#جوليت وأسرها....

البارت السادس والعشرين

البارت السادس والعشرين
رواية...جولييت واسرها....غياهب الإنتقام
بقلمي...نور سمو العراق

💔💔💔💔💔💔💔💔💔💔

اصنعــي مـن ألسنتــهم فرحاً ولا تبالــي بهـم.

...................................

⇣♥🍟)"̯

لــ متاابعيني

عــــشان الـعيد قـرب​ انـــا بيــّن ضحكــاتِڪن
أعيــش واتعــَايــش وإلرِضــا غامرنــِي♥ֆ'ء

كل عام وانتم بخير

🌹🌹🌹🌹🌹🌹🌹🌹

اتصل موبايله كطع كلامه ورد علئ الموبايل حط ايده علئ خصره ودار وجهه عني وهو يفتر بالغرفه كال...هااا جابر الوو الوو وياك

اردف بصدمه...شنوو شبيك دحجي عدل يمعوود شنووو جعفر مخطوف من البارحه مخطوووف ويساومون عليه

طلع من الغرفه بسرعه بعد ما قفل موبايله ...

واني طلعت اركض وراه لزمته من قميصه ورجفت بخووف...شكوو شكوو احجي شنو الصار

سحب ايده مني بعنف وصاح بصوت عالي...جعفر انخطف جعفر خطفووا

اجن يركضن البنات ورضيه ونوال وخالتي لطمت علئ وجهها بخوف....يمه وليدي يمه سوده بوجهي

هو خله وطلع بسرعه وهمه

وخالتي تلطم هي ونوال هجمت عليه نوال تصيح وتغلط....ماكووو غير اخووج العار ماكو غيره هو الي خطف خطيبي

خفت منهن ومن هجومهن المباغت وركضت الغرفتي قفلتها ...

ضليت افتر بالغرفه بخووف ونحيب ...الله ينتقم منك يا عاصم شسويت شسويت بيه الله ينتقم منك

ابد ما طلعت من الغرفه بس خطيه رضيه تجيبلي اكل واني حتئ ما اكل من الوجع ...

ضليت يومين علئ هل حال وجع وبجي وخوف من الصار وخوف علئ جعفر...

لان والله حمويني ابد ما ماذيني ولا مضايقيني حتئ البنات ابد ما يضوجني

بس خالتي ونوال وجاسر...

اشوف الناس تروح وتجي ومخابرات مستمره وعرفت الخاطف مخابر جابر من موبايل جعفر لان عود جعفر كايله جابر يحجي وياهم بهدوء اخاف ينجلطون مدري شنو...

ربي يفك اسرك يا جعفر وين متكون ويخلصك من وجهه الطاوه....

...................................

شهد...

صار يومين اخاف اطلع من وره ابويه واجت ام مرة ابويه خطبتني لابنها بس عود اني طلعت الها...

كتلها بملل...شوفي خاله اني اكعد متاخره من النوم وخايسه لا اعرف انضف ولا اشتغل اموت علئ النوم عاجبج عاجبج ما عاجبج الباب يوسع جمل

كالت زوجة ابوية...بالكتل تتعلمين لا تخافين

رفعت اديه بتذمر ...ترئ بس المطي يكتل يعني اخوج مطي وبعدين بس الحيوان ينضرب صح اني كتكوته بس أنظم للدواجن مو للحيوانات

كالت امها..يمه لسانها شطوله عود هاي عمرها 14 من تصير عشرين شسوي

ردت زوجة ابويه...تتادب تتادب بس كون رجلها حوك

نطيت من مكاني ...منيله حوووك لو بي خير جان كدرلج احسه ما يفيدني

هي تخبلت طاحت بيه وطردتني واسمعها دكول لامها...دخذيها وخلصيني منها هسه هو مو زين تقبل بي اشو مطلك ثنين ومنو يتزوجها تنهزم منه باليله ضلمه

ضجت من كلامها رحت خابرت جعفر ...

كتبلي رساله...لا تخابرين رجاءا ترئ،مخطوف وحالتي حاله

استغربت كتبت...وين اكو مخطوف يخابر اهلها كلاواتك مو عليه مبين عجبتك وجهه الطاوه روح يا جعفر كون بيوم عرسك تطفئ الكهرباء وتحضن صبريه بدل نويله المعفنه...

شاف الرساله ومجاوبني انوب حرك كلبي بالزايد ...

لازم استفزه كتبت...اله اتزوج اخووك جاسر واخلي يشبعك كتل واعزمك بعرسي بس حتئ تشيل البدله من وره لان طوويله

دزلي سمايل يضحك وهماتين مجاوب

ياربي كووولش ديقهرني لو ادري ولا حابته كرهته النذل ابو الحبوب فوك ما قابله بي...

.....................

كل يوم لازم تنسرد عليه رواية واكون اني بطلة هل روايه...

الكل محملني خطف جعفر وكل شويه وخالتي هدت عليه وكالت...ماكو غير اخوتها الكلاب هم خطفوا ابني جعفر حتئ يساومونه

جنت حايرة الذهن...صدري متت منه الوجع لا يطاااق متت متت بجي ليل ونهار وحتئ ما انام ولا أشتهي الاكل

حتئ ايدي عبالك نشلت ما اكدر ارفعها من الوجع...

مجتبئ ضل يبجي رحت اله بوجع والم رفعته من سريره وحطيته بحضني ...

دخلت رضيه كالت...شبي يبجي مشمش الحلوو

رديت بذبول...جوعان

جرت نفس...رضعي يمه ما تشوفين صدرج مورم هاي لان ما ترضعينه طلعي الحليب من صدرج لا تخلينه متحجر

طلعت صدري دا ارضعه وهو خطيه جوعان اخذ صدري يرضع بس احسه يكطع بروحي تكطع ...

جنت مخليه شالي بين شفايفي واكتم صرخاتي رغم عيوني تدمع لا ارادي من الألم...

بعدته مني ما اكدر اصبر والله وجع يموت الله لا يشوفه العبد مسلم وجع كافر ...

ضل يبجي رحت خبطت اله ممه ورضعته بس هو رضع مني هوايه وحسيته خمل فجأة...

نام رجعته المكانه بعد ما بسته حييل يحبه جاسر وهو هماتين احسه من يكون عند جاسر يرتاح وما يضل يبجي عكس مرتضئ تماما...مرتضئ يكره جاسر مثلي

اخذت حبايه مسكن مالت اسنان من حلاة روحي صرت شنو اشوف مسكن اشربه ...

اكول الرضيه الوجع موتني دكول من الحليب ما اعتقد حليب اكو شئ بصدري صلب ومتت وجع...

رحت سبحت واجت دا امشط بشعري مقابيل المرايه انتبهت لوجهي ...صاير هيكل موحش موشح بالالم

سواد حالك تحت عيوني فضيع رمشت بعيوني عدة رمشات...

علاقتي بكاسر مثل علاقه الموت بهيكل الإنسان...لا لا بين الانسان الفاقد والدفان محد يحس بالثاني...

لا اني احس بي ولا هو يحس بيه علاقه عقيمه ...الدفان من يدفن الميت كأنه قلبه ميت ما يحس بالباكي الي هم اهل الميت ...هيج علاقتنا اني وجاسر...

تافئفت من صاحت عليه رضيه...جووولي تعالي سوي جاي

ضفرت شعري بسرعه ولبست شالي وطلعت لكيت البيت صايره بي ضجه...

باوعت من الشباك شفت جابر كاعد هو وابو وجاسر وصلاح وخالتي ام فلاح وخالتي ام جابر ويحجون عن خطف جعفر...

رحت سويت جاي وديته الهم اخذه مني صلاح ركز بعيوني استغرب كال...شبييج

نزلت راسي بغبن...ما بيه شئ بس لان منايمه

تافئف بضيق...يابه انتي شايفه روحج صايره هيكل عظمي لا تهتمين لكل شئ يصير وان شاء الله ما يطلع عاصم هو وره خطف جعفر

همست بهدوء...ان شاء الله...

اخذ الجاي وراح واني رحت شفت وقار ونوال كاعدات بالصاله كعدت علئ صفحه وضليت مركزه بالفراغ ...

ما شوف اله نوال هجمت عليه بس لزمتها وقار وهي تصيح ...الله ينتقم من اخوووج حاط كووره وياي لج والله حرام عليه كتل فلاح ويتم بناتي انوب لحكني علئ خطيبي يريد يموته ويساوم عليه

ركزت بوجهها بجمود ومجاوبتها و وقار كوه لازمتها لان هي تريد تهد وخطيه وقار ايدها ممساعدتها

ركزت بنظراتي علئ وقار...عوفيها عوفيها بالله اريد اشوف شنو تسوي مثلا

هي دفعت وقار بقوه كسرتها تكسر

ركضت عليه واني طكيتها ركضه والله ما بيه حيل كتله واديه توجعني من صدري..

اول ما طلعت انضربت بصدره لزمني قووي كال...شبييج

باوعت ورايه نوال رأسا خمدت و وكفت بمكانها بكل ادب ولا جنها قبل شويه تتهدد و تركض ورايه

ابتعدت عنه ومسحت وجهي بتوتر رفعت أصابعي واني ااشر علئ نوال عبالك اشكي لابويه...هاااي نوال تريد تضربني وكل شويه وكالت اخوج السبب وانتي الحيوانه

هز راسه باسئ كلها...بلا رجاءا ما اريد اي وحده تتدخل بخطف جعفر يالله وبلا اكلان تبن كل وحده تروح لشغلها..

نوال بغضب...ترئ اخوها هو الخطف جعفر

وقار...هسه انتي حبيتي جعفر اشو نهار كله مثل الفار والبزون انتي وياه ..

نوال بحقد...اي حقج شهامج انتي اموت واعرف انتي ليش حاقده عليه والله ما اعرف ليش تكرهيني مع العلم ما ضريتج بشئ...

عاط بيهن جاسر...كافي انتن ما تستحن ما تخجلن والله اليطلع الها صوت اله اكص لسانها احنه بيها حال وانتن تتعاركن...

خليت وطلعت لاكتني رضيه اجت علئ صوت نوال باوعتلي بعتب كالت...مو كتلج ضلي بغرفتج ليش تطلعين وتصير مشاكل سويتي جاي ارجعي الغرفتج ...

جاوبتها بزعل...ترئ مو خدامه عندكم وبعدين حرام عليكم والله حصير بيه حاله نفسيه من السجن هذا حسو بيه ...

جاسر حجه من وراي ...وتشوفين حالتنه مال ونسه وضحك وراحه نفسيه كلنه متدمره نفسيتنا بسبب المشاكل الي تصير

باوعتله بحقد وخزرته وهو يتخبل من انظرله بهيج نظره يتخبل تقرب مني بس رضيه حطت ايدها علئ صدره وهي تبعده عني...عوفها يمه مريضه

رد من بين اسنانه...نزلي عيونج لا اعميهن الج اتخبل من هاي النظره مال الصلافه والادبسزيه ..

ضليت مركزه بنظري وما نزلت عيوني وهو يباوعلي بس لانت ملامحه وابتسم بخفاء خلاني. رجفت من تغييره المفاجئ وابتسامته الكاذبه وهذا الي خلاني اكسر نظرتي للاسف وانزل عيوني بخذلان ..

رضيه بتوسل...عوفها يمه والله ليلها ما تنامه من الوجع مريضه محد يحس بيها...

اني تركتهم ورحت عضيت شفايفي بقهر من نظرات الاستعطاف بعيونه وعيون رضيه ما اريد منهم شئ والله ما اريد دا اخذ مسكن ان شاء الله اصير زينه بس ما اريد منيته...

حاولت اشغل نفسي اريد انسه الوجع شويه كعد اباوع للاطفال العب بيهم واضحك ودغدغهم وهم مطنبين علئ ابوهم غثه ههههه

باوعت شفت جابر طلع هو والشيخ عكاب وام جابر

سمعت خالتي تصييح...والله يا جاسر دقيقه متخليها اذا خليتها بالبيت اني اطلع طلكها العرمه هي خابرت اخوها المجرم وخلته يخطف وليدي جعفر...

صاح بيها بغضب..دخلي نفتهم السالفه شنوو وبعدين نحجي...

طلعت بره الوجع يخليني انهزم من شضايا روحي مو بس من غرفتي...

شفتهم واكفين بالحوش وخالتي ونوال ويلطمن يردنه يطردني

اول ما طلعت اتصل موبايله اشر الهن يسكتن وتالي فتح خط كال...الوو ..

احتدت ملامحه واردف بغضب...ادري انت خطفته وتساوم عليه يابه واحنه مستعدين ندفع الي تريده بس غير تنطينه فد مكان...

ضل يراوغ وياهم بالكلام تقريبا نص ساعة وبعدها تكلم باستغراب...انت منو يمك انت مو كلت بس اني وجعفر

اهاا اهااا ديلا يلا خلوو جعفر عندكم وربع ما انطي واذا تردون تقتلوا الله يرحمه وللجير وللجهنم براحتكم ...

تردون تدلونه علئ قبره نزوره ضلت انتم وضميركم تردون ما تدلونه بعد احسن...

قفل الخط والكل متفاجئ من رده

خالتي فتحت عيونها بصدمه...جااااسر ابني جعفر شلون الك كلب وتكلهم اكتلوو

جاسر ببرود...لا تخافين عار ميصير بي شئ

باوعلي وجر نفس خفت حييل من نظراته ومن بروده المفاجئ مع العلم قبل شويه جان ينطح ويزاكط...

تكلم بأمر...حضري نفسج اخذج للدكتوره

خالتي فتحت عيونها بصدمه وغضب ...لااااا جذب انت مو ابني جاااسر انت مو جاسر جذب لا انت مو ابني هاي لحست مخك...

باوعلي بعصبية مصطنعه وتجاهل كلام امه...انتي ،بعدج واكفه روووحي بسرعه بدليييي ...

عاط بيه بصوت عالي واني خليت ورحت اركض وخالتي دكوله...روووح يبني الجبير يالزين ادري بيك ما تكدر تقاوم ام شفايف ورديه وعيون زرك

روح عوووف اخووك بين الحياة والموت واخذ الي مريحتك وقايمه بواجبك لو بيدك تكابلها ليل ونهار بس غزوله واكفه بعينك ولا هامك اخوك ولا ابووك...

اني من يمي فرت من كلامها وهو ولا كأن تحجي وياه..كاعد علئ القنفه ويطكطك بموبايله...

يا بروودك يا اخي ما تنطيني شويه

دخلت للغرفه وخالتي مستمره تحجي ياربي الوجع ما ينطيني مجال حتئ افكر...

اسمعها دكوله بتوسل...يعني اخوووك ما هامك جعفر ما هامك

اسمعه يكولها ببرود...لا ما هامني لان عااار ...

هي ضلت تحجي وتصيح وتبجي استغفرت ربي يالله من كثر الصياح صرت اتلفت بخووف واحس حتئ الحياطين تصرخ

تقريبا نص ساعه وحسيته اقتحم غرفتي وكف بنص الغرفه لابس قميص اسود وبنطلون اسوود

رمشت بذهول من وجوده بغرفتي كال...انتي ليش عنوديه وكبريائج مخالف مشاعرج

مسحت وجهي بتوتر...ما اريد اروح ما اريد عووفني الوحدي ما اريد منك شئ ان شاء الله تزوج وتلتهي بمرتك النعاله هاله وتعوفني بحالي...

جاسر...اهااا هذا الغاثج

رديت بلعثمه...ماكو شئ يغثني بس تجبرني علئ شئ ما اريده...

رفع اكتافه بملل...وشوكت جبرتج واصلا شنو الي اجبرج علي

رديت بقهر...مو تريد تجبرني اروح وياك للدكتوره وهاي مغثه بالنسبة اليه فما اروح

مسح شفايفه بخبث...بس اني عاجبني اغثج لذلك راح اجبرج

ضحكت...متكدر يعني شنو تنزع حزامك وتكتلني بي عادي اكتل ترئ وجع صدري محد يتحمله ومتحمله ضلت علئ ضربك ...

رفع حاجب بغرور...افااا منو كال بهيج طريقه اجبرج ؟

باوعتله بتساؤل ..دا اشوف شنو يريد يسووي...

تقرب مني وبحركه سريعه منه حط ايده جوه رجليه من الساق ورفعني بطني صارت علئ كتفه وضفيرتي وكعت علئ ضهرهه

ضربته بضربات ضعيفه...نزلني نزلي

ضليت ارفس برجليه وضرب بي وهو لا ابالي

حط ايده علئ مقبض الباب كال...تبدلين لو اخذج هييج

همست بسرعه..وابدل ابدل ..

رد..مو تشلعين كلبي احلفي بداعة امج ترحين وياي

دمعت عيني من حلفني بامي بلعت ريكي ودمعي وكعن علئ جتفه همست...بداعة ماما اروح

نزلني من كتفه واني رحت بذبول اخذت صايه وحضرت اغراضي وهو راح للاطفال ضل يبوس بيهم ويلعب وياهم ويعضهم...

حضرت نفسي باوعلي كال...يالله امشي

رديت بتساؤل وتردد...والاطفال...

جر نفس..... وصيت بيهم رضيه ما عليهم شئ

طلعت اني وياه بس اخذت ويايه مرتضئ لان مو مثل مجتبى يكعد هوايه ويبجي خفت يتعبها...

ركبنه بالسياره جنت متوتره ودايره وجهي عنه بس اكو شئ بداخلي حاب يعاتبه ويضربه ويضمه مشاعر مخربطه ومتناقضه داخلي ...اريد اكرهه وفعلا كرهته...

وصلنه للدكتوره دخلنه بسرعه طلع حاجز من الصبح تفاجئت ..

سوتلي فحص عام واشعه وتحاليل...

باوعتلي باسف كالت..ماما انتي وين جنتي شلون متحمله هذا الوجع انتي من شفتي نفسج هيج غير تجين...

باوعتلها بخوف...دكتوره هو مصار كم يوم واخذت علاج بس مفاد وأرضع هوايه بس من أرضع اموت من الوجع...

جرت نفس ..ماما انتي شلاعبه بنفسج شلون ترضعين بدون استشاره ماما حليبج اذا اخذه طفلج حيتمرض اكييد لان حليبج كوله جراحه تعرفين ليش ..

لان انتي قاطعه الرضاعه وصاير عند احتباس بالحليب ومسبب بكتيريا حاده لان انتي ما عندج مناعه لهذا السبب تكون عندك جراحه داخل الحليب...

تدرين صدرج صاير من منتج للحليب لبكتريا تاكل خلايا البشر...

حطيت ايدي علئ صدري بوجع...اي والله احس تاكل بخلايا صدري وجع مميت

جرت نفس وضلت تكتب كالت...ماما تدرين هذي الحاله من واحد ما جاليعالجها تسبب عندج سرطان الثدي ...

ماما لازم هيج حاله تراجعين الدكتوره من رضعتي واستخرجتي الحليب وضلت حالتج هيج لازم تراجعين ...

جاسر جان يباوع للدكتوره كلها..وهسه شنو دكتوره تنطيها علاج تصير زينه لو شلون ورضاعتها تاذي الاطفال

ردت بتفهم...راح اكتب الها دورة ابر ولازم تستخرج كل الحليب من صدرها لان بي خراج ..« جراحه »

وماما لا ترضعين اببد لان تضريهم...

هزيت راسي بقبول وهو راح جابلي العلاج وابر ورجعنه للبيت...

صعدنه بسياره كال..تعرفين تطلعين الحليب من صدرج

درت وجهي بخجل...شلون يخجلني همست..اي اعرف

طبعا هو عايف الدنيا كلها لا يبحوش بصدري لو مدري شيسوي بي سوله كل ما صارت مشكله ومد ايده شكد ما يستحي احسه يستفزني...

وصلنه للبيت بعد ما ضربت ابره هي مسجله 12 ابره واخذت علاج...

حاولت اطلع الحليب بس متت من البجي ياذي حييل مو مجرد حليب لا فعلا حسيته اصفر بي جراحه فعلا...

هو مرات الاصبع يصير بي جراحه يموت من الوجع مو الصدر...

بس انتبهت لمجتبئ كوولش خامل ضليت العب بي وابوسه صار زين

وضليت اشرب بيهم حليب نوفيلاك...

شويه واجه جابر وصلاح وعمي الشيخ ضلوا يسولفون علئ خطف جعفر

وجاسر كلهم بهدوء...جذاب ما مخطوف هاي لعبه منه لان من اتصل بيه الخاطف سمعت جعفر يكله ...كله كله راح نرجعه بس اخذنه السياره والفلوس...

هم تخبلو وانصدموا وحتئ خالتي ورضيه كالن جذب هو مخطوف...

وصلاح كال...اذا صدك والله اموته حلال

شويه وصلاح خابر الخاطف وكله...كل لجعفر عرفناه هو مسوي هاي السالفه وكله اخوتك راح يموتونك وعرفوا انت وين...

قفل الخط وشويه وخابر صديقه كال...خطيه جعفر يعني سكران وميدري بروحه واخذوا سيارته وفلوسه وهو سوه هيج لان خايف منكم

جاسر ضحك كال بغضب...مو كلتلكم عااار مو كلتلكم هي هاي سوالفه والله اله اذبحه اني عرفته من اول يووم الكوا..الساقط الادبسز بس خلي يوكع بيدي...

شويه وهو خابر امه وخالتي ما خلت غلطه بقاموس الغلط ما غلطتها عليه سب وفشار وهو قفل الخط بوجهها وراح...

اني حمدت ربي مو عاصم ولا حازم وره سالفة جعفر لان اكيد حتتازم الامور اكثر

الحمد لله ربي ما خيبت ضني وانتي وكيلي ما عندي غيرك

.......................

ريهام ..

خطيه صلاح خابرني بعد ما عرفوا الحقيقه وره خطف جعفر...

اني حمدت ربي وشكرته لان تزوجت صلاح مو جعفر لان جعفر ممخلي مكسوره ممسويها...

خابرني صلاح اني جنت دا اقره قران وماما حجت وياه من كملت حجيت وياه...

بده يتغزل وما اعرف شنو خجلت منه وغيرت الموضوع كال...ان شاء الله نفس الموعد هذا الاسبوع العرس وراح اوديلج فلوس،غيرهن...

رديت بمرح...لا لتودي والله عندي ذهب وعندي ملابس كومه مو بحاجه خليهم الك اخاف تحتاج اي شئ

رد بلهفه...حبيبتي انتي والله انتي مثل ريشه بنص ايه قرانيه شكد احبج واحب هدوئج وركوزج ربي يخليني واسعدج وما اخلي الهوه يمر بعرضتج

ضحك ...تسلم فدوه الكلبك

ضحك بصوت عالي ...كولي فدوه الكلبك حبيبي ما اسلم اله تكولين هيج

ابتسمت بخجل...يالله حبيبي ...

رد بخيبة امل ...ادري مداينتها يا ريهام دكوليها من كلبج فرحيني ضيفيلها كلمه دخليها بجمله مفيده

ضحكت بحب ..والله استحي عود من نتزوج اشبعك غزل

جر نفس عميق...نشوف عود اريد اغرك مو تنسين

ضليت احجي وياه وهو ابد ما يتمنئ يكطع الخط وبس يتغزل وبعدها قفل الموبايل وراح لان يىدون يجيبون الفلوس وسيارة جعفر...

اني خطيه بابا انطاني فلوس كال من صلاح ينطيج عود انطيني...

رحت اني وماما جبت ملابس وذهب وشغلات دخلتني علئ الملابس الداخليه جنت حيل خجلانه ودايره وجهي ومغلسه وماما تجيب وتخلي

عود تسالني...ريهام هذا حلو

واني اجاوبها بدون شوف...لا محلوو

وهي ممهتمه اليه تاخط ملابس وتخلي ترست النيشان بس ملابس داخلية...

رجعنه للبيت ميتين تعب اول ما وصلنه اذن الضهر عاد اني ما اجلت صلاتي رحت توضيت وصليت ودعيت ربي يسعدني

.......................

جابر ...

جنه واكفين بالفلكه مالت التقاطع اتصل جاسر علئ جعفر بس جعفر ما يرد

كتب جاسر رساله اله...افتح خط لا اندمك بسرعه يالله

رجع اتصل فتح خط جعفر جان صوت الموبايل عالي كال بحزن...هااا جاسر جنت بالحمام ما ادري بالموبايل ..

جاسر بغضب مخلوط بهدوء...تاكل تبن وتنلصم احسن الك بسيطه والله والله وروح غزل وهاي اول مره احلف بيها يا جعفر اذا ما موتك حلال ما اطلع جاسر اضربك طلقه واخلص منك ومن سوالفك التعبانه

جعفر بقهر...يعني شسوي حبيبتي خابرتني ابوها يريد يزوجها واني ضجت عليها طلعت لاكتني نويله وجهه الطاوه تضحكلي واني افتر راسي اخذت الفلوس وشربت

جاسر بجمود وملل...منو جان وياك من رحت تسممت

جعفر...هااا اي هو ابو عليه خمطهن اني اتذكر اخذهن مني وانهزم ومن صحيت ورحتله للبيت نكر انوب هد عليه هو والنسوان وهاي امه جنها كشخيل حتئ شوارب عندها...

جاسر بغضب...دكل تبن لك يالاغم يالسگط...دزلي عنوان بسرعه ودزلي صورة الصديقك يا زمال...

جعفر...جاسر ليش تغلط هسه احجي بدون غلط

فرك وجهه بانزعاج...شلون يريد اجي انقله لعالم الاموات الك عين تحجي لك ساقط ؟ سوالفك لا تعد ولا تحصئ لك مخلينه بنص النار وتالي دكول والله محد خطفني اني سويت هيج...

جعفر...اي غير من صحيت من السكر لا لكيت سيارتي ولا مهر ريهام كلت بس ارجع يذبحني جاسر انوب يعرف بيه سكران والله يموتني اتفقت ويه اصدقائي عود خطفوني

جاسر...يعني ما فكرت بامك باختك برضيه المسكينه وحده منهم علئ يوم يصير بيها سكر لو جلطه من وره سوالف لهل درجه اناني تفكر بس بنفسك...

جعفر بنبرة حزينه...شسوي اذا انتم مجرمين وياي ...وبعدين سالفتكم وياي ما تتسولف مزوجيني وجهه الطاوه اكسباير وراح موديلها وحتئ الايسي عطلان

جاسر بضحكه مستهزئه...ههه لك انت من يوم يومك عااار وطايح حضك هسه بلا لغوه دزلي العنوان والصوره بسرعه ...

قفل الخط وشويه وجعفر دز العنوان ورسل الصوره

اشر لصلاح كال...امشي لهذا العنوان...« ...»

صلاح انطلق بينه وجاسر خابر رضيه اني جنت كاعد يمه ابتعد شويه ودار وجهه علئ الجهه الثانيه همس بصوت ...هلا يومه شلونها جوولي صارت زينه

كمل بهدوء...اهااا اي خلي تاخذ علاجها ولا تتوهم وترضع الاطفال حليبها مو زين...

اني جفلت بمكاني من ذكر اسم جولييت احسها واكفه عائق بينه هو ما اعتقد يحبها ليش ما يطلكها...

اتذكر من خطبها اني وياه جنه صداقه عميقه بينه وكل اسراره عندي وكل اسراري عنده ...

اتذكر لحد الان كال...جابر لو تشوفها ما شاء الله شايله جمال مو طبيعي وصغيره وهادئه بس يا اخي ما احبها احس كلبي ما يحب غير شام ...

كتله...لعد شكو خطبتها هيج تتدمر البنيه اذا انت ما مستعد للزواج

جر نفس وتنهد كال...المشكله القدر خلاها عثره بطريقي اني حميتها من اخوانها وعقدت عليها عقد زواج صارت بعصمتي ومحد اله اي اييد عليها غيري

ضربته علئ كتفه بضحكه...تحبها تحبها لا تخاف وشام انساها بعد اكيد ماتت...

باوعلي بعيون غايره من الحزن...شلون انساها يا جابر هاي زوجتي عندي منها بنيه ما خليت مكان ما دورت بي عليها والله فريت سوريا فر ماكو اختفت فجأة معقوله تكون اسيره عند الدواعش هي اخوها وابوها ماتوا بالقصف بس هي ما الها قبر وهذا الي كاسرني اكثر

بلع ريكه بصعوبه وهو يداري حزنه بعد ما دار وجهه..اوووف يا جابر هذا الي كاسرني اخاف شام عندهم اسيره وما الها احد غيري اخاف يعتدون عليها يضربوها ياذوها ياريت لو بس اعرف مكانها...

رجع دار وجهه عليه وابتسم كال...تدري جابر جنت دائما من اريد ارجع للعراق تلزمني بحنانها المعتاد وتتكلم بلهجتها السورية...تؤبرني جاسر ما بدي ترجع للعراق لانو انفجارات وهييك والوضع ما بيطمن

جنت ادووخ علئ كلامها السوري جنت من كثر ما تخاف عليه حتئ خلتني احذر من هوايه امور لان اني جنت بين سفر للعراق وسوريا ...اثاري طلعت هي المستهدفه مو اني ..

كان هذا اكثر كلام جاسر وحتئ من بعد زواجه من جولييت ضل يذكر شام لحد موت اهله بس الي فاجئني هو ليش حاليا تمسك بيها وهو وعدها بس تولد يطلقها ...

الله يصلح بينهم ما اريد اكون شيطان بنصهم واخربهم..

وصلنه للمكان المطلوب جاسر ضل مركز بالمكان وهو يفكر بخطه جان الوقت ضهر تقريبا الساعه بالثنتين هيج شئ والجو حااار والشمس عاليه...

فتح جام السياره شاف ولد يمشي جايب صمون صاح جاسر عليه...حبيبي بلا زحمه وين بيت ابو عليه

الولد اشر علئ البيت وراح جاسر باوع لصلاح وتكلم بأمر...صلاح انزل دك الباب عليهم كله الواير مالت السحب مالتنه مكطوع وتشابكت الوايرات اذا تعرف الواير مالتك كلي حتئ ما اكطعه...

نزل صلاح شفناه من بعيد دك الباب وضل يحجي ويه الولد تالي اجه وياه واحد مهتلف وسخ كرشه شكبره لابس سروال ابيض وفانيلا بيضه جربه ومهتري لونها ويمشي بثقل وغرور...

جاسر بسرعه نزل من السياره وتكئ عليها جان المسدس بحزام البنطلون واني نزلت وكفت بصفه اخفي ضهور المسدس...

مسح قطرات العرق المتلئلئه علئ جبينه ...صلاح والولد مشوا بكل برود من كدامنه وصلاح عبالك ميعرفنه ...

جاسر صار وره الولد وحط المسدس بخاصرته ذاك فز من مكانه برعب وباوع الجاسر وفتح عيونه بصدمه

جاسر من بين اسنانه وباحتداد ملامحه...اصعد للسياره بلا صوووت والله اذا نطقت بكلمة افجر خاصرتك

صعد الولد بخوف وبامر وطاعه وجاسر أمر صلاح يتحرك للبيت القديم الي اخذ جولييت بي

الولد جان يحلف ويصيح ويغلط وخابص السياره خبص وانتم منو ليش خطفتوني ضربه جاسر بقسوه باخمس المسدس علئ اسفل عنقه خلاه فقد الوعي...

تقريبا ساعه ونص وصلنه للبيت نزلنه من السياره وابو عليه بعده فاقد جاسر راح اشتره بطل من السوبر ماركت بااارد حييل وفتحه شمره عليه فززه من مكانه ضل يرتعش وينكث بنفسه

سحبناه اني وصلاح ودخلناه بالبيت مثل البهيمه وهو يصيح ويغلط ويسب،وساعه يتوسل ويضل يبوس بالادين

كعد علئ الارض وجاسر جان واكف كال...من الاخير لا اتعبك ولا اتعبني انت صديق جعفر وهو سكران جان اخذت منه ست ملايين واخذت سيارته رجعهن ونرجعك لاهلك

وكف بغضب ...منووو جعفر ما اعرفه ولا اعرف هو منو واني اصلا لا طالع ولا ماشي اني رجال حارس بمدرسه واليل كله احرس وين بعد اخذت فلوس جعفر وسيارته

جاسر بهدوء..شسمك انت

رد بتردد وارتجاف ...اسمي زامل

غمزله جاسر...لقبك شنو؟

بلع ريكه..ابو حوراء..

جاسر تقرب منه وحرك المسدس علئ راسه ...لا اني اكول ابو عليه

باوع الجاسر بخوف...منو ابو عليه

جاسر بضحكه...انت

هز راسه بنفي جاسر ابتعد عنه وصوره رسله الجعفر وجعفر اكد هو هذا ابو عليه

جاسر زمجر بغضب بوجهه ابو عليه...تطلع الفلوس .السياره لو اتصرف غير تصرف

ابو عليه بانزعاج...اتصرف وشنو يعني

لزم جاسر مسدسه باحتراف وأطلق رصاصه واثقه تحت رجلين ابو عليه ...

ضل يكمز من مكانه وهو يصيح...دخيلك خوويه صاحب عووويل لا تكتلني

جاسر بجمود...رجع الفلوس والسياره وارجعك لعويلك

صرخ بصوت عالي...اكلك والله والكعبه والزهره ما عندي

رجع رمه طلقتين فوك راسه دنك وركع وهو يرتجف ويصرف...يابوووويه راح يكتلني ...

تقرب منه جاسر ورفعه بقسوه حط المسدس بحلقه ...تحجي لو اترس حلكك رصاص ..

هز راسه بأي وعيونه تتدمع ...

ابتعد عنه ومسح المسدس من لعابه بقميص ابو عليه...

ابو عليه بلع ريكه كال...اءءء عند بحلوووقه اني خليتهن عند بحلوقه

باوعلنه جاسر باستغراب ...منو بحلوقه

رفعنه اكتافنه بمعنئ ما ندري ...

رد ابو عليه...بحلوقه صديقنه اني وجعفر وهو الي علمنه علئ السكر واني مو لوحدي اخذتهن اخذتهن اني وبحلوقه السياره نريد نبيعها والفلوس ضلن بالسياره نتقاسم بيهن سوه ...

جاسر...خابره وكله لكيت شراي لو دكله نراوس بسيارة جعفر ونزيد عليها وناخذ سيارة زينه...

هو صدك خابره تحت تهديد جاسر واني وصلاح لازمينه اله خابر واتفق ويه الولد و وصف اله المكان...

طلعنه بره عود احنه شرايه وابو عليه واكف بصفه...

صاح...صلاح عفيه جيبلنه بطل مي لعبت نفسي من هل خايس حطيت المسدس بحلكه وروحي زهكت خلي اغسله

كمل بقهر...هذا جعيفر مدري منين يجيب هل شكولات ويصادقهم لا خلقه ولا اخلاق مثل عقليته زفت

اول مره اشوف زلم وسخه دسبحوا طاح حضكم استغفر الله واحد تجي الغيبه لا إرادية والله متعجب زلمه وسخ؟

راح صلاح جابلنه مي وحتئ لابو عليه جاب شربنه وجاسر غسل المسدس ورجع النه...

شويه واجه بحلوقه نزل من السياره وهو يباوع ابو عليه باستغراب ...

بسرعه جاسر سحب المسدس و وجهه عليه انصدم هو رجع خطوتين من صدمته

ركضنه اني وصلاح قيدنه مقاومته وسحبناه للبيت ربطاناه وهو يصرخ ويصيح بعدها شلناه وخليناه بالصندوك ...

اخذنه السويج مالت السياره منه وطلعنه الفلوس بالجكمجه ...

ركب صلاح بسيارت جعفر اخذها وراح بيها واني وجاسر ضلينه بسيارة صلاح ...

وصلنه مسافة الطريق نزل الولد المربوط بنص الطريق ورجع نزل ابو عليه وتركهم بطريق صحراوي خالي من الناس وهم يركضون وره السياره ويصيحون بعد ما ابو عليه فتح الحبل من بحلوقه...

والحمد لله كدرنه نرجع السياره والفلوس ...

لزمت ايد جاسر بتوتر همست...ابو غزوله بعدك زعلان مني

رفع حاجبه بغرور بدون ما يباوعلي...ليش شمسوي حتئ ازعل منك

جريت نفس...علئ زوجتك اني والله مجان بقصدي اضم عنك او اهربها اني شفتها طلعت ومن طلعت لحكتها اجيت ارجعها بس ابوي خابر كال اعلنت عليها الحد وهي تخبلت وحتئ تخربطت والله بيومها اخذتها الصبريه وضلت عندها

رد بجمود...سد الموضوع جابر انت غلطان لو تشوفها تموت ترجعها اليه بس انت عجبك الوضع واني شكيت بيك من اول يوم تذكر من كتلك ما اخاف بس من المزنجر بيوم تلمعه الايام

انت المزنجر يا جابر وجنت ملمع نفسك كدامي

اشرت علئ نفسي بتفاجئ...يعني اني مزنجر؟

باوعلي وضحك ورجع باوع للطريق وسكت مجاوبني وهو ينفخ بالدخان حسيته اكبر ملوث للبيئه خنكنه خنك...

اليشوفه يكول متزوج الجكاره ما متزوج ثنين نسوان وقته كل ويه هل الانتقام...

............................

ريهام ...

واجه يوم حنتي وبعدهه عرسي ، مشاعري محتدمة
بين حزن راح افارك اهلي بعد يوم وبين فرح راح ارتبط بأنسان امتلك قلبي وسيطر على مشاعري وراح نصير اني وياه تحت سقف واحد .....

حفلة الحنة جانت بسيطة ، عزمت صديقاتي والاهل وهم اكدت على خالة صبرية تجي وخطية اجت وجانت فرحانتلي هوايه ..

اول مافاتت للبيت تهوس وتصفك
الليلة حنته وباجر يزفونه الليلة حنته وباجر يزفونه ..

امي جانت بس تريد الحجة حتى تبجي
من شافت خالة صبرية حضنتها وظلت تبجي ..

خالة صبرية ظلت تهدأ بيها ..
لج كولي يا الله عيوني شجاج صدك جذذذب هي وين راح تعرس شو خطوتين عنج بس تصعدين فوك السطح تشوفيها

جا مثل حظي من تزوجت ابو اللول وبعيد عنكم وعن اهلي وياريت لو يستاهل والله شحاطة مكطعة على راسه هم مايستاهل بعد مو مرة مثلي لو معرسة على ثور احسلي .

ضحكنه وسلمت عليها ، ظلت تكرص بخدودي
ولج رهيمة تستاهلين كل خير وصلوحي خوش صلوحي والله يسعدكم ان شاءالله ..

حضنتها وبوستها ..

قبلها بيوم امي حضرتلي تلث فساتين للحنة
واحد ماروني ووردي واحمر .. لبستهم بالحنة
شعري سويته يم الصالون وخلولي مكياج يناسب
الفساتين الي راح البسهم .

خالة صبرية على طول الحنة تصفك وتغني هي حيت الحفلة وونستنه ..

والبنات خربانات ضحك ويركصن على اغانيها القديمة وهوساتها ..

.. اجت صديقتي و حنت راحة اديه بالحنة ..

امي تباوعلي من بعيد وعيونها مدمعة .. خالة صبرية
جابتها يمي وكعدت ، ميلت نفسي عليها وبستها من راسها وعيوني دمعت ..

خالة صبرية كالتلها شجاج ام جابر خلي البنية فرحانة بعرسها ..

ماما مسحت دموعها بطرف شالها وكالت
شسوي ياصبرية هاي وحيدتي رهومة ام قلب الطيب ..

ورثت جكارتها خالتي وكالت اي والله حقج رهومة تستاهل حبابة ، خما مثلي بتي راحت ونستني لو جايبتلي نعال مكطع يعلس بي كنوش ويتونس عليه هم احسن منها ولا عبالك عدهه ام .

امي : والله مامصدكة راح افاركها هي مثل ظلي وين مااروح وياي ..

جاوبتها بتهكم : اي هسه يصير ظلها صلوحي وانت بعد تعودي هاي سنة الحياة عيني ام جابر كولي يا الله هسه هم لو مامعرسة هم جان كلتي ظلت على كلبي .

والنعم بالله يختي والله رهومة على كلبي احلى من العسل حتى لو تظل يمي العمر كله ..

سمعت صوت اذان المغرب ، كمت على حيلي كتلهم
اذن اكوم اغسل الحنة واتوضى واصلي ..

اجت صديقتي كالت بعد وكت والله ماشبعنه منج

لا لا الصلاة اهم ..

اجليها اليوم خلي تفوتج شويه ساعة لربي وساعة لگلبي وضحكت ..

لالا شون اريد الله يوفقني ويسعدني لعد واني متناسية صلاتي ..

ظلت تضحك مو ادري بيج ودااختبرج دااشوف العرس حيغيرج لوولا .

لا ايماني قوي ميغيرني شي اني ..

ضحكنا ورحت غسلت الحنة ومسحت المكياج
ونزعت البدلة ورفعت شعري ، رحت توضيت
وصليت وكعدت ادعي الله يسهلي ويسعدني .

اجت خالة صبرية كعدت على السرير حطت رجل على رجل وبيدها
جكارتها ورثتها وظلت تدخن شافتني سلمت وخلصت صلاتي .

كالت انت الليلة عروس والعروس الله يستجاب دعائها
ادعيلي الله ياخذلي حكي من ابو اللول ..

ضحكت كتلها خالة انت بس كولي حسبي الله ونعم الوكيل واذا الج حك يم الله تاخذينه الله مايضيع حك احد .

اخذت نفس من جكارتها وكالت جا قابل اجذب عليج ولج رهيمة ماتدرين بابو اللول شسوا وشفعل بيه ؟

اي خالة ميخالف سلمي بيد الله وعوفي هسه تعالي كوليلي صليتي لو بعدج ؟

بعدني ..

شون تأخرين صلاتج خاله مايجوز

ولج بس هالجكيرة واكوم خيبة شجاج ماتنطين صبر قابل منو راكض ورانه

خاله ميصير انت متعرفين بأي لحظة شنو يصير ؟؟

مايصير شي محد يموت غير بيوومه ..

اي واحنه ماندري شوكت يجي هذا اليوم نصلي صلاتنا بوقتها افضل .

طبت امي ظلت خالتي تشكيني لامي
... خايبة هي بتج العروس تريد تموتني كووة ..

ظليت اضحك عليها وامي ضربت على صدرها
وكالت اسم الله ، سمعت صوت موبايلي يرن
يعلن عن وصول مسج ، تركتهن يحجن ورحت للموبايل شفته مسج من صلاح ابتسمت ونبضي تسارع على اثره زاد من وتيرة ارتجاج قلبي بين اضلاعي

وفتحت المسج كاتبلي بي : شلونه الحب مالتي مامصدك باجر اجيبج يمي .. وتصيرين من صدك مالتي ..

زاد خجلي واتسعت ابتسامتي ..
دزيتله : ليشهد الله اني تمنيتك في كل سجدة ..

بعثلي : والله اني محظوظ بيج والله وشكد دعيت تصيرين الي بكل مقام وبكل امام وبكل صلاة دعيت تكونين من نصيبي والله استجاب دعواتي
وصرتي من نصيبي .

اريد ارد عليه اجو صديقاتي اخذوني نكمل الحفلة ..

تعشينه ونمت على وكت باجر وراي مشوار طويل ..

يوم ثاني كعدت الصبح وامي خطية مانشفت دمعتها

واني احضن بيها وابوس بيها وابجي وياهه ..

تريكت ووبدلت واخذوني للصالون ..

لبست البدلة البيضة والتسريحة جانت حلوة وملكية .

بس احس جسمي كله يرجف .. خجل على فرح ومشاعر غريبة ..

اجه عليه صلاح للصالون وبس يطل بوجهي

واني كلما الي انزل البرنص على وجهي ماريد احد يشوفني بالمكياج لان حرام .

لحد ما وصلنه للتصوير وبغرفة التصوير دخلتنه المصورة كالت تحضروا هسه اجي .

وخر عن وجهي البرنص وظل يباوعلي ..

ابتسمت بوجهه ودنكت ، هو خله اصبعه على حنجي ورفع راسي باتجاهه وكال : اللهم صل على محمد وآل محمد .

رددت وراه الصلاة على النبي وآله ..

واجت المصورة اخذتلنه لقطات ورجعنه لبيتنه وهو راح لبيتهم يجيب اهله ويجي ..

لشوية سمعنه صوت هورنات ومزيقى وطبل
عرفناهم اجوا ، قلبي زادت نبضاته وتوترت حيل .

دخل صلاح ووراه دخلوا اهله كلهم وظلوا يسوون هوسات وهو اجه باس راسي وكعد يمي .

خالة صبرية طلعت مسدسها وظلت تهوس
و تغني رشيت الدرب ريحان عدالي يمر منا ..

والكل على الواهس يهوس ويغني وياهه ..

صاحني ابويه يريد يحجي ويايه ويودعني ..

كمت اني واابدلة شفته واكف بالصالة رحت يمه باسني على راسي وحضني ..

بنيتي ريهام الغالية على گلبي الله يسعدج ان شاءالله ديري بالج على نفسج ولا تظنين انت راح تتزوجين خلص اني راح ابقى سندج لاخر يوم بعمري واي شي تحتاجينه اني حاضر ..

كال اخر كلماته بغصة ، اخترقت قلبي غصته قبل

غصته قبل لتخترق سمعي ، حصنته وظليت ابجي هوايه بجيت
حتى المكياج سال على وجهي ..

وهو هم ظل يبجي ويايه واجت امي الي جانت تبجي قبلنا اصلا وظلينه نبجي احنه التلاثة .

وصلاح يهدأ بيه ويمسح دموعي ..

دخلت علينا خالة صبرية صدك جذب منكم يمعودين شوفوا شسويتوا بيها عروس خطية حتى مكياجها نزل على وجهه .صارت جنها دجاجه طايحه بساگيه

سكتنه شويه وبابا وجه كلامه لصلاح وظل يوصي عليه ..

كاله عمي بدون ماتوصي اصلا شون توصيني على روحي .

ظل ابويه يربت على كتفه : متقصر ابني بس هاي لبة كلبي وروحي من الدنيا هاي الغالية .

بست ايد ابويه وهو باس راسي ودعته ورحت .

صعدنا بالسيارات واخذونا لبيتهم .

اول ماكعدوني اجت نوال عود تريد تدبج كابلت صلاح وظلت تدبج ورافعة طرف ثوبها الماروني اللماع ووجهه خريطة من المكياج جتي صبرية ودفعتها وخري وخري مابيج خير خليني اني ادبج

نوال عاندتها قابل عرس الخلفوج وخري حتى بهاي محايلتني .

دفعتها صبريه مو انت ماتعرفين تدبجين مثلي شوفيني شون ادبج ...

نوال : اووو رجليج بالكبر وتردين

بعدها مامكملة طلعت مسدسها خلت نوال تشرد بروحهه العزيزة .

وهي كملت هوساتها وتدبج ..

وتهوس كلساع هوسة شكل
صلوحي لا تعلك ضوة خدهه والكلوب سوة ..

واحنه ضلينه نضحك باوعلي صلاح همسلي
اي اضحكي والله كطعتي كلبي من بجيتي يم ابوج تمنيت احطج بكلبي واهديج ومن تهدين اطلعج .

هزيت راسي وابتسمت ..

زفونا للغرفة .. جابوا العشه ... صلاح ساعدني انزع البدلة وافتح التسريحة ..بس ابد ما خليته شاف جسمي مرتجفه مدري شبيه

كتله يله من زمان اذن تره امشي توضى خلي نصلي ..

هز راسه ومبتسم ابتسامة يشع منها الحب والسعادة اخذ ايدي باسها وكال صار .

توضينه وصليت المغرب وكعدت اقرا قرأن ..

هو صلى وخلص صلاته وراح تمدد على السرير واني طولت بالصلاة وصلاة ليلة الزفاف وكعدت ادعي لكل شخص وصاني بالدعاء هذي امانة ....

.........................

جولييت

اليوم عرس صلاح ...

قررت اعيش حياتي مثل العالم والناس هم ما سوو حنه بس عرس...

بيوم العرس لبست فستان قصير بس مو كوولش لونه زيتوني وردانه تول خفيف...

وفتحت شعري شسورت حطيت بي فيونكه حلوه

وخليت شويه مكياج بدلت للاطفال ...

مجان العرس ضخم بالعكس بسيط بس النسوان تهوووس...

وجاسر كل شويه وداخل وخازرني واني ما منطيته اي اهميه اشوفه يسترق النظرات اليه واني ابتسمت بخفاء علئ تصرفاته...

أخر شئ لزمني بالمطبخ خفت منه ضل يباوعلي بلهفه كال...عندي موضوع وياج يخص شغله مهمه انتظريني باليل اجيج

هزيت راسي بأي...

ضحكت عليه يربي متخبل كووولش

رجع باوعلي من فوك ليجوه وهو يقيمني رتكزت نظراته عند رجلية ...

ورجع باوعلي كال...كصير فستانج بعد لا تطلعين ضلي جوه لا واحد من الولد يدخل

ضحكت...شنو تغار

ابتسمت بخبث...مو شغلج

بعدها صاحو عليه وخله وطلع...

جان هم جايبين طل ذبحو للعرسان

وخالتي صبريه من اجت جابت وياها ديج شكبره ويخوف وعصبي محد يوصل يمه كالت هذا فده لمجتبئ ومرتضئ

اني اخاف منه رابطي بالدرج

وصبريه كل شويه وكالت...دخلي يا جكليتت الكاسر لا يختصبج الديج

ضحكت عليها...شنو خاله شنو يغتصبني

غمزتلي وكرصتني كالت...قصدي علئ جويسر بس عود ابسمر

متت ضحك عليها...ضلينه ننضف ونغسل بالمواعين وزفوا العرسان...

رحت بدلت جان امه حجت ويه جاسر كلتله.. خطيه يمه ليش هيج جعفر متبهذل خل يرجع

هو رد بغضب...والله ما يرجع حالف ارمي طلقه واموته خلي بعيد احس سوالفه محد مسويهن ومن كثر ما تسدسدن اله تماده وصار طلي...

هي سكتت ما احجت وخالتي صبريه باتت يمنه...

رحت دا أرضع الاطفال رضعت مرتضئ نومته ودا ارضع مجتبئ

ما اشوف اله انفه وحلكه كله حليب متقيئ من انفه وحلكه...

بلعت ريكي بخووف ركضت غسلت اله بس ما صحه ضليت اضرب بخده واسمع تنفسه من ربكتي كووولشي ما فهمت ...

بس جان روحه رايحه وتخطل بيدي منا ومنا

صرخت بصوت عالي واني اركض....جااااسر مجتبئ ماتت...

نهاية البارت يتبع...

كونوا انتم كونوا بخير...احبكم 💔

نور سمو العراق 😘

لا تنسوا التصويت و المشاركه بكم نكتمل...🌹

الفائز بالتعليق طبعا هنه ثنين...👇👇👇👇