| يا تعبي العشگته | ' باللهجة العراقية '

| البارت الحادي عشر |

#يا تعبي العشگته
#بقلم الراوية
#البارت الحادي عشر

بسم الله الرحمن الرحيم

| صلوا على النبي ⁦♥️⁩ |

.

لين..

فـتحت عيونـي على صوت عالي جاي من الصـالة
گعدت على حيلـي و صارت المراية گـدامي
لو ما عيب الا أصيح بخوف من شفت شكلـي..الكفشه عبالك طاگه بيها عبوة..الحمدلله اليوم جمعـة و ماكو دوام
جريت الماسكه و لميتو و أني اگول بسخط

- هـو اني بكلشي حظي سگط ظلت على هالكفشـه..

ذبيت الغطا و حدرت من التخـت..
اتجهت للمراية و گمت اركز بملامحي.. مبين اثار السـهر..عيوني مورمه و عبالك احد ضاربني بـوكس

جريت حسرة و طلعـت من الغرفة رحت غسلت و فتت للمطبخ
چانت امـي و عماد يتريگون..صبـحت عليهم و گعـدت صبيتلي چاي
و انـي اگول لعـماد

- شبيك تصيح !

حط الگلاص بقوة و گال بعصبية

- من گعدت و امچ فوگ راسي تنگ..
گال سلطان و حچه سلطان..كفرتني جعلو يتـزوج كـح... اني شعليه

رجعت دحگت لأمي الگالت بقهر

- مـو گلت تا تحچي ويا..يمه والله البنية مو راهتملو
امو جتي البارحة تبچي عليه..شگد حاچيه وياه بس ما فاد و گالت خلي عـماد يقنعو

حولت نظري لـ عماد الگال

- و اني شعـليه شحاط بجيبي ؟ معيد و شطولو و عندو عقل محد گالو اركض ورها
بعدين تعالي هين..مو عندو عم ما يحچي ويا

امي رجعت تحچي و اني دحگت عليها
حسيت نفسي چني بـومه كل شوية فاره راسـي

- تعرف عمو هـو وياه مو على صلح من انطى رانـيه لمسعود

ادحگ لـ عماد انگلب وجهو
و گام و هو يدردم

- طلع زقووم هالريوگ.. أني ما عليه بـ أبن خالـتچ
گتلچ الف مـرة لا ادخليني بسوالفـو

حچاها و طلع و أني انـداريت على امـي و گلت

- يمـه شعليچ أنتي و فـوگاها محترگ گلبچ
هو راضي على طـياح حظو

جرت حسرة و حطت ايد على ايد و گـالت

- گبل كم يوم جتي خالتي و حچتلي و چانت خايفة يسويها صدگ..و هسا صدگ خطبها و باچر الخطوبة مالتهم

بـلعت ريگي و صديت عنها لأن احس وجـهي راح يفضحني الدمعـة بطرف عيني

- اگـول لين.. أنتي روان ما حچتلچ ؟

- لا و لا جابت طـاري

مع ما حچيتها فات عماد و هـو ينشف وجهـو بالخاولي

- شعچب الموساد الاسرائيلي ما انطاچ خـبر

- ما ادري

حچيتـها باختصار و هو كمل كلامو..

- سبحان الله هالبنية شگد يگـولون فقيره
بس من اشـوفها انذكر شولا كوهين

عگدت حاجبي و گلت

- و مـنو هاي شولا كوهـين

- جاسوسة اسرائيليه

- و شجابها على روان..شوف أني ادري بيك تضوج من اخـوها..بس هي ترا تختلف عنو

گلب عيونو و گال بملل

- اثنينهم نفس الطينه..و حتى هذيچ الهاجرت وي هالمسعـود و راحت لأوروبا العراق ارتاح منها

دحگت لأمي الهزت رأسها بـ اعتراض على كلام عماد و گال بتأنيب

- شـذكرك بـ رانيه يا عماد.. البنية چانت طول عمرها فقيره و صوتها ما نسمع..درست و تعبت و تزوجت و راحت بحال سبيلها

ضحك عماد باستـهزاء و هو بلبس حذاءو

- ايي قمة البراءه..ما تخلينا ساكتين

كمل كلامـو و طلع و أني تنهـدت و گالت بصوت ناصي

- الله يهـدي

- ليش الله يهـدي ؟ تحسسيني هو يمشي بطريق اعوج
شو كـل صلاواتو بالجامع

دحگتلي بطرف عيـنها و گالت و هي تگف

- گومي واحد يتـورط يحچي
لمي المواعين و اغسلـيهن أني رايحه لبيت خالتي

- اگول شعندچ ؟ ترا الساعة بالـ8 الناس هسا تلگينها نايمه

- لا خالتي گاعده هسـا..

زفرت و گمت الم بالمواعين
هي لبست صايتها و من طلعت صحت

- يمه إذا سألتچ روان عليه گوليلها نايمه
يعني إذا لگيتيها گـاعده

- ليش ضجتي منها لأن ما گالتلچ

ذبيت الگلاص بالسنگ و امي خزرتني حسبالها انـكسر
تحمحمت و رحت يمها و گلت

- بصراحـة اي..يعني اني ما اظم عليها شي ليش هي ما تگلي

- ما ادري يا بنتي اني اتفاهم وياها

- لا لا تحچين و لا تجيبين طاري على اسـاس أني
ما ادري

- خـوش

حچتها و طلعت
و اني گمت الملم بالبيت..و كل شوية اعوف الشغل و اگعد و اصفـن.. والله راح تصير صدگ و يخطبها

جريت حسرة و رجعت خصلة نافره من شعري..
و رجعت اشتغل بفكر مـو صافي..
ذبيت المكناسه و صفنت وين راح عماد صـدگ ؟
اليوم جمعة و ما يفتح المـحل

گلت الا ما اعرف من يرجع.. كملت شغل البيت
و ادري راح احصلي قاط رزالة من امي..بس شسوي هذا الاعرفو
گعدت بالصالة و اخذت التلفون..لگيت اشعار طلب صـداقة من ولد..عگدت حاجبي و فـتت للصفحة مالتو

يمه جا الموبايل يگـع من ايدي..شنو هذا ملاك لـو شنو ؟
ناشر چثير صور و أني اگلب و اگول يمه اجعله في عيني بـقره

تنهدت و أني احذف الطـلب..اعرف دفرت نعمة الله بس غير لو يشوفو عماد وي الاصدقاء الا يعلگني بالبنكه

ايدي تلقائياً راحت لـ صفحة سلطان
اخر صوره صايره عليها التعليقات دگ..عبالك راح يتزوج المؤمنه الطاهـره..هي كـلها خلگ لمار

تنهدت و أني اگول بقهر عبالك گاعد احچي ويا وجـه بوجه

- يعني ما لگيت غير لمار..والله لو ماخذ غير وحده الا افرح على الاقل تطلع احسن مني..بس شبيك يحظي طايرلي ورا لمار بـعربانه مطرگعه

ذبيت حسرة و مددت و أني ارفع رجليه على تچوت القنـفة و بصوت ناصي گلت و دمـعة تلالي بعيني

- والله لو تـعرف شگد احبك فلا تسوي هيچ وياي..
بس انت ما تشوف غير لمار خاتـون
بس هو مو صوچك والله..صوچي اني الما حبيت الا انت..عفت شـباب المنطقه الصاگين و حبيتك انت الچنك مجمدة عشتار شگد ما بارد

سمعت صوت الباب الخارجي ينفتـح..گبل تعـدلت
بگعدتي
دحگت من الشباك شفتو عماد جاي و هو شـايل علاليگ

فات للصالة و گال و هو يمدهن عليه

- هـاج

رفعت تك حاجب و گلت

- شـنو هذا ؟

- باچه

- لا بـربك ؟

حچيتها و هو ضحك و فتح الكيس و اني گبل رجعت ليورا و صحت

- عميد بروح ابوك وخرها من هين.. اشتم ريحتها تگعد الميت

- لا تسوين نفسچ النازكه..گومي حظري الغراض و سـويها

- والله مو قصة نزاكه بس تدري بيه ما احبها
بعدين تجي امي و تسويها اني ما عليه

حچيتها لأن صدگ ما احب الباچه..مو شغله تقزز لو لعبان نفس أني نفسي ما تتقبلها ..اي اشرب المرگه مالتها بس كون ماكو اي قطعة منها بالصحن.. لأن اذا شفت هالشي نفسي گبل تلعب

- تعاي اخذيها و وديها للمطبخ

- ليش ما فتت من باب المطبخ الا من هين !

دحگ عليه و ابتسم باستفزاز

- لأن خباثه

خزرتو و أني اگول بگلبي
والله عاد انت مشهودتلك

- تعاي اخذيها

- عفية وديها للمطبخ الله يخليك

حچيتها و اني اتصنع البراءه..و هو زفر و گال

- أمري لله

اخذها للمطبخ و لحگتو و هو يسأل عن امي

فرغها بصينية..و أني گلت و حواجبي معگوده

- شو هاي بيضه حيل.. شمسوليها

ضحك و هو يگول

- ضربها مزيل و خيط

- لا والله

- والله..عود لو تشوفين شكلو للگصاب حاط الخيط بين سنونو و يحف بيها

ضحكت و أني اتخيل شكلو
تقدمت اركز بيها و گلت

- والله يمكن هو ياخذ خيط لمرتو

رجعت دحگت لـ عماد الصافن بيها و گلت

- شبيك صافن ؟

- انتي ما تعرفين تسوينها

- خليني اسوي تمن تا اطبخ باچه

- يعني ابد ابد ؟

- ابد ابد

مسح على حنچو و گال بتفكير

- امچ لگت خالتها و اشتغل مگصهن..ليش ما نسويها اني وياچ.. لأن الوكت تأخر الساعة بالـ8

رفعتو تك حاجب و گلت

- اگول انت ما تعرف اطگ بيضه و أني افشل مني بالطبخ ماكو..شلون تريدنا نسويها ؟

- نتعلم شورانا

حچاها و گام على حيلو و كمل

- ترا ما يرادلها شي..نفس مرگة الدجاج بالضبط

- متأكد ؟

- مية بالمية..يلا نجرب و منها تنسين

حچه اخر كلمتو و صـد على السنگ غسل ايدو
و أني صنمت بمكاني..شنو انسى ؟

- عماد شنسى

اندار عليه و گـال بنبرة هادئه

- تعرفين شقصـد

نزلت رأسي و غمضت عيوني قوي..شهل الفشلة يربي !

- يلا لين

حچاها و انطاني مجال اغسل..بس ما دحگت بوجهو
لأن والله استحيت فرد نوب..يعني اني هلگد مفضـوحه مشاعري

غسلت أيديه و طلع عماد الـوصفة و گمنا نسوي
و انطاني مهمه تقطيع البصل
و أني كل شوية ادحگ للباب اگول يا رب تجي امي و تنقذ الوضع..

انعمت عيوني من البصل..و گمت ابچي و عماد يدحگلي..بس صدگ ما چنت ابچي من ورا البصل بگد ما بچيت من قهري.. اتذكر صورتو و كلامو عن الخطوبة و ازيد بالبچي

اخر شي گال عماد

- رجاءا ما اريد مـلوحة دمـوعچ بالبصل

رحت غسلت و أني اگول كافي لين..هو عمرو ما راح يلتفت عليچ بطلي بچي على شخص اهانچ و سمى حبچ الو مراهقه..

و هين چانت اصعب مهمه شلون نقطع الراس
كل ما يضربو بالساطوره يگمز الراس و يتزحلگ على السيراميك
اخر شي طب جو الكاونتر..و نرجع نغسلو و نحاول محاولات مستميته انو نسويه بس كلشي يفشل..

اخر شي گال انتي اكمشي الراس و أني اضربو بالساطوره..و صدگ كمشتو و صديت لأن خفت يطفر شي بعيني..
بس هين چانت المصيبة.. ضليت اضغط عليه و ايدي زلحت على العين و طب اصبعي بيها و حسيت بلزوجه مقرفه على ايديه..و عماد صاح بعصبية

- الله يقرفچ شسويتي

حچاها و هو يگوم على حيلو و يصيح نعل يومج
اني دحگت عليها و صحت لأن العين باصبعي نابته
گمت و أني اسب و اگول كلو من وراك انت الجبت الصماخ..

و الحمدلله امي جتي و تلاحگت الوضع..و سوت باچه و جتي بوكتها طيبة تغدت يمنا هي و ضرغام
و أني سويتلي طماطه حمس

.

طيبة..

گعدت الصبح من النوم و دحگت لـ ضرغام
الگاعد يبدل

- وين تريد ؟

- عندي طلعة مستعجلة..

- للشغل ؟

- اي

- عجل توديني لأهلي ؟ اليوم خطوبة سلطان

تنهد و گعد يمي و گال

- گتلچ ما تروحين لبيت اهلها للعروس

- ضرغام ترا الخطوبة بيت سلطان

رفع تك حاجب و گال

- ليش ؟

فركت رگبتي من ورا لأن توجعني بسبب نومة المخده المو مريحه و گلت

- العروس ما عدهم مكان

- زين اني مستعجل خلي بهاء يوصلچ

- على السريع ابدل
و هناك اتريگ

مسح على حاجبو و گال

- خوما تباتين ؟

ابتسمت و تقربت عليه و بستو من خدو و گلت

- أكيد لا..بالليل اجي

- شعجب

استحيت و أني اريد اگلو..ما اعرف انام الا بحظنك
فـ سكتت و هو فهم قصدي بدون ما انطق حرف
ابتسم و گال و هو يمسح على حنچي

- حتى أني.. عجل يلا على السريع بدلي تا نطلع

و على السريع گمت..فتت للحمام و بدلت
و حظرتلي هدوم..دحگتلي المكياج مالتي و شلتو

دحگت لـ ضرغام الگال

- شتسوين بالمكياج ؟ ما عندچ هناك

- لا..لين ما عدها

حدر هو و اني وراه..سلمت على عمتي و عمي
و طـلعنا
بالطريق ظل يوصي بيه..لا تخلين احد يصور و ديري بالچ على نفسچ
و اذا احد فك حلگو وياچ انتي تعرفين شلون تتصرفين

يحچي و هو يسوق و مركز بالطريق و الكلام و اني صافـنه عليه..
شگد حبيت خوفو و حرصو عليه..

وگف گدام بيتنا و نزل الغراض و على السريع سلم على امي و طلع..
چنت مبتسمه و أني افوت جوه امي وگفتني يم الباب مال الصالة و گالت

- مرتاحه ويا ؟ خوما يحچي عليچ

- لا ماما..ضـرغام ماكو أحسن منو

انشرح وجه امي براحه و گالت

- الله يحفظكم بنتي

چنت شايله هم لين..اگـول أكيد هسا تعبانه و ضايـجه و مقهوره
صعبة والله هيچ تشوف التحبو يأخذ غيرها.. ما اگول بس أن شاء الله يطلع من گلبها و تحصل الي يستاهلها و تستاهلو..

تفاجئت من لگيتها بالصالة حاطه رجل على رجل و ادحگ للتلفزيون
سلمت عليه و دحگت للعلاليگ و گالت

- جبتي المكياج مـو ؟

- اي جبتو

ابتسمت و گالت وي تتصنع الفـرحه لدرجه حسيتها حقيقية

- والله يا طيبة متحـمسه شفتي الفستان الجابتو امي مو ؟ راح البسو

- هو حلو بس مو شوية گصير

صدت على التلفزيون و گـالت

- خلي نستعرض بلكي وحده تنعجب بيه و تخطبني لابنها..مليت من حياة العزوبية

حچتها و الحمدلله امي ما چانت موجوده چان كفختها بالچفچير على راسها
جيت اسألها عن شعورها اليوم بس سكتت من وجهة تلفونها عليه و گالت

- شنو رايچ بالمكياج يرهملي

اخذت التلفون و گلت

- اي احمر و اسود يرهم لوجهچ..و يرهم للفستان

تعدلت بگعدتها و گالت

- و راح البس كعب اسود عالي..شوية ينطيني طول
ما اريد اضيع بين الرجلين

ابتسمت و أني ارجعلها الموبايل انتچيت على القنفة و گلت بهمس

- لـين.. زعلانـه

تنهدت و صدت عليه و گالت

- إذا ازعل لو ابچي..انطح راسي بالحايط راح يـصير شي ؟
لا فـ ليش اضوج نفسي

- ما ضجتي من عـرفتي

- و بچـيت..و انهاريت بس غيرت شي ؟ لا فـ اسكت أحسن
بالعكس اروح للخطوبة و ارگص و اهوس و شيريد يفكر يفكر

ظليت ساكته مقهوره عليه
لين دائماً اذا رادت شي ما تحـصلو

العصر الخطوبة..فـ من ورا الظهر بدينا
نتحظر حچتلي عن روان و شلون ما حچتلها..و البارحة بالليل مخابرتها و مـا راده علـيها..

جا عماد من الشغل..و طلعت سلمت عليه
و كملت تحظير لين..انبهرت شلون صارت حلـوه و شكلها كيوت
فستان احمر و كعب اسود..و شعرها رفعتو ليفوگ تركتو مثل ما هو..لبست اكسسورات ناعمه بيدها
و هي بيضه..و گالت اذب صاية فوگ الفستان بالشارع..

ما طلعت من الغرفة...گالت اسوي لعماد و امي مفاجئة
أني ما لبست قصير لأن ضرغام ما يقبل..لبست فستان سوارية و تركت شعري مفتوح و حطيت مكياج مثل لون الفستان التركوازي

من تا نطلع لأن بدت الحفلة امي طلعت من غرفتها لابسه هاشمي بالون ازرق غامق..دحگتلنا و گالت و عيونها تلمع

- ما شاء الله..عيني باردة عليچن

جتي عليه  و گامت تقرأ المعوذات و لين ادردم

- تحسسني انگط جمال و نزاكه

و وراها رفعت صوتها و هي تگول

- يمه والله محد يحسدنا..شيحسودنا على كفشتي

- أنتي ما تشوفين نفسچ حلوه..بس بعيني ملكة جمال

رمشت بعيونها و هي مسويه نفسها متأثره

- انني على وشك البكاء

سكتت من فات عماد و رفع تك حاجب و هو يهز بيدو و يگول يشبه عصبية

- هلو هلو..لين شنو مفتحين ديسكو قريب منا و اني ما ادري

امي جتي تحچي قبل لين.. لأن تعرفها راح تجفص بالموضوع..بس لين گـبل گالت

- والله ما ادري..دشوفلنا يجوز مفتح
عاد نرفه عن نفسنا

عض على شفتو وتقرب عليها و گال بعصبية

- شهل البس هاا..لو ما لابسه احسن !

- عماد لا تهول الموضوع..محد راح يفوت بس سلطان و هي راح تذب على راسها شال و الصاية تلبسها

حچتها امي و هو خزرها لين الساكته و الما بدت اي ردة فعل من گال

- امـشي انزعي لبس الراقصات لا اكشمو عليچ

غمضت لين عيونها و زفرت و هي تسحب ايدها و تگـول بملل

- اهوو عماد دعـوف سالفة التكشم
بعدين ترا اختك الجابتو مو انـي

- يعني بربچ ريهام تجيبين هيچ لبنتچ ؟
رايحه تستعرض  بين النسوان بهالكشمه..ما يگولون هالبيت الطلعت منو بهالبس ما بي زلمه

- هسا انت شبيك يا عمـيد ؟
و بعدين يريدن يحچن خلي يحچن اني رايحه اتونس اغير جو لا  تعكر عليه مزاجـي

خزرها و جا يتقدم تا يحچي بس امي اخذتو على صفحه و گعدت تقنع بيه..دحگتلي لين و گالت

- خـطية ما اكلتي رزالة

ظلت امي تقنع بخالي..و وين يلا سكت
الا شافها لبست الصاية و الحجاب
طلعنا و توي الخطوبة بدت.. الجوارين اغلبها مستغربة ليش الخطوبة بيت العريس
و گالت امها للعروس الابسه فستان طويل بالون رمادي

ما راهم لا الها و لا لعمرها.. لأن عدها ارداف و كرش چبير و لازگ عليها..و أكيد شافتها لين و نزلت دگ تصنيف. .و خـطية من تمشي تتمايل
و لين تگول مشية البطريق..تحسينها راح تنبزخ بالگاع

أما لمار فـ صدگ طالعه حلوه..لابسه بدلة لونها زهري خفيف الي يشوفها من بعيد مايل للبياض و مكياج فول وتسريحه عاليه
جتي لين يمي و گالت بصوت ناصي

- بربچ ما طالعه چنها بريعصي !
والله لون البريعصي المتيه دربو

ضحكت و هي ببرود رجعت گالت و عـينها عليها

- اكو احد يختار هالون ؟

- لين عيب

- لا مو عيب..الحچي على هالنماذج مو حرام و لا عيب

دحگتلها بطرف عيني و هي نزعت الكعب و گالت

- ديـري بالچ عليه..ترا اشتريتو بـ 10 الاف إذا يضيع يعني اطگ و اموت من القهر عليه

دفعتو برجلي جوه الكرسي مالها..و هي تقدمت للوسط
و گامـت ترگص أني ردت ارگص بس استحيت مو مثلها عادي الوضع
نظراتها چانت على لمار الي هي الآخر ادحگلها بشماته هي و اخـتها هديل

بس عفية عليها لين ما دارت بال..
و من فات سلطان تا يلبسها الحلقات المحجبات لبسن حجاباتهن
إلا ليـن خزرتها و هي دحگت عليه و رفعت اكتافها
بلا.. أتجهت عليها و گلت

- البسي حجابج..عيب منو

ابتسمت و هي ترجع شعرها التناثر ليورا

- يمعوده ما يشوف غيـرها..
عوفيني

ما حبيت تصرفها حاولت وياها وهي ما قبلت..
لبسها الذهب و هي الضحكه شاگه حلگها..
و امها تهوس و تهلهل.. اكثر من خالتي ام سلطان..

گاموا يباركون الهم.. أني گلت بعدين امي سلمت عليه و ما شفـت إلا لين توجهت عليهم هي و لبسها
والله لو يشوفها عماد الا يذبـحها عكس اتجاه القبله

سلمت عليهم و نظرات سلطان مستغربة.. مدري من منظرها مدري من تبريكاتها المبالغ بيها
و كمشت لمار تبوس.. حسيتها شالت حتى كريم الاساس من وجهها..

آخر شي صدت و طگت هلهلول..الي يشوفها يگول هي اخت العريس مو روان
الي هادئه و ما مبين عليها الفرح..ادحگ لسلطان اعيونو صارت بگصتو
أكيد ما حب تصرفاتها..

و هو بقى شوية و رجعت لين ترگص وي كم بنية..
جريت حسرة و أني ادحگ عليها..اعرف كل هذا الگاعد تسوي من قهرها..ما تريد تبين لأحد هي متأذيه بس ما تعرف انو بهاي تصرفاتها فضحت نفسها خصوصاً گدام سلطان..

ورا اتجهت هي للدي جي و ربطتو على تلـفونها و گامت تتحكم هي بالاغاني تحت اعتراض هـديل
فجاة صارت عيـطه
و نشوف لين كامشه هديل من شعرها و هي تصيح لا تتدخلـين..

امس اتجهت لـين و گالتلها كافي روحي
حاولت وياها انو تبقة بس لين رفضت..يمكن هديل حچت وياها شي غثها..طلعت و النـسواين تتهامس
هي طلعت و سلطان اسـتأذن لأن امو گالت كافي روح

.

لين..

طلعت من البيت و أني اسمع صوت روان تصيحلي رغم صوت الموسيقى العالي

مع ما طلعت و صرت بالحوش نزلت دموعي الي چنت كاتمتهن طول الوكت طببت شعري جوه شالي و اني احس گلبي يريد يطلع من مكانو..

احس بغصة خانگتني ما ادري شلون دست على اعصابي و ظليت ساكته و ما حچيت و لا صحت و اني اگول..هو مو الها..هو ليه
احس رجليه ترجف و أني اباوع للكعب الي لابسته..احسو يهتز جوايه
شعور صعب..حيل صعب و اني اشوفو يلبسها الحلقة و يبوسها من رأسها..و الضحكه مرسومه على وجهو
و هي ادحگ علينا..و كانها تگول
اخذتو و غصباً عنكم

توجهت لباب الحوش اريد افتحو تا اطلع راجعه لبيتنا
بس تيبست بمكاني من حسيت بيد تكمش زندي
صديت بسرعة و صرت وجه بوجه وياه
فتح حلگو تا يحچي و كالعادة يذب سمومو
بس سكت و حواجبو عگدهن من شاف وجهي و دموعي الي استقرت على خدي

بلعت ريگي و نصيت راسي و أني اگول بنبرة ترجف

- عوفني اريد اروح

- ما اعوفچ إذا ما حچيتي شنو معنى تصرفچ الجوه ؟

ضحكت من بين دموعي و رفعت رأسي عليه
و اني اسحب ايدي من ايدو
حسيت نفسي رجعت نفس قبل و أني اگول بضحكه

- شبيك سلطان غير ارگص بخطوبتك

رفع حاجبو
و أني حكيت طرف حنچي و گلت بابتسامة مستهزه

- ارجع سلطان جوه لأن وگفتك وياي تجيب الشبهه
و تطلع العروسه زعلانه..خطية يصير وضعها يقهر

دحگ بطرف عينو لباب الكيلديور و شاف روان واگفه يمكن تمنع احد يطلع لو گاعد تلهي بأحد

تقرب خطوة ناحيتي و هو يصر على سنونو و يگول

- كل ما اگول يا سلطان على كيفك وياها اتندم وراها
لأن تستاهلين الجاي يصيرلچ..و حل بيچ حسبالچ انقهر عليچ ؟
هه لا والله بالعكس اضحك عليچ و على عقلچ الصغير

سكتت و هزبت راسي بـ اي
و انداريت على روان و أني اگول بصوت شبه عالي

- روان خالوو عماد يصيحلي ما اگدر اظل

حچيتها و أني اندار على سلطان الي ما أنكر انو كلامو كسر شي بداخلي
بس مثل كل مرة اضحك و اني اجاوبو

- هاا صدگ ما عزلت لـ عماد كيكة من هالكيكة الطيبه
عود خلي روان ادزها بيد طيبة..لأن تعرف هو يحب الكيك

ابتسم باستهزاء و هو يرجع خطوة ليورا و يگول

- احرگي گلبچ اكثر..احرگيه

و فات جوه و أني ظليت ادحگ لخيالو الا ان دخل
رجعت دحگت لـ روان الي تقدمت خطوات و گالت من صارت يمي

- لين..ترا اني ما عليه

ابتسمت و گلت بسخرية

- ادري انتي ما عليچ.. بس سوايتچ ما حبيتها
ظامه عليه الخبر عبالچ اخرب عليه

بلعت ريگها و هي تريد تجمع كم كلمة گبل لا تگول

- هو..هو گال لا تنطون خبر
صدگيني علمودچ حتى ما تنقهرين لو تسوين شي

هزيت رأسي بـ اي و اني ادحگ عليها گبل لا اتقرب عليه و اگول بصوت ناصي

- گولي لـ سلطان..مو اني الي راح اخرب هالزيجه المحترمه من بنت الحچي الزاهد الفاضل
گوليلو انت الي راح تخربها و يجي هاليوم الي راح يگول بي ايي والله لين..صدگتي بكلامچ

ختمت كلامي و طلعت..و أني اعدل بحجابي على رأسي
طلعت من بيتهم و شفت الشارع بي چم شخص بس ما درت بال
طبيت لبيتنا و بالحوش لگيت خالي عماد گاعد يدخن نرگيلة
جيت افوت جوه بس وگفني من گال و هو ما يدحگ بوجهي

- هاا برد گلبچ ؟ لو بعدو محروگ

ابتسمت و گلت باستهزاء

- لا تخاف عماد..مو أني الي ابچي على زلمه

اندار عليه و گال و هو يذب القمچي

- تعرفين صوجچ..ليش ما حچيتي الصار
چان اليوم مو خطوبتو.. أصلاً چان طلع من حياتو شي اسمو لمار

هزيت رأسي بـ لا و گلت بهدوء

- خلي شگد حذروا و ما سمع..الاخ طامس بحبها
يجي اليوم الي يعض اصابيعو ندم من وراها..

حچيتها و فـتت جوه..
سبحت و طلعت من الحـمام..و گبل اندحست بـفراشي..
دحگت للسگف و أني اعيد تصرفاتي هـناك
اعرف ما يصير بس شأسوي ما گدرت اتحـمل..

و تا اهرب من هالواقع.. أنو خـلاص صارت مـرتو لفيت رأسي و نمت

گعدت على صوت طيبة تگعد بيه..ضيقت عيوني من گالت و هي تمسح على شعري

- لين..گومي تا تعشين

- مو جوعانه

- ليونه عمري اعرف ضايـجه..بس خـوما تضلين هيچ
خـالو جاب لفات برگر التحبينهن

من گالت هيچ والله نسيت كل قهري..
لأن أني انسانه ما اگدر اتحمل جوع معدتـي..ابتسمت طيبة و گالت بهمس

- عفية عليچ..لا تخلين شي يكسرچ

وگفت و جريت حسرة و انداريت و گلت بشبه ابتسامه

- الـمكسور ما ينكسر

انـرسمت على ملامحها علامات الحزن
و طلعت أني و كفشتي..لگيتهم بالصالة حاطيـن العشا
و ضرغام هين..دحـگتلو بطرف عيني و سلمت
و جريـت اشـمغ عماد على القنفة و ذبيتو على رأسي.. لأن خجلت منو
بس تذكرت شسويت هـناك و جيت اغم نفسي

امي ادحگلي بعدم رضا..و ضرغام هو و عماد يتسولفون
و گعدنا نتعشى..ادحگ لـ ضرغام شلون مهتم لـ طيبة و هو يحط گدامها الفنگر..

صديت علـى عماد الي شال الجبن رغم انو ذايب بس ما ياكلـو
و بدون ما نحچي..فتحت الفه مالتي و هو يحـطلي الجبن بيها..نفس كل مرة
اني احب الجبن و هـو لا...مرات طيبة تغار و تگلو مو بس هي اني همين أريد و يگعد يقسم بينا

ورا ما كمـل العشا شلت المواعين وي طيبة
انتبهت صورة ابوية منزلتها..وديت المواعين و رجعت علگتها
و أني اگـول

- بس لو اعرف شعندچ وي صورة أبوية چان ارتاحيت

صديت عليها و كملت و كلها ادحگ عليه

- كل ما زعلتي لو ضجتي نزلتيها..عمري ما شايفة هيچ بس عندچ

و برود گالت و هي تصب الچاي

- اشيلها تا انسى حظي الزفت

- هه والله محد گالچ اخذي الله يرحـمو إذا رحمة ما تترحمين عليه

- لين

حچـاها عماد و أني تقدمت و گلت بزعل

- ميت..تعرفين شنو يعني ميت ؟
حرام عليچ والله..گبرو ما نعرف وين و محرومـين من انو نقرا عليه الفاتحة
و ما تحبين حتى ذكرو..على الأقل عوفي الصورة تذكرنا أنو عدنا اب

حچيتها و دمعتي و گعت و طلعت و أني اشوف طيبة نزلت دمعتها .

طبيت للغرفة و أني ميته قهر..ما أعرف ليش هيـچ گاعد يصير..تيتمت و أني بعدني ما جايه على الدنـيا
و حتى قبر ما شفنا الو.. لأن مـات بغير محافظة و مدفون هناك..و حسب كلام عمي جابر انـو مات بحـادث و الله يرحمو ما ظال لشه وحده لا متفسخ

من اگعد اتخيل شلون مات و شنو شعورو ابچي و اگول همين تذكرنا قبل لا يموت ؟
طيبة من اسألها ما تتذكر اي شي منو..و امي ما تحب تحچـي عنو

مـرت أيام و اني و روان شوية بينا برود
صح نروح و نرجع للمدرسة سوية.. بس ما نحچي چثير رغم محاولاتها نرجع شلون گـبل
گعدت تحلفلي انو هو ما مخليها..هه والله يضحك هالسلطان

عبالو عندي حقد لو خـبث تا افرقهم..اي صح اتمنى لو اگدر بس ما اريد
لأن حچيت و حچـيت بس ما فـاد

اطب للمدرسة و اشوف هديل..العبالك ما مصـدگه اختها انخطبت
يا گال سلطان يا حچه سلطان..جاب هيچ و انطانا هيچ..ادحگ عليها و أني اشوف اغلب حچيها عن الهدايا و الفلوس..و البنات وي و يا عمري
و اني اشب بنار

اما روان ما تجيب طاري و لا تحچي..و حتى من يسألونها شوكت العرس ما تحچـي..

رجعت من المدرسة اني و روان و وگفـت سيارة سلطان بصفنا

أني كملت طـريقي بدون ما ادير بال الو
هه والله زمان من چنت اتمنى بس يگف تا اصعد ويا..

روان گـامت تصيحلي تا اصعد و اني ما قبلـت
و هي صعدت و راحت و أني كملت طريقي مشي..
من وصلت للفرع لگيتهم واصلين

عگدت حاجبي من شفت شاب واگـف عند باب بيتنا
صرت قريبه منو و گلت بصوت ناصـي

- نعم اخوية تفضـل

اندار عليه و شو هذا صفن بـوجهي
تحمحم من گلت مرة ثانيه عبالي ما سمعني

- محتاج شي ؟

- ااا هين عماد

- هسا هـو مو هين..بالمحل مالتو

- ها..شوكت يجي ؟

يحچي و احسو خجلان مني..ما ادري ليش مستحي

- مرات يجي الظهر يتغدا و يروح و مرات العصر
محتاج شي منو ؟

- إذا ماكو زحمه..من يجي گوليلو ايوب يريد يقابلك

- أن شاء الله

حچيتها و هو حك رگبتو من ورا و ابتسم ابتسامة ناعمه و مشى
ما درت بال الو يمكن واحد من جماعتو بالسوگ..
فتت و من تا اسد الباب شفتو واگف ليغاد و صافن بالباب
طبگت الباب و اني اگـول هذا شبـي !

بدت امتحانات نص السنة و الحمدلله طلعت منها سلامات..رغم أعرف نفسي مو حيل جاوبت عـدل بس المهم گدرت اطلع منها

و جـتي العطلة
يعني اجا النوم يعني اجت الدواحه و الطلعة يعني اجا الوقت الي اقرأ بي قصص و تأنيب الضمير ما يعـذبني

روان دخلت دروس خصوصيه تا تعـدل مستواها الدراسي..هي ما تريد بس سلطان دخلها

أما سلطان و لمار..و لا فكرت لـحظه أنو أسال عنهم
تجيني اخبارهم من روان و أني اغلس و لا اجاوبها
لأن بيوم الخطوبة حچيو ظل يرن بأذني..و عبالك سچاچين تضرب بصدري
راح يصيرلهم 3 أشهر من هما مخطوبين

سمعت امي و خالتي ام سلطان يتحاچن على عرس سلطان
الي بعد اسبوعين.. شفت عدم الـرضا بعيون امو
و هي تحچي بحسرة على تـصرفاتهم
تجي عليه و يطبون للغرفة و ساعة يطلعون و الأخت تتمضحك..بس مو صوچه لمار لا والله

صوچ سلطان..شلون يرضاها على نفسو اي خطيبتو و باعتبار مرتـو بس هاي الدنيا و كلشي يتغير يمكن ان شاء الله ينفصلون شنو راح يكون موقفهم
من غير الطلعات و الطـبات..يوم مطعم يوم سوگ يوم مدري وين

و ظلت ام سلطان تشكي على المصاريف اليذبها..مو بس عليها لا حتى على امها و اختها..
تگول من هين صحتو و من هين فلوسو..گامن ينسلن شوية شوية

أني چنت ادحگ للتلفزيون..على أساس ما منتبه الهن
بس فجاة انداريت عليها من گالت يتعب بسرعة و حتى ضعفان..اخاف رجعت القـرحه عليه

- خالة

- ها خالة

ردت عليه و أني جيت يمها و گلت بتردد بس والله ظلت هالكلمة تحوص بگلبي

- أنتي تؤمنين بالسحر

حسيت وجهها انگلب و هي تگول

- يمه السحر موجود و حتى انذكر بالقران

-  ما طـول هيچ يعني تتوقعين سلطان مسحور

أني حچيت هيچ و هي لطمت على رجلها وگعدت تولو
و أمي تخزر بيه لأن حچـيت هيچ

- يعني مو بس أني هيچ احس..
والله اگول ابني مو طبيعي... احس بي شي
بس اگول ما افوت بحظي و بخـتي و اظن بيهن ظن سوء

- خالة أنـتي لا تندفعين بسرعة لا
احچـي وي ناس تفتهم بهيچ وضع..ترا ابنچ راح يضيع

و بقهر گالت

- ابني مو راح يضيع ابني ضاع

ظليت ساكته و تنهدت امي حاولت تهديها
و گالت إلا أسال عن شيخ ملا اي شي..طلعت من عدنا و امي كمشتني رزايل ليش حچيتي و ليش سويتي هيچ..

ورا يومين بالضبـط..
دنيا ليـل گاعدين نتعلل انـي و امي
امي حاطه كرزات بحظنها و تكرز و هي ادحگ للتفلزيون..و أني اقرأ بقصة
بطلها شيخ و يحب وحده من المدينه..و سواها دوشگ مال كتل..و اگول اوف همين عود يحبني شيخ
و ارجع اضحك على نفسي..هو جـاهل بالشارع ما انعجب بيچ تريدين يا لين شيخ يحبچ ؟

گـاعدين و ما حسينا الا فات عـماد
جفلت من شفت وجـهو مدمي و عينو جواهـا ازرق
امي گعدت تلطم و تگول ما نخلص من كوانانك
ما رد عليها بس صاح ما عليكم
فات لغرفتو و اني اشوفو يتلمس ايدو لأن مشخـطه

الصبح چان يوم جمعة..گاعدين نتريگ
و طلع عماد على صوت برا عالي..و فشار و مسبـه..
طلعنا ورا بس هو صاح بينا ارجعـن..

ظلينا بالحوش ننتظر على اعصابنا
شوية و فات و هو عاگد حواجبو.. امي تلگتو و گالت

- شكوو هالصوت جاي من بيت خالتي

- هه ابن خالتچ اخذو للشيخ عمو و ولد عمو

أني من حچه هيچ گبل تقدمت عليه و گلت

- يعني صدگ مسـحور ؟؟

هز راسو بـ أي و امـي گاما تبچي
گبل فاتت جوه اخذت صايـتها و طلعت و ظليت أني و عماد
لميت مواعين الريوگ و أني گاعد اغسل بيهم
عماد گاعد يشرب چاي لأن يگول نفسي مسدوده

- لين

- هاا

صديت عليه و حچيتها
هو حط الگلاص و گال بهدوء

- عندي رفيچ اسمو ايوب

عگدت حاجبي و أني بداخلي اگول
أني شعليه ؟ بعدين منو هذا ايوب

- ايي ؟

حچيتها و هو يمسح على شعرو

- بصراحة يريد مرة من عندي

رفعت تك حاجب و أني اگول بعدم فهم

- ما افتهمت ؟

زفر و گال و هو يدحگ عليه

- يعني گال اني اريد اطلب ايد كريمتكم
الي هي أنتي..

.

السلام عليكم ورحمة الله وبركاته 💖

شلونكم حبايب عمري

أن شاء الله الكل بخير 💚

شنو ارائكم و توقعاتكم 😗

🌚🌚صدمتين باخر البارت مو ؟

تتوقعون عماد شنو سبب الكتله مالتو 😭😂

و لين و الخطابه 🌚

اعتذر البارحة لازم ينزل بارت بس صارتلي شغلة منعتني 🌚💔

عندي طلبين صغيرونات منكم 😍

متابعة لهذا الحساب لان تستاهل الدعم ⁦❤️⁩

Umrah2222

و هذا الحساب هماتين 😍

bn__16__n

اعرف ما راح تفشلوني 🌚⁦❤️⁩

و بس والله 🤭

نلتقي على خير احبتي 🧡
و لهذاك الوقت استودعكم الله الذي لا تضيع وداعه 💚