| يا تعبي العشگته | ' باللهجة العراقية '

| البارت الثالث و العشرون|

#يا تعبي العشگته
#بقلم الراوية
#البارت الثالث و العشرون

بسم الله الرحمن الرحيم

| صلوا على النبي ⁦♥️⁩ |

.

لين..

ارتـديت خطوة ليورا..و اني اشوف عماد التقدم باتجـاهنا بعصبية
عاگد حواجبـو و قبضة ايدو تشتد..

صحـت بجفلة من كمش والدي من ياخة تراكو الاسود الثخـين و هو يرجعو ليورا و يصـيح بوجهو
بـكلمة
ليش تـضربها

ابوية حـاول يبعد عماد و هو يريـد يبرر سبب ضربتو الي
بس عماد ما انـطاه مجال
خـالي عمرو ما مد ايدو علينا..رغم عصبيتو و مرات عدم تفاهمو بس ما يضرب وحـده منو

امي طلعت على الصياح الي يصدرو عماد
و هو يدفع بابويه على الحايط

گـلت لازم ادخل..ما اريد تصير مشكلة
حاولت اوخر عماد و اني اگول

- عمـاد عوفو..مريض هسا يموت جوه ايدك

صد علـيه و هو يصر على اسنانو و يحچي

- يمد ايدو عليچ و اعوفو
لا يتسبع عليچن هالگ...

- اشش اشش عماد وخـر عنو الله يخليك

صاحـت بي امي..و اني ادحگ لابوية هدأ
و عماد بعدو دافعو على الحايط و كـامشو من ياختو
يدحگلو بنظرات حارقة..

- تمد ايدك مرة ثانيه اكـسرها

حچاها عماد و اني حاطه ايـدي على كتفو
اريدو يوخر..هسا يختنگ لو يصير بي شس و نبتلي

- عماد عوفو

حچـيتها بهدوء..و مع نبرتي الهاديه ارتفع صوت والدي الغاضب و هو يتـكلم

- عجـل تريدني اسكت من اشوفها تنزل من سيارة واحد غريب !

جيت اجاوبو بس عـماد سبقني و هو يگول بسخرية

- محـد غريب غيرك

ختم كلامو و هو يهدو و يبـتعد عنو
تقربت عليه و گلت بصوت نـاصي

- نـتحمل علما يروح وامرنا لله

امـي اگفة باب المطبخ و هي مكـتفة ايديها لصدرها
ادحـگ عليها تكابر و ما تريد تنزل دمعتها

جينا نفوت و نعوفو..بس انتبهت لـ يوسف واگف باب المخزن و هو يبـچي بدون صوت

انـدار عماد و توي تا يفوت للصالة بس تصـنم بمكانو من گال ابوية

- مـو يعني انو انت ربيتهـن يعني ها هي اني ما الـي اي مسؤولية عليهن
عمـاد..ترا هذني بناتي

صـد عليه عماد..و هجـم عليه فجاة
و هو يدفعو بالگـاع..امي صاحـت و هي تريد توخـرو عنو
و اني بمكاني واگفة
لا اگـدر اروح و افك والدي من جـوه ايد عماد
و لا اني الاگدر اسكت

ادحگ لوالدي نفسو ضاق و هو يريد يوخـر عماد عنو
ما تحملت اشوفو هيچ..مو علمودو لا والله
اخاف لا خـالي بدون وعي منو يقتلو بمكانو

و نفس اول مرة گوه وخرتـو عنو بمساعدة امي
عدل عماد قميصو و بيدو الثـانية يأشر على والدي و هو يحچـي بعصبية

- بناتك گـلتلي موو..اسمع صلاح حچـايتي و حطها بـاذنك لين و طيبة اني التعبت عليهـن و اني الربيت و اني القدمت كلشي علمودهـن..مو تجيني ورا عشرين سنـة اطالب بمسؤليتهن

- هه اي مسؤولية و انـت تخليها تجي وي واحد غريب

- لـو تجي وي سلطان بالـ12 بالليل ما راح اشك بيها لو ذرة...انـت ما تعرف بناتك لان مـو انت الربيتهن
و جـاي هسا تريد تتحكم بيهن..محد الو سلطة عليهن ما طول اني عايش

مشى و طب جوه
گّام والدي و هو ينفض بملابسه..رفع راسو لامي الگـالت بسخط

- اسمع صلاح..تريد ظل هين تحكم بنفسك و لسانك
ترا محد رايدك هين بس لانك مريض..اطيب من مرضك و تطلع من هيـن

و هي الثانية فاتت جوه
هو زفر و صد على يوسف..و حچه ويا بالاجنبـي
و رجع صد عليه

جيت اعوفو و افوت..بس وگفني من گـال بتعب واضح بـنبرتو

- ما توقعت بنـاتي و مرتي يسوون هيچ

- و لا احنا چـنا نتوقع ابونا يسوي بينا هيچ
ما گاعد نسوي الا رد الصاع..مرضك و تعبك شفعن الك و خلنا نبقيك هين..چان ثانية ما ظليت هين

مشيت و عفتو..و ما زدت على كلامي
طبيت مـن باب المطبخ و اني اسمع امي و عمـاد يتسولفون بخصوص الصار

فتت لغرفتي و سديت الباب..زفرت و اني امسح علـى وجهي
شلون راح يگـضي هالوكت و هو هين؟
شگد لازم نتـحمل و نتحكم باعـصابنا

قريـب المغرب گعدت..راسي مصدع
گعـدت بالصالة و عماد يتفرج على التـلفزيون
و كوم گـشور يمو..چان طالع فيلم سيد الخـواتم
يمكن شايفـنو الف مرة..بس كل ما ينعاد لازم نتـابعو
گعدت بصفو و هو گبل ناوشني حب شمس

- امـي وين

- بيت خالتي

جاوبني
و انـي گبل گلت

- بس اليوم عدهم خطوبة

- اكيد خلـصت

سحبت تلفوني و دگيت على روان
ما طـول خلصت الخطوبة..ظل يدگ و وين يلا ردت

- ها رونه

- هلاو لين

- امي يمكم مو؟

- اي ليش؟

- لا هيچ ردت اتأكد
اي شوكت جيتو

حچيتها و اني اذب الگشور
و هي ردت

- اجيچ بالليل و نتسولف..عندچ شي

- لا..تعاي من وكت مو بالـ10 و نص ساعة و تروحين

- اكـمل عشا و اجي

- باي

حچيتها و ما انتظرتها ترد
و سديت الخط..

دحگـت لـ عماد الگال و هو يركز بالتلفزيون

- عدچن تبادل علوم و اسرار؟

- بالضبط

جاوبتو..و اني ارجع حب الشمس للصحن

- اگـول ما عندك غير هالوكت اتابع فيلم..اريد اسوي عشا

دحگلي و گال باستفزاز

- ما عندي شي اني..خوما مثلچ اروح اغرق بالزيت و ريحة الطبخ

ضيقت عيوني و اني اجاوبو بنفس النبرة

- غير تا نملي بطنك..صاريلك كرش

حچيتها و اني اطبط على بطنو..و هو تعدل و گال

- لا عاد..والله ما عندي
اخاف متوهمه بين كرشـي و كرش ابوچ

ابتسمت و ما جاوبتو..رچيت راسي على ايدي و گلت بهدوء ورا ثواني

- عماد..

- هـا

- يعني برايك هناك شلون عاش؟

- اكيد بالبارات و السكر
ما تشوفين كليتو تأذت بسبب كثرة الشرب..

ظليت ساكته و عيني غورگت..بس سرعـان ما كتمت غصتي و اني اگول بسخرية احاول اخفي شوية من قهري على الصار

- بس تگول امي فرد مرة الكلى متأذيه
يعـني لو اكو متبرع چان شالها..

- لو ظال هناك احسن..هه على الاقل يتعالج
بس هو خلصت فلوسو و جا

- يعني مو علـمودنا؟

سألتو بهمس..و هو دحگ عليه لحظات
گبل لا يرجع يدحگ للتلفزيون بدون ما يرد..
يمكن نفس الجـواب نفكر بي
هو ما جـا علمودنا..مرضو جابو

الصبح ما صارلي واهس اداوم..و صدگ ما رحت
دزيت رسالة لـ روان اعلمها بهالشي

امي گالت روحي اشطفي الطرمـة
و اني بدون نفس طلعت..

گمت اغسل بيها..و شفت يوسف طلع من المخزن..وده الصينية للمطبخ و رجع
و گف بالباب مالت المخزن..ابتسم الي و رفعلي ايـدو
و گبل لا يگول كلمة اني سويت نفس حركتو و گلت بتكشيره

- مرهـبا

هو ضحك و رجع گال مرهبا..

كمبت غسل الطرمة و هو بمكانو واگف

لميت الصونده..و رحت باتجاه الحديقة اريد الم الاوراق البيـها
هو لحـگني بس اني ما درتلو بال
وگف يم شجرة مالت ليمون
و هاي الشجرة صارلنا چم سنة زارعينها..و لحد هسا ما شالت ليمون..يمكن عاقـر

هو ظل صافن بيها
گبل لا يتلفت عليه و اني مدنگه الم بورق شجر
و سألني.. هذا شجرة ليمون
الحمدلله حچايتو سهله..و الا تعال يا مترجم گوگل ترجملنا

هزيت راسي بـ اي..و هو ضحك و رجع گال
احب اليمون..

كملت شغلي و هو بس يتفرج..
طبيت للمطبخ و لگيت امي تسوي بالغدا
شكلو ابوية مو هين..فـ هو طلع يتفسح شوية

وگف باب المطبخ..و اني گعدت على الكرسي
و طلعت تلفوني
ضحكت امي و اشرتلو يفوت..و هو ما گال لا
گبل فات و گعد بصفي

صح ساكت بس يبتسم و يدحگلنا..
صح ما مأذيني بشي..بس من اتذكر انو هو حـصل حب و حنان من والدي انقهر
هو ابنو..و احنا همين بناتو

ظل گاعد الا ان جا ابوية..و هو رفع ايدو و گال

- ودائن

و طلع..و اني ضحكت والله
چنـا بـ مرهبا صرنا بـ ودائن
.

طيبة..

دنيا صبح و چنت اني و عمـتي بالمطبخ
نلف دولمة..البنات بالمدرسة..و زوجـة بهاء تلم بالبيت
و عمي و ضرغام بلدوام..بس بهاء فوگ نايم

ابتسمت لمـن عمتي گالت

- والله چان ينكسر ظهري من اسوي دولمة
دانة و زينة بالدوام فـ بالليل مرات اسـويها تا يساعدني

- و هسا جيت اني و بعد ما تحتـاجين

حجيتها بضحكة..و هي گالت

- الله يحفظـچ يا بنتي..والله مو علمود گـدامچ بس من طبيتي لهل البيت ارتاحيت

خجلـت منها و اني اكمل لف بورق العنب
شوية و گالت بهدوء

- يمة طيبة..ماكو منا منا خبر حلو

- شنو عمه؟

ما فهـمت قصدها و هي جاوبـتني

-يعني..ماكو حمل

خليت الورقة بالجدر
و جاوبتها

- لا عمه

- الحمدلله على كل حال..ربي ينطيني عمر الطـويل و اشوف حظنچ مليان جهال

- آمين يارب

رديّت عليها بصوت ناصي
كملنا الجدر و غسلت المواعين..و هي گالت اني كل شوية اشوفها
لان اريد اصعد اغسل الملابس..

من فتت للغرفة ذبيت حـسرة و گعدت على التخت
گمت دائمـاً انسأل هالسؤال
ها ماكو حمل؟...شوكت تخلفين مو طـولتو

عبالهم اني ما اريد..و ما گـاعد يصير حمل
ما يدرون انو كـلشي بيد رب العالمين

العصر جـا ضرغـام
و رحت لاهـلي..گتلو راح ابات و هو ما اعترض رغم شفتو ضاج
بس مشى الـوضع..

امي چلبت بـي على العشا و ظل هو
و باللـيل راح..گعدنا اني و ليـن و البقية گاعدين بالصالة نتعلل
عماد طلع للگـهوه و امي فاتت نامت
و هين گـعدت تحچيلي على الصار قبل كم يوم وي والدي

تنهدت و گلتلها

- شنسوي لازم نصبر و نتحمل علما يروح

- طـيبة والله البيت گام يخنـگ احـسو
شعور بداخلي مـو مرتاح من وجودو

كمشت ايـدها و گلت بنبرة هادية
فـاهمه شعورها..لان والله احس هيچ..بس خوما نطردو..يظل انـسان مريض و بهالدنـيا محد الو غيرنل
رغم تخـليو عنا

گامت هي تا تـنام لان تگعد الصبح على الدوام و ظليت اني بالصالة..گمت اريد اقفل الباب مال الصالة عود من يجي عـماد يدگ على الفـون

من تا اسد باب الصالة شفت والـدي بالحـوش و هو يتقيء
انكـسر گلبي عليه..مبين على ملامحـو الوجع
و يوسف واگف بالباب مال المخزن يدحگلو بعيون مغورقة..

شفتو گـوه يمشي و هو يسند نفسو على الحايط
جـا يگع فجـاة..و گبل تركت زعلي و كرهي الو ورايـة
رحت عليه و سنـدتو

ما دحگتلو..بس چنت احس بشعور ما عرفت اوصفو
حزن على حالتو لو لان اول مرة اتـقرب منو هيچ

فوتو للمخزن و خليتو يمدد على فراشـو..
فات يوسف و سد الـبات تا ما تبرد الغرفة..

غطيتو و هو يتنهد بتعب..
ركزت بوجهو مو مثل اول مـا جا..
صد على يوسف و حچه ويا
الي فهمتو گـالو جيبلي العلاج

انطاه يوسف و گعد يمـو و خلاه يرفع راسو و هو ينطي دوة
ادحگ ليوسف..مادري ليش ابتسمت بيني و بيـن نفسي

مبين حنين و فاهم رغم صغـر سنو
اني ما عندي مشكلة وياه..عكس لين
ما اعرف ليش تضوج منو..

بللت شفتي و گـلت

- مسكـنات؟

هز راسو بـ اي
و اني كملت

- ليش ما تاخـذ علاج

- العلاج گـام ما يفيد

حچاها بوهن..و سند نفسو على ايـديه و گعد
دحگلي و كمش ايدي..جيت اجرها بس هو تمسك اكثـر عيونو دمعت و هو يگول

- طيبة..انتي اول شخص من جيت هين يسأل عن حـالي

صديت عنو و اني اريد اكتم دمعتي
اني مو مثل لين اگـدر اتماسك..اني ام دمعية على گولتها..ما اتحمل اشوف شخص بهالضعـف

- المرض ياكـل جسمي اكـل
ما گاعد اتحمل الوجع بنتي..

- اخذ علاج

- مـا يفيد..العلاجات بدت تعبني اكثر مما تشفيني

صديت عليه و هو كـمل بنبرة انسان اخذ منو التعب ما اخـذ

- يوميا اروح للمستشفى..بلكتن الگه متبرع
اريد ارتاح والله تعبـت..

وگعت دمعتي و على السريع مسـحتها
ما ردت ابقى اكـثر..گبل گمت
بس هو چلب بيدي..و گال

- الله يخليچ بنتي گعدي..مليت من الوحده
اريد اسولف وي احد

- هيانو جوزيف..احچي ويا

صد على يوسف الگـاعد على تختو
و هو گال بهمس

- يظل طفل..و من اشوفو اتذكر والدتـو

- ليش چـنت تحبها

سكـت و ما رد..و اني وخرت ايدو عن معصمي
و گلت بغصة بدون ما ادحگـلو

- ربي يشافيك

و طلعت...اول ما عبرت عـتبة الباب
بچيت و اني اخلي ايدي على شفتي..والله ما گدرت اتحمل نبرة صوتو و المو

حـتلو وصل بيه كرهي الو لعنان السماء
يظل ابوية..و شخص مبتلى بمرض
طبيت للصالة..و اني اگول كافي طيبة لا تبچي
بس ما گـدرت اني اذا اشوف بزونه متأذيه انتهي
شلون اذا چـان بشر..و فوگاها مرض الكلى
و هالمرض حرفياً ينهي صاحبو

الصبح من گعدنا سويت الريوگ اني و امي
و لين طلعت مستعجلة لان تأخرت على الدوام
و عماد راح للسوگ..سوت امي صينية تا اوديها لوالدي
و اخذتها الـو

دگـيت الباب و شوية و فتحو يوسف..
ابتسمت على شكلو العفوية..لابس بجامة مال نوم
چانت ملامحـو ناعمة..عيونو واسعة و حواجبـو بيهن ثـخن
ابتسم هو و وخر عن الطريق..و راح باتجاهه المغسلة تا يغـسل

تنفست بعمق و اني اگـول
طيبة حطي الصينية و اطلعي..لا تگعدين و تحچين ويا

هو چان يسفط بالفراش مال التخت مالتو..
حطيت الصينية بالگـاع..و هو صد عليه
و صبح..و اني رديـتها بصوت ناصي..

جيت اطلع بس گـال

- گعدي طيبة

- اروح اساعد امي

- دقايق ما تاخذ من وقتـچ شي

حچاها و صديت عليه..
فات يوسف و گـعد يم الصينية..يـدحگ
للچاي و فجاة گام و توجه لابـوية
حچه يم اذنو..و والدي ضحك

و رفع راسو و گال

- طيـبة اكو حليب

- اي اكو

- تگـدرين تجيبين لـجوزيف
هو ما يحب الچـاي

هـزيت راسي بـ اي
و طلعت
فتت للمطبخ و طلعت قوطية حليب نيدو
صديت على امي و سألـتها

- يمة انتي كل مـرة توديلهم حليب

- ياا والله نسيت..ما خليت اليوم
لان الولد ما يشرب چاي

حميت مي و خليتو يصير حار
و سويتلو حليب و بـكوب وديتو الو

ابتسم و هو خلى شكر و گام يتريگ

ظليت واگفة بالباب و والدي ياكل و يرجع يرفع راسو يبتـسملي..

ما حچيت شي..عفتهم و طبيت للبيت
ساعدت امـي شوية
و دگ تلفوني

من رحت تا اشـوفو لگيتو ضرغام
فتحت الخط و رديت عليه
و هو گال

- اذا تريدين تظلين يم اهلچ ظلي
اني شوية و اطلع عندي سفرة

- وين!..بعدين منو يرتب جنطتك

- هين قريب لتركيا..اني ارتبهن
بس راح اشتاقلچ

ابتسمت و اني اگلو بنبرة هادية

- اني همين..خومـا اطول

- لا 3 ايام اربعة

تنهدت و ضجت
و هو حس عليه و گال بضحكة

- شبيـچ طنگرتي

- لان اضوج من تسافر

- عـجل اني ما اضوج من تباتين عند اهلچ

- اني يوم و ارجع..مو مثلك اطـول اسبوع و ما اعرف شنو الوضع العندك

گمت بس اسمع ضحكـاتو..
ورها گال باستفزاز..گمت اتعود عليه

- والله..عاد انتي صادقة الوضع مرات عندي يصير يخوف

- و من تتذكرني تخاف

- بالضبط

فاتت امي و اني تحمحمت و گلت

- اي عجل تروح و ترجع بالسلامة
عود طمني

- امچ جتي مو؟

دحگت لامي و اني مسحت على گصتي
و گلت

- اي..اريد اروح اكمل شغلي

- اوف من هالشغل..روحي عمري
عود اخابرچ من تا اطلع

- اوكي حياتي..باي

ودعني و سد الخط..و گمت كملت وي امي كم شـغلة
مادري ليش لحد هسا استحي منها من احچـي ويـا ضرغام
عبالك خطيبي مو زوجي...

جا عماد بوكت الغدا
و اخذ الصينية الهم..
و هيچ مرت يومين و ضرغام بعدو مسافر..يخابر يطمن عليه و يسدو..

و ابوية مرات من يشوفنـي بالحديقة يگف يمي و يـسولف وياي
اكثر من مرة حچه وياي
و دائماً يشكيلي وجعو..و ما چان بيدي غير انو اطمنو انو كـلشي يصير بخير ان شاء الله..و انو رحمة رب العالمين وسعت كلـشي..

بالليل خابرني ضرغام..و گال يجوز ما اجي بهاليومين
اذا تريدين ظلي..و اذا لا..بكيفچ

و اني قررت ابقى..لان هين شوية مرتاحه رغم مشتاقة لعـمتي و عمي
بس شوية ارتاح من دانة..الي صح سكتت عني بس اظل اشوفها ما متقبلتنـي لحد هاي اللحظة

اما مـلاك..فـ من يوم الي كتلها عمي بسبب حچيها عليه ما خطت عتبة باب بيت عيالي..
خفه و راحه والله..

الـعصر رابع يوم..طلعت للحديقة
و لگيت والدي گاعد على عتبة الباب و هو منـزل راسو
و بصفو يوسـف

جيت اتجاهلو و اطب..بس گـلبي ما انطاني
عضيت على شفتي و انـي اگول بس اسـألي و طبي
و اخـذتني رجليه ناحيتو

وگفت گدامـو و هو رفع راسو و رجع نزلو
بس التعب واضـح عليه حيل
اكثر من قبل

دنگت عليه و ساعدتو يدخـل جوه
لان الجو بارد..رغم هالايام بدت تدفى الدنيـا..
چـنا نهاية شهر الثالث..2018
طـبينا جوه
و مدد على التخت مالتو..و يوسف سد الباب و شغل الصوبة الكهربائية
لان الكهرباء چانت طافية

غطيتو..و انطيتو المسكن
چنت اساعـدو مو كانو والدي..بس اساعدو بعطف
و رسمـية

جيت اطلع بس كـمش ايدي..صديت علية
و هو بوهن گال

- طيبة..ظلي هـين والله تعبان

- نام و ترتاح

- طيبة تعبان..بنتي ساعديني
والله بعـد ما اگـدر اتحمل الوجع

بلعت ريـگي و گلت باستسلام

- بشنو اساعـدك..ما بيدي شي
نام هسا..اكيد المسكنات راح يهـدنك

- زين گـعدي هين يمي..علما اغفـى

زفرت و اني ارفع راسي ليـفوگ
رجع كـرر كلامو و هو يگول بس اغفى
استسلمت و گعدت يمو
و اول ما گـعدت دگ تلفـونو
طلعو من جوه المخدة و رد عليه

ما چنت منـتبه عليه لان صبيت كل تركيزي
على التلفزيون و القناة الي مطـلعها يوسف
ادحگ عليه دخل للضبط و بدا يسوي شغلات بصراحة ما عرفت شنو معناها
يمكن يريد يغير القمر..بس مو المفروض من فوگ

جذبني كلام والدي من گال بتعب

- الله كريم..الله يخليك دكتور اي شخص يريد يتبرع انطيـني خبر ترا تعبت

صديت عليه من سد الخط..
و هو ابتسملي و گال

- گال الشخص الي يريد يتبرعلك..تراجع عن قرارو

سكت..و هو سكت
و رجعت صديت على يوسف..

.

روان..

چـنت گـاعده بالغرفة مالتي
و اني اقرا..دگ تلفوني رنة رسالة
تجاهلتها گـلت اكيد الشركة
لان بزمن الواتساب و الماسنجر..قلة قليلة ترسل رسالة على الرصيد..

ورا تقريباً ربع ساعة
سديت الملازم وگـمت اخذت تلفوني
و طلعت للصالة..لگيت بس سلطان گـاعد
الساعة بالـ12
باجر جمعة..فـ اليوم يوم السهر

اكيد والـدتي هسا بسابع نومة
سلطان متمدد على القنفة..و رافع رجلينو على اليد مالتها..والله لو تشوفو امي راح
تگـول
نزل رجليك..صرت شايب

و طبعاً كلمة شايب..تحمل معناة واحد
انو كبر بالسن..ولحد هسا بدون زواج..حافظة المصطلحات السرية للوالده

فتحت الفون..و عگدت حاجبي من انتبهت للرسالة
من رقـم غير مسجل عنـدي

" خـصم الحچي..كلشي باسمچ الليل و الدنـيا..و الاغاني و الحزن..و گـلبي "

اني قريت المكـتوب لو صاعقة ضربتني
ايدي رجفت و بـلعت ريگـي
و خفت حيل..گوه حذفت الرسالة بس گبلها انتبهت
لكلمة جـوه لحد هسا ابـالي
" مو طبـعي الرسايل..بس الليل جبرني "

سويت تلفوني صامت
و اني احس نفسي ضـاق..منو هذا و منين جايب رقمي و شعـندو

جفـلت من گال سلطان

- اگـول روان..شو جيبي الفيشة تا اربط التلفون بالتلفزيون

هزيت راسي بـ اي و طلعت
چانت الفيشة بـغرفتو
رحت جبتها و جيت..و هو ربط تلفونو بشاشة التلفزيون..و گـعد يدور فيلم

طلع فـيلم لاحمد حلمي..اسمو عسل اسود
صح من 2010 بس كلش حلو
ابتسمت من گال سلطان بضحكة

- اعرفچ تحبينو لاحمد حلمي
فـاليوم السهره على شرفو

رحت گعدت بصفو ورا ما رحت سويت شامية
و گـعدنا نتفرج
صح چنت ادحگ..بس كل تركيزي ظل عند الرسـالة

صديت على اخوية مـن سألني بهدوء

- روان..شنو الوضع بين لين و ابوها

- ليش؟

تنهد و تعدل بگعدتو..دحگلي ثواني و گال

- مو تأذت حيل

- كلهم تأذوا..مو بس هي
بس تگدر تگول هي چانت طول عمرها تحبو و هيچ فجاة يطلع بهذا الشكل

زفـر و فرك على شعرو
دحگـتلو لحظات و گلت بتردد

- سلطان..انت تحب لين

انتفض من مكـانو و گال

- شنو احبها..اكيد لا

- عجل ليش خطبتها؟ و دائماً تسأل عنها

و بثقة جـاوبني

- شيلي فكرة انـو احبها
بس تگـدرين تگولين اعجاب طفيف..فكرت بيني و بين نفسي و كلام امي ظل بالي
مو يگـولون اخذ اليحبك و لا تاخذ التحبو

- بس اني ما اتـفق بهالشي..الشخص اذا ما شايلو مشاعر عمرك ما راح ترتاح ويا

- بس اني اشوف عكس هالشي..
الانسان يرتاح بسبب شنو؟ اهتمام احترام..ثقة و راحة بال
من الله يرزقك بشخص يسويلك كل هاي الاشياء..حتلـو ما راح تحبو
تلقائياً تشوف نفسك متأقلم ويا و مرتاح
الحب مو كلشي روان

ابتسمت على تفكيرو..ما اعرف
يمكن صح و يمكن غلط..بس الجذبني كلمتو الاخيره
فـ گلت بهدوء

- الحب مو كلشي..نفس حچـاية لين
مو بقصد اذكرها گدامك..بس هي همين هيچ تشوف

ارتـچى على مسند القنفة و گال بضحكة

- شوفي هسا لازم تغيرين رايچ
لان اخـوچ و صديقتچ نفس الراي

بداخلي گـلت..يا رب اشوفك سوية مو بس بنفس الراي
يس سكتت..
ظلينا نتفرج على التلفزيون..و ما ادري باي ساعة خلص الفيلم
و اني حرفياً طفيت من الرئيسي
گوه رحت لغرفتي و نمت بمكاني

خلت العطلة و رجعت للدوام
و خمسة ايـام مرت..الحمدلله الرقم ما رجع دز..

خلص الدوام و طلعنا وي سلطـان..لين ادحگلها هادئه
بس اعرف ورا هالهدوء معارك بداخلها

دگ تلفوني برسالة..و ما اعرف ليش خفت اشوف شنو..
فتجاهلـتها..وصلنا للبيت
و حدرت من السيارة..بدلت هدومي و تغديت..جيت اغفي شويه

بس تفطنت على الرسالة الوصـلتني
طفرت من مكاني..و سحبت الموبايل..والله گلت هسا اذا هو بدون اي كلام بلوك و شيريد يسوي خلي يسوي..

رمشت بعيوني و انـي اقرا بالرسالة
يمكن خمس مرات عـدت قرايتها..و احس مشاعري بلحظه صغيره تـخربطت..
" كلـهن چذابات..ما يستاهلن كلمة احبچ..الا انتِ "

گعدت على التخت و ظليت كـامشة الموبايل
جيت ادز منو انت..شتريد
بس تراجعت..و گبل حذفت الرسالة
و انطيت بلوك للرقم..ما ردت انجرف ورا كلمـتين من شخص غريب..
اخاف تاخذنـي هالكمتين لابعد من هيچ
لدرجة تخليني انسى نفسي..و انسى تربية اهلي..

على عساس اغفى..بس ما گدرت ظليت افكر بشأن الرسالة..
انتظرت اذان العصر..و من سمعتو اذن
گـمت صليت و خلصت و رحت لـين

دگـيت الباب و فتحو عماد
توترت من سلمت و هو رد السلام..بس مبين عصبي حيل
فات و اني استحيت..خوما ارجع؟

فـ فتت طبيت للصالة
و لگيتهم مجتمعين و صياحهم عالي..طيبة گاعده على القنفة و لين نار و شابه بيها و امها تحچي تگول تخـبلتي

استحيت حيل..يمكن جيت بوقـت مو مناسب
انـتبهت لين لوجدي..فسكتت
و اني بخجل گلت

- اني اعتذر..مع السلامه

- يمه روان مو غريـبه فوتي

- لا خالة..والله اعتذر جيت بوقت مو مناسب

انـداريت و طلعت..حسيت احد يمشي وراية
مع ما انداريت لگيت لين و هي تلبس حجابها
جرتني من ايدي و گالـت بسرعة و عصبية

- اجي ويـاچ لان اذا ظليت ارتكب جريمة بـ طيبة

ما حچيت شي..لان اعرف لين من تعصب تگوم ما تعرف شنو گدامها

فتت لغرفتي گبل.امي بالمطبخ مدري شسوي و سلطان نايم

گعدت على التخت و اني قدمتلها مي
گعدت گبالها و گلت

- شبيچ شصاير؟!

شربت الگلاص شربة وحده..انطتنياه و گالت و عيونها تحتد بغضب و سـخط

- طيبة راح تجلطني

- شنو مشكلة وي رجلها

- لا..

- عجل

سكتت لحظات..و مسحت وجهها
وخرت ايديها و هي تضرب على فخذها و گالت بخنگة

- تـريد تتبرع بكليتها لابوية

.

السلام عليكم و رحمة الله و بركاته ❤

شلونكم حبايب گلبي ❤

ان شاء الله الكل بخير 🙏

اتمنى البارت عجبكم

طبعا بيني و بينكم..و تدرون بيه ما اظم شي عليكم
طيت انهي البارت بغير قفلة 😅
بس شنو..يمكن شوية اشتغلت الخباثة عندي 😅😅
و سويتها..مع انها مو كلش قوية 😁

المهم شنو رائيكم بالبارت ككل 😃

طيبة و قرارها 😑 تعتقدون ليش سوت هيچ
يعني صدگ حست بـانو لازم تسوي هالشي من دافع انساني لو عاطفي..انو هو ابوها و هيچ

و روان 😅

طبعاً قبل لا اروح
ادعو لـ ام جود umjoodi123 ملامسه لزوجها المصاب بـكارونا
عمري ام جود ان شاء الله ما بيچ غير العافية🤲
و الشفاء العاجل يا رب ❤

و ممكن متابعة لهذا الحسابt03_95

و بس والله
نلتقي على خير احبتي❤
و لهذلك الوقت استودعكم الله الذي لا تضيع وداعة ❤