السلام عليكم
⁃ وعليكم السلام ورحمة الله وبركاته
⁃ عمي انتَ بهذا الموكب ؟
⁃ اي عمي خادمك تفضل
⁃ خادم الحُسين ( انتم خوش موكب وما شاء الله خدمتكم حلوه واسلوبكم حلو بس عمي اكو شغله وحده اريد اكولهه الك هذا الاكل الي دتسوونه مو هواي ليش متنطوه للفقراء الخساير الي جاي تخسروهه عالخدمه والسواد والادوات والاعلام وبناء المواكب لو تروح للعوائل هاي مو افضل )
⁃ عمي سألتني واجاوبك ( انتَ اعتراضك على الاكل نفسه لو على الناس الي جاي تاكله لو على التبذير الي يصير ببعض الاماكن مو كلهه وبقية الاشياء مثل الاعلام والسواد ؟ )
⁃ لا عمي خلي يسوون بس مو بتبذير يعني ..
⁃ زين هسه اسولفلك ( شايف رب العالمين من يسولف عالجنه بالقرآن : انهار من خمر وانهار من لبن وفواكه واعناب ومختلف انواعها والوانها وحور عين وبيوت وقصور وولدان واساور من فضة وفرش حرير واستبرق واثواب سندس وووو ... وكل هذا وصف والحقيقة شي ثاني اقوه من هذا هذا كله تبذير زين المن الله سبحانه يبذر هيج انه اكلك المن
تعرف انو ((من ذُكِر الحُسين (عليه السلام) عنده فخرجت من عينيه من الدموع مقدار جناح ذُباب، كان ثوابه على الله عز وجل، ولم يرضَ لهُ بدون الجنة)) كامل الزيارات 202
((عن عبد الرحمن بن أبي نجران، قال: سألت أبا جعفر (عليه السلام) عمن زار قبر النبي (صلى الله عليه وآله) قاصدا، قال: له الجنة ))
كامل الزيارات 42
واذا اعددلك بعد تعرف انو كل شي تسوي للامام الحسين عليه السلام ثوابه الجنة
الشِعر ، السواد الاطعام .... ما شئت فعدد طبعاً وبالروايات والادلة ..
زين اذا رب العالمين يجازيهم بالجنة الي هي قمة التبذير بكل شي مثل مذكرنه فوك ف شيجي تبذيري امام تبذير الجنة ؟ هاي اذا سمينا تبذير..
من ترجع للحقيقه تلكه الفقراء ما تشبع الا بهاي الايام تلكاهم ياكلون ويترسون بيوتهم من زاد الامام الحسين ع وبعد اكثر تدري اصحاب جمعيات التكافل وغيرهه هم كلهم من خدام الامام الحسين ع ويشتغلون بهاي الجمعيات طول السنة هاي من ناحية
من ناحية ثانية تعرف انو هذا الشهر من الناس تشوف السواد والاكل وغيرهه يدفع الناس انو تسأل ليش وشنو هذا واذا سألت راح تعرف المن واذا عرفت راح تتأثر واذا تأثرت راح تتغير كل احوالها
ناحية ثالثة اذا انتَ اليوم كاعد واجي اجيبلك فد اكله حتلو بسيطة واكلك تفضل عمو هاي الك خاف جوعان شنو تترك بنفسك من تأثير وشنو من رابط حب وآخاء راح يصير بيناتنه حتى لو كنت انتَ مو فقير
بالاخير اسألك سؤال / اذا اليوم يجيك خطار عزيز وتحبه وهو شخص بمكانة اجتماعيه عالية شراح تسويله وشنو راح تقدمله تطبخله ووو .. زين شتريدني اسوي لشخص النبي ص ((احبَ الله من احب حسينا)) يحبه الله مو اني .. الي من يطلع من داره تفرش الملائكة اجنحتهه جواه هذا شقدمله انه
⁃ عمي نقدملهم ماي العين بس مو باسراف وبعدين ينذب الاكل
⁃ عمي خو حته الطيور والحيوانات وحتى الكاع تستفاد من هذا الاكل تعرف برواية انو اهل البيت ع جانوا اذا اكلوا في الارض المفتوحه او ضل الشجره ميشيلون بقية الطعام يتركوه حته ياكل منه الحيوان والطير والباقي يصبح غذاء وطيب للارض
تعرف انو في رواية((عن هشام بن الحكم، عن شهاب بن عبد ربه قال: قال أبو عبد الله (ع): ليس في الطعام سرف )) المحاسن / باب الاسراف بالطعام ص399 وهذا باب كامل يحجي بي عن هذا الشي
⁃ عمي الف رحمه لوالديك
⁃ عمي الله يجعلنا واياكم من السبّاقين في خدمة الحُسين ع والانفاق من اجلهِ
⁃ في امان الله
⁃ في امان الله وحفظه