#اغتصاب_ارواح(#منى_المجبري)
#PART22
______________________
_مها .... كملت حوستي وطلبت مهندكثر من مره بس مردش مش من عوايده خفت عليه ونزلت لقيته واقف يدخن قدام شقتهم
مها بٍ خوف : مهند شن صايرلك
_التفت مهند وعيونه حمر
مهند:مش صاير شئ
مها: كنك ماترد
مهند بِ جمود : نعسان معندش نيه نحكي مع حد
_مها... قعدت مصبيه مصدومه من رده شافلي بِ نظره غريبه وخش وسكر الباب ركبت للشقه ودموعي على خدي💔
__________________
"ثاني يوم الصبح"
ربيع وهوا دوبا فاتح اعيونه: صباح الورد
رنيم بِ ابتسامه : صباح الخير
ربيع : كنك لابسه هك ؟
رنيم: جلابيه كنك
ربيع : ضيقه راه
رنيم بٍ تنهد : اوسع حاجه عندي هيا الى مغطيه بطني بدت تطلع راه
ربيع بِ تفكير : والحل بطنك في البدايه وهكي يبال كم شهر اخره
رنيم بٍ فكره : لازم نطلعو لين ما انجيب وماحتي عمتى ه تحسب وهكي
ربيع : كيف نطلعو؟
رنيم : نأجرو برا
ربيع : بس حتى لو أجرنا ه نجوها وتجينا لازم نسافرو
رنيم بٍ صدمه : نسافرو ومن ويلك الفلوس انت
ربيع : ههههههه او نوهموهم بٍ اننا مسافرين
رنيم بٍ حيره: كيف
ربيع : نقولو مسافرين تركيا عندي شغل وهكي وسنتين ونردو فهمتي وفي الأصل نحنا قاعدين مأجرين في بنغازي ونكملوالجامعه تمشئ بِ خيمار طبعا بيش محد يفطن لين تجيبي ويمر كم شهر ونطلعو كأن ردين من تركيا فهمتي
رنيم بٍ اعجاب: لانقنك خطير
ربيع : هههههه به هي نطلعو ونفتحولهم الموضوع
رنيم : هي حبيبي
_طلع ربيع ووراه رنيم
فاطمه بِ فرحه : هلا هلا بِ العرسان
رنيم بِ ابتسامه: هلا بيك عمتى
رواسي بِ حب: قعمزو توا ب نحطو الصفره
ربيع : بعدك جعان
_ ابتسمت رواسي وجابت الصفره كلو وبعد كملو جابت رواسي طاسه الشاي وفتحو المواضيع المختلفه
ربيع : في موضوع مهم بِ نفتحه قبل نسيت
رواسي بِ فضول : شن في
فاطمه : اسكتي انتِ شن في يا ربيع
ربيع :جاني شغل في تركيا والحق من زمان نجري عليه ه ناخذ رنيم ونمشو
فاطمه بِ صدمه: وامتى مروح
ربيع : مرات سنتين ونرد
رواسي بِ دموع: امتى ماشي
ربيع بِ حب: متبكش كل يوم ه نكلمك متخفش وادعيلى ربي يفتحها في وجيي، اليوم الليل الطياره
فاطمه : معقوله هكي شكلك من زمان منسق
ربيع بِ كذب مابتش نحكي لين يصير من الموضوع يا امي
فاطمه : ربي يفرجهها عليك ورد بالك عليه يا رنيم
رنيم : حاضر عمتي
ربيع : أمشئ قولى ل هلك بيش نمشولهم توا تسلمي ونطلعو منهم للمطار
رنيم : إن شاءالله
_ ناضت ربيع طلع يسخن السياره وخشت رنيم وتت الشناطي وكلمت مها الى ردت بعد رابع رنه
مها بِ صوت تاعب: الو
رنيم: هلا مهاوي شن جو
مها :، تمام حبيبيتي شن جوك وجو راجلك
رنيم : الحمدالله اسمعي رانا جاينكم توا
مها بِ خوف : شن في
رنيم : مفش إلا الخير توا نوصل ونقوللكم سلام توا
مها بٍ فضول : سلام
_سكرت رنيم الخط وطلعت سلمت على هل ربيع وطلعت لِ ربيع ومشو لِ بنغازي
____________________
_مها... حولت ننسه مهند الى متجاهلني وبديت انضم في الحوش ونجهز فيه لِ جيت رنيم
انشراح : كنك حايسه
مها : حيي نسيت نقولك راه رنيم جايه
انشراح بِ شهقه : حي عليا شن صار و
مها : وسعيي بالك مفش شئ قالت جايه مع راجلها توا تجي ونعرفو
انشراح بِ خوف : خير ان شاءالله امتى كلماتك هيا
مها : من ساعه هك غير نسيت نقولك اكيد قريب يوصلو
انشراح : وهذ حاجه تتنتسه ربي يسامحك وخلاص
مها: و
_ قطع عليهم صوت دق الباب طلعت مها فتحت وخشت رنيم وراجلها وسلمو وقعمزو
انشراح بِ استغراب: في حاجه غريبه جيتكم الحق
رنيم بِ ابتسامه : مفش شئ غير بِ نسافرو لِ تركيا اليوم في ليل وقلت نسلم عليكم
مها بِ فرحه : به تغيرو جو حلو شهر العسل في تركيا
ربيع بِ ضحكه: لا الحق مش شهر عسل انا جايني شغل غادي
انشراح بِ خوف : وكم مدته الشغل؟
رنيم بِ غصه : سنتين ممكن
انشراح بِ دموع : معقوله منشوفش بنتي سنتين
ربيع بِ هدوء: الله غالب شغل جاني ولازم نمشي في نت توا تحكو فيديو
_ناضت رنيم حضنت امها وبكت وحاولت تهديها وسلمت على خواتها وودعتهن وطلعو 💔
ربيع : كنك قالبه وجك
رنيم بِ حزن : مش قالبه وجي بس مش متعوده على فراق هلى
ربيع : توا مع الايام تعودي لازم نغطو الغلطه
رنيم: إن شاءالله ، وين نمشو توا
ربيع : حصلت ايجأر شقه بِ 350 وحصلت شغل في مول الراتب 750 تم تكملى قرايتك لين تجييي
رنيم بِ تنهيده: ربي يساعدنا
ربيع : إن شاءالله
_رنيم.. حسيت بِ كسره اول مره نبعد على على هكي وصلنا للشقه او بِ الاصح استيديو صغير رفعت شعري ولبست توته ودرت برمه عليها بعدها رقدت ونا ميته نوم الحمل جايني على النوم
_______🖤روايات منى المجبري🖤 ________
_رواسي... خشيت في ليل مع الساعه 1 للدار طلعت التلفون ولقيت لمياء رانه عليا عاودت اتصلت بيها وطولت ماردت
لمياء وصوت دوشه جنبها: الو رواسي شن جوك
رواسي: اهلا حبيبتي بخير وانتِ
لمياء: جو يهبل وين معش شفناك
رواسي بٍ تهرب: معش جت فرصه
لمياء : غير بطلى جو الكئابه وتعالى قاعدين في للمدرسه شوي ونطلعو وجايبه معاي دبش احتياطي هي تعالى
رواسي بِ خوف : لالا معندش نيه
لمياء: تي تعالى راه نجي انا ومحمد ناخذك هي تغيري جوك شويا حفله بسيطه اليوم راه
رواسي بِ اقتناع : به هي نحط العبايه ونجيكم
_ رواسي.. حسيت بانئ مكسده ومكتئبه ومفش حد مقدرني وذكرت الايام الى مشيتلهم فيهن وكيف الكل انبهر بيا قررت نمشي لبست العبايه وطلعت من الروشن وصلت وخشيت والجو كاين زي العاده لقيت لمياء خذتني ودارتلى المكياج ولبست قفطان من قفاطينها وطلعت جت عيني في عين محمد شافلى بِ نظره غريبه وقرب مني وحضني
محمد بِ انبهار: اوو حبي المكان نور بيك
رواسي بِ ضيق : محمد لو سمحت حول من عليا
محمد بِ قهر : معش تحبيني صاح
رواسي بِ ضعف : نحبك بس منحبش افعالكك
محمد : به حطي عباتك وتعالى معايا بِ نمشو للاستراحه توا
رواسي : به
_ طلعو ووصلو للاستراحه ونزلت رواسي مع محمد وخذوه طاوله قعمزو عليا
محمد وهوا يمد في شيشه: اشربي وسكي
رواسي بِ خوف : لا لا منبش
محمد وهوا يشرب: براحتك
رواسي بِ تسأل: محمد شن نهايه علاقتنا
محمد بِ ضحكه : هههههه شن تبيها انتٍ
رواسي : سعيده اكيد بس انت شن تقول النهايه
محمد : نهايتنا مهمشه اكيد
رواسي بِ استغراب : كيف يعني
محمد بِ ضحكه : هههههه انا بروحي مش عارف مع الايام نعرفو
_رواسي... من القهر بتاعي مسكت الشيشه الى قدامي وشربتها وشوي شوي بدا المفعول يطلع عليا وقعدت نضحك بصوت عالى ونضرب في محمد زي المجنونه ومن التعب وقوته عليا رقدت ونضت بعد ساعتين وراسي مصدع لقيت محمد ولمياء جنبي وفي دار كبيره لونها احمر وغريبه
رواسي بِ حيره وصوداع : ا انا وين شن صار
محمد بِ تنهيده: انتِ مش قد ه ليش تشربيه
لمياء: انتِ في امان ماتخفش كل الى صار شربتي وماتحملتش ودرتي حركات مهابيل ورقدتي ممكن صار هكي عشان اول مره خلاص خذاك محمد وشربك قهوه ب الغصب وتوا صحصحتي
رواسي بٍ دموع : اسفه تعبتكم ساعه كم توا
محمد :5 ونص
رواسي بِ شهقه: حي عليا شويا وينوضو
_ ناضت رواسي بس اختل توازنها وطاحت
رواسي بِ دموع : أي راسي توجع فيا وبنتي يعع
محمد : هاكي باندول وتوا نوصلك انا
_رواسي.... خذيت اابنادول ووقفني محمد سندني لين طلعني للسياره ووصلني للحوش وخششني من الرواشن خشيت دوشت ونا دايخه ودسيت دبش لمياء ولبست توتي وطحت رقدت 💔
________🖤روايات منى المجبري🖤________
"تسريع الاحداث"
"بعد مرور 3 شهور "
_مهن مهند مصبي في المطبخ جنب سدينه
سدينه : شن رايك بكرا نحددو موعد العرس خلاص عاد شوف لك كم تبيها مها
مهند بِ عصبيه : لا يا امي معش نبيها
سدينه بِ شهقه : ليش شن صار
مهند بِ غصه : مصار شئ بس اركبي وقوليلهم الدنيا نصيب ونا ومها مش لِ بعضنا
سدينه : معقوله هكي كنت ه تنكلب عليها شن غير رائيك
مهند : امي الى عندي قلته معش نبي نزوج وفضي القصه
سدينه : به به
_ طلعت سدينه لِ انشراح وقعمز مهند يبكي زي الطفل الى خذوه منه لعبته🖤
_______________________
_مها... قعدت نفكر ليا 3 شهور نحاول نفهم مهند كنه متغير بس مابش يحكيلي ويتجاهل فيا تلفونه طول اليوم مقفل ومكملها طلوع مع لصحابه اهمالني بكل وجعني خاطري كنت كل يوم نرقد نبكي معقوله الى يحب ينسه محبوبه قطع تفكيري دقه الباب نضت فتحت لقيتها عمتى سدينه ووجها مايبشر بالخير
مها : تفضلى عمتي خشي
سدينه : كيف حالك وحال امك وخواتك
مها بِ ارتباك : الحمدالله بِ خير اهي ماما جت
انشراح بِ فرحه : خيرات زارتنا البركه
سدينه : سلمك سلمك انا جايه نقوللكم موضوع ومهما صار نحنا هل والدنيا نصيب
انشراح بِ خوف : خير ان شاءالله شن في
سدينه بِ ارتباك : راه مهند قال معش يبي مها ويشهد عليا ربي حاولت نعرف كنه مابش يقول والدنيا نصيب وتوا يجيها نصيبها
مها بِ شهقه ودموع : ك ك كيف هوا يحبني لالا كيفف
انشراح بِ هدوء:، الحمدالله على كل حال وهي قولتك نصيب
سدينه بِ حزن على شكل مها : انا توا نازله واسفين ماتزعلش روحك مها اكيد ربي كاتبلك الاحسن
_ نزلت سدينه وحضنت انشراح مها وقعدت تهدي فيها💔
مها بِ دموع : شن درتله ليش دار فيا هكي.
______________________
يتبع..
ب قلم : #منى_المجبري
ومسموح ب نقل الروايه ب وجود اسمي❤
متابعه للايميل منى المجبري او روايات منى المجبري او واتباد munaalmajbry ، .،❤بقق لووف ليكم