| يا تعبي العشگته | ' باللهجة العراقية '

| البارت التاسع عشر |

#يا تعبي العشگته
#بقلم الراوية
#البارت التاسع عشر

بسم الله الرحمن الرحيم

| صلوا على النبي ⁦♥️⁩ |

" ماينعدل حچيك درب بين گبور "
.

لين..

- لـيونه
اني اعرفچ تحبـينو لـسلطان..و مو هسا لا من زمان
فـ اريد منچ...

سكتـت و اني ظليت ادحگ عليها..بخـجل ممزوج بالعصبية
اريد افهم شلون عرفت؟
بس لا روان حاچـيه..والله لو فاكه حلگـها الا ابتلي بيـها..

رجعت كـملت كلامها و هي ترجع تكـمش ايدي بلطف

- اريدچ تتـقربين لـ سلطان
يعني تجذبـين انتباهو..والله العظيم ما الگه احـسن منچ الو..و هو راسو يابـس ما يقبـل يتزوج اريدچ تـلينين راسـو

ما ان خـتمت كلامها حتى انتـفضت من مكاني
و اني اسحـب ايدي من بين ايديها
والله حسيـت كل جسمي رجـف بسبب حچيها
اريد اجمع كلمتين على بعضـهن ما گدرت

دحگتلها و هي استحت من ردة فعلي يمكن الـشوية مبالغ بيها
بس ما گـدرت اتحمل..هيچ عدهـا الموضوع بسيط تا تجي تطلب مني هيچ طلب

جيت اطگها ضحكه و اگوللها..خاله ابنچ من اساسو يشوفني جـاهل و وكحه..لو حاولت اتقربلو و اجـذب انتباهو مثل ما تگـولين فـ راح يشوفني وحده رخيصـة و ذابـه المستحى

هي من شافتني ظليت ساكته و صفـنة تاخذنـي و صفنة تجيـبني وگفت على حيلها
و صـارت گدامي و گالت بـترجي

- والله اعـرف طلبي صعب
بس هذا ابـني الوحيد اريدلو وحده مثلچ..و صدگيني والله سلطان ماكو اطيب من گلبو
بـس هو ما يبين هالشي..يمه لين اريدچ تجذبينو ناحيتچ اخاف يرجع لمگصوفة الرگبة لمار
لو يـروح يتعرفلو على وحده من نفس الطينة

ابتـسمت بمجاملة و اني ارفع تك حاجب
و اگـوللها

- خالة..ترا احنا مو بـمسلسل تركي
ترا والله انصدمت من طلبچ..و اني اسفة لا تتوقعين اقبل بهالشي..مو امي و عماد تعبوا بي و برابتي تا اسوي هـاي الحركات

- والله العظيم خجلانـه منچ
بس گوليلي شسوي و اني اشوفو بهالحـال؟ كل ما احچي ويا على وحده يگول ما اريد
عبالو كـل النسوان مثل لمـار

- كل واحد و نصيـبو و قسمتو خالة
لا تسـتعجلين..مو باچر بعد سنه يجيچ يگلچ يمه روحي اخطـبيلي

ابتسمت و هي تكمش ايدي و تگول

- بس اني اريدچ الو

ابتسمت و ما اعرف شلون كتـمت دمعتي
والله العظيم الموقف خلا كل جسمي يصب عرگ
اريـدها تختفي من گدامي بس تا اخذ نفس

- بس ابنچ ما يريدني خالة
و اني الما يريـدني ما اريـدو..ربي يكتـبلو الي بي خير ان شاء الله
و مـو كلشي نتمناه يتحقق..ان چنت احبو او لا هالشي راجع لنفسي..و رحم الله والديچ من تشوفيني مناسبـه الو..بس هو لا ما يشوفني
يريد وحده تناسب تفـكيرو و عمرو

و باسى گالت و عينها غورگت

- شلون اگـولچ بس والله نافستچ من زمان
و رايدتچ الو..و من عـرفت تحبينو والله فرحـت من كل گلبي..و گلت ما طول تحبو اكيد راح توافق على سالفتي
منها اخلي يحبچ..و منها ارتاح اني

طبطبت على ايدها بلطف و اني اگـول بنبرة خافته

- حتلو روحي معلگه بي
الما يريدني ما اذب نفسي عليه..لو اريد اجذب انتـباهو چان سويت من زمان..چان على الاقل اعتـرفتلو بس اني ما اريد

- اي هي روان گـالت تحبو بس ما گايـلتلو

فتحت عيوني بصدمة و عضيت على شفتي
و هي حطت ايدها على شفتها و صدت و ادردم

- اويلي شحچاني

- خالة روان گالتلچ؟

حچيتها و هي رجعت اندارت عليه و گالت تريد تضيع السالفة

- زلگت بالحچي والله مو قصدها

تنهدت و ما رديت عليها
كتفت ايديه من گـالت

- بنتـي اعتذر منچ
بس..

اخذت نفس و دنگت راسها و هي تكـمل بنبرة حزينه

- انـي اروح يمه
و اعذرينـي مرة ثانية..و انسي حچي

تقربت الـها بخطوة و بستها من راسها
و گلت بابتسامة خفيفـة

- معذورة خالة..و والله ما زعـلانه منچ

ابتسمتلي و هي ادحگ بوجهي و حچت بصوت ناصي

- والله كل يـوم تكبرين بعيني
مـا اگول الا ربي يرزقچ ابن الحلال..بس اظل ادعي ان شاء الله تكونيـن من نصيب وليـدي

حچت حچايتها و استأذنت
ودعتهـا لباب البيت
و طبيت جوه..گعدت بالصالة و حطيت راسي بيـن ايديه و اني استـرجع كلامـها
حسيت بخفقان بگلبي من شدة التـوتر
بللت شفـتي و اني اغمض عيوني..حطـتني بموقف لا احسد عليها
هيچ بسهـولة تحچي وياي عبالك الوضع سهل

سمعت طبگت باب الحوش
و صوت امي يحچي..وراها صيحـتها الوصلتـني بعصبية

- مـو گـتلچ كملي المواعين ليش ما خلصتيهن
اكيد التهيـتي على الصخام
مو صوچج صوچ عميد الجابو لچـه

گمت على حـيلي و اني اتسـخط
طبيت للمطبخ و گلت بهدوء..يمكن استفزها

- جتي خـالتي ام سلطان و گعدت وياها
خوما طايرات المواعين

سدت باب الثلاجه بـقوة و هي تگول

- و ظلـيتي فاكه حلگچ مو ؟
و لا درتي لا مي و لا چاي

عضيت على شفتي كاتـمة عصبيتي
و هي ما بطلت تسفط بالمسواگ و تحچي
اخر شي دفعت كرسي محطوط يم الباب و وگـع بالگاع و صحت بغضب و قهر
عبالك سالفة ام سلطان قطعـت اخر خيوط الصبر بگلبي

- رحمـة لاهلچ كافي
ترا مو زعـطوطه گدامچ و ما اعرف شسوي اذا جـانا احد..كافي بالقـرام بزعت و طگـت روحي من هذا المـهجوم
الله ما يكتـلني و اخـلص من عيشتي وياكم

طلعـت من المطبخ و هي ما سكتت گبـل صاحت

- ايي روحـي الحگي ابوچ
روحي و خلصيني

صديت عليـها و اني اكـتم دمـعتي
ما حچيت بس انطيتها نظرة عتـب و فتـت للغرفة
و طبگـت الباب وراية..
و مددت بمـكاني و اني احس وجع گلبي زاد
مثل الحرگـه صارت بي
تغطيت و اني احط راسي جـوه الغطا..عضيت عليه و اني ما ادري بنفسي شلـون بچـيت

و فوگ كلام امي الذبـتو بدون اهتمام
زاد الوضع تذكري لحچـي سلطان.. و انتهى الوضع بطـلب امو

مددت على ظهري و بچيت..يمكن لاول مرة هيچ
گـمت ابچي بصوت عالي واني احط كفوفي على گـصتي
شي يجرح..و يمـوت
من تسمع اقرب الناس الـك..يدعي الك بالهلاك..لمن تسمع الشخص الي طول عمـرك تحبو و تعتبر شي چبير بحياتك
يحچي عليك بكلام انت بعيد عنو

عصرت گصتـي و اني اگـول بصوت متعب

- يابه تـعال
ليش عفتني

ما عشـت ويا و لا سنة..ما حضني و لا باسني
لا نومني على رجـلو..و لا اذن باذني
بس احس باشـتياق الو...عبالك عاش وياي سنين

هيچ البنية..من يروح والدها
تحس بكسرة ظهر و شوق مو طبيعي الو..حتلو ما تجـمعهم ذكرى مع بعض

مر اليوم و امـي ما حچت وياي
و لا اني طـلعت من الغرفة..ظليت معتكفة بيها
صـاحتلي تا اجي اتغدا و ما رديـتلها

المغرب صار و اني بعدني بالغـرفة
فات عماد و گال بدون مقدمات

- شبيچ ضايجه و زعـلانه

- ما بيـه شي

جاوبـتو و هو جا يمي و گعد
دحگـلي لـ ثواني گبـل لا يگول

- تكاونتن انتي و امچ

- تعرف سوالف العجايز

ضحك و قرصـني من خدي و گال بشقة

- اي والله امچ عجزت و خرفـت..باچر تگوم تمشي بالبيت و اطفي الاضويـة

ما جاوبتو و هو تنهد و رجع حچه بتساؤل

- ليش تـكاونتن؟
علمود شنو

انـداريت عليه و جريت حسرة
ما اريد اگـلو..لان ما احب اتشكي بس هو حثني على الكلام من رجع گال

- بسبب شنو

- تحسسني انو جـاهل و ما اعـرف شي
جتي من المحل و شافت المواعين بعـدني ما مكملتهن..لان جتي ام سلـطان و من درت گعدت تحچي عليه اكيد ما ضيفتيها شي

-مو اگـلچ عجزت و خرفت

ابتسمت و هو بادلني الابتسامة و اردف

- ما عليچ..انتي چبيره و عقلچ يوزن بلد

رمشت بعيوني و اني اگول

- يعني اني مو جاهل؟ و لا وكحه

- امم..انتي مو وكحه..انما شخصيتـچ قوية
فـ يشوفنچ وكحه و جاهل ما تعرف تتصرف

ظليت ساكته و اني لامه رجـلية و محاوطـتهن بيدي
هو گام و كمل كلامو

- لا تزعلين و لا تضـوجين
خلي عندچ ثقة بنفسچ..و لا تخلين الكلام يأثر عليچ
انتي مو مجبـورة تعجبين الكل..المهم شخصيتچ تعجبچ انتي
ليونه ترا ما نخلقنا تا نعجب خلق الله..اذا ظلـينا نفكر بكلام فلان و عـلان على شخصياتنا..بيوم تگعدين الصبح و ما راح تعرفين نفسچ..لان بسبب كلامهم بنيـتي شخصية جديده ما تعرفينها شگد ما تأثرتي بحچيهم..و شخصيتچ القديمة راح تلگينها مهـدمه

و طلع بس قبلها گال

- گومي ترا ما يلوگلچ الزعل

من طلع و سد الـباب
ظليت صافـنه وين چان گـاعد..و اني ارجع اتذكر كلامو مسحت على خدي و احس حچيو غير بيه شي

گمت على حـيلي و وگفت گدام المراية و گمت اركز بملامح وجهي
اني صدگ ليش زعلانه و ضايجه من حچي امي!
كم مرة سمعتو و طنشتـو
و ليش اصلاً مقهورة من حچي سلطان الي كم مرة و مرة ذبو بوجـهي؟

ليش تحسست من كلامـهم الي سمعتو و شبعت منو..الا ان حسيت انتخـمت

طلعت من الغرفة و رحـت غسلت وجهي
و طبيت للصـالة..شافني عـماد و ابتسم..بادلتو الابتسامة و گـعدت يم امي الاستغربت شلون رضيت و اني اگول

- شـنو نسوي عشا

ظلت ادحگلي بـحواجب معقوده و قبل لا ترد
تـدخل عماد و هو يگول

- لا تـعبن نفسچ..اني اجيب لفـات گص

- ميـخالف

حچتها امي و اني اخذت جهاز التحكم..و گمت اقلب بالقـنوات و احس بنظرات امي المتعجبة عليه

.

طيبة..

چـنا كلنا بيت عمي مـجتمعين
و بيت عمي علاء هميـن..نتعشا بالصـالة

گاعدة بصف ضرغام و گبالنا العرسان بهـاء و فدوى زوجـتو
بنية لحد هسا حـبابة و بسرعة انـدمجت ويانا
تحب تضحك و تسولف..و روحـها حلوه

على گـولت لين..شلون رضت بالعكـرة بهاء
هي بشوشة و هو اربعة و عشـرين ساعة مخنـزر

ملت عـلى ضرغام الي گال بنبرة نـاصية
و هو يكمش شالي و يسحبو على صدري

- دلعة دشداشتچ چبيره

- اني شعليه امك اشتـرتليـاها

ابتسم و هو يدحگلي بطرف عيونز و بذات النبرة كمل كلامـو

- اشترتها للغرفة..علمود اني امتع نظري مو تـحدرين بيها جوه

گبل تعـدلت بگعدتي و سـويت نفسي داكمل عشاية
والله حسيت خدودي صارت نار
دشـداشتي ما بيها شي و مستوره بس لو فتحت زيگها چبيره
هو رجع ياكل
و اني دحگتلو و ابتسمت..

الحمدلله لحـد هسا كلشي تمام..
البارحة جابلي تلفون..و سيم كارت..من سوه هيچ
حسيت انو هاي هي رجـعت ثقتو بيه
كملنا العشا و اني احس بنـظرات ملاك و زينة علينا

تريد تاكلنا اكل..
و اني ابد ما احب اخبث..فـ اظل گاعدة بصفو و احچي وياه..لو اكمش ايدو عاد هو ما يصدگ على الله
يكمش ايديه اثنينهن و يگعد..عبالك معتقلة عندو

ملاك معذورة الاخت تحبو و تضوج
بس زينة ليش هيچ تسوي؟ مو هذا اخوها يعني ما تريد تشـوفو مرتاح

البنات فاتن يغسلن المواعين و اني چنت اصب بالچاي
تقرب عليه ضرغام و گال

- اكو براستول؟ راسي يوجعني

انـداريت عليه و صارت عيني بعينو
و هو ابتسم..بلعت ريگي لان ما تـوقعتو بهالقرب
عيونو مشطت وجهي انش انش
فزيت من ناداه عمي
و هو گبل اندار و جاوبو ها يابة

گمت و گلتلو

- راح اجيـبلك بندول عدنا

طـلعت من الصالة و اني اعدل بشالي
اول ما طـبيت للمـطبخ شفت ملاك و زينة يغسلن بالمواعين..و دانـة تمسح بالكاونتر
من انتبـهن الي اندارن الثنـائي
ضحكت ملاك و هي تگوب بحقد و عيونها تشع غضب و كرهه الي

- هلا بـ ام الصور
ما صارت فرصة و تقابلنا

تماسكت اعصابي..و اني اكرر
طيبة تجـاهليها..عوفيها زعطوطة و تحچي
فتحت الكاونتر و گمت ادور لعلبة يخلـون بيها علاجات
حطيت ايدي على العلبـة و وگفت من رجعت تحچـي بسخرية

- اگـول عود همين من چنتي زعلانـة ورا الكـتلة
تعرفتي على واحد؟ اكيد ما گدرتي بدون بديل لـو واحد يسد الفراغ العـاطفي العندچ

مع ما انـداريت عليها ما شفت الا ضرغام فات للمـطبخ
و صوت صياحو ترس المكـان..
ما شفتو هيج عصبي الا لمن تكاونو
كمش ملاك من ايدها و ضربها براشـدي على حلگها

اني يبست بـمكاني و هو طلعها من المطبخ و يصيح و يحچي
زينة طلعت وراه و دانة جتي ناحيتي
و هي كمشت ايدي..لان جيت افقـد السيطرة على تـوزاني

صارت العيطة و چان صوت ضرغام هو العالي
شوية و صاحو باسمي
دانة ما عافت ايدي..و اني ميته خوف و تـوتر
خايفة لا تذب براسي سالفة
بس ضرغام سمعها

طبيت للصالة..و الجو چان متوتر
طل الوجوه متـجهمه و معصبة

و بصيـاح گال عمي جابر

- دانة شـصاير؟ شنو حچت ملاك

- يابة سمعتها باذنـي تحچي على طيبة
والقران يا عمي اذا ما ربيت بنتك اني اربيها

عمي صـاح بـ ضرغام تا يسكت
و هو احتراماً الو سـكت

عمي جابر رجع سال دانة بعصبية..و اني انـداريت عليها و ادحگلها بترجي
اخاف تسوي نـفسچ ذيچ المـرة و تنكر

هي ظلت ساكته ثواني و گـالت بنبرة ترجـف

- ملاك هي التـحرشت بـ طيبة

و حچت كلشي مرة وحده
تنفست براحة..و نظرتلها نظرة شكر..
عمي علاء تخبل و كمش بـنتو حچي و مسبه
و ضرب..الا تدخل عـمي جابر يلا عافها

و راحوا و هو يسحل بيها سحل و يحچي عليها
بهذيچ الليل كلهم تعذورا مني..

عرفت انو الموضوع ما چان بسيط مثل فكرت لثواني
لو ما سـامعها ضرغام بهذيچ اللحظة چان عبر و ما دافعت عن نفسي
بس الحمدلله تواجـد باللحظة المناسبه..و صار درس الها و لـ زينة الخنست و ما فكت حلگها بكلمة

صعدت فوگ..و اني ساكته ما ناطـقة حرف واحد
صعد وراية ضرغام و سد الباب..وخرت حجـابي عن راسي
و هو بس صـافن بيه

التـفتت عليه و گلت

- ترا وتـرتني بنظراتك

ضحك و تقرب عليه..حك ايديه على اكـتافي و حچه

- ليش ؟

- ما ادري..بس من تركز بيه حيل اتوتر

تقرب مني اكثر..و قرب انفو على انفي و سند گـصتو على جبيني و هو يگول بنـبرة ناصية و عيونو مغمضـهن

- عـاد والله حقچ..لان ما اركـز بيچ
فـ معناها الشيـطان گاعد يوسوسلي

جفلت من حچـايتو و ابتعدت
و هو طگـها ضحكه..والله مرات اخاف من افـكارو و كلامو المبطن
رجع سـحبني من خصري و هو يطمن بيه بضحكه

- اشـاقيچ يمعوده گبل تصـدگين؟

ما اقـتنعت بكلامو..بس ما جـابتو
مدد على التخت..و حطيت راسي على ايدو
و ايدو الثانيه على خصري

- ضرغام

- همم

همهم بـيها..و انـي گلت بتـردد

- هـمين ملاك چانت تجي هين..يعني من چنت يم اهلي

ضحك و هـو يرفع ايدو و يحطها على خدي و يمسح عليه بلطف

- اصلاً سوت اقامة هين

عگدت حاجـبي بانزعاج
عود يعني يحچي من كل عقلو و يـضحك فوگاها
هو من شافني ضجت
ابتسم و كمل كلامو بنبرة هاديه

- عود چانت هي و زيـنة يحچن وياي
طلگ و اخذ تاج راسها..ما تعرف انو التاج واحد و هو انتي

ابتسمت و هو ذب حسرة و رفع نفسو و گال

- بالقران چنت اسمع حچيهن عبالك شياطـين و يم اذاني..بس من اتذكرچ و اتذكر عيونچ اتعوذ منهـم

و بصوت خافت گلت و اني انـزل عيني

- و ظل تعوذ منـهن

دنگ شوية و رفع وجهي ورا ما حط ايدو جوه حنچي
و گال بمكر و هو يغـمزلي

- اتعـوذهن ليش لا..بس اكو شيطان عشعش براسي هسا اتعوذ منو لو لا

.

عماد..

ورا فترة وجيزة..قررت اروح للشـمال
احجز بضاعة مـن هناك
اروح وحدي..فـ قررت ما طول عطلة اخذ لين و ريهام وياي..

ريهام حچـيت وياها و گالت ميخالف..
و لين بس عرفت..گامت تهز رگبة و اطگ اصبع

گمت اضـحك عليها و شلون فرحت
بالليل بالـ11 تقريبا طلعت للشارع
ما جايني نوم..و خصوصا انو عندي طلـعة من الصبـح.و من تصير عندي طلعة النوم يجـافيني

گعدت على الرصيف يم باب الحوش..وگمت ادخن
شفت سيارة سلطـان طبگت و حدر منها
هو انتبـهلي و رفع ايدو و سلم
هزيت راسب بـ اي و ما رديت

علاقتنا بعدها نفس ما هي..ما رجعنا مثل گبل
بس نگـدر نگـول شوية الگلوب تصـافت
شفتو طبب سيارتو..و رجع طلع
و جا ناحيـتي

و بدون ما يحچـي گعـد بصفي
و هو يطلع باكيت جگايرو..دور للجـداحة مالتو و ما لگاها
طلعت جداحتي و ورثت جگارتو

و گام يدخن و هو ساكت
مـادري شگد مر وكت..بصمت مطبق
اتذكر گبل من ننجـمع..افوهنا ما تسكت عن الكلام
عـبالك چنا نتسابق منو يحچي للاخر اكثر

اما هسا..كل ما نـتقابل الصمت يتلحفـنا من كل الجـهات..مادري كبرنا و قل حچـينا
لو ما ظلت سوالف تتـسولف

قطع هذا الصمت المدوي من گال بهدوء
و تسـاؤل

- باچر تـطلعون لـ دهوك

- أن شاء الله

- دربكم مسهل أن شاء الله

-تسلم

حـچيتها
و انـداريت على صوت طرگعة يم بابنا
انفتح و طلعت من ورا لين..عگدت حاجبها و حچت

- شو تعال المبردة مالت غرفتي طفت من حالها

- جاي..فوتي جوه

حچيتها و هي انـدارت تشخط بنعالها
يمكن ما انتـبهت لـ سلطان الگام على حـيلو وگال

- فوت شوفها..اني استأذن تصبح على خير

- و انت من اهلو

راح و اني فتت جـوه
طبيت لغرفتها و ما لگـيتها
گلت يمكن بغرفة ريهام
شـفت المبردة و الله ستر الواتر بم معطب
فسختـها عن الكهرباء
و طلعت ادورلها..ضحكت من شفتـها ماخذه مخدتها و غطاها..و بغرفتي متمدده گدام المبردة على الگاع

گـرمزت يمها و گعدتها

فتحت تك عين و گالت بخمول

- المبردة بيها ريحة شعواط

- الواتر بم معطب..ما انتبهتي

هزت راسـها بـ لا
و رجعت مددت..هزيتها من كتفها
و گلتلها

- گومي نامي على الدوشگ..الگاع راح تكسر ظلوعچ

و بدون ما تحـچي تحولت و مددت بس بمخدتها
سحبت غطاها و غطيـتها

و مددت بمكـاني..و كل شوية اگعد..لان نوم ما جاني

الصبح گعـدنا من وكت بالـ5 علما تحـظرنا و ما تريگنا گلت عود نگف يم مطعم و نتريگ

چنت مأجر تكسي خصوصي بس احـنا..چارجر لان مريحه و ما تبـزع رغم اجرتها غالية

وصلنا دهوك بحدود الـ10
افترينا بالسوگ..و رحت اني لـلرجال الي راح اخذ منو البضاعة
الحمدلله تم كلشي على اكمل وجه..و تصافينا
و تقريبا يومين و تصلـني البضاعة

و طلعنا افترينا..و كل مكان نگف بي لازم تاخذ لين صورة و تگول اقهر بيها روان
شفتها شلون فرحت بهالـطلعة البسيطة
و بالمطعم
گالتلي

- عمـاد خوما اليوم نرجع؟
واله ونسة هين خـلينا بس يوم اخر

- يمه شـيخلينا..العصر نرجع ما نگدر نعوف بيتنا

حچـتها ريهام..و لين ضـاجت
اني چـنت مقرر نرجع بنفس اليوم..بس من شفت لين شلون فرحانه
و طلبها انو نظل..گلت ماكو مشكلة اذا ظلينا يوم اخى
كلنا نـحتاج لهيـچ طلعة

- لا نظل شعـدنا

ضحكت لين و گالت

- والله؟

- والله..ماعدنا شي

- عجـل..الله يخليك خلي نروح لـقلعة نزاركي

- اصبـري خلي اشوفها شگد تبعد من هين

بحثت عنها بالـخريطه و شفتها حيل بعيده
فـ اقترحت نروح للمـصايف
و تجهزنا و طلعنا
چانت سفرة حلوه..حسيت مكان طيبة ناقـص
و من خابرتـها لين گالت الا اخلي ضرغام ياخذني

و بعد يوم من الفره و التسوق..
و حـسيت محفظتي ضعفت بعد السمنه..حجزنا  بالفـندق غرفة

و الصبح همين اخذتـهن للسوگ و اشترينا كرزات عـلى حلويات

و رجعـنا للبيتنا العصر و الـتعب اخذ منا ما اخذ
و بالليل اندگ الباب
گمـت و رحت فتـحتو و طلعت بـوجهي روان
و خالتي
بس شفتها خطية گبل توترت..و اني گوه كتمت ضحكتي
سلمت على امها..و هي تتحمدلي بالسلامة
و هي ما نـطقت حرف

فاتـن جوه و گعدنا بالـصالة و اني وياهم
صح روان شكلها تريدني اگـوم بس اني ظليت لازگ

شنـو مشتاگ لـ خالتي و اريـد اشوفها

شوية و گامن روان و لين..و اني ظليت وي ريهام و خالتي
سمعت تلفوني يدگ..اخذتو و شفتو الرجال الاشتـريت منو البضاعة
گلت افوت للغرفة احچي ويا..لان شو ما ناويات يسكتن
و ريهام متحمـسه و هي تسولف لخالتها عن دهـوك و اسواقها

فتحت الخط و طـلعت للممر و رديت
بس انگطع الخط..چنت قريب يم غرفة لين
و گمت اضحك من سمعتها تگول لـ روان

- والله امشي و فاتحه حلگي و ادحگ على هالشباب
جـيت اخطف واحد واحطو بالجنطه..عبالك جبنة المراعي شگد مو بيض و حـلوين

طبيت لـغرفتي و اني ابتسم على سوالفها
مع انو اني و امها شگد نحچي وياها..بس ما تبطل هاي السوالف
اني اعرفها هي شنو من شي..و كل كلامها بنيـة بيضه و مو صح
بس لو غيرنا يسـمعها اكيد راح ياخذ غير قصد

الصبح گـعدت من وكت..علمود استقبل البضاعة
ليـن بعدها نايمة و تقريبا الساعة بالـ7
و لگيت ريهام مسوية الريوگ..گعدنا نتريگ اني ويـاها
چنت گاعد اگشر بـيضه سلگ و هي گدامي بيدها خبزة
احس اكو كلام على لـسانها و متردده تحـچي
تركت البيضه من گالت

- عماد خيي..گبل لا تروح اريد احچي وياك بي

رفعت راسي الها و هي تركت الخـبزة و نفضت ايدها
من گلتلها

- شكو..خوما صاير شي

- ان شاء الله خير..البارحة خالتي بالليل من جـتي حچت وياي بخصوص لـين

عگدت حاجبي و سألتها

- علمود شنو

تنهدت و ابتـسامة انرسمت على شفافيها

- طلبـت ايدها لسـلطان

تفاجئت..و فـتحت عيوني على وسعـهن
سلطان يتـقدم بطلب ايد لين؟ شصايرلو؟
اخاف مضروب على راسو

و بتـشكيك گلت

- متأكده؟ اخـاف خالتچ من حالها
جتي و حچت

و بانفعال گالت ريهام و هي تهـز ايدها

- لا لا والله..حلفت بالله و حلفت بروح امي
گالت سلطان هو الـدزها

.

السلام عليكم و رحـمة الله و بركاته ❤

شلون مفاجئة 🌚
سويتلكم بارت مفاجئ لان تستاهلون 🤭❤

المهم شنو رائيكم 🌚
قفلة تجلط مو 😂😂

طبعا بصراحة..جيت انهي البارت عند عماد من طب لغرفتو بعد ما سمع لين 🥳

بس تدرون بيه احب شوية اخبث 🌚 و انهيتو بهاي القفلة 🙃😂😂

ها شنو توقعاتكم 🌚
تتوقعون لين توافق 🤔🤔

و ها قبل لا اروح عندي طلب صغير منكم و اتمنى ما تفشلوني 🌚🌚❤

اتمنى اتابعون HafsaHafsa710
و تروحون تلـقون نظرة على قصتها الجديده " زمهرير الاوجاع "

طبعا والله بداية كلش قوية من المشهد واضح رواية نار🔥

و بس والله 🤭❤
نلتقي على خير احبتي ❤
و لهذاك الوقت استودعكم الله الذي لا تضيع وداعة🙏👼