| يا تعبي العشگته | ' باللهجة العراقية '

| البارت الخامس و العشرون |

#يا تعبي العشگته
#بقلم الراوية
#البارت الخامس و العشرون

بسم الله الرحمن الرحيم

| صلوا على النبي ⁦♥️⁩ |

.

طيبة..

بـالمطبخ واگفة..اني و زوجـة بهاء نسوي بالغدا
اسـمع صوتهم برا و عبالك متعاركـين..شوية و طلعوا
تركت البـيدي و رحت اتجاهه ضـرغام الـي يلبس بحذاءو

- شـكو ضرغام شصايـر؟

رفع راسـو عليه ثواني ظـل يدحگ بوجهي
گـبل لا يذب حسرة و گال

- ماكو شي..

حـچاها و طـلع لحگ عمي و بهاء..
ظليت بمكاني صـافنة..اكو شي بس ظـامينو علينا

مع ما انـداريت صارت بوجهي زيـنة..الي ابتسمت
و هي تخلي ايدها على خصرها..و ترفع حاجبها و حچت بهدوء

- گـالچ وين راحوا؟

و بـفتور رديت عليها

- لا..يمـكن شي يخص الشـغل

حچـيتها و جيت اتـعداها بس هي كمشـتني من زندي
صديت عليها و عـگدت حاجبي من تقربت منـي
و هي ترسم ابتسامة ماكـره على شفتها

- لا مو عـلمود الشغل..سمعت شگالو

- و انـي شعليه !

- مو الموضوع يخص اهلچ

- شبيهم

حچـيتها بقلق..و اني اسحب ايدي منها
و هي ضحكـت باستهزاء و تلتفت هيچ و هـيچ تخاف لاحد يشوفها
و رجعت تقربت و گالت عبالك فحيح افعـى و عيونها تتحرك على وجعي تـريد تشوف ردة فعلي

- ابوچ منهزم..من گـاعدين الصبح ماكو
و هسا ظهر و ماكو اي خبر منو..فوگـاها عايف ابنو

جـا كلامـها على مسامعي مثل المي الحار و انكب فوگايه
ظليت ادحگـلها بتركيز اريد اشوف الصدق بـعيونها
اخاف تضحك عليه.
بس الشـفتو بعيونها بس صدق و خـبث

بلعت ريگي و ابتعـدت عنها
من وصلنا صوت عمتي الصاحت بيها
انداريت على عمـتي و زينة مشت من گدامي و هي تبرر كلامـها و تگول لازم تعرف

دحگت لعمـتي برجاء انو تكذب الحچتو
و اتجهت عليها بخطوات بسـيطة و اني اگول

- عمه صح كـلام زينه

حاوطت وجهي بيديها و هـي تگول بهدوء و عيونها مدمعـة

- بنتي طيوبة مو متـأكدين
هو مختفـي

- يمه ليش تظـمين عليها..مو عايف ضرف و بي فلوس لابنوو

حچـتها زينة و امها زجـرتها بعصبية
و اني..والله ما ادري شنو صار بيه
عبالك الگاع اهـتزت من جواية..اگول چذب الگالتو و اقنع نفسي هو ما يسويـها
صح سواها قبل 20 سـنة..بس ما يعيدها
خصوصاً بعد ما تبرعت الوو و وعـدني يظل يمنا

عمتي سـحبتني لحظنها و هي تگول بنشيچ

- اوف يا حظچن يـبنات ريهام
ربي يصبرچن

حچت هيچ..و عبالك انطـتني الضو الاخضر
وخـرت عنها و گمت ابچي بحـرقة گلب
وعدو النا و رجـعتو و كلامو و هو يگول ما اعوفچن بعد
اتمنى يخلص عـمري و اني بينچن

عمتـي سندتني لان حسيت نفسي فقـدت توازني
طلعت زوجة بهاء من المطبـخ و هي تتسأل شـكو

و زينة گالت بحقارة

- ابوهن رجـع انهزم و عافهن

شگهت و هي تضرب على صدرها و تقـدمت عليه
و انـي صديت على زينة الكـملت

- والله حقهن..تؤ تؤ شگد ناكر للجميل
يعني دحط بعين الاعتـبار بنتك الغبية الي انطت كليتـها هيچ تسوي بيها

امها گامت تصيح بيـها..و هي واگفة و ادحگلي بشمـاته
عمري ما چـنت عدوانيه بس كلامها بحقي و تعيريها النا..خلـتني اتخبل و انـي اهجم عليها
و قبل لا تشـرد..كمشتها من شعرها المسـويتو ذيل حصـان

كمشتها و طلعت كل قهري بيها..اعرف حطيت عقلي وياها و هي اصغـر مني
بس ردت شي يخليني ابچي و قـهري و عصبيتي بي

عمتي و زوجة بهاء حـاولن يبـعدني عنها
بس ما انطيتهن مجـال..هـي گوية و عرمة و محد يگدرلها..بس ما اعرف شلون ما گـدرتلي
لان غضبي خلاني اگدرلها

ابتعدت عنها من حـسيت بضربه اجت بنـص صفحتي
خلت روحـي تفرفح
عمتي كمشتها و هي تدفع بيـها ناحية الدرج و تسب بيها

زوجة بهاء لزمتني..و هي تمسح وجهي و تگول اهدأي
گعدت بالگـاع و گمت اضرب على خدي و رجلي
ما اتذكـر شنو حچيت..بس الاعرفو گعدت اعاتب بوالدي

والله صـعب..صعب يرجع بهالسهـولة
و يروح...ورا ما خلاني اتعلق بي..خلاني احس شنو معناة كلـمة اب
عمتي دنگـت عليه و هي تحظن بيه
و اني فقدت و تهسـترت..و من جهة الـوم بنفسي
ليش خليت عاطفـتي او غبائي يتحكم بيه
ليش ما سـمعت حچيهم

گـالتلي لين راح تتنـدمين..بس ظنيـت بهالسرعة و السـهولة

گوه عمتي و نوران اخـذني لغرفتي
گعدن يحـچن وياي يحاولن شوية يـمتصن قهري و حـزني

شگد ما تعبت مـن البچي غفيت
و ظليت احس بايـد عمتي تمسح على شعري

فـزيت فـجاة على همس يمي
اول ما فتحت عيني صارت على ضرغام..الي بس دحگـلي اني گـبل بچيت
هو عاف ايد امـو و اتجه عليه..گعد على التخت و سحـبني لحظنو
و اني سندت راسي على كـتفو..ما حچيت كلمة وحده
بس بچـيت و گمت اشهگ..عمتي طلعت و ظليت اني بحظن ضرغام

ورا ويـن گدرت اگول كلمة وحده
اريد اتأكد من الصار..چذب لو صدگ

- راح؟

- رب العالمين بعـدو عنكم
لا تنقهرين يا عمري على هيچ انسان

- ليش خلاني اثق بي؟
ضرغام انـي..اني صدگتو والله

وخرني عنو و دحگت بعـيونو المغورقة و هو يگـول بحنية

- كافي بچي يا عمري..مو زين عليچ
انتي حامـل..اريدچ اديرين بالچ على طفلنا

- لين شلونها

تنهد و گال و هو يمسح دمـوعي

- تعرفينـها تمثل القوة..و كانـو الوضع مو هامها

- اگـدر اروح لاهلي؟
اريد امـي

باسني من جوه عيني و گال

- ميخالف عمري اخذچ الهم

جيت اگـوم بس هو حط ايدو على كـتفي يمنعني
راح طلعلي عبـاية و حجابي
ساعدني البس العباية و عـدل حـجابي
اخذ تلفوني و حـدرنا جوه

عمتي بالصالة واگفة من شافتني حظـنتني و هي تگول ديري بالچ على نفسچ
ما يسوى تبچين عـلمودو
و زينة واگـفة و مكتفة ايديها
دحـگلها ضرغام و گال

- حـسابچ بعدين انتي

و كمش ايدي و طـلعنا
طول الطريق ساكتين و محد حچه..اني صافنة و ادحگ من الشباك
من وصلنا لـبيت اهلي
وگـعت عيني على الغرفة مالتو..و كل ذكرى جتي بالي
طبيت من بـاب المطبخ
و امي تلگـتني و هي تحظن بيه..و ما ادري بنفسي شـلون گمت ابـچي

صـديت على لين الواگـفة يم الطبـاخ
دحگتلها باستغراب..گـاعد تاكل من الجدر تـمن و مرگة حمره

دحگتلي و ضحكت و الگمة بحلگها
بلعتهـا و گالت

- اليوم لم شمل عدنا..يمعوده من هسا العشا سمچ مسگوف

ظليت ادحگ عليها...و هي رجعت تاكل
و اني بچيت و بندم گلت و رجليه تاخذنـي اتجاهها

- والله گلتي راح تتنـدمين بس ما صـدگتچ

انـدارت عليه و گـالت برفعة حاجب

- عادي چلب و راح..عمرچ بچيتي على چـلب شرد؟

دحگت بعيونها و اني اريد اشوف حزن بس ما لگيت
عجل ليش بس انـي البچي و الانقهر؟

ظـليت 3 ايام يم اهلي
بصراحة ما اعرف شلون مرت و شنـو صار
لان اغلب الوكت بغرفة لين گاعده..ضرغام يجي و يحچـي وياي يريدني شوية اطلع من الوضع الـبي اني..

ما مقـهورة على روحتو..بس القاهرني ثقتي بي
انو مشيت للموت علمودو و تبرعت الو و اني الفـرحانه

قليل اطلع من الغرفة و مرات يـجبون الاكل يمي
لان گمت احس بوجع بطني..و امي خافت او بالاحرى تخبلت..خافت لا يتأذى الطفل

بـرابع يوم دنيا عصر چانت
عمـاد بالشغل و بس احنا بالبـيت..جا ضرغام و اخذني اني و امي للطبيب
تا نشوف وضـع الجنين

الدكتورة من عرفت انو متبرعية بـكلى
كتبلتي علاج و مقويات..و اهم شي ما يصـير اتعب نفسي
ضرغام الطريق كلو ما سكت و هو يگلي سوي هيچ و هيچ.
و مرات يعاتب ليش تبرعـتي..ليش ما سمعتي حچـينا

و انـي عبالك يذب ملح على الجرح..يلومني و اني اموت الف مـوته
عبالك ناقصني تأنيبهم الي

طبيت للبيت و ضرغام ظل شوية و راح..گـال اجيچ بالليـل..

لين من شافتهـم طلعوا من يمي تا ارتاح شوية
طبـت
مسحت دمعتي گـبل و هي تخصرت و اني گلت بنبرة نـاصيه

- لين طفي الضو اريد انام

- ما اطفي..

- لين

- و وجع بگلب لين ان شاء الله
اريد اعرف شبيـچ انتي هاا
تبچين و تنـوحين على خلـگ على واحد كلب دايـح؟ اذا ابنچ البطنچ مات لو صـارلو شي راح يـفيدچ بچيچ عليه

- لين مو بيدي والله..اني تبرعت الو حسـبالي خوش انسان صار

و بعصبية گالت

- چـم مرة گتلچ عوفي
ذيل چـلب ما ينـعدل..گتلچ راح تتندمين لو ما گتلچ
و هاي نـتيجة غبائچ اخذ كليتچ و شرد
كـافي بچي و نوح و نـدم..ترا والقران لعبت نفسي من بچيچ

صديت عنها و اني اعض عـلى شفتي تا اسكت
سمعـت تنهيـدتها و صوت طرگعة الچرباية..گعدت يمي و بنبرة هاديه گـالت

- گومي غسلي وجـهچ و ارضي بالامر الواقع
العـافنه گبـل عشرين سنة رجع عـافنه..بس هالمرة ترك طفل برگبتنا..اذا مو خايفة على نفسچ خافي على الطفل البطنچ
شوفي حالتچ و حالة رجلچ..الي ما يعرف وين يصد
حاير بينچ و بين شغلـو..طيبة ما اطلب منچ انو تبطلين تفكيرين و تلومين نفسچ..لا لوميها تا ما تظلين بـهالغباء

من الاول عرفت رجـعتو الها غاية..و اكتشفناهـا
انو ياخذ كلى و يشرد لان بالخارج اكو صعوبة..
امسحي دموعچ و گومي على طـولچ..و حطي بالچ هيچ انسان ما يستاهل تفكيرين بي مجرد تفكير

دحگت عليها و هـي حظنت وجهي و مسحت دموعي و كمـلت بحنية

- يلا ام مـادري منو..اريدچ قوية تصيريـن
شوفي عندي الوضـع عادي لان ما يستاهل انقهر علمودو..ما شفنا منو لا حنية و لا حب
انسان ما عرفـنا شنو من شي..الا انو هو انسان دوني و حقير..الي يعوف اطفال و زوجة و ينهزم
عادي يـعوف الدنيا كلها لاجل نفسو

كلامها خلاني شويـة ارتاح
صح حچيها ليش ابچي و انقهر..هزيت راسي بـ اي و هي حظنتني و اني ابتـسمت من گالت بضحـكة

- گومي وياي نسوي كيكة صح انتي الحـامل بس اني التوحم

.

لين..

رجـعت من الدوام و اني راسي مصـدع
راح يصير اسبوعين او يمـكن اكثر من روحة الرجال
الي ابتـلينا و صار يتسمى والـدنا
انقهرت و ضجـت..حچيت و عصبت
بس ما بچيت..و لا راح ابچي على هيچ زلـمة

طيبة صح تحسنـت حالتها بس ظلت تاكل بنفسها لان صدگتو..
ظلت يومين و وراها راحت لعيالها
من اتصل بيها اسـمع نبرة صوتها شلون تعبانه
خـايفة حيل لا تخسر طفـلها..بس ان شاء الله رب العالمين يحفظو الها

طبيـت للبيت و صار گـدامي يوسـف
گـاعد يتفرج على التلفزيون..دحگتلو و گلت بابتسامة

- مرهـبا

صد عليه و ابتسم هو همين و گال

- مراهب

و اختفت الابتسامة من محياه..كمل يتـفرج على التلفزيون
هذا همين قضيـة ثانيـة..
من تركوا ابـوه..لان ما اتشرف اگـول ابوية
و هو على هذا الحال
صعبة حـيل..يصبح الصبح يدور لابوه و ما يلـگاه
و لا يلگى ملابسو و لا اي اثـر غير ضرف بي فلوس تقريباً خمس اوراق و مكتوب عليه لـجوزيف

و من هذاك الوكت ابو ضحكة بشوشة..مثل ما امـي تسمي ..صار انسان هادئ
قليل يحچي
عماد گال ما نعوفو..لان ما شاء الله عمي علاء گـال ما اگدر اخلي يـمي..اني عندي بنات
ام عـمي جابر..فـ ما چان عندو اعتراض گال اخصص الو غرفة
بس يوسف هـو الرفض يروح و گال اظل هين

اما عمـاد..گال حالو حالچن
مثـل ما ربيتچن و صرتـن من مسؤوليتي هو هميـن..
و جابلو التخت مالتو و حطو بالغرفة مالـتو..گال مؤقتاً علما افرغ المخزن الداخلي و ارتبوو اسوي غرفـة الو لان ماكو غرفة زايـده..

ادحـگ لعمـاد و اگول شگد تحملت مسؤوليات و انت بهذا الـعمر
شگد ضحيت علمودنا احنا ولـد صلاح..الي يخلف و يشمر عليك

بـدلت هدومي و صبيتلي غدا
گعـدت بالصالة و اني اتغدا..امـي فاتت و گعدت يمـنا
يوسف ما يحچي قلـيل حيل عـلى گد السؤال
دايما عماد يگول اسـمعو بالليل يبچي و من تا اجي يـمو يسكت..

مـر الوكت و اندگ الباب
و رحت فتحتو..فاتـت روان گعـدنا بالصالة
و هي تـسولف وي يوسف..الحمدلله تجاوب ويـاها شوية

التهـينا بالسـوالف اني وياها و اسـتغلت عدم وجود امي
و حچـتلي عن الرقم..صـح منطيتو بلوك بس تگـول انقهـرت حسيتو صدگ يحبني

بعفوية صديت على يوسف..و تفاجئت من شفت يوسف يدحگ علينا
بس انتبهـلي گبل صد للتـلفزيون

انسد الموضوع من فـاتت امي و گـمنا نتسولـف احنا وياها

شوية و راحـت..و اني گلت لامي راح انام
طـبيت للغرفة و مددت على التخـت

دحـگت للتلفون و شيـطاني يوسوسلي..
اروح اشوف صورو البصـفحة..لو اجبر نفسي انو ما اسوي هيچ

غمضت عيوني..و اخذت التلفون
گلت خلي التهي و ادگ على طـيبة..بلكي انسى شوية
مـع اني اظن

دگـيت عليها و گعدنا نسـولف..صح ما الها واهس و اجر الكلمة جر مـنها
بس تحملت على الاقل شوية انسى..و انسيها

حچـيت وياها شوية الحمدلله زينة و البارحة رايحه للدكتورة و مـطمنتها على حالة الجنين

سـديت الخط منها
و رجع الشيطان يوسوس..روحي بس المحي صورتو و سدي الصفـحة

جريت حسرة و مسحت على وجهي و اني اگول لين لا تظلين هـيچ
صارلچ شگـد موخرتو عن بالچ..مو التهيتي بسالفة اهلچ ليش هسا تذكرتي

دحگت للموبايل و بقهر گـلت

- يعني على اساس انت تذكرني بي..و هو معشعش بالي

استسـلمت لامر گلبي و سحبت الفون
و طلعت حـسابو..دگ گلبي بسرعة من شفتو منزل صورة جديده البارحة بالليل بالتحديد

چانت بالكلية و لابس زي الرسمي مـالتو
اسود الون و راهم وي بشرتو..دخلـت للتعليقات
و گعدت اقرا تعليق تعليق..و كلها مـنور استاذ

بس الجذبـني تعليق من حساب بنية
و هي كـاتبة " منور استـاذ سلطان "
و يمـو ايموجيات باقة ورد..
هو راد عليها تسلميـن ست ايناس

فضولي الاعـتيادي خلاني ادخل لحسابها
چان عام و ناشره صورها..يطـلع عمرها بالـ28 سنة
لان قريت مواليدهـا..مو متزوجه

حلوه بس اكيد اني احـلى منها..بس الحلو بيها شامة جوه شـفتها
گـمت اگلب بالصور الي نـاشرتهن
طگيتها ضحكه من انتبهت لشغلة..و هي شامتها
عبـالك شامة المغـنية احلام يوميا مستقره بمكان

طلعت من حـسابها و رجعت لتـعليقات
هو راد عليها..و هي مجاوبـتو بايموجي الطالعة من عيونو گلوبه..شگد مستفز من اشوفو

رجعت دحّگت لصورتو و تمتمت

- من اشتعلـو اهلك اولهم روان

طفيـت الموبايل
و نمت..

مادري بيـش الساعة گعدت على صوت يوسف
دحـگتلو بطرف عيني
و هو ما زال مستـمر يدق بيه عـلى كتفي و يكرر اسمي بالطريقه المعتادة

- شبيـك

حچيتها و ذبيت الغطا عني
و حدرت من التخـت..غسلت وجهي و هـو طلع برا
و اني لحـگتو توي طالـعة من باب المطبخ و كفختني ريحة دخان و نار
شهگـتها لو متت..گـمت اگح
و عماد اندار عليه و صاح و هو يهف بالـنار

- ها متي لو بعد

- لا بعد انتظرك

حچيتهـا و اني اگـح
رحت على حـنفية الحوش وغسلت وجهي
اموت من ريحة الدخان..و گبل زردومي يتحسس

- شگـاعد تسوي

- اشوي كـباب..خوما بس انتي تسوين اكل و تكبرين كـرشي

ضحكت و اني احط ايدى على شفتي و خشمي و اگـول

- شنو المنـاسبه؟

صد عليه و گـال

- ماكـو مناسبه..بس هيچ ردت احسسچ بالنعمة العندچ

ابتـسمت و دنگت عليه بستو من خدو و رجـعت قرصتو و گلت

- والله عاد انت نعـمة من ربـي

امي طلعت و هي ادردم و اكيد المقصوده اني
و هي شايله صينـية بيها اسياخ و عجينة الكباب

- بس نايمة اريد اعرف ما تشبع نوم هالبنية

رفعت ايدي و گـلت و هي شكلها ما انتبهتلي

- مرهبـا ريهام

دحگتلي بطرف عينـها
و ناوشت الغراض لـ عماد..اني كالعادة ما اعرف
بس شغلة وحده و هي من يستوي السيخ اخذ قطعة منو اشوفو طعـمو شلون
و بالاخير احصلي ضربـة من عماد بالسيخ على ايدي
تا اعوفهن

و يوسـف يمنا گاعد و يضحك و هـو ما فاهم شي
المهم يشارك

اندگ الباب و سمعنا صوت ضرغام الصـاح

- هـا على شرفي هالمشاوي مو؟

فتحتلهم الباب و فاتو هو و طيبة
و اني بصوت ناصي گلت من سلمت عليه تا امي كا تسـمع

- غير النسيب..عوزها امي تذبحنـي و تسويني قوزي علمـودك

و بنفس نبرة صوتي گال

- اسف ما اكل لـحم چلاب

و مشى من گدامي يسلم على امـي
اني ظليت بـمكاني احاول استوعب كلامو..صديت علـى طيبة و گلت

- هذا عليه؟

هزت راسها و ابتسمت..و رحت تسلم عليهم
هو اندار عليه و ضـحك و اني خزرتو و گلت بگلبي
شگد مكروه عوذه

تونسـنا و ضحكنا رغم تعـكيرة طيبة و ضوجتهاخ
لا انو شوية فكت ويانا..و يوسف اندمج بسرعة و هز يحـچي وي ضرغام و عماد
الحمدلله طلع من المود الي هو بـي

جو عائلي و حلو..
بـالـ11 راحـوا ضرغام و طيبة..
طـبو امي و عماد و ظلينا اني و يوسف
چـنت الم بالفراش و مواعين الحلويات..لان ضرغام جايب وياه كرزات على حبشـكلات

اندگ الباب و عگدت حاجبي گـلت يجوز ضرغام و طيبة رجعـوا

رحـت فتحت الباب و صار بـوجهي سلطان
تحمحم و گـال بهدوء ورا ما سلـم

- عماد هـين

- اي..جوه

- مـمكن تصيحيلو

هـزيت راسي بـ اي و مشيت تا افوت جوه
بس رجعت عليه و گلت

- لـيش؟

ضحك و جاوبـني

- شي بيني و بيـنو

رفعت تك حاجب و گـلت

- ما يصير اني هـمين اعرف

هـز راسو بـ لا
و ابتسامة على وجهو..ضجت و تأففت و فتت جوه صحـتلو لـ عماد..شو عماد بس گلتلو طلع گبل

مشيت وراه و اني اگـول شكو شكو
بس ما رد..انداريت على يوسف الي هميـن يصيح شكو شكو بس بطريقة تضحك

طلع عماد و صد عليه و هو يريد يسد الباب و گال

- شبيكم بصلكم محـروگ..فوتي جوه

سد الـباب من برا و اني ضـربت الگاع برجلي و گلت بعصـبية

- عوذه شمكروهين

شوية و صـارت هوسة و ضحـك برا
دحگت من زرف الباب و طگيتها ضحكه
والله عبالكم عدهم مؤامره لو خطه مو لعبة طـوبة برا هما و شباب المنطقة

يوسـف يريد يدحگ و اني ادفع بيه اريد اني ادحگ
هو عصب و مشى ناحية الحايط صفـنت عليه و هو يتسلق و يگعد على السياج

هين تأكدت انو هذا الولـد عراقي من المهارة مالتو بتسلق السياجات

سمعت صوت سلطان و هو ينادي يـوسف..الي ضحك و حدر من الحايط و جا ناحيتي
عيب عليه و هو يمد لسانو و انفتح الباب و طلع
و اني ظليـت مثل خراعة الخضرا واگفة

بس بنفس الوكت فرحت..على الاقل شوية تحسنـت حالتو
ظليت ادحگـلهم من زرف الباب
الساعة دگـت الـ12 و هما بعدهم يلعبون
و كل ما يهدف عماد لـو سلطان اگمز و اصفگ و ارجع اسكت لحد يسمع

الصبـح من تا نروح للدوام
صـعدنا وي سلطان..اني و روان وحده ادحگ للاخرى
اني تحمحمت و گـلت و عيوني على سلطان

- روان بلـه البارحة شـلون مبارة شفنا الحمدلله ما فاتتنا

ضحك سلطان و گال و هو يدحـگلي من المراية

- عفيـة بنات ما يفوتچن شي

- ترا محد ما طلع على صياحكم
بس والله زين..معيد بالكلية صباحاً و بالليل لاعب طوبة شوارع

حچيـتها و طگيتها ضحكه
و روان شاركتني..و هـو ما نطق حرف
مرة يدحگ لروان و مرة عليه
وراها گال برود

- عرفت القاسم المـشترك البينچن
اثنينچن فطيرات

- اووه الحمدلله هسا يلا عرفت..حسبالي تدري

حچيتها و اني اضـرب روان على چتفها
الي انحنت ليگدام من الـضربة..گبل كمشت چـتفها و گالت بوجع

- كسر تا كسر شهل الضربة عفية لين بطلي هالسالفة
ترا حركات اولاد ما ترهم لبنيـة مثلچ

و بجفـصه گلت و اني اكرر حركتي و اضربها بس مو بقوة

- و منـو گال اني بنية
مـا تشوفين شواربي شـطولـ..

قطعت كلامي و سكتت..من استوعبت شحچيت
روان ضحكت بشماته و هي ترفع حواجبـها..
بلعت ريگي و رجـعت ليورا..صديت على الشباك
و اني اگول موت ياخذچ لين على هالجفصـة

الحمدلله سلطان سكت و ما علق..شيعلق يحظي و يحچي

ظليت طول اليوم كل ما اتذكر سالفتي اغم نفسي
و من جا بمحاظره علينا..تفشلت لان مرتين يدحگ عليه و يضحك
من طـلعنا من المحاظره وگفتني البنية الي گاعده بصفي
تقربت عليه و گالت بهدوء

- لين انتي تعرفيـن المـعيد سلطان؟

- ليش؟

- لا هيـچ..عبالي اكو معرفة بينكم

ابتسمت بمـجاملة و گلتلها

- هو اقاربي..
فـ اكيد اكو معرفة بينا

- ها..مو حسيت

حچتها و ابتسمت و استأذنت من عندي
هاي شبيها؟ اول مرة نحچي هيچ وي بعض
لان اثنينه ما يشاركنا غير الستول..

تجاهلـتها و مشيت للحديـقة

ورا يومين تقريبا چنت بالكافتيريا اخذت عصير و طلعت للحديقة
وحدي گـاعده..على المسطبه
رفعت راسي و لگيت سلطان الي ابتسم و گعد بصفي بينا مسافة..سويت نفسي طـبيعيه و اني اطلع التلفون على اساس اشوف السـاعة بيش
وجودو بهالقرب صراحة وترني حـيل..

- شو وحدچ؟

سألني و بسرعة جاوبتو عبالك منتظرة يحچي و ما يظل بهالصـمت الي يضوج

- ماكو احد اگعد ويا

- ما حـاولتي تبنين صدقات وي زميلاتچ

- لا بصراحة..ما حاولت لان ما يعجبـني

سند ايدو على ظهر المسطبة و گال

- ليش ما يعجـبنچ؟ يعني ترا اكو مؤدبات و خلوقات

- مو قصة مؤدبات او هيچ..بس مو من نوعي
يعني الاكثرية مسويات گروبات..و فلانه تحچـي على علانه

دحگـتلو و كملت بابتسامة

- عندي روان كافيه

ابتسم هو بهدوء..و اني دنگت راسي بس ظليت احس بنـظراتو عليه
لو بيدي اگـلو شبيك..بس اخاف يفهمني غلـط

ظل مادري شگد گبل لا يتحمحم و هو يگول

- براحتچ الي يناسبچ سوية
بس اني شفتچ وحدچ و گـلت اسألها

- شكرا لسـوالك

حچيتها بهدوء..و هو استأذن و راح
و اني ظليت اتبعـو بنظراتي و ابتسامة عـلى وجهي
شلون الطلاب يوگفون ويا و يسولفون..و هو يرد عليهم و يضحك
والله الي يشوفو ما يگول خشم..هو صح شوية مغرور بس مو حـيل

بس اني اشوفـو..مغرور و انفة و نفسيه
بس حليوه

.

روان..

چـنت بغرفتي گـاعده و اني اقرا
دگ تلفوني..و هبط گلبي گلت بس لا الي يدز رسايل
بس تذكرت انو اني نطـيتو بلوك

سحبت التـلفون و شفت لين تتصل
بس فتحت خط گالت تجين..گلتلها اشوف
و كالعادة بدون اي ذوق سدت الخـط بوجهي

كملت و طلعت سألت امي اذا اروح لو لا
دنيا ليل..تقريباً الساعة بالـ9 گالت نروح اني وياچ
فـ رحنا

گعـدنا بالصالـة و يوسف ويانا..
شگد حلو و سوالفو حلوه مثـلو..من ينطق اسمـي يشيل حرف الواو
عاد لين تضحك تگول ران مرت كونان
و اني بس اجاملها..و هي تخرب من الضحك

هو ينلام سلطان من يگول فطيرات

ظلينا نعتلل يمهم..و جا عماد
گعد يم امي و يسولف وياها..اني من جا تقيدت بكلامي و تصرفاتي
لان ادري بي يضوج مني..يعني علاقتك بـسلطان
ليش لحد كل ما يشوفني يضوج و مبين علـى ملامحو كرهـو الي

امي كالعادة م تشوف شاب..و اعزب بالتحديد
تگـول كلمتها الشهيره

- اي عماد..شوكت نفرح بيك

ضحك عماد و اني لين صـدينا اثنينه عليهم
اكيد نلتفت و نحط اذانانتا و كل مسـامعنا عدهم ما طول اكو خبر جديد

- والله خـاله حاط هالموضوع براسي
بس بعد

- يا خالة حچيت وياه..و اكثر من وحده حچـيت ويا علمودهـا يگول ما اريدها

حچتـها ريهام
و اني ملت على لين و گـلت

- شنو يريد يتزوج؟ لو غار من سلطام لان يريد يتزوج همين

- انچبي خلي نسمع

حچتها لين..و هو رد

- اريد اكون نفسي و اجهز كلشي و الله كريم

- اي عفية وليدي..اهم شي تكون نفسك مثل سلطان الطگ راسو شيب و بعدو اكون نفسي
يابه العمر يـمشي بيكم و انتوا تصيحون نكون نفسنا

دحگت لامي..و فكرت هسا هاي قصفتهم لو مدحتهم؟
هو گام يضحك و گال

- عجل خوما نجيب بنت الناس على حصيره و كنتور بابين..غير نجهز انفسنا و ما نقصر بشي

- هم صدگ ابني..ربي يرزقك من اوسع ابوابو
و ان شاء الله اشوفك انت و سلطان احلى عرسان

- ان شاء الله خالتي

حچـاها و گـام استأذن منا
و طب لغرفتو..لين گـمزت من مكانها و طفرت گعدت بينهن و هي تعدد فلانخ بنت فلان حلوه
ادحـگ عليها عجوز بس بعدها بروح الشباب

ثاني يـوم العصر چـنت اشطف بالحوش
اندگ الباب و تركت الصونده
نزلت دشـداشتي و رحت فتحتو
سلطان مو هيـن و امي جوه بالبيـت..

فتحت الباب و اني اعدل بحـجابي ما لگيت احد
عگدت حاجبي دحگت هيچ و هيچ الشارع ما بي احد حتى اطفال ماكو لان توي الساعة بالـ4 و الشمس عاليه محد يطلع بهالحر

جيت افوت بس انتبـهت على ورقة مذبوبه بالگاع
دنگت اخذتها..و سديت البـاب وراية

ظليت ادحگلهـا و اني اقلبها بين ايديه
فتحت الضرف و چان فارغ..ما بي غير وردة جوري

رجـعت فتحت الباب و همين ماكو احد..
زفرت و جيت اذبها بالزبل..بس تراجعت تلمست الورده و ما ادري ليش ابتسمـت
و الله شي يضحك..عود يعني يحاول بهالطـريقة يخليني اتراجع و اشيل الحظر
لا يا عمري
رجعتـها للضرف و ذبيتها بالزبل..هالحـركات مو عليه
صح فاهـية و فطيره بس مو غبية
مر كم يوم و الحمدلله لا وردة و لا رسـالة..

بيوم دنـيا عصر چنا بالحديقة احنا و سلـطان
دگ تلفونو و فتـح الخط
شكلو ما عـرف منو المتصل
لان گـام يسأل منو انت..فات جوه و اني ظلـيت ادحگ عليه الى ان فات للبيت

چنت العب بالتلفون..و جفلت على صوت امي و هي تصيح بي

- گـلاصات الچاي صارلـهن ساعة ما تشيليهن

- يمه مو ساعة..والله ربع

الحمدلله تفاديـت الضربه من جتي تضربني بالسلاح مالها و الي كلنا نعرفو النعال حاشاكم

طببت الصينية جوه و اني ادردم
غسلتهن و حطيتهن بمكانهن..سمعت سلطان يحچي
بس ما افـتهمت شنو يگول

نشفت ايديه و مشـيت اتجاهه الهول
وگفت يم الباب و اسمـع سلطان متعصب و هو يگول بصياح

- انتـي منو و منين جايتني
اسمعي تا اگلچ مو اني سلطان التضحكين و تحاولين تبتـزينو بصور

فتحت عيونـي على وسعهن و اني الزگ اذاني على الباب و هو يكـمل

- اذا انتـي جايه من نسل طاهر باچر تعاي اگفي گدامي بالكلية و احچي بوجهي

جفلت من صياحـو و هو يسب بيها سد الخط..
بلعـت ريگي و فتحت الباب..هو زفر من شافني
و اني بتلكؤ گـلت

- شبيك سلطان صاير شي

مـسح على وجهو و گال

- ماكو شي

طبيت و سديت الباب و بهدوء گلت

- عجل شبيك حبيبي عصبي..اني مو اختك شكو
شنو سالـفة الصور

گـعد على الكرويته و گال بدون ما يدحگلي

- وحده ما متربية..تريد تبتزني و تستفزني

- علمود شـنو؟

صد عليه ورا ما گعدت يمو
و هو رد بعصبية

- محد يعـرف انو لين گرايبي..و الاخت ماخذتلنا اكثر من صورة بالحديقة و حتى من صاعدة بسيارتي و انتي ما مبينه
و تگول اذا ما عليت درجاتي الا افضحكم بهالصور و اگول اكو علاقة بينـهم

شهگـت و اني احط ايدي على شفتي..الله ياخذها من بشر شنو هالنذالة
يناوشني التلفون..و گمت اگلب بالصور
صور اقل من عـادية و ما بيهن شي
بس العالم اكيد راح تاكل بيهم اكل..معيد و طالبه اكيد بينهم شي

- لازم لين تـعرف

- انتظري لا تگوليلها تا ما تكبر السـالفة

- سلطان والله الصور ما بيهن شي

- بس اذا شافوهن الطلبة شيگولون..محد يضرر غيرها

حچاها بعصبية...و رجع يسب بالبنية
بللت شفتي و گلت

- انت تعرفها؟

- لا ما عرفـتها..

- زين انت ليش ما تحـچي وي الاستاذ او العميد
يعني گبل احچيلو عن السالفة..و اكيد راح يتخذون الاجراءات

دحگلي لـ ثواني و زفر
و بنبرة ناصية اردف

- لا تجيبين طاري لاحد هسا..بلكي نگدر نحل الوضع

- ميخالغ بس اعصابك هسا..و ان شاء الله كلشي ينحل

طول اليوم المـر ادحگ لـ سلطان على اعصابو حيل متنرفز
گال حچيت وي واحد من الاساتذة..راد ينطي خبر الو قبل لا يصـير اي شي

ثاني يـوم الصبح طلعنا بسيارة سلطان
سلطان متوتر..اشوفو يريد يحچي و يتراجع
الصبح مـن گعد گال اگوللها تا ما تنصدم لو تكون ردة فعلها قوية حتى تتحكم باعصابها

تقريـبا ربع ساعة و نوصل للكلية
و هو تحمحم و گال

- لين

- همم

حچـتها و رفعت راسها الو
شبح ابتسامة انرسـم على شفتي و اني اشوف ردة فعل اخوية
حسيتو توتر بالزايد و هو يضغط على الاستيرن بقوة

- لين اكو انسانه مريضه..البارحه
دزتلـي صور..يعني صور عاديه اني وياچ بالحديقة
تحاول تستفزنا بيها

انداريت على لين الصنـمت بمكانها
طبگ سلطان السيارة و رجع تكلم

- بس راح احل الوضع..يعـني الحچي وصل للعميد

همين ما ردت..بس مسحت على گصتها
و فـجاة گامت تضحك و گالت

- المهم اني طالعة حلوه بالصور

رفعـت تك حاجب و سلطان حچه

- لين تسمعيـن شگلت؟

- اي سمعت شنو گـلت..بس ليش اخاف ما طول احنا ما مسوين شي
عادي ولـد خالات واگفين وي بعض..بعدين انـت گلت راح الوضع

حچتها و سكتت وراها..صدت على الشباك
عرفتها تحـاول تصير طبيعية..ادحگ لايدها رجفت و هي تحطها بين ركـبها
عيونها غورقت

ندتها بهـدوء و هـي گبل ردت

- سلطان كمل الطريق..اني ما مسويه شي غلط و لا انت
بس اقسـم بالله بس اعرف منو هالبنية الا ازوع حليب امها من خـشمها

- ليـن اني حچيلتچ تا تنفعلين و تسوين شي يأذي سمعتچ..تعرفـين شنو عقوبة الاستفزاز و الابتزاز بالاساتذة و الطـلبة..توصل للفصل

- ان شاء الله يـفصلون راسها عن جسمها

حچتها و مسحت على وجهها..سلطان زفر و تـوي مشغل السيارة
دگ تلفونها

رفعتو و فتحت خط و اني صديت عنها
بس سمعت شهـگتها گبل التفتت عليها
وجهها اصفر و شـحب فجاة
سلطان من انتـبلها گبل وگف السيارة صد عليها و گال

- شكوو

سدت الخط..مع ما سـدتو بچت و هي تبچي
گامت تحـرك بيديها بفوضويـة تگول بنحيب

- عفية سلطان اخذني للمستشفى
طيبة راح تمـوت

.

السلام عليكم و رحمة الله و بركاتـه

شلونكم حبايب گلبي
ان شاء الله الكل بخير 🙏👼

اتمنى البارت عجبكم 🌚

شنو ارائكم و توقعاتكم 🤓

البارت شوية طويل 4000 كلمة

تتوقعون طيبة شبيها 💔

و سالفة صور سلطان و لين 🌚

برود لين والله فضيع 😑

و روان 😃 و المراسيل و الورد

عود سؤال بعمركم احد دزلكم وردة 😂
لو نفس حالي ضرف بالغلط ما وصلني 🙂😂

و بس والله 😁
نلتقي على خير احبتي❤
و لهذاك الوقت استودعكم الله الذي لا تضيع وداعة 😘