طلعنه من بيتهم اباوع الجاسر ابد ما اهتم اليه
وصلنه للبيت وهي عادم وجودي....
اول ما رجعنا من خطبة جعفر رحت لغرفتي ، بعدني ممبدلة ملابسي ، وكفت كبال المراية صفنت شويه وتحسرت بدون إرادة مني .
تذكرت من فتت للبيت هو جان كاعد بالاستقبال لوحده
واحنه من دخلنا كل وحدة راحت لغرفتها .
فكرت اروح كدامه و اخلي يشوفني ، من صدك الفستان رغم سواده كلش حلو عليه وبارز جمالي وبياض بشرتي الصافي .
اريد اشوف ردة فعله شنو ، نزلت وتوجهت رأسا للاستقبال ، باوعتله كاعد بكل جبروت ، ومدد ايده
ع القنفة واللخ لازم الموبايل ومخلي وجهه بي ويطكطك .
ولا انتبه عليه ولا حس بوجودي ، رفعت تك حاجبي
وعضيت شفتي .
وهيئت نفسي حتى افززه واخلي يشوفني .
عطت : رووضي وينك حبيبي انته هنانه ؟ يااا وين راح مرتضى .
احجي واسوي نفسي دا ادوره ، باوعتله شفته يتأملني بسكون ، ونظراته بيها وميض اعجاب وهو يباوعلي من فوك ليجوه .
نظراته الدافية صابت گلبي ولونت خدودي .
سويت نفسي اتجاهل نظراته وممهتمة اله .
واني امشي واتمتم : ياا عزااا روضي وين راح .
طلعت من الاستقبال بانفاس مخطوفة وحرارة طالعة من وجهي ، جريت نفس وتحسست بشرتي احسها حارة .
ابتسمت واني اتذكر نظراته النفاذة احس لسعتني .
طبيت للمطبخ شربت مي بسرعة وطلعت صعدت فوك .
توه داافوت حسيت بأيده الدافية تسحبني من ساعد ايدي وتقيدني ، سحبني طخيت بصدره وتوجهت نظراتنا .
نزل ايده من رسغي و لزم كف ايدي الصغيرة الباردة وصرت احسها دفت تحت ضغط اصابعه ..
قفل الباب وضغط علئ ايدي حييل وعيونه تتاملني بجرئة
تفاجئت كتله بتعجب .. جاااااسر
كونوا انتم كونوا بخير...احبكم 💔
نور سمو العراق 😘
لا تنسوا التصويت احبتي رجاءا حتئ استمر رغم امتحاناتي واسفه علئ التاخير....
القفله حلوووه هاااا😂😂 اكسر واجبر 💪