المخلص "باللهجة العراقية "

البارت الثامن والعشرون

المخلص..
البارت الثامن والعشرون..
بقلمي رسل..
rasolaa7

انستا  Rasolaa7

عندي بوجودك ثقة
اعرف اذا انخبص
راح استقر يمك..

-جنت احجي وابجي وايدي ترجف شفافي  يبست وصار كبالي كل الي عشته الغرفه الي نوخذ بيها شرفي
الحرك الي بركبتي الشاب الي نق..تل كدامي الطفله
الي اغت..صبوها وبس جثتها طلعت منهم كلها رجعت
عليه وحتى الحلم واني ارجف هي كامت عليه بقلق..

-زمرد اهدي كافي زمرد لا تحجين شيء حبيبتي
كافي انتهت الجلسه كافي بس اهدي تحجي وتذب مي على وجهي ونبرتها مليانه قلق..

-بلعت ريكي .. بعد ما اكدر اكمل سندت راسي على الميز الي كبالي واتنفس بتعب الثكل الي على كلبي جن
جبل ما يتزحزح..

-مسحت دموعي وهديت من حالي وعدلت كعدتي عيني عليها بفراغ موجع.. دكتورة ماكو فايدة جاي اتعب بالزايد وعقلي راح يوكف..

-يعني انتي تشوفين ماكو فايده؟!..

-هزيت راسي بـ اي بدون ما انطق حرف وهي ابتسمت.. بس هالشيء مو انتي تحددينا وخلي اضرب الج مثال حتى تتوضح الج الصورة..

-شالت بطل مي وبدت تصب بالكوب مستمرة الى ان
المي صار يطلع من الكوب وهي مستمرة..

-تشوفين الكوب الي نترس هذا عقلج هيج اشوفه مزدحم بالافكار والمشاهد الي ذكرتي بعض منهم والي ماخذه حيز اكثر بتفكيرج ومخاوفج بحيث تعدى المها
الدماغ ووصل التعب للراس والانحاء الجسم..

-هي تحجي واني صافنه وكانو ادرس وياها شلون جسدت حالتي فعلا الي احس بي وشفته منهم اذيته ما اقتصرت بس على دماغي الي قفل على بشاعة المواقف
وانما اذاني الي متشوشه باصواتهم وراسي الي مصدع
وحتى روحي الموجوعة..

-ووين العلاج اذا انتي تشوفين حالتي بهيج وصف؟!..

-العلاج يحتاج جلسات يحتاج صبر حتى نتخلص من الي مكتوم بداخلج شوي شوي بحيث يبقى بس الجزء الي مخزون بالدماغ ونحاول اكثر لما نتخلص من جزء من العبء الي عليه قبل لا تنهارين وتتفاقم حالتج وبهالحالة راح تحتاجين الى علاج نفسي بالادوية والمهدئات الي حاليا ما افضلها لان احنا بمرحله نحاول نطلع المكتوم مو نتهرب منه..

-زفرت بقهر.. بس المكتوم ياذي وحتى لو حجيت
ما راح تفهميني..

-طبعا ياذي بس اذيه كم ساعه تختلف عن اذيه ايام
وبعدين ما درست كل هالسنوات حتى ما ادرس واحلل المقابل واكيد راح اتفهمج وان شاء الله هالشيء بعدما تفتحين كلبج وتحجين وياي وكانو تحجين ويا نفسج وهسه انتهت الجلسه حجتها ورجعت ضحكت مو تختفين زمرد فكري بكلامي..

-كمت وهي كامت وياي وصلنا للباب التفتت عليها مستغربه من كالت.. تعالجي علمودج انتي واذا هيج ما هامتج روحج فالخاطر الطفل وابوه الي اعتقد يستاهل..

-ما حجيت طلعت منها مصدومه وهي وين تعرفه ويستاهل ادبسزيات عود هن يعالجن تالي عينهن على
الزلم باوعت عليه كام من شافني هسه شكو جبته وياي
من اشرلي بيده ضحكت على روحي ما ينلام يكول ام
السان هسه البنيه شسوت واني حجيت عليها فعلا صايره مخبله اني..

-الصفنة مو الج؟!..

-لعد المن حجيتها وهو ابتسم شايل علاوي ويمشي بس اكلج تكولين سرسري وتطلعين السانج شطوله خليها
سكته..

-رجعنا وقريب ما نوصل لابو اللفات التفت عليه.. تردين لفة لو ما تعجب ام الاثنين ونص بعد..

-لا ما اشتهي..

-عجيب ام بطن اول مره اسمعها منج راد ينزل وما خليته بعدما اصريت عليه ما اشتهي وفعلا بعد البجي الي بجيته بالجلسة معدتي تاذت وما اشتهي شيء بعد..

-ذبنا من الباب وطلع بعدما اتصل عليه فداء بعدني ما صعدت واسمع صوتها جانت تبجي.. ابنج ظالم تزعلين
ترضين ظلم اخويه وامي وهسه يريد يظلم الكل وياريت
لو على وحده تستاهل من تالي وكت اجت من الشارع
وصار الاول والتالي الها..

-رجعت تتمسكن وبنبره اقناع.. يمه انتي ما تعرفين بيهن شنو من مصايب يسون وكم بيت هجمن هذا ابنج لو بعد كم يوم شفتي مخبل ويمشي بلا وعي مو تنصدمين ترى هاي حذرت اني بس انتم عاميتكم ما ادري شمسويه بيكم..

-اعرف وحده تبجي بجي تريد تخلص منهن وكل يوم تلعن بالتنظيم الي جابهن علينا بعدما وحده منهن كوشت على زلمة المرة وعود هاي جانت تساعدها وتوكف وياها وتاخذ رجلها بنص الليل يوديهم مستشفى لو تمرض الها طفل يحتاجون اكل تطبخ للبيتين تالي كومي واخذي رجلها منها وخلت كلبها موجر نار..

-تقربت اكثر وكعدت على الدرج اسمع الهذا الحديث
واجاها الرد من زينب.. شذى انتي حاقده حرام عليج
مو كلهن سوه واذا كم وحده هيج مو معناها الكل خافي الله باجر تتحاسبين ترى زمرد مو مثل الي تحجين عنهن زمرد اختيار اخوج وتعرفين بي شلون نبهه وما تعبر عليه سوالف النسوان كافي عوفي البنيه بحالها الزين والي مو زين الله يحاسبه على افعاله منو انتي وتحكمين عليهن كلهن على نفس التفكير اذا كم وحده هيج هذا مو يعني كلهن..

-انتي لو عندج ظمير جان مره رحتي سمعتي منها الي شافوا هناك اخوج بنفسه حجالي هي حجت لج معاناتهم تكسر الكلب لا تزيدينها عليها اطلعي منها لا احجي لابو تراب وتعرفين ساعتها شيسوي بيج..

-انتي مغسول مخج مثل اخوج وعاميتكم شوفي يمه
هذا الي احجي عليه..

-كمت وكملت خطواتي صعدت البيتي الله ذب عليه برود ما رحت هجمت عليها بس وصلت القناعة الي مثل شذى علاجهم التجاهل لان كافي عليهم تفكيرهم بينا وارهاق دماغهم اما افعلانا ونوايانا الله يعلم بيها..

-كعدت على التخم ورجعت راسي والتفكير نخر مخي
حتى نوم مثل البشر ما انام وتجي وحده حاقده مثل شذى تقلل من المنا وتحجي بشيء بعيد عن تفكيرنا بس كل الي اكوله الله لا يشوفها الي شفنا لان فعلا ما اتمناه لاي
بنت صعب كلش الي عشناه من خوف وغربه وذل
وانتهاك للشرف ما عدا السب القذف وكل الي يخطر وما يخطر على العقل..

-فزيت من افكاري على صوت زينب.. يمعودين موجودين لا..

-فتحت الباب وهي دخلت وجهه فرح على قلق.. اجيت اكلج شيء بس خايفه..

-احجي لا تخوفيني..

-شوفي هو يمكن يعني وما ادري شلون احجي
كامت ورجعت كعدت وترتني صحت.. زينب وتالي وياج غير افهم خوفتيني وياج لا تكولين شذى وياج
ترى متحلفه الها واريد حجه عليها..

-يا شذى انتي زمرد يمكن يعني يربي والله خايفه يمكن حامل حجتها ونزلت دمعتها وتفرك باديها بكل توتر..

-بهتت واني ما مصدكه الي سمعته وكون تعيد مره ومرتين حتى استوعب زينب حامل زينب الي مايسه
تشم ريحه الطفل زينب الي اخوها شايل همها..

-كومي الخاطر الله كومي وشنو الي يمكن كومي حللي
عليج الله كومي كملي فرحتج وفرحي كلب اخوج والله محتاجة هيج فرحة كومي خابري على رجلج خلي ياخذج خرب ببليسج حتى ايدي ترجف حضنتها وهي تبجي واني وياها..

-يارب يا جبار الخواطر اجبر خاطر زينب
يارب دخل الفرحة على كلبها بكد كل كلمه وكفت بيها
ويانا بكد كل موقف طيب منها يارب حاشاك انو تخيب امل شخص يترجى القليل من كرمك ولطفك ابتسمت وبداخلي ادعي لعمه نبع الي قربتني هواي من ربي بكلامها الي لليوم لو وكفت على السجاده اذكرها بالخير..

-طلعت كم خطوه ورجعت.. خاف ماكو وهم اتعب وهم
اصيل يتعب وياي زهكته مني..

-روحي اكيد راح يفرح حجيتها وهي طلعت وتتلفت عليه ادعيلي زمرد..

-كمت توضيت ومديت السجادة اخذت كتاب الادعيه مال المخلص وطلعت دعاء التوسل فرصه الي البيت هدوء خلي اقرا واتوسل لربي باهل البيت عليهم السلام
يفرجون همي وهم زينب..

-قريتها وكلبي يمها ساعه ساعتين واكثر واني دمي نشف توترت كلش واخاف اخابرها واسمع خبر مو حلو
اريد اشيل علاوي ما اكدر من فكري الي تعب وندك الباب بقوه وخبال وهي تصيح.. لج زمرد افتحي الباب
وكع كلبي واني اسمع نبره صوتها الي مليانه بحه مال
بجي..

-خطواتي ثكلن فتحت الباب واشوفها تمسح بدموعها
وحاضنها المخلص الي مبتسم تركته وحضنتني وانهارت ما ادري شنو تحجي وما فهمت غير بس الكلمه الي جنت بامل اسمعها حامل اني زمرد حامل..

-لحظات من الفرح والبهجة ما مصدكين اخوها الي راح جاب حلويات ويوزع رجلها الي دمعته بطرف عينه وهي الي ساعه تضحك ساعه تبجي الى ان تقربت
عليه ورفعت راسها لاخوها..

-بعد روحي دير بالك عليها والله من يوم الي طبت بيتنا لليوم وعلى وجهه شفنا كل الخير هم ترقيت انت وهم الله رزقني هالفرحة..

-هو ابتسم.. ام لسان بعد من تدعي ودج بس تعرفين
شتحجي هاي من جنه هناك محبوسين اشوفها ترفع راسها وتدعي وكلبي يلعب منها هسه تطكنه بدعوه
لجهنم كبل..

-هم يحجون واني فرحانه انو هم يختلفون بحكمهم عن
شذى الي تشوفني خطر على فلوسهم وحياتهم وحتى عمتي الي يقهرني ما تردها تسكت وتستمع الها..

-نترسنا امل وفرح بزينب الي طايره هي ورجلها واخوها الي فرحان بيها وعلاوي يضحك من يشوفنا فرحانين ونصفك فرحة ترست البيت..

-ثاني يوم فرحتنا كملت بجيه عمه نبع الي مخليه علاوي بحضنها ما تذبه وهو مكيف لان ما تمنعه من شيء يمد ايدها على التمن وعلى الاكل ولعب لعب وهي تهوس اله فرحانه وهذا ابني السرسري الصغير بسرعه باعني ولاطش بيها..

-بالليل هي اخذت علاوي يمها واني رحت حضرت جنطه المخلص لان باجر عنده دوام كملت وكعدت يمه وكالعاده هو مكالماته لو شغل وشفرات نص الكلام لو
افشار بحيث تعلمت من يفشرون اطلع بدون ما يطلب مني وياشرلي..

-كعدت بتعب وهو رفع عينه عليه.. شبيج؟!..

-ما بيه..

-اي ام لسان عود هم اطلعي ونضل مثل توم وجيري اركض وراج..

-مو حلفت ما اطلع لا تحجي هيج..

-وجلساتج تكملينهن؟!..

-اي ان شاء الله..

-خوش حتى اوصي عمتي تاخذج لان هالمرة دوامي يطول كلش شهر اكثر الله اعلم بعد بداعة هاللسان اكعدي عاقله لما ارجع لا تخلين فكري يمج واني بنص
الك****..

-وهسه تعالي لحضني وفتح ايده اتقربت وصرت بحضنه بعد الثوب من جافي ورجف جسمي من شفايفه
الي بوست جتفي بوسات متفرقه..

-شسويتي الگلبي وهالگد يحبج..

-مدد وصرت بحضنه عيونه بعيوني اتمنى اخلص من هالخوف والحاله الي اني بيها كلمته دخلت بنص كلبي
ودغدغت كل شرايينه حضنته حيل وخليت راسي على صدره المكان الوحيد الي ارتاح بي والي ما اتقيد ولا احساب حساب الكل شيء واسترسلت بالكلام..

-اني الي شمسويه الربي وهالكد يحبني وخلاك بطريقي
عوض عظيم ما اكلك غير بقربك وبشوفتك زمرد اقوى زمرد ما تخاف من شيء والاهم زمرد مرتاحه وناسيه
كل همومها..

-باس راسي وايده تمشي على شعري وظهري خملت عيوني وبديت اغفي وقبل لا اغمض عيني واستسلم للنوم اخر شيء سمعته من همس بهدوء..

-نامي يا راحة گلبي الملچوم..

-ثاني يوم من الصبح فزيت قبله سويت ريوك وعندي طاقه عجيبه مرتاحه كم كلمه تاثر على البشر واني الظاهر كلامه البارحة طمن كلبي هواي وفرحه كعد ياكل وعمه نبع ويانا اكل كم لكمه وكام كمت ويا وعيوني مدمعه شلون يطول والله روحي تفرفح وراه..

-رجع للغرفة دنك باس علاوي ورفع راسه عليه عينج عليه والباب ابد لا تفتحونه ترى هذا يزحف سريع ولا تخلين شيء بالكاع كل شيء يخلي بحلكه كام اتقرب مني وانتي هم لا تركين جلساتج روحي ويا عمتي راح
تبقى يمكم لما الله يفرجها وارجع..

-شو تعالي ركضت لحضنه ودمعتي نزلت بوست صدره وركبته واني حاضنته وهو كرص ايدي
خفيف.. ام لسان هسه منو سرسري ما بقى بس تغتصب..يني..

-ضحكت وابتعدت عنه وهو سحبني عليه يبوس بيه
رجع باس شفتي رجف جسمي ورجع الخوف اجاهد نفسي ما اريد اكسر كلبه بس ما كدرت هو حس وابتعد..

-طلعت قبله جنت محضره اله اكل وزينب هم مسويتله
كليجة خطيه هناك يبقون ايام بدون اكل ومن يحجيلي حالهم بنص الموت والبرد كلبي يتكطع عليهم شجعان البلد الي ما غمضت عينهم وهم يتصدون للعدو..

-طلع سلم على عمه نبع.. انتي ما ناسيج بس ارجع
ازوجج راجعة شباب من اشتعل ضاوي نوب مسميته
ضاوي تلكينه ضلم اوربا..

-لا عمه الله يوفقه شريد منهم..

-دنك حضنها حقج عليهم يسالون عليج يكعدون بقربج
يفرحونج هذا الي تردينه منهم مو واحدهم صار بكد الثور ودار **** وطلع بس كوا**** ما يفيد بيهم..

-خفه هاللسان زايح المستحى كلش حجتها وهو ضحك.. انتي تحجين الواحد غصب هسه لما شايفه حتى **** شكو مستحي منج..

-ابتعد منها وهي توصي يديرباله وتحصن بي رفعت القران الكريم وهو دخل من جوا وصل للباب والتفت عمه ديري بالج على ام لسان بعد ما اوصيج صحت وراه وكوه كاتمه دموعي..

-لا اله الا الله..

-محمد رسول الله عليا ولي الله هاي سالفتج حتى للجنود وصلت وين ما نطلع واجب واكلهم لا اله الا الله وهم ساطرهم الحمزة ما يعرفون شيردون عبالهم اريد افجر
بنصهم..

-امشي عمه تاخرت محد خلص من لسانك حجتها عمه
نبع وهو نزل يضحك راح سلم على امه الي نظراتي عليها شكد باسته شكد حصنته كلبي نكسر عليها والله ما الومها الضنا غالي لو جان جبير او صغير لما طلع وهي عينها وراه..

علي..

-واكفين بظهر الساتر و ارواحنا بيدنا وهذا الاسبوع الثاني واحنا بنفس المنطقة الجبيرة وزواغير دا..عش ما تخلص بس بفضل الله كدرنا نتقدم هواي عليهم هلكنا تعب ومنكدر نتراجع اتقدمنا تقدم حلو..

-تمشينه مسافه قريبه على الساتر اني وجهاد هذا ولد من كربلاء جف ايده نبتر قبل اشهر واليوم رجع وكف من جديد يحاربهم نظره التوعد الهم الي بعيونه تبين شكد عدنا شجعان ما يهابون شيء ولا حتى الموت بسبيل الدفاع عن الوطن ومقدساته..

-ابتعدنا مسافه وهو يحجي وياي ما ينام الليل ولا ثانيه
شغلته يراقب ويندل كل زواغيرهم اربع قناصين وكعوا بيوم واحد على ايده واذا كال هذا المكان خطر هذا هو
ميه بالميه يشكنا شك يلا نسيطر عليه..

-بس الي قلقني هو كلامه من الصبح والهسه هو نظراته علينا ويوصي بينا انت انتبه انت خليك على هالجهه وعبالك هو اخر يوم ويانا..

-رجعنا للساتر بعدما صب النا جاي بعده ما شرب منه
والتفت عليه.. ابو حسين جنها الليله حاميه ما اوصيك بعد..

-نغثيت عليه مو منه على كلامه.. يمعود اليوم شبيك
كول يالله ماكو شيء..

-ماكو اقل العشر دقايق واشتغل علينا الرمي والقصف
الجنود كلها تاهبت معركه هدت الحيل والقاده ويانا يهتفون ولو صاحوا علي وياكم جن شحنونه طاقه نبيدهم من مكانهم..

-تفرقنا ومن التراب والظلمه ما صار ينشاف شيء
لا ساعه ولا ساعتين واحنا نرمي وهم يرمون شتدت كلش وكلبي نزف دم على شبابنا الي يوكعون وهناك واندليت مكان كلبي من وكع جهاد يشهك النفس فقدت
شمرت السلاح وركضت عليه..

-نزعت الشماغ وخليته على صدره الي مليان دم.. كوم
جهاد كوم وياي بس شد حياك جهاد لا تغمض بروح اعزازك التفت على الولد اسناد بس خلي نطلع بي منا..

-بهت لوني من سمعته يتشاهد كوه يصارع يلا نطقها
من تعبه علي امانه بس هاي حجاها وفقد ضربته على صدره انعش بي اريد ماكو سلمها جهاد بهالليله وعبالك
جان يدري هذا اخر يوم اله حاضنه ودموعي تصب.. وين عفتهم وين تدري محد الهم لك جهاد المن عفتني ويامن اسهر ونمشط المنطقه منو الي يداهر بينا بعد
منو الي يدعيلنا بالشهادة ويشد من عزيمتنا..

-دنكت بست راسه وهاي الجنود القريبها كلها بجت مودع بالله يا صاحبي ملتقانا عند الحسين همست بيها
وكمت هو هذا الي جان متمني من اول التحاق لليوم
وظفر بي ابو نفس الحلوه الشجاع..

-للفجر يلا هدات الاصوات بعدما نزف الدم العراقي
من جديد جان يوم صعب علينا بخسارة هيج شباب والعدد مستمر الى ان نحررها..

-لليل وحسيت الكون ضاك عليه وادور بالوجوه على جهاد هالليله محد طلع يراقب وينك ولك هيج تعوفني تمشيت شوي ورجعت كعدت يم الشباب جانوا يستمعون لواحد منهم هذا صوته حلو كلش ويكعد ينعي لو يقرا ابو ذيات وكل خميس يقرالنا دعاء كميل بس يهيج مواجعنا لان بينا الي مشتاق والي يحب والي باله يم اهله والي تارك اطفاله وجاي حتى يحارب هالوصخين صفنت على صوته والله تدمع لعين عليه بالي راح يم اهلي امي كرار جود نور عيوني اويلي شكد مشتاقلهم هو يقرأ واحنا هدوء كل واحد يفكر بهمه وبالي تاركهم خلفه..

-هو كمل ورجعنا اخذنا اسلحتنا وتقربنا من الساتر اسمع بس صوت الرصاص والجنود هذا الي يهتف ياالله وهذا يصيح ياحسين،ياعلي ،يازهراء، الحلو بالعراق انو وقت ما يمرض عنده زلم من كل اركانه وطوائفه تفزع اله وهذا الي مخلي العراق يمرض ولا يموت..

-اباوع طلع الفجر واحنا مستمرين الله لا يوفقهم جبناء نقتل بيهم منا يطلعون منا لثاني يوم يلا كدرنا نسيطر على الوضع ونبعد الخطر عنا اباوع التعب هلكنا وتراب السواتر ترس وجوهنا والله واحدنا كام ينشاف بس تراب سجدنه شكر لربي الي عداها النا ولو خسرنا شباب هواي من الحشد والجيش جانت ليلة متعبة هواي بس كدرنا بجهود الابطال نصمد ونقاتل لآخر رمق بينا المهم ما يوصلون ولا يتوغلون اكثر بعراقنا اباوع على الشباب اغلبها كعدت بالكاع من التعب وفرحتنا فرحة نصر بتقدمنا رغم كل الي صار..

نورا..

-مشتاقتله هواي راح ندخل بالاسبوع الثالث وهو ماكو كلبي طاك عليه اصعد للغرفة واشم من عطره حتى احسه موجود وياي رغم هو ما مفارك بالي ولا دقيقه..

-رتبت الغرفة ونزلت يم خاله وجانت ليلى يمها الي بطنها راح توصل الخشمها خطيه كوه تمشي من الثكل
وكرار طاير من الفرح كلما رجع من الدوام وصاح هاي شنو لعد شوكت بنيتي تستقبلني..

-كام جود واجه بحضني بوست كل وجهه رفعت كفشته شعره كيرلي واشكر جنه لعابه شيريد حبيبي؟!..

-ريد ايلي فز كلبي من كلمته حضنته.. ان شاء الله باجر
يجي شنو تريد يجيبلك ويا..

-كوكو..

-ضحكت كالب اللغة ايلي علي كوكو ككو وامه يسميها ليل وابوه كار وهم متخبلين على سوالفه..

-كمت سويتله بيضه وكلته وسبحته ورجعته يم امه وانفتح الباب وما نسمع غير فرحة جود ايلي وايلي..

-ركض على علي عجيب شكد يحب عمه حاضنه وما
يقبل ينزل من حضنه لك وخر هو اني صاير خيسه..

-سلم وكبل للحمام سبح وطلع منتهي من النعاس نحجي
ويا وهو عيونه تغمض ويفتحها كام للغرفة واشرلي
اكوم ويا..

-اول ما دخلت حضني وراسه بركبتي يبوس بيه واني
شاده عليه بحضني اشتاقيتلك ليش هيج طولت..

-افيش يا ريحة هلي اشتعل عبيس هسه ردتلي روحي
لا تحجين بالشوك وما تدرين بكليبي شحاله يحجي ويبوس بكل بوجهي مددني وصار فوكاي يبوس بيه ما ابتعد الا وهو مرتوي من شوكه ولهفته لفيت روحي باللحاف وهو ما قبل اكوم حضني وغفى..

-عيني عليه لحيته طالعه ووجه متعوب ويشوخر من
التعب..

-كمت طلعت وعفته نايم وبهذا اليوم للمغرب هو على نفس نومته طكت روحي وهو نايم من شفت جود
ابتسمت بخبث واخذته طبيت للغرفه وخليته على صدر علي وهو يضحك عباله نلعب ويا لان جان علي مغطي وجهه باللحاف وهذا بيديناته الصغيرونه وخر البطانية ويضرب بوجه علي حتى يكعد..

-علي احس ايدين ناعمه تضرب على وجهي عبالي نورا تكعد بيا فتحت عيني واني اشوف هذا الفصعون وخرت ايديه وقربته مني واني ابوس واعض بي يربي هذا الكائن ينوكل اكل وهو يضحك رفعت حاجبي لنورا.. خو انتي ارتاحيتي خبيثه..

-اي والله فديته ساعه اكعد بيك ماكو ما يكعدك غير جود..

-ايلي كوكو.. ايلي كوكو..

-اشتعل ايلي خلي اسبح واخذك اشتريلك كوكو رفع راسه حضري نفسج تروحين ويانا..

-طلعنا افتر بينا شوي واشترالنا وهذا جود منطلق نسى حتى امه وابوه من شاف علي جنت مخليته بحضني
وهو يصفك على الهوسات الي على الجيش والحشد
التفتت علينا علي.. شلون اثنيهم احبهم مال اكل وربي..

-رجعنا مرينا على لارا تطمن على جعفر الي حالته
احسن بس رجله متاذيه لان سواها عمليه بلاتين جانت
متهشمه ولارا شكد فرحت باخوها الي ما ينزل من دوامه اذا ما يمر عليها..

-من رجعنا كعدت يم امي وجود يشوفها الحلويات وهي تحجي وياي على خوالي وهذا يكمز على راسنا..

-كاعدين ونسولف وما نحس الا صوت الرمي رج البيت وحتى الجام تكسر بالخمس دقايق استمر واني مخلي جود بحضني لان خاف من الصوت وكام يبجي  انطيته  الامه واني انبه عليهم ما يطلعون اباوع الخوف بعيونهم انتبهت نورا ماكو صحت عليهن وين نورا
وين مو احجي؟!..

-ليلى وهي تحجي بخوف.. راحت تحضرلك عشه بالمطبخ نورا بالمطبخ..

-احس نكفخت على راسي طلعت ركض واني اسمع امي تحجي عليه شلون اطلع والرمي مستمر والله بعد ما احس بشيء كل فكري يمها  دنكت راسي واني ادعي بداخلي يارب استر يارب لا تفجعني بيها لان ما جان الها صوت بعدني بالممر  وجان تنضرب الجامة مال الصالة وتطشر الكزاز خليت ايدي على وجهي ومااحس غير الدم يتدفق منها تجاهلت الألم وكملت طريقي دخلت للمطبخ وعيوني تدور عليها..

-واشوفها كاعده بصف الطباخ وخايفه ومصدومة وبس الدموع تصب اول ما شافتني ركضت عليه وهي ترمي نفسها بحضني حاوطتها  بين ايديه وجسمها الي صار سعفه وبس صوت شهكاتها الي شكن كلبي ينسمع منها....

يتبع....

لا تنسون التصويت وتعليقاتكم الحلوه على الفقرات حبايبي انتم..

اللهم صل على محمد وال محمد❤️