*بسم الله*
.
.
.
.
.
.
.
.
.
.
سلسبيل: واش ديري يرحم باباک متخلطييش فيهم
ميار: سلسبيل والله منقدر نعيش بلا جواد وعلبالي ضوک كرهني مي ملازمش نخليهم يمشوني كي لعبة حتى وايذا علاقتي مع جواد راحت مي منخليش ظلم يريح
سلسبيل: خلاص خلاص وانا راني معاک
هزيتلها راسي ونضت ريحت على لبونک وهي خرجت .. تفتحت لباب لقيت بابا جا
صهيب: ندخل
ميار: اييه بلا متسقسي
دخل وقعد بحذايا
صهيب: بنتي محبيتش نجيک فسخون ونقلقک مي احكيلي بلاک نقدر نعاونک
ميار: مكان والو بابا
صهيب: وجواد
ميار: passe وجاز
صهيب: مراحش نسيف عليک مي لولد راه مدمر منک كون مخليتيش لضوک
هبطت راسي ملقيتش واش نهدر خفت نبين دموعي ويفيقلي
مكنتش حابة توصل لهنا .. علبالي بلي جواد حبني وهو مشي مناس لي يبينو حبهم بالهدرة وعلبالي ضوک جرحو مني راه مخبيه
صهيب: بلاک كي راه رايح لمريكان يرتاح شويا
غير سمعت هدرتو طلعت راسي غير شاف عينيا يحوسو على جواب حس بيا وكمل
صهيب: خدمة برک ويولي
ميار: احم بابا وانا علاه ربي معاه
تنهد وناض
صهيب: معليش انا نخليک رايح للكازيرنة بلاک على يومين نولي
ميار: ان شاء الله اتلهى بروحک
هز راسو بايه وخرج .. غير شفتو هبط وراح روحت نجري لسلسبيل دخلت لبيتها لقيتها فلادوش .. دخلت وغلقت لباب
سنيتها خرجت .. غير فتحت لباب سوطيت عليها
سلسبيل: يعطيک غمةةة حسابتلي جن
ميار: حابة نشوف جواد
سلسبيل: هبلتيي منين نجيبهولک انا
ميار: غدوة راهو رايح لمريكان خدمة وحابة نشوفو قبل ميروح
سلسبيل: بركاي ملجياحة وين تشوفيه
ميار: نروح لدارهم
سلسبيل: حابتني نحي شعري ونمشي برا بلا حوايج .. واقيل نسيتي واش درتيلو
ميار: شكون قالک راح يعرف مكاش آباغ نتي تعاونيني ايبان نتي جي معايا
سلسبيل: كيفاه
ميار: بابا راهو رايح لكازيرنة ميوليش لدار و آسينات وقاسم مراهمش لاتيين بيا تسما ليوم فليل نروح نشوفو
سلسبيل: كيفاه زيدي فهميني
ميار: اوف اوف شحال متفهمييش .. ليوم فليل نخرجو بسرقة وواحد مايعرف نروحو لدارهم انا نطلع متاقة نشوفو تمتم ونولي نتي تريحي تسنايني لتحت
سلسبيل: نتي هبلتي رسمي روحي نتي ولميسيون آمبوسيبل ديالک
ميار: مانغيضكش
هي دمعة في شفاري وباش تقبل بديت نطيح دموع
سلسبيل: وشبيک متقوليليش راح تقلعي
ميار: ياک انا صاحبتک لالا متخلينيش نشوفو
سلسبيل: ايه خلاص اسكتي برک
تبسمتلها وخرجت .. دخلت لبيتي شويا فرحانة باسكو راح نشوفو
فليل كنا مريحين انا وسلسبيل وشاعلين لفلاش
ميار: سيريووو شفتيهم دخلو
سلسبيل: والله شفتهم بعينيا لي ياكلهم دود
ميار: ؤک ؤک نوضي لبسي
ناضت بلاعقل وخرجت اما انا رحت جبدت سروال نواغ وتريكو نواغ وباسكات نواغ
حسيت روحي جيمس بوند .. طلعت سروال لصرة وشعري درتلو طوماطيشة
غير كملت خرجت لقيت سلسبيل جاية حتى هي لابسة كلش نواغ
خرجنا بلعقل .. مي شفت زوج رجال عند لباب خبطت راسي وين نخمم حكمتها من يدها وكركرتها مورايا للكوزينة
دخلنا وطلعت فوق لبوطاجي فتحت تاقة
سلسبيل: اسمعي نخاف
ميار: طلعي طلعي
سلسبيل: احكميني
مدتلي يدها وحكمتها طلعتها بسيف وهي ترجف
فتحت تاقة بلعقل باش ميحسوش مزية جات شوية واسعة مالغري صعيبة باش نخرجو منها
سميت بسم الله وسييت نخرج .. سنيت سلسبيل تخرج روحها
سوطيت انا بلعقل وقعدت نسنا فيها حتى بدات ديلي بيدها لالا
حكمتها من رجلها وبديت نجبد وهو حاكمة حكمني ضحک من grimace تع وجها
غمضت عينيها وسوطات عليا لبقرة قريب قتلتني وبدينا نهمسو كي سراقين
سلسبيل: والله يا ميار غير تخلصيها صبري برک
ميار: بربي
روحنا نمشو بلا ميحسو علينا وخرجنا ملباب تع لور
مالغري 12 تع ليل مي كاين ناس شويا مشي مكانش كامل تسما رتاح قلبي
روحنا ضربنا نص ساعة مشيا حتى وصلنا ايهيه لقيت رجال هنا تاني بففف مدرتش حسابهم
ميار: امشي نروحو ملور
سلسبيل: وكيفاه نطلعو واقيل ملحيط!
ميار: وي
سلسبيل: بركااي
ميار: هيااا برک
درنا حتى للور وزهر كانت كاينة باب تسما نسوطي عليها خير ملحيط طويل
طلعت على لباص وقعدت فوقها .. رميت رجلي وندعي منديرش صوت
سوطيت ومزية كاين حشيش متوجعتش بزاف .. بديت نعيط لسلسبيل لخرية لخوافة
ميار: جيري كيما درت متخافيش
سلسبيل: صبريي
بدات تتعافر وحد 10 دقايق باش فريتها معاها تنهدت وستعفيت شوية
بديت نشوف وين راهي بيتو وقعدت نحسب فيهم يازح واش يطلعني صرة ضوک طيحلي
شفت بيتو وتبسمت .. وصلت للحيط تواقي تع لتحت كان فيهم لباروداج تسما مابيد نطلع جيني ساهلة
سلسبيل ريحت لتحت حكمتلي لفلاش وانا تعلقت كي شادي
طلعت روحي حتى حكمت فلبالكون ديالو تنفست وشهدت ايذا طحت ومت نكون مسلمة
اوروزمون لبالكون ديالو فيه لفتحات حكمت فيهم بديت نتعلق بشوية حتى طلعت
تنهدت براحة وخزرت لداخل لقيتو مكاشو شفت ساعة كانت 00:43
سنيت شويا حتى سمعت لباب تفتحت تخبيت وقعدت نطل بشوية لقيتو خرج مدوش ولاف سربيتة على روحو وكاين لي يدوش هاذ لوقت
لالالا مجيتش نشوف هاذ لمنظر خبيت عينيا حتى لبس
حليت عينيا لقيتو لبس شورط وتكسل على لبونک حط يد على وجهو
وانا ريحت فلرض وربعت رجليا كون عطا ربي ضوک مبقالناش ونتزوجو ونكونو كيف كيف
بديت نبكي وحدي ونخبي فصوتي منعرف شحال ريحت نخزر فيه
نضت ملرض ومسحت دموعي شفتو لخطرة لخرة ووليت منين جيت وجاتني ساهلة لهبطة
وصلت عند سلسبيل غير شافتني ناضت ملرض
سلسبيل: طولتي حسابتلي حكمک
ميار: هيا امشي
روحنا بلعقل حتى خرجنا لبرا .. تمتم بديت نبكي كي نتفكر بلي مولاش ليا ندخل في هيستيريا
سلسبيل: تعيشي ميار متريحيش هكا
ميار: واش راح ندير مثلا
سلسبيل: هيا امشي نروحو قبل ميفيقولنا
ولينا لدار كيما مقبل وطلعت لبيتي نحيت حوايجي وتكسلت
كل منغمض عيني جي تصويرتو .. حكمت تيليفوني وقعدت نشوف تصويرة لي تصورناها نهار لعرس ..جوزت ليلة كي لعادة تع بكا حتى رقدت
************************
**جواد**
تعشيت واش قدرت وطلعت لبيتي فرزت لحوايج لي نديهم وخليتهم بجيه
لبست حوايجي تع سبور وهبطت للبيت لتحتانة وين كاين شكارة تع لبوكس
ريحت لتم منعرف شحال اصلا منجيش لهنا غير نهار نكون حاب نخرج غشي
ودرت هاد لبيت بلعاني
طحت فلرض ملعيا .. غمضت عيني جات تصويرتها بين عينيا
زدت نضت وكملت نضرب بكل قوتي حتى جهدي طاح
كملت ورفدت سربيتة نمسح فلعرق .. دخلت لادوش ديراكت دوشت وخرجت
لبست شورط وروحت لبلاصتي .. منعرف علاه حسيت حاجة شميت ريحة نعرفها
تنهدت وخرجت نفس .. اصلا واش راح يجيبها لهنا .. هي خلاص شافت حياتها وانا؟
حياتي باينة .. قعجت مدة حتى داتني عيني ورقدت .. نضت على لفجر صليت
وجدت روحي
هبطت لتحت .. لقيت يما دور فلكوزينة غير شافتني تبسمت
رحمة: صباح الخير
جواد: صباح النور
ريحت في بلاصتي وعمرتلي كاس قهوة ريحت نشرب
رحمة: ليوم تروح
جواد: ايه طيارة على 8
شفت ساعة لقيتها 6:30
رحمة: ان شاء الله توصل بخير .. غير توصل عيطلي
جواد: ان شاء الله
شويا سمعنا لاصونات تع لباب .. نضت فتحت لقيتو اكرم اصلا هو لي يوصلني
اكرم: جيت نشرب قهوة
جواد: ايه ادخل
دخل لكوزينة وريح .. 7 هكاک نروحو .. طلعت هبطت لافاليز ودعت يما وزدت اسراء لي هبطت
خرجنا وروحت ركبت تكيت راسي على لكوسانة حتى جا
اكرم: هاک لمفاتح تع دار ريح فيها
جواد: مشي في hotel
اكرم: وداري ريح فيها ووصيت شريكة للتم تبعتلک طونوبيل
جواد: ايه خلاص ..بلاک عليهم
اكرم: متخممش
حكمتهم وحطيتهم في جيبي .. مدة وصلنا للمطار
دخلت سنا معايا شويا وراح .. حطيت وراقي وواش لازم كامل سنيت شويا وروحت ركبت فطيارة حطيت لكاسک ورجعت راسي للور نريح
بعد 13 ساعة وصلت .. هبطت ديت لافاليز ديالي وخرجت لقيت طونوبيل واجدة
مزية كنت جيت ملقبل ونعرف طريق دار
مدة وصلت لدار عيان
حطيت صوالحي لبيت لي جات لولى في طريقي دخلتها
دوشت توضيت وصليت لي فاتني .. ريحت نستعفا محسيتش حتى رقدت اصلا غدوة تبدا لخدمة
*************
**سيرين**
كنت نهدر مع مرام وقاتلي واش صرا كي عرفت بلي جواد طلق ميار تشوكيت
ربي يستر ويحلو مشاكلهم .. خرجت ملبيت لقيت ماني في وجهي
سيرين: خير يا زين
ماني: كون تصبغيلي شعري مشي خير راه قتلني شيب
سيرين: شيب ولعيب
هدرتها ملتحت لتحت هكاک وسمعتني خبطتني بضربة لضهري حتى جاني روماتيزم
سيرين: وشبيک
ماني: روحي شريلي صبيغة خفيي
سيرين: غدوة
ماني: امشييي
لبست حوايجي وخرجت نشريلها .. فطريق شفت مصعب كوفت روحي وقطعت طريق
مي لي سامط سامط .. جا ليا ومن باب احترام محبيتش نحرقو
مصعب: واش صفا
سيرين: حمدلله
مصعب: مكيش تباني
قالها وضحک .. خزرت فيه ملفوق للتحت وجزت .. بدا يمشي مورايا كي رهج
مصعب: وشبيكي
سيرين: والو
وصلت لحانوت تع زين دين .. وهو مزالو يرحي فلهدرة بلا فايدة
سيرين: كملت
مصعب: هه مزال
زين دين: مصعب واش راک دير هنا
سمعنا صوتو خزرنا فيه كان واقف قدام لباب تع لحانوت مشنف
مصعب: والو شيخ
نفست بالقاوي ودخلت لحانوت .. مكنتش حابة نشري عندو مي مدام عيانة والله منشقاها للتحت
قعدت نحوسلها واش يوالم .. وهو مزالو يعيط مع خووه يدخل واحد يسرقو نورمال
كمل معاه ودخل يخبط في روحو مع لول رما لمفاتح من بعد تيليفون وانا نشوف ملتحت لتحت
زين دين: واش موقفک معاه
خزرت فلحانوت كامل لقيت غير انا شفت فيه وشريتلو بصبعي
سيرين: راک عليا
زين دين: مالا عليمن؟؟
سيرين: احكم خوک مشي جي تهدر معايا انا
زين دين: سيريين
لحظة لحظة يعرف آسمي نووو.. عيط وانا روحت خبطت صوالح لي رفدتهم
سيرين: اخلص عليا خلينا نروحو
زين دين: كي نهدر معاک متعيطيش
سيرين: واللله
زين دين: احكمي شويا داار
سيرين: بابا نتا تحكم فيا
بدا يستغفر ورفد دوزان دارهملي فصاشي ومدهملي
زين دين: امشي لدار
سيرين: شحال خرجو
زين دين: قتلک رووحي
فتحت پورتفاي باش نجبد دراهم
زين دين: متخلصيش روحي لداار
سيرين: مشي حانوت تع بابا
زين دين: حاب نصدق تساليني
سيرين: هاهاها مشي ليا
خزر فيا خزرة رفدت صاشي وهربت .. خرج مورايا وريح قدام لباب
سيد واش بيه كيفاه حتى ولا يهدر معايا سبحان الله مغير الاحوال ديجا يزمررر هو خاطب وانا نكسر في راسي هدر ولا مهدرش الله يسهل
دخلت .. لقيت ماني فصالون تحكي دخلت لقيت طاطا خديجة لثم تبسمت معاها وسلمت عليها
خديجة: عسلامة بنتي
سيرين: يسلمک طاطا
خرجت وخليتهم .. نحيت حوايجي ولبست بيجامة .. روحت لكوزينة لقيت ماما توجد سنيوة .. قتلها روحي وانا نكمل
وجدت كلش وروحت لصالون حطيتلهم سنيوة وريحت نكونيكتي
جميلة: وكيفاه مع عرس زينو صيف لجاي؟
خديجة: اييه يا ختي جميلة ياک فسخو
ماني: ياخاه وعلاه
خديجة: معلباليش زين دين ناضت فيه وفسخنا كلش
جميلة: معليش ربي يلاقيه ببنت لحلال زينو والله مكاش كيفو
خديجة: ان شاء الله
هل صحيح ماتسمعه اذنااي .. زين دين فسخ خطبتو نووو
نضت ملثم ودخلت لبيتي نسوطي شويا ونزغرت والله مراني مآمنة
جريت عيطت لمرام .. سنيتها تريبوندي مريبونداتش .. هكا شويا عاودتلي
مرام: توحشتيني مقبيل كنت نهدر مع جدک
سيرين: ونقللللک وااش صراا .. اول حاجة راني ميتة مسعادة
مرام: وشنو فرحيني معاک
سيرين: زينو فسخ خطبتوو
مرام: متزيديليييش مبرووک
كملت ضربت فيها gsra فشباب ولمورال عال عال
****************
**ريان**
كنت مريح نرسم كي نكون كاره هكا .. وزيد مرام راحت بقيت وحدي
كملت نرسم حتى صونا تليفوني رفدتو لقيتو عمي خالد تبسمت لا اراديا مي لخوف في قلبي .. باينة راح يقولي جواب
ريان: السلام عليكم عمي كيف حوالک
خالد: وعليكم سلام .. حمدلله ونتا
ريان: حمدلله
خالد: وليدي تعرف لي انا نعزک والله وكنت بزاف فرحان كي طلبتني في سيرين
ريان: مقبلتش؟
سمعتو تنهد .. غمضت عينيا وقعدت في بلاصتي
خالد: سمحلنا وليدي الله غالب مقبلتش
ريان: علاه
خالد: هدرت معاها ومحبتش .. نتمناولک كل خير ان شاء الله
ريان: ان شاء الله .. اتهلا عمي
كوبيت عليه وزيرت على تيليفون .. رميتو على لحيط حتى ولا فتات فلرض
حكمتني هستيريا تع عياط .. حسيت بلي واش حلمت كامل طاح فلما
تفتحت لباب ودخلت خالتي فاطمة مخلوعة جات ليا وحكمتلي راسي
فاطمة: وشبيک ريان
ريان: علاه خالتي علاه
فاطمة: خير وشبيک
ريان: مفهمتش علاش مقبلتش كنت ناوي لحلال معاها علاه
فاطمة: شكون
ريان: سيرين بنت عمي خالد
فاطمة: ياوليدي لي فيه لخير يجيبو مديرش في روحک هكا
مسحتلي على راسي وقراتلي شويا قرآن حتى هديت
فاطمة: ريح ضوک نبعتلک قهوة تهدي اعصابک بيها
خرجت وانا حطيت راسي .. شويا دخلت مدتلي قهوة ..شربتها وقعدت في بلاصتي
كي تخنقت ملبيت خرجت .. غير فتحت لباب حسيت بخبطة في صدري
هبطت راسي لقيتها بنت خالتي فاطمة حاكمة حوايج طلعت راسها
رؤيا: سمحلي مشفتكش
ريان: عادي
بعدتلها مطريق دخلت وانا خرجت .. قعدت ندور حتى طاح ليل حتى جواد مكاشو دوماج عندي شحال مهدرتش معاه وقريب عرسو نوغمالمو
رفدت تيليفوني وكومپوزيت نيميرو ديالو سنيت مي محبش يجوز
عيطت لاكرم .. شويا ريبوندا
اكرم: واش خو كيفاه تفكرتني
ريان: متفكرتكش
اكرم: مالا
ريان: وشبيه تيليفون تع جواد نميروه محبش يجوز
اكرم: آآ راح لمريكان خدمة آک تعرف
ريان: ووقتاه يولي
اكرم: على سمانة
ريان: تتمسخر بيا؟ وعرسو
اكرم: معلبالكش واش صرا
ريان: لالا غير لخير
اكرم: عندها وحد يومين جواد طلق ميار
ريان: ماتتمسخرش والله احللف
اكرم: والله
ريان: علاه؟
اكرم: حنا ومفهمناش .. ميار قعدت 3 يام مبانتش كي ولات طلبت طلاق
ريان: سيريووو وشبيها هاذي
اكرم: ربي العالم
ريان: كيفاه راه جواد
اكرم: والله راک تعرف خووک ميهدرش خلاها في قلبو وخلاص لحاجة لحيرتني كي قعد كالم مشي من عوايدو صح ميهدرش مي يريح مقلق
ريان: خلوه ضوک وحدو ينسى راهو كي حالتي
اكرم: وعلاه نتا
ريان: خطبت بنت عمي سيرين ومقبلتش
اكرم: خيرها في غيرها
ريان: المهم انا نخليک
اكرم: آيا صحا
******************
- إنتهاء البارت
- رايكم؟؟؟
- توقعاتكم للحلقات لجاية .. صراحة كنت قاعدة كتبت هاذ لبارت صح مفيهش احداث مي بون جوزو لوقت
- ريانو راهو كي خوه سبحان الله .. هاذ لكرو نص يفرحو آبخي نص يطيح عليهم لغم والمشاكل
- منعرف علاه عجبني زين دين !
- تفكرت قولولي آسكو عجبتكم لاغياكصيون تع جواد ؟
- فوط وكومنت باش نتشجع ♡˙︶˙♡
- إلى الملتقى...
- أحبكم