#وانكسر_قلبي
#بقلم:#منى_المجبري
#part5
__________________________
_لايك قبل ماتقرو و بعد القراءه رايكم في تعليق دعمكم ليا يهمني وديرو دعوه للاصدقاء💙
___________________________
_رتاج... اف انقطع الخط كمل الرصيد يسور الدبه ليش مش معبيه، بعدها التفتت لقيت لطعه على الساس اعيوني ابلطن من مكانهن سيبت الفون على الصالون وخذيت اليفه وخشيت عبيه ميه وبطاس وصبون من الحمام وطلعت وصبيت وكرعيها مش شايلتني من الصدمه كان التلفون يرن وخالد ماسكه و..
خالد" بِ صدمه وعصبيه": هضا شنوو
رتاج بِ "همس": خ خالد سامحني و
خالد بِ" عياط": معقوله اديري هكي نحنا حاطين فيك الثقه تي كيففففففففف
_ صوت خالد اسمعه الكل وجو على اثررالصوت اما رتاج قعدت مصبيه مكانها ومش عارفه شن تقول من الصدمه
فوزيه" بِ خوف": شن في كنك تعيط
يسرا" وفهمت الى صار": وحد الله بس
معتصم" بِ شك"كنك احكي
خالد" بدموعه": تكلم في صاحبي وجارنا طيحت قدرنا صاحبي يا باتي صاحبي صاحبي يا رتاج معقوله اهه
رتاج بِ "ندم ودموع":سامحني مش ب يدي
_ قعمز خالد على الأرض بِ نهيار ويبكي زي الطفل اول ما سمع صوت رتاج هجم عليها بس باته مسكه
معتصم" بِ جمود":، خالد وقف رد بالك اتمد يدك عليها طول ما انا حي ونا نصرف اطلع توا الناس بدو يجو واحسابي معاك يا رتاج بعدين
فوزيه "بِ دموع": عليش هكي عليش تقهري فينا
يسرا: اهدي يا ماما توا كله ينحل
_طلع معتصم وخذاه معاه خالد وخشت رتاج للدار بكت لين هدت وسلمت امراها لله وغسلت وجهها وطلعت للمطبخ
يسرا: انتِ كويسه
رتاج: الحمدالله على كل حال في حد جاء
يسرا: اها بدن يجن وقاعده نوتي في القهوه
رتاج : هاتي نساعدك في تستيفت الحلويات
يسرا "بِ استغراب": انتِ مش خايفه من قرارات بابا
رتاج: خلاص معش في اي حل الى يبيه هوا يديرها 💔
يسرا: قصدك الى يبيها ربي وكلى امرك لله بس
رتاج: ونعم بالله
يسرا: عدي سلمي على السريع وتعالى قدمي
رتاج: حاضر
_ سلمت رتاج وقدمت الضيافه واول ماخشت الصبايا قعدن يتهامسن عليها على حظورها وجمالها الى لفتهن وقعدت حديث المه الى تبي تخطبها والى مستغربه فيها ووو
يسرا: توجي شوفي الباب يدق
رتاج: به
_ رتاج.. فتحت الباب وخشت غزاله حضنتها ونزلن ادموعي
غزاله "بِ خوف": شن صاير
رتاج : خشي اسلحي عبايتك وتوا نحكيلك
_قعمزت غزاله في المطبخ مع رتاج وحكتلها الى صار
غزاله: بس لو انتِ تبي اسماعيل خليك مصره عليه لين يملو ويعطوك له
رتاج: تعبت انا
غزاله: معلش تحملى هضا هوا الحب نار في نار
_ غيرت رتاج الموضوع وهدرزن وكملن اضايفه وبعد المغرب كل الصبايا روحهن بما فيهن غزاله وضمت يسرا ورتاج الحوش
رتاج "والخوف بدا يتسلل لِ قلبها": بابا قريب يخش كملت صلاه العشاء
يسرا: اها انتِ تأسفيله وقولي معش نعاودها وخلاص معش تكلميه لو فيه خير توا يكون نصيبك
رتاج: به
_ قطع حديثهن خشت معتصم ووراه خالد 🔥وطلعت فوزيه
معتصم" بِ جمود": تعالو قعمزو في الصاله كلكم نبيكم تكونو حاضرين
_ قعمز الكل وقعمز معتصم مقابل رتاج الى دموعها ماجفنش ونزلات زي خط المطر على خدها الوردي
معتصم : اسمعي يا رتاج هوا اليوم طلبك مني اخره والمره هذ قتله نأخذ شورها قبل
رتاج "بِ بصيص امل" : بابا سامحني و
معتصم: خليني نكمل كلامي اسمعي لو تبيه نعطيك له لكن تقبليه بيه بِ خيره وشره ومتجينيش تشكي منه انا مش موافق عليه لكن الى تبيه خوذيه انا حطيت فيك ثقه وخنتيها ومش ه نخليه اكثر من هك عندك خيارين العريس الى حكيتلك عليه في الصبح هضا لو تاخذيه يعيشك اميره والثاني الى تبيه وانا نبي مصلحتك بكرا الصبح تعطيني قرارك
رتاج "وفقدت الأمل وبِ استعجال": موافقه على الى حكيتلى عليه في الصبح
معتصم بِ فرحه : ايوا هذ بنتي الى نعرفها
فوزيه: لوووووولى
رتاج" بِ دموع": بابا وخالد سامحوني
خالد &معتصم: مسامحينك مدام عرفتي مصلحتك
_ رتاج... اخترت رضاء بابا وسيبت اول حب ليا لان حسيت المشاكل كثرن ونا ضعيفه منقدرش انتحمل ومنقدرش نعصي بابا اكيد هما يعرفو مصلحتي صالحتهم وخشيت لِ داري بكيت" وقلت وانكسر قلبي"وقريت قرأن لين تريحت ودعيت الى فيها الخير ربي يقدمها 💔وخشيت لى سريري واستسلمت للنوم
___________________
_ ناضت رتاج وهيا مقرره تنسى اسماعيل وتبدا في حياه جديده مع نصيبها(عامر) غسلت وجهها وتوضت وادت صلاتها ك العاده وطلعت وهيا رتاج الجديده الى متحمسه المستقبلها لقت هلها يفطرو
رتاج "بِ ابتسامه": صباح الخير
الكل: صباح النور
معتصم: تعالى بنتي الغاليه العاقله قعمزي جنبي وافطري
رتاج:حاضر
_ قعمزت رتاج وهيا مبتسمه
معتصم: دزيت رساله لِ عامر وقتله على الموافقه قالى العشيه يجي يدير مقابله شرعيه
رتاج "بِ هدوء": الى فيها الخير يجيبها ربي
_ فطرت رتاج وناضت ضمت الحوش ودارت الغذاء ووتت حاجات الضيافه للمقابله وحطو تغدو وضمت الحوسه ومع ال 5 جأء عامر وخشوه للمربوعه
فوزيه" بِ فرحه" : هي اطلعي قالك باتك
رتاج "بِ ارتباك": يسرا امتى تجي
فوزيه: قالت في الطريق جايه هي خشي
رتاج: حاضر
_ رتاج.. كنت لابسه سروال امريكي وبلوزه وطلقت شعري على طوله ولبست محرمه صلاه وكان نصه باين لان طويل وخشيت للمربوعه ونا نرجف قلت السلام عليكم ورد السلام ابتسملى بابا وطلع وقعمزت بعده بِ كنبه
عامر" بِ اعجاب ": مشاءالله مشاء الله ربي يحفظك
رتاج "بِ خجل": ويحفظك
عامر في محاوله تلطيف الجو: انا اسمي عامر مواليد 1988 متخرج من اقتصاد ونشتغل تأجر ذهب وعندي محل ال .. في سوق الجريد والحق شفتك مره من سنتين ومن يومها وانتِ سكنتي في عقلي وقلبي بس معش جيتي ومعرفتش كيف نووصلك وو
_ حس عامر بأن رتاج تسمعله بِ فضول
عامر "بِ منابشه": نكمل ولا مليتي
رتاج "بِ طفوله" : لا كمل كمل
عامر : خلاص من فتره شفت باتك مخطم من الشارع لحقته وعرفت حوشكم وحكيت معاه وخذيت رقمه وطلبتك منه
رتاج" بِ فضول": وكيف عرفت ان مش مخطوبه لا متزوجه
عامر: قلبي قالى وان شاءالله نكون عجبتك وتوافقي عليا بعد للمقابله ممكن تعرفيني على روحك
رتاج بِ راحه:، انا رتاج مواليد 1993 نقرا ثالثه ثانوي وبس
عامر" بِ ضحكه': احلى رتاج في الكون خليك متأكده لو وافقتي مش ه نخليك تندمي وه نعيشك اميره
رتاج : إن شاءالله خير
عامر: به هي نوضي خشي خير مايقول باتك هضا ماصدق لزق عندنا
رتاج "بِ ضحكه" : هههههه به
عامر" بِ حب" : ووافقي عليا راه قلبي يموت
_رتاج.. شفتله بِ احراج وطلعت بجد انسان يهبل واضح عليه ان يحبني وعجبتني خفت دمه وتواضعه يخش للقلب طول خشيت وسالتني ماما وقالتلها كويس وسالني بابا وقتله موافقه عليه وتوكلت على الله وجت يسرا
يسرا "بِ صدمه ": متاكده انك تبيه
رتاج: خلاص هوا يبيني وعاجب بابا انا موافقه لو فيه الخير ربي يكمل علينا لو هوا شر ربي يبعده
يسرا: واسماعيل به
رتاج" بِ غصه": مش نصيبي ربي يرزقه بِ بنت الحلال الى تستاهل طيبه قلبه وعقله
يسرا: يارب ويصبركم وينسيكم بعضكم
رتاج: يارب يارب
__________________________
يتبع....
ب قلم : #منى_المجبري
ومسموح ب نقل الروايه ب وجود اسمي❤
متابعه للايميل منى المجبري او روايات منى المجبري او واتباد munaalmajbry ، .،❤بقق لووف ليكم