| يا تعبي العشگته | ' باللهجة العراقية '

| البارت الرابع و العشرون|

#يا تعبي العشگته
#بقلم الراوية
#البارت الرابع و العشرون

بسم الله الرحمن الرحيم

| صلوا على النبي ⁦♥️⁩ |

.

لين..

طـيبة من رجوع والدي
و حسيتهـا متعاطفة ويا اكثر من البقية..بوقتها ما حچـيت و لا گلتلها ما عليـچ بي

هي هيچ گلبها رهيف و بسرعة تـتأثر..و تنقهر حتلو على شخص اذاهـا

بس يوصل بيـها الامـر من التعاطف..انو تقرر تتبرع الو بكليـتها..هين ما گـدرت اسكت
جابها علينا ضرغام و هو غـادي نار..گال بزعت و اني احچي وياها انو تتـراجع

بس هي راسها و الـف سيف..تگول ما اگدر اشوف شخص بهالحال..و تكرر كلمة
يـظل ابوية

ضرغام راح و گال بالليل اجي..اريدها مغيره رايـها
لان اذا ظليت يمها ارتكب بيها جريمة..و اني چـنت مأيدتو

طلعت و عفتها..و رحت وي روان..
حچيت الها عن قرار طيبة
و هي سـكتت لحظات..گبل لا تگـول بهدوء

- بس هالشي راجـع الها ! هي تريد تتبرع لـوالدچ
وين المشـكلة

انتفضت من مكاني و صـحت بعصبية

- شنو وين المـشكلة گلتيلي
روان انتي تعرفين منو هذا الي تگـولين والدچ..يولي العافنا من عشرين سنة و هسـا جاي يريدنـا ننسى السواه..و الله العظيم لو چـان حالو حال اي اب و الله انطي روحي مو بس كليتي
بس هالانسان ما يستحق

هي گـامت على حيلها و كمشتني من اكتافي
و گالت بسرعة تريدني اهدا..ليش تحسسني انو احنا وضعنا عادي..

- اعـرف والله اعرف..بس هسا اهدي
اعصابچ يولي

- ردتچ تهدين اعصابي..مو تحرگيهن بحچـايتچ

حچـيتهت و جريت حجابي و حطيتو على راسي
لان نزعتو اول ما طبيت غرفتها

- وين تريدين اگعدي

- اروح للبيت..انتي ما تـعرفين شنو الاحس بي روان

- والله حاسه بيچ..بس گوليلي شنو اسويلچ
يعني اختچ مقرره و مصره..زين ليش ما انتي رافضه هالشي..اي اعـرف انو اذاكـم و عافكم..بس شوفي شلون حـالتو هسا؟ رب العالمين بلاء بالمرض تا يعرف السوا غلط

انداريت عليها..و گلت بضيق

- تعرفين لو تنطيها لاي واحد ما راح احچي
بس هالرجال لا..تعرفين ما مأمنه بي
ليش بس طيبة تودد الها و حچه وياها و اني لا؟ لان يعرف طيبة غبيه و مشاعرها تتحكم بيها..تدرين يوميه اظل افتر على الابواب اتأكد مسدودات
اخـاف يدگ الناقصة بينا مثل گبل و ياخذ كلشي و يشرد

كمشت ايدي و حچت

- زيـن ليش هيـچ متأكده..صارلو شگد شفتي عليه شي

و بصدق هزيت راسي بـ لا
ليش اكذب و اگول اي..لحد هسا ما شفت شي
و حتى البيت ما يطب بي الا للحاجة و هي السبـح..و  ما يدخل الا عمـاد  موجود

- شوفي ما شفـتي شي
فـ اطمني..و طيبة احچي وياها بهـدوء..بدون عصبية
فهـميها موقفچ و وجهة نظرچ..لا تستعجـلين و تأزمين الوضع

رفعت تك حاجب و گـلت

- صايره تفتهمين

حـركت شعرها بغرور و هي تگول

- اني من زمان افتهـم

گـلبت عيوني و مشيت من گدامها
طلعت من الغرفة و هي تمشي وراية و تنصح..احچي بهدوء لا تعـصبين
و اني اهـز راسي بـ اي
عود افكر اخـذ بنصيحتها

بالحوش من تا اطلـع لگينا سلطان بالحديقـة يحچي بالتلفون
سدو و اندار عليـنا..
سلم و رديت بصـوت ناصي و طلعت

من فـتت للبيت چان هدوء
يوسف چان بالحديقة..من شافني گبل ابتسم
اليوم ما شفتو..ما حچيت شي و حـتى من گال مرهبا ما رديت عليه
عبـالك فاضيه الو و لسوالفو

طبيت للـصالة..بعدهم على گـعدتهم و ساكتين
دحگت لطيبـة الي التفتت عني
عشـتو زعلانه مني..

امي ذبت حسرة و گـالت

- طـيبة متخذه قرارها..و ما تسمع لاحـد

كتفت ايديه و گلت بهدوء..رغم الغضب الـمستحلني
بس سمعت نصيحة روان..لازم شوية اهدا

- يعني مـاكو رجعة؟

- لا

ردت عليه بنبرة هاديه
و عماد الساكت اخيراً قرر يحچي

- ليش نـستعجل يمكن  التحاليـل ما تتطابق

- ان شاء الله

حچيتها و طيبة عگـدت حاجبها بعدم رضا..

- زين ممكن افهم ليش هيچ مـصره؟
يعني عادي تنطيـن هيچ شخص عضو من جسمچ

- شفقة..عطف انـسانية لان ابـوية شتريـدن تسمينها سميها

- و نسيتي..غباء

تمتمت بـيها و گمت على حيلي

و هي بعصبية گـالت

- لين انتي ما عليچ..اطلعي منها

سكتت و ما حچيت شي ما طـول القاضي راضي فـ يا لين لا تتـدخلين
هي الوحيده الي راح تتندم..

بـالليل جا ضرغام و انفتح المـوضوع
و همين علت اصواتهم..و اني ما تـدخلت..هي گـالت ما عليچ فـ عليه

و انتهى الامر باستسلام الكل..و الرضوخ لطلب طيـبة
ضرغام مبين علـى ملامحو عدم الرضا..حقو والله
بس كل الي ادعي انو التحـاليل ما تطابق

بس والله هو عندو حظ..باگ و انهزم و من جا محد فك حلگو ويا..و سكن بلاش و شرب و اكل..و فوگـاها بنتو راح تتبرعلو

هـي رجعت وي ضرغام
و ثاني يوم الصبح جوي..تا يحچون ويا..
اني طلعت للكلية بدون ما اسمع الصار..و لا اريد اعرفو..بلكي عندو احساس و يرفض انو تتبرعـلو

الطريق كلو روان تحچـي وياي بالموضوع و تحاول تفك عني الطنگره..و سلطان بس يفر باذانو يريد يعرف الصار
اخر شـي حچت ويـا روان عن الموضوع

بينـت على ملامحو الجدية و هو يتكلم موجه الحچي الي

- و وين المشكلة..اعرف موضوع عائلي
بس لا تـنسين بالاخير هو ابوچن

- ابوها هي..مو ابويـة

حچـيتها و صديت على الشباك
و بحركتي اعلنت انو ما اريد الخوض و الحچي بهـالموضوع

طول وكت الدوام چنت بحالة عصبية
حتى المحاظرات مـا اركز بيهن.
و ادعي يا رب ما يوافق..و ان شاء الله ما تتطابق التحاليـل

رجعت من الدوام و چانت بس امي موجوده بالبيت
گبل سألتها و گالت العصر تطلع التحاليل

- انتي مو راضيه؟

سألتها و هي جاوبت بتنهيده

- لا

- عجل ليـش ما حچيتي؟ ليش ما ضغطـتي عليها انو ما تسوي هالشي

- حچيت و قنعت و راسها الف سيـف

حچتها و گامت تگلب تمن على الـطباخ تريد اسوي كبة تمن
گمت بدلت و صبيتلي غدا
تغديت و غفيت شوية

بالليل جا عمي جابر..و راح هو و ضرغام و هي للمخزن
مع الاسف التحاليل تتطابق..شفت طيبة فرحانـه
دحگتلها و تمتمتت والله الا تسبين الساعة القررتي بيها انو تتبرعين الو

سبـحان الله الوضع چـان متسهل و ما صارت اشكالات
و عرفت من عماد انو هو ما معترض
صح بالاول گايل لا و ما يصير..بس بعدين ساكت

صفنت على موقفو..والله لو غيرو يمكن ما يوافق و هو بهالـوضع

و جا اليوم الي راح تصير بي العـملية
اني ما رحت ظليت بالبيت..رغم ردت اروح..بس جبروني اظل وي يوسف

گعدت بالحديقة و الدنيا صبح..اهز برجلي بـتوتر و كل شوية اتـصل على امي
اخر اتصال گـالت فاتت للعملية..ظليت ادعيلـها و ان شاء الله عميلتـها سهله

طلع يوسف مـن الغرفة مبين مقهور و ضايج
ما حچـيت ويا شي..تقـدم باتجاهـي و گال بعربية مكـسرة

- عملية صارت

دحگت عليه و ثواني استـوعبت شنو يقصد

- لا

تنهـد و هو  منزل راسو..ظليت ادحگ عليه و انقهرت بصراحة
و بهدوء گلت

- لا تخاف هو زين

هز راسو باي..ما ادري افـتهم لو لا
بس كل السوا ظل گاعد يمي
صارت الدنيا ظهر و جـتي خالتي ام سلطان تسأل علينا
و من شافتني بس اني و يوسف...گالت سدي الباب و تعاي..بيومها چان يوم سبت
و صارت العمـلية بمستشفى خاص..و وگع اكثر الحمل على عمي جابر

سديت الباب و طلعت وياها..لان صدگ چنت محتاجه اطلع ما اريد اظل وحدي

رحنا لبيت خالتي ام سلطان..و ادحگ لـ يوسف بس يتلفت اول مرة يطلع من البـيت من جيتو هين

ساعدت ام سلطان و روان من حطن الغدا
و گـعدنا حول السفرة..و يوسف بصفي
و گـبالي سلطان..

چان يوسف مستحي و خجلان..خالتي مسوية دولمة
و هي معروفة شگد تسويها طيبة..

كملنا الغدا..و اني ما حچيت وي سلطان و لا هـو
عبالك غريب و گدامي
رغم كل ما ارفع راسي تصير عيني بعـينو بس بسرعة اتحاشى ادحـگلو
اخاف تكمشنا ام سلطان و تسويلنا سالفة انو ها حب و مدري شنو
تفكير عجايـز و اعرفو..

الحمدلله خابرتني امي و گـالت طلعت من العمليات
و ابوچ فات..ما حچيت و لا سألتها عنو

ظليت بيت خالتـي ام سلطان للـ2 و ربع
و چان ارجع للبيت

المغرب جا عماد و اخذني انـي و يوسف
يوسف اخذو عماد للغرفة البيهـا ابو

و اني رحت لـ طيبة..من فتت لغرفـتها
غورقت عيوني من شـفتها على السـدية مبين التعب و الوجع على ملامحها
يمها امي و ضرغام و عمـتها

دنگـت و سلمت عليها بستها من راسها
و هي ابتـسمتلي بخفوت
گعدت على الكرسي النطـانيا ضرغام
الي گعد بصفها و هو كـامش ايدها

گلت ها هـي لين صار الصار و تبرعت و انتهى الموضوع
ادعـي تگوم بالسلامة و انو ما تتندم على طيبتها

عمـي علاء عرفتو انو يم ابوية و راح يظل يمو
و عماد و امي راح يبقون يم طيـبة
ردت اظل بس گـالو روحي للبيت احسن

رجعنا بالليـل اني و عماد و يوسف
گالي خالي مدي فراش للولظ بغرفتي..صغير ما يگدر يظل وحـدو

و هيچ مرت الايام..و اطلعو طيبة و ابوية من المستشفى ورا اربـعة ايام

ضرغام گال طيبة تظل يمي..عود هو يعتني بيـها
بس الـشاهده لله..خطية ما قصر امي تگول هو الي يأكل و الي يشرب و اذا احتاجت للحمام يساعدها..

و اني متت من القهر..لان ردت ادير بالي عليـها
بس ضرغام ما انطى مجال حتى لامي
هه عاد عماد يگلي.
روحي ديري بالچ على ابوچ..بري بي

.

روان..

چـنت بالقاعة گاعده و اني احچـي وي زميلة تعرفت عليـها من مدة..

نضحك و نتعرف على بعضنا اكثر
بنية حيل حبابه و من عمري..القاعة بيها كم شخص و اكثريتهـن بنات

هـي جاها اتصال و استأذنـت و راحت ليغاد

دحگت بتلفوني و تذكرت الرقم الحمدلله انطيتو بـلوك و خلصت منو
بس لازم اگـول ليـن

و قررت احچـيلها
رجعنا للبيت و العصر رحـت عليها
گعدنا بالغرفة مالتها..تقريباً راح يصير شهر او اقل من سوت طيبة العملية
تحسنت حالتهـا..و ابوها همين

گعدت اسولفلها على الرقم و الرسايل..الي حفظتهن على گـلبي..رغـم صار فترة من انطيت بلوك و حذفتهم بس ظان بالي

ضيقت عيونها و تقربت عليه و هي تگول

- اخـاف من الجامعة

- منين جاب رقمي! اني ما منطـيه رقمي لاحد بالدوام

حطت ايدها علـى حنـچها و هي تفكر
فـجاة سحبت تلفوني و فتحت الرمز..بما انو اثنينه نفس الباسورد مخلين لتلفوناتنا

مديت راسـي و هي تفوت على الارقام و من هناك رفعت الحظر و سجلت الرقم
لطمت على رجلي و گـلت

- گعـدي شگاعد تسوين

- ايي غير نعرف منو..انتي منطـيتو حـظر و تريدين تعرفينو

حفظت الرقم..و اني اضغط على اصابعي والله توترت من سوايتها
مع اني اعرف ما راح تسوي شي غلط..طبـت على الواتساب و گعدت تحدث بجهات الاتصال و هي زفرت و گالت بقهر

- لو ما عندو واتساب لو مسوي الا اثنيـنكم متبـادلين الارقام

- زين شراح تسـتفادين

- يجوز حـاط صورتو لو شي يوصلنـا الو

و گبل لا تطلع فاتت على رقم سلطان و دخلت للصورة
ضحكت و هي تكبر بيها و لا عبالك اني موجوده و هـي تگول

- نفسيه بس حلو..اشتعلو اهلك

طلعت من الواتساب و شيـكت على التليگرام
و نفس الحال ما مسوي..اني ما عندي فايبر لان اكرهه استخـدامو
لذلك دخلت گـبل على الفيس و گعدت تبحث و ما لگت اي شـي

عصبت و شمرت التلفون عليه و گـالت بشبه عصبية

- هاچ هاچ طيح الله حظچ شنو جني الي يدزلچ

سكتت و ما رديـت عليها والله بصراحة تخوف من تصيح
خلصت من صيـحتها و فزيت على صيحت عماد خالـها
عبالك يصيح بسـماعة الجامع
و هي ما ترد عليه بهدوء..لا
بذات النبرة و يـمكن اعلى

طلعت هي و اني هزيت ايدي و گلت

- الحمدلله على نعمة صوت امي من تصيح..طلعت لا شي مقارنة بيهم

شوية و رجعـت و هي شايلة چبس و تاكل
بصراحة لين مرات من تاكل..احسها مفترسة
فوگاها جبس احمر و ايـديها متطلخه بالصبغ
و بشقة گلت

- ها صاحـلچ تا ينطيچ چبس

- لا والله فانيـلتو الداخلية ماكو و چنت ادورلها و خـمطت الچبس من غرفتو

- تورطت و سألتچ

رفعت اثنين ايديها و هي تگول بسخـرية

- عشتو على اساس اخوچ ما يلبسها..دسكتي بله لا تسوين نفسچ الخجوله

- والله محـد يگدرلچ

هزت كتفها الايمن و هي تحچي بنـبرة استهزاز

- بس عيون اخوچ تگدرلي و تهزمني

ضحكت عليها و هـي كملت اكل چبس
و فوگـاها ما گالتلي هاچ..على الاقل مجاملة راضـيين والله

ظلـيت شوية و رجعت لبيتنا
ساعدت امي بالشغل و كعادة اي ام عراقية
ما ترضى على شغل بـنتها

راح عن بالي انو لين رفعت الحظر..فـ الصبح من تا نطلع للدوام
و اني بالسيارة بصف سلطان توي صـاعدين ننتظر جيت لين...دگ موبايلي برسالـة
اخذت تلفوني و فتحتو..

گبل غلقتو من انتبهت للرقـم بلعت ريگي و توترت
شنو من رقم جـديد لو شنو السالفة

انـداريت لـين الـي صعدت و هي تحچي بالتلفون

- عفيـة عماد احجزلي الجنطة الرمانيه بروح موتاك

سكتت شوية و كملت

- يلا عجـل مع السلامة

سدتو و سـلمت علينا و مشى بينا سلطان
چـنت اريد يخلص الطريق بس تا افـتح و اشوف الرسالـة
و من دخلت للقاعة و الحمدلله چانت المحاظرة بعـدها ما بدت..

گعدت بمكاني و فتحتها..و حـسيت بشي وگـع على گلبي و انـي اقرا بالرسالة
چـانت بسيطه بـس ما ادري شصار بيه مع انو ما فكرت شلون عرف انو شـلت الحظ عنو؟
كاتب بيها " بقيت مناطرك حد ما عتگ ملگاي "

عضيت على شفتي و اني اريد ابچـي
والله اول مرة هيچ يصير بيه..خوف على قلق و دمعة بطرف عيني
تمـاسكت شوية تا ما ابچي
و اني اكتب بتردد

- منـو انت؟

و ظليت انـتظر يرد
بس ماكـو جواب..زفرت و جـيت احط الموبايل بالجنطة لان اجا الاستاذ
بس دگ باخر لحظة..
خليت الفون جو الستول و فتحت الرسالة
" اني؟ اني واحد من البشر المهتم بوجودچ بهالحياة..لدرجة چبيره "

ظليت صافنه بالرسـالة..لدرجة ما سمعت صوت الاستاذ و لا الطلبة
گمت ارمش و حسيت بدمعتي وگـعت على خدي سرعان ما مستحها
ما انـطاني گلبي احذف الرسالة..بس بنهاية الامر
انـطيت بلوك و حذف..و اني اكـرر
بعد ما تشيلين الحـظر روان..

ورا كـم يوم چـنت گاعده بالمطبخ انظف بالخضراوات
اندگ الباب و امـي گالت گومي افتحي
دنيـا مغرب و سلطان مادري وين
اصلاً هو بعـمرو ما گـاللنا رايح لفلان مكان

رحـت فتحت الباب و ابـتسمت بوجـه يوسف و هو يناوشني صحن بي لـحم بعجين

- تفضل

اشرتو تا يـفوت بس هو هز راسو بلا
مشى گبل لا ارجعلو الماعون..مـديت راسي تا اشوفو فات لو لا
و عگدت حاجبي من شفت عـماد بالباب مالهم بنتظر يوسف

شـو من انتبهلي صد بس گـبلها خزرني
هذا شبي منو جاي حـولو؟

طبيت جوه و اني الف بواحـد من الرغفان و اكلت منو لگمة
والله ام طيبة اكلهـا طيب..و هيچ الها نفس بالاكل
حرمات لين ما طالـعه عليها

.

لين..

نايمة و اني حـاظنة المخده و لافه الحاف لف عليه
جفلت على صوت عالي
طفرت من مكاني..و ما حسيت الا واگـعة بالگاع
بس شنو حسيت بوجع بـحنچي

طـلعت ركض من غرفتي..و اول ما طبيت للصالة صار بوجـهي ضرغام و طيبة و عمـاد

- شكـو شصاير؟

حچـيتها و اني اتلفت عليهم
بس ماكو مشكلة لان وجـوهم ضاحكه و امي حاظنه طيبة من اكتافها

هما صدو عليه لو والدتـي شهگت و ضـربت على صدرها و ما احسها الا جايه صوبي و هي تگول بقلق

- يولي شبي حنـچچ؟

عگدت حاجبي و عماد همين و هو يجي ناحيتي
و كمش حنچي

- يولي مجروحه

حطيت ايدي على حنچي..و توجعت
و دحگت على ايدي بيها دم
طيبة جتي همين و التمو عليه.. و اني افكر شـلون انجرحت
فجاة تذكرت من حدرت من التخت
و بتأفف گلت و اني امسح الدم

- من سمعت صياحكم جـفلت و وگعت على الگاع من التخت

طلعت طيبة من الصالة تريد تجيب لاصق جروح
و انـي گعدت على القنـفة..جابتهن و عماد لصق الجرح بس قبلها عقمو
الحمدلله مو چبير
من كمل گلت

- اي شكو؟ شبيكم تصيحون

دحگت طيبة لامي و هذني شو يتمضحكن
عماد الگـاعد يمي قرصني من خدي و هو يگول

- ام كفـشة راح تصيرين خـاله

رفـعت تك حاجب و اني اريد افهم شنو گال
انداريت على ضـرغام الگال و هو يضحك

- ما تلوگلچ الصفنة..اختچ حامل طيبة يعـني راح تصيرين خالة الله يسلمچ

هين يـلا طخت بالي
ضحكت بفرح..و اني اشمر نفسي عليها و احظنها
عيوني غورقت لان هاللحظه شگـد چنت احلم بيها
و دائماً اتمناها بيني و بين نفسي انو طيبة تحمل و يصير عدها طفل صغير العب بي طوبة..لا چذب تا احبو و احظنو بس

هي بادلتـني الحظن و اني ابارك الها
بس بسرعان ما وخرت و اني اگول بغباء

- زين شلون؟ شلون طلعتي حامل

شفتها سكـتت و هي تمسح على گصتها
فركت طرف حاجبي و اني اگول يمكن جفصتي
بس اسمع ضحكات ضرغام المـكتومه
انداريت عليهم و ابتسمت و اني اريد اضيع الموضوع

- اي بنية لو ولد

- بعد ما صارلها شهر

- هـااا

حچـيتها و گعدت بصف عماد
الدحگـلي بطرف عينو و اني ابتسمت ابتسامة واسعة
و هو رجع ابتسملي نفس الابتسامة
والله مو ناصحين على هالحركات

و كالعادة ضرغام نسيب امي الغـالي انعزم على العشا
و بدينا نحظر..اني و امي و طيبة الي كل شوية نصيح بيها اگـعدي احنا نكمل كلشي

كملنا العشا و امي عـزلت لابوية و يـوسف
و طلعت اني اوديهن..من ورا خشمي
لگـيت بس يوسف بالباب گاعد بس شافني ابتسم و وگف على حيـلو

دحگـت هيچ و هيچ ماكو اثر لابوه
طببت الصينية جوه و هو ماكو..و يوسف من حالو گال مو هنا راح

دحگت عليه و هزيت راسي..
طبيت للمطبخ و گلت لامي

- يمه هذا الولد وحدو

- ابو وين؟
بي لا ما رجع من المغرب

- ما ادري..و گاعد بالحوش

- خطية جيبي لت يظل وحدو..و اخذي صينية غطـي بيها الاكل

لويت بوزي بعدم رضا..سحبت صينية و اني ادردم
غطيت بيها الاكـل..و اشرتلو يجي ويايه

صبيـنا العشا و هو گعد يم ضرغام...ادحـگلو اندمج ويا و يسولف..بدا يحس بالالفة ويانا و شكلو تعود علينا و على اكلنا
لان اول فترة مـا چان يتقبل حتى الچاي عكس هسا يشربو

شوية و سمعنا الباب انفـتح
و فات والدي..محد گـام و گالو هيانو يوسف
اندگ باب الـصالة و طلعلو عماد
من شـاف يوسف ابتسم فرحان..اني تجاهلتو و لا درتـلو بال و هو اندار و طب للمـخزن

و ورا العشا راح يوسف..و اني طلعت تا اجيب الصينية..دگيت الباب و فتت..ما چنت احب افوت هين بس غير امي و اوامرها

ابتسملي من شـافني فتت
دنگت تا اخذ الصينية و هو وگفني و گال

- لين..اگعدي هين شوية

انداريت عليه و تنهدت
و هو گام و وگف گدامي و حچه

- اعرف ما طايقـة تشوفيني بس..بس والله مشتاق اگعد وياچ

و بسخرية جـاوبتو

- مشتاگ؟ ليش انت شوكت تعرفني تا تشتاگ لگعدتنا

سـكت و دنگ راسو
و اني تركت الصينية و كملت و عيني عليه

- اني مو طيبة الي گدرت بدمعة و كلمة تلينها باتجاهـك..اني لو تظل ثانية بعمري ما راح يجمعني وياك لا حديث و لا لگمة

رفع راسـو عليه و دحگلي ثواني
ابتسم و اني دنگت تا اخذ الصينية بس توقفت لمن گـال

- نفس المرحومـه عمتي..نفس الحچي نفس الوگفة
حتى بالشكل

بلعت ريگي و ما رديـت عليه
اخذتـها و طلعت.. و اني اتذكر حچايتو
عمتو لميـعة..اخت جدي
چان دائـماً عمي جابر يگلي تشبهينها..بس ما تـصورت ابوية همين يشبهني بيها
عبالي نسى كلشي من عبر حدود العـراق..

ثاني يوم چـنت اصبلي غدا ورا مـا رجعت من الدوام
على غير العـادة طب عماد للبيت..

بدون ما ادحگلو گلت

- ها شو من وكـت

ما رد عـلية بكلـمة..صاح امي و گالتلو هياني بغرفتي
ردت اعوف الاكل و اروح اشـوف شكو
بس والله جـوعانه..ظليت اگول اروح لو لا
و علما اختـاريت انو اروح و اشوف شكو
طلع عماد مألف و مبين عصبي و من گلتلو شبيك

نتر بيه و طلع
عفت الاكـل و رحت لامي..فتت لگيتها بالغرفة و هي حـاطه ايدها على خدها

- شبي عـماد

دحگـت عليه و گالت بعصبية

- تكاون هو و سلطان

- اخوو طلابة ما تخلص..شنو الموضوع الـمرة الثانـية

حچيتها بسخط..و من داخلي زعلت و انقهرت
ما صدگت رجعت علاقتهم شوية..تا يجون هسا يخربونها

- يمه ليش تكاونو؟

رجعت سـالتها و هي يمكن چانت صافنة
لان فجاة انتفضت من مكانها و صـاحت

- وجع ما تشوفيني ما اجاوبچ يعني اسكتي

- يمه شكوو..ليش متكاونين

- روحي كملي غـداچ
من يجي نفهم

- ما اكمل يمه..احچي شكو

تأففت و گامت من مكانها و گالت بدون نفس

- من رحنا للـشمال..بوكتها ايوب جايب اهلو تا يمشون عليچ
و سلطان گايللهم هاي مخطوبة..و عماد ضايج ليش هيچ يحچي؟

تخصـرت و اني اسـمعلها
و شلون النار و گبت بصدري..تمنيت لو گدامي قسم بالله اسوي خريطة
طلعت من الغرفة و اني اسب بي..بس ارجع اتذكر ابو ميت
ما حبيـت موقفـو اطلاقاً..هو منو تا يسوي هيچ و يحچي

عبالو راح افرح بهالحركة..ما يعرف انو هالتصرف مو حلو لا بحقو و لا بحقنا كلنا
و هسا لو يذبحو عماد ما ينلام

لا ما توصل للذبح..يعني هيچ حچاية على عتب
گعدت بالمطبخ و رجعت اكل..و اني اهز برجلي
اتمنى يجي هسا عماد و اشوف شـسو بيه

ذبيت الخاشوگـه و تذكرت ايوب
لازم اسمي لزوگ..شبي ماكو احد غيري بهالدنيا؟
عود اني چنت اتـمنى احد ينعجب بيه و نفس القصص اربعة خمسة يحبـوني..طلع كل الي يريدوني ايوب
والله الولد ما بي شي..بس ما ادري خجلو الزايد و لطشتو كل فترة يدز و هو يعرف ما اريدو

انسدت نفسي..و دحكت لصحن التمن
ظـلت بي لگمتين..والله ما متريگه اليوم فـ جعت

طـب عماد و اني گبل ركضت عليه
كمشت باب المطبخ لان جيت اتزحلگ لان امشي شاطفة المطبخ و يم الباب يمكن كحال البيوت العراقية تصير نزله و تتجمع بيها شوية مي

- ثـول انتبهي

صـاح بيه عماد..و اني ابتسمت
و رحت عليه و گلت

- ها كتلـتو

رفـع راسو فوگ و گال بسخط

- ربي بهـالبيت ما ينظم خبر

- لا

جاوبتو و اني ارمـش بعيوني اكثر من مرة
انتبهت ابوية واگـف ما درتلو بال
چلبت بيد عمـاد و گلت بهمس

- عفية عماد كون هيچ زورگت عينو

ضحك و هو يضربني على راسي من ورا و گال

- ها لين شصايـر

- ما صايـر شي بس تا بعد ما يعيدها

- والله تفشلت من ايوب حچـالي

طبينـا جوه و گلتلو باستفاهـم..يعني شنو گالو خطبت اختك و انطردت؟

- شلون يعني هو حچالك گالك وگفني لـ...

قاطـعني بجاوبو

- لا..سلطان چان بالسوگ و مر سـلم عليه
ورا ما راح ايوب حچالي گـال هالرجال هيچ گالي

فاتت امـي و هو سكت
صـديت عليها من گـالت

- امشي اغسلي مـواعينچ

- خـوش

حچـيتها و طلعت
ادري بيها طردتني تا ما اسمع شيحچون
هي ما تدري اخوها حچـالي كلشي

ثانـي يوم الصبح
چـان يوم اربعاء..الجو حار بس بنفس الـوكت حلو
رحت للـدوام و مر اليوم بروتين عادي

من رجـعت من الدوام..شفت سيـارة عمي جابر طابگه بالباب
گـلت اكيد جاي على ابوية
فتـحت الباب و فتت
اول شي وگع عيني عليه باب المخزن مفتوح

ما درت بال و طبيت من باب المطبخ..
محد موجود بس اصواتـهم جاية من الصـالة

بـدلت و دگـيت باب الصالة و فتت
ما چان اكو احد غريب..امي و عماد و عمي علاء على صفحة ومي جابر گاعد و بصفو يوسف الي يبچي و عمي حاظنو
و هو يگول..اشش ابني انت

اول شي خطر بالي..انو يوسف بي شي
دحگت لامي ساكته و مبين العصبية على ملامحها
سلمت و كلهم ردوا بصوت مقتضب

تحمحمت و گلت

- شبي يوسف؟

حچـيتها و صديت گبل على عمي علاء الضحك بسخرية
ضجت من تصرفو..و رجعت كررت سوالي
و يمكن محد چـان عندو الجراءه انو يحچي
بس عمـي علاء

الحط رجـل على رجل و گال بكل بساطة و هدوء

- عافو ابوه و راح..مثل ما سوه وياچن

.

السلام عليكم و رحمة الله و بركاته

شلونكم حبايبي ان شاء الله الكل بخير ❤

اتمنى البارت عجبكم 🙃

اعرف اغلبكم بحالة صدمة 😃

بـصراحة ما اعرف شنو اگول
لان والله ما عندي اي تعليق 💔

لين انطتكم الضو الاخضر بالحچي 😃💔
والله العظيم هيچ بشر عمري ما شايفة

لدرجة من گـالتلي لين ما صدگت بصراحة
لو ما دزلي صور اوراق التحاليل مالـت العملية مالتو الي عايفهن فلا چان صدگت و صور جواز يوسف خلتني اتأكد من كلامها

لين تأذت من رحـيلو مرة الخ بس مو كثر طيبة الي وثقت بي و انطتو كليتها 💔

و ها قبل لا اروح
اكو تعليق البارحة من متابعة
بخصوص دولة الفاتيكان..و انو لغتهم الايطالية او الاتينية ما يحچون انگليزي

طبعا الخلل من عندي اني غلطت
لان لين شوية تحفظت على اسم الدولة الچان بيها والدها..ف گالت اختاري اي دولة..و اني اختاريت الفاتيكان و ما جنت ادري انو هاي مو لغتهم

فـ التمسو الي العذر ❤ و شكرا للمتابعة الي نبهتني

و بس والله ❤

نلتقي على خير احبتي❤
و لهذاك الوقت استودعكم الله الذي لا تضيع وداعة❤