لبسوا العزوف ولينا وخلصوا وجوا بيطلعون الاعبير وفدوى الي كانوا مقررين يجلسون في البيت لانهم ما يدرون وش ام الدعوى
طلعت لينا ورنا والعزوف وجوا بينزلون تحت تحجبوا ونزلوا
اول من شافهم مشعل الي نط لهم علطول: هيي انتم تقول امي تغطوا بجلال عشان عمتكم رجا
رنا: خير ان شاء الله ماابي
العزوف : يا بنت الحلال امشي بس ناخذ جلال لا تخربين علينا الطلعه
رنا: خلااص انا باستناكم فوق اذا جييتوا تروحون ارسلوا لي واحد من البزران يعلمني
مشعل: من البزران ؟
رنا: يووه موب انت اقصد شوقي وخلوده
مشعل: ايه اشوى
العزوف : لينا امشي بس ما نبي نجلس معاهم خلينا نطلع نجلس بالملحق اللي بالحوش من ورا
ودقي على اخوك اذا جوا يطلعون يعلمونا نطلع من ورا عشان عبايتك
لينا: ايه والله صادقه
طلعوا ومروا من المطبخ
العزوف: جوعااانه
لينا : لا لا تاكلين شي عشان نخليهم يمرون على مطعم
العزوف : شف الدبه ما علي منك انا باكل
لينا: بكيفك
العزوف : سوت لها سندويش جبن كيري وفتحت الثلاجه تدور شي تشربه
العزوف : غريبه عندهم ديو
لينا : خذيه اشربيه
العزوف : لا ماله داعي اخاف لاحد ويبيه ولا مشعل وتركي حاطينه هنا وبيشغلونا عنده
لينا: خوذيه بس ونشتري من هناك ونرجعه مكانه
العزوف : اوكيه وجلست عالطاوله تاكل
شوي رن جوال لينا وطلعت ترد عليه من برا
العزوف : قاعده تاكل ولا جابت خبرها
::::::::::::::::::::::
برا بالحوش
سعود: يللا ترا الساعه صارت 4
لينا: واذا يعني اصلن حر خلينا نروح على المغرب ازين
سعود : و 4 وشي الظهر مثلا
لينا : لا بس قصدي 5 كذا
سعود حس صوت لينا متغير شوي: لينا وش فيك
لينا : ما فيني شي
سعود : افا يا لينا تخبين علي وانا اخوك
لينا : ياخي قلت لك ما فيني شي اذا جيتوا تطلعون دق علي دقه واقطع يللا باي
سعود : مع السلامه
لينا كان ودها تقول له عن العزوف بس مب عارفه شلون ودها هو يسالها شي صعب عليها تفتح الموضوع وما تعرف شلون تتكلم فيه
::::::::::::::::::::::::::::::::::::::
عالساعه اربع ونص وبعد ما الكل جهزوا الا عبير وفدوى الي للاسف ما كانوا يدرون ان العمه موافقه وقرروا يجلسون في البيت
خالد وسعود وطلال جالسين بالخيمه الي برا يستنون البنات يخلصون وشوي يرن جوال خالد
خالد: ايه لا ان شاء الله .. كلها ساعه بالكثيرساعتين وانا عندكم .. هههه ولا يهمك يا شيخ
وصك الخط
سعود : هاه يللا نمشي بس
طلال: دقيقه ادق عليهم ودق على امه
طلال: هلا يمه شوفي البنات وللي يرحم والديك عن النار قولي لهم يطلعون
ام طلال: يللا اجل باروح اشوف وينهم
سئلت عن العزوف ولينا وقالوا لها انهم برا بالحوش
ارسلت لهم خلود تناديهم
وطلعت فوق لرنا وعبير وفدوى
اول ما دخلت الصاله الي فوق
فدوى: هلا والله انورت واسفرت
عبير: تو ما نورت الصاله والله بحضورك يا يمه
ام طلال: وش عندهن المصلحجيات
فدوى : افا عليك يا خاله انحن مصلحجيات
عبير: حلوووه يا فدوى منك انحن هذي شفتي يمه من شدة حبها لك تكلمك بنفس لهجتك
ام طلال: يا حبي لها فدوى بس بنت ولا كل البنات
فدوى استحت
ام طلال: وراكن ما لبستن تو طلال داق علي يقول يللا
عبير: ما راح نروح
ام طلال: لا والله اجل وشهوله جايين عشان تجلسون
عبير: ابد عمتي رجا ما رضت فدوى تروح وقلت اجلس معاها اوسع صدرها
ام طلال: من قاله
عبير: خلود
ام طلال: وانتم تمشون على كلام بزران امها موافقه وقايله لخالد بعد يروح معاها
عبير: احلفي يمه
ام طلال: شف الي ما تستحي يعني انا باكذب
عبير : قومي فدوى خلينا نلبس بس لا يطلعون عنا يمه وقفيهم
فدوى: يللا تعالي في غرفتي
ام طلال تضحك على شكلهم وهم يراكضون: ان شاء الله وقامت
""""""""""""""""""""""""""""""""""
عادل كان جالس بغرفته عالنت لانه من جد مدمن نت
عادل يسولف مع رائد بالمسن
]¦[يّاقَلّبيْ لّيّشْ مّاتِرتّاحْ خَلْ الحُبْ لأَصحْابَه]¦[: لا مو كذا ياخي وربي مالي خلق طلعه
صحيح القدر فرقنا وتاهت بيننا الأعذار بس القلب ياخلي أبد ما نامت أشواقه: عادل ياخي وراك انت كذا ما قد قلنا لك نطلع تقول لا ترا موب زين تصير انطوائي
]¦[يّاقَلّبيْ لّيّشْ مّاتِرتّاحْ خَلْ الحُبْ لأَصحْابَه]¦[: بس اليوم ما اشتهي الطلعه وغير كذ ا امي قالت لي رح مع اختك وقلت لها لا واجي اطلع معاكم
صحيح القدر فرقنا وتاهت بيننا الأعذار بس القلب ياخلي أبد ما نامت أشواقه :الي يسمعك يقول اهلك بيحاسبونك عالروحه والجيه
]¦[يّاقَلّبيْ لّيّشْ مّاتِرتّاحْ خَلْ الحُبْ لأَصحْابَه]¦[: خلاص طيب وين نروح له
صحيح القدر فرقنا وتاهت بيننا الأعذار بس القلب ياخلي أبد ما نامت أشواقه: ابد بنفرفر في هالاسواق كالعاده
]¦[يّاقَلّبيْ لّيّشْ مّاتِرتّاحْ خَلْ الحُبْ لأَصحْابَه]¦[: اوكيه بالبس وامر عليك باي
صحيح القدر فرقنا وتاهت بيننا الأعذار بس القلب ياخلي أبد ما نامت أشواقه : انتظرك في امان الله
مشعل: تركي متى بيطلعون
تركي : وش دراني بس العيال برا
مشعل: اجل اكيد يستنون البنات امشي نرقا فوق نناديهم
تركي: يللا
رقوا فوق واستعجلوا البنات وقعدوا يستنونهم بالصاله الي برا عند التي في
خلود كانت جالسه تشوف سبيس تون قبل لا يجون
مشعل : اقول تركي ما شفنا نتيجة مباراة امس
تركي : أي مباراة؟
مشعل يغمز له : المباراة هذيك
تركي : هاه ايه
وياخذ مشعل الريموت ويغير
خلود : خير انا كنت هنا قبلك
مشعل: انا الي معاي الريموت وبكيفي
خلود سكتت وراحت تدور شوق
بس ام خلود قالت ماله داعي ياخذون شوقي معاهم
رنا الي انت جالسه بالغرفه تشوف التي في لفت نظرها ان الساعه صارت 4 ونص وقالت اكيد انهم الحين بيطلعون
رنا: شكلهم طلعوا وسحبوا علي باقوم اجلس مع عبير وفدوى في الصاله اصرف لي
رنا ما غيرت بيجامتها وطلعت للصاله الي برا على اساس عبير وفدوى موب رايحين وجالسين برا
طلعت لقت مشعل وتركي سئلتهم قالوا العزوف ولينا تحت جاهزين وعبير وفدوى الحين يلبسون
رنا : بيروحون عبير وفدوى
مشعل : ايه
رنا : هات الريموت باكمل مسلسلي
مشعل: مابي
رنا : هات ولا ترا بافضحك عن الي سويته ذيك المره باستراحة خالتي
مشعل: اصلن ما سويت شي يستاهل انفضح بسبته
رنا تناظره بنظرات
مشعل: بس انا باعطيك الريموت عشانك اختي الكبيره خوذي ويمده لها
رنا غيرت ورجعت على مسلسلها
مشعل : ما اشوفك لبستي ما راح تروحين
رنا : الا بس شوي ويخلص المسلسل
:::::::::::::::::::::::::
عادل لبس وكشخ وجا بيطلع ما قال شي لانه عارف ان البنات كلهم طالعين وما توقع يكون احد بالصاله
عادل طلع من غرفته وكان الباب حق الجناح مفتوح شوي عالصاله وبدون قصد منه طبعا شاف رنا
عادل بنفسه من القمر الي هنا.: احم احم
رنا : تخربطت ما تحجبت ولا شي فركت علطول ركض لغرفتها
اما مشعل : هههههههههههههههههههههههههههههه هلا عادل كويس انك جيت وطيرتها ازعجتنا رنا هي وهالمسلسل الي مدري وش يبي
عادل في نفسه رنا بنت خالي عبد العزيز صارت كذا اذكرها يوم عمرها 11 كانت بثره وقلق
مشعل : هيي عدوول وين سرحت
عادل : هاه لا ولا شي
مشعل : اها على وين العزم ان شاء الله
عادل : باطلع انا وخويي
مشعل : يعني ما راح تروح معانا
عادل : لا عازمني وفشيله
مشعل: اوكيه الله معاك
عادل : مع السلامه ونزل
رنا في غرفتها
ياربي وش ذا الفشله لا وشافني كذا ياليتني رحت ولبست وكشخت ورجعت جلست اما شكلي بالبيجاما والله يفشل وتطالع نفسها بالمرايه ... وبكل غرور : بس وربي قمر
والله يحليله عدوول كبر وصار يشبه خالد بس الحق ينقال عادل اوسم بكثير ياربي انا وش قاعده اقول شكلي نسيت انه ولد عمتي رجا
خل اكمل لبسي لا اتاخر ازين لي
بعد نص ساعه الكل كان جاهز
العزوف ولينا بعد ما ملوا ودخلوا للصاله الي جوا
العزوف : لينا ملينا واحنا جالسين كذا من الظهر
لينا ما امداها تتكلم الا جوا خلود والبنات وكلهم جاهزين
العزوف تقصد فدوى وعبير: بتروحون معنا
عبير: ايه وافقت عمتي رجا
العزوف : اوكيه بس على كذا احنا جيش بناخذ 3 سيارات وبالطقاق بتكفي
عبير: موب مشكله
سياره طلال وسيارة سعود وسيارة خالد ونتقسم عليهم
العزوف تتهرب : اقولكم انا من الحين باركب مع سعود
لينا: ياهوو ترا فيه ريالات مشقوقه هنا
العزوف : ليش وش قلت
لينا تقصر صوتها : باركب مع سعود
العزوف : هاه انا قلت كذا لا والله اني قايله مع طلال
فدوى وعبير ضحكوا عليها الي في قلبها على لسانها علطول
طلعوا وركبوا
العزوف ورنا مع طلال ومشعل
وخالد وفدوى وعبير لان فدوى اصرت انوو عبير تركب معاهم
ولينا مع سعود وخلود وتركي
وراحوااا للبحر
::::::::::::::::::::::::::::
عبيرطول الطريق تفكر في خالد هو صح حلو بس باين عليه من النوع البارد الثقيل
ما تدري ليش تفكر فيه معقوله حطت في بالها انوو ممكن يكون زوج لها
حاولت تطرد هالافكار خصوصا انو على حد علمها ما بعد صار شي اكيد
:::::::::::::::::::::::
العزوف تفكر في سعود ما ودها تشوفه قدام عيونها تحس انها اشتاقت له ومن زمان عنها
وان نظراتها بتفضحها زي ما فضحها لسانها قدام البنات عشان كذا قررت ما تركب معاه زي العاده
:::::::::::::::::::::
لينا ودها تقول لسعود عن العزوف ووش قالت ودها تفهمه الصح عشان ما يفهم تصرفات العزوف وصدها له بشكل غلط وشايله هم في قلبها لانوو تحس انو من واجبها انها توضح لهم
خصوصا انها تعتبر الوحيده الي تعرف مشاعر العزوف وسعود على حقيقتها وبشكل واضح
::::::::::::::::::::::
فدوى مستغربه ومستنكره انوو امها وافقت بس مرره مبسوطه ما تنكر اعجابها طلال
لفت نظرها كشاب وسيم وطيب وبعد عشان اخواته دايم يمدحونه
:::::::::::::::::::::::::
رنا منقهره لانوو عادل ما جا معاهم ما تدري ليش تبي تشوفه بعد ودها تسمع صوته ولا تعرف أي شي عنه
""""""""""""""""""""""
خلود تفكر وشلون ترد لشعولي حركة الريموت << يا ملحها بزره
"""""""""""""""""""""""""
العزوف ما تحب جو الرطوبه وما بغت تنزل
طلال: يعني جايبينك عشان تجلسين بالسياره
العزوف: طلال خلاص يكفي اني اشوف البحر من هنا موب لازم انزل شغل المكيف وخلني هنا
طلال: الشرهه موب عليك على الي يطلعك يللا رنا
نزلوا وراحوا مشعل وتركي مع بعض
تركي : خلينا ننادي خلود تجلس معانا
مشعل: غريبه انت قلتها قبلي
تركي : ليش كنت بتناديها يعني
مشعل:ليش احنا عندنا وناسه غيرها
تركي : شف النذل
مشعل: لا تنسى انها توها عبدتنا
تركي : خخخخخخ ايه صح
طلال وقف مع خالد يسولفون
وعبير ورنا وفدوى مع بعض على جنب
اما سعود ما خلا لينا تروح معاهم
وفي السياره
لينا: ابي اروح للعزوف
سعود : طيب شوي مب طايره
لينا: طيب ليش مو راضي تخليني اروح
سعود : انا اخوك وادرى بك ابي اعرف وش فيك وما فيه روحه لمن تقولين
لينا : ياخي قلت لك ما فيني شي
سعود : الا فيه
لينا جت بتروح عنه بس سعود مسك يدها بقوه
سعود : وين رايحه قلت لك ما فيه
لينا خلاص شوي تصيح ياخي قلت لك وخر عني وبدت تخربط انتم كلكم ما تفهمون هذي العزوف بنت عمي انا احبها
بس هي حرام صاحت بس انا ما قدرت تحسبني نمت وقعدت تصيح
سعود : خلاص لينا هدي اعصابك وفهميني وش صاير انا والله مو قصدي اصيحك بس ابي افهم وش صاير عشان اساعدك
ووسكتوا كذا خمس دقايق
لينا وبعد ما هدت شوي
قالت لسعود عن كل الي صار
سعود وبعصبيه: انا بافهم بنت عمك ذي وشلون تفكر يعني معقوله انا تحسبني كذا
لينا : لا انت ناسي انك قلت لي بتساعد لا تعصب
سعود : وشلون ما اعصب عليها وهي تفكيرها غبي لهالدرجه
لينا : لامو غبي انا لو مكانها بافكر بنفس الشي
سعود : صدق بنات ناقصات عقل ودين
لينا ضحكت
سعود : واخيرن ضحكتي ليش وش يضحك
لينا : لا بس شكلك يضحك كل ما تقول هالجمله تحس انك صدق تعاني من البنات
سعود : ههههههههه الله يرجك حتى وانتي يقالك تصيحين ومسويه مآساة تعلقين
لينا : امشي بس خلينا ننزل
ونزلوااااااااا
راحت لينا مع باقي البنات
"""""""""""""""""""
تركي : اقول مشعل موب مشتهي ديو
مشعل: الا والله ومعاي 5 ريال من امس مدري وش اسوي فيها
خلود ساكته ما تدري هم على وش ناوين
تركي : اقول مشعل يا بعد البقاله هناااك مشوار نروح لها
مشعل: ايه والله مره بعيده ويناظرون خلود
خلود فهمت السالفه وجت بتروح عنهم
مشعل: تراك لسه عبدتنا خوذي هذي 5 روحي جيبي فيها كلها ديو
خلود انقهرت الحين هي يقالها بترد حركته وهو يزود عليها بس راحت وسكتت
"""""""""""""""""""""""""
جالس لحاله يتامل في البحر و يفكر وشلون يفهمها عن وجهة نظره وموب عارف شلون
التفت لجهة البنات ولقاهم 4 بس استغرب انوو وحده ناقصه ويوم دقق عرف انها العزوف
لان عبايتها معروفه على اطرافها زهري
التفت للجهه الثانيه ولقاها جالسه لحالها في مكان ما يشوفونها الباقيين قال يمكنها جالسه لحالها ومتضايقه من امس وكذا
راح لها كانت هي معطيته ظهرها وواقفه تتفرج عالبحر
سعود : ادري ان جيتي غلط بس يا عزوف لازم تفهمين
انا مابيك تتكلمين ابي منك بس تسمعين
سعود : العزوف انا عمري ما فكرت فيك عشانك بس بنت عمي لا والله
ولا فكرت فيك عشان شي
سعود : انا بس حبيتك ومو بكيفي اني حبيتك
سعود : انا مدري ليش انتي كنتي تعامليني كذا ومع ذلك ما عمري فكرت انوو كره قلت عايدي كل البنات يتثيقلون ويتغلون
وسكت شوي وبعدين كمل
سعود : بس لينا امس قالت لي عن الي صار وبصراحه ...... ولسه جاي بيكمل
الا البنت قامت من مكانها وقامت وخلته
سعودوش فيها ذي شكلها ما اعجبها كلامي ويناظرها راحت مع جهه ثانيه
وقاعده تكلم حرمه كبيره شوي
سعود في نفسه وش فيها ذي ومن هالحرمه ما اخبر معانا حريم ويوم رفع عيونه يناظر لعيونه اكتشف انو لون عيون البنت عسلي موب اخضر مثل العزوف
سعود انحرج من الموقف البايخ يعني الي كنت قاعد ابربر عليها واخربط في الاخير مب هي العزوف اجل العزوف وينها؟
واخذ جواله ودق على لينا
لينا : هلا والله
سعود : العزوف وينها
لينا في السياره
سعود : باللهي ووش مجلسها في السياره
لينا: ما تحب الرطوبه
سعود : والله من الدلع والمصاخه بس من جد بنات
لينا : ههههههه يكفي عاد كفايه حقد علينا
سعود : اقول بس باي وراح جلس مع طلال وخالد وطول الوقت ساكت متفشل من الموقف البايخ الي صار له
:::::::::::::::
العزوف كانت جالسه بالسياره ومشغله الام بي 3 حقها وتسمع ميوزك ولا داريه عن أي شي حولها
يوم جا عالساعه 6 كذا وجوا بيطلعون
مشعل: اوكيه البقاله بعيده بس خلود ما بعد جت ليش؟
تركي : مدري لا يكون ضاعت
مشعل : لا ان شاء الله
تركي : والله بيهاوشونا هواش
مشعل: اقول سوي نفسك ما تدري عنها بس
تركي : اختي وشلون اسوي مدري عنها
مشعل: انت سوي نفسك ما تدري وانا باروح ادورها
تركي : الحين بيركبون السياره
مشعل راح يركض ولا اهتم له
خالد وفدوى وعبير راحواا وباقي سعود وطلال
طلال: تركي وين مشعل وخلود
تركي : مدري
طلال: وشلون ما تدري وين راحوا له
تركي : البقاله ويأشر لها
طلال: يا سلام هماني قايلكم لا تتعدون هالمنطقه انا وش اسوي فيكم بس
تركي: دق على جوال مشعل
طلال يدق على جوال مشعل ولا يمكن الاتصال به
طلال: ياربي وش هالوهقه من جد غلطان الي يطلع مع بزران اركب انت بس
ركب تركي ولا قال شي
وطلال راح يدور عليهم
""""""""""""""""""""""""""""""""""""
في سيارة سعووود وبعد ما ركب تركي
سعود : خلود كانت جايه معانا ولا؟
لينا : ايه
سعود: ترووك وين خلود؟
تركي : هاه مدري
سعود : شلون ما تدري ويلتفت على ورا ما لقى طلال بسيارته
سعود : وطلال وينه
تركي : راح يدورها
سعود : لحوول يعني مطولين احنا هنا
لينا: يعني شلون الحين خربت مخططاتي مانا بمارين على مطعم ناكل شي
سعود : البنت ضايعه وتقولين مخططات اصص بس
دق سعود على طلال وقال طلال انوو قاعد يدورها وان شاء الله بيلقاها
واكيد انها راحت مع مشعل منا ولا منا
""""""""""""""""""""""""""""
بعيد وعند خلووود
خلود بنفسها: ياربي الحين انا وش اسوي وحست ان دموعها خلاص بتنزل ما تدري وينهم فيه لا مابي اصييح مابي موب مشعلووه الي يصيحني والله لاعلم عليهم ابوي واقول انهم مشغليني عندهم وبسبتهم ضعت.. ورجعت عادت الكلمه.. اعلم ابوي ونزلت دموعها خلاص
هذا ان رجعت لاهلي اصلن وقعدت على كرسي تصيح وتشاهق
::::::::::::::::::::::::
على فرشة كانت جنب مكان خلود
شادن : شوفي هالبنت حرام ياربي قاعده تصيح شكلها مضيعه اهلها ..امشي نروح نسئلها يمكن تعرف رقمهم وندق عليهم ولا شي
ميس ومركزه نظرها على جوالها : لا واحنا وش دخلنا فيها بنت الناس يقعدون يقولون بعدين انتم الي ماخذين بنتنا
شادن: بس حرام شوفي شكلها
ميس الي رفعت عيونها من جوالها وناظرت: هذي البنت موب غريب علي شكلها.. شايفتها بس مدري وين
شادن: لا بالله
ميس: ايه اذكر شفتها مره وانا راجعه من بيت ناهد في بيت جيراننا تلعب او شي زي كذا
شادن : يعني من اهل جيراننا ؟
ميس: ايه الظاهر لان اهلهم جايين من الرياض
شادن : لا يكثر قومي نروح لها
ام ميس : وين رايحين؟
ميس: شوي يا ماما بنتمشى وقامواا
"""""""""""""""""""""
في سيارة خالد كان ما بقي الا شوي ويوصلون البيت
طول الطريق فدوى تسولف مع عبير وخالد قاعد مستمع
ويدقق بكل كلمه تقولها عبير يبي يفهم هي وش تفكر فيه وش الي ما تفكر فيه لانها بتكون زوجته عن قريب وهو اصلن ما تاكد من مواقفتها لسه بس عارف انوو أي شي بتقوله امها هو الي بيصير وفعلن على انه هو ما وده بعبير بس ما رفضها ولا فكر حتى
اما عبير كانت متوقعه انو خالد مثل طلال بس استغربت يوم شافت منه العكس تماما
علاقته باخته الوحيده مو زي علاقة طلال اخوها بهم يعني فدوى ما تمزح وتضحك مع اخوها عايدي وعلاقتهم شبه رسميه هذا وهم اخوااان فسرتها بان خالد من النوع الثقيل او شي زي كذا
:::::::::::::::::::::::::::::
ميس برقه : حبيبتي وين اهلك؟
خلود خافت منهم : هناك
ميس: تيب وش تسوين هنا؟
خلود : اشوف البحر
ميس : طيب حبيبتي لا تخافين مني اناا باوديك عندهم
خلود ما تدري ليش حست بلهجتها بامان شوي : اوكي
خذتها ميس وشادن ومشوااا شوي يشوفون
""""""""""""""""""""""""
تعب من كثر ما يدور عليها معقوله تكون ضاعت لا مستحيل وشلون
لازم تكون هنا ولا هنا ولو ضاعت باصير انا السبب
شافها من بعيد ماشيه ومعاها بنتين راح لها وهو يركض
مشعل : خلوود وينك امشي يللا بنروح
خلود بعصبيه : مابي اروح معاك وخر عني
مشعل : خلود تعالي بسرعه ترا بيروحون للبيت عننا
خلود : مابي يعني مابي ولا تكلمني
شادن: حبيبتي روحي مع اخوك
خلود شوي وتصيح : موب اخوي وما اعرفه
ميس تساسر شادن: وش الوهقه الحين ما تبي تروح لاهلها
شادن : مدري عنها وش نسوي بها الحين
"""""""""""""""""""""""""""
طلال الي قاعد يدورهم صار له الحين نص ساعه ياربي وين راحت ذا البنت باروح اشوف هناك ما بقي الا هذيك الجهه ومستحيل تكون بعدت اكثر من كذا
راااح طلال
ولقاهم بعيد
طلال الي ما صدق لقاها بعد ...صعبه عمه بيقول انتم ضيعتوها وغير كذا بتنكد عليهم سفرتهم ولا اخوه ما عليه خوف مشعل يقدر يدبر عمره بتكسي ويدل بيت عمته: خلوووود
خلود علطول سحبت يدها الي كانت متشبكه بيد ميس وراحت تركض له وهي تصيييح
طلال كان ناوي يهاوشها يوم شافها كذا رحمها : خلاص حبيبتي بس علميني وش صاير
ليش رحتي وبعدتي
خلود : موب انا مشعل وتركي قالوا لي
طلال: بس خلاص هدي شوي انا اوريك فيهم
مشيعل اذلف قدامي عالسياره بسرعه
مشعل : ما سويت شي
طلال: خلوده مين هذولي الي معاك
خلود : مدري ما اعرفهم قالوا بنوديك لاهلك
طلال: اوكيه يللا روحي قولي لهم شكرا وتعالي
خلود ماسكه فيه : لا اخاف تروح وتخليني
طلال: لا ما عليك باوقف هنا بسرعه يللا
::::::::::::::::::::::::::
راحت خلووود ومن بعيد قالت لهم شكرا وراحت
ميس: شدووون شفتيه
شادن : مييين
ميس: هذا اخوهم الكبير الظاهر
شادن: ايه
ميس : يا بردك ملك جمال وتقولين بس ايه
شادن: طيب ولا صار حلو يعني اول واحد ولا اخر واحد حلوو
ميس: وين هذا غييير يجنن
شادن: اقول خلك من شغل الخرابيط وامشي بس نرجع لا تهاوشني امي
ميس: اوكيه يلا وهم ماشين
ميس:بس لازم نزور للجيران عاد حرام القطيعه
شادن : تو ما طلعت صلة الرحم عندك ما شاء الله
ميس: من زمان وانا ما احب اقطع احد
شادن : باييين
ميس: ليش وش شايفه علي
شادن : بالله من متى ما رحتي بيت خوالي
ميس: من مده
شادن : كل مره نروح لهم ما تفكرين تجين
ميس: وييه عااد من زينهم ما فيهم حلو يستاهل اروح عشانه
شادن استحي على وجهك انتي متى تعقلين
مييس بحالمية: لحد ما القى فارس احلامي
شادن: وان شاء الله قريب جيراننا الي تو هو هدفك الجديد
مييس: ايه الا اذا
شادن تقاطع الا اذا ايش
ميس: اذا لقيت احلا منه
شادن: خخخخخخخخخ والله انك مهويه امشي بس
""""""""""""""""""""""""""""""
العزوووف الي كانت مره معصبه ما تحب يكون وضع زي كذا احد ضايع وهي تستنى ولا تدري وشي القصه كل ما كلمها احد تصرخ عليه
رنا:يوه ورانا واقفين كذا الحين ما بعد لقوها
العزوف بصراخ : وانا وش دراني عاد قالوا لك اعلم الغيب انا
رنا : ما سئلتك عشان تجاوبين
العزووف : اجل سئلتي مين.؟ الجني مثلا
رنا : ايه اكلم روحي بكيفي
العزووف : مجنونه اللهم عافنا
رنا: احترمي نفسك عاد
العزووف : محترمتها من قبل ما اعرفك
وشوي جاهم مشعل فتح الباب الي قدام واقف برا يكلمهم
مشعل: لقيناها
العزووف : لا جانا الثاني مو انت كنت ضايع معاها
مشعل: لا كنت ادورها
العزووف : اركب وانت ساكت بس مالي خلق اسمع صوتك
مشعل يعاند :لا مانيب راكب وش عندك؟ وقبل ما يكمل قاطعه طلال الي كان جاي من وراه
اركب بس يالبثر وشغلك عندي بعدييين
مشعل: ليش وش سويت
طلال: قلت لك اركب وبس
مشعل: ركب وسكت
وخلود راحت وركبت مع سعووود
"""""""""""""""""""""""""""
سعووود ما اهتم بالانتظار اصلن لينا ما خلته يحس بالوقت طول الوقت تقرقر فوق راسه
جت خلود وركبت معااااهم
سعوود: الحمد الله على السلامه
ما ردت خلود
وتركي ما قالها ولا شي
"""""""""""""""""""""""""""""""""""""
أول ما وصلوا سعود وطلال راحوا البنات ورقوا فوق
ويوم جوا مشعل وتركي بيدخلون
طلال: على وين يابابا انت وهو
مشعل: واللهي دايخ ابي اروح انوم
تركي : انا امي تبغاني في شغلات هامه
طلال: عن التصريف ويكلم خلود الي ماسكها بيده : مو انتي تقولين هم السبب
خلود : ايه
طلال: خلاص انا وياك نعاقبهم موب لازم تقولين لماما وبابا
تركي : علطول تصدقها وانت ما تدري وش القصه
طلال: ما يهمني بس خلود مب كاذبه ولا تقاطع .. هاه خلود وش تبين عقابهم
خلود تطالعهم بحقد: ابي اشوف دموعهم
طلال ضحك على طريقتها وهي تقول الكلمه بحقد : ابشري من عيوني
خلود ورجعت كملت : فلكه
طلال: خخخخخخخخخخخخخخخ ولا يهمك فلكه
اصبري انادي سعود من الخيمه
وانت وياه خلكم تتحركون ولا ما تطلعون معانا شهر لاخليكم تخيسون
وانت عارف يا مشيعل ما عاد فيه سواق مثل اول بيسافر اخر الشهر
وشوف عاد من يوديك ومن يجيبك
تركي: انا اروح معاه بسواقنا
طلال: ايه اطلع معاه هذا ان سمحت له يطلع من البيت وشوف مين بيخاويك يا تروك
مشعل وتركي ساكتين
طلال: سعوووووود
سعود : نعم
طلال: تعال نبيك شوي
سعود : وش عندكم
طلال: لا بس هالاثنين مضيعين خلوده اليوم ولازم يتعاقبون
سعود : وانا في الخدمه خخخخخخخخ
مشعل: شف النذل
سعود : نعم وشي
مشعل: اقول سلامتك بس
سعود : ايه
طلال: سعود تكفا شوف البيت الي قدامنا الي يعمر لسه
رح لمه وجيب لنا لي ولا أي شي نجلدهم به فلكه
سعوود : اووه وناسه من زمان عن الفلكه خخخخخ
وراح سعووود وجاب لهم وجا
"""""""""""""""""""""""""""""""""""""
عند البناااااات في غرفة فدوى
رنا: لا فاتكم انتم ما شفتوا ابو تيشيرت اصفر يمووت من الضحك
فدوى : هههههههههههه لا تقولي لاسمر هذاك
رنا: الا هوووو ما غيره مسوي فيها انا معذب الاناااقه ويناظر البحر مسوي رومنسي
فدوى : الله يرجك ياهووو وشلون قزيتيه
رنا : تستهبلين انتي هو الي ما غير يترزز في وجهي
فدوى: هههههههههههههه
لينا: وانتم هذي شغلتكم بس تحشون في فلان وعلان
عبير: خليهم ياهووو بعد شبابنا مسوين ثقه وكل واحد شايف نفسه ملك جمال
لينا : حرام عاد فيه والله ناس ملكين جمال
عبير: فيه وفيه بس اكره شي لمن يجي واحد شين ومسوي نفسه انا الي واااو
لينا : خخخخخخخخ حلوه انا الي واااو
العزوف سحبت نفسها وطلعت لغرفتهم لانها فاضيه وما فيها احد
وهي تبي تقعد لحالها شوي
"""""""""""""""""""""""""""""""""""""""""""""" """" """
في بيت جيران العمه وبالتحديد عند ميس وشادن في غرفة ميس
ميس : شادن
شادن قاعده عالنت ومهيب لمها
ميس: شديييين اكلمك ردي علي
شادن: نعم
ميس: ياختي طفش اليوم
شادن: ياختي انتي ما تشبعين هذانا طلعنا ورحنا وشفنا البحر
ميس: عندي فكره ودي انفذها
شادن : الله يستر من افكارك بس
ميس: جزاتي ادور لك الوناسه
شادن: وشي
ميس: ابي اعزم جيراننا واهلهم عندنا اليوم
شادن: فاضينا احنا ومتى نجهز ويمكنهم مرتبطين وكذا والحين الساعه 7
ميس: لا ما عليك انتي بس ما لقيتي الا رجا اصلن اول ما تدق عليها امي بتحلف عليها نجي عندهم وهذا الي انا ابيه
شادن : او او لهالدرجه ماخذه عنها فكره غلط
ميس: لا فكره غلط ولا شي بس اغلب الحريم كذا وبالذات الي بيوتهم قصور مثل جيراننا
شادن : لا بالله عطيهم عييين
ميس: والله بيتهم يجنن مالت علينا بس
شادن : حرام عليك بيتنا والله كشخه
ميس: بس ما يتقارن ببيت رجا
شادن : وانتي وش فيك كذا الرسول كان دايم يقول ناظروا للي اقل منكم عشان تحسون بالنعمه الي انتم فيها
ميس: باروح اكلم امي
شادن : عالاقل يوم ذكرت اسم الرسول قولي صلى الله عليه وسلم
ميس طلعت من الغرفه ولا عبرتها حتى
""""""""""""""""""""""""""""""""""""
طلال ماسك مشعل ومثبته وسعود ماسك تركي
ومخلين خلود تطقهم عشان بعد ما تعورهم مرره
مشعل: حرام عليك خلووود شوي شوي
خلووود ساكته وتطق من كل قلبهااا وومب فاضيه حتى تتكلم
تركي : خلوود حرام عليك انا اخوك نسيت يوم اجيب لك حلاو معاي كل يوم من المدرسه
خلوود لفت عنه وراحت لمشعل
مشعل: هيي انت حرام عليك بديتي فيني
خلود : خلاص
طلال: وشي الي خلاص توك ما طقيتيهم زين
خلود : لا بس خلاااص
مشعل: مسويه طيبه تبيني اقول انك ازين مني لا بتطقيناا
تركي : طقيه هو انا مالي دخل
خلود عصبت منه وطقته طقه مشعل خلاص عيونه شوي وتدمع
مشعل ساكت ما يبي يصيح
طلال وسعود رحموه وفكوهم خلاص
وخلوود راحت قالت لطلال شكراااااا
طلال: ولو العفو بنت عمي أي شي ثاني تعالي لنا وراحوا للخيمه
خلود : اوكي ودخلت داخل
مشعل : الحين وشلون بننتقم منها
تركي : ناوي تنتقم انت ووجهك
مشعل: ايه بس بدون ما تدري انه احنا
تركي : لا خلاص كافينا الي فينا
مشعل: انت كافيك بس انا لا
""""""""""""""""""""""""""""""
ام طلال كانت قاعده بالصاله الي فوق مع بو طلال بس
وتقهويه
ابو طلال: كلمتي عبير بالموضوع
ام طلال: لا والله ما فاتحتها بس ودي اقولها عشان تحاسب بتصرفاتها شوي
ابو طلال: ايه خليها تتسنع
ام طلال: وهي سنعه ولا عندك شك
ابو طلال: سنعه ما قلنا شي بس ان جلست مع هالبنات اكيد بتتهيبل
ام طلال: ايه والله انك صاادق
"""""""""""""""""""""""""""