نيران قلبي

part 7

نيران قلبي
بقلم هدى
البارت السابع

---------

كملت مشي عادي جان ازلك عالدرج...
هي وكعه وانلوت رجلي شاغت روحي سديت حلكي مااريد احد يسمع..

ردت اوكع عالكاع جان يسندني شخص من وراي وما وكعت
عرفته اسير

- الله الله صارلج شي

- اخ رجلي انلوت

تحتاحين مساعده

- لا شكرا

- لحضه خلي اشغل فلاش

جانت ضلمة احنه نحجي ومانشوف شي شغل الضوه بجهازه ووجهة عليه رأسا نزلت راسي

- ااا رجليي

- انتي منو

- اني احم اني شسمه،شمم

- اهااا انتي بت عمي هاشم صح

- اي

اجت الكهرباء و كمت اريد اصعد لفوك كال

- اساعدج خاف رجلج توجعج

- لاااا اكدر امشي

- لحضه ليش جنتي نازله؟

- ها ماادري هيج
كلت بكلبي(خرب حتى نسيت ليش جنت نازله)
صعدت عالدرج اول درجتين وعطت من رجلي

- مو كتلج خلي اساعدج،شو تعاي

بالبدايه رفضت بس شفت مااكدر امشي قبلت يساعدني ، حط ايده ع ضهري ومشاني

وصلنه يم الغرفه فتحت الباب وكتله شكرا وسديت الباب سمعت صوت وراي طفرت

اخخ رجلي خرب

- وين جنتي لج

مشيت ليمها اعرج

- طايحة الحظ ليش مانزلتي وياي شوفي شصار بحالي

- يا هاي شبيها رجلج

- انلوت عالدرج وموتتني

- لعد شلون صعدتي

- اهوو رنيم سويتي تحقيق،اسير الاحزان صعدني

- شنو

انتبهت لجفصتي وبقيت امتمت

- ااا شنو

- منو اسير الاحزان هذا

- منو هذا منو كال

- عمي كال وطلع

- لعد اني حنام

- تعاي تعاي والله ماتنامين الا تفهميني تدرين بفضولي انتي

- دولي شبيج لزكتي ،هو هذا اا...اسير ابن عمي شافني جوه وساعدني

- واو وتردين تقنعيني بس هيج لج شميمه اني ماتمشي عليه هالسوالف ولج احجي كتلتيني

- شكد لزكه

- محد كالج جفصي يمي ومثل ماخليتيني احجي البارحه هسة تحجين

- اي احم ، حجيتلها السالفه

- عزاا شهالصدفه ،يعني انتي محاجيه وياه هواي

- لا ابد بس هاي

- اي لعد ميحتاج تتوترين اذا ميعرفج بس لزمي لسانج لتجفصين

- اي هو هيج ، اخذتلي صفنه وگلت ،
رنيم احنه يوميه نكعد هيج ونحجي بهمس

- اي هسة الا ذكرنه نحجي دكومي من يمي خلي انام

- كايمه يابه

رحت نمت بفراشي والنومه نومه للـ10 الصبح

- كعدت لكيتهم مخلصين ريوك وكاعدين كعدت وياهن ومر الوقت

العصر جنت بالمطبخ دا اشرب مي
شفت بيان تركض واجت يمي تلهث

بيان ..

كاعده بالهول صاحتني امي

- ولج بيان شوفي امير وين اريده

- اي

صعدت فوك لغرفته مالكيته نزلت للأستقبال...
فتحت الباب وفتت جفت

- امييررر امي تصيحـ..

بعدني مامكمله ورفعت راسي لكيت الكل يباوعولي صار كبالي ابن عمي هاشم هنا يا كاع انشكي وبلعيني من الفشله

ايسر جان يخزر بيه اني طلعت ركض ووكفت بالمطبخ

- يا هاي شبيج

- خرب حضي لج هذا اخوج منو شوكت هنا

- منو تمار؟

- ليش عندج غيره

- لا شنو ماادري شوكت اجه

- شو انطيني مي نشف ريكي من الفشله

- هاج شكو

- لج فتت للأستقبال دا اصيح امير جان يصير كبالي اخوج واني اصيح وبلا حجاب

- هههههههه خرب حضج يلا تكبرين وتنسين

- انجبي لو شايفه الموقف جان حفرتي كبر ونمتي بي

- لا يابه مو لهالدرجه وهو مثل اخوج واذا

- هم صح بس فشله

- اهو شو ولي ..

رجعت كعدت بالهول صاحت امي

- بيااان وينه امير مو كتلج صيحي

- هذاك هو بالاستقبال يم الولد روحي انتي

- الله يطيح حضج مامنج فايده

حچيت بهمس

- هاي فوك ماتفشلت ، ولا يغزر بيكم

طلعت اغسل بره واني دا افوت لجوه ..

رنيم ..

مر اليوم ببيت عمي ماكو شي جديد..
صار ثاني يوم
اجه بابا وصاحنه

- ها بابا صحتنه

- اي تعالن اريد احجي وياجن ،ليال صيحي امج

- حاضر

راحت ليال صاحت لماما واجن

- ها ابو تمار الله يساعدك

- هله هله ، اجرت بيت نكعد بي لمن يكمل بيتنه الي هنا شكم يوم وننتقل

- يا بابا عدنه بيت هنا

- اي عدنه بس عايفه عالنص ماكامل ، يلا اني رايح

- صدك انت وين تبات

- بأرض الله الواسعه ماعليه شي ، هاجن هذا مصرف خاف تحتاجن شي ..

طلع بابا واحنه طلعنه من الاستقبال
دك فون ماما
كالت باجر معزومين يم ام ايلاف ..

صار الليل وسوينه عشة كملنه وكل واحد راح بجهة
اجتني رساله عالفون اخذته وصعدت لغرفة بيان ..

شمم..

كالت ماما باجر نروح لبيت خالتي كلش فرحت...
حاولت اقنع بيان تروح ويانه بس ماقبلت

صار ثاني يوم
بعد الغده اصريت اني اغسل المواعين صعدن البنات بغرفة بيان بقيت اغسل

لمن كملت ساعه 2 اني غركانه بالمي
صعدت لكيت البنات كاعدات دك سوالف بالغرفه
اخذت ملابس دا احضر روحي للطلعه

- ها رنيم ماترحين

- لا اروح ليش

- ها مو ما مبدله

- اي بعد وكت

- بكيفج ، اكلجن انتن حاجزات الغرفه وين ابدل

گالت فناء
- نزلي للحمام الجوه لو بدلي بالغرف الهنا محد بيهة

- تمام

تعاجزت انزل لجوه فتحت باب الغرفه الي بصف غرفة بيان شفت محد بيهة سديت الباب وفتت

واني دا ابدل يدة الباب تحركت عبالك واحد ديفتحها
هنا وكف كلبي...

باوعت عالباب قافلته
بقيت حابسة انفاسي حتى ميطلع صوت
اندك الباب دكتين واني انخرطت..

لبست بسرعه والباب يندك شويه وراح ، انتضرت شويه بالغرفه وطلعت ركض...

- لج فناءءء هاي هاي الغر..فه الي يم غرفة بيان المن

- غرفة اسير ليش

- عزاا شهالحض ،فتت ابدل بغرفتة وانفت...

كلهن صاحن
- يححح

- ياا شبيجن ، لا مو هيج يعني راد يفتحه بس همزين اني قافلته

- هاا اشوه

- خرب حتى ملابسي نسيتهن هناك فدوه بيان كومي جيبيهن

- شتنطيني

- علج ابو السهم دكووميي

- ولو متستاهلين بس اسويها لوجه الله

- غير تستقر ام حلك

راحت جابتهن واجت ، كمت لفيت شالي ونزلت
لكيت امي وعمتي كاعدات ويمهن اسير ويضحكون وليال يم اسير

وكفت يم الدرج عدلت نفسي ومشيت يمهم ، كعدت يم ماما صرت مقابيله اشو هذا فوت راسه بنص الفون واني اجتني حالة استغباء وبقيت صافنه عليه

شويه كام وطلع..

نزلت رنيم مبدله كالت
- ماما منو ياخذنه

- ابوج موصي اسوري ياخذنه

كالت بهمس وهي تباوعلي
- همممم اسوري

اهو هذا حتى بالجبس يطلعلي ، رحت يم مرت عمي

- عمه فدوه خلي بيان تروح ويانه

- لا يمه خليهة وي مرت اخوهة

- اي خل يجن اثنينهن حبابه

- لا ابد

- فدوه لخاطري ،اجت رنيم هم تقنعها

- يلا لخاطرجن اقبل

- ايي شكرا ،حروح اكول الهن

صعدت كلتلهن بيان ماقبلت بس كلتلها عمتي قابله اقتنعت...
اما فناء كالت ايسر ميقبل وبقت

واحنه دنطلع فات تمار جاي يحجي وي امي وراد يروح...
ذكرت اني من يوم الحادثه مامحاجيته

رحت يمه
- تمار....

التفت الي وگال "هاا

- اسفه ، رحت حضنته وبجيت

- ها ها عليمن البجي

ابتعدت ومسحت دموعي
- ههههه هيج ، نتصالح؟ ومديت ايدي بمعنى انطيني فلوس

- ها هو منو الغلطان

- اني ولأن اصغر منك انت تراضيني ، يلا بسرعه اريد اروح

- هاج ولي

- هههههه لوف يو

جنت واكفه وي تمار يم باب الاستقبال...
طلعت لبره ما لكيت احد

فتت لكيتهن بالهول

- ها رجعتن؟

- منتضرين اسير اشو تأخر

- اها

بيان..
طلعت اغسل بره واني دا افوت لجوه طخيت بـ تمار صرنه كصه بكصه اجي منا يجي وياي

- ممكن توخر اريد افوت

- اها اسف ، بس انتي طلعتي بوجهي

- ماصار شي ، فتت ركض وكبل لغرفتي

يابه اليوم ما ناوي يخلص كلساع يصيرلي موقف...

اجه ثاني يوم وشمم قنعتني اروح وياهن لبيت خالتهة

بدلت ونزلت الهن...
جنه واكفات بالطرمه نريد نطلع اجه تمار

اني رأسا طبيت لجوه وكعدت...
شوي واجت مرت عمي ورنيم وليال بس شمم مو وياهن..

- رنو وين راحت شمم

- دتحجي وي تمار

- يا هسة ذكرت

- لج مو جانت ماتحاجي من يوم الحريق

- اها تمام

شويه واجت شمم كعدت يمنه

صارت الساعه 5 ونص الا اجه اسير كال
- اعتذر صارتلي شغله وتأخرت...

صعدنه بالسياره مرت عمي بالمقدمه واحنه انجعصنه وره وليال شطولها كعدت بحضن رنيم...

مشه بينه وصلنه للمنطقه ومرت عمي توصفله البيت
وصلنه يم البيت ونزلنه

- عمه شوكت ترجعون حتى امرلكم

- لا حبيبي مايحتاج احنه نبات

- هاا وبيان؟

- خليهة وي البنات ماعليهة شي

- خوش

طبينه للبيت واستقبلتنه خالة البنات وبتهة
فوتونه للهول من باب المطبخ وشفت بت واكفه تحضر صينيه...

جان عبالي بتهة الثانيه بس طلعت بت عمتهة لأيلاف اسمهة شروق
كعدنه وقدمولنه عصاير وحلويات...
انوب جرتني شمم وصعدنه لغرفة ايلاف..

تعرفت عليهن وتبادلنه الارقام واخذتنه السوالف فوك الساعه حبيتهن و اندمجت وياهن لحد ما صاحونه للعشة..نزلنه وكعدنه عالسفره مسوية اشكال والوان...

خلصنه وكعدنه بالهول...
نسولف وايلاف تشوفنه صور عرسهة

مر الوقت هيج وكلش تونست وي البنات..

،،،

رنيم..
اجتني رساله عالفون اخذته وصعدت لغرفة بيان

- هلا مهدي شلونك..

- هلا بيج..
اخذت صفنه عالرساله وما جاوبت

- اريد احجي وياج بموضوع..

- اي تفضل..

بقة يكتب هواي واني متوتره والفضول كتلني شنو راح يكول!! واخيرا دز رساله

- رنيم يمكن انتي ماتعرفيني بس اني اعرفج من 3 سنوات واعرف كلشي يخصج
وابد ما عندي نيه مو زينه صح تصرفي من راسلتج برقم مجهول مو حلو بس مااعرف شلون سويت هيج ، واليوم قررت انهي هاي السالفه...

قريت الرساله واني دايخه ، جاوبته بخوف
- شلون؟

- رنيم
اني
احبج

يتبع.....

رأيكم؟
توقعاتكم؟

لتنسون التصويت 🌟