باجر دوام اليوم رحنة استلمنة الكتب اني واخواني
اخذنة عمو سلمان للمدارس مالتنة
خلصنة عشة وكاعدة عمة دعاء تجلد الكتب والدفاتر
حور.عمة شنو هاي الجلادات مو مال جهال
دعاء.لا
حور.بس موحلوات أريد غيرهن
قصي . مو انتي اختاريتيهن
حور.لا مو أني هاي حلا ماأدري من اخذتهم
آصف . هسة هو جلاد خابصة الدنيا
حور.اني احجي وي عمة مو ياك
هز أيدة ورجع يباوع لجدو
ندكت باب بيتنة استغربنة
الساعة 11 منو يجي هيج وقت
حسان.ياستار
طلع آصف وقصي يشوفون منو أجة
تأخرو طلع وراهم جدو وعمو سلمان
شوية ودخلو و وراهم كومة نسوان وجهال
اول مرة أشوفهم
كامت عمة دعاء وماما يرحبون بيهم
ويبوسوهم عبالك يعرفوهم
حور.حلا تعرفين منوو ذولة
حلا.لا
سلمنة عليهم وكعدو بالصالة بدون منعرف منو
طلعت بيبي فاطمة استقبلتهم بس كأنو معاجبها
كامت مرية اصغر من بيبي حضنتها وتبجي
بس بيبي تفتح اديها وتبعدها عنها
رحنة للمطبخ اني وحلا وفاطمة نحضرلهم تقديم
دخل آصف وقصي
حور.همزين اجيتو
آصف.شكو
حور.منو ذولة الناس
آصف.اخت حجية فاطمة وبناتها وجناينها
حور . قصدك بيبي
آصف.مممم
حور.زين شكو جايين ، يعني قصدي اول مرة
آصف.روحي منا حور هواي لغيتي
حور.ممحتاجة عليك احجي ويا قصي
آصف.اني اعلمج على هاي النبرة بسيطة
الزمج لو لا بس خل يرحون
قصي.بطران وين يرحون وهمة جايين من الأنبار
وهناك حرب شفاعات الا طلعو
حور.عزززة دواعش
آصف.لج شنو دواعش انجبي شوية ناس شاردة من الضيم عود حجت الفهيمة
حور.شمدريني
آصف.يلا هسة هنة 10 نفرات من غير الجهال الي وياهن
اكو بس غرفة وحدة فارغة
حور وحلا تنتقلون لغرفة فاطمة حتى يصيرلهم 3 غرف
حور.والله مااطلع من غرفتي
آصف.شحجيت اني وبسرعة نترتي وتجادلين
حور.ماطلع من غرفتي خو انطي غرفتك
تقرب مني لوة أيدي ورة ضهري
يحجي بأذني ويلويها أكثر
حور.شبيكك عوف ايدددي
آصف. هوااي صايرة أدب سز شفتيني ساكتلج
حور . أيدددي وخر وخر
دخلت بنية للمطبخ بسرعة ترك أيدي
وأشر لقصي يطلعون
حور.آصف
اندار علية يخزرني
حور.لتنسة ترى ماغيرت رائيي
آصف.تعاي
مدلي أيدة وأشرلي أجي
تقربت يمة لزم أيدي وطلعنة للحديقة
آصف.تاليها وياج
حور. شبيك
آصف.شنو هالعناد
حور.ممعاندة بس غرفتي ماانطيها
آصف. يجون حلا وفاطمة الغرفتج ؟؟
حور.ي عادي
آصف.يلا روحي وصيري حبابة
استغفر الله شون يجبرون الواحد يحجي صيري حبابة
همزين اني مخلصتها ساكتة
رحت ع البنات وكوتلهن خلص تجون لغرفتي
حور.من هسة سمعن هوسة ماريد
الي تلزم حاجة من أغراضي ماريد
وقت محدد طبة وطلعة هم ماريد
ماااشي
حلا.والله مانة علينة
حور.هذا العندي عيني مبقيتجن بغرفتي
فاطمة.بعد عندج قوانين خاتون
حور. حالياً لا من يصير قانون جديد اكول
فاطمة.امداج اي والله
حور.شون راح اطردها من غرفتي
دخلت عمة دعاء وهي معصبة
تشيل حاجة وترجعها تفتح بيبان الكاونتر وتسدة حيل
حور.عمة شبيج
دعاء.ولي منا
حلا.يا ماما قابل احنة شحجينة
دعاء.وحق الله يا حلا اذا ما وليتي منا أطلع حركتي بيج
شوية ودخلت ماما للمطبخ هم ضايجة
يحجن هية وعمة دعاء بصوت ناصي
اني والبنات وكفنة نباوعلهن بفضول
اول مخلصن كلام التفتن النة درنة وجهنة عود ممنتبهين
هزن ايدهن وطلعن
حور.شنو محد يخلينة نحجي
فاطمة .عود همة كبار
حلا.والله وجودنة صار مالة داعي
رجعنة للصالة والمرة اخت بيبي كاعدة يمهة ولازمة اديها
يحجن بس بيبي لسة ممهتمة ألها من يمي ستحيت
اول مطبينة عمة دعاء كعدت تعرف بينة
فدوة شكد أحبها من تكول بناتي
مافد يوم فرقتني حتى من نطلع يكولولها منو تكول بنتي
ام ضياء.فدووة الله يحفضهن عرايس
بس ليش نويعمات وضعاف هيج
حقها بناتها وحفيداتها الي بكدنة كولش ضخام
ومبين عليهن اكبر من عمرهن
طبعاً هية عدها ثنين بنات
ورقاء ممتزوجة عمرها 25
وعالية متزوجة وزوجها شهيد عمرها ٣٤ عدها بنية
وتلاثة جناين صباح وفجر وهند
وحفيدات نور ورشى ومها وصبى
تقريباً بعمرنة اني والبنات
وثنين يطلع عمرهن 13 و14
والجهال الصغار كومة تقريباً 9
عاد مصطفى وأمين كيفو طايرين وياهم
كول شوي يأشرولي أوكي هههه
صارت الساعة بـ 12 ونص واحنة بعدنة منايمين
كاعدات يسولفن
شفت وجه أخواني عبس
شوية وأجاني مصطفى صاح بالصالة
مصطفى. حوور يكول آصف خلي تكوم تنام
وتأخذ اخوانها تنيمهم يلا
حور.بعد ماريد انام هسة
ماما اشرتلي اكوم
لزمت أيد اخواني وصعدت
أمين.وج حوري خل ننزل
مصطفى.اي والله نلعب شوية ونصعد
حور.اني معلية تنامون هسة لا اكطعكم
مصطفى.حبابة
حور.باجر عدنة دوام امشو يلا
دخلتهم غرفتهم ونص ساعة إلا قبلو ينامون
رحت لغرفتي اول شي رحت للحمام سرحت شعري
الا نمت
تقريباً الساعة ب 2 حسيت البنات صعدن للغرفة
كعدت الصبح ماما تحجي بصوت ناصي
حتى ليكعدن البنات تريد تكومني وأرجع انام
حور.بس شوية
مي.شو كومي الساعة ب 7 وعشرة كومي
حور.كعدت هاي بس خلي اصحصح
مي.تصحصحين لو تنامين كومي ولج
حور.ماما شوية شبييج
مي.كومي تعبتيني يلا
كعدت افرك بعيوني والغرفة باردة مال أرجع انام
ماما فتحت الكنتور طلعت الملابس والقراصات
كعدت غسلت بعدين صليت وبدلت
وبقيت ربع ساعة اسوي شعري
سويتة كباية عالية ونزلت كذلة
فيونكة حليبي جبيرة جانبية خليت شوية مورد ميبين
لزمت بأيدي شالي الأبيض ونزلت
وتفاجأت صراحة تفاجأت
جوة كولهم كاعدين الجهال تلعب والنسوان وبناتهم ينضفن ويعدلن بالبيت ويسون ريوك وماما وعمة دعاء يباوعن عليهن
حور.صباح الخير
ورحت ابوس راس جدو وبيبي
اول مكعدت جابتلي بتها عالية ريوك حطتة كدامي
حور.شكراً
عالية.على شنو حبيبة
كعدت اتريك صارت الساعة ب 8 الا ثلث
كال آصف يلا تأخرنا
حور.اني أروح وي عمو سلمان بعد وكت
عمو سلمان يطلع ب 8 الا عشرة
آصف.كووومي
صيح علية كدامهن شكد استحيت
كمت لبست صايتي خليتها مفتوحة اصلا سدريتي طويلة
حذائي بيضة وجواريبي ام الكشكش هههه
لبست الجنطة ماما نطتنة المصرف وجدو هم نطانة
طبعاً نستلم راتب بابا الله يرحمة التقاعدي
ف ممحتاجين صح جدو يشتريلنة غالباً هو
بس راتب بابا موجود
صعدنة بالسيارة أني بالكدام واخواني بالأخير
آصف.بطلي عناد ، نعدلي ، المرادد عوفي
بس الكلام يطب من أذن يطلع من ثانية
حور.هاي لأن كلت اجي وي عمو فشلتني كدامهم
آصف. هو انتي تنكسر عينج أبد لا والله
حور.بقيت ساكتة وصلنة يم مدرسة الجهال
نطاهم آصف يوميات
حور.بيبي وجدو نطونة
آصف.أدري
دار وجهة يحجي وياهم
آصف.الي يصير وكح لوو تمشولكم وي شلة
تذكرون العام شسويت بيكم لو لا
ألسنة حسابنة يصير أزيد مااشي
همة حركو راسهم بقبول وراحو ركض
آصف.وانتي هم سمعي
حجاية وحدة ماريد عليج
صداقات وكروبات ماريد
درجات عالية
ماشي متفقين
حور.ي
آصف.شو ماعاجبج
حور.عاجبني
بعدين اكو واحد من الصبح يشرب جكاير
آصف.اي اني عندج شي
حور.لا
آصف.بعد خلي اشوف مخلية صايتج مفتوحة
هالمرة حذرتج مرة ثانية أيدي وما لاحت
حور.وصلت للمدرسة خلي انزل احسنلي
طلع خمسة حطها بجيب الجنطة مالتي
حور.ممحتاجة فلوس عندي
آصف.خليهن
حور.ماريد
آصف. يلا نزلي
اول منزلت صارت بوجهي ريم أووي فدوة اموت عليها
ركضت عليها حضنتها درت وجهي سيارة آصف لسة واكفة منتضرني ادخل المدرسة واني ركضت لكة حجة يرزلني بيها
دخلنة المدرسة عبالك بالأبتدائية
لعب وتحشيش دروس ما أخذنة
لحد ما صارت الساعة ب 1 ملابسي متنكعة مي
لعبنة بالبطالة وملابسي كولهن تراب شيخلصني من ماما
طلعت انتضر عمو سلمان يجيني
لكيت منتضر صعدت يمة
وهو يسألني درستي وأكولة أي
رحنة للجهال اجو وبيدهم علاكة مشترين
حور.شعجب جايبينها للبيت وياكم
أمين.خطية نطي للجهال ويانة
سلمان.عفية بعد عمكم زلم
حور.هههه شون زلم
مصطفى.شنوو ماعجبينج عود جبنالج اندومي
حور . لا اشاقة
مصطفى.هاااا
طلعلي اندومي وذبة علية
اول موصلنة انطو لحلا وفاطمة كول وحدة اندومي
بعدين كعدو يوزعون على الجهال والهم
مي.ليش ملابسج مبللة
حور.تنكعت ماما
مي.بطليها هالسالفة كبرتي مو طفلة
روحي بدلي يلا
حور.مااشي
رحت بدلت وصليت
وهمينة من نزلت هنة يصبن
كعدنة نتغدة ماشاء الله سفرة جبيرة
ماعدا آصف وقصي لسة بالدوام
صعدت لغرفتي اني والبنات نريد نام
هنة فراشاتهن بالكاع
جبت بطانيتي والمخدة ونمت بنصهن
كعدنة على صوت الباب تندك
الساعة ب 3 بعدين نفتحت الباب
آصف.هاا نايمات
حور.لا بعدنة
آصف.ديلا وحدة منجن تكوم تصبلنة غدة امي نايمة
والبيت يصفر
حور.جان حميتو ليش كعدتونة
آصف.اني طالع عشر دقايق أريد الغدة جاهز
رجعت نمت فاطمة كامت تجهزلهم الأكل
ضربتني اني وحلا الا طلعت الحقيرة
كعدت الساعة ب 6 الغرفة ضلمة البنات مو يمي
غسلت ونزلت شعري مفتوح حتى ممشطتة
جانو كاعدين يشربون جاي ومسوين كليجة
الله شكد أحبها
سلمت عليهم ورحت جبت كلاص وأجيت
صبولي جاي وكعدت اشوف ياكليجياة ام التمر
آصف.تعاي ذني ام التمر أربعة طلعن ضميتهن الج
هو يحب ام الجوز بس من تطلع تمر يخليها الي
ضحكت وأخذتهن منة
حور.شكراً
آصف.عفو يابة
خليت الكليجاية بالكلاص تتنكع الا أطلعها وأكلها
آصف.هااا حورية هسة كلنا حبابة وعاقلة
حور .شسويت
آصف.اكو واحد هيج ياكل هسة البسكت كلنة عادي
مو كليجة وكلها تمر تخليها بالجاي مو صح ؟
حور.لعد شون أكلها
آصف.كل وحدة وحد
حور.مااشي
بس والله طريقتي أطيب
أشرلي بحواجبة يعني لا
بقو كاعدين ويسولفون وأجو صفاوي وأموني يركضون
مصطفى.أجو خمس زلم بالديوان