البارت 31
رواية...جولييت واسرها
بقلمي...نور سمو العراق
💔💔💔💔💔💔💔💔💔💔💔
بعض الكلمات ان بقيت بداخلنا تقتلنا ...وان خرجت فنحن بيها مقتولون...
فلا بالصمت راحه ولا بالبوح راحه...💔
..........................................
جابر...
خابرتني خالتي صبريه كالت...جابر تكدر تجيني لديالئ عويناتي ما ادري شبيهن ما اشوف واريدك تأخذني للدكتور...
طبعا اني ما ارفض الها طلب اكول خطيه محد الها وتضل حرمه وجبيره وخالتي رديت عليها بحزم...عد عيناج خاله ان شاء الله العصر اني يمج...
كالت...لا تعال هسه غداك عندي ولا دكول دوام اليوم جمعه اني جااا اجيتكم بس كنوش يستاحش وطلياتي محد الهن
خليت ورحت الها بعد ما خابرت اهلي طمنتهم ...
مسافة الطريق وصلت لديالي دخلت بشارعهم شفت خالتي صبريه من بعيد تحش بالزرع ابتسمت عليها اتذكرت جولييت من جبتها هنا وتعاركت هي وصبريه واني بنصهن محتار
نزلت من سيارتي وهي باوعتلي كالت...يمه هله بجويبر ابو المتعه
انصدمت فتحت عيوني بتفاجئ...شنو ابو المتعه ؟
ضحكت ...تعلمني بسوالفك رحت لايران وشمرتني يم الغگا وخلصتها تدور متعه ويه امهات الثوم
تافئفت بضيق...صدك تحجين خاله وحق الرضا لطفت بحضرته اني مو من هذا النوع ولا مدور اصلا تلعب نفسي من هاي السوالف...
ضربتني بقوه علئ كتفي...هههههه دهر فرك كوون ولك شبيك اتغشمر وياك...
تنفست بضيف واستغفرت ربي بملل...خاله انتي مو دكولين مريضه اشو اصحه مني تجذبين عليه مثلا
جرت نفس وتكلمت بجديه...فوت جوه خليني اشرب چوي وان شاء الله نحجي الصار...
دخلت البيتها المتهالك تحب كل قديم وطين وگصب متحب تجدد اببد
شربت جاي ومي وهي كالت بتنهيده طووويله...شرايك بداوود ابو سلعوم من خطب وقار بت مهيوب عمك؟
رديت باستغراب ...هو صح ابن خالي بس ما عندي علاقه قويه بي مجرد علاقه سطحيه ...ليش صاير شئ؟
هزت ايدها بقهر...خايب صدك نايم ورجليه سامطتها الشمس ...
وكف بعصبية...صبريه ترئ جزعت شكووو ؟
بلعت ريكها وجرت نفس طووويل كالت...هذا داوود عار وحرامات يتزوج وقار اريدتك تخرب الخطبه
عقدت حواجبي مستغرب من طلبها اني وقار حييل احبها واحترمها هي،صديقة اختي ريهام وابد ما شفت منها تصرف مو حلو من عرفت بيها مخطوبه كلت مبروك الله يهنيها...
بس اذا شئ يمسها ويمس سعادتها اكيد اخلصها من هل خطوبه لو اعرف ابيع روحي بس اريد سبب مقنع حتئ اخطي هيج خطوه واحتمال البنيه تكون تحب داوود ليش اضلمها؟
نفخت بملل...احجيلي شنو الصار بالضبط لا تضلين تلوفين وتدورين ليش تعتبرين داوود عار
طلعت جكارتها وضلت تنفخ بيها بغضب كالت...داوود العار من خطب وقار اله غايه مره من المرات اجه وشاف جكلييته عندي وكتل روحه عليها وضل يتردد عليه خفت منه ومره شفته يريد يتحرش بيها ركعته براسه وفلشته
وهو تخبل شلون هيج سويت ومن حجيت وياه لان خطب وقار يكلي بس تحجين افضح جكلييت واذب تهمه عليها
حسيت فقدت أعصابي ...لا ياااا. عاااااار ياكلب والله اليوم اله ادفنه بصف الثور
لزمتني من قميصه واني ادفع بيها بس هي قووويه دفعتها وركضت وهي طلعت وراي تركض ما حسيت غير بصوت طلقه طلعت من مسدسه
وكفت مصدووم درت وجهي عليه واني ارمش بعدم استيعاب ...شش شبييج
وجهت اسلاحها عليه وصرخت بوجهي بعصبية...اوكف ولك بس تتحرك خطوه وحده ابيت الرصاصه براسك
باوعلتها بذهوول مستغرب منها تقدمت عليه خطوات وكالت...جاااا يا جابر ردتك عوون تطلعلي فرعوون ولك الجاي تسوي غلط اني بس اريد افهم شغله وحده كنوش ليش افهم منك وانتم مطايه
ولك اذا رحتله وتعاركتوا وصارت امالخ وبعدها خليتها يفسخ الخطبه من بت عمك الوادم راح تنشد ليش جابر كتل ابن خاله وليش فسخوا الخطبه
ادري بيك دمك حمه علئ عرضك بس لا تزيد الطين بله وخلينه نعرف شلون نحلها وما نضرر لا جكليته المايعه ولا وقيره الحلوه
شئ بداخلي يغلي ما مستوعب كلامها ولا مقتنع بي بس هي لزمتني بمسدسه ضلت تحجي وتقنع بيه
وكالت...جكليته اذا دره الكاسر هل نذل حاط عينه عليها تصير مصايب ومو بس جكليته وقيره هم خطيه تاخذ واحد عار مثل داوود
وانت اذا تريد ترد اعتبارك واعتبار عرضك لا تخلي يحقق غايته وانهي علئ وقيره واخذها...
حسيت نفسي بدوامه...اتزوج وقار انهي عليها؟
ردت بجزع وهي تغم بروحها...خيبه امداني وشبيها وقيره انت احله منها عشتووو ولك شو شحلاتها بس انتم وين الزلم تحبون الكح...مثل حسنه ام الوسخ شبيها بالله وقيره وما تريدها لو عقل كنوش تمدد براسك؟
وعلي ابو الحسن هسه من كون اخذك للدكتور واسويلك مخ راس ..« مفراس» الكه مخك بي مخ مطي مسودن
هزيت راسي باسئ...مو هييج بس ما مستوعب انطيني مجال شويه اكلتيني حاصل فاصل بالعه مذيع تخرطين خرط
جرت نفس وكالت...ولك فكر بعقلك ولا تخليني اتندم لان كتلك بالسالفه...خلص وقار من هل عار وخلص جكليته منه ولا تخلي يحقق غايته...
بعدها كعدت وياي قنعتني وحلفتني ما اسوي مشاكل ولا اتعرض الداوود حلفت الها يالله ضمت مسدسها وهدئت...
خليت ورجعت بسيارتي جنت أتمنى الزم داوود واكطعه باسناني النذل العار خاطب وقار حتى يتقرب من جولييت...
رجعت للبيت تعبان دخلت سبحت واكلت شويه وبعدها بدلت ورحت البيت عمي مهيوب...
دكيت الباب بس جان بداخلي رهبه شلون انهي عليها اخاف حبته شلون اواجهه جاسر شلون تكون زوجتي ومشاعرنه بااارده بس فكره ببالي لازم اخلصهن من هل عار...
اتصلت بريهام كتلها اني يمكن افتحيلي الباب صدك فتحت الباب دخلت وابتسمت بوجهها وهي خطيه فرحت ذبت روحها بحضني
بستها براسها وخدها سالت عن احوالها ودخلت جوه بالاستقبال محد موجود من الولد كالت بس جاسر ويعالج بابنه....
انتظرته شويه واجاني حسيت روحي كاعد علئ نااار من شفته اعرف غير مرحب بيه. بعد الي صار
سالته عن ابنه المسكين
جر نفس ومسح وجهه بتوتر...زين الحمد لله بس هو طفل ومن انعالجه يتخبل بحيث اكول علئ ساعه يوكف گلبه
همست...الله يساعده احنه كبار وما نتحمل مو انوب طفل بعده ترف الله يشافي ابنك لا تخاف عليه الله موجود
جر نفس وتاكئ علئ القنفه كال...ونعم بالله شنو اليوم شعجب جاينه مو عوايدك
بلعت ريكي بتوتر ونطقت هل جمله بتردد...اني نهيت علئ وقار واي واحد يتقرب منها هو منهي و وقار بنت عمي متصير لغيري
التفت عليه تلقائيا حسيت بالصدمه المخفيه بين عيونه
اندك الباب سمعت صوتها. الخايف وهي دكله...الجاي جبته
ثواني وخله الجاي كدامي وكعد...
جاسر بثقل...ههه تحجي صدك وين جنت عنها ما خطبتها من زمان وبعدين شنو نهيت عليها احنه بيا زمن وتعرف اني اتخبل من هاي الامور ...
رديت بصوت متعب غاضب...اني شمدريني بيكم منو يجي تنطوها اله وبعدين جنت مسافر من اجيت لكيتها مخطوبه
باوعلي بنظره حااده...احترم نفسك شنو منو اليجي ننطيها اجت قسمتها وما حبينه نوكف بطريقها
نفخت بملل...بس طريقها اسوود انت ما تعرف داوود بكدي داوود واحد نذل وعار وابو نسوان محد يعرفه كدي
جر نفس...شنو دليلك عليه
اخذت كلاص المي شربت شويه لكلام وياه صعب تنهدت...صبريه دليلي انت تعرفها هي ما تجذب وتطكها طك بطك وتعرف كلشي عنه اسالها اذا تريد
ركز بعيوني بنظره بارده كال...يعني انت تريد تتزوج وقار لو لان ما عاجبك داوود
اشرت باصابعي...الاثنيين
ضحك وتعاليت ضحكته باستهزاء...استشير المنهي عليها واشوف اذا ما قبلت بيك لا انت ولا داوود يطولون اظفر منها...
ابتسمت...اكييد اهم شئ موافقتها واناسبك يالنسيب
ضرب علئ كتفي ببتسامه....ههه هلا والله بأبو النسب
..................
جولييت
فرحه غامره استعمرت صدري ونعشت روحي من سمعت وقار نهئ عليها جابر تستاهل والله
دكيت الباب بسرعه هو اخذ الجاي من ايدي وعبالك يريد يفترسني بنظراته شبي خبل هذا اشو قبل شويه شلونه هسه مطنكر....
همست...هذا الجاي
اخذه من ايدي واني خليت ورحت اشتغل ويه رهومه واجت وقار ساعدتنه البيت هدوووء لان وجهه الطاوه مو هنا
يتصل داوود علئ وقار وهي متجاوب ريهام كلتلها...جاوبي ليش متردين عليه خطيه معاقبته شنو هههههه
كعدت علئ الكرسي بانزعاج وهمست...خلي يولي سوالفه كلها تعبانه كارهتته
واردفت بتساؤل...منو جان عدنه..؟
ريهام ببتسامه...اخويه جابر
فتحت عيونها ببتسامه...جابر جان هنا اشو محسينه بي ههه
التفتنه علئ صوته وهو يكول...اي جان هنا ونهئ عليج
صدمه وذهول من البنات وقار جانت لازمه موبايلها وكع من ايدها وتفلش
دنكت بارتباك وضلت تجمع باجزاء موبايلها المنهاره...
ابتسم جاسر بغموض وسحب وقار احتضن اكتافها كال...تعالي عندي حجي وياج
خلت وراحت وياه واني سمعت واحد من الأطفال بجه طكيتها ركضه حتئ ريهام انصدمت مني
ريهام....
انصدمت صدمة عمري من جابر نهه علئ وقار وفرحت بنفس الوقت بس كون ذاك يفسخ الخطوبه لان وقار ممرتاحه اله...
وجاسر اخذ وقار وراح وجولييت سمعت صوت ابنها فزت فززززه وركضت ركضه بحيث خفت من يمي...ضحكت عليها الله يساعدها ابنها طلع من الموت....
رجعت اغسل بالمواعين...
حسيت بشخص حضني وحط ذقنه علئ كتفي باوعت بفزع شفته صلاح ابتسمت ورجعت اغسل بالمواعين
باسني بخدي بوسه طوويله لزمت اديه وهمست...صلاح عييب لحد يجي يكولون شبيهم ذول مشايفين روح للغرفه وسوي الي تريده...
رد بهيام وصوت نعسان...لج بابا اني واني ما اشوفج اتمنى احضنج وافترسج
نزلت عيوني بخجل ورجعت ضغطت علئ ايده بحيا..
دارني عليه وهو يضحك كال...تدرين رهومه قبل شويه اجيت احضن مرة جاسر لو ما ربج ستر عبالي انتي هههه
فتحت عيوني مصدومه وابتسامه خفيفه علئ شفايفي...يااااا عززززا صدك تحجي شكد عيب مو كتلك بطل سوالف الحضن بالاماكن العامه..ونتمي للاماكن الخاصه...
رد بلهفه وهو يحضني بقسوه ويسحبني اكثر...اكلها ما اكدر اسيطر علئ روحي شبييج لج مخبل احببج يااابه احبج مو بيدي مو زين ما حضنت السكرتيره عبالي انتي
ضربته بباطن كفي علئ صدره ...شكد صاير منحرف ولا توقعتك هههه صاير عندك الحلال والحرام واحد..
ضحك...اي عود هاي وانتي متدينه لو متدينه من زمان انحرفت..
حطيت ايدي علئ شفايفي ومنعت نفسي ما اتقيئ هو لزمني بخووف كال...شبيج ريهام بيح شئ؟
جاوبته بصعوبه...لا مبيه شئ بس معدتي تاذيني ما اعرف شبيها...
ضحك...اخاف حامل
ابتسمت ونزلت عيوني...ما اعرف والله
رفع اصبعه وحطه اسفل خشمي بذهول رفع اصبعه ماطخ بالدم ..
بلع ريكه بخووف...انتي تنزفين تعالي ارتاحي ولا تطلعين بعد...
انطاني كنلكس خليته علئ خشمي ومشيت بدوخه للغرفة مالتي
نمت وهو يباوعلي بحيره وقلق كال...ان شاء الله اليوم اخذج للدكتور...
ابتسمت...لا تخاف ما بيه شئ نزف عادي بسبب فقر الدم ودا اخذ علاج
باسني بشفايفي بحيره وابتعد عني وهو مزعوج والقلق ياكل بيه ...
ااني يمكن حامل لان كووولش تلعب نفسي وحتئ من المي تلعب نفسي
ومو مثل قبل جنت اوكف بين يدين رب العالمين واصلي ساعات هسه حتئ ما اكدر اكمل فروضي ما اعرف تعبانه وما عندي طاقه...
...........................
وقار...
رحت ويه جاسر للاستقبال بارتباك خفت مشاعري تفضحني صح اني علئ ذمة داوود وما يصير افكر بي بس ما اعرف فرحت من جابر نهى عليه...
ابتسم بوجهي بحنان كال...جابر نهى عليج يا وقار ولو انتي علئ ذمة داوود بس بصراحه اني افضل جابر علئ داوود ما نعرفه والمايعرفك ما يثمنك انتي شنو رايج
رمشت بعيوني وفركت اديه بارتباك...والله ما اعرف انت اخويه الكبير وانت التآمر وتنهي هنا وما عندي اي اعتراض على امرك...
فتح اديه ببتسامه واستدعاني الحضنه ابتسمت ورحت شمرت نفسي بحضنه اتذكرت ابويه الله يرحمه شلون جان حنين ويايه بجيت بصمت وشهكت واني لازمه قميصه بقوه
رفع وجهي وعقد حواجبه باستغراب من شاف دموعي مسح دموعي بطرف واصبعه كال...اذا عاجبج داوود ما افسخها...
هزيت راسي بنفي وهمست...لا بس اشتاقيت البابا وانت ذكرتني بي...
جر نفس وسحبني الحضنه اكثر وشد باديه عليه وباسني براسي همس...الله يرحمه ...
واردف ببرود...ان شاء الله اخابر داوود وكله ما الك نصيب عدنه ونرجع اله الذهب وكل شئ انطاه الج..
هزيت راسي بقبول واني ابتسم بحب واتذكر ملامح جابر الأسره الحمد لله فعلا الطيبات للطيبون وداوود نذل مو نصيبي....
بعدها خليت وطلعت وجاسر كال...راخ افسخ الخطوبه وانطيها الجابر
امي و ماما رضيه كيفن...رغم بالبدايه ماما ضلت تحجي علئ جابر كالت وين جان بس بعدها سكتت وكالت ابن عكاب احسن من غيره...
وخطيه رهومه حبيبتي مكيفه عبالك جابر خاطبها دكول ...همزين حتئ من اروح الاهلي اشوفج هناك احسن ما تتزوجين بديالئ بعد وين اشوفج
...........................
جولييت...
رحت الابني شفته يوون خطيه من الوجع ...اوووف ياربي ارحم جسمه الهزيل ولا تعذبه بهل وجع
حتئ اخاف اشيله اخاف الچم جروحه
عضيت شفايفي بقهر كلبي ما ينطيني اشوفه هيج يتعذب هزيت الكاروك مالته واني اناغيله...حبيبي يعمري انت فديت العيون الناعسه...
ضل يبجي اكثر شلته واني ابوس بخده الناعم واهز بي وهو يباوعلي بنظرات حزينه عبالك يشكيلي عن اوجاعه
شويه ونام من التعب حطيت ايدي علئ وجهه شفت حرارته مرتفعه خفت حييل لان مو زيين...
نيمته بسريره ورحت الجاسر فتحت الباب بعد ما دكيته لكيته يشتغل علي الحاسبه
همست بانذباح...جاسر!!
مجاوبني همست ...مم مرتضئ مو زيين
رفع نظره اليه و وخر الحاسبه باوعلي بصدمه ...شبي وييينه ؟
رجفت شفايفي و وكعت دموعي اشرت للباب عود بغرفتي هو تجاهل كلامي وراح بسرعه يركض واني رحت وراه ...
اخذه من السرير وهو ملفوف بملحف ابيض مثل بياض خدوده...
باوعله بقلق وباسه بخده باوعلي حيران...حرارته مرتفعه
رمشت بعيوني ودموعي نزلت لا رادي...اي حرارته مرتفعه ...
اخذه وطلع واني رحت وراه خلاه بغرفته وراح جاب مقياس الحراره خلاه تحت ابطه شويه وشافه طلعت درجة حرارته 39
تخبل كال بعصبية...جيبي مي وقطعة قماش نظيفه بسرعه
ركضت بسرعه جبت الاغراض واجيت وهو يسويله كمادات واني اباوعله بترقب وخوف وحزن
باوعلي وجر نفس كال...جيبي موبايلي خلي اتصل بالدكتور اذا فاتح عيادة حتئ نروح
رحت جبت الموبايل بسرعه واجيت اركض انطاني الوصله وضليت اسوي كمادات
ضل يتصل ويحجي ويه الدكتور ويفتر متوتر حييل كال...بس دكتور يعني ماكو داعي اجيبه ؟
اهااا زين تمام اي هو علاجه انطي اله بإنتظام تمام تمام ان شاء الله اسوي اله كمادات واقيس حرارته انطي خافض حراره موو؟
تسلم دكتور ربي يوفقك اشكرك تعبناك ويانه
قفل الموبايل وباوعلي كال بأمر...جيبي اغراضهم وتعالي نامي هنا اخاف تنتكس حالته وانتي ما تدرين عاد يمي احسن...
يبست بمكاني يستدعيني انام بغرفته بس اعرف هو لخاطر مرتضئ يكول هييج
خليت ورحت جبت اغراضهم واجيت رحت انوب سبحت ولبست ثوب عادي
تعشينه وكملنه غسلت المواعين وهو ابد ما طلع من الغرفه ضل يم رضاوي وخالتي هي ورضيه راحن اله يشوفنه اني سويت جاي اخذته الهم شفت خالتي ضاجت وكل شويه وتباوعلي بخزره
ضاجت لان جاسر كالي تعالي يمي نامي وهي تخاف اخاف انام يمه ويضعف تجاهي ما تدري بابنها بلوكه لا مشاعر ولا أحاسيس...
صار دنيا اليل واني كنت عند اطفالي بغرفته بس هو طلع ما اعرف وين راح كل شويه أقيس حرارة مرتضئ...
نمت علئ السرير مالته وحضنت مخدته مالته جريت نفس عميق غمضت عيوني باسئ...باربي هسه يجي ويسحلني ويشمرني من فراشه
يكول اي والله خوش متمدده المسعده ونايمه ضحكت...ان شاء الله ميسويها واذا سوالها العب بي لعب اي والله شنو تايهتله
نفخت بملل...يعني شسووي اضربه هو هذا ينفع وياه ضرب اشووو لا يندفع لا ينزاح
ضحكت بانتقام...اي اعرف شلون اخذ حقي اكووله ...يبعتلك حمه تسلوء بدنك ههههه
اخلي يشتعل ويطفئ الوحده ...بس اكيد راح انسحل سحله من هاي التمام...
هو اني هذا حضي اجفص بالنص واخلصها توسل طاح حضي اي والله...
حسيت الباب انفتح غمضت عيوني بخوف لا إرادي منه وارتعش جسمي بقوه لا اكدر اتحرك ولا احجي حتئ النفس كطعته بس شنو عود فاتحه تك عين
شفته ضل يباوعلي وابتسم ابتسامه مستهزئه جانبية وبعدها اشاح بنظره عني...
نزع قميصه غمضت عيوني حيييل عصرتهن صايره اخجل منه حييل لا صار هوايه مهجوره احتمال هسه اذا اسوي فحص اطلع رجعت بنيه ههه
رجعت فتحت تك عين شفته شمر قميصه علئ القنفه باهمال وبعدها راح للحمام غسل ورجع اخذ موبايله واتصل...
احس خوفي مبالغ بي منه حتئ النفس كطعته رغم هو مو مثل قبل قاسي ويايه من حركت صور العرس لحد الان وهو ماشي عدل رغم اني لا احجي ولا اكول....
سمعته كال بهدوء...هااا جابر اي رحت الهم وانطيتهم ذهبهم ونيشانهم بس هذا داوود تخبل وكال مرتي اريدها ما افسخ...
سكت شويه وأردف بجمود...يمعوود اول مره بحياتي اسايس واحد سايسته جبته منا خليته منا وهو مثل الجحش قافل
عاد طكيتها ويه من الاخير كتله تطلكها وغصبا ما عليك
دار وجهه عليه وحط اصابعه علئ لحيته وضحك بتفاجئ...افاااا صبرية صبرية الناطق الرسمي مالكم شبسرعه وصلت خبر
ضحك ...هههه لك يستاهل وحق اله وروح ابوووي لو ما امه ضلت تتوسل بيه اله دفنته بارضه لك هذا فد واحد عار گوا...
كمل بتجاوب...ايي مو هو كلب استفزني خليت الدم يطفر من حلكه ومن خشمه
اردف بقهر...لك فد واحد حيوووان يكلي اطلكها اختك بس بشرط اتزوجها يوم واحد اخذ حقي واطلكها...
هو ما گال هييج لك حتئ قميصه شكيته مرعدته تمرعد سنونه كلها طيحتها بحلكه...
ضحك ...ههههه صبريه دكول واكع سنين من سنونه ويريد اجي افصل واجيب عشيرتي
ههه والله اذا ارجعله اله افصل جسمه عن راسه خبلني من حجه علئ وقار هيج
انتظر جابر يحجي وبعدها كمل...اي مو من جبته ببوكس جنت لابس محبس فضه ضخم فاجت الضربه ترس من المحبس بوجهه
غمض عيونه بغرور...يستاهل يابه يستاهل لو ادري بي عار لهل درجه يحلم اخلي يخطب وقار ويمس شعره من شعرها...
ههه انوب يكلي اني رجلها واذا حجيت عنها كتله هسه لو تصير ولي امرها وقار خط أحمر انعل اسلاف اجدادك اذا مريت بعرضتها وتطلك وغصبا ما عليك
عاد من اجيت اطلع وهو وجهه كله دم صاح عليه بصوت عالي وكال...وقااار طالق طالق طالق خسرتني
بس والله طكيتها بضحكة كتله كوون جايب وياي جعفر يطكك بزيج ...لك بابا احنه ننخسر ما نخسر
انطه مجال لجابر يحجي وبعدها كال...لا مو هسه اريد اروح اطلكها غيابي عند سيد او شيخ ان شاء الله اروح للنجف واطلكها وانطيكم موعد للخطبه
ابتسم بجمود...اي ترئ وقار خيتي عاليه اعزها اكثر من الكل وهي وصية ابووي اليوم الدين ابيع الروح فداها...
قفل الخط وبعدها راح للاطفال باسهم واخذ المحرارقاس حرارة مرتضئ
كلامه جان مثل الخنجر صح احب علاقته باخته بس لاول مره يصيبني احساس بالغيرة
اني والله فعلا غرت...غرت لان اخواني مو مثله شوف شلون يحب اخته ويحترمها ويقدرها ويطلع حقها من عيون السبع
واني اخوتي باعوني برخص التراب شكد انقهر وكل هذا وانب ادافع الهم واحبهم علئ محبة امي وادعيلهم بنص اليل وباطراف النهار...
اني اصلا ما اعرف يا كلمه اثارت استعاطفي علئ نفسي ونزلت دموعي
حسيت صار هدوء وايد حنونه تمسح دموعي بعشوائيه بلعت ريكي وفتحت عيوني بسرعه وباسئ
قابلني بنظرات عاطفه ولطيفه علئ حالي كال...شسالفتج تحبين البجي انتي حتئ لو نايمه تبجين شنو هل قابليه العندج
كعدت ومسحت دمعتي بطرف اردان ثوبي وشهكت...لا بس ابجي علئ مرتضئ
تنهد بضيق...لا تخافين مابي شئ هسه شفته وقست حرارته زينه
تنهدت بهدوء...الحمد لله
كملت بترقب...نرجع الغرفتنه لو نضل
وكف وهو ينزع بساعته ولابس بس البنطلون الاسود وفانيله بيضه تنلبس جوه الملابس رد بعدم اهتمام وهو مركز بساعته...لاااا اخاف علئ رضاوي...
خله وراح بالحمام يسبح واني ضليت افتر بتوتر شلون حاله...
رحت اجيب غطا اليه شفت ماما رضيه ادخل بجعفر وتضرب بي دكله...هم سكران ساعة السوده الصرت بيها ابوك بذيج الساعه لو لاف راسه ونايم مو احسن من هل خلفه الطايح حضه ...
هو حاضنها...شهووده احبج وحتئ بزونتج الخايسه احبها...
دخلته وهي ترزل وتغلط عليه رحت جبت غطا ومخده واجيت غطيت نفسي ونمت علئ القنفه وهو خلي ينام علئ السرير ...
طلع من الحمام وهو لابس بس بيجامه وينشف بشعره باهمال باوع للسرير لكاني ماكو
دار وجهه بإرجاء الغرفه وكعت عيونه عليه عقد حواجبه باستغراب واني اباوعله ببراءه كال...شبيج جنج بزونه ماكلين عشاها
تمتمت بخجل...لا ما بيه شئ بس دا انام
عض شفته بقهر...وليش نايمه هنا جربايه شكبرها شكدها مكسرة روحج علئ القنفه ليش...
همست بتردد...ما اريد اضايقك وهماتين انت تريد تاخذ راحتك
ضل مركز بنظراته الحاده عليه كال...كومي اني انام هنا وانتي اليوم ضيفتي واني من شيمتي اضيف الضيف
كعدت وبعد الغطا عني...لا اخاف تتكسر اني صغيرونه وناعمه تكفيلي القنفه ممتضايقه بس انت حتتكسر
تقرب مني وسحبني من ايدي بقووه وجعتني ايدي وعطت حييل كطع تنفسي بيده الخشنه همس عند رقبتي بهدوء...فضحتينه يالمشهوره هسه يكولون خووش حجه ابنه محترك وضالين كل شويه وعاطت المدام
ابتعدت عنه واني افرك بيدي بدلع كتله...وجعتني
رد بغضب...احتركت لشتج احتركت عشيرتج امشي نامي هناك ولا تضلين تتنعوصين عليه
نصدم هذا شبي مريض كل شويه وتناقض والله يناقض نفسه ما اعرف شنو يريد مزاجه متقلب كل شويه برأيي...
خليت ونمت بس نسيت شغله هو نام بفراشي واني نمت بفراشه اجيت اكوله فراشي بس خفت فسكتت...
ضليت كل شويه افز والكاه كاعد يخابر من اجيت عنده لحد الان وهو بس يخابر وحتئ من يجي لمرتضئ هو يخابر عبالك رئيس الوزراء مو جاسر...
نمت بعد ما غلبني النعاس...
كعدت من النوم علئ صوت مرتضئ اليبجي فتحت عيوني شفته شايل مرتضئ ويسكت بي
باوعلي بجمود وضل مركز عليه ويباوعلي من فووك ليجوه باوعت النفسي شفت الثوب صاعد لابو ظبي
لحد بطني و رجليه كلها طالعه
فزيت برعب عدلت ملابسي ونزلت من الجربايه اركض رحت غسلت وما طلعت من الحمام...
ياربي شكد حيوانه اني والله اببد نومتي مو قانونيه لا والله نومتي مثل جني نوال منحرفه
حتئ اخواني جانوا يكولون الامي هاي بنت المايعه كليلها تنام عدل لو تلبسيها تراك من تنام
خطيه ماما ضلت تجيبلي تراكات واني البارحه نسيت البس تراك والله عيب ولو هو يعرف بيه من انام نومي ثكيل ومستهتر...
غسلت وطلعت كتله بخجل.صباح الخير
رد بدون ميباوعلي وهو ملتهي بمرتضئ... صباح النور
باوعلي كال...انتي شنو هاي نومتج فضيحه همزين شفتج حتئ بعد ما اخليج تنامين بأي مكان
صار ساعه صافن عليج وافكر اكول هاي شلون جانت تنام عند صبريه وهي مشلحه تشلح همزين ما عندها ولد جان ذبحتج والله
رمشت بخجل...لا ما عندها بس كنوش والثور المرحوم الديج المظلوم
رفع حاجب باستهزاء...منووو ضلمه
رديت بقهر...انت
ضحك...خلي يموت مظلوم ولا ظالم واخذي ابنج عندي شغل وديري بالج عليهم ولا تهتمين شغل مدري شنو اهم شئ الاطفال تمام
هزيت راسي بأي وهو خله وطلع
رضعتهم وكملت ورحت تريكت نضفت الغرفه هو لكيته مضمد رضاوي...
من طلعت خالتي حطت ايد علئ ايد كالت...ايييي ناس مرتاحه وناس نامت جوه لتراب والله ما تعمض عيني اله اخذ بثار ابني ومهيوب وخلي ابو غزوله الطايح بالعسل هو يأخذ ثاره...
سكتت مجاوبتها ورحت انضف ويه البنات مرة الايام طبيعيه ...
اجت هاله كعدت تخبث عليه وبعدها كالت...عود تواصلت ويه احمد خطيبي وطلع متزوج ومطلك ويريد يتواصل وياج
صدك بيومها انهاريت وتعاركت وياها الحمد لله اني ما عندي موبايل بس خايفه تستغل احمد لصالحها ضدي
بس احمد يخاف من جاسر ما اعتقد يسوي شئ بس هي اكيد تريد تخوفني وتلزم عليه مستمسك طردتها من غرفتي وكلتلها ما اريد اشوف وجهج...
جاسر راح للنجف ضل يومين الله يعينه ويساعده وينطي الصبر زين ومتحمل شاف بنته انضربت كدامه وماتت بين اديه
والله الضنه غالي والله من مرتضئ احترك ليلي ما انامه وكل شويه افز مرعوووبه وحتئ لو نايم اجي احط راسي علئ صدره واني استمع التنفسه ودكات گلبه
كووولشي ولا الضنه والله اغلئ من الروح....
رجعت الغرفتي ما اريد مشاكل وخالتي تبسمر عبالك ماخذه رجلها مو ابنها
هو من شاف اغراضي ناقلتهم ضل يخبث ويتمنذل وكل شويه وعاط بيه حتئ من الارتباك عثرت بحجلة مجتبئ جان تكسرت
دوهني بس يحجي ويدردم ويصيح علئ الكل مز بس عليه
والله اجيت اتعارك وياه ميصير هيج ...
مرة الايام حددو خطبة جابر و وقار...بعد ما فسخت العقد نهائي
اندك راحت بنت نوال فتحته طلعت ام نوال جايه استقبلنها الحبايب وسالفه منا وسالفه منا وبعدها خلت وراحت
هنه ضلن يسولفن ويحجن عن نوال وعن بناتها
دخل جعفر يفر بسويج سيارته كلتله رضيه بضحكه..جعفر اجت عمتك دكول ما يرجع مريته
عقد حواجبه باستغراب...منو مريتي منيلي مره اصلا ما متزوج ذيج جنسيتي مكتوب الحاله الاجتماعيه اعزب
بعد شكو سويتني متزوج شويه وتكولن عنده اربع ولد
امه بعضب...هااا ذاك اليوم من كتلتها واكلك يمه عوفها دكول لا تتدخلين رجال ومرته وهسه ما معترف بيها
جعفر بملل...اهووو ترئ نويله اني معترف بيه مرتي بس بالكتل...خلصوني منها ما اريده والله والله مستعد انام ويه اخت كنوش ولا انام ويه نويله
ام فلاح...ولك يمه خطيه الخاطر هل بنات عينهن خاليه لا من ابوهن ولا من امهن
رضيه...اي رجعها امها دكول هي طايشه وما عندها عقل بعدها طفله هههه
جعفر بصدمه...نووويله طفله نوويله تفله مو طفله
رفع ايده باستنكار...ما ارجعها تعذروني
من راحت زعلانه لحد الان واني مأخذ راحتي اسكر براحتي وادخل براحتي جنت اخاف اسكر وتغتصبني وتعال يا عمي شيلني
خالتي بلوم وقهر...مفتخر ابو العرك شوف حجيه شوف والله لو ما اكول خطيه اله كل سوالفك اسولفها الجاسر واخلي يسوك كتلك عمل شعبي اله اخلي يدفنك بمكانك
جعفر بسخريه...ياريت والله واخلص من وجهه الطاوه يوم عيد .عيد ابو التسعة ايام مو تلاثه...
ضلت خالتي تحجي عليه وهو خله وراح...
واني رجعت انضف ويه البنات
...........................
شهد ...كاعدة بالصف الدرس الاخير والمدرسة تشرح والبنات يحضرن بجنطهن ولا مهتمات لشرحها عبالك تشرح للحيطان والرحلات ، والبنات عبالك مستعجلات ديحضرن جنط السفر ووراهن طيارة تنتظرهن . رجعت صفنت بجعفر
عاطت بيه المدرسه كمزت من صفنتي كالت...خوو انتي طينه والها عيون لو تقرين بكد ما تصفنين جان هسه انتي دكتوره
علست منها ما حجيت ورجعت الهوسه مال الطالبات
توها صاحت المدرسة علينا تريدنا ننتبه الها و دك جرس الدرس الاخير ، خطية هيه من الفشلة دارت وجهه وطلعت بسرعة . حل تستاهل ليش دكول عليه طينه اصلا اني عسل
اخذت جنطتي وودعت صديقاتي وطلعت من المدرسة مشيت مسافة على الشارع العام واحس خطوات ورايه
التفتت شفت مرة من بعيد جايه باتجاهي .
مهتميت الها ودرت وجهي وكملت طريقي فتت بفرعنا
واسمع صوتها ورايه تلهث وتحجي .
_ اوكفي المفعوصة خطافة الزلم اوكفي اليوم وين ترحين مني اليوم الادبسزززز .
التفتت عليها اباوعلها معصبة ومتعجبة .
وكفت اضرب برجلي على الارض .
وايدي على خصري كتلها خيير شكو لاحكتني شرايدة مني ؟
_ تعاي ولج انت شنو من صلافة شنو من تربية شنو من اخلاق شوكت تعوفين زوجي وتتوبين منه كوليلي شوووكت ؟ لج ابتعدي عنه لا تندمين والله ترى انت متعرفيني منو وشسوي .
_اعرفج اعرفج نويله وجه الطاوة وبعدين ايباااه من حوره زوجج ابو العرك بيج خير جان كعدتي على بناتج وماتزوجتي شكبرج عجوز براطمج براطم المطي .
ظلت تغلط عليه : يالادبسز يالطايحة الحظ اله افضحج فضيحة الها اول ما الها تالي بس بسيطة اصبريلي الدايحة بنت الشوارع .
_ اذا اني الدايحة انت ام الرجولة لازكة بي وهو يموت منج و اعلى مابخيلج اركبي ، وشسوين سوي ماخاف بس من الخلقني .
يييع بكد امي ولاحكتني على حبيبي وخري لعبي بعيد ترى الي اندكيتي بيها مو هينه اني شهودة ولا يغرج عمري اوديج للشط وارجع ميتة من العطش وادفنج بيدي .
ظلت تباوعلي مصدومة واني فريت ايدي وعفتها بنص الطريق ورجعت للبيت .
وهي تصيح عليه...كح هم الزلم يموتون علئ الكح...شنطيتي وميت عليج اكيد بعتي شرفج يا عديمة الشرف
عفتها تاكل تبن وحدها وخليت ومشيت
بدلت ملابسي بسرعة واتصلت على جعفر
بس كال الوو ؟
كتله هسه تجي حالا فورا للمحل سمعتني لو لا ؟ وسديته بوجهه .
رحت للمحل وبقيت انتظره ، نص ساعة واجه ..
فات كال ها حبيبي شهودة خير خو ماكو شي لا كليلي اجوني خطابه وتعال اخطب هاي كلاوات مو عليه .
توة داحجي واسولفله عن جية نوال وعركتنه بالشارع كال شهودة جكاير جكاير انطيني .
اخذت باكيت وانطيته اله واسترسلت : اليوم مرتك اجتني واني طالعة من المدرسة وكفتني بنص الشارع .
كال بصدمة وهو يطلع الجكارة من الباكيت ويخليها بحلكه : وجه الطااااوة !؟؟ شتسوي وشتريد .
كتله : ع الاساس ماتدري شتسوي وشتريد تكولي ابتعدي عن زوجي .
كال : جداحة جداحة هاي مالتي ماتشتغل ،
اخذت وحدة وخليتها بيده .
شعل الجكارة وكال اي وشكتيلها ؟
كتلها..ديلا عساس شلون زوج ابو العرك ..
طلع الجكارة من حلكه وباوعلي عيونه مفتوحة بتعجب
وملامحه جامدة
_ طاح حضج يا حماره كابله وبزه بعينه مو ؟
تخصرت : اي شوكت تطلك وجه الطاوة مو كلت حتطلكها ؟
_ من اشتري طاوه جديده ..
وظل يرفع بحواجبه وينزلهن ....
تأفأفت .. كال : دنطيني علج مر الرضيه معدتها هلايام مو زينة جالي عندها ومتهورشه مدري شبيها .
اخذت علج مر خليته بجيس وانطيته كتله ادري انته جاي تقطني لو تسمع مني وتشوفني ؟
_ كلج خير وبركة شهودة ، الشي الي اشتري منج متدرين شكد طيب وبي بركة لان نفسج طيبة بعد عمري .
_ تشتريه !! انت يا مرة اشتريته كل مرة تقطني وتروح .
_ اعوضج اعوضج على العرس ان شاءالله .
عوجت حلكي وكتفت اديه وشحيت نظراتي منه .
هو كال بابتسامه : يلله هسه مامحتاجة شي ؟
سبلت اديه بعصبية : ماريد شي بس كفيني شر وجه الطاوة ولا تشوفني وجهه بعد وتلزملي الشارع حذرهه مني جعفر .
_ تدللين بس ارجعها افششها تفشش شكو شي نافخته افششه اطلع البوتوكس من خشمها واذانها شكم شهودة عندي اني . واذا ما رجعتها وطلقتها اتزوجج واحرك كلبها
وبعدها كال...نومي بصره نومي بصره مرات يصعد ضغطي من مصايب نويله ام جني منحرف عاد افورلي نوميات
شلت اله نومي وانطيته اله بغضب وخزرته لان هوايه يطلب وهو لا ابالي ولت احساس ياخذ ويروح
غمزلي وطلع ..تمنين اركعه بسطل لروبه ماكو هيج بشر دمه بارد....
............
جابر....
باليل تقريبا الساعه بالعشرة ...
جنت نايم واقلب بموبايلي دخلت للفيس مليت طحت بي وشمرته
اتذكرت وقار ان شاء بعد كم يوم خطبتي عليها
الحمد لله بنيه حبابه وفقيره اليوم سمعت جيرانه دكول لامي صح هي حلوه البنيه بس ايدها عايبتها شعجب تخطبيها الجابر
استلمتها ريهام جايتنه خطار وضلت تحجي وياها بالدين وعن التمنر بحيث المره حست نفسها كافره وفشلت وراحت
اني متهمني ايدها المهم البنيه حبابه وان شاء الله بمرور الوقت تدخل گلبي اكثر
رحت للحمام سبحت وطلعت اخذت موبايلي شفت جايني اشعار علئ الفيس دخلت للفيس رحت للشعارات ودخلت علئ المنشور
كعدت مفزززززززوع من الشفته المنشور مكتوب عرضك طش علئ الفيس ومسويلي تاك
والحساب الداوود
فتحت عيوني مصدوم من شفت صورها...
نهاية البارت...يتبع
كونوا انتم كونوا بخير...احبكم 💔
نور سمو العراق 😘
لا تنسوا التصويت احبتي بكم نكتمل ...
شكر خاص للكتابه المبدعه نورا ناصر ابد ما قصرت ويايه ساعدتني بالتقرير وبالبارت وبكوولشي ولو قريبه مني جان ساعدتني بلف الدولمه 😍😍😍
مشكوره يعمري Nora-Naser
تابعوا هذا حساب الكاتبه الروايه كوولش حبابه وقصصها حلوه وقلمها مبدع alraawih
تحبون فقرة هاي الصور 😍😍😍
من تصميم طلحة طبعا Talha-25-3