مشعل كان طالع يكلم برا
وفي غرفة الالعاب انواع الصراااخ
البلاي ستيشن شغال ومحد يلعب فيه
وتركي يطق شوقي ويخليها تلاحقه
وخلود ماسكه التليفون وتصارخ عشان صديقتها موب قادره تسمع صوتها
شوقي باعلى صوت : وااااااااااااااااااااااااااااااااااااااااااااااااا ااا
ام خلو د جت من الصاله بسرعه : هو بنيتي وش فيها
شوقي وهي تشاهق وتصيح : مام شوفي تروك ما اقدر امسكه يتقني وينحاس
تركي كالعاده : نصابه ما سويت لها شي هي الي تلاحقني تقول نبي نلعب هبسه
ام خلود مسكت شوقي وضمتها وتهديها": خلاص بس وتطق مشعل على خفيف
اجل هبسه هاه يالهيس اصلن ياعمري هي ما تعرف وشي الحبشه ثاني مره بتنصب نصب صح ياحسرتي على عيالي موب فالحين في شي ابد وراحت
مشعل : والله امك زاحفه وناسه
تركي : عشانها اصغر من امك ولا امك بعد عليها حركات تذكر يوم تخلينا نسوق في البر
وتعطينا مفتاح السياره
مشعل: بس ركبت معانا
تركي : اهم شي خلتنا نسوق وابواننا كانوا معيين
مشعل : ايه والله ذكريااات
تركي : هههههههه
مشعل: ترا امي واهلي بيروحون لصحارى وبنروح كلنا معاهم
تركي : والله ونااسه هناك في محل العاب عندهم اشرطة قيم بوي خطيره
خلود سمعت طاري قيم بوي: ويين يا تركي
مشعل: انتي وش دخلك كلمي خويتك بس
خلود : محد كلمك انت يبو خشم كنه زحليقة نمل
مشعل: اوووه لا لا
وتركي يكمل له : غبااار غبااار
مشعل: ذكرتيني بايام الطفوله وزحليقات النمل
تركي : هههههههه مشكله اختي طلعت ولا شي في عالم الموضه
مشعل: اص انتي بس ووجهك هذا الي كنه علامة ممنوع الدخول
خلود : طيب عند امي والله باروح اقولها بتطلعون ولحالكم ومانتيب قايلين لها عشان تعيي عليكم
خلود اللي لسه ماسكه السماعه: هند اكلمك بعدين باي وصطراع ذبت السماعه
وراحت تركض لامها اللي جالسه باالصاله الي فوق
ومشعل وتركي وراها ويصارخون : نصااابه والله نصااابه
وخلود وهي تلهث واقفه قدام امها : يمه ترا هم بي
تركي: يمه ما عليك منها
ام خلود صرخت عليهم : بــــــــــــس واحد بس يقولي الي تبونه
ام خلود : مشعل وش القصه
مشعل: بس امي دقت تقول بيروحون السوق وتعالوا معانا
خلود : يمه يمه الله يعافيك ابي اروح هند تقول فيه محلات فيها شنط واغراض مدرسه تجنن
ام خلود : بس انتي شريتي الى قبل
خلود : لا لا يمه هذي اشياء جديده غير
ام خلود : لا ما فيه
خلود : يمـــه والله غير نروح ونشوف واذا طلعت نفسها مانيب شاريه
ام خلود : لا والله نروح عشان بس نشوف
تركي : يمه وش ذا بتخلص الصيفيه خلنطلع شوي نوسع صدورنا
ام خلود : تراني امك وش هالاسلوب
تركي : اسف يمه
ام خلود نشوف شوقي وش تقول
تركي : لاااااااااا
خلود : الصغييييره
ام خلود : شوقي نروح سوق
شوقي هزت راسها بدلع يعني ايه
ام خلود : بسرعه روحوا البسوا
وخلود رتبي غرفة الالعاب
خلود : يمه هم الي حايسين
ام خلود : رتبي الي انتي حستي والي شوق حاسته والباقي على الشغاله
خلود : وليش العيال ما يرتبون
ام خلود : رجال وش يرتبون بعد
خلود زعلت وراحت تلبس وهي في بالها ما راح ترتب اصلن
""""""""""""""""""""""""""""""""""""""""
في السوق وبعد ما الكل كانوا هناك وتقسموا طبعن هيفاء راحت تتمشى لحالها وقالت لامها باروح مع هيام وهي اصلن ما واعدتها
العزوف ورنا راحوا مع بعض
وعبير وهدى مع امهاتهم يدورون
وام خلود جالسه فوق مع شوق والشغاله بطاوله عند المطاعم
وخلود وتركي ومشعل يدوجون بالملاهي ومحلات الالعاب
وطبعن خلود كان لازم تمشي معاهم لان امهم قالت لهم ما تخلون خلود لحالها
خلود : ابي اروح العب في هذيك اللعبه
مشعل : ما فيه
خلود :ابي اروح يعني باروح
مشعل: ناويه تضيعين مثل يوم عند البحر
خلود : انطم ما ضيعني الا انت
تركي : فشلتونا ترا الناس تناظرنا
مشعل: واحد وبنت عمه هم وش دخلهم
خلود : ايه والله لقافة ناس
تركي : غريبه خلود ومشعل متفقين على شي
مشعل: ما سمعت بالمثل الي يقول انا واخوي على ولد عمي وانا وولد عمي على الغريب
تركي : وش يعني
مشعل: هذا مثل ناس كبار في المتوسط انت شعرفك فيه
تركي: قل والله تراني كبير الرجال موب بعمره
خلود :هههههههههه اسكت بس ابتداائي
مشعل: اووه صح خلود الحين اول متوسط
خلود : ايه
مشعل باستهزاء: ما شاء الله
خلود : المهم لا تضيعون السالفه باروح العب
مشعل يأشر : وين هذيك اللعبه
خلود : ايه
مشعل: تركي روح اشتري الشريط هذاك
تركي : لا باروح مع اختي
مشعل بطنازه: انا باروح معاها بتضيع يعني
تركي: لا والله ما فيه انت رح اشتري الشريط
مشعل ويلعب بدقنه : ازين لا تشتري بس تعال قول مشعل ولد عمي تشوف
تركي : اف منك تيب هات الفلوس
مشعل: اشتريه بفلوسك يا تنح نسيت بوكي
تركي : تيب بس باخذهم منك بعدين
مشعل : ان شاء الله
وراح هو وخلود للعبه
مشعل: شاريه تكت
خلود : لا باروح من هناك اشتري
استني هنا انا باروح اشتري
راح وطلع بوكه واشترى تذكرتين له ولها ورجع
خلود : ناسي بوكك هاه
مشعل: انطمي وخذي بس
خلود : انت بتركب معاي
مشعل : اجل اخليك لحالك ناقص تضيعين بعد
خلود ببرائه: ايه تيب
وركبوا مع بعض
"""""""""""""""""""""""""""""""""""
عالساعه 10 وبعد ما تعبوا الحريم من الدوران
ام طلال: عبير ادخلي انتي هالمحلات الي هنا انتي وهدى وانا وخالتك بنجلس هنا
هدى : تعالي هذا المحل دايم يجيبون حاجات حلوه
عبير : يلا قدام
دخلوا قعدوا يتفرجون
هدى : عبير تعالي شوفي
عبير: حلو والله هالفستان بس كم سعره
هدى: 650 ريال
عبير: معقوله
اللبناني راعي المحل: هيدي الجهه كلها عاملين عليها تخفيضات
عبير: اها تيب فيه منه مقاسات
اللبناني : ايه
عبير: ابي اكبر من هذا بشوي
اللبناني : تكرم عينك
وياشر على الكراسي : تفضلوا
وراح يجيبه
ام طلال دقت على جوال رنا: هاه شريتوا
رنا : ايه شريت شنطه يامامي تجنن من nike
ام طلال : ايه زين روحوا للمطاعم تلاقون عمتكم جواهر اجلسوا عندها
رنا : تيب
""""""""""""""""""""""""""""""
بعد ما شرت عبير طلعت لامها وخالتها
ام طلال: ابشرتس يا وخيتي معاهم كيس
ام فيصل : الحمد الله
ام طلال : وريني يا عبير وش شريتي
عبير طلعت لافستان عشان توريهم
ام فيصل : والله يهبل وش زينه بكم
هدى : 650 عليه تخفيض
ام طلال: بس موب كانه صغير شوي
عبير: يمممه وش شايفتني عاد موب دبه لهذيك الدرجه
وبعدين انا ناحفه هالايام مع كرف البيت
هدى : ايه والله جسمك محلو عن اول
ام طلال: يللا نروح للمطاعم فوق عند جواهر والبنات نتعشى
ام فيصل : يللا
وراحوا تعشوا
وبعد ما تعشوا رجع الكل لبيته
""""""""""""""""""""""""""""""""""""""
ام فيصل واختها وبناتهم في السياره واقفين عند بيت ام طلال بينزلونهم
ام طلال ما تقدر تشوف زين بدون نظارتها والسياره مظلله: مشعل سيارة طلال موجوده
مشعل : ايه يمه
هدى التفت قعدت تتامل في السياره وتشوف الاشياء الي هو معلقها على المرايه الي قدام
رجع لها حزنها الي في قلبها بس سكتت
ام طلال: مع السلامه يا ام فيصل
ام فيصل : في امان الكريم
ونزلوا ولقوا ابو طلال وطلال جالسين بالصاله يتابعون الجزيره
دخلوا البنات وامهم وسلموا
ابو طلال: شعولي وينك يالجاحد
مشعل: في بيت عمي
ابو طلال: ايه ما تبينا
مشعل : وانا لي غنى عنكم يبه بس عاد باروح انبسط شوي وارجع
ابو طلال: وريني وش شريتوا
رناعلطول: يبه شريت شنطه تجنن وطلعتها
ابو طلال: والله حلوه سبورت تستاهلين
العزوف تساسر عبير: وش عنده ابوي اليوم مروق
عبير: تعرفين ابوي مزاجي
العزوف : ايه صح صدقتي
رنا : بابا ابغى اشحن جوالي
ابو طلال: ان شاء الله
عبير:وانا بعد يبه
ابو طلال : ومشعل والعزوف بعد بكره باشتري لكم كلكم بطاقات
طلال: يبه شرايك ابيع اسهم صافولا
ابو طلال: لا خلها الظاهر انها بترتفع
بيع حقة الجماعي خلاص ما اعتقد ترتفع اكثر من كذا
طلال: ان شاء الله بكره بابيعهم
ابو طلال : يللا ياعيالي باروح انام
ام طلال قوميني بكره الصبح عندي مشوار
ام طلال: ابشر من عيوني
ام طلال : عبير روحي قيسي الفستان
العزوف : وانا باجي معاك
رنا : وانا باروح انوم
عبير: اوكيه
عبير في الغرفه قاعده تلبس الفستان
عبير: العزوف تعالي صكي السحاب عيا لا ينصك
العزوف جت تحاول بس ما قدرت
عبير: اصبري بامسكه
العزوف : يللا بقووه
عبير: خلاص خلاص لا ينقطع ما فيه امل
العزوف : فيه ترجيع
عبير: مدري تخفيضات بس باحاول باقوله بس تبديل مقاس
العزوف : روحي قولي لامي اجل
بدلت عبير وراحت للصاله وقالت لامها
طلال: خلاص انا اوديك بكره تردينه
عبير: شكرا الله يعافيك
رن التلفون وقامت عبير ترد
عبير: الو
لينا: هلا والله
عبير اهلين
لينا : كيفك
عبير: تمام وانتي
لينا: بخير وينها العزوف
عبير : دقيقه اناديها
راحت نادتها
عبير: لينا عالخط
العزوف : قولي لها مشغوله
عبير: بس انتي فاضيه ما عندك شي
العزوف : بانوم دايخه تعبانه
عبير: تيب تيب لا تنافخين
وقالت لللينا انها مشغوله
لينا : تيب شوكرن وصكت
لينا: لا عاد هذي زودتها انا باروح لها واواجهها والاقي لها حل
"""""""""""""""""""""""""""""""""""
بكره الضحى وفي مكتب بو سعود
بو طلال: والله يخوي مدري وش اقولك
ابو سعود : افا يا ابو طلال قول
ابو طلال: انت عارف ظروفي
ابو سعود : وانا مستعد اعطيك الي تبي
ابو طلال: انا مو جاي اخذ منك لا ابدن
بس تخبر بيت ابوي القديم الكبير
ابو سعود : ايه من زمان عنه
ابو طلال: ادري احنا ما بعناه لاننا موب بحاجه لفلوس
ابو سعود : صح
ابو طلال: والحين انا ابي حقي منه
ابو سعود : بس كذا ان شاء الله باقول لعبد الرحمن ونشوف كم يطلع للكل منه
ابو طلال: ما تقصر ياخوي وانا عارف انك انت الي دايم بهالامور عشان كذا جيتك علطول
ابو سعود : ابد خل كل شي علي وانا اخوك
ابو طلال: الله يعافيك والحين استأذن باروح
ابو سعود : وين ما تقهويت
ابو طلال: لا مره ثانيه في بيتك ان شاء الله
ابو سعود : يللا اجل هلا
"""""""""""""""""""""""""
في البيت ام طلال مقومه البنات كلهم من 10
وقاعدين يغلسون الحووش وينظفون الشبابيك وشغل كرف صدقي
العزوف : مامي تعبت انا باروح ارتاح
ام طلال: روحي بس نظفي غرفة العيال وعن الدلع
العزوف : مامي والله معاد اقدر
ام طلاال: رنا روحي معاها عاونيها
رنا: موب كفايه الي عندي
ام طلال: حاشا لله موب بنات انتن زبدات من كبر هالبيت الحين
الله يرحم ايام زمان نكرف كرف مهوب طبيعي وما عمرنا تشكينا
العزوف : خلاص خلاص بدا الموال يللا رنا تعالي
رنا : روحي وانا بالحقك
وعالساعه 12 كلهم جالسين والغدا جاهز ومخلصين الشغل كله
حطوا الغدا وجلسوا كلهم يتغذون
بعد الغداء وهم يشربون الشاهي
عبير: طلال يللا نروح الحين
طلال: معليش عبير بس مواعد واحد خليها بعدين
ابو طلال: وين بتروحين له
عبير: باروح لصحارى ابدل
ابو طلال: يفتحون الحين
ام طلال: ههه يحليلك يا عبد العزيز خبرك عتيق الحين ايه يفتحون
ابو طلال: خلاص انا اوديكم وعلى الطريق نشتري لكم بطاقات
العزوف : باروح معاكم
رنا : وانا بعد
ابو طلال: يللا لكم 5 دقايق راح منها الحين 5 ثواني بسرعه
العزوف : ههههههههههه يللا
وراحو البنات يلبسون
بعد ما لبسوا ركبوا السياره عبير قدام والعزوف ورا ابوها
ورنا ورا عبير اول ما طلعوا من الحاره كان فيه بقاله
رنا : يبه هنا يبيعون بطاقات
ابو طلال وقف ونزل يجيب لهم
راح وجاب لهم ورجع
رنا : شوكرن يبه
العزوف: مشكور دادي
عبير: الحمد الله واخيرن جتني الله يعافيك ابوي
ابو طلال: بنات تبون تشوفون مدرستكم الجديده
العزوف : ايه
رنا : لا وش حادنا عالقرف من الحين
ابو طلال: رنا عيب وش هالكلام
رنا : لا ما اقصد يعني بس تعرف الدراسه وثالث يعني لازم اشد حيلي
ابو طلال: عاد ابيك من الاوائل على الرياض
العزوف وعبير فقعوا ضحك: ههههههههههههههههههههههه
العزوف : يبه لو انا كان قلنا ممكن بس هذي العام راسبه في مادتين وهي ثاني ادبي
رنا : انطمي انت بس يا نيرد( نيرد = دافوره)
العزوف : ذكااء فهامه موب مثلك
ابو طلال: لا انا واثق في بنتي ولو بغت قدرت تجيبها هي بس مطنشه ولا من ناحية الذكاء
فهي ادهى منك ياعزييف
رنا: ايه اسمعوا الكلام الصح كلام ابوي حبيبي
فجأه عبير صرخت صرخه قوييييييييييييييه وهي رافعه يدها وتأشر: يبااااااااااااااااااااااااااه
و صوت ارتطام قوي يغطى المكان في ثواني السيارات تجمعت والناس ملتمه وطالبين الاسعاف
وينتظرون
:::::::::::::::::::::::::::::::::::::::::::::::::: :::::::::::::
الساعه 4 العصر في بيت ابو طلال
ام طلال قاعده في الصاله ومو عارفه تجلس رايحه وراجعه وتدور ابو طلال والبنات تأخروا وهي موب عارفه عنهم خبر
وتدق على الجوالات ومقفله تناظر ساعتها شوي وتناظر الباب تستنى احد يدخل
اخر شي استلسمت ودقت على طلال الي كان وقتها طالع في شغل
ام طلال: هلا طلال
طلال: هلا يمه
ام طلال: ياوليدي ابوك وخواتك طالعين من متى ولا بعد رجعوا وادق على جوالاتهم ومقفله
طلال حس انه في شي صاير بس ما حب يخوف امه وهي اصلن باين عليها الخوف : خلاص انتي لا تشيلين هم اكيد البنات اقلقوا ابوي وخلوه يتأخر وما تدرين يمكن جوالاتهم ما فيها شحن
انتي خلي كل شي علي وما عليك كل شي بيصير بخير
ام طلال: ان شاء الله يارب في امان الله
طلال: في امان الكريم
صك طلال الخط وهو مو عارف وش يسوي دق على الجوالات وبعد مقفله
فكر يروح يدورهم بس وين يدورهم فيه
"""""""""""""""""""""""""""""""""""""""""""""" """" "
تفتح عيونها ببطء تحاول تتفح عيونها قامت حست بالم بسيط في يدها التفت عليها لقتها مجبره انا وينني فيه سالت نفسها هالسؤال حاولت تتذكر شاللي صاير ما درت الا بفتحة الباب ودخلت عليها ممرضة
تذكرت صراخ اخواتها تذكرت الحادث
الممرضه : ايوه كويس انتي في قومي
رنا: وين اخواتي وابوي
الممرضه وماسكه معاها سجل وقلم : انتي لازم يعطي معلومات
رنا بعصبيه: اقولك وين ابوي واخواتي بسرعه
الممرضه : كلو موجود كويس انتي بس كلام نمبر قريب انتي عشان فيه سوي كول
رنا استلسمت يوم قالتها اللمرضه كلو كويس وعطتها رقم طلال
راحت الممرضه بتعطي الرقم للمسؤولين وتركت رنا لحالها
رنا تفكر وتناظر حواليها الحمد الله ما جاها شي بس يدها مكسوره يعني الحمد الله اكيد ابوي واخواتي ما فيهم الا شي بسيط
""""""""""""""""""""""""""""""""""""""""
رن جوال طلال اخذه ورد
طلال: الو وينك
سعود : هلا هذاني جاني وش فيك طلال
طلال: لا ما فيني شي ان جيت علمتك
سعود : طيب هذاني داخل
دخل سعود وصك الخط وجلس على الكرسي الي مقابل مكتب طلال
سعود : وش فيك خير شكلك موب طبيعي
طلال: مدري امي دقت تقول ابوي واخواتي طالعين من زمان ولا رجعوا وجوالاتهم مقفله
ياخوفي صاير فيهم شي
سعود : وما دورتهم
طلال: وين ادورهم فيه مالي الا اني اصبر موب اكيد ان فيهم شي ان شاء الله ما فيهم الا العافيه
سعود : بس ولو
وقبل ما يكمل سعود كلامه رن جوال طلال مره ثانيه
طلال الله يستر رقم غريب
طلال: الو
المتصل: الأخ طلال عبد العزيز محمد
طلال: ايه نعم
المتصل : لو سمحت ممكن حضورك ضروري لمستشفى الحمادي
طلال بخوف: ليه وش صاير فيه احد صار له شي
المتصل : انت تعال وتعرف كل شي
طلال وهو يقوم : طيب يللا جاي وصك الخط
سعود : على وين طلال
طلال: المستشفى داقين يقولون تعال انا حاسني قلبي شي صاير
سعود : وين بتروح خذني معاك
وطلعوا مع بعض
دخلوا المستشفى وسئلوا الاستعلامات ودلوهم على الدكتور
الدكتور: طلال عبد العزيز
طلال: ايه نعم
الدكتور : ياخوك خليك مؤمن بقضاء الله قدره
طلال ساكت وينتظره يكمله
الدكتور: عظم الله اجرك في ابوك
طلال يناظر في الدكتور ومو مستوعب كلامه حط يده على كتف سعود الي كان واقف معاه
حس نفسه بيطيح من قوة الصدمه نزل نظره للأرض وبدت دموعه تنهمر ما قدر يوقفها
سعود : طيب واللي كانوا معاه
الدكتور: اصابات خفيفه وان شاء الله انهم بخير
سعود : طلال
طلال اخذ شماغه وتلطم ما يقدر يمنع دموعه وصعبه في نفس الوقت رجال يبكي قدام خلق الله
سعود كان في موقف صعب ما يبي يضعف ما يبي ينهار وهو يشوفه ولد عمه كذا قدامه
سعود : طلال خل ايمانك بالله قوي
طلال: سعود ابوي ما مات صح شكلهم مخربطين اصلن ابوي كان معانا اليوم يتغدى ويسولف ويضحك ما فيه شي
سعود : طلال كلنا بنموت وهذا شي لازم نتقبله
طلال: لا اكيد تشابه اسمااء
وراح عن سعود للكاونتر الي قدام
طلال: انتم متأكدين عبد العزيز محمد
اللموظف اللي بالكاونتر مو عارف كيف يتصرف وساكت
انهار طلال وطاح على الارض جاثي على ركبتيه وهو يبكي : لا لا مو عبد العزيز عبد الرحمن هو غلط
سعود والدمعه بعينه يسحبه ويقومه: خلاص يا طلال هذا امر ربك .. فكر باخواتك واهللك الحين مالهم الا الله ثم انت
اذا انت سويت كذا هم شو بيصير حالهم
طلال: بس يا سعود ما اقدر ما اقدر هذا ابوي
سعود : لا تقدر وانت قدها وقدود يا طلال
طلال: واخواتي وينهم الحين
سعود : اخواتك بخير لا تشيل هم انت واحمد ربك على كل حال اخذ ابوك بس بقي اخواتك
طلال: امشي بسئلهم عن خواتي
راح طلال يسئلهم وسعود اخذ جواله
وعلم ابوه بالخبر اللي انصدم وبدوره علم باقي اخوانه عشان يتخذون باقي الاجرائات
"""""""""""""""""""""""""""""""""""""""""""""" """" """""""
مرت أيام العزاء الثلاث كئيبه وحزينه على الكل ام طلال اللي يشوفها يقول جسد بلا روح كانت ما تكلم احد الا كلمه ورد غطاها
رنا وعبير ما جاهم شي الا كسور ورضوض بسيطه اما العزوف
العزوف كانت من جهة الحادث وهي اللي تأثرت اكثر شي
طلال حاول يكون قوي بكل ما يقدر
اما مشعل ما كان مصدق الخبر كان لسه عنده يقين انوو ابوه مسافر وبيرجع في يوم من الايام
بكى يوم شافهم يبكون وصااح بس ما اقتنع داخليا انو ابوه مات وماله رجعه
عبير ورنا جالسين بغرفتهم وساكتين عبير تقرا قران ورنا تبكي كلما تذكرت الحادث وتسكت شوي
رنا: عبير وشلون... تذكرين عبير ابوي كان قاعد وكنا مارين من الاشاره
بس هو اللي كان السبب قاطع الاشاره ومخالف وبسبته صار الحادث
عبير: رنا استغفري ربك كل شي صار بامر الله ومحد هو السبب
رنا وهي تصيح: بس عبير حرام
عبير: رنا هذا اعتراض على القضاء والقدر ما يجوز كلامك هذا
رنا: يعني وشلون
عبير: يارنا حتى الولد الي صدمنا مات خلاص الله يرحمه
رنا : عبير ما اقدر ابوي هذا ابوي
عبير: تصيح وضامها اختها خلاص يارنا تكفين
رنا: والله ما اقدر شفيك ما تفهمين
عبير: احمدي ربك احنا ماجانا شي شرايك بحال العزوف فقدت ابوها وتشوهت
رنا: مسكينه اختي
عبير: ادعي ربك يطلعها من اللي هي فيه
رنا: الصدمه شديده عليها
عبير: بس الدكاتره يقولون ما فيها أي خلل عضوي هي بس من صدمتها ما تتكلم
رنا وهي تمسح دموعها: ان شاء الله ترجع مثل اول
عبير: وازين بعد بس هي محتاجه كم عمليه تجميل
رنا صياحها زاد: بعد هي كانت من جهة الحادث واللي جاها مو شويه
عبير: خلاص رنا تكفين خليك اقوى من كذا عالاقل عشان امي
رنا وهي تبكي: وامي امي معاد صارت مثل اول
عبير: بس الحياة تدور يارنا وان شاء الله كلنا حياتنا بتتغير
رنا: بس
عبير: ولا بس الحين قومي مسحي دموعك وامشي نطلع برا في الصاله امي وخالتي جواهر هناك وبعد شوي بنروح للعزوف بالمستشفى
رنا: ان شاء الله
عبير: رنا تكفين خليك قويه مابي العزوف ولا امي يشوفونك كذا ترا ماراح ينفعهم بيزيدهم بالي هم فيه
رنا هزت راسها دليل على موافقتها
"""""""""""""""""""""""""""""""""""""""
في بيت ابو سعود العمه رجا كانت نايمه عندهم لانها جت الرياض عشان العزا
لينا : يمه يللا تأخرنا باروح للعزوف
ام سعود : يللا هذاني اصبري بس البس عبايتي
لينا : وعمتي رجا وبنتها
ام سعود : صح النوم راحوا من زمان الحين بيرجعون
لينا : يمه واحنا من بيودينا
ام سعود : سعود بيودينا
لينا : ووينه سعود
ام سعود : الحين بينزل
سعود وهو نازل من الدرج : هذاني جيت
وطلعوا
سعود الشخص الوحيد الي ما كان مبين عليه أي نوع من انواع الحزن طول ايام العزااء
كلهم استغربوا منه هالشي كانوا متوقعين ينهار يبكي عالاقل ينزل دمعه بس سعود ما سوا أي شي من هالاشياء كانت ملامح وجهه قاسيه خاليه من أي تعبير يمكن كان يبي يكون قوي قدام طلال عشان ولد عمه ما يضعف خصوصا انه صار الحين مسؤول عن امه واخواته الثلاث واخوه
وقف سعود بسيارته قدام باب المستشفى ونزلت ام سعود ولينا معاها
""""""""""""""""""""""""
في المستشفى كانت هدى جايه هي وامها وهم داخلين
صادفوا طلال
ام فيصل بنظرها الضعيف: هدى موب هذا طلال ..؟
هدى وهي ما تدري وينها فيه من زمان ما شافت طلال وجها لوجه : ايه يمه
ام فيصل : باروح اسلم عليه
وراحت تسلم وهدى واقفه وراها على جنب شوي
ام فيصل : عظم الله اجرك ياوليدي
طلال: تجرنا واجرك ياخالتي
ام فيصل : شخبارك
طلال: الحمد الله بخير
ام فيصل : عسا ما احد داخل
طلال: الا فيه عمتي رجا وبنتها
ام فيصل : اجل يللا عن اذنك
وهي جايه بتدخل طلعت العمه رجا وفدوى
ام فيصل : هلا رجا وسلمت عليها
فدوى يوم شافت طلال ما رفعت عينها عنه
حتى وهو حزين وسيم
هدى كانت مراقبه طلال مره اعجبها موقفه وثباته كانت متوقعه انه بيصير اضعف من كذا وفي نفس الوقت ما عجبتها نظرات فدوى لطلال وبعدين تداركت الأمر
هدى بنفسها : ياربي انا شقاعده افكر فيه الناس بعزا وابوهم ميت وانا تفكيري كذا ياربي ما اسخفني
سلمت على رجا وبنتها وخلت امها معاهم تستفسر عن حالهم وسحبت نفسها ودخلت
"""""""""""""""""""""""""""""""""
العزوف الناس تدخل عليها وتطلع وهي من وقت الحادث ما نطقت بحرف
امها واخواتها خايفين عليها حاول المستحيل يبونها تتكلم ما تكلمت
تشوف الناس وودها لو تطردهم ودها لو تقولهم وخروا عني
وجهها مربط كله بشاش حتى مو عارفه وش بيصير شكلها
كل الي تعرفه انها تشوهت وابوها مات
دخلت ام فيصل وسلمت على اختها وبناتها
ام طلال وبعيد عن مسمع العزوف والدمعه بعيونها: يا اختي مدري شفيها هالبنت ما نطقت بحرف
ام فيصل : استهدي بالله انتم سألتوا الدكتور
ام طلال: يقول ما فيه اي مشاكل عضويه
ام فيصل : تلاقين نفسيتها تعبانه مره وحده تتشوه وابوها يروح اصبري وادعي ربك والله كريم
ام طلال: وهذاني صابره وما اودي اصيح قدامها
ام فيصل : زين تسوين ياوخيتي
""""""""""""""""""""""""""""""""""""
يوم الجمعه اخر يوم بالصيف بكرا الناس كلها بتروح المدارس
وبتبدا سنه دراسيه جديده
كانت الساعه تشير الى الرابعه عصرا
دخل بيته وهو مره تعبان ياربي وش هالناس حتى يوم الجمعه مخلينه يشتغل
استغرب في نفسه ما سمع ازعاج قال يمكن مرته وعياله طالعين بيت اهل مرته او شي
رمى بنفسه على اول كنبه في الصاله وحاول يرتاح لقى مجموعة جرايد
على الطاوله الصغيره اللي كانت في النص
فتح جريدة الجزيره وهو يقلب فيها لفت نظره خبر نعي
قراه مره مرتين ثلاث
حمود يكلم نفسه بصوت عالي شوي: ياربي مو معقول: عبدالعزيز محمد
واللي كاتبين النعي اخوان الفقيد عبد الرحمن وعبد الله
وهو قاعد يناظر بالجريده انتبه ان الجريده قديمه شوي لها يومين تقريبا
حمود : يعني الحين معقول هو ! ما فيه حل الا اني اتأكد
ودق على ارقام الجوال اللي كانت مدونه بالنعي للتعزيه
حمود : بادق على ولده واعزيه واشوف واتأكد
"""""""""""""""""""""""""""""""""
هدى كانت جالسه مع امها ومتضايقه رجل خالتها مات وبنات خالتها في حاله ما يعلم فيها الا الله
هدى: يمه اليوم باروح بيت خالتي ما اقدر اخلي البنات وهم في حاله زي كذا
ام فيصل : يابنيتي العزوف مرقده ورنا وعبير كل يوم رايحين لاختهم ما يجون الا متى وين تروحين وتثقلين عليهم
هدى: خلاص يمه حطيني معاهم بالمستشفى
ام فيصل : طيب ان شاء الله
هيفااء كانت نازله من فوق
نزلت وجلست : يمه طفشانه ابي اطلع
ام فيصل بعصبيه : وين تطلعين له
هيفااء: أي مكان طفشت واليوم الجمعه وبكره بنداوم
ام فيصل : ما تستحين على وجهك انتي رجل خالتك متوفي وبناتها حالتهم حاله وانتي تقولين باطلع قومي اذلفي عن وجهي بس
هيفااء: اووه واحنا شعلينا من الناس
ام فيصل : هدوو وخري اختك عن وجهي لاثور فيها
هيفااء : خلاص رايحه وراحت فووق
دخلت هيفااء غرفتها وهي مره منقهره
جلست شوي تفكر وهي حاقده
على خالتها وبناتها بسبتهم ما طلعت اليوم وهي طفشانه
سمعت رنة جوالها كانت رنة خاصه لبدر ابتسمت وراحت
ترد
"""""""""""""""""""""""""""
في بيت بو سعود الحريم كانوا قاعدين بالصاله
وكلما تذكروا المرحوم قعدت رجا تصيح
رجا عمتهم اللي كان الكل يتوقع تكون ثابته هي اللي انهارت عليهم
واغمي عليها اول ما سمعت الخبر
واول ما قامت اخذت اغراضها وعيالها وجت مع رجلها للرياض عشان تكون متواجده بعزا اخوها
نزلت لينا من فوق وهي متضايقه
ام سعود : هلا لينا تعالي اقعدي
لينا: طيب
رجا: وش هااللبس عليك يا ليين ما تستحين انتي
لينا : ليه وش فيه بنطلون عادي وتيشيرت
رجا : لا يا شريفه وشلون ترضين على بنتك تلبس هاللبس
يعني البنطلون لحاله ما نبيه لا بال مثل هاللي لابسته ضيق
ام سعود : خلاص لينا روحي غيري
لينا قامت وهي متضايقه اكثر
وهي راقيه فووق صادفت سعود
سعود : وش فيك لينا تبكين
لينا : من القهر
سعود : سلامات وش اللي قاهرك
لينا : ووش الي ما يقهرني عمي وراح وبنت عمي الله اعلم بحالها وفوق كذاا عمتي رجا عندنا وشكلها مو ناويه تروح للشرقيه وعلى كل صغيره وكبيره هالعمه مستقعده لي
سعود وبحزن: خلاص طيب لا تبكين وشوفي غيرك عالاقل موب انتي اللي فقدتي ابوك ولا تشوهتي بحادث
لينا : ياليتها كانت انا ولا العزوف وقعدت تصيح
سعود : ياعيني كل هذا محبه ترا اغار
لينا ابتسمت
سعود ايه خليك كذا وابتسمي انا وين الاقها منه منك ولا من طلال ولا من مين كل الدنيا محزنين ويبكون وانا احاول ارفع معنوياتهم
لينا : قلبك قاسي ما فيه احساس
سعود : انا يالينا تقولين عني كذا بالعكس ما تدرين انا وشلون متأثر
عمي والله يرحمه كان زي ابوي والعزوف وانتي عارف وش العزوف بالنسبه لي
لينا : ادري يا اخوي
سعود : والحين لا يكثر بس انا طالع
لينا : تروح وترد بالسلامه لا تسرع وانت تسوق
سعود : لا توصين حريص في امان الله
""""""""""""""""""""""""""""""""""""""""
طلال كان قاعد في صالة بيتهم يستنى سعود لانه مواعده بيجيه
وفجأه رن جواله
""""""""""""""""""""""""""""""""""
طلال كان قاعد وفجأه رن جواله اخذه ورد
حمود : السلام عليكم
طلال: وعليكم السلام
حمود: طلال عبد العزيز؟
طلال: ايه انا طلال من معاي
حمود بنفسه وولد طلال اكيد هم : عظم الله اجرك بابوك
طلال: اجرنا واجرك يا اخوي
حمود : يا ولدي حبيت اقبلك ضروري في موضوع باتكلم فيه معاك
طلال: وليه ما تقوله الحين
حمود : لا ما يجي انت عطني عنوانك وانا باكون موجود بالوقت اللي فيه
طلال: طيب اليوم انا شبه فاضي تقدر تمرني
حمود : اليوم اليوم
"""""""""""""""""""""""""""""""""""""""""""""" ""
رنا وعبيرعالمغرب كذا كانوا جالسين بغرفتهم
رنا : عبير بكره الدراسه
عبير: واذا صار يعني
رنا : مو قادره اداوم مراح اروح
عبير: احمدي ربك انتي قادره وان شاء الله ربي بيوفقك العزوف هي اللي بتروح عليها السنه
رنا: ما اقدر يا عبير مستحيل اداوم انا شكلي باجلس في البيت بس
عبير : رنااا
رنا: ...
عبير نزلت دمعه من عيونها: رنا انا ما ودي اذكرك بشي ولا ودي اشوفك تبكين
رنا قلبها انقبض من سمعت عبير تتكلم كذا
عبير: انتي عارفه ابوي قبل لا يصير الحادث وش اخر كلامه ووش كان يقول
رنا صاحت خلاص : ادري ادري بس صعب علي مرره صعب
عبير: ما فيه شي صعب
رنا: بس بكره مراح اداوم من اول يوم
عبير: براحتك يالغلااا بس ما بي اسمع منك طاري جلسة البيت
رنا : ان شاء الله
"""""""""""""""""""""""""""""""""""""""""""""" """" """""""""""