#جوليت وأسرها....

البارت العشرون

البارت العشرون
رواية...جولييت واسرها...غياهب الإنتقام
بقلمي...نور سمو العراق

💔💔💔💔💔💔💔💔💔💔
ك

سرا في أضلعي واحد تلو الآخر.. ضوضاء ترتج في داخلي تكسر ثنايا قلبي.. لا أعلم هل أن الزمان لم يرحمني؟؟! أم أنه قدري.. إنني لاارى ملامحي.. ولا لذه في عيني. ولا البقاء في دنيتي. ومالجرم في حقي؟؟

بقلم المتابعه المبدعه..ammar123ammar

...........................

ترادعت المشاعر داخل قلبي احساس مؤلم من تشوفيين قطعه من كلبج يعاني ويتعذب...اتعذب العذابة

اني فاقده راحة گلبي شلون اقدم الراحه لگلب ابني

احساس مؤلم من تشوفين نفسج غارقه بالمشاكل ومتلكين احد يساندج

كل المشاكل والارهاقات والقساوة الي شفتها منه تهوووون بس ابني ما يهوووون

دمعت عيني بعدم تصديق وهزيت راسي بنفي....لاااااا جذب ابني مو مريض انت تريد تحرك كلبي عليه تريد تعذبني لان تكرهني...

تجاهل كلامه ورجع باسه بصدره جر نفس وكال...مو لهلدرجه حقير حتئ افاول علئ ابني مجتبئ عنده فتحه بالقلب ورخاوة بالاعصاب....ولازم يتعالج

حطيت ايدي علئ صدري بنحيب ....لاااا يمه لاااا يمه مجتبئ لااااا ابني ما بي شئ لا تكسرني يمممه مالي غيركم والله...

اخذته من ايدي واني ابجي بصوت عالي ...يمه ابني،يمه يا ضناي متت والله متت من الوجع من جبتك مثل سكرة موووت ولادتك يمممه...

تقرب مني جاسر وجر نفس كال...لازم اعالجه ان شاء الله خيير...

كعدت علئ الارض وحضنت مجتبئ دفنت وجههي بصدره وبجيت بقلب محروق

واشكي الابني المريض وهو هادئ واناشغ ...يمممه مريض يمه سوده بوجهي المرض الامك يعمري انتي حبيبي يمممه كلبك تعبان

هو اخذ الطفل مني ورجعه الكاروكه....

ضربت علئ صدري بنحيب...كله بسببي اني السبب اني الحقيرة اني يمممه

تعب گلبك من وراي يمه ما درت نفسي علي روحي يمممه خلصتها ضيم بضيم ما طاحت بگلبي طاحت بگلبك من سوده عليه يمممه يعمري...

دنگ عليه سحبني وگفني صرت مقابيله واني امسح دموعي وابجي ..

تنهد بصوت خافت...الدكتور طمني كال عنده فتحه بالقلب ورخاوه بالاعصاب ننطي علاج اذا ما تنسد ان شاء الله اسويله عملية....

والرخاوه كال...اذا ضل بدون علاج يكون مثل حالة ابوووج يعني يمشي علئ اطراف اصابعه...

فتحت عيوني مصدومه...يعني مجتبئ حيكون مثل بابا

جر نفس بجمود...ابوج ما تعالج فضل هيج ومن كبر علاجه صار صعب تعرفين قبل جانت العالم مهمله والطب تطور هسه فأكيد يتعالج يعني ينراد اله علاج وهم لازم كورس للمفاصل افتهمتي...

بلعت ريكي بدموع حايرة...يعني يصير زين ويمشي طبيعي زين وگلبه شلون

تقرب مني ومسح دموعي...يصير زييين ...

جر نفس وكمل بغموض...اني جنت حاقد علئ نفسي يس من شفت مرتضئ،ومجتبئ...وعرفت مجتبئ مريض احس رجعتلي مأساة غزوله شفت بيهم غزل...

انتي امهم واكيد ماكو احن منج عليهم لهذا السبب اني غيرت رأيي وخليتج وياهم....

بلعت ريكي ومسحت دمعتي بطرف اصبعي...يعني مراح تطلكني يعني نسيت ثارك راح نعيش بأمان

رد بقسوة...اموت وما انسئ ثاري وعاصم اني كتاله واكتله لو يضل يوم بعمري....

بس اني جنت مقررج واخذ الطفل...حتئ جنت ناوي ما اتقرب منه...

بس من تخربطتي واخذتي سونار طلعتي حامل بتوم حجتلي رضيه واحد من الاطفال حالته تعبانه ..

بيومها عشت بحيره بين قلبي،وبين عقلي اثار عاطفتي مجتبئ اكثر من مرتضئ لان مريض

قررت لا انطيهم ولا اطلكج لخاطرهم لا الخاطرج ولا الخاطر نفسي....

انتي امهم تربينهم وتعيشين معززه مكرمه هنا لا اطالبج مثل قبل تسلمين اخووج ولا اطالبج بحقوق زوجية...

اني هنا اصرف عليج وعلئ اطفالي وكل شئ اني اوفره الكم وما اقصر بأي شئ عايل وياج

فتحت عيوني بفرحه ممصدكه كلامه كمزت عليه وحضنته وحطيت ايدي علئ رقبته وراسي علئ صدره همست....شكرا شكرا والله ممصدكه كوول حقيقيه مو حلم

بعدني عنه بهدوء وكمل بغموض....بس عندي شرط وهل شرط من حقي من حق اطفالي

همست برمشات متتاليه....شنووووو؟

دار وجهه وسحب من باكيته جكاره ورثها وعض شفته بتنهيده....تتبرين من حازم وعاصم

كمل بجمود...تنسين عندج اخووووان اذا حابه تعيشين تنسيهم  اني مغلطان وياج مو صح

سكتت مجاوبته بس والله احس بنار بصدري ترئ يضلون اخواني مهما يكون...

نفخ الدخان بملل...هاااا لا تخليني مكالمة فائتة  احجي شنو قررتي

تنهدت بضيق...يعني شنو احجي اصلا اني كاعده عندك وما اعرف وين اروح قابل شسوي ...

جاسر...القصد شنووو؟

جولييت بألم...القص مثل متريد ومثل متحب

بلل شفايفه بانتصار...هذا الاريده وان شاء الله باجر اروح اخذهم ثنينهم لان رضيه دكول عندهم ابو صفار

تقربت منهم واني اباوعلهم بحزن....اي خطيه وجههم اصفر بس اخاف علئ مجتبئ يصير بي شئ

ابتسم وطفئ الجكاره ...اوووه نسيت روحي افتحي الباب لا يختنكون من الدخان...

رحت بسرعه فتحت الباب والشباك شفت نوال لازمه بنتها تسحب بيها من شافتني جابتها براشدي خلتها تعييط...

جاسر كال...شكووو هذا منو انضرب

رديت بقلق...بنت فلاح ضربتها نوال

طلع من الباب كال ...ليش ضربتيها

ردت بهدوء وابتسامه خايفه...هاااا خوويه وكحه موتتني تريد تطلع بالشارع واني اخاف عليها ..

جاسر ...كم مره كنالج لا تضربين البنات لا تضربيهن انتي شنووو ماكو عندج ضميير لج يتيمات...

نوال ..هو منو مهتم الهن اشو كلمن حاير بروحه وانت ما صدكت صار عندك توم نسيت حتئ ثأر اهلك

جاسر بجمود....هذا الشئ راجع الي انتي مالج شغل ولا تتجاوزين وترفعين صوتح انتي هنا مره غريبه تحترمين نفسج وتكعدين بما يرضي لله ...

واذا هذا الشئ معاجبج واحنه مقصرين وياج روحي الاهلج تردين تأخذين البنات اخذيهن ومصرفهن يوصلج...

يابه معاجبج الله ومحمد وعلي وياج...

واذا تكعدين هنا تحترمين نفسج ولا تتدخلين بغيرج حتئ الناس تحترمج....

ردت بخبث وتصنع...لا شنو السالفه اني احبكم وماشيه وياكم علئ حب الله واني منتظره تاخذ ثار ابو بناتي،حتئ،ينام مرتاح وما اطلع من بيتكم اله تجيبلي راس عاصم

جاسر رفع حاجب بتكبر....ثاري محد يوصيني عليه مو انتي تنبهيني وثاري ما محصور بس بفلاح لاااا ابوووي وغزل فلا تشعلين نار الفتنه ولا تستفزيني ...

اني جنت بس واكفه اتسمع الكلامها بس جنت مقهوره من الكلام الصار بس ما الي حق احجي ...

جاوبته بحزن...شبيك يا خويه يا ابو غزل قابل شنو اني اكرهك واثير الفتنه والله. الله ميته قهر علئ ابنك طلع معوق اني جنت اعرف لان اهل مرتك كلهم معوقين فأكيد يطلع معوق

ضحك باستهزاء...مجتبئ مو معوق مجتبئ مريض يتعالج ان شاء الله وما اقبل اي واحد يكول عن ابني معووق وأي شخص يحجي هل كلمه اكص السانه والله لا تمشونها عليه تمام...

نوال...يااا لا الله يشافي ان شاء الله وتشوفه عريس بس انت يا جاسر كلت تطلك جولييت يعني اني والله من حقي اطالب بطلاقها لان ما اكدر اشوف اخت كتال زوجي تاكل وتشرب ويانه....

جاسر...انت مو تامريني .لا تفرضين رايج عليه هذا الشئ راجع اليه تمام خليج بحالج وعوفي حياتي لا تتدخلين بيها....

وهااا حاب اكلج شغله...جعفر هو الي طلب يتزوجج لان صلاح عمي انطاه ريهام

فتحت عيونها مرعوووووبه وفكت قبضتها من ايد بنتها....

جاسر اجاه اتصال وخله وطلع....

وهي نوال هجمت عليه بغض...بنت الكلب بنت الزمال حضج كاااااعد مثل حضي

اني خفت منها لان جنت هسه جايبه وما بيه حييل الها...

خليت ودخلت الغرفتي...

وهي تصيح وتغلط كعدتهم من النوم اجت رضيه وام فلاح و وقار

كالن شكوو شكوو اني جنت اباوع الهم من الشباك وهي تتهدد....

تردون تزوجوني جعفر ابو العرك ...شفتو اتفهه واحد بيكم تردون تبلوني بي والله ما اقبل ...

وبعديين انتم صار من مات فلاح لحد الان تقشمرون بيه اني لا ميته علئ صلاح ولا شئ بس،عيب عليكم تجذبون عليه...

رضيه...وشبي،جعفر عيني فوك ما راضي بيج ارملة اخوو وعندج كومة بنات وهو بعده شاب مية وحده تتمناها

تخصرت بسخريه...عشتو منو تتمنئ واحد عركجي سكير بس التافهه والمابيها خيير تردون تبلوني بجعيفر ابو العرگ

تعرفون اني ما اتراهم ويه جعفر ودوم نتعارك تردون تبهذلون بناتي ...

اني ما اريده وراح اروح الاهلي ...

ام فلاح ...شسوي يعني شيخ عكاب انطه ريهام الصلاح افشله .اكله ما اريدها...

نوال... وشوكت شيخ عكاب انطاكم ريهام وبعدين شلكم بهل كلاوات ...كولوا ما نريدج لا تضلون تتهمون العالم....

وبعدين اني اعرف بالصار ويه رهيمه مسويه روحها متدينه وهي مخلصتها تمطك

أم فلاح..انجبي لا تاخذين عرض البنيه هل فقيره المسكينه

راحت تغلط وتسب وام فلاح ضلت تحجي عليها وهم تغلط كالت...يمممه نسوان وكحه متت منجن الله ينتقم منجن ويخلصني وضلت تغلط....

شفتها جمعت ملابسها وخابرت امها اجت اخذتها....

اني طلعت اغسل الممات مالت اطفالي،جان سمعت ام فلاح دكول لرضية...يطبها مرض خلي تروح مليت منها اني محد كاسر ظهري غير بنيات فلاح هاي ما ترحم بحالهن...

رضيه...عزا بعينها ولج كاعده تاكلين وتشمرين صينيتج وتمسحين اديج بالحايط لحد يحجي وياها لحد ماذيها شبيها تخبلت....

ام فلاح بتنهيده...اني مو ضحيت بصلاح لخاطرها...بس صلاح الله يحبه وخلصه منها خلي يتزوج ريهام وخلي جعفر يتحمل نتيجة غلطه...

والله مقهورة علئ ريهام من كال جاسر اعتدئ عليها صلاح لحد الان حتئ ما الي عين اباوع بوجهها...

رضيه بفرحه....يمممه اني فرحانه والله احب رهيمه تخبل ومؤدبه ومتدينه

وجعيفر خلي يتزوج نويله جدر ولگه غطاه ...

ضحكت ام فلاح...هههه اي والله بس هو دواها بس خيه رضيه اني اخاف من المشاكل...

كملت غسل المميات ورحت للغرفه بس شفت ام فلاح جانت نظراته تتبعني من الحوووش لحد باب غرفتي....

كعدت ارضع بيهم واحد واحد يعمري كتاكيت يجننون

خطيه امي جانت تتمنئ تصير بيبي  وجانت دكول جولي يمممه شوكت اشوف ابنج ادلله دلال واشتريله واخلي علئ گلبي ...

وحائ بابا من عرف بيه حامل شكد فرح وكال ..يابه جولييت جهاز ابنج عليه ومن استلم راتبي انطي الامج فلوس تشتري اله ملابس. 

ياربي ميته علئ شوفة امي وابووويه طاگ كلبي عليهم والله ...

حتئ بالحلم مدا اشوفهم ياربي ليييش اريدهم حتئ لو بحلم دخيلك ربي...

...........................

شهد...

صار يومين اتصل بجوجو مديجاوب متت قهر وخايفه عليه بس لا تركني،بعد ميحبني،ويلعب عليه

عضيت شفايفي بقهر...خوووش يجعيفر اني الك اذا ما ندمتك يا خاااين يا ابو النسوان ما اطلع شوشو اني،تضحك علية...اني تضحك عليه

ضليت افتر بالغرفه.. شسوووي شسووي لازم اسوي شئ اخلي تحت الأمر الواقع ...اروح الاهله واكلهم عليه

تؤؤ غلط هييج اخاف اتندم...لعد شسوي والله ورطه يجوز زعل لان ما شمرت بزونتي الفرعونية

باوعت البزونتي بحيره ودرت وجهي...والله حقه هي هاي البزونه محلوه عبالك بيها جني فرعووني...

بس والله احببها خطيه متشرده واني انتشلتها من مزبلتها يوم الينتشلني جوجو من هل مزبله...

ابتسمت من لكيتها بباب بيتنه ضعيفه عظامها مبينه و وسخه حييل وخطيه جوووعانه ميته جووع...اني جنت دائما اشوفها بالقطعه المقابيلنه الي بيها زباله

رحت للطباخ لكيت مرة ابويه سالگه لحم لابويه خمطت منها وانطيتها اكلت...

اخذتها سبحتها جانت مرة ابوية شاره ثوبها علئ الحبل لفيتها بالثوب ونشفتها و رجعت شريت الثوب ومن هذا اليوم وهي صارت صاحبتي

حتئ مرات اشكي الها من جعفر هي دكلي ميوو

اعرف قصدها يعني دكول اصبري عليه ..

جانت مونستني قبل لا يكون عندي موبايل انومها بحضني واسولف وياها ساده عندي الفراغ...

بس بعدين من شفت مرة ابويه ويه ابو طخه وهي خافت افتن اشترتلي موبايل وسوتلي فيس

الثوله شلون افتن واني ما عندي دليل ضدها..بس يالله ان شاء الله اصورها بالموبايل وتصير الفتنه صدك اشد من القتل ..

رجعت اتصلت بجعفر فتح خط كال بدوخه...الوووو هاااا نويلة وجهه الطاوله ارتاحيتي راح تتزوجيني

عرفته سكران جريت نفس...اني مو نعيلة وجهه الطاوة اني شهد...

رد بذوبان وهدوء...حبيبتي شش شو شو

حسيت بعصره بصدري ...سكران جعفر

عاط بصوت عالي...لاااااااا بحياااتي كلها ما شارب

هزيت ايدي...اي مبيين ظالمتك اني المجرمه انت شارب عصير دالي

رد بقهر وهدوء...ضايج ام الشوش ضايج

همست...ليش؟

تنفس بغضب وكمل...يردون يزوجوني وجهه الطاوة المحتركه

وكفت بعصبية...شنوو شنوو مو دكول اخوك الوسط حيتزوجها...

تنهد بضيق...مو حقراء ذبوا عليه تهمه يكولون عود اني مشرب صلاح ومغتصب صبرية..

عقدت حواجبي...يا صبرية ؟

تافئف بقهر...صبرية بنت عمي عكاب هاي الاكلج من جماعة الزرقاوي هواي تصلي..

نفخت بعصبية...مو دكول اسمها ريهام

جعفر بدوخه...لا خالتها ريهام بيتهم بشهربان حتئ عندها ثيران ان شاء الله ينطح وجهه الطاوة واخلص منها

حضنت بزونتي باسئ...وهسه شنوو وبعدين ليش ما يتزوجها اخووك وانت ما كلت اتزوجج ليش تسكر وتجذب روح غسل وتعال هسه مدا افهم شئ...

جاوب باستنكار...جذابيين لا مشرب صلاح ولا فلاح هم عركجيه سرسريه يسون مصايب ويخلون براسي

قفلت الخط بقهر ما طايقه اسمع منه كلمه كم مره كتله لا تشرب لا تسمم ...اوووك انت بس اصحئ يا جعفر واني اعرف شلون اقسم الك...

انوب يريد يتزوج نويله...

شمرت الموبايل اجت بزونتي دخلت بحضني دفعتها بقهر...وخري مني اني كم مره اكولج من اضوج لا تتقربين مني...

هي انهزمت ووكفت بباب الغرفه استلقت بجسمها النحييل واومئت بصوت ناصي وحزين ..ميووو

جانت الغرفه ضلمه بس صوء الحوش ضارب عليها انقهرت علئ نوشه البزونه صحتلها اجتني تركض نامت بحضني...

بستها باسف...نونه حبي مو قصدي اعيط بوجهج بس والله ضايجه وخايفه جعفر ما يتزوجني انتي ما تحسين شلون الحب عذاب هسه بس تحبين شوفي شلون تتعذبين...

اذكرت جعفر من يقلد عليها واني اكوله باجر تحب وتزوج ويصير عندها اطفال وتصير تجنن والعتوي يطلب رضاها

يكول منو يتزوجها جنها مرة ابو طبر ...

حاقد حتئ علئ البزونه هو اني لو أمي عدله احبببه

مسحت دموعي بقسوة حاسه بتأنيب الضمير يمكن هسه امي مراضية عني لان احجي ويه جعفر ودكول هاي مو خوش بنية...

بس اني ما اريد اضل هنا ما اريييييد اخاف علئ روحي هي زوجة ابويه قبل لا تزوج ابويه سوت وياه علاقه ومن امي درت ابويه ضربها بالحايط وفلش راسها...

وصارت مخبله و تركض بالشارع وكالو وكعت من الدرج ونشگ راسها بس اني شفته من ضربها...

لهذا السبب اني ما اريد اكبر عندهم ولا اريد مثل مرة ابويه كومه علاقات اريد بس جعفر بسسس جعفر...

بس متت احس اكو شئ غلطط بداخلي احس دا ادخل بشئ غلط رغم مرة ابويه دكول مو غلط واحساسي يكول غلط...

رغم والله جعفر ممتجاوز ويايه بس نهار كله سكران ويسب بنعيلة

واني مخلصتها عليه...تزوجني والله اصير الك حزام بظهرك واشك حلك نويله علئ ضوجتك

رحت نمت واني افكر بهل دوامه الي صارت بحياتي....

...........................

ريهام...

لابسه عباية الصلاة وكاعده بين يدي لله ..الدمعه ما فاركت عيني ولا طلعت من هل كهف المظلم من يوم الي تحرش بيه صلاح لحد الان....

ابويه جان يكول بوية ريهام انتي مثل سجده بعطر الجوري لا والله بويه انتي انقئ...

كفكفت دموعي بانهيار...بويه السجده تلوثت بس مو ذنبي والله ومع العلم اعرف مو ذنبي بس دا احس بقهر فضييع

همست بنحيب...يابه جسمي محمل بالمساته ولا عبالك فرحانه.... لمساته مثل السووط تحرك جسمي وما تشافي...

صرت اكره الليل والسبحه ما تفارك اصابعي واني اسبح بمطر الغفران بلكي تغفر عمق خطيئة صلاح ويايه ...

همست بحنين..اللھــــــــمَ بشـــــرَنْي بآلِصبر
گمّآ بشــــــــرَتِ الصابرين بــ بالجنة....

تنهدت ...ما اريد بس الصبر الي يشوفني يكول هاي تبالغ بس والله مستحيل تكون مبالغه مني اني انسانه تعلمت علئ الشرف واحترام مستحيه من نفسي لان الي صار حرام اعرف  ما الي ذنب بي بس ما اكدر اتجاوز هيج موقف بحياتي...

ومستحيل يمر مرور الكرام حسيت نفسي شهوه ورغبه وجسم شنو الي جذبه اليه لابسه المخصر مسويه اغراءات؟ والله بحياتي كلها ما اتعمدت اثير غريزة رجل...

لان حرام ما فديوم قدمت نفسي بطبق من ذهب ولا تعريت ولا تمضحكت ليش اني بالذات صلاح يعتدي عليه

حسيت الباب انفتح صايره بيه خووفه من ينفتح الباب باوعت شفته جابر تنهدت ورجعت اسبح بالسبحه

جر نفس واجه كعد علئ السرير محجيت ولا كلمه وهو هماتين ما حجه ...

شويه وتكلم بصعووبه...حبيبتي ريهام عندي موضوع وياج

درت وجهي عليه بتساؤل...ان شاء الله خير

مسح وجهه بتوتر...خيير خيير

كمل بتردد...ريهام اني مو ادافع الصلاح بس والله صلاح جان سكران

حضنت جسمي بصدمه...يااااويل حالي سكران لوث جسمي وهو سكران حيوان حقييير ما اله اي عذر وعذره اقبح من فعله...يشرب انوب يشرب يغضب ربه حسافه والله حسافه

جر نفس...شبيج ريهام هو مو يشرب بس جعفر شربه حبايه..

وكفت بغضب...صدكته موو ترئ،جذاب يدور اله عذر مستحيييل شنو احنه قشامر حتئ يضحك علينه

وكف وتقرب مني احتضني بحنان...حبيبتي ريهام اسمعي مني خلي افهمج من اجه جعفر جان بيده حبوب وانتي سويتي جاي وبهاي الاثناء دخل صلاح فجعفر خاف منه شمر الحباية بالجاي وصلاح بدون ميدري شربه

باوعتله بعدم تصديق ابتسم بحزن ...ان بعض الظن اثم يا ريهام واني ضنيت بي هذا الظن

جاوبته بقهر...هذا كلامه لو كلامك يعني هو اختلق هل عذر لو انت شفته...

هز راسه بنفي...لا والله اني شفته الجعفر خله الحبايه حتئ ضليت احجي عليه...

درت وجهي بزعل...حتئ لو جان سكران ليش اقتحم غرفتي شنو جان تفكيره بيه ...

سكتت ما ردت احجي اكثر ولا ادخل بمواضيع ما الهه صحه

مسحت دموعي ...بعد الصار صار خلي يكون بعيد عني

جابر...بس هو يريد يعتذر منج

جاوبته بصدمه....لاااااا مستحييل ما اريد اشووووفه خلي بعيد عني...

ضحك...زين شلون من باجر يجمعكم سقف واحد

عقدت حواجبي باستغراب...شنو قصدك

جر نفس ومسح على خدي بحنان كال..باجر اهلي يرجعون من العمره اريدج تكونين قويه وما تبينين الصار

همست بهدوء.. ان شاء الله

طلع خطيه من الغرفه واني انقهرت عليه حييل صار كم يوم من الحادث لحد الان واني هاملته خطيه يجيب اكل كله من المطعم...

واني استحرم اكل اكل مطاعم لكص والكباب والمشاوي لان ما اعرف مصدرهن واخاف مستورد وممذبوح علئ القبله...

فهو يجيب لفات فلال لو يجيب تمن ومرك سفري

طلعت دا اسوي اكل خابرت وقار فتحت عليها خط ضليت احجي وياها وهي كالت بفرحه...رهومه حبي
صلاح حجه ويه ماما ويريد يخطبج ...

ردت بفرحه....ممصدكه ونبي ممصدكه معقوله حنكون اني وياج نفس البيت ونعيش سوه ما اخليج تنامين يم صلاح تنامين عندي

حسيت بعصرة بصدري...اسكتي شنو هل حجي هو لازم يتزوج نوال لان هم قرروا واصلا ابويه طلب منه يتزوجها...بعد شنو هل كلام...

وقار بضحكه...هههههه تحجين هيج لان خجلانه ادري بيج يعمري...بس متعرفين شكد فرحانه ...

شمئزيت من كلامها وقفلت الخط بوجهها تعبانه نفسيا وجسديا ما الي خلگ الاي شئ....

كملت الاكل اكلنه وبعدها ضليت انضف وارتب وانوب رجعت اصلي،ونمت...

كعدت الصبح جابر كال ...راح يجون اهلي...راح اجيبهم من المطار تمشين وياي

ابتسمت بحزن...لا روح انت لوحدك الله وياك...

خله وراح واني ضليت ارتب بالبيت ...

شويه واجوي من السعوديه شكد فرحت بجيتهم حضنت ماما وبجيت بصوت عالي وهي خطيه ضلت تبجي كالت...مره ثانيه من اروح البيت الله اخذج ويايه...

انوب حضنت بابا وبجيت وهو يضحك عليه ويبوس براسي...بنيتي رهووومه دعيت الج بيت الله يوفقج وينور دربج

ابتسمت وبست ايده...

سلمت علئ خالتي صبريه وكعدنه شويه هم يسولفون علئ الزيارة ومتحمسين....

صبرية...يمممماي كعدنه بفندق مو فندق لا والله عبالك بتركيا شني الشابو..«.الشامبو»

شني الصابون ليفه شني حتئ نعال ابيض مال دكاتره مخلين لميتهن كلهن جبتهن من الفندق...

شلون ناس طيبه زرنه ودعينالكم رهيمه دعيتلج تزوجين صلاح لان خووش ولد اذكر من جكليته اخذها رجلها وهو اخذني الها شلون ولد حباب

حتئ شترالي بطل سيفون بس مو سيفون ضليت اتريع حتئ من خشمي...

ابوية ضحك بصوت عالي....ههههههه هسه انتي حبيتي صلاح علئ بطل السيفون ...

صبرية...لاااا بس حرامات هل شاب الحلوو ياخذ مرة اخووو هو مبين مؤدب مو ملطلط مثل ابو اللول ما صدك اخو مات تزوج حزينه جنها صويلح ابن مريم...

ابتسمت ...صدك خاله نسيت جولييت جابت ثنين ولد تووم دكول وثار يجننون

وكفت بفرحه....صدك جويليته جاااابت ؟ وانوب توم ولد ما مصدكه شلون طلكت بيهم هل جكليته المايعه

انه هناك وافكر ششتري لفرخ جويليته جابت ملابس وهديه الها ...

خلي اروح الها...

جابر...خاله انتي مو هسه جايه من دوله وتعبانه اكعدي وان شاء الله من ترتاحين اخذج الها...

صبرية بغضب...خيبه كوووم تعبانه شني...ما دكلي جنت شسوي احصد يو افلح هي كلها مخلصتها رافعه ايدي وادعي ربي يحفظ حلالي ...

بس نسيت ادعي علئ حسنه. .لا مو نسيت بس خلي تولي حرامات اوسخ لساني بيها

رد ابويه.. لا خويه صبرية ارتاحي وان شاء الله باليل ياخدج جابر

صبرية بقهر...خويه مو ضال بالي علئ طلياتي ودجيجاتي وكنوش تدري بي متعلم عليه تذكر من خابرت الفلاح شگال..

گال گنوش ما ياكل اعرفه ما ياكل اله من ايدي سوده بوجهه حسنه...

ابويه كلها...ميخالف خويه ارتاحي وان شاء الله ياخذج جابر باليل الجولييت وعگب باجر ياخذج البيتج....

صبرية...اوووف يا ريحة گنوش معزته خاااصه احبه اكثر من حبي الابو اللول من جنت مراهقه وثوله واحبه

امداني اشفت منه هل الصخل هذا...

ضلت تسولف وتحجي واحنه نضحك من اجوو اهلي ارتاحيت شويه ...

جابر ذبح طلي و وزعه للفقره لسلامة اهلي من السفر.....

ضلينه لليل اجت عمتي ام فلاح وعمتي رضيه وجاسر وصلاح تباركوا الاهلي...

جانت جايه وقار وياهم ضلت كاعده يمنه...

بعدها الولد راحو من اجه صلاح وياهم حييل ضجت بس بداخلي نقيض من المشاعر ساعه اضوج ساعه طبيعية...

خالتي ام فلاح كعدت يم ابويه كالت...خووويه ابو جابر انت تعرف ولدي وانت مربيهم وتعرف بصلاح شكد مؤدب واخو اخيته ...

ابويه رد...ونعم منه شلون ما اعرفها صلاح ورده والله وسبع ولكل تشهد اله..

فركت اديها بتوتر...اريد اطلب ايد ريهام لصلاح لان هو ما يريد مرت اخوو وتريد الصراحه هو عاجبته ريهام...

ابويه ضحك وهو يباوعلي واني نزلت راسي بخجل وفشله وبلعت ريكي

كال...والله هو بكيف رهومه اني من زمان كايل ما اجبرها...

حضنتني ام فلاح كالت...بنتي رهومه ساكته اكيد موافقه مو يكولون السكوت علامة الرضا

ابويه بضحكه...ههههه والله اكيف علئ الاقل بنيتي ما تروح الناس غرب والتعرفه احسن من الي ما تعرفه بس يضل الراي رأيها

اني خجلت خليت ورحت بسرعه طلعت و وقار طلعت وراي وهي تصحك متحمسه عبالك هي خاطبيها مو اني

حضنتني كالت...اقبلي الله عليج والله صلاح اخويه حباب

دارت وجهه عليه شافت الدموع بعيني كالت...ريهام شبيج ليش تبجيين

سكتت محجيت وهي تنهدت بضيق وشكت بأمري...

............................
جولييت...

راح جاسر هو ورضيه اخذ الاطفال صح انطيتهم اله بس جان كلبي يرجف من الخوف جنت اشك ياخذهم وينطيهم الاخته

جنت افتر بالغرفه بخوووف احس اتاخروا حيييل ....

طلعت ملابسهم وحضنتهن انتبهت علئ الملابس تخص ملابس اطفال ولد ونفس اللون جنت عبالي ملابس بنت نوال الي ماتت ...

بس انصدمت الملابس تخص ملابس تؤم من سالت رضيه كالت من عرف جاسر بيت توم ولد انطاني فلوس وكال جيبي جهاز كامل الهم

الحمد لله طلع عنده قلب ...

رجعت بذاكرتي لايام زمان من اتزوجني جاسر مجبور بسبب التهمه اللعينه الي طلقها عليه اخو هالة علئ،لسان احمد خطيب هالة..

حسيت بحقد علئ عاصم وحازم حتئ من تزوجت تزوجت مكسورة خاطر وفشلانه من اهلي ومن نفسي

اتذكر من دخل حازم رفس الباب بقوه اني وامي وابويه فزينه من مكانه

سحلني بقسوة من شعري وضربني راشدي وبعدها طاحلي بوكسيات وهو يصيح ...لج كح لج ادبسز هيثم ابن عمي يكول خطيب هاله دازله رساله يكله بنت عمك جولييت جنت اخذها شقق ...

امي لطمت علئ خدها ورجعت تلطم علئ صدرها ...يممه عزا العزاني يمه صخام الصخمني والله جذب جذب جوليت لو تتاخر دقيقه اروح اركض للمدرسه اجيبها واجي

هو رفسني علئ بطني وصرخ...جذاااابه هاي جذااابه طيحت حضنه وطينت روسنه والله بس يجي عاصم اخلي يموتها حلال

جنت اصرخ واتوسل بي وابجي  وهو لا ابالي

امي لزمته تبجي وابوي لا حول ولا قوة يبجي بألم ويكله ..ولك عوفها ولك جولييت تربيتي متسويها ولكم ارحموها...

اجه عاصم شافني بين اديين حازم من شفت عاصم ماتت رجليه من الخووف

حازم صاح بصوت عالي ...تعال شوف اختك ام الشقق ولك اكتلها واغسل عارك احنه لازم نغسل عارنه هاي هسه تطلع مو بنية...

عاد عاصم تخبل كله. .منو يكوول شنو هل كلام

جاوبه حازم...هذا كلام احمد خطيب هاله هو الي كال لهيثم وهيثم متخبل ومتخلف يكتل احمد...

عاصم تخبل صار يفلش بالبيت تفلش وبعدها لزمني كطعني تكطع دخلني للمطبخ وشغل الطباخ وقفل المطبخ امي جانت تتوسل بي وتبجي ...

حازم لزمني اله وهو لصق السجين علئ رجلي بيومها روحي صعدت الرب العباد صرت اصررررخ بصوت عالي

وفقدت الوعي من الوجع...

من اتذكر الماضي دموعي تنزل بوجع واي ذكره منهم تبجيني وبحرقة قلب...

مسحت دموعي بقسوه مر بخيالي،من طلعوني من المطبخ واني شبه فاقده طلعت امي لابسه عبايتها و تركض

بيومها اجه جاسر بس دخل بدخول مهيب من اتذكره احس بانتعاش بروحي...

ابتسمت من اتذكرت دخلته لبيتنه بس قطع سلسلة افكاري طرق الباب...

رحت فتحت الباب شفتها رضيه شايله الاطفال انطتهم اليه

سالتها عن صحتهم كالت...زينين بس هذا علاج اخذي الهم وديري بالج علئ مجتبئ لان نسبته اكثر من مرتضئ

باوعتلهم بحزن وبوستهم واخذتهم للكاروك ضليت العب بيهم بس هم مخنجرين...

حسيت اكو حركه بالبيت فتحت الشباك شفت خالتي وهاله دخلن

جاسر جان واكف بالحوش،هي هاله تباوعله وتبتسم بس هو جان كلتهي بموبايله وممهتم الها

قهرتني مال اطلع الها واجيبها براشدي الرخيصه

يعني الغيرة هيج تسوي اذا هيج تسوي محد يلوم اخوة يوسف من شمروا بالبير

فعلا الغيره تحرق رجل الي يدخل بيها...

الحقد هيج يسوووي من غيرتها وحقدتها مستعده تنزلني بغياهب الانتقام وهي الممنونه...

.........................

ريهام....

خالتي صبريه كعدت تريكت وحضرت اغراضها ممخليه شئ مجايبته لجولييت

ملابس الها والطفل مالتها ...وجايبه حتئ ملابس داخليه

ماما كلتلها . انتي شكو جايبه ملابس نوم الزوجة جاسر

ردت بعصبية.. بلكت هل ثور كويسر من يشوفها تتدلع عليه يطيح بحبها ويبطل ياذيها

ولو جكليته ما بيها خيير ما تعرف مثل حسنه الخايسه تخمط الزلم

جويليته نفسي خجوله

امي ردت.. صبرية منيلج خجوله

صبرية...اي هم صدك انه لا اخجل ولا استحي هسه عوفينه اني اريد اعلمها...

جمعت اغراضها...وجابر حضر نفسه...

طلعت بره شفت بابا ديتوضئ يريد يصلي

واني رحت اخذت اكل للدجاج اندك الباب

ابويه جان ديثبت وراح فتح الباب ضل شويه وكال ...تفضلوا تفضلوا اهلا وسهلا

باوعت انصدمت من شفتها...نوال وامها...

نهاية...البارت. .يتبع

كونوا انتم كونوا بخير ...احبكم💔

نور سمو العراق 😘

تنبية...شكرا بنات علئ اقتباساتكم و ومضاتكم الجميلة كلها ارتجال عن حال جولييت ان شاء الله كلهم انزلهم واعتذر منكم لان كل ومضه حنزلها علئ حدث معيين وكوولش ممنونه منكم

احبكم بكد كورونا فايروس 😂👌