| يا تعبي العشگته | ' باللهجة العراقية '

| البارت السابع و العشرون |

#يا تعبي العشگته
#بقلم الراوية
#البارت السابع و العشرون

بسم الله الرحمن الرحيم

| صلوا على النبي ⁦♥️⁩ |

.

لين..

چـنت گاعده بالغرفة و اني متمدده على التخت
و اتفرج على المـوبايل
سمعت دگـت باب الحوش..گـلت هـسا امي لو عماد يفتحونـو

بـس ظل يندگ..تأففت و انـي اذب الفون من ايدي
و طلعت من الغرفة..شفـت يوسـف يتفرج على التلفزيون و گلتلو

- ليش مـا فتحت الباب

دحگلي بطرف عـينو و صد عني
طلعت و اني احـط شال على راسي اخاف يطلع رجال

فتـحتو و گبل فاتت روان

- اريد اعـرف شعندچ بهالظهرية دايحة

حچيتها و هي دفعتني للباب و تگـول

- فـوتي

حچتها و طبيـنا للصالة
و روان بدون مقدمات اتجهت ناحية يـوسف
الي من شافها خنس

طلعت من جيب بجامتها ضرف و رفعـتو بوجهو و گال

- شنـو هذا

عگدت حاجبي و ذبيت الحجاب من راسي
و مشيت باتجاهـم
هو سكت و نزل راسو و ما حچه..روان باردة و فاهيـه و ما تعصب بسرعـة

بس من تعصب الله يستـر منهـا
صـاحت بعصبية و هي تذب الـضرف بوجهو و بـالهجتو حچت ويا انو شنو هـذا

خطية خاف..و من صوتها گمز من مكانو
و هو يرفـع ايديه و يگول يخوف منها

- انـي ما الياا

كـمشتها من ايدها و گلت بنفاذ صبر

- بس اريد افهـم شكوو

- اخـوچ حاطلـي ضرف و بي وردة جوه الباب
و هاي ثـاني مرة

فتحت عيوني علـى وسعهن و اني اصد عليه بسرعة
لا مو معقـولة..اكيد ما يسويها
توي طالـع من البيضه وينـو وين هاي السوالف
رفـعت تك حاجب و اني اخطي خطوة اتجاهو و اگول

- جوزيـف شنو سويـت

حدر من القنفة و كمش ايدي و يحچي

- اني ما اليا لين والله

حچاها بـعربية مكسره
و روان جاوبت

- عجـل منوو خومـا جدي؟
لمحت رجلينك جوه الباب من حطـيت الضرف و گبل فتحتو و شفتك فتت للبيت تركض لا تنـكر

تجاهلت روان و سحـبتو من ايدو و فتنا للغرفة مالتي
و روان وراية..طبگت الباب و خليتو يگـف گدامي و بلجهة حـاده حچيت

- يوسـف لا تكـذب و لا تنكر
انت خليت الضرف جوه البـاب ؟

ظـل ساكت و هو منزل راسـو
كررت كلامي
و هو دحگ عليه و حچه بتردد

- مـو انا هذاا عيمـاد

حچـه حچايتو و سمعت شهگـت روان
اني ظليت ادحـگلو و هو رجع ليورا و يمـسح على شعـرو
رفعـت حاجبي و گلت و اني احاول استوعب شنو گال

- يـوسف لا تكذب؟ شافتك

- عيماد قال اني ما اليا

عضـيت على شفتي و اني ادنگ عليه و اكمل كلامـي

- هـو يتصل بيهـا

دنگ راسو و ما حچـه و صمتو اكدلـي جوابو
طلعت من الـغرفة و عفت روان مـصنمه بمكانها
اخذت الضرف من الصالـة و اتجهت لـباب غرفة عماد

سحـبت نفس قوي و اني اهـدأ بنفسي
ما لازم اتعصب و لا انـفعال
طببت للغرفة و شفتو نـايم بالـگاع
صديت على التخت و شفت باقة ورد على الميز

غمضت عيوني و اني ارجع شعـري ليورا
والله العظيم احس عـقلي وگف..الصار اسابيع شاغل بالنـا بالمسجات و هسا بالضروف طلع خـالي؟

رحت باتجاهـو و گمت اگعد بيه
من گعد و سألتو شـنو هذا

شفتو شلون انـصدم..گبل وگف على حيلـو و سحـب الضرف من ايدي
و اني بسرعة حچيت

- عمـاد يعني هذا انت

زفر و بدون نفس گال

- من الاخـير شتريـدين

- اريد اعرف السالـفة من البداية

كتف ايديه و بهدوء تكـلم

- شـلون عرفتي الموضوع

برودو و نبرتو الهاديـة العبالك ماكو اي شي
خلتني اثور و اني اصيح بعـصبية

- عـماد لا تستفزني ببرودك..انـت من الاخير تحـبها لـروان

سكت و ما جاوبني بحـرف
صـد عني و هو يتحاشـى يدحگلي
ادحگ عليه و مئـة سؤال يدور بالي..شلون و شوكـت صار هالـشي
تأففت و ذبيت الضرف و گلت

- ترا هي بالغرفة..و الي عبالك كاتم اسرارك و مرسال ترا هـو الحچه و اعترف عليك حتى انك تتصل بيها

شبـح ابتسامـة انرسمت على شفايفي من شفت توترو..خشب بمكانو
تقربت عليه و صرت گدامو
ادحگ لوجهو گـام يذب الوان

كمشت ايدو و هو سـحبها بسرعة و اني حچيت

- عمـاد..لا تتهرب مني
انت ما طـول تحبها ليش ظميـت هالشي

رفع حـاجبو و ما جـاوبني
رجعت كمشت ايدو و گلت بهدوء..احاول مـا انفـعل
بلكي يحچي بدون عصبية

- والله مـو زعلانه و لا متعصبه عليك
بس فهمني الگاعد يصير..انت منين جبت رقمها
و شلون گدرت تقنع يوسف و ادز بيـدو ضروف

مسح على گـصتو الي ندت بحـبات العرق
لاول مرة اشوف عماد بهـذا الوضع..متوتر ما عـندو اي رد على السؤال.

- زين فهمني..على الاقل اكون واسطه بينكم
اكيد هي هـسا مصدومه منك لان يوسف حچه گدامها

- ليـن كافي..شبيچ لطشتي؟؟

صاح بيه و انـي هديت ايدو و حچـيت بغضب

- ما لطشت بس اريد اعـرف شيصير

- مـو لازم تعرفين تفهمين لـو لا؟
مو كلشي لازم احچـيلچ

حچاها بنتره
و انـي تخصرت و ادحگلو بعصبية و هـو صد عني
هزيت راسي بـ اي..و طلعت من الغرفة و اني اسد الـباب وراية بقوة..

طبيت لـغرفتي و ما لگيت بس يوسف
من سألتو عن روان گال راحت..

گعدت على التخت و هو ظل واگف..مسحت على وجـهي و گلت بهدوء

- يوسف اطلع اذا ممكن

ما افتهم عليه فـ اشرت على البـاب..
و هو فهم و راح

طول اليوم چان الجـو متوتر و مشحون..ما صارتلي فـرصة اروح لـروان
و ما اتصلت بيها..ردت افهم كلشي من عماد تا اخـاف تسألني يكون عندي جـواب

بس والله ما گـاعد تدخل بعقلي
هو مو نفسيتو الي يظل يقـلد عليها و يعيب يـا فاهيه يا بدون شخصية و بچايه
و هو دايماً يحچي عليها و يضوج من تجي هيچ بدون اي سبب

حتى امي انتـبهت على عماد و شلون ساكت
و تأكدت من هالشي لان ما راح للمحل

بالليل تقريـباً بالـ12 و نص
طفيت الضو و مـددت بفـراشي تا انام
اندگ الباب و فـات عماد

دحـگتلو و هو تنهد و بعدو واگـف بالباب
و بهدوء گال

- خـوما تريدين تنامين

وخرت الغطا و گـلت

- لا ما اريد فوت

فـات و سد الباب
گعد بصفي و اثنينـه ساكتين
شغلت التيبلام يم چـربايتي و صار ضو بالغرفة بس خفيف و الباب شـوية مطبوگ

قطع الصمت بكلامـو

- بـعدچ تريدين تعرفين الموضوع

- اي

حچـيتها بابتسامة و اني اصـد عليه
هو زفـر و سكت لحـظات گبل لا يگول بنبرة نـاصيه عبالك يحچي بينو و بين نفسـو

- اي انـي چنت اخابرها
خـليت يوسف ياخذ رقمها من تلفونچ..و گمت اخابرها من رقم جـديد مو مسجـل

صـد عليه و كمل

- صدتني و انطتنـي بلوك
و هالشي خلاني اتعلق بيها اكـثر..ما چـنت اعرف اعبر عن البداخلي و مـستحيل اگف گدامها و احچيلها مشاعري..فـ چنت اخليلها ضـرف بي ورده
ما ادري شنو اسـمي هالتصرفات يمكن مـراهقه متأخره

ختم كـلامو بضحكة..و اني ما حچيت بس ظليت ادحگلو و حسـيت بخنگـة
من كمل

- لين حـاولي تسدين الموضوع من يمچ
اعـرف نفسي غلـطان و المفروض ما اسوي هيچ..گاعد اطعن بظهر اهلـها تصرفي تصرف مراهقين
يترجـى كلمة او نظرة منها..انتي احچـي وياها و فهميـها انو اني غلطت..

- يعنـي ما راح تحاول وياها؟
انت ليش اسـتسلمت و بعدك ما بديت اي شي وياها

- مـو قصة احاول او لا
اني كاره نفسي و ما اريد ادخل بعلاقة جـديده..يعـني هه اذا هي تقبلت مشاعري اتجاهها

- شنو كاره نفسك و شنو ما تريد تدخـل
بعدين وين تلگـة احسن منك

حچيتها بصدمة و اني اعگد حواجبي
هو ما رد و اني رجعت احچي

- رسايلك الچـنت ادزهن كلهن حچتن ليه
عماد والله انت واگـع بيها و طامس بحبها..بس اريد اعرف شلون گـدرت تكتم بگلبك

ابتسمت باخر كلامي..و اني زفرت و مسحت على گصتي
دائما تحچـيلي عن الرسايل..و شلون تحـس من تقراهن تستحي بس تفكر انو اكو شخص شايل ناحيتها مـشاعر

من شفتو ساكت كملت بابتسامة

- عمـيد خليني احچي وياها..صدگني روان متفهمه

- زين و اذا رفضت مشاعري!
ليـن والله العظيـم ما ادري شلون حبيتها..اني اصلا اعجاب ما چـنت شايل ناحيتها
شلون فجاة حسيت نفسي احبها..

- لان هو هيچ الحب..يچفت للگلب بدون استأذان

حچـيتها و هو ضحك
و رجع ضربني على راسي و گال

- لازم خبره

- و شهادة ماستـر

ابتسمت و هو تنهـد و ابتسامـتو على شفتو
و اني رجعت احچي

- سؤال..شلون گـدرت تقنـع يوسف

- الاخ طمـاع..على كل شغـلة انطـي ربع

- ربع دينـار؟

هز راسو بضحكه و اني گمت اضحك

- لا صدگ طـماع والله..فوگاها استغلالي

حچيتها و عماد جاوبني

- ايي صـدگ طماع حيـل

ثـاني يـوم چان يوم جمعة
گعدنـا من وكت و قررت بـوقتها اروح و اتفاهم وي روان..
بالـ10 كملت كل شغلي..و تأكدت انو عماد ما راح يعـرف بالموضوع
لبست حجـابي و طلعت

دگـيت بابهم مرة مرتين
يلا انفتح..و منـو فتحـو؟ اكيد النفسية سلـيطيـن
عاگد حواجبـو..تحمحمت و سلـمت عليه
و هو بدون ما يـدحگلي رد

طبيت جوه و بعـدني ما فتت للبيت من باب المـطبخ لان لمحت روان هناك
وگفت و رجـعت عليه و هـو ما زال واگـف بمكانو
و حـاط ايديه بـجيوب بجامتو

- شـو صاير عصبي زيادة عـن الزوم؟

رفع تك حاجب و گـال

- تعاي اخذيلچ راشدي؟
بعـدين منو گالچ عصبي

بنصف ابتسامة گـلت

- شـوف وجهـك ما يگـصو السيف
و تگول مو عصبي

- شغلة مضوجتني

جيت اگـلو احچيلي و فضها
بس تراجعت..خوما اذب نفـسي عليه؟
انداريت و طبيت للمطبخ..و سـلمت
روان من شـافتني توترت و اني اشرتلها بعيني على الممر و گلت

- اي خالة شـلونچ

- الحمدلله عمري زينه..ما طـول شفت هالوجه الحلو

ابـتسمت بمجاملة
و روان گالت

- يمة راح نـروح لغرفتي

- خـوش يمه

و استأذنت منها و طـبينا للغرفة
اول ما طـبگت الباب اندارت علـية و گالت بعصبية

- بس اريد اعـرف خالچ تخـبل ؟؟

.

روان..

من الحـظة الي عرفت بيها انـو عماد ورا الرسائل و الضروف و اني متوتره
و على اعـصابي..گوه كاتمه غضبي و ما انفجرت

ايام و انـي الحيرة ماكلتني و افكـر منو هذا
و شلون عرف رقمي..و منيلو عنوان بيتـنا

و فجاة يطلع عماد ورا كل هذا
بوقتهـا رجعت للبيت و عفت لين تفهم شنو الموضوع
طبيت لغرفتي و بدون سابـق انذار گمت ابچـي
علمود شنو؟ ما ادري
بس حسـيت جبل و جـثى على صدري

امي حاولت تـفهم مني شبيه بس تحججت انو تعبانه من الكلية و الـدراسة

الصبـح من جـتي لين و فتنا للغرفة
ما اعـرف شلون صحت بيها و هي اكيد ما تسـكت
كل السوتو دفعتني من كتفـي و حچت بشبة عصبية

- مو زعطـوطه تا تصيحـين فوگاية
جايه احچي وياچ و اولي

ما تحـملت و گعدت على التخت..و گلت بنبرة ترجـف

- خالچ شيريد منـي؟

- ما رايد شـي..خالي يحبچ و هاي القصـة

من گـالت هيچ شفتي رجـفت..و توترت
حسيت بخطواتها تقترب عليه و تگعد بصفي و هي تـكمل بنبرة حاولت تكون هادئه

- هو الچـان يدزلچ مسجات و مـاخذ رقمچ من تلفونـي والله بدون علمي..
روان عمـاد خايف و ما جاي يحچيها بوجهچ..يحسـها ثگيله

- و همين مو حلـو تصرفو !
يدز مسجات و ورد..شنو چان موقفي لو سلطان شايفهـن

ابتسمت و هي ترد علـيه بثقة

- عماد مو غبي ترا..يعرف شـوكت يدز و شوكت لا
مو مرتين يدزلچ الظهرية من انـتي وحدچ بالحوش

وگفت علـى حيلي و گلت بعدم رضا من تصرفـاتو
اي يحـبني بس المفروض ما يسوي هيچ..اذا ما فكر بيه ليش ما فكر بنفسو و شـلون يگدر يقابل سلطان و امي

- حتـلو..ما عجبني السواه
بعـدين تعاي من شوكت يحبني؟ شو طـول عمرو كل ما اروح لو يخزرني و مدو يطردني لو يفشلني؟
منين حـدرت هالمحبة

- ترا چثيـر ناس تكره بعض و بالاخير واحـد حب الاخـر..و خالي اكيد شاف بيچ شي الحلـو و حبچ

حچـتها لين و هي تگف على حيلها مقابيـلي و تردف بتساؤل

- من الاخـير روان شنـو رايچ بـ عماد؟
ترا هو نيتو صافيه مو لعب جـهال

كتفت ايديه و انـي ادحگلها
الموضوع من الاسـاس ما دخل راسي..هيچ فجاة يطلعلي عماد من العدم و هـو شايلي مشاعر

اي حالـي حال اي بنية..اريد احـب و انحب
بس مو عمـاد..البيني و بينو اختلافات شاسعـة
العمر التفكير و كـلشي مختلف بينا

- ليـن اني الموضوع ما يهـمني والله
گـولي لخالچ ترا روان شايله الموضوع من بالها لا تترجى منها شـي

عـگدت حاجبها و هي تخطي خطوة اتجاهي و تتسـأل

- شنو لا تترجى منها شي..يعني ما راح  تتشاورين بينچ و بين نفسچ بالموضوع؟ زين فكري على الاقل!

رفعت حاجبي و گـلت كلامي
الي ما ظنـيت انو لين راح تفـهمو بغـير شـكل

- ماكـو داعي افكر لو اشاور نفسي
انـي و خالچ ماكو بينا شـي مشترك..بعدين اني اريد اكمـل دراستي و طموحي اكبر من انو اتزوج او ارتبط و اني بهالعمر..و من منـو؟ عماد !

- و شـبي عماد؟

- مـا بي شي..الله يستر عليه

حچـيتها هيچ بدون اي نية..بس لين افتهمت خطا
وبسببها گـالت بعصبية و هي ترفع حاجبها

- لا تستهزين روان
گولي ما اريد و فضيها ليش تنقصين منو

- و منو منتقص منو؟؟ لين اسمعي زين بعدين احكمي

- سامعـة زين..بس انتي شكلك ما تسـمعين التحـچينو
بس تدرين مو صوجچ صوچي اني الثولة الجيت اتـفاهم وياچ و اريد اشوفچ..

و بعصبية من كلامها و صوتها العلـى
گلت و اني اشر بيدي

- ترا ما سـبينا العنب الاسود تا هيچ تتخبلين عليه
اي خـالچ مو مناسب ليه من الاخير تريديهـا
اني ما اريد شخص مثل مستوى عماد..و حتلو زعلتي ازعلي مع انو كلمة الحق ما تـزعل

ظـلت ليـن ساكته و هي ادحگلي بعصبية بس ما حـچت شي..
صـديت عنها و ورا ثواني گـالت برود عكس ملامحها المتعصبـة

- خوش روان..راح اوصـل هالشي لعماد
البنى احلامـو و هو يتخيـل تتقبلينو و تتقبلين مشاعرو لان مدحتچ و لان يعرف انو انتي ما عندچ هاي النظرة الطبقية..

حچـتها و طلعـت من الغرفة
و اني بقيت بمـكاني ساكنه..جريت حسرة و مسـحت على شعري
يا ربي يمـكن جفصت بالمـوضوع؟
والله العظيم عصبتني لان فهمتني خطا..عماد خوش انسان بس ما اشوف نفسي ويا

گعدت علـى التخت و عيوني غـورگت
و انـي اهز رجلي بتوتر..
ادحگ للباب و اگـول روحى روان و فهميها و راضيـها
بس هسـا اكيد طلعت

و هيچ مر يوم الجمعة و السـبت..بدون ما اشـوف لين و لا المحهـا
و التفكير ارقني او بالاحرى عـذبني..يمكن اشوفـها لكلمتي كـلمة عادية
بس هي تشوفها لا..اني شلون گدرت احچـي هيچ گدامها و على منو؟
على عماد الي تصير لبوة من ادافـع عنو اذا احد مـسو بحـچاية

صعدت بالـسيارة اني و سلطان منتنظريـن
لين..شوية و طلعت من بيتهم و هي مخليـة التلفون على اذنـها..صعدت بالسيارة و سـلمت
و رجعت تحـچي بالتلفون
طول الطـريق تسولف و يمكن غـرت

چـانت تحچي وي زميلة الها..بس شو وياها ميانة قوية..و حبيبتي و عمـري و من اشـوفچ نتسولف

من سدت التلفون دحگـتلي بنظرة يعني شبيچ ادحـگيلي

استغلـيت وجود سلـطان لان اكيـد ما راح تتجاهلنـي تا ما يصير اكو شك بالموضوع

- مـنو هاي؟

- رفيـچتي

حچـتها و هي تبتـسم
و اني رفعت تك حـاجب و گلت

- الاعرفو ما عندچ غيري

- لا عـندي

حچتها و انـدارت على الشباك
و اني نار و گبت بيه..كتفت ايديه
و دحگـت بطرف عيني على سلطان الگال

- شصاير اليوم متكـاونات

- لاا

اثـنينه رديـنه بنفس الوقـت
و ابتسم سلطان الرجع يحـچي

- واضح حيـل

و باستـهزاء گالت

- سلطـان..شوكت نصل ترا اختنگت من هالجو
اكو بشر يـضيقون النفس

جـيت اجاوبها بس سـكتت
من سمـعت سلطان يتمتم بصوت ناصي

- اجي اسويلـچ تنفس اصنطاعي

ظليت فاكـه حلكي و عيوني و اني ادحگـلو و هو كاتـم ابتسامتـو
اصلاً نسيت الكونه و حچي لين
و اني صافـنخ عليه..هو انتبهلي و صد عليه و رفـع حاجـبو يعني اسكتي..

حدرنا من السـيارة و هي راحت بطريقـها و اني هـمين
بس كل ما اتذكر كلام سلطـان اضحك

و هـمين ما گدرت اشوفها من رجـعت من الدوام
بالـليل قررت اروح اشوفها
رغم خايفة لا اشـوف عماد
الحاولت اسوي الوضع طبيعي بس ما گـدرت
كل ما اتذكر انو يحبني احس كهرباء تضرب جسمـي
اگول عادي روان سوي كانو ماكو شي بس ما اگـدر

گلت لامي و ما حچـت شي
لبست صـاية خفيفة فوگ دشداشتي و حجابي و طلعت من البيت

دگـيت بابهم..و انفتح ورا لحظات
بلعت ريگـي من صار گـدامي..و احس بالندم لان جـيت بهالوقت
جيت ارجع بس گـلت لا تبيني انو انتي توترتي منو
عادي تصرفي بطبـيعية
وخر هـو عن الباب بعد ما سلمـت بصوت ناصي و هو رد عليه
مشيت و هو گال

- روان ممكن شويـة..

ما جاوبتو..گلت انهزمـي روان لا تگفين
جيت افوت بس رجع گـال بحده

- روان اگـفي

.

عماد..

صـدت عليه بتردد و هدوء..و اني جريت حسرة
و ظـليت ادحگلها..و هي تتهرب من نظراتي

هه والله العـظيم احسن نفسي مراهق و اتصرف وياها تصرفات ما تدخل العقل
خطيت خكوة اتجاهها و گلت بنبرة خليتها هاديـه
لان حسيتها خافـت من نبرتي الـحادة

- لا تتهربين مرة ثانية

- اريد احچي وي لين

- و اني اريـد احچي وياچ

صدت عني بوجهها و اني مسـحت على گصتي و گلت

- اني اعتـذر عن ازعاجي و تصرفاتي ناحيـتچ

- ما صار شي..ممكن اروح

- لا

حچيتها و حطيت ايديه بجيوب بـنطروني
و اني استغل الفرصة..

- انـي مو صاحب علاقات و لا احب سـوالف التلفونات و المسـجات..بس
بس چنت متردد انو اگـف هيچ وگفه چدامچ و احاچيچ

مـا حچت شي..كل السوتو دنـگت و هي تضغط على ايديها بقوة
و اني كملت..رغم اكو تردد بداخلـي انو اردف كلامي

- بس يـا بنت الناس اني نيتي وياچ صافيـة
و رايدچ على سنة الله و رسولو..اعرف جيت من طريق مو راهم بس الحمدلله عفتو
و عندي استـعداد من باچر اجي على اهلچ و اطلب ايدچ..طبـعاً اذا انتي حاطه هالموضوع بالچ

ظليت ادحگـلها منتظر رد منهـا لو كلمة
بس ظلت ساكته
انفتح باب الـصالة و طلعت منو لين
الي بس شـافتنا تقدمت بدون تردد
وگفت يم روان و گالت

- هلا روان..تفضلي

- لا مو گـاعده بس ردت اشوفچ

- فوتـي

حچتها لين بـرود..و اني دحگت عليها بتعجب
شبيـها لين؟ مو من عوايدها تتكلم هيچ وي روان

الرفعت راسها و دحگتلي و رجعت صـدت على لين و تكلمت

- لين..انـي اريد احچي گدامچ
ما طول خالچ هين و انتي..

رجعت دحـگتلي و كملت بهدوء و عيونهـا العسلية الصافية دمعت

- اني مقـدرة مشاعرك والله
بس و ربي ما مخلية هالشي بالي..اعذرني عماد
اني گدامي طريق و اريد اكمـل دراستي مو بالي لا زواج و لا علاقات

لاول مـرة يمكن احاول اتمسك بـشي بهـالقوة
و اني ارد عليها بسرعة بدون تفكيـر

- ميخالف انتـظرچ سنة سنتين..يا بنت الحلال اني شاريـچ والله

حچيتها و لين تقربت عليها و گـالت بهدوء

- روان..لا تستعجلين

هزت راسها و گالت

- ما مستعـجله..اني ما اگدر ارتبط بيك

- زين شنـو السبب ؟
لا تتحـججين بالدراسة..ترا صارت سالفة قديمة

حچـيتها بحدة
و هي رجعت خطوة ليورا..و اني سحبت نفس و كملت

- خـوش ما اضغط عـليچ..

و طبيت للبيت و گبل لغـرفتي و عـفتها برا
گمت اروح و ارجع و انـي اراجع كلامي
والله العظيم صرت ما اعرف اتصرف..انفتح الباب و فاتت لين

سدتو وراها و وگفت ادحگلي و گـالت
و هي تحط ايدها على گصتي

- اريد اشوف خـوما حرارتك مرتفـعة

رفعت تك حاجب و هي اردفت بتعجب و نظراتهـا عليه

- عماد شبيك؟ شو صاير ما تعرف تتصرف
انت سمعت شگـعدت تحچي؟

- لين اذا تريدين تـلوميني فـ اسكتي

- ما اسكت بس اريد افـهم
شو الحب خلاك ما تعرف تحچي..شو مرة تگعد تترجاها و مرة تگوللها ما اضغط عليچ..ترا مو هيچ تحچي وي التحبهـا

ذبيت حسرة و اني امسح على شعري
گمت اتحرك بـمكاني و اني اگول

- شمدريني لين..بالقـران ما اعرف شگول

و بضعـف گلت و اني اصد عليها

- لاول مرة لين..اگف گدام وحده و احس الحچي ينهزم مني..والله كل ما اريد احچي حچايو براسها خير اجـفص

ابتسمت هي و اني صحت بيها

- لا تضحـكين..ترا والله الوضع ما يضحك

تقدمـت عليه و اني بمـكاني
حظنت وجـهي بيديها و گالت بضحكة

- خـالو الحلو واگـع بالعشگ
تعرف والله العظيم فرحت..بس عماد لا تضغط عليها چثير
عوفها على راحتـها

غمضت عيوني و گلت بصوت نـاصي

- و اذا عفتها و راحت مني؟

- ويـن تروح

- الجامعة مليانـه ولد..ناس حلوه و دارسه و بعـمرها
اخاف..والقران اخاف تنعجب لو تحب واحد
عود اني وين اولي

فتحت عيوني و اني ادحـگ لـين الوخرت ايدها
عن وجهي..وراها بثواني گـالت بنفس نبرة صوتي

- بس ما تـلگه احسن منك

- لا تلگـه..تلگه المثقف و الدارس
الحليوة و البعمـرها

حچـيتها بوهن و هدوء
گعدت على التخت و اني احاوط راسي بـين ايديه
و اكمل بجزع

- ليـن..صدگـيني تلگه
و تنسـى عماد  و عشيرتو..وحده بعمرها و بجمالها
اكيد ادور لشخص نفس مستواها

گـرمزت گدامي و گـالت باعتراض

- عـماد ليـش تقلل من قيمتك و شخصيتك ها؟
ليش دائـماً تشوف نفسك اقل منهم

- لان هذا الصحـيح !!
مو صح اني كلني خلگ صاحب محل..انفصل من الكلية بتهمه اخلاقية..واحد يا دوب معيش نفسو و عيـلتو..قسط سيارة ما يگدر يدفعو

حچيتها بصـياح و گمت على حيلي
و كملت بقهر..قهر صارلـي شگد كاتمو

- لين باختصار احچـيلي شگالتلچ من رحتي عليها؟

وگفت گدامي و هي السكوت مـطوقها
عرفتها حاچيه حچي راح يزعلني..و بسببو لين رفضت تحچي.

- لين..احچي

- مـا حچـت شي..بس گالت مـو مناسبين لبعـض
عماد روان ما تعرف شنو تريد والله
متقلبة المزاج

هزيت راسـي بـ اي و گلت بدون ما ادحگلها

- خوش لين..روحي

.

لين..

نـظرة و نبرة عماد بهذاك اليوم ما اگدر انساها
اول مرة اشوفو بهالضعف..معقولة هالحب هيچ خلاه يضعف و يبهت؟

دايـماً يشبونها سوية
بس ما چنت اظن حتى اقدارنا و كسرات گـلوبنا تكون تتشابه لهلدرجـة
اثنينـه انكتبلـنا نحب..و اي حب؟
حب من طرف واحد..يذبـح والله

چـانت دنيا ليل..و الجو ححل گاعدين برا بالحديقة
مر اسبوعين من يوم الجـتي بي روان و حچـه عماد

صح احچي وياها..و تقريبا اتـناسى الموضوع
بس كل ما ادحگـلها اتذكر عماد و حزنو

گـاعدين و دگ تـلفون عماد
بوقتها طيبـة عدنا..الي الحمدلله حياتها تمر بهدوء
ربي يتمم عليها

حفز عماد من مـكانو و هو يصيح جاي جاي
ما عرفنا شـصار..طلعت اركض وراه و هو بسرعة و صدرو يعلى و ينزل بسرعة من التنفس العالي

- المحل گابـه بي النار
ربي يستر

ضربت على خدي و اني اصيح لا يا ربي
طلع ركض..و البيت انگلب
امـي گابت تبـچي و طيبة تسكـت بيها
القهر احسـو اكلـني اكل
اروح و ارجع بالحديقة و اتصل بي
ادعي ربي انو متوهمـين لو صاير غلط بالموضوع

عمتـي ام سلطان جتي وياها روان
و گـالن سلطان راح عليه

ساعة و نـص هيچ و اندگ الباب
طلعـت فتحتو..و فات سلطان و عماد
گـمت ابچي و اني ادحگ لعماد..الصاير عبارة عن صـخام و رماد

طـبينا للصالة و تلگـتو امي و خالتي
و هـنا يحاولن يطمنـن بي ..

- المحل صار گاع و سگـف..گشاية ما ظلت بي
كلو رماد

حچـاها و رجـع شعرو ليورا..عضيت على شفتي من شفت دمعتو وگفـت بطرف عينو و هو يكمل

- تعب سنيني كـلو راح
بضاعة بالملايين اكـلتها النيران

سلطان گاعد يمـو طبطبو على كـتفو و گال

- عماد الحمدلله على كـل حال
كلشي يتـعوض الا البشر..راح ترجع تگف على حيـلك
ان شاء الله

مـا اتحملت اشوفو بهالـضعف
گمت و تحججت اجيب شي يشـربونو
طبيت للمطبخ و نزلت دمعتي و گـبل مسـحتها
و غسلت وجـهي على السنگ

لحظات و فـاتت روان ما صديت عليها و كمـلت شغلي
شفتها طلعت صينية الستكـانات و الخواشيگ

كملت الچـاي و وديتو الهم و رجعت طـلعت للمطبخ
مـا چنت اريد اگعد بالصالة
لان احس نفسي باي لحظه راح ابچي..حيل مقهورة
مو علمود المحل لو الراح
بس نظرة عماد و نبرتو و شلون راح كلشي منو هو الكسرني

تعدلـت بوگفتي يم الباب من انتبهت لسـلطان الطلع
و هو حاط تلفونـو على اذنو و يحچي
ما فهمت شنو الموضوع بس عرفت شي يـخص الدوام

نهى الاتـصال و انـدار تا يفوت
شافـني و وگف بمكانو..ما حچيت شي و هو دحگلي و جا يگول كلمة
بس قاطعـو صيحة جتـي من الصـالة

.

السـلام عليكم و رحمة الله و بركاتـه

شلونكم حبايب عمري ان شاء الله الكـل بخير ❤

كلش اشكركم على تفهمك و دعائكم الي
اني الحمدلله هسا احسن ❤
و الصبح گعدت من وكت و كتبـت الكم البارت
و اذا كدرت اكتب بارت لاخ انزلو بالليل
كتعويض ❤❤

المهم شنو ارائكم و توقعاتكم 🌚

و ها ترا شغل يوسف ما انتهى 😭🤣

و بس والله
نلتقي على خير احبتي❤
و لهذاك الوقت استودعكم الله الذي لا تضيع وداعة ❤