البارت 37
رواية...جولييت واسرها...غياهب الإنتقام
بقلمي...نور سمو العراق...
💔💔💔💔💔💔💔💔💔💔
اريدن هيج حار وياي ملكَاك…
مثل ملكَه جهنم لليكفرون
..............................................
ريهام...
اكو شخص تحترمه لأن هو محترم واكو شخص تحترمه لأن انت محترم ..
والله بالنسبه اليه محترمه الكل ان كان محترم او لا بس نوال طغت وتفرعنت وهماتين ما ردت افضحها
بس اني خجوله كدام ولد عمي وخاصه جاسر لان هو الكبير والامر الناهي بالبيت
اني شفتها تتلفت اول ما دخلت المطبخ شفتها دارت الملح كوله بخبث علئ الشوربه ...
محجيت اني ما ردت اسوي مشكله كلت بلكي جولي تحلها هي،وزوجها بس تفاجئت من استدعاني ابو غزل وطلب مني اعترف ...
اني أحمد الله واشكره علئ صلاح ما فديوم خشن خاطري ولا هضمني ...والحمد لله اني كوولش،محترمه وياه..
جعفر ما قصر لزم نوال سكطها تسكط وهي ما شاء الله لسانها محد يلحك عليه تغلط وتفشر علئ جعفر
ومن طردها انهزمت الغرفتها ومدت راسها من الشباك وهي تصيح بسيطه ابو العرك ابو النسوان اله اندمك
عاد هو شمر حذائه عليها اجت بالحديد مالت الشباك سدت الشباك ورجعت فتحته
باوعتلي كالت...الله ينتقم منج يا عياره ان شاء الله بنار جهنم حركتي كلبي الله يحرك كلبج مسويه روحها متدينه امداج امده العلمج الدين
جعفر عض ايده بقهر كلها.. كون القندره جايه علئ حلكج والله اله اطلع الفلر من اذانج
دخل صلاح شاف البيت خبصه وجاسر راح الغرفته كون صاحي اله سحلها وشمرها بالشارع
صلاح بعصبية . شكووو انت ما تمل نهار كله تتعارك ويه مرتك
جعفر بتفاجئ...منووو مرتي وجهه الطاوه ؟ّّّ.. غم روحه. امداني اذا اعترفت بنويله مرتي
خالتي كلتله بقهر. .هسه شبيك وياها هسه هي مو تحلف دكول ما مخليه ملح انت ليش تضربها حرام عليك كلشي وذبيتوا براسها يجوز ذيج مخليه ملح هواي انتم مو كل مصيبه خليتوها براسها وتكضها تكطعها تكطع
حط ايده باستنكار كدام وجهه امه. رجاءا يمه لا ادافعين لنويله اني ومرتي ما احب واحد يتدخل بينه احترموا خصوصيتنا
هي عاطت من الشباك...خصوصيتك ولك ابو العرك تذكرني بس بالكتل ان شاء الله الله ينتقم منك وتلحك اخوووك بحق الحسين الشهيد
عاد هو هجم عليها ولزمته امه وصلاح
هي صاحت بصوت عالي وتصرخ وتبجي. خويه صلاح كله من وره مرتك مصاحبه ذيج اخت المجرم واتفقت عليه هي وياها وشهدت ضدي تقبلها...
خالتي عاطت بيها..كافي ولج الله يصخم وجهج شلون تدعين علئ جعفر
ردت بغضب. كون الله ماخذه ومخلي فلاح
جعفر بتذمر...لا والله كون الله ماخذج انتي،ومزوجين فلاح هم خلصانين منج وهم فرحانين بعرس اخونه
هو انتي لو بيج خير ما عافج الطير وصدك لو كالو الاغم ما يموت
نوال. اي ما تشوف روحك ما متت
جعفر. اني ضال حتئ اكسر راسج من تروحين فدوه لوجهه الطاوه...
صلاح ضل يصيح وطرد جعفر الغرفته وعاط بيها سدت الشباك وراحت انوب اشو هذا ضل يحجي عليه ويرزل بيه
صدك انقهرت وخليت ورحت الفرفتي والنار تسعر بصدري اخر شئ جنت أتوقعه صلاح يرزلني كدام الكل.
دخلت بسرعه للحمام اريد اطفي النار البيه مكدرت كتمت عبرتي وغسلت وجهي اكثر من مره.
توضيت بسرعه وطلعت فرشت السجادة كلت خلي اصلي ركعتين بلكي اهدئ شويه
ما متعلمه احد يرزلني كوولش انهضمت.
حسيت بي،دخل للغرفه ضليت اصلي بس،احس بريحة الدخان تداعب بخشمي اختنكت كملت صلاه ودرت وجهي عليه شفته متمدد علئ الجربايه ويدخن...
تنهدت بضيق ولفيت السجاده ةالعبايه دا اضمهن هو ضل يباوعلي وملامح الجمود مستوطنه وجهه
همست بصعوبه. صلاح اني اسفه مو قصدي اضوجك ولا احب اتدخل واتطفل بس والله جاسر جبرني
عدلت كاعدته وباوعلي وهو عاقد حواجبه كال. اني من اول ليلة بينه وصيتج لو تحترك الامه بهذا البيت لا تتدخلين وانتي انسانه متدينه ما توقعتج تفتنين بهيج موقف...
حسيت رماني بسهم مو حجه ويايه اني صايره كولش حساسه من الحمل ما اعرف شنو
تعصبت بسرعه كتله بصدمه. هيج ضنك بيه عندك اني منافقه وفتانه دا اكولك مجرد شهدت بالحق والساكت عن الحق شيطان اخرس
رد بعدم اهتمام...ديله كااافي
رجفت شفايفي بقهر والدمعه تلئلئت بعيني خليت ورحت دخلت للحمام اريد اسيطر علئ دموعي ما اكدر...
هو دك الباب كال...رهومه حبيبتي اطلعي ما قصدي اجرحج والله بس هاي نوال تدعي وتحط نفسها ما اريدها تاذيج والله خايف عليج لا اكثر ولا اقل
بلعت ريكي ورديت بخفوت...مابيه شئ صلاح هسه اسبح واطلع
هو ضل يحجي ويايه واني طمنته ضليت كاعده شويه بالحمام حسيت ملابسي تدمرت دم
رفعت ثوبي شفت الدم مأخذ مسار علئ رجلي انرعبت بخووف وقهر
وطلعت اركض وملهوفه لكيته ماكوو طلعت بره شفت جولي دتنضف بالمطبخ تقربت منها واني لازمه بطني ومنهاره بالبجي...جولي دا انزف
جولييت...
هي كالت دا انزف واني انتفض جسمي،لزمتها كعدتها علئ الكرسي. كولي،يالله حبيبتي لا تخافين خلي اروح اصيح ماما رضيه ...
طلعت واني الطم علئ خدي علئ كيف اول مدخلت لكيت نوال كاعده يم ماما رضيه وخالتي ودكولهن....اني اكرهه الجولييت اي،وصدك اني خليت الملح بالجدر لان اريد اسويلها مشاكل انتن ما تعرفن شسوت بيه
جرت نفس رضيه وضربت ايدها بصبر...شسوت ؟
ردت بتمسكن من انتن جنتن بالعرس هي لكيتها داخلة بغرفة جعفر الله اعلم شنو جانت تسوي،وياه
خالتي بغضب...صدك تحجين لو تجذبين والله موتينه صدكج من جذبج ما عرفناه
نوال. وروح فلاح وداعة بناتي ما اجذب هي مراحه حتئ إسألي هاله شافتهه بعينها ولا تنسين هي شلون اخذت خطيب هاله منها وشلون قشمرت جاسر وتزوجته.
خالتي كالت...خوووش بس جاسر يصير زين اسولف اله عن سوالفها ..
دخلت اني بقهر. علئ شنو دكوليله ترئ،حرام عليكم تسمعون من طرف واحد وهسه هي تشوه بسمعتي وتحجي عني، وهي عندها بنات ما خافت ينطعنن
اني صح جنت بغرفة جابر بس والله وداعة ابويه دخلته لغرفته لان جان سكران ويهلوس وخفت علئ جاسر يسمعه ويجي يضربه ويتاذون وحتئ اسالوا
وبعدين انتم تعرفون كوولش زين بحياتي ما كعدت وياهم وسولفت وياهم...
خالتي،ام فلاح غلست ورضيه كالت ..اي والله ابد ما عندج ميانه وياها
نوال...اي ام خنيس من جوه الجوه
سكتت مجاوبتها علاج الجاهل التجاهل...وبعدها صحت لماما رضيه
طلعت بره كلتلها ماما رهومه تنزف عاد هي تخبلت وركضت عليه لكتها بالمطبخ لوجهه اصفر مثل الليمونه وكوه فاتحه عيونها...
لزمتها بخوف. يمه رهوومه يمه شبيج كومي البسي خلي ناخذج للدكتوره
همست بتعب...اااه ماما ما اكدر احس رجليه ماتت ما اكدر اكووم
صدك نريد نوكفها علئ رجليها ما كدرنه
عاد ماما تخبلت بسرعه ركضت خابرت علئ صلاح وهو بين ما بدلنه الها تصدر الغرفه
تقدم بخطوات سريعه واخذ ايدها الناعمه بين كفوف ايده الخشنه وبلعت ريقه بقلب نازف. ريهام شبييج شنو اليوجع
همست بتعب. ما ااعرف
مسح علئ جبينها العركان وبلع ريكه بقلق. ولج لا تخوني والله حتئ ما كدرت اسوق اديه ترعش ادري ضوجتج وجنت قاسي وياج بس تعرفين شكد احببج
هزيت راسها بذبول واشاحت بعيونها البريئه
هو شالها بين اديه مثل طفله هزيله وهو يرجف بصوره مو طبيعيه و وجهه محتقن عرفت هو شكد يحب ريهام الله يشفيها ويطول بعمرها..
اخذوها للمستشفئ،هو وامه وماما رضيه بس عود خالتي كطعت روحها تكطع عليها هي تموت علئ ريهام ...
ولو هو منو ميحب رهووومه ...
خطيه ريهام مريضه وصلاح مثل المجنون محتار شيسوي هي الكل منتبع عليها الصفار محاوط وجهه
طلعت نوال وهي تباوع وتتمضحك وتبتسم كالت. اوووف حوبتي ما تنزل للكاع
هزيت ايدي ورحت دخلت للغرفه لكيت جاسر نايم والاطفال يلعبون بالكاع مرتضئ ما شاء الله دكول داخل سباق للجري السريع محد يلحكه
ومجتبئ سوده عليه يريد يصير نفسه يجر بروحه جر وما يكدر بس يحاول ...
حزنت عليع ابتسمت ببتسامه مقتوله حطيت ايدي علئ ضهرها وساعدته يوكف كعدت علئ ركبي واني امشي بي
ضحك واني،اباوع لمرتضئ بشماته. علئ عنادك شوف الحلو مجتبئ يمشي
اوووي يعمري انته...هو خطيه لازم اديه ويضحك ويمشي علئ اطرف اصابعه اجه مرتضئ بسرعه وهو يزحف وشمر روحهه بحضني...
ومجتبئ يضرب بي وهو يغرد...دد دا بب ننه
مدري شنو يكول طلاسم مدري شنوو
باوعت الجاسر وهو باوعلي فرك وجهه بتوتر كال...شبيج انتي و ولدج خابصه الامه ترئ،مريض ما تعرفين بشروط زيارة المريض ممنوع اصطحاب الاطفال
عدلت كعدتي واني حاضنه مجتبئ. .والله اشو بس انت هيج اني شايفه المريض يصير فقير وحباب اشو انت عكس العالم...
جر نفس ....مو العالم الوياي مطفيه فلازم اوضح الهم ذاك اليوم انطيتج كورس بتعليم البوس للمريض واليوم اعلمج عدم اصطحاب الاطفال حتئ واحد ياخذ راحته
باوعتله ببراءه...خويه لعد وين اوديهم رجلي مسافر السوريا ومحرمني علئ نفسه وين انطي وجهي
رفع حاجب.. افااا مسافر ومحرمج واني اخووج هاي شلج بيها ...مو كلج راح نبدي صفحه جديده.
ضحكت...وبعدها رحت كعدت يمه تسللت ايده ولمس خصري بحنان
جريت نفس،بخوف وهمست...جاسر اريد اكولك فد شغله بس اريد تفهمني للاخير وتحلف يروح ابوك لا تحجي ويايه وتضربني،ولا ويه غيري
عقد حواجبه باستغراب كال....اي احجي تشوفيني مال ضرب هسه اكيد ما اضربج بس اذا غلطانه احاسبج ما بيه شئ
عضيت شفايفي ببراءه...والله مغلطانه بس هاي نوال ما اعرف شبيها ويايه والله من قبل لا اخويه يكتل فلاح من يوم الخطبه وهي كاهرتني
حرك اصبعه علئ شفايفي بذوبان وركز عليهن حسيت ماعت روحي عكسه هو الي ثاق من نفسه
كال ببرود...اي اعرف ام مرتضئ اني من كلت اريد اخطب جولييت بنت خالتي ام عاصم هي انتفضت وكالت لا صغيره وطفله وما تفهم
بلعت ريكي،بخجل وخوف ولزمت ايده...زين ليش هيج تتصرف ويايه
ابتعد عني شويه وسحب جكاره ديدخن سحبته منه باستنكار....لا تدخن مو زين والله
كسرها وشمرها علئ الارض
سحبني اله وحط ايده علئ كتفي كال. ... غيره تعرفين الوحده من تغار شتسوي مثلا عندج اخوة يوسف بسبب غيرتهم بهذلوا اخوهم...
جانت تضن نفسها هي،ملكة جمال الكون والكل يكول عنها حلوه وهي شايفتج فاكيد ما حبت تجي وحده تنافسها بالجمال ما تشوفيها كامت تشد وتمط
ضحكت ...منو احلئ اني لو هي
رفع راسي باصابعه...انتي اكيييد هي،بيش الكيلو حرام تقارنيها بيج
هزيت راسي ببتسامه....لا اكيد ما اقارن بس ردت اشوف ردك وردت اسمعها منك
ابتسم وضمني اكثر الصدره
تنهدت بضيق...بس جاسر مال تتهمني نوال هاي صعبه والله ما اكدر اتحمل هييج
استغرب كال...اتهمتج بشنو؟
جريت نفس ...ذاك اليوم بعرس وقار اجه جعفر سكرات بس النبي عليك لا تحجي وياه ولا تضربه والله حقه اذا متزوج وجهه الطاوه واحد غيره يشرب زرنيخ مو خمر
ضحك وضربني علئ خدي علئ كيف كال...هو جعفر من قبل نوال هاي سوالفه بس بسيطه اله اخلي صلاح يطيح حضه هسه اني ما اكدر...
جريت نفس عميق...اي اني من شفت جعفر سكران بسرعه اخذته الغرفته كلت اخاف تشوفه وتتعصب واجت نوال وهاله شافني وهسه تحجي لخالتي دكولها عوود اني عندي علاقه ويه جعفر
هو انتفض من مكانه وتخبل احس دخلن ضل يطلع من وجهه كال....لا ياااا ادبسز يا حيووانه وحق الله اذا ما زوجت جعفر عليها وخليتها تدك براسها
بسيطه بسيييطه هاي تفرعنت هووواي امي ما لطمتها علئ حلكها هل تافهه هاي والله اذا ما ندمتها ما اطلع جاسر
لزمت ايده برعب. ونبي جاسر اني ابببد ما عندي شئ ويه جعفر وحتئ هو حتئ ما يباوع بوجهي ويحب وحده اسمها شهوده بس هي ليش تتهمني
وخالتي مكيفه عليها بس،ماما رضيه ما رضت عليها وكالت الها جولي حبابه ما عندها هيج سوالف
هز راسه بوعييد ...هييين ان شاء الله بس خلي افتح ازرار العمليه واني اعرف شلون اتصرف وياها
بسته بخده بفرح ....شكرا والله مراح انسالك هل معروف تستاهل كلاص حليب دافي من اديه
لزم اديه وقربني منه...يا دفوو ولج ما ادفه اله بالاحضان وبعدين حلات الدفوا بهيج حضن...
ابتسمت بمرح ...احسك متغير انت تحبني ؟
باوع لعيوني وجر نفس باسني بجبيني ومجاوب
سكتت بس انقهرت منه رجعت سالته...لحد الان تتذكر شاف
تنهد بهدوء كال...ما نسيتها حتئ اتذكرها
بلغت ريكي بغصه...تحبها:؟
باوعلي بغموض وديحجي وما اسمع اله واحد من الاطفال انشحطت باوعت عليهم وركضت شفت مجتبئ مشحوط ويكح ويسعل
تخبلت حسيت اكو شئ بداخل حلكه مديت ايدي بحلكه ولكيته عالس الجكاره بحلكه
هو جاسر كال بقلق ورعب...شبي احجي
رديت عليه بتوتر وغضب.. ماكل الجكاره الي انت شمرتها عفيه عليك ابو مرتضئ علم ولدك علئ الجكاير خليهم يستهترون
عدل كعدته كال...انجبي لج شنو اني مستهتر
ابتسمت...لا حشاك اني مستهتره واشرب جكاير
رد بسرعه ...تعالي،لج تعاي
اجيت بتردد و وكفت بعيد منه ...شكوو شحجيت
رفع حاجب...لا والله خايفه مهزومه مترتين لو تخافين ما تغردين من كيفج
رديت باستنكار...ترئ محجيت شئ انت نفسيه ومتحب غير نفسك
اشرلي..دتعالي ليش خايفه ما احاجيج والله
اجيت وكفت بصفه كال...عيدي بالله شنو كلتي
جاوبته باستنكار...ترئ مكلت شئ شدعوه انت تاخذ علئ نفسك ما اقصدك قابل بس انت تدخن حتئ اني ادخن هذا قصدي
سحبني وكعدني بصفه عضني،بخدي حيل كال .من شوكت تدخنين ولج
عطت بوجع ولزمت خدي...اوووي توجع هي مره وحده شربت اركيله بس دا اجرب صوتها وانت طلعتها من عيني
كال..ديله اعتذري مني
رفعت حاجب باستهزاء...علئ شنو ترئ مغلطت بحقك
رد بسرعه...لا كلتي مستهتر
اشرت علئ نفسي...اني ما كلت مستهتر ترئ كلت يستهترون انت تسمع غلط
باوعلي بحده...اعتذري
رديت من وره خشمي ...يالله العفو
باوعلي بعدم رضا ...العفو شنو خاف ما ترضين بوسني وكولي العفو اتعلمي شروط الاعتذار
باوعتله بطرف عيني ودا امشي هو سحبتي من ايدي،وباسني بقوووه كطع انفاسي
لزمته حييل واتصل موبايله هو ابتعد وضل يحجي،ويه صلاح ويسال عن ريهام واني اتطمنت عنها وخليت وطلعت اخذت الجكاره شمرتها وغسلتلهم ونومتهم...
.....................................
ريهام...
وصلت للمستشفئ بتعب،وصلاح ويايه كبل اخذوني للطوارئ وصلاح وعمتي وماما رضيه ويايه
اخذوني سوولي،فحص وتحليلات ...
ضلينه شويه منتظرين دخل عليه صلاح تقرب مني،وكعد يمي ولزم ايدي باسها بحنان
بلل شفايفه بقهر كال. رهومتي والله مو قصدي اضوجج واصيح بوجهج
دمعت عيوني...صلاح قهرتني والله اني مو قصدي اببد اكون ما اسمع كلامك بس انجبرت وخفت جولييت تتاذه وهي فقيره
ابتسم بحزن ورجع باس خدي...وانتي شدعوه هلكد ناعمه ورقيقه بسرعه زعلتي من كلامي اني اضوج من نوال لان تدعي واخاف عليج اخاف اتخلي نفسها وياج
ولج اني احببج بكد رحمة الله الواسعه
ابتسمت بتعب...واني والله احببك
ضل كاعد ويايه يسولف ويمسح علئ شعري وشويه راح يجيب التحليلات دخلت ماما رضيه وعمتي
وبعدها اجت ماما وبابا وخاله صبريه تحمدوا اليه بالسلامه وماما حضنتني وضلت تبجي ...
دخل صلاح وهو جايب التحاليل ضل يحجي،ويه بابا وبعدها كال.. الطفل نازل دكول ومحتاج عناية لان نبضه ضعيف وعندج انيميا حاااده
وعندها ابو صفار
ابويه انتفض...ابو صفار لا اله الا الله يارب انت الشافي المعافي هي ما تتحمل الحمل مو انوب بيها ابو صفار...
همست ماما...الله كريم الله يشافيها...
اهلي رادوا ياخذوني بس صلاح مقبل كال بالي يضل عندها وما اكدر رايح جاي عليكم
ضلينه شويه بالمستشفئ وبعدها رجعنه للبيت جولي تحمدت الي بالسلامه وخطيه دارتني مخلتني اببد اتحرك هي،وماما رضيه وحتئ خالتي.
........................
جابر...
سمعت ريهام مريضه خليت ورحت الها لان اجت خالة وقار واجت بنت خالتها هاي بنت خالتها ما ارتاح الها. .
ركبت سيارتي ورحت البيت عمي هم اشوف ريهام وهم اشوف جاسر ...
اتذكرت الصار ودار قبل لا يتصوب جاسر بينه وبين عاصم
رغم كلشي انقهرت علئ جولييت كلام اخوها حييل قاسي ولاذع اكيد واصله غير كلام
اذا مواصل غير كلام ليش ينكر جولييت شنو الصار حتئ ينكرها ويغلط عليها
وهي الي تموت عليهم رغم حقارتهم ...
وصلت للبيت دكيت الباب فتحلي جعفر حضني وهو يرحب بيه...هله بالنسيب هله بحامي عرضنه
وحق ربك نشرت صورتك وانت متدين وكتبت عليها لا يغركم هي ليلة العرس كلها رياء
بشرفي طكت طكه كل تعليق اطول من برج ايفل ولايكات لو ناشرك بدون ملابس شلوون هههههاي
هزيت ايدي ودخلت وهو يخابر سمعتها يكلها...ولج شوشو احببج اكثر من حب صبريه الكنووش ولو تدريه بيه صبريه قارنتج بكنوش اله تربطني،بمكانه
ولج اتزوجج بس اصبري خرب عشيرتج
سلمت علئ الكل ورحت الغرفة ريهام خطيه رادت تكوم الي ما خليته بستها وسالتها عن احوالها وبعدها خليت ورحت لجاسر
بس انعصر كلبي عليها متغيره حييل ياربي يشافيها ...
لكيت جاسر كاعد بالاستقبال شويه صاير زين سلمت عليه وكعدت
كتله..كتله عن الي صار ؟
جر نفس ورجع يدخن...لا والله ما كلتلها
استغربت. ليش؟ مو كلت وره عرسي
تنهد بضيق...والله يا جابر احسها صعبه واني نقسيتي،تعبانه وصحتي مو تمام وخايف عليها تنهار
مسحت وجهي بتوتر ..بس خطيه لازم تعرف
رد بغضب...لك شفت شلون يحجي وياي عاصم شفته شلون يغلط ويسب انوب هو ابو الانه لا ويريده مني سبب
والله اعرف بي هو وره ضربتي هو الضربني حيووووان اذا ما دفنته بيدي ما اطلع جاسر
لك اني ما مقهور بس عليه هي تتمنئ احضانهم وتتمنئ رضاهم وهو النذل شفته شلون يغلط عليها ويكول كلها ما عندج اخو بعد
رديت بغضب...نذل
اردفت بهدوء...بس جاسر شعجب هاله وامها ما جفصنها وما حجن
جر نفس كال. اني وصيتهن ما يحجن وخابرت عمها لجولييت كتله الزم مرتك وبنتك
نفخت بضيق...الله كريم خطيه اذا عرفت تنهار
بلل شفايفه كال ...الله كريم
اندك الباب هو كال...فوتي ام مجتبئ فوتي
هاي اول مره يخلي جولييت تدخل واني موجود يمكن عرف اني ما بيني،وبيها شئ
هي دخلت لازمه صينيه الجاي وتتراجف وترعش خلتهن كدامنه وبدون متباوعلي وهي تحت تاثير خوفها من جاسر كالت..مبروك جابر ان شاء الله بالرفاه والبنين..
ابتسمت بهدوء وجاوبتها...الله يبارك بيج
باوعت لجاسر برهبه كالت...جاسر محتاج شئ اسويلك شئ،لو اروح
رد عليها بتنهيده وهو يباوعلها باسئ...لا روحي ما اريد شئ ديري بالج علئ مجتبئ ومرتضئ
هزت راسها بأي وخلت وطلعت وهي مكسورة الخاطر الله يساعدها كلام عاصم عنها قوووي شلون نكرها وهي ما تنكر...
حتئ امها نكرتها مسكينه
ضلينه نسولف اني وجاسر وبعدها خليت ورجعت للبيت وصلت دخلت حجيت ويه وقار اشو هاي متغيره مدري شبيها
خليتها براحتها وسكتت...
.......................
كعدت الصبح اتمطط شفته صافن بوجهي واني بملابس النوم خجلت منه دخلت للفراش مرة ثانية ولحفت نفسي تلحف عن انظاره .
هو ضحك ضحكة غيرت نبضات قلبي وابتسمت لا إرادي تأثيره كلش قوي عليه .
وبدون سابق إنذار جذبني اله ولزمني بقووة
خلاني على صدره وهمس بأذني بعدج تستحين مني
مكافي صرنا رجال ومرته تره !
هزيت راسي اضيع خجلي واتظاهر انو مخجلانة
رجع همس زين ليش هيج ترجفين مني بعدج .
رفعت راسي باوعت لعيونه وبس مبتسمة وساكته
وهو مطوق اديه باديه ، دنك وباس خدي بوسات متتالية يطبعها على بشرتي تزيد من سرعة نبضاتي
ورجفة جسدي .
الى ان وصل لشفايفي والتهمها بنهم .
انعزلت عن العالم وحسيت نفسي بدوامة عاطفية
انحنى عليه بلا وعي تمسكت باكتافه العريضة
وحسيت نفسي اغرك وامواج حبه وهمساته
تتقاذفني وتطغى عليه .
اندكت الباب فجأة وهو وخر مني رتبت شعري بسرعة لان تخربط وخجلانة حيل هو راح للباب واني كمت لبست روب فوك ملابسي .
اجه كال عدنه خطار يله حبيبي بدلي .
هزيت راسي سبحت ورجعت للغرفة شفت جابر مرتب السرير ابتسمت وهمست بداخلي فدوة حبيبي .
بدلت ملابسي ووكفت على المراية اخلي مكياج .
انفتحت الباب ودخلت هالة تفاجئت بيها شون اقتحمت عليه الغرفة .
اجت بوستني وسلمت عليه وباركتلي وراحت كعدت على السرير بأريحية عبالك سرير الخلفوها ومدت ايدها تتلمس النزلة وتباوعلي بمكر.
واني اباوع لانعكاس صورتها بالمراية ، التفتت عليها وبيدي قلم الحمرة .
هي ابتسمت بخبث ورافعة تك حاجبها
_ صدك وقار طلعتي مو بنية ؟
فتحت عيوني مصدووومة من كلامها ، شمرت الحمرة على الميز وحاولت اهدأ نفسي بس بعدني متعجبة من كلامها .
خزرتها كتلها شنووو ؟
هي ابتتسمت وكالت على كيفج بس سمعت من نوال وهي هم سامعة خالتي ورضية يحجون بموضوعج .
درت على الميز مرة ثانية وتمتمت وممهتمة اذا وصلت الها تمتماتي او لا : لا ماكو هيج شي متوهمة انت ونوال جذابة .
اجت وكفت يمي على الميز لزمتني من كتفي
باوعتلها واحس داخلي يرجف ضوجنتني .
كالت وقار حبيبتي اني احبج واخاف عليج انت بنت خالتي اريد احذرج ترئ جابر مو حبا بيج اخذج ديري بالج علئ جابر من جوليت .
نفضت ايدها واباوعلها بعصبية واعماقي تهتز
_ شبيج هالة شتحجين انت مامعقولة كلامج مو مال واحد صاحي .
_ لازم تخلين ابالج انو هم انهزموا سوه والله اعلم شصار بينهم لو نسيتي هالسالفة معقولة تنسي ؟
حسيت ما اكدر اوكف على رجليه رحت كعدت على السرير واتنفس بغير انتظام واباوعلها بعدم رضى
هي اجت صارت مقابيلي وانحت كدامي .
تباوعلي مثل الحية بنظرات كلها مكر
كالت : واحتمال حتئ داوود من دخل حياتج بسبب جولي وبتحريض من جابر ويمكن يريد يتقرب منها مثل احمد خطيبي .
انهاريت واحس اعصابي تعبت : سكتي هالة دخيلج سكتي كافي وطلعي برى .
_ على كيفج اني اريد مصلحتج ولان انت بنت خالتي واعرف جوليت حية وعدهه سوابق ويايه .
بقيت بس خازرتها وهي تحجي وتبث سمها
لزمتني من كتفي تهز بيه نفضتها مني .
_ لج وقار شبيج معقولة اني اريد اضرج وانتي بنت خالتي بس اريد انبهج ديري بالج ولاتخلين جابر رايح جاي على بيتكم على ابو هو نسيبهم ويستغلون الفرص هو والحية جوليت لان متعرفين شنو عدهم وشنو ضامين .
هزيت راسي برفض ارفض كلامها وارفض الافكار الي ملت عقلي .
خلت سبابتها على خدي وكالت بحقارة
امم اتركج تكملين اخرتج اني بس لان استغليتها فرصة انت وحدج جيت احذرج .
طلعت بوسط صمت مني ، بقيت احس نفسي بدوامة كلامها يرن باذني كل ثانية اريد اطلعه من راسي واسماعي ما اكدر عرفت شون تأثر عليه .
بقيت ساكنة لحظات بمكاني مثل جثة متحنطة
دقايق ودخل جابر كال ها حبي بعدج ماخلصتي ؟
سكتت عنه واباوعله بنظرات اتهام .
اجه كعد يمي قرب ابهامه من خدي وظل يحركه .
حركت راسي وعيوني بعيونه ووخر ايده عني
كال شبيج حبيبي صاير شي ؟
بلعت ريكي بهدوء. وين جنت
ضحك...عند اهلج
سكتت مجاوبته..بس افكار تدور ببالي
اقترب مني يريد يخلي شفافه على خدي
دفعته وكمت ...
هو تفاجئ بس سكت ما حجه.....
........................
جولييت...
ماكوو شخص حب حب صادق من كل كلبه يكدر يكره الشخص الي حبه وحتئ لو طوول بالجفاء والابتعاد...
اول ما يشوفك حينهار ويسأل عنك باطمئنانيه ولهفه حتئ لو كان بآخر العمر.
هيج دا احس احس جاسر يحب شااام من كل كلبه واحسه ما يكدر يبتعد عن سحر طيفها
رغم هو كوولش زين هل فتره ويايه بس احس گلبه مو ملكه واحس بس شام هي الي متربعه علئ عرش كلبه
هي رغم صار سنين مختفيه بس،احس يحن الها واكثر المواقف تذكره بيها.
واحس حنيته مو لله فالله اكو شئ ضامه عليه دا احس يعطف عليه ما متقبله هل حنيه الي اجت تالي وكت
مع العلم احس اهلي اببد مو بخيير دا اتناسه امرهم بس ارجع واندار بنفس القوقعه
صادف دنيا الضهر واني نعست هو جان كاعد يم صلاح رغم بعده شويه جرحه مطاب
كلت خلي الف نفسي زين بالبطانيه رغم شويه الجو حار لان اني نومتي مو مال اوادم
نمت شويه رغم اطفالي مشيطنين كطعوني تكطع هذا يجر بكصيبتي وهذا يجر بثوبي يريد يطلع صدري مدري شنو انوب عاف ثوبي ضل يجر بالكلاده كطعها...
غطيت راسي ونمت وهمه هماتين ناموا
تقريبا ساعتين وكعدت بس كعدت كلبي مقبوض وضايجه كلت يمكن لان نوم العصاري
وخرت البطانيه من وجهي شفته كاعد علئ الجربايه واني،نايمه بالكاع كتله...دنيا الصبح الضهر العصر مدري شكد نمت
ضحك بسخريه كال ..لا العصر
عدلت شعري واني اتثاوب بنعاس كال باستهزاء...اي جولي،من فوك رمضان ومن جوه طرزان
استغربت شنو يححي باوعت النفسي متغطيه بالبطانيه كلها من فووك خانكه روحي خنك
وثوبي صاعد لبطني والبطانيه صاعده علئ بطني ومرتضئ نايم علئ رجليه
كمزت من مكاني....يااا عزااا ونبي،كمطت روحي بالبطانيه
ضحك بغموض. .بس ترئ حلوه نومتج بيها اغراء نومه مال سرسريه
غطيت نفسي واني اخفي ابتسامتي الخجوله. وانت شكو تباوع تحملت اثم من ورايه
رد بسرعه...افااا مو بس اثم استلكت عشيرتي
ضحكت كال...تعالي اريد احجي وياج
كتله تمام بس اغسل واجي رحت غسلت واجيت انشف بوجهي كعدت بصفه
كال بغموض...جولييت صعبه من شخص تحبينه وما يريدج موو
رديت بسرعه عبالي يقصد نفسه...طبعا ولا احببه اصلا اهم شئ كبريائي وكرامتي اما الحب يروح ويجي
جر نفس ...اي صح بس مو كل حب حب مثلا اكو ناس تحبيها تعشقيها مثل امج اخوج ويكول اني ما اريدها ولا احبه او نزلت راسنه
بلعت ريكي...اي صح بس اخواني حجوا هيج وما كدرت اتخلئ عنهم يعني اكو مشاعر بداخلي رافضه هل شئ وطبعا هم يحبوني ما يكرهوني
ومكسور خاطرهم عليه اكييد لان بعيدين عني،واني بعيده ياريت لو عاصم يسلم نفسه وارتاح عاد اكدر اشوف امي وابويه
مسح علئ وجهي بحنان.. اني امج واني ابوج انسيهم
دفعت ايده بنفي...لاااا امي وابويه محد يعوض مكانهم اني صح مقهورة منهم بس محد يعوضهم
كل يوم انام والدمعه بعيني تعاتب ابويه شلون عايش حياته وينام ويكعد واني منفيه بعيد عنه
ابتسم باسئ كال...حقج محد يعوض مكانه
دمعت عيوني كتله..تحملت بي يكولي جولي بويه طاك كلبي عليج ليش ما تجيين اشوفج
لزمته من قميصه بتوسل ودموع حاااره تحرك خدودي...الله عليك خليني اروح الهم بس اريد ابوس ايده والله مشتاقتله
جر نفس كال...الله كريم ان شاء الله
حضنته بحنان وبشكر وبجيت بقهر وهو باس خدي كال. .كافي عذبتيني
سكتت وابتعدت شويه كتله..اشويلك جااي
كرصني من خصري واني عطت بضحكه قوويه..ههههه اوووي توجع والله
رد بسخريه...ليش تخليني افشر علئ كولتج كل ما كعدنه كعده بيها خير وركضتي سويتي جاي انتي ما تملين من الجاي
ضحكت بتوتر وخليت ورحت لكيت نوال جنها عريف واكفه بباب المطبخ كالت..والله عمي زين نسوان لا يهمهن ابو ولا ام ولا اخوو
غلست منها مجاوبت كالت بمكر...مقهوره عليج اريد اكصلج قطعه سوده جبره بس شفتج طايحه غزل وضحك ويه جاسر كلت عليمن
استغربت. .جبرة شنووو؟
ردت بتمسكن وقهر...والله اعذريني ما قمت بالواجب من زمان لان البارحه سمعت من هاله وحلفتني ما اكول
لزمتها من اكتافها وهزيتها بعنف ..دكولين شنو
ردت بعدم اهتمام ..ابوج ميت قبل شهر او اكثر ..
حسيت الدنيا افترت بيها همست بخفوت وضياع ..ابويه مااات...
نهاية البارت .. يتبع
كونوا انتم كونوا بخير...احبكم 💔
نور سمو العراق 😘
لا تنسو التصويت والمشاركه اشكر حبيبتي نورا ناصر بدونها اضيع تاكلني الكلاب 😬😬Nora-Naser
رغم ملتهيه بنشر رائعه من روائعها الجميلة هذيان بين جمر وجليد لكن ما قصرت ويايه
وفعلا قصه تجنن بعدها بيها الشيخ علي الدر وفرح المسودنه 😀
سوالف طلحه 😂 Talha-25-3
اليوم كان عندي بث بكروب الكاتبه مريم السعدي كوولش جان حلو اله شويه فضحت القصه اذا حابين تشوفون شنو صار بالبث ادخلوا الكتاب وئام الشيخلي snwn2231
يكولون اني صوتي حلو الحمد لله من عجبهم 😬😀
الشكر للجميع كلكم احبكم وان شاء الله اسوي بث بكروبي بالفيس وانطيكم خبر...😘