صباح يوم جديد 💜
"وقد يكون اصعب ما يحدث لك عندما تنتقم ولا يرتاح ضميرك تصرخ انسانيتك وتتمرد مشاعرك"
صحى شهاب بصعوبه بعد ما داعبته اشعه الشمس كان الجو بارد ، وكان حاسي بصداع شديد وجسمو مولع نار ، ما قادر يتحرك ، سحب نفسو بصعوبه في اتجاه التلفون شالو واتصل ع اول رقم
⁃ طاهر ! انا شلتا حق اهلي بس ما مرتاح نهائي ، حاسي الدنيا دي ضيفه شديد
⁃ شهاب انت وين ودنيا ضيقه شنو ووين حنين ؟! شهاب رد علي!
شهاب قال بصعوبه رميتها !
⁃ شنوو ! انت مجنون حرام عليك الله يااخي طيب ورني انت وين !؟ حسبى الله ونعم الوكيل ي شهاب ليه عملتا كدا ذنبها شنو هي !! قولي انت وين انا جايك هسه
⁃ في البحر
⁃ طيب طيب بتقدر تسوق ؟! الو !
قطع الاتصال ، طاهر بسرعه لبس وشال مفتاح سيارتو قابلتو مرتو ( ياسمين) طاهر ماشي وين من الصباح دا ... طاهر رد علي ، بس اكتفى بانه يقول بعدين بعدين بوريك يلا سلام .... وبسرعه ساق باتجاه المينا ... وطول الطريق يدعى وما عارف يعمل شنو وكيف صحبو عمل كدا ... وصل ووقف سيارتو واستاجر بسرعه ياخت وقال ليهم حاله طارئه ، وركب وبدا يفتش في شهاب .
*جانب اخر
في وحده من الجامعات دار حوار بين بنتين
⁃ ي فتون والله لكن لقتها حنين الكلبه
⁃ لقتها وبسس ي بت والله شهاب دا كان مكسريني حته حته جمال واناقه طول وعضلات والعجب الكشيره ، وااي بسس
⁃ ههه ي فرح والله انتي كان ما مسكتو عليها بتشلبي طوالي
⁃ ااااي عاد دي دايره ليها سؤال ههه
وبدا يضحكو بصوت عالي
⁃ لكن ي فرح والله شهاب دا تحسي فيهو حاجه غريبه خلاص
⁃ غريبه انتي دي ، قال غريب يختي غريب جمالو ووجاهتو
⁃ ي الله ي بت انا جاده معاك يوم العرس تتذكري لمن طلعنا بره اتكلم مكالمه لقتو واقف ولمن شافني اتخلع وبقى يتلبش كانو كان بكلم زول وخاف اني اكون سمعتا
⁃ عليك الله ابليس ، زاتو كان شافك بتخلع هههه خلي هو
⁃ هههه ي وسخه ، غايتو انا كدا حسيت ما عارفه اذا صحح ول لا
⁃ بس صراحه ي فتون كلامك ذكرني حاجه برضو اهلو. والله كان تصرفاتهم غريبه شديد
⁃ اااي ي بت الكل لاحظ تحسي ما اهلو ما اهلو والله اعلم ما نفتى سااي
⁃ هيييه سجمنا المحاضره بدت قومي قومي
⁃ بالجد وبعلي كمان حقت دكتور عمر
وبخطوات متسارعه مشو ع قاعتهم
*في بيت ياسر ابوالعنين
قاعد بستقامه في كرسيه وماسك جريده
جاتو ميسون وختت صينيه الشاي وقالت
⁃ اها شمارات البلد شنو !؟
⁃ ياها زاتها ماف جديد والدولار بزيد
⁃ ايواا ، اها اكب ليك ول تصبر شويه
⁃ كبي كبي ... انتي وين يامن ما شفتو خالص
⁃ بري اكيد مشى جامعتو
⁃ واسما ؟!
قاطعهم صوت صباح الخير برقه كدا ودلع جات نازله من السلم بي فستان صيفي فضفاض ومسويه كعكه وضاربه مكياجها ، جات وقعدت معاهم وقالت لي ميسون بغطرسه
⁃ كبي لي شااي
⁃ ليه يختي ايدك في اجازه ؟!
لمن حست بالاحراج سكتت وقبلت ع ياسر وقالت
⁃ يسوري حبيبي ممكن طلب
ياسر وهو لسا مندمج مع جريده قال ايوا
⁃ رايك شنو نمشي مع بعض المالديف نغير جو حبه ونجي
( هنا ميسون بدت. تتمتم بصوت خافت.... يمشي فيك النمل ي بعيده )
ياسر قال ليها الفتره دي مشغول شديد
طوالي ميسون ادتها نظرات وابتسمت ليها وقالت
⁃ كان خلاااص غافله معاك امشي مع عيالك وغيري جو . اقتراح يعني ما اكتر
⁃ ايواا ودايره يفضي ليك الجو برااك ،اصلا بتك وانقلعت دايره تصرفيني انا. كمان
ميسون عاينت ليها وقالت
⁃ هدا ما شاء الله بتعرفي تتكلمي مالك بتتعولقي
اسما اتغاظت من تجاهل ياسر ليها واستفزاز ميسون طوالي قامت ومشت ... ميسون بنفس نبره صوتها قالت ليها
⁃ طيب ي سوسو والشاي؟! ههههه
بعد دقايق قالت لي ياسر بصوت مخنوق
⁃ ياسر !
⁃ اها ي ميسون
⁃ يعني ما ممكن بس كدا اتصال سريع بس نطمن ونغفل منهم
⁃ ي ميسون ما امس كلمتك وقلتلك ما صاح
⁃ عليك الله عليك النبى بس اتصال سريع
⁃ اوووف طيب اوكي اصلا ح تقعدي تزني كدا كما عملتي الفي راسك
طلع تلفونو وبدا يتصل في شهاب اول مره وتاني مره وما كان في رد ، قال ليها ما برد
ميسون كان بدت تقلق وما مطمنه خالص وحاسه بتها حصلت ليها حاجه ، بس كلام ياسر كان بهديها حبه ويطير منها افكارها دي
*بورسودان :
طاهر بعد تفتيش ساعه واتنين وتلاته حسه بانهاك ومع بروده الجو ، زي بدا يفقد الامل ، بس قعد يرتاح شويه حتى يرجع يفتش تاني ، وهو قاعد لمح حاجه بعيده ، جرى ع المنظار وبدا يشوف لقاهو( يخت شهاب زاتو بتاع امبارح ) بقى يسوق في اتجاهو ربع ساعه ووصل عندو بدا ينادي بصوت عالي شهاب ي شهاااب ، ماف رد اضطر انه يحاول يربط اليختين مع بعض وينط عن شهاب
بدا يفتشو لقاهر مرمي في الارضيه وصدور مكشوف ويرجف ، بدا يفوق فيه واحتار يعمل شنو وشهاب بس بطلع صوت همهمات ، طاهر رفعو بي صعوبه بسبب حجم شهاب ، وحاول يدخلو الغرفه كان صعب شديد لانه المساحه ضيقه بس في النهايه. رقدو وغطاه وطلع اتصل في الزول الاجر منه اليخت وقال ليهو تعال بالمركب وقالليهو انا عندي حاله طارئه ... وفعلا بدا يوصف ليهو والراجل قدر ظرفو .. وبكدا ساق يخت شهاب ع اتجاه المينا واخد نص ساعه لحدي ما وصل كانت سيارتو موقفه ساعدوه بعض الشباب ونزلو شهاب ونقلو ع سياره طاهر ... طاهر كان خايف عليهو شديد اول مره يشوف صحبو كدا . ساق بسرعه ع بيتو ونزلو ومرتو كانت مصدومه ، دخلوه اقرب غرفه وغطوها كويس ، طاهر قال لي مرتو كمادات سريع واي حاجه سخنه يقدر ياكلها ، فعلا جرت جابت كمادات ومشت تسوي شوربه ول اي شي دافي ، طاهر بدا يخت ليهو كمادات ويقرا ليهو قران لانه جسمو كله بنفض من البرد وحمه شديده ، ياسمين جابت ليهم الاكل وطاهر حاول يسندو وبدا ياكل فيهو كان شهاب ما مستوعب اي شي بتمتم بكلمات مبهمه ، شربوه شوربه وحبه مويه ورجعو رقدو بعد كمادات كتير بدت حرارتو تخف غفلو اللمبه وطلعو وخلوهو يرتاح
⁃ مسكين يحليلو ربنا يشفي
⁃ اميين ي رب
⁃ دا شهاب مش؟!
⁃ ااي ياهو زاتو
⁃ مسكين حصل معاهو شنو
⁃ شكلو كدا غطس امس في المويه البارده واتعرض للهوا
⁃ ايوااا !! بس دا مش امس عرس وين مرتو ؟!
تغيرت ملامح طاهر قال ليها
⁃ ياسمين ما وقت اسئلك عليك الله
⁃ طيب اوكي
⁃ اسمعي محتاجين حاجه ناقصه حاجه ؟!
⁃ لالا كلو في
⁃ طيب جهزي غدا زابط بالله
⁃ تمام ولا يهمك
ابتسم ليها وقال يديك العافيه
ردت ليهو بالابتسامه وفاتت ع المطبخ ... اما هو مشى استحمى وغير وجا طالع لقى ريحت البخور فايحه مشى ع مرتو قال ليها ماشاء الله الليله جاني احساس جمعه جمعه .. قالت ليهو علشان ريحه الطبيخ ، قاليها لالا تمام يلا انا بشوف شهاب دا يمكن صحى وفعلا مشى عليهو ... دخل وقعد جنبو شافو شويه هدا ووضعو اتحسن ، بس بقول في كلام غريب ، قرب طاهر منو اكتر علشان يسمع
" حنين ! حنيين ! انا الخليتها تغرق " ملامح طاهر اتغيرت وبقى زي المربوط من جهة صحبو ومن جهة البت المسكينه الله اعلم ماتت ول حيه ، وما بقدر يكلم الشرطه لانها بت زول كان وزير سابق ممكن يجوط الدنيا ويمكن ياذو شهاب .. بقى قاعد وبفكر يعمل شنو والحل شنو ، ونظراته ع شهاب .
يتبع.....