البارت 32
رواية..جولييت واسرها...غياهب الإنتقام
بقلمي...نور سمو
💔💔💔💔💔💔💔💔💔
فقدان الثقة بشخص مثل تمزيق الورقة ...
يمكن لصقها...
لكن لا تعود كما كانت...
.......................................
عدم الخوف من رب العالمين هو سبب مم اسباب النذاله والحقاره
الي ما عنده مخافة رب العالمين وبايع ضميره هذا نذل وجشع وخسيس وحرامات يتسمئ انسااان الحيوان اشرف منه ...
والي بايع دينه ياذي الناس بطريقه مشروعه وغير مشروعه المهم يرضي حقارته وسفالته...
بحياتي ما شفت هييج واحد خسيس ونذل مثل داوود وعديم شرف هو لو عنده شرف جان كال ان وقار بيوم من الايام جانت علئ ذمتي
شلون ادنس عرضها وشرفها واخلي اليسوه والمايسوه يشوف صورها...
انلجمت كل حواسي واني اشوفها زاهيه بفستان الخطبه وضحكتها البريئه الناعمة
للاسف صدرها طالع الفستان جان كاشف تفاصيل جسمها باغراء
حوريه بفستان ناصع مبتسمه بحزن عميق وخافيه ايدها المجروحه وموجهه نظراتها الاخاذه للكاميرا تذوب الگلب من حزنها...
جنت اباوع للصوره بصدمه وذهووول...لااااا ياكلب لا ياااا عااااار والله اليوم اطلع حليب امك من خشمك..
شمرت الموبايل بسرعه واديه ترعشمن العصبيه ركضت للكنتور طلعت ملابسي ومسدسي لبستهن بسرعه
اتصل موبايله شفته مكتوب داوود...
فتح خط بسرعه وبدون سابق انذار نزلت اهله كلهم ...لك كووو..ساقط كلب والله وحق ابو فاضل يا داوود اذا ما خليتك تتمنئ الموت وما تلكاه
رد بضحكه...هههههههههاي ..عجبنك الصور ؟
واردف بحقاره وجديه بالكلام....انتم الي اندكتوا بيه انت بالذات لو بيك خييير ما تدني نفسك علئ خطيبتي واني ابن خااالك
رديت بقهر وغضب...الك العن ابووووك لابو حتئ خالي بسيطه يااا عار بسييطه
كمل ببرود قاتل...الفيس مو هلكد بي الطشه بس روح لليوتيوب واكتب « ....» شوف عرضك وشوف التعليقات علئ وقار واختك ريهام
حرامات ما طالعه جووولي جان طك المقطع من صدك اوووويلي كلها دكووول هنيال زلمهن شلون متحملين هيييج جمال...
اعصابي تلفت من كلامه والنار تسعر بصدري ...ابن الكلب ابن النعال والله بس اجي اله اخليك تبجي دم...
قفلت الخط بوجهه ودخلت لليوتيوب كتبت شنو كال بالضبط وفتحته طلع مقطع لخطبة وقار بس جان المقطع قبل لا يعقد عليها...
يعني شلون بعدهم ما كايلين تمت الخطبه هلهلوا
اعتقد امه مصورته جانت وقار كاعده وتفرك باصابعها وريهام يمها بس ريهام لابسه حجاب بس وقار لا ماكو اي احتشام رغم كل شويه وخلت ايدها علئ صدرها العاري....
من شفت المقطع حسيت الدم تجمع براسي وعيوني بعد ما اشوف بيهم من القهر...
هذا يلعب بعرض مهيوب العلي وينشر علئ يوتيوب وعلئ الفيس...
والتعليقات فوك ل300 تعليق ومشاهده الفين ...
وكلها تعليقات بذيئه واكو تعليقات كاتبين طيح الله حضك النشرته سوو ابلاغ علئ الفيديو مبينه البنيه بنت عوائل وخطيه معوقه بس حلوه
تركت نص التعليقات وركضت بسرعه نزلت الدرج باقصئ سرعه والسلاح بيدي....
ركبت بسيارتي واني افح من العصبية...والله يا داووود اله اخليك تبوس الايادي يا عار يا ابن العار...
اتصلت بجاسر مجاوب ضربت ايدي علئ الاستيرن بغضب...افتتتتح خط انت الثاني مو وكت انانيتك
.........................
جولييت....
احس نفسي ضعيفه هزيلة مقيده باسوار سجنه يعني من طلعت من غرفته لحد الان وهو محاربني كل شويه وعاط بيه...
حتى ما يستعطف حالتي وخوفي منه ومن اهله
والله اني من طلعت تفادي للمشاكل لان خالتي ما اعرف شبيها تتخبل من تشوفه زين ويايه
مرات اكول حقها الراحو مو شويه ويمكن تستنكف ابنها يعوف ثاره ويلتجئ اليه ...
واكول ميخالف المهم عايشه واطفالي تحت جناحي وهو ممقصر...
صح اكو هوايه شغلات بخاطري اتمنئ اشوف حنية ولهفة بعيونه مثل صلاح وريهام ربي يسعدهم مو حسد بس تمنئ...
اتمنئ يعترف بيه زوجه مو اله اني ابادر احس من قبل يستعطف عليه وحاليا لااا حتئ العطف لغاه من قاموسه...
جريت نفس وطلعت بره اشواق جايه من العماره لان خطبت وقار ومكيفه لان اشواق حييل تحب جابر وتحترمه ...
ومن اجت سلمت عليه وانقهرت حييل من شافت روضي محترك حتئ ضلت تبجي..
طلعت سويت عشا ريهام خطيه ما اجت ساعدتني لان كالت شويه مريضه وتدوخ احتمال عندها حمل بس كالت الها خالتي خلي تفوت عشرة ايام وان شاء الله اخذج احللج....
سويت عشا دخلت اشواق كالت بهدوء....اساعدج؟
رديت بارتباك وابتسامه...لا ما عندي شئ هسه اخلص بسرعه
كعدت واخذت السجين من ايدي وضلت تكشر بالبتيته ...
واني ضليت اگلي بس مرتبكه من وجودها...
ببالي سؤال يرادوني كل شويه اريد اسألها من جاسر اخذ مجتبئ ورضاوي اخذهم الها لو وين وداهم؟
ترددت اسالها بس بعدها شجعت نفسي كلتلها...اءءء اشواق اريد أسألج سؤال
باوعتلي باستغراب وعقدت حواجبها الرقيقه...إسألي جواب...
بلعت ريكي وجريت نفس....قبل فتره جاسر اخذ أطفالي مني وضلوا يومين ماكوو اخذهم الج؟
رفعت عيونها للسكف وهي تتهرب من الاجابه سكتت مجاوبت ...
رجعت اكمل طبخ كلتلها بحزن...اصعب حتئ من ولادتهم يوم الي فگدتهم بي متت من البجي ولو ما عندي ايمان جان انتحرت وخلصت من هم فراگهم
اردفت بنحيب...ترئ اني گلب والده لا يحرمني منهم والله حتئ تمرضت لو تشوفين صدري شلون ورم والاذيه إلي تاذيتها...
درت وجهي عليها شفتها تبجي ودموعها تنزل بصمت انفجعت من شفت دموعها معقوله تبجي عليه
كعدت بصفها وسحبت ايدها واني اطمنها ومتسائلة عن شنو تبجي
باوعتلي ببتسامة تحمل كل معاني الحزن والاسئ همست بذبول...الله يساعدج انحرمت من الأطفال بس صدكيني دا احس بوجعج...
كملت بنفس الابتسامه الحزينه ...خابرني وكال تعالي بسرعه انتي وزوجج لا ترحين الاهلي تعالي للشقه مالتي
انفجعت من كلامه وحجيت ويه زوجي كال شياخذنه ترئ الطريق طووويل مو ساعه وساعتين
المهم قنعته واجينه دخلنه للشقه ولكيته كاعد وولده بصفه وهم يبجوون بصوت يكطع الكلب .هو محتار بيهم وما يعرف شنو يسويلهم ...
ابتسمت بفرح كالت...ايييي واخيرا جاسر قرر ينطينب واحد من ولده اربي واكون اله احن ام
من كالت احن أم انتفض جسمي بفزع وكفت وعيوني غوركت بالدموع...لااااا مستحيييل ماكو احن مني عليهم ولدي ذووول ماكو احن مني والله تحمل المر وجرعت الصبر لخاطر عيونهم الحلوة...
مسحت دمعتها ببتسامه...ايي جنت هيج اضن ضلوا عندي يومين داريتهم حييل وفرحانه بيهم جنت اكول منو اخذ مرتضئ لو مجتبئ وارد الروحي اكول الجاسر وهو ينطيني اي واحد اني قابله
ضحكت بحزن...هيج تتبضعون باطفالي ومحد اهتم المشاعري
جرت نفس كالت...اجه جاسر بيومها عيونه تجدح واعصابه تلفانه عرفت صاير شئ
سألته مجاوب ضليت الح عليه بس هو اكتفئ بالصمت اخر شئ كال....اريد ارجع الاطفال لجولييت..
استغربت وتكسرت كل أحلامي كدامي بلعت ريكي وطلبته بتردد...جااااسر؟ اجبر گلبي وانطيني واحد من الولد
عاد هو باوعلي بنظره حااااده كاال...الله يجبرج مو اني ....اني مو بس لخاطر جولييت ...بس ما اريد احرم مجتبئ من مرتضئ هم توم ارواح معلگه ببعض...
واني الله جبرني بيهم بعد موت غزل وتعرفين الضنا غالي ما اريد تنعاد مأساتي بجولييت علئ الرغم من كلشي
اني من اخذت أطفالي منها ردت احسسها ان اذا تقبلتي قاتل اهلي مراح اتقبلج لا اني ولا ولدي بحياتنا حتئ وان كان القاتل اخوج
اخذهم مني واني جنت كلي امل اخذ واحد منهم ورجعت للعمارة مكسورة الخاطر ودمعتي ما نشفت من عيني...
رمشت بعيوني وهمست...اشوااق ان شاء الله ربي يجبرج ويرزقج بالطفل الصالح
ابتسمت بقهر...يعني ما تكدرين تقنعين جاسر وينطيني واحد من الولد حتئ لو مجتبئ المريض
وكفت مفزوعه من كلامها...لاااااا مستحييل حتئلو مريض افدي بروحي فدووه فدووه عووفوا اطفالي كافي خلوني اعيش وياهم ولا تحرمنا
والله والله حتئ من كثر ما العالم مخليه عيونهم عليهم ما لكتهم عافيه شوكت ما تجين مرضه ويوميه طالعين من حلگ
وكفت بعصبية....شنو قصدج اني حاسوده
جريت نفس عميق...لا مو حاسوده بس والله عبالك بس اني عندي اطفال الكل حاط عينه عليهم وذاك اليوم نوال تصييح بخت الله رزقها ولد واني تكومت البنات عليه...
ردت بانزعاج...بس اني ممخليه عيني عليهم اني ردت واحد اربي ويكون الي عوون لكبرتي
تنفست بضيق وغمضت عيوني فتحتهن بجزع...فدووه اشواق ربي يرزقج ويترس حضنج اطفال ...فدوه ما اكدر افارك واحد منهم الله يخليج بعد لا تعيديها...
هي تنهد بقهر وخلت وطلعت...خفت من كلامها اخاف يجبروني انطي واحد منهم بس والله لو اعرف امووت ما انطي اي واحد منهم ما اكدر افاركهم والله وثنينهم نفس المعزه ....
ضليت اسوي بالعشا الوحدي تذكرت امي شلون فاركتني اني ما اكدر انطي اي واحد منهم ولا اكدر اضحي بيهم ورغم هم بأمان
شلون امي ضحت بيه وهي تعرف اني مو بأمان
تعرف شكد اخاف منه واهابه واهاب جبروته وعصبيته شلون نامت عينها وهي مفاركتني
والله ما انام اذا ما اذكرها وادعيلها ربي يبعد عنها الشر هي واخواني ويهدي بالها...
ياربي عيني فدوه اروحلك....
.............................
ريهام...
اليوم ما طلعت صدك رحت الصبح الاهلي نضفت بيتهم وكملت واجيت
بس كل شويه اكعد تعبانه ما عندي طاقه الأي شئ ومن اوكف ما اكدر امشي علئ رجليه ...
احس رجليه داخل بيهن الموت
قبل لا يجي صلاح ياخذني امي كالت امشي ويايه للسوك اريد اشتري الوقار شغلات
رحت وياها وهناك حسيت روحي طلعت كلتلها ماما فدوه اطلعي راح اتخربط
هي تخبلت كالت...شبيج يمه شبييج من تزوجتي ولحد الان وانتي مو طبيعيه حتئ ابوج كال رهومه ما عاجبتني وجهه اصفر مثل الليمونه
حبيت اطمنها...لا ماما مابيه شئ بس عندي فقر دم وهماتين اخذت علاج بالسعوديه وان شاء الله اصير زينه...
خطيه انخبصت من ورايه حتئ ما عرفت تشتري جابت شال وكلبيه وعطر وملابس داخليه وطلعنه
حتئ ردت اشتري الي فستان لخطبة اخوويه ما كدرت....
رجعنه للبيت كعدت شويه ارتاحيت وخابرت خالتي ام داوود لعبت لعب ضلت تغلط وتفشر
دكول لامي...هسه تذكر يخطبها جبير شلون اله نفس ويحط عينه علئ خطيبة ابن خاله
امي جاوبتها بهدوء...هي بنت عمه ونهه عليها وهي البنيه موافقه بي وما تريد ابنج
ردت بغضب...اجه اخوها شايخ علينه سكط داوود تسكط والله شلون يكله اخذ حقي واطلكها والله والله اذا ما ندمتكم ما اطلع ام داوود....
امي قفلت الخط بوجهه وكالت..تولي تسربت وحدها...
وبعدها اجه صلاح اخذني من شافني تعبانه كال...لا تعبين نفسج
حتئ عمتي وماما ورضيه اجتي انقهرن عليه كالن...لا تعبين نفسج هذا بسبب فقر الدم ان شاء الله ما بيج غير العافية والله متستاهلين...
عمتي كالت...المرض مو الج لنويله لجولييت هذن المسمومات مو انتي الفقيره
رديت عليها ببتسامه...لا عمه اسم الله لا دكولين هيج هم عندهن اطفال وجولييت بعدها طفله وينها وين المرض
ماما رضيه جاوبتها بعصبية...نويله بيها باب وجواب اله هل مسكينه ليش هيج وياها شنو ذنبها اشو حتئ اليغلط عليها دكله انعم الله...
باوعت الرضيه بحقد كالت...من اشوفها اشوف عويصم الكلب هي وياه نفس لون العيوون
ضلن يتعاتبن ويحجن وبعدها اجت جولييت صاحتنه للعشا
خلينه ورحنه كلها تعشت جولييت متعلمه تاكل ياما بالمطبخ يا بغرفتها ما شفتها كعدت اكلت وياهم
مرات اكولها ترد بخجل واحراج...لا متعوده اكل بالمطبخ
فما احب احسسها هي منبوذه اجي واكعد وياها اكل
جابت المي خلته ودتطلع صاحت عليها ماما رضيه...جولي يمه تعالي اكلي ليش ما تاكلين
ردت باحراج وخجل...لا يمه شبعانه من اريد عود اكل بس هسه شبعانه
جاسر رفع عيونه الها بدون ما يرفع راسه كلها...تعالي اكعدي ويه البنات واكلي
هي ضلت متردده ومرتبكه كالت بلعثمه...لااا فد ش
هو رجع باوعلها بحده...تعالي اكعديييييي واكلي لا تضوجيني
اجت كعدت سويتلها مكان يمي واني اطمنها. خطيه ضلت تاكل والاكل يوكع منها منا ومنا ...
جانت لمه حلوه يسولفون وجعفر كل شويه وجفص واحنه ميتات ضحك
بس صلاح وجاسر يهزون باديهم علئ كلامه
وكل شويه وكال...الاكل يفتح النفس لان وجهه الطاوه ماكوو...
كملنه عشا عزلنه المواعين وغسلناهن وسوينه جاي ديشربون اندك الباب
راح جعفر فتح الباب دخل واخويه جابر كدامه بس عيونه تجدح نار وشرار خفت من شفت لازم اسلاحه يا ستار شصاير...
دخل للاستقبال وما اسمع بس الصياح والغلط اني بلعت العافيه وجولي من يمها ضلت ترجف بخووف ورعب...
طلعوا من الاستقبال وعمتي ضلت تلطم...عزا بعينه عزا العزاه المصخم الملطم العار الحقير شلون ينشر صور وقار
وقار خطيه جفلت بمكانها وهمست بضياع ...صوووري
ضلينه بحالة ذهوول ورجفه واحنه نشوف الولد هجموا وجاسر دخل اخذ اسلاحه
وجعفر يسب ويغلط
بعدها افتهمنه من رضيه وعمتي ام فلاح ان داوود العار ناشر صور وقار مالة الخطبه وناشر مقطع فيديو علئ اليوتيوب...
تخبلنه و وقار ملخت روحها وتبجي وتنوح وكلنه نريد نسكتها ماكوو ماتت من البجي
كلتلها...يمعوده اخوتج ما هينين والله هسه يسحلونه سحل وكولي يالله لا تموتين
والله خطيه بحيث تشهك شهكه تشك صدرها من الوجع مسكينه حقها مو قليل ينشرون صورها وهي ما الها ذنب...
....
جولييت...
من سمعت داوود النذل نشر صور وقار بلعت العافيه كلت انلاصت حيلوحني طشار...
صرت ارجف لا ارادي وابجي هماتين علئ نفسي وهماتين علئ وقار مسكينه انلاصت ولو يعرفون السبب اني...اي اني لان داوود العار خطب وقار بنية سوء لان جان يريد يتقرب مني...
همست بدعاء ورجفه ونحيب...يارب دخيلك يارب دخيلك ارحمني والله راح اموت
دخلت جوه لغرفتي سويت ممه للاطفال رضعتهم وبعدها رحت توضيت وفرشت سجادتي وصليت طلب حاجة حتئ يقضي حاجتي وتنحل هل مشكله علئ خير...
ياربي محد الي غيرك ارحمني دخيلك يامجيب المضطر اجب دعائي يالله....
...........................
جابر...
وصلت البيت عمي نزلت بكل غضب والسلاح بيدي فتحلي الباب جعفر دخلت للاستقبال شفتهم كلهم كاعدين الولد وعماتي كاعدات...
تفاجئوا من دخولي المباغت واستغربوا وكف جاسر بذهول...خير شكووو
تنفست بقهر....داوود العار نشر صور وقار وفضحنه
وكفوا كلهم بصدمه وجاسر احس عيونه طلعت وعفاريت الجن والانس ضلت تتراكص كداك عيونه...
هزني بقوه وعيونه تجدح من عصبيتة...انت شتحجي شنوو هل حجي بالله شوفني
طلعت موبايلي وايدي ترجف شوفتهم المنشور ودخلت لليوتيوب شوفتهم الفيديو تخبلوا ضلو يسبون ويغلطون
جاسر بسرعه راح الغرفته جان اسلاحه واجه وهو يلبس بقميصه بسرعه وصلاح ما عول يلبس حذائة...
وجعفر يسب ويغلط واليوم اربطه بمكان كنوش...
ركبنه كلنه بسيارتي جاسر كعد بالصدر كال...گبل لديالي اليوم والله والله احرگ شهربان علئ راسه
اتوجهت بسيارتي لديالي واعصابنه نااار مشتعله....
وجاسر كل شويه وزمجر بغضب....بسرررعه يمعوود اسررع والله اليوم ما يصبح الصبح اذا ما ندمته وخليته يبوس ايدي والله...
مسافة الطريق وصلنه لديالئ دخلنه الشهربان الجوء مظلم ومخيف وبس نباح الجلاب علينه
وحفيف الاشجار يحدث ضجة ويه رياح القويه
وصلنه للبيت داوود نزلوا جعفر وجاسر وصلاح عبالك عصابه كلهم لابسين اسوود ...
دك الباب جاسر بقوووه فلشه تفلش اول ما داوود فتح الباب جاسر جابه ببوكس طيره من مكانه
سحبه من قميصه انشك بيده طلعت خالتي ام داوود وهي تصرخ...يمممه ابني ابني داوود...
سحل جاسر سحل وصلاح واني وجعفر سكطناه تسكط شلناه وخليناه بالصندوك مالت السياره وهو يصرخ ويتوسل...
مشينه بالسياره وصلنه لبستان خالتي صبرية وكفنه عنده
نزلنه من السياره وفتحنه الصندووك وسحلنه منه داوود بسرعه...
سحبناه من بين الاشجار وهو يتوسل ...خويه جابر والله ما ادري شكوز شمسوي اني فدوه كلولي شكو
دار عليه صلاح وندفه ببوكس معدل وزمجر بغضب...ما تدرب لك عااار ما تدري منووو النشر صور اختي وفضحها...
رد بخوف وهو يصرخ...والله مو اني مو اني اصلا وقاى عرضي قبل لا تكون عرضكم واني عندي اخوات شلون اسوي بيكم هييج
سحبه جاسر بكل غضب حسيته طار من بين اديه...عرضك مووو؟ لك ساقط كوا.... تلعب بعرضي لا صار ولا استوه ولا جابته امه ليحاول يمس عرضي بشعره والله اليوم اله اخليك عبره لمن يعتبر
جابه براشدي حسيت مخه طاح براسه وركعه كله
وكع داوود علئ الارض وهو يرافس بروحه من الوجع
وجعفر هجم عليه وهو يرفي بي ويسب بي
بصراحه داوود يستاهل بس حظه نعال و وكه بين ادين جاسر واخوته كطعوا تكطع
جاسر بعدهم عنه كلهم...لاااا ما نريد تصير وليه عليه اني احاسبه...
وهو لزم جاسر بخوف...خووويه جاسر اني دخيل عندك
دفعه جاسر بغضب...ما ادخل بذمتي العارات والناقصين شرف يا دماغ سز....
مد ايده بغضب...انطيني موبايلك
داوود بخووف..ببب بالبيت
باوع لجعفر بجمود....روح جعفر جيب موبايل هل عار وتعال بسرعه واذا امه ما نطتك الموبايل كله راح انكتله ...
داوود برعب...اني اروح اجيبه
جاسر بعصبية مفرطه...اكل نعل لا اجي اوكلك بيدي يا ساقط ..
واردف بصرخه قوويه...رووح جعفر
لزمت جعفر بهدوء وتكلمت ...لاات عوف جعفر اني اروح اخاف مرة خالي تتعرض اله وتسويله مشكله اني اجيبه واجي
رحت بسرعه لكيتها بالباب هي وخالي و واكفه وهي تولول وصبريه جايتهم لابسة عبايتها ونعال تك وتك وكاعده تدخن
كالت...اجه جابر مو كتلكم ابنكم عار ما يصير بي شئ
مرة خالي وخالي هجموا عليه وين وديت داوود وانت شنو تجي تهجم علئ هذا المسكين الفقير الفقير ما يعيش بهاي الدنيا
نفخت صبريه الدخان بملل...هسه بدون تمسكن شوفوا الولد شيريد ولا تضلون تمسلتون
جريت نفس كتلهم...ابنكم المسكين الفقير ناشر صور وقار بنت عمي مو زين منه ما كتلناه هسه جيبوا موبايله وخلي نحلها علئ خيير...
ام داوود بغضب...يا خيير وانتم اخذتوا ابني دمه بطوله
جريت نفس بملل..انطيني موبايله خلي نحذف المقطع والمنشورات وداوود يرجعلج
انطتني الموبايل وخليت ورحت مشي لان بستان صبرية مسافة عن بيتهم ...
حسيت بحركه وراي درت وجهي ما لكيت شئ قلقت بصراحه بس لا بستان صبرية مسكون ويطلع النه جني...
مشيت شويه شفت خيال وكفت بس ما درت وجهي والخيال اختفه يالله هي صبريه مسكونه ضلت علئ بستانها مثل بستان شنيشل بي سعلوه ام المساعيل...
رجعت امشي وبسرعه درت وجهي ضحكت بتوتر وفشله...ههههه جويبر شلونك
باوعتلها بنص عين...صبريه علينه...شلوني موو؟ صار ساعه يمج ما كلتي شلونك وبعدين جنج سعلوه تركضين وراي بنص اليل والله من الهبطه بعد ما اخلف...
صبرية....هههههه دهر فرك يجويبر والله ضحكتني ولك كل هل جمال ورقه ونعومه والدكاك الحلو ودكول سعلوه
جااا من تشوف حسنه ام راس الاعوج شدكول
ضحكت كالت...اريد اروح وياك اشوف داوود وتشمت بي فدوه مقهورة منه من يوم الذبح ثوري...
ابتسمت واخذتها ورحت لكيتهم واكفين يم الحضيره بنهاية البستان ومشغلين اضوية الايتات...
باوعوا الصبريه سلموا عليها وهي ضلت واكفه كالت...هاااا ولك ابو سلعوم شو جنت تفيك علئ ثوري المرحوم وهسه خانس جنك جريذي. ما تحجي لو اغم ما تكدر بس علئ الثور ...
هو رد عليه بتوسل...فدوه عمه صبريه احميني
طلعت جكارتها وضلت تدخن...اله تخسر فلوس ثوري يالله احميك
جعفر ...احمي بجدر فافون ههههه
باوعله جاسر وخزره سكت جعفر جاسر مد الموبايل لداوود...افتحه بسرعه
داوود اخذ الموبايل برجفه وفتحه دخل جاسر علئ منشور الفيس ورجع باوع الداوود ركله برجله علئ بطنه خلاه يتصركع بمكانه وهو لازم بطنه بوجع...
حذف المنشور وبعدها دخل علئ اليوتيوب وهو داوود حذف المقطع
وصلاح اخذ الموبايل مالت داوود كسره بمنجل صبرية سواه تراب....
جعفر بتوسل...عفيه جاسر خليني اربطه بمكان كنوش والله احس نفسي الوحيد الي ما اخذت حقي
صبريه باستنكار...لاااا مستحيل ما تربطه بمكان كنوش...كنوش ما يحب بغير مكان اله بمكانه متعلم عينه ماتاخذ نوم اذا بدل مكانه
جعفر بسخرية...اي مو عساس كنوش نايم بغرفة خمس نجوم هو نايم بالزباله
وخر جعفر كنوش وربط داوود بس ما خليصها وياه رفسات ...
وكنوش ينهگ صدك طلع متعلم علئ مكانه...
خلينه ومشينه وداوود يصيح ...عمه صبريه فدوه تعاي افتحي الحبل
ردت بانزعاج ....خايب تحجي صدك بيه حييل باجر عود اكعد نشيطه واجي افتح الحبل...
خلينه ورجعنه الفجر بعد ما رمئ جاسر علئ بيت خالي ابو داوود وهو يطالب بعطوه ورد اعتبار
رجعنه للبيت الفجر وضلينه كم يوم اجوا اخذوا عطوه وبعدها رادو يفصلون بس ما قبلنه بالفصل بس ردنه رد اعتبار
خطيه يسولفون علئ وقار بس تبجي كلت لريهام تطمنها وان شاء الله الخطبه بعد كم يوم...
...................................
ريهام .. كعدنا الصبح على وقت اليوم خطبة وقار وشغل دگ ، يادوب نلحگ ، طبيت للمطبخ ساعدت جوليت دتحضر للغدة ، سويت كم شغلة صاحت عليه خالة صبرية رحت للصالة واحنه على هالحال دخلت نوال علينا تفاجئنا ، كعدت يم عمتي وخالتي صبرية بالصالة .
باعتلها شفت لصقة على خشمها ..
خالة صبرية خلت ايدها على حنجها وملامحها كلها مستفسرة كالتلها : يااااع نويله خيبة شمسوية بخشمج ؟ كاصته صلوات ؟ اي بلكي كاصته حتى بعد ماتحشرينه وتسوين مشاكل .
اردفت بضحكة وهي تنفخ بجكارته...خايبه عليش لازكته هو ربع مشكوك ولازكته...
هي ارتبكت كالت لا ها عندي جيوب انفية سويت عملية .
سألتها عمتي ام فلاح : اي شجابج علينه من الصبح ؟
ظلت تتصنع البكاء : صدك جذب عمه هيج تحجين وياي بمكان ماترجعيني انتي وديتوني لاهلي ونسيتوني ام بناتكم اني سألوا عني كولوا
هيج تتلكيني ؟
جاوبتها وهي تشح نظراتها منها : من ايدج هاي كلها من ايدج " ورجعت باوعتلها " ولج كافي ملينه منج ملينه كل يومية مشكلة انتِ ماتملين ماتتوبين ؟ ولج كرفتج فكرتنا .
خلت ايدها على صدرها تأشر على قلبها ونبرتها بجي مصطنع ..
_ لا عمة حرام عليج اني مظلومة والله مظلومة كلبي ملجوم من راح فلاح لهسه . وانتوا ماترحموني لو يدري بيكم طردوتني اني ام بناته شيسوي ؟
خالة صبرية كالت خاب كومي كلبها ملجوم وهي يومية مسوية تجميل شكلولج ولج شفتينه سود كلتي هنود انت حية حرباية وتتكلبين مسحي دموعج دموع تماسيح محد يصدكج بعد . لو كلبج ملجوم على فلاح ماكتلتي روحج على رجل .
هي فتحت حلكها كالت هاي منو ؟ عليه اني ؟
خالة صبرية بعفوية خلت جكارتها بحلكها وكالت
لع امي ....
هي باوعت لعمتي ام فلاح ورجعت تبجي وتتمسكن
_ اني غير احبكم وطالبة القرب منكم حاستكم بمكان اهلي وضعت بدونكم والله .
جاوبتها عمتي : شوفي انت اذا تردين ترجعين تكعدين وتسكتين وكفينه عن المشاكل ماناقصين ضيكة خلك افتهمتي ؟
خالة رضية كالت : اي وتحترمين نفسج غيري من تصرفاتج مثل ما جاي تغيرين بشكلج يوميه شكل مسويتلج .
و تساعدين بشغل البيت حالج من حال رهومة وجوليت . مو تاكلين وتمسحين ايدج بالحايط .
عمه فلاح كملت : وبناتج ما تمدين ايدج عليهن وتكتليهن والله اذا سمعتلج حس وصياحج واصل لراس الشارع اخلي جاسر يطردج مرة ثانية . وتحلمين تدوسين عتبة هالبيت مرة ثانية .
همست خالة صبرية ذيل الجلب عمره ماينعدل .
عوجت حلكها نوال ودارت وجهه من خالة صبرية
ورجعت تحجي بنبرة توسل : عمه وكولي لجعفر كافي عيب مصاحبله وحدة لو متزوج قبل كم سنة جان بنته بكدها .
جاوبتها : ماعليج من جعفر انت سوي الي عليج وسكتي .
_ شون ماعليه يعني يبقى يخوني ؟ هم الله مايرضاهه .
_ هم رجعنا ولج انت ماتتوبين كتلج عليج بروحج وبس وانت تعرفين كلش زين جعفر مايطيقج ، واذا ماعجبج ردي من وين ماجيتي وهذا اخر حجي عندي وهسه يله كومي غيري لبسج هذا وتشكلي وساعدي البنات يله هاي اذا من صدك تردين ترجعين .
_ اي خالة گايمة هسه بس جعفر وينه عندي حجي ويا .
جاوبتها عمة بنتر : ما موجود جعفر طالع من الصبح .
باوعتلي كالت بضحكه...خشمي حلوو
صبرية...يخبل جنه خشم كنوش...
هي فزت متعصبه وخلت وراحت الغرفتها....
اجه جعفر وكلوله اجت نوال كال بغضب...شلون بالله ما نخلص من وجهه الطاوه ماكو كرامه خلي تولي الاهلها لا والله اذب روحي من جسر الصرافيه
..........................
جولييت...
رجعت نوال والبيت صار ظلمه بوجودها صايره حيل ما اطيقها باوعتلي بضحكه مستهزءه وراحت
عود قصدها رجعت وغصبا عليه وهم الممنونين
اني الرجعت والضلت ما تهمني
سبحت وبدلت وقار لسه بالصالون
لبست فستان لحد الساق لونه بنفسي فااتح واكمامه نص وشسورت شعري خليت مكياج خفيف
امي جانت ما احب اخلي هوايه مكياج دكول انتي بيضه وملامحج ناعمه من تخلين مكياج تطلعين جنج بزون مملطخه ههه
جنت اضحك عليها هوايه وبالعناد اخلي مكياج رغم هوايه تحجي
صاحت عليه رضيه كالت ...جاسر يكول خلي تجي تكوي قميصي...
خليت ورحت هو جان داير وجهه ويحجي بهمه بموبايله..
دار وجهه عليه وتوقف عن الكلام ضل يباوعلي بنظرات هايمه
بلع ريكه كال...اءء اكوي قميصي بسرعه
طلعت الاوتي وخليت القميص دا اكوي بي و شعري نازل علئ وجهي وكتفي...
شويه وهو اجه هايج عليه رفع شعري بغضب وعصبية كال...شبيج بابا انتي مطفيه انتبهي علئ نفسج شعرج اجه يحترك وانتي صافنه
لفيت شعري بمرح...هههه عادي خلي اموت محتركه واتزوج الثالثه
باوعلي برفعة حاجب...طاح حضج وين اتزوج الثالثه خايف منج انتي الي تزوجين خطابتج كثرة
ضحكت...اوووه لا تذكرني بخطيب الغفله ان شاء الله اليوم هم انخطب طالعه حلوه موو؟
ما حسيت غيروهو دافن وجهه بركبتي ودنك عليه التهمني بعضه قووويه برگبتي
ضربته علئ كتفه واني اريد يفك مني لان توجعت همست...راح اصرخ اووووي اذيتني
ابتعد عني وهو يبتسم بانتصار....هه هسه سويتلج ختم حتئ يعرفون متزوجه وما تكعدين تزامطين فوك راسي خطبوني وخطبوني
خجلت منه ونزلت راسي رجعت اكوي وهو راح يلبس بساعته
همست....نوال رجعت
جر نفس وكمل...طاح حضها ما عندها كرامه ان شاء الله اشوف الها صرفه بس انتي لا تحتكين بيها
كملت كوي القميص وانطيته اله همست..وما محتكه بيها
باوعلي بنفس ذايب كال...لبسيني
بلعت ريكي ورفعت اصابع رجليه ولبسته القميص واني ارجف
تقرب مني اكثر وباوع لعيوني وبعدها ابتعد وتدراك الامر وهو يزر باقي ازرار القميص
همس بهدوء...روحي شوفي اطفالج احسن
خليت وطلعت واني ارجف من مواقفي وياه ابتسمت من اجن البنات كالن...اجت العروس اجت العروس...
............................
وقار .. بهذا اليوم حسيت نفسي بوسط عاصفة من الشغف والمشاعر الملتهبة .. أمنية جنت دافنتها بداخل اعماقي السحيقة وتحققت ، حسيت ربي يحبني .
وكفت كبال المراية بالصالون ، خجلانة من نظرات الكل بس بداخلي فرحة توسع الكون كله .
بدلتي لونها وردي وسخ ، وتسريحتي مناسبة لدورة وجهي مرفوعة ليفوك وخصلة صفح ثابتة ومموجة .
وكفت هوايه اباوع على نفسي اجتي عمتي ام جابر
كالت والله حلوة وهنيال جابر عليج .
ابتسمت بخجل ودنكت همست : خجلتيني عمة .
بابتسامة : الله يسعدكم يوم . خلي اخابره اكله خلصنه حتى يجي علينا لتبقين واكفة روحي كعدي بين ميجي .
فدوة شكد حنينة عمة صدك اني محظوظة بيهم
رحت كعدت وهي ساعدتني رفعت االبدلة حتى لا اوكع
وخابرت جابر كلتله خلصنا .
ربع ساعة وخابر على عمه كال اجيت ، كمت لبستني البرنص وطلعنه جان واكف ينتظرنا يم باب الصالون ، من شافنه طلعنه اجه باتجاهنا .
عمتي اشرتله يلزم ايدي ، لزمها ، تنفست بعمق ويه لمسته ، باوعتله اريد اشوفه هم فرحان مثلي .
مثل مفرحانة اني بي !
شفت ملامحه طبيعية ، احتواني بنظرة سريعة وهو مبتسم ، وظل لازم ايدي يمشيني ويباوع للارض .
بس طبعا اني قبل لا اروح للصالون الصبح عقدت مهر ورحت كالو حتئ ناخذ راحتنه بالتصوير
سوينه جلست تصوير ورجعنا للبيت كعدوني بالصالة واشتغلت الاغاني ، شفت نوال طبت للوسطة تركص
تفاجئت هاي شوكت رجعت !!
لابسة بدلة تركوازية قصيرة ومنفوشة مصغرة عمرها وبارزة بياض بشرتها ، شعرها مغيرة لونه مسويته اطرافه سلفر وبيرمنته ويمكن مخليه خصل اكستينشن لان طولان وثخنان صاير يجنن .
وطبت وياهه خالة صبرية وظلن يدبجن اثنينهن ويركصن . ظليت طول الوقت مبتسمة وفرحانة واحساس بداخلي متلذذ بهاللحظة هايه وعبالك
حلم ماريد اصحى منه .
ودخل جابر حتى يلبسني الذهب ، قربه الهب قلبي
بالخفقان ، وانفاسي مو راضية تنتظم .
لبسني الذهب وعيني احسها وكحة مو راضية تبعد عنه
وهو ملتهي يلبس بيه ويضحك ويه ريهام وامه وهن يهمسن بأذنه ويساعدنه يابسني .
خلص تلبيس الذهب هن كلوله بوسها ..
وكفت يمه دارني اله لزم راسي من جوانبه باثنين اديه وطبع القبلة على راسي ، واني حشدت كل حواسي
لحتى اسرق عطره واخبئه بانفاسي للابد .
باسني براسي وخله وراح....واحنه كملنه باقي الحفله جنت اركص علئ نغمات الاغنية
جنت فرحانه وشكل جابر اسرني واني اتخيل ابتسامته الحلوه وبنيت احلام حلوه وياه....
..................
جولييت
كملت الخطبه علئ خيير جنت واكفه علئ صفحه واني اشوف خالتي صبريه لابسه الهاشمي وحاطه كحل العرب والديرم وتركص ركص ما صاير...
ضحكت عليها واني اصفك اكثر شئ احبهم وقار وجابر وثنينهم طيبين كلب
خلصت الخطبه وطلع جابر باوعلي بنظرة استعطاف وخله وطلع
اني شتت نظري يالله جابر شبي يجوز اتذكر من هزمني وجنت اني السبب باذيته...
كملنه الحفله وبعدها رحنه سوينه عشا وما شاء الله نوال كفت البيت كف ما خلت شئ وتغسل مواعين حيلها حيلين
الحمد لله يمكن تابت وصارت حبابه
رجعت الغرفتي دا ابدل دخل جاسر ضليت واكفه ما بدلت ضل يبوس بالاطفال ويحجي وياهم
اتصل موبايله وهو فتح خط ضل يحجي وكل شويه ملامحه تحتد وبعدها كال...يا وحمه احجي لك عار يا وحمه....
نهاية البارت....يتبع
كونوا انتم كونوا بخير...💔
نور سمو العراق 😘
لا تنسوا التصويت والمشاركة بكم نكتمل 😍
واعتذر عن دعم الحسابات ما اعرف اليوم ليش ما يصير اسوي تاك للحسابات...
طلحه وسوالفه 😂