قمع المشاعر

تكمله البارت الاخير

قمع المشاعر....  تكملة البارت الاخير...
للكاتبة زهراء ( روزايه)...

بشار.. صار فتره من قدمت بلاغ ع ابو غدير
لان جاي من السفر هالعار وتحركت الدعوه من جديد
وطلعوا القاء القبض علي وهسه محتاجين شهادتج
من جان يجيج للمدرسه وهددج..

قبس.. يحجي واني مصدومه!! فدواتك ربي حكمك عادل
بالسره بينت حوبتي واحد ورا واحد وبعده
كلبي مابرد..

بسرعه ركضت بدلت وامير بملابسه
بس اخذتله ممه صعدت بالسياره
كال خلي اودي لامي ونروح..

وصلنه امير وطلعنه للمحكمه جانت الساعه
ب١١ ونص امشي ورا التفت عليه صاح
لاتمشين وراي امشي بصفي..

طبيت للمحكمه شويه انتظرنه وهو يحجي
ويه المحامي وصاحوا اسمنه
دخلت بس اني مرتبكه
واخذوا شهادتي وطلعت..

اشر للمحامي عود نتخابر وطلعنه
اخذلنه غده من الطريق وراح جاب اموري
السياره مايفوتهه للفرع يدري انجن من ذاك الشارع..

وصلنه لبيتنه ونزل الاكل وباس اموري
وطلع فتحت حلكي ردت انطق اسمه
واكله لاتروح تغده ويانه بس ماكدرت احجي..

سد الباب ورا واني عفت الاكل نفسي
مسدوده ورحت صليت ونومت اموري
ونمت مالي نفس بكلشي احس طعم الحياة
فاهي...

كعدت العصر راسي منفوح عيوني
مورمه مدري شجاهن حيلي مهدود
برائتي ظهرت وهو اخذهه الي من هالعار
الدمرني

بس روحي ااااخ ياروحي جاي تطحن
بنفسهه مثل الرحى الفارغه !!

امير بعده نايم واني محتاجته
احس نفسي ضعفت واستسلمت
ع الاخير كلساع تاخذني رجليه
للتليفون اريد اتصل بي وابطل..

افرك بگلبي مأذيني متعوده علي
يحس بيه!! ليش هسه ماحسيت
ليش كلشي تغير ومشاعرنه الجانت
نار هسه صارت تاكل بينه لحدما نصبح
حطام..

صارلي هوايه ماباجيه
صار هواي امثل القوه بس لهنا وخلصت طاقتي
كعدت بالكاع وكمت ابجي ..

ابجي بحرگه كلب وادوره بكل زوايا البيت
شلون اكمل حياتي شلون اعيش واني
بنص هاي النيران ...

يمكن اكثر يوم بجيت بي بعد لقائي
بامير احس كلبي راح يوكف من كدما
شهكت!!

كمت غسلت ورجعت مددت ع التخم نفس
القنفه الي يمدد عليهه لاعندي حيل اكوم
وحته امير مالي خلكه اذا كعد..

ظليت فوك الساعه اني مدده سمعت
الباب اندك عبالي خالتي تجيني
بس دكة السويج علنت هذا هو!!
ورفت كلبي خلاني اركض بدون حجاب
نسيت نفسي..

فتحتله الباب ويمكن مبين على ملامحي
الشوك واللهفه صفن بوجهي عينه
تركزت ع ملامحي  مانزل عينه من عيوني ..

يمكن فوك ال٥ دقايق احنه واحد صافن بالثاني
الكلام الي عجز السانه ينطقه
نطقته عيونه

جان يحاجيني بعينه وهو يكلي مشتاقلج
واني ارد علي برمشه عيوني واكله
شوف شكد متلهفه عليك !!

بلع ريگه وشتت نظره وحجه بصوت
خافت شبيهم عيونج باجيه؟!

قبس.. غمضتهم وميلت راسي بهدوء
ورجعت فتحت كتله لااا بس اشتاقيت لاهلي
وبداخلي اكول انت اهلي!!

بشار.. اني باجر اروح اجيت علمود المحكمه
اريد امير شويه وارجعه !!

قبس.. نايم فوت اكعد بين مااكعده
واغير ملابسه
بشار.. ماشي ع راحتج

قبس.. كعد بالمطبخ مايدخل للصاله ابد
رحت كعدته وبدلتله وسويتله ممه
وانطيته اله

من اخذه مني ايده لامست ايدي
حسيت نفسي تكهربت يمكن حته هوانتبه
على ردة فعلي

اخذه وطلع كال اقفلي الباب هسه تجيج
امي محتاجه شي؟!
قبس.. لا تسلم بس اشتريله خلي ياكل
هستوه كعد
بشار.. ماشي

قبس... طلع وقفلت الباب حسيته
دور امير حجه علمود يجي لان هو الصبح شافه
مبين من عيونه ...

للمغرب اجت خاله وهو بعده ماجاي
اذن الاذان وجنت اصلي وراحت خاله
فتحت الباب اخذت امير واجتني للغرفه كالت
بشار يريدج ..

كملت صلاة وطلعت بلبس الصلاة
لكيته بالمطبخ شايل علاگه زغيره
كال هذا تليفون جديد وبي كل البرامج فعليهه
اريد اشوف امير فعلي فايبر وماسنجر..

قبس.. مااريد عندي تليفون؟!
بشار.. اخذي قبس ومد ايده من تفعلين البرامج
دزيلي رساله وديربالكم ع انفسكم...

طلع وجان جايب عشه صبيت العشه
تعشينه اني وخاله ورحت للغرفه فتحت
الفون جان ايفون نوع جديد وبي كل البرامج

شويه مااعرفله ظليت اتصفح بي هو مسوي
بي حساب بس فعلت الفايبر ع خطي
وسويت فيس لان لغيته من جنت بتركيا..

دزيتله رساله سمايل مغمض عيونه
😔 شويه ورد عليه بعلامه اعجاب

سديت الفون وظليت ويه اموري
لحدما صارت موعد نومته ونمت..
ظليت اباوع ع كلمه نشط هسه يدز شي
هسه يدز كلشي ماكووو!!

وهيج مرت حالتنه بين الاشتياق
والحرمان !!
يدزلي رساله دزيلي صور اموري
وكمت ادزله يوم بيومه بس كلام
ماكو بيناتنه...
....

شجن.. قررت بالليل احجي ويه قبس
محتاجتهه حيل وهي متجاهلتنه كلنه
تسوي العشه ونتعشه وهي ماتنطق حرف واحد

ومن تكمل تكعد ويانه بس ساكته واذا بدينه
نحجي بأي موضوع حتلو عام تكوم ماتسمع

اتذكرهه اول مااجت يمنه من سألتهه ليش
تكومين من نحجي كالت مااريد اكون شاهده
وبيوم تكولون حجينه كدام قبس..

اخذت اموري تنيمه بس وضعهه موتمام
اني عاشرتهه وعرفتهه من تحاول تبين
نفسهه طبيعيه وهذا الشي صار ورا ماراح
بشار العصر..

دكيت الباب ودخلت لكيتهه كاعده
ع الجربايه وامير بحضنهه غافي
وهي صافنه عدلت كعدتهه وابتسمت..

اجت عيني ع قميص بشار بصف مخدتهه
بس عدلت نفسهه سوتلي مكان كدامهه
صار وراهه ..

شجن.. قبس اريد احجي وياج
قبس.. احجي!!
شجن.. قبل لا احجي اكو سؤال ابالي
انتي شكد عانيتي ويانه وجنت اتوقعج من ترجعين
راح تعاتبينه واحد واحد ليش ماعاتبتي وماحجيتي
بالصار ابد...

قبس... لو كان للعتاب نتيجة لما اسرها يوسف في نفسه
،ولو كان في البوح فرج لما نذرت مريم
ان لا تكلم اليوم انسيآ...

اذا عاتبتكم واذا ذميتكم!! واذا تعاركت
وصيحت شنو النتيجه ؟! راح تقدمولي كلمه
اعتذار وهاي ماراح اطيب جرح لذلك اسكت
احسن..

لاتزعلين مني خاف يكون كلامي ثقيل
بس انتو جنتو بحالة صراع منو يجرحني
اول ؟! ومنو يغرس خنجره اعمق من الثاني..

اكتفيت بعداله رب العالمين مااريد
لا اعاتب ولا اسمع خليني
هيج احسن..

شجن.. ولا تحبين تسمعين مني كلمة اعتذار
اني غلطت بيوم الحجيت لاخواتي شلون شكيتي
بيه لان انقهرت من ردة فعلج وعبالج اني من هذا النوع

قبس اني احبج اكثر من اخواتي والله
وحته فرحتي ناقصه لان احسج مو ويايه
الله عليج سامحيني وخلينه نرجع مثل قبل
تدرين بيه ماعندي صديقات بس انتي..

انتي موجنتي تكولين عليه ثوله
وفاهيه والله كلامج صح لو ماثوله ماكدرت
اسراء تسلط عليه واذتج بس والله ياقبس
مااذيتج ابد حته اخواتي من جانن يحجن عليج
مااقبل

ومن ابتعدت عنج مو لسبب بس لان
مقهوره من شكيتي بيه وطلعتيني
حالي حال فرح...

قبس.. موكتلج مايفيد الحجي بهذا كلامج
فتحتي جروح جانت نايمه

اني اداري بجروحي وانيم بيهه
حالهه من حال امير واقل نغزه
تفز وترجع نديه وهيج اني وياهه
انوم واكعد..

شجن.. اسفه حيل بس الله عليج لاتعوفيني
خلي نرجع صديقات ..

قبس.. ابتسمت!! اني ماضايجه منج
وانتي اختي بس اني ابتعدت عن الكل
بعدني قبس بنت عمج الوقت التحاجيني
تلكينه كدامج..

شجن.. لعد اوعديني تجين بعرسي
الخطوبه ماحضرتيهه ..

قبس.. اله هاي كتلج ماافوت ذاك البيت
لاتحاولين مستحيل احط رجلي من جديد
ابيتكم..

شجن.. العرس بالقاعه موبالبيت تعالي للقاعه
فدوه قبس مالج علاقه بالكل الله عليج
تعالي لخاطري..

قبس.. مممم الله يسعدج ويتمم ع خير منا
ليوم زواجج الله كريم اذا كدرت اجي..

شجن.. كملت تجهيز اختاريت الغرفه اني
وغيث واخذني للبيت شفته جانت ماما ويانه
من طلعنه خابرني

غيث.. شجن حبيبتي عندي كلام وياج
اريد اجل الزواج وتسوين عمليه يله
شجن.. ليش انت موكلت ورا الزواج

غيث... لا خليهه قبل شهرين ووتعافين ونتزوج
حته تمارسين حياتج طبيعيه

شجن.. حجزولي باربيل عند طبيب هندي
وجان ويايه غيث وعمر وماما
دخلت للعمليات واني اقره ايات بگلبي
كون تنجح العمليه ..

فتحت عيني واشوفهم واكفين ع راسي
يضحكون مبشرهم الطبيب بعد مااحتاج
عكازات وراح اكدر امشي بمسند ..

بس طلعوا اجه غيث بصفي باسني
من راسي ولازم ايدي مرات احس نفسي
بحلم ومااريد اصحه منه
من كدما سهله وكلشي صار بسرعه
حته عمليتي خلال اسبوع تمت

رجعنه لبغداد وحالتي الصحيه تمام
وائل نهائيا ماشفناه واصلا العلاقه انتهت
بيناتنه واول شرط من اهلي من نتزوج
مااتواصل باهله وهو وافق..

ابدايه ٢٠١٩ اكثر شي اثر علينه
هو طلاق فاديه تنازلت عن كل حقوقهه
بس كسبت حضانه اطفالهه ورجعت النه
هذيج المرحه القويه رجعت مكسوره حته
كعداتهه ويانه قليله..

اليوم اني عروس الي جنت اكول عنه مستحيل
يصير صار اليوم المفروض كلمه مستحيل
انشيلهه من حياتنه لان مانعرف رب العالمين
شمخبي النه من افراح...

الحفله بالقاعه حاسه نفسي
اريد اطير من الفرحه كلساع ماما
دكلي اثگلي ولاتضحكين شبيج ممصدگه..

تفاجأت بوجود سرور عازمتهه خاله
هاي البنيه عدهه قابليه ع التمثيل
موطبيعيه جانت شبه قائده الحفل
ومسويه نفسهه من اهل البيت
وكل الي تسال منو هايه الي مايعرفهه
دكلهم اني دكتوره سرور زوجة بشار..

عيني ع الباب كلساع واكول هسه تجي
قبس هي وعدتني وان شاء الله تجي!!

بعدهه الحفله بنصهه جانت عيني ع عمه بشرى
كامت وكفت وكامت تهلهل وعينهه ع الممر
الجاي من غرفة التبديل..

فرحت حيل بجيتهه بس للاسف ضجت
من الكاعدين كل اثنين كامن يتهامسن
ماادري يثنن ع جمالهه لو يحجن عليهه!!

دخلت لابسه كعب اسود عالي وحجل ذهب
لابسه فستان طويل ماروني من صدره لخصره
كيبور اسود وبي فتحه واصله لنص الفخذ..

اموري بيدهه لابس قاط اسود وفيونكه ماروني
وهي فاتحه شعرهه والضحكه ماليه وجهه

جانت فاديه بصفي كامت تريد تسلم عليهه ولزمتهه
كتلهه تفشلج دفعت ايدي وكالت حتلووو

قبس.. الفستان وصيت علي من النت هو وملابس
اموري وبيومهه بدلت ولبست وحايره اخابر ابو
حسين لو هو يجي ياخذني

بس يظل ع طول يقره فكري ويحس
بيه وبعدني بوسط تفكيري
ودك تليفوني اشوف اسمه نور الشاشه

جاوبته هلو ابو امير
جان صوت يمه عالي وهوسه كال اجيج
تروحين للحفله؟!

قبس.. ااي تعال ماعندي شي؟!
شويه واجه قفلت الابواب وطلعت لابسه
عبايه اسلاميه فوك ملابسي شاف اموري بوسه
وهو يكله شلون طالع حبيبي؟!

نزلني بباب القاعه وكال من تردين ترجعين
اتصلي بيه..
طبيت واني متوتره اكو اشكال مشايفتهه
صار اكثر من سنتين ومن ضمنهم بيت عامر
وهدى وفاديه ..

قويت حالي ودخلت ضحكت ع هلاهل عمه بشرى
شفت بعيني شلون تهامسوا عليه بس مااهتميت
وصلت لشجن بوستهه  وباركتلهه

حسيت ايد تخلت ع كتفي التفتت شفتهه
فاديه عينهه ممليه دموع ومالحكت احاجيهه
بسرعه حضنتني خجلت كدام الناس بس مابادلتهه

رادت تحجي ماخليتهه قابلتهه بأبتسامه
رحت كعدت يم عمه بشرى نفس الموقف اجت
هدى وهم نفس تعاملي ويه فاديه ...

عمه بشرى اخذت تليفوني واخذتلي صوره
ع الصار بعد اخاف كمت احجي كتلهه لاعمه
ماناقصني مشاكل

بس اعرف ادروبهه اني مفعله نت ع الخط
دائما خلتني مثل الخبله اركض وراهه
وهاي شايله تليفوني ودزتله الصوره
وكاتبتله انا لا ارى بشار اين بشار؟!!

بسرعه مسحت الصوره ومسحت المحادثه
من الفايبر خوف ع ارتباك وقلق
اجت عيني ع سرور خابصه نفسهه

تعجبت ع نفسي شكد قاسيه لاضجت
ولا اهتميت الجروح والصدمات تخلي الواحد
قوي..

اشوفهه تفتر وعينهه عليه لابسه
فستان طويل ربع ردن احمر
وطالع الصدر والظهر وشعرهه طويل حلووو

ماانتظرت الحفله تخلص لان هدى وفاديه
ماعافني بحالي كلساع يعتذرن واني مااريد اسمع
وبيبي كملتهه من اجت تبوس بيه واني مااريد
التقي باحد

دكيت علي كتله تعالي كال شويه واجي!!
نص ساعه ودك تليفوني كمت انطيت لشجن الهديه
وسلمت عليهم وطلعت..

بس صعدت بجه امير وكوه سكته يريد يظل
بالحفله ابو البنات ...

وصلنه للبيت بس طول الطريق اشوفه
ممرتاح واكو حجي عنده وماكدر يكوله

اخر شي من نزلنه يله حجه كال
طالعه حلوه حيل!!!

جاوبته واني مدنگه كتله شكرا وبعدهه
سكت ماحجه شي..
طبيت للبيت وهو راح ..

شجن... اول مادخلنه للبيتنه شالني ويفر بيه
ويصيح بصوت عالي مامصدك واكله هسه الناس تسمعنه
فضحتنه...

جان مستعجل حيل كام يطبع بوساته بكل مكان
وايده تفتح بسحاب البدله
عشت وياااه ليله اكثر من الاحلام الجنت انتظرهه..

بعد زواجي مباشرة قررت اكتب قصتي
راسلت روزايه وحجيتلهه مختصر عنهه
كالت قصتج قليله احداث واني مااكتب قصص قصيره

كتلهه احجيلج شويه عن مرت اخويه تصير بنت
عمي حجيتلهه شلون انهزمت من هي وصغيره
وحجيتلهه عن شخصيه بشار

كالت اريدهه اذا تكتب قصتهه اكتبكم سوه
واذا وحدج تعذريني !! حاجيت قبس بلكي تقتنع
ضحكت ع عقلي دكلي هو اني صايره قصه

قررت احجي لروزايه الاحداث الي مرت بيهن
قبس ومن يمهه ترتبهن ومن سمعت كمية الظلم
اول ماحجت عليه وكالت بيا عين جايه تكتبين
قصتكم وانتم كلكم اغلاط..

ظليت اقنع بقبس شهرين ومااقتنعت
جانت دكلي اذا عرف اخوج يسويني
وصلتين وحده شوي ووحده گلي..

خليتهه تحجي ويه روزايه وكدرت تقنعهه
ويوميه تكلي راح ابطل اني مااحب القصص..

كل واحد اخذ نصيبه وائل وامه المرض
هاد حيلهم !!

بسمه وبناتهه عليهم حرام عتبة الباب
واي خطتب يجي عليهم امجد يطرده

ابو غدير بالسجن وميامين سمعتهه
موزينه وتركت العراق وسافرت

اما اسراء خابرت ماما على مرت عمهه
وجانت العداله الالهيه كلهه طلعت باسراء

دكول بس جبناهه منكم متزوجهه ابن عمهه
عنده نسوان اثنين وبليلة العرس طالعه
موباكر ومحد عرف السبب

معذبيهه ودكول محد ماعندي علاقه ويمكن
بشار السوه هيج ماندري
وصايره حامل وماخذ منهه ابنهه ومطلكهه
وهسه عايشه خدامه عند بيت عمهه الثاني
ومحرومه من ابنهه من يوم الولاده...

سرور يم اهلهه وظلت معلكه تعب وياهه بشار
وتعب من اهلهه لاتحضر محكمه ومصره
بس يطلكهه تحجي بسالفه مامتقربلهه

رادهه وياهه بالحسنى اخر شي
وكل محامي وطلكهه غيابي
وشكد صارت مشاكل بس جنه نسمع
حته قدموا شكوى اخوتهه بس بعد طلك غيابي

ورجع بشار وحيد بعد ماجان بزوجتين
صفه ولا وحده

كل واحد اخذ نصيبه من عداله رب العالمين
بس قبس القديمه مارجعت شكد قوت علاقتنه
وردتهه تطلع من حالتهه بس رفضت
كرست عمرهه لابنهه وبس..

اما اني الحمدلله مرتاحه ويه غيث
ماعندي تواصل ويه اهلي بس بعد
لحدالان ماصار عندي حمل رغم المراجعه
وكالت الطبيبه مابيج شي ولاهو بس
رزق رب العالمين..
...

قبس... اني وبشار ارواحنه قريبه
تتعانق كل يوم بس اجسدانه هي
البعيده ...

بعده نفس طبعه يحس بيه قبل
لا اطلب مدللني موفرلي كلشي
والناقصني حضنه

بيوم جابلي ورقه وقعت عليها
سجل البيت باسمي ومن ناقشته كال ضمان
الج مامعلوم شيصير باجر...

اموري صار عمره اربع سنوات
واللسان ماالحك بي ومن يجي ابو
يشكيله يكله ماتخليني اشوف طيور
الجنه وشكو سالفه عوجه يشكيله

حالنه ماكو شي جديد ينذكر
بعدني عايشه ع الحنين واشتاقله
بكل دقيقه وثانيه وهو نفس الشي
بس ماكو باليد حيله..

اترقى لمنصب اكبر حته اكبر من منصبه
السابق ووفرلي حمايه ع البيت حته يطمئن
علينه ...

يجي يوميه يشوفنه شمحتاجين
ومرات يخابرنه ونفتح كاميرا
ونسولف وياه علاقتنه طيبه
وحبنه ظل مدفون باعماقنه...

....
الى هنا اصل الى ختام قصة قمع المشاعر
شاركنه قبس وشجن بكل لحظاتهم ضحكنه وبجينه
وياهم ..

اتمنى استفاديتوا واخذتوا العبره من القصه واخطاء
الابطال اول كلام اوجه للبنات لاتخبون عن اهلكم
شي لاصغير ولاجبير الاهل هم السند لاتغلطون مثل شجن
لاتثقون بأي شخص لا بنت عم ولاخال اله بعد
تجربه لان شفتوا المصايب الي حلت ع راس قبس ..
اما سالفه التليفونات هاي صارت بالفتره الاخيره
سبب دمار العوائل...

ادعوا لقبس براحة البال ويحفظلهه بشار
وامير رغم بعدهه عن بشار بس نتأمل نسمع
اخبار حلوه بيوم ودكول رجعنه ..

راح اودعكم الى ان نلتقي في قصه جديده
اعذروني خاف قصرت وياكم بيوم بسبب او بدون
سبب ... احبكم مووووت💓

الفيديو اهداء لشخصيات القصه