يا هلا والله 😍
ترى والله اشتقت لكم 😂❤️
نظراً اني محدثتش من ايام الفتح الاسلامي فأكيد انتوا نسيتوا الأحداث انا شخصياً نسيت الاحداث 🙂
المهم قد توقفنا في الحديث السابق عند ان تاو والشلة الكريمة بتاعته هربوا وفي واحد سمع صوتهم وهما بيتخانقوا فبلغ عنهم، واكسو في قوات صاعقة هجموا عليهم وخدوهم بالمعني الأصح اتخطفوا تاني 🙂😂
كم انا شريرة، انا شريرة 😂😂
.
.
.
صعدوا بالإجبار الى السيارة وايديهم مقيدة للخلف ولا يرون شيئاً من القناع القماشي الذي علي رؤوسهم.
كاي : اتخطفنا تاني،،اتخطفنا تاني.
اخذ يكرر بنبرة باكية. وبجانبه تشين الذي حاول ان يفك قيوده ولكن بلافائدة.
تشين :ايه هو مفيش غيرنا في كوريا تخطفوه. كل ما تتزنقوا في حد تيجوا تخطفونا احنا.
بيكيهون : اهئ اهئ خطف تاني هو انا قلبي طاب من الأولاني.
دندن بنبرة باكية وهو يبكي.
كاي : اتخطف تاني ليه عيب على عضلاتي والله . انا ابن ناس علي الأهانة دي ما تتكلم يا سوهو..
سوهو : سيب سوهو واللي هو فيه دلوقتي.
تشانيول : ك.. كيونغسو.
اخذ ينادي عليه بصوت هامس ولكن الأخر لم يرد عليه.
تشانيول : ياسطا رد يا سطا بالله عليك.
دي او :ايه عايز ايه!
تشانيول :حد يقول للسواق يركن علي جنب في اي حتة الله يستركوا.
بيكيهون :ليه في ايه؟
تشانيول :اهئ اهئ عايز ادخل الحمام.
اردف ليصمت الجميع بحسرة مما سمعوه هم في عالم وهو في عالم اخر.
دي او : يارب لا تاخده لتاخدني.. يارب الرحمة ارجووك.
اخذ يناجي ربه وهو يتنفس بأضطراب يحاول ان يهدأ نفسه.
شيومين :حمام ايه دلوقتي يا زفت انت. مخطوفين وتقولي حمام اشكالك دي اللي هتعجل بنهايتنا.
اردف بحنق من بين اسنانه ليبكي تشانيول في صمت بعد مرور خمس دقائق في الطريق.
تشانيول : لا كدة كتير عليا نزلني علي جنب لوسمحت بقولك نزلني.
قطع ذلك الصمت بصوت جهوري وهو يحاول الوقوف ولكن رأسه ارتطم بالسقف ليعود مكانه مرة اخرى في ألم وتقريبا فقد الوعي من شدة الضربة ليرمي جسده ناحية كاي الجالس بجانبه.
كاي : يارب ارحمني حد يشيل البغل ده من علياااا.
صرخ وهو يحرك جسده بشدة يحاول ان يبعد الأخير عنه لكن بلاجدوى.
بيكيهون :جماعة؟!!
نادى بصوت هامس قليلاً.
سيهون : ايه؟
بيكيهون : ايعقل لي سومان هرب وبعتلنا رجالته يجيبونا علشان يسلمنا بنفسه.
تو ان اردف تلك الجملة انصدم الاخرون منهم سوهو الذي اغلق عيناه في حسرة من تحت القناع.
سيهون : لا ياعم تف من بوقك ما تقولش كدة مش معني اننا خطفناه وبهدلناه يسلمنا تسليم اهالي سنسن طيب وميعملش كدة.
اردف بخوف ونبرة باكية.
تشين : طيب؟ !! بعد اللي عملناه ده كله طيب. ده انت ودي او كنتوا بتدربوا علي لعبة التصويب بالسكاكين عليه.
سيهون :انا يا بني؟
كاي :اه صح بأمارة التفاح ايوة. بصوا بقولكوا من دلوقتي انا لوحد جه ناحيتي في القسم هعترف بكل حاجة وان تشين ودي او كانوا بيكهربوه في قفاه ومش هسكت انا بعرفكوا اهو.
تشين : لا اصيل بروح امك أصيل.
سيهون : ثواني ماهو يمكن ميكونش لي سومان وتكون جيسيكا قفشت اننا نصبنا عليها في المخدرات.
اخذ يحدثهم وهو يفكر علي اعتقاد ان لا احد يسمعهم.
كاي : اعتقد ان لي سومان ارحم بكتير من اللي جيسيكا هتعملوا فينا. انا متخيل وهي بتدخل علينا فرج ورجالته والله.
بيكيهون : اهئ اهئ فرج تاني انا لسة بتعالج من اللي حصلي من ساعتها.
اخذ يبكي بحسرة وهو يتذكر ما حدث له.
سيهون : يابني متزعلش ان شاء الله مش جيسيكا هو ده اكيد صاحب بيت شيومين خطفنا بعد ما لبسناه كام قضية محترمة، حريق البيت ومخدرات، وسرقة...
اخذ يعدد مصائبهم.
سوهو: ماتبس بقا ياعم الزفت انت؟ هو احنا في كافيه امك بندردش مش ملاحظ اننا لسة في ام العربية واحتمال يكونوا بوليس اصلا وسامعين كل القرف اللي انت بتقوله ده.
كاي : ياجدعان انا قولتها مرة ومش هكررها تاني طلاق تلاتة لو بوليس انا معرفكوش انا بحذركوا اهو، ابعد عني كتك القرف في معرفتك مش قادر اتنفس.
في البداية اخذ يهددهم ومن ثم دفع تشان بشدة ليبعده عنه ولكنه مازال فاقد الوعي هذا افضل من ان يندب حظه معهم ويطالب بدخول المرحاض.
صمتوا قليلاً لكن بيكيهون اعاد كلامه مرة اخري وهو يتخيل مصيرهم الاسود لم يتحمل دي او ليصرخ فجأة وجسده يهتز بعنف من الغضب حتي استيقظ تشانيول مفزوعاً من صوته.
دي او :انت ياسواق البهايم انت بقالك ساعة سايق ولا عارفين انت مين اصلاً. أنا عايز اعرف انتوا مين دلوقتي حالاً.
- اخرس ومسمعش صوتك.
اتاه صوت جهوري بأجابة لم ترضيه.
دي او :لا ياااحبيبي مش انا اللي يتقالي اخرس دي، وقف ام العربية وعرفني انت مين والا وكتاب الله اوديكوا في ستين داهية.
اكمل صراخه ليستمع البقية في صمت وخوف، حتي تشان الذي لم يجرأ علي الكلام يحاول فهم ما حدث.
كاي : اديله يا دي او مترحمهوش.
- انت لو عليت صوتك تاني هاخد رد فعل مش هيعجبك.
حذره بنبرة كلها سخرية لكنها لم تعجب دي او.
دي او : لو راجل وريني هتعمل ايه؟
تحداه في سخرية مشابهة ليسمع صوت سحب زناد سلاحه وتوجيهه في منتصف رأسه. لكن لم يكن دي او المعني بالتهديد بالقتل بل لاي الذي كان في الامام قريباً منه.
لاي : بسم الله ايه ياسطا في ايه؟ مالك بس ايه اللي زعلك؟
لم يكن لاي مستيقظاً بل غفى من طول الطريق ليستيقظ علي سلاح مصوب في منتصف رأسه.
-حرف زيادة وهفجر دماغه.
دي او :هه انت فاكرني هخاف يعني باللي بتعمله ده، وريني اخرك انا مش فارق معايا حاجة.
اكمل استفزازه ليبتلع لاي غصته في خوف.
لاي : ايه يا اخ اللي انت بتقوله ده بيقولك هيعمل دماغي شبه البسطرمة بالبيض وبتقوله مش فارق معاك حاجة.
- ده اخر تحذير!!
دي او :وانا بقولك لو راجل وريني هتعمل ايه؟
وجه المسدس ناحية عين لاي وهو يشدد عليه.
لاي :يعني هو بيهددك ويقول راجل ومش راجل وبيشكك في قدراتك وشوية كمان وهيجيب سيرة الست الوالدة بدل ما تقتله هو جاي عليا انا.. انت احول ياسطا.
انهي كلامه بنبرة باكية وقد بدأ في البكاء بالفعل.
سيهون :خلاص يا شباب ده شيطان ودخل ما بينكم عيب يعني نخسر بعض علشان خلاف بسيط.
شيومين :خلاف بسيط ايه؟ احنا مخطوفين يابغل انت!
سيهون: فيها ايه يعني مخطوفين هي اول مرة، اومال نسيب لاي يرجع من غير راسه.
اخذ يشرح وجهه نظره حني توقفت السيارة فجأة لينزل السائق والرجل الذي معه.
وفتحوا الباب الخلفي واخذوا يجذبون البقية بعنف حتي دور لاي.
-انزل!
امره بعنف غير مهتم بأن الاخير لايري اي شئ.
لاي : انزل ايه هو بعد قطع الخلف اللي حصلي ده هقدر امشي.
زفر الهواء بحنق ليحمله علي كتفه ولاي مربوط يداه خلف ذراعه، ام تشان اخذ يتوسلهم ليأخذوه للمرحاض.
دفعوهم بعنف لم يتبينوا سوى صوت فتح بوابة حديدية وكان هناك صوت موسيقي عالي ولكن كان يختفي تدريجياً حينما توجهوا الي اسفل عبر الدرج.
بكيهيون :ياعم متزقش طيب ما انا متنيل ماشي اهو.
توقف لينهر الذي خلفه ققد قام بدفعه حتي كاد يسقط.
- امشي وانت ساكت مسمعش صوتك.
بيكيهون : انا اخرج من هنا بس واوريكوا ازاي تعاملوا بيون بيكيهون كدة يا شوية اوباش.
صرخ ليدفعه مرة اخري ولكن تلك المرة لغرفة مظلمة بها انارة بسيطة ومن ثم ارغمهم علي الجلوس في احدي جوانب الغرفة.
سيهون : والنبي ياشباب حد يقولهم يجوا يشيلوا البتاع اللي علي راسي ده علشان قرب يجيلي ضيق تنفس ده لو مش هزعج الكائن القذر اللي جواكوا.
كاي : انا حاسس اننا مخطوفين في قبو ليه؟ احنا اتفقنا علي خطف بس يا جدعان مش حاجة تانية.
كانت الغرفة واسعة يتوسطها مكتب عتيق وكرسي موجه نحو الحائط يجلس عليه احدهم وجهه لا يظهر من الظلام الذي يحيط به اشار بيده لأحدي الرجال ليتوجهوا بفك قيودهم.
ازال احد الرجال القناع من علي وجه تشان ليحاول تشان ان يعتاد علي الرؤية كأنه اصيب بالعمي بالرغم ان الاضائة كانت عادية. وجد احد الرجال ينظر اليه باعين جاحظة وهو يقترب من وجهه في رعب، اخذ تشانيول يتمتم بكلمات غير مفهومة وقد شهق من الرعب.
كان سوهو يجلس بجانبه ولم يتم ازاله قناعه بعض.
سوهو:ايه في ايه؟
تشانيول : عذرائيل انا شوفت عذرائيل...
سوهو :ايه!!!
سيهون :ايعقل انتقلنا العالم الاخر.
بكيهيون :مُت قبل ما اتجوز اهئ اهئ.
اخفض رأسه في يأس وكان سيبدأ في البكاء، حتي انار ضوء في اتجاه المكان لتظهر احداهن تقف امامه ولكنها لم تظهر لهم فقد كانت مشغولة بمساعدة الجالس علي الكرسي. تو ان رأوها قام سيهون بالتصفير بأعجاب ليرفع بيكيهون رأسه بسرعة ويبتسم بخبث.
بيكيهون : مش تقولنا ياجماعة ان اللي خطفانا واحدة ست كنا لبسنا حاجة انظف من كدة.
اردف وهو يوجه كلامه للرجل الذي احضرهم ولكنه نظر لهم شرذا وبأستحقار.
اماتشانيول الذي ارتسمت على وجهه ابتسامة بلهاء اخذ يلوح لها في اعجاب.
تشانيول : هاااي.
ابتسمت لهم ومن ثم وضعت ما في يدها علي المكتب، همس لها الجالس علي الكرسي بشئ ما فهزت رأسها بهدوء ومن ثم خرجت والجميع ينظر لها فقد كانت ملامحها جميلة.
سيهون : انسة يا انسة رايحة علي فين احنا لسة متعرفناش.
حاول ان يقف يلحق بها ولكن تم اجباره علي الجلوس.
تشانيول : لوسمحت ممكن تندهلها.
طلب بأدب ونظرات بريئة فنظر له احد الرجال مفتول العضلات.
- ليه؟
تشانيول :وهي ماشية سرقت قلبي وانا عايزه دلوقتي حالاً.
اجاب بثقة وملامح جادة لينهض دي او فجأة ويمسكه من لياقته.
دي او :هو المصيبة اللي احنا فيها دي مش مأثرة، العركة اللي احنا فيها دي مش عاملة فيك اي حاجة يا اخي انا تعبت يا اخي يلعن ابو معرفتك.
كان دي او سيلكمه ولكن الجالس علي الكرسي استدار لينظر له الجميع، حتي تشانيول الذي فتح فمه من الصدمة.
سيهون : اوووه.
وقف سوهو بصدمة وهو لا يصدق.
تشانيول : اا... المرحوم بذات نفسه.
اردف ليفقد الوعي ويسقط علي الارض لم يهتم له دي او.
سوهو :ادريان انت لسة عايش!!
قال بحماسة وهو يتوجه له يحضنه ولكن الرجال منعوه، فبدأ سوهو بالبكاء بتأثر.
سوهو : اهي اهي لسة عايش انا ربنا نصرني اهي الحمدلله.
اردف وقد ارتمى في حضن شيومين وهو يبكي.
ابتسم ادريان بسخرية للعلم كان وجهه مشوه من كثر الخدوش وكثرة الضمادات التي علي وجهه وهناك خياطة ناحية حاجبه وانفه ، كما ان ذراعه قد كُسر.
استند علي عكازة وقد اشار لاحد الرجال ان يساعده علي الوقوف. ومن ثم ساعدوا تشان علي النهوض.
تشانيول : كُتر الصدمات ده خطر عليا طلاق تلاتة صدمة تانية مش هتلاقوني.
ادريان : ازيكوا يا شباب؟
كاي :متخزوقين كالعادة.
اجاب بسخرية ليهز ادريان راسه بتفهم.
سوهو :انت كويس؟ روحت المستشفى طيب؟
انهال عليه بالأسئلة ولا كأنه امه.
ادريان : متقلقش ماليش في جو المستشفيات.
تشين : مالكش في جو المستشفيات ايه؟ ده انت متشلفط.
تشانيول : هو انت خرجت من العربية ازاي، انا شايف العربية وهي بتنفجر.
ادريان : انا مش بموت بالساهل كدة.
شيومين : صداع من الثقة اللي مقطعه بعضها
لاي : سؤال معلش انت لسة عايش ازاي، انا لما رجلي بتخبط في الكرسي وانا ماشي روحي بتطلع.
تشين : سمعت انك اتخزوقت تاني.
اردف بسخرية مشيراً لما فعلته به جيسيكا مرة اخرى
ادريان :هه وانا سمعت ان جيسيكا ضحكت عليكوا ومجبتش اصحابكوا.
اجاب بتحدي وهو ينظر له بقرف
سيهون : شوية رجالة واحدة نسوان حاطة عليهم كلهم بيعايروا بعض.
تشانيول : ياجماعة اهدوا احنا هنعاير بعض خلصنا، ضحكت عليه وعلينا ووقعتنا كلنا في بعض حصل خير مش اول مرة يعني.
ادريان : والله لو كنتوا التزمتوا بالخطة مكنش حصل ده.
كاي :هيههي خطة مين يا ابو خطة، هو اللي حصل ده كان في خطة دي اول ما مسكت كاري كل حاجة باظت وانت عملي فيها سبع رجالة وجايلي بعربيتين بس. جاي تخطفنا وجايبلنا قوات خاصة ورايح لجيسيكا بعربيتين بس .
صرخ به في غضب وبيكيهون وشيومين يمسكون به يحاولون تهدأته.
بيكيهون : اهدى يا كاي مش كدة صحتك ياراحل احنا محتاجينك
ادريان : متقلقوش كل حاجة هتخلص الليلة دي تعالوا ورايا.
تشين : خازوق بيتكلم انا اول مرة اشوف خازوق بيتكلم
قلد تشين كلامه في سخرية واستحقار وهم يتبعونه.
ساروا التسعة خلفه ومن خلفهم الرجال ليهبطوا بالسلالم الي الطابق السفلي.
انتفض جسد تشان عندما سمع صوت تكسير وصراخ من بعيد.
تشانيول : هو انت بتعذب حد تحت ولا ايه الصوت ده.
سأل في خوف كالأطفال ليبتسم ادريان بثقة، امر احد رجاله بفتح الباب في نهاية الممر، ليجد ثلاث رجال يحاوطون احداً ما وينهالون عليه بالضرب.
بيكيهون : فرج!!!
تشانيول : انت جيبته ازاي؟
ادريان : مش كان معاكوا في العربية!
تشانيول : معلش من كتر الحاجات اللي عملناها مش متذكر.
اجاب بحرج، اما سوهو كان يقف هو والبقية فاتحاً فمه من الصدمة لما يرونه أمامهم وبيكيهون فضل الأختباء خلف سوهو، واسترقاء النظر في خوف.
استمر الرجال في ضربه بطريقة وحشية، يحاولون الوصول لأجابة عن مكان جيسيكا، لكنه امتنع عن الحديث واخذ يضحك في عِند. والدم يتقطر من وجهه.
تقدم منه ادريان في خطوات ثابته وعيناه تكاد ان تحرق الذي امامه.
ادريان : جيسيكا فين؟
فرج : عند امك!
اجاب بسخرية لم يستطع سيهون منع نفسه من الضحك لكن قام شيومين بضربه حتي يصمت، وفي نفس اللحظة قام احد الرجال بلكم فرج في معدته حتي بصق الدماء من فمه.
ادريان : هسألك تاني جيسيكا فين!؟
فرج :مع حبيب القلب صاحبك!
شيومين : انا اول ما شوفت البت دي قولت انها واطية وزبالة محدش صدقني.
سيهون : هيونج انا مسمحلكش انت ممكن تشتمني عادي تشتم دي او ممكن تشتم سوهو ياريت لكن جيسيكا دي خط احمر انت عارف انها زوجتي المستقبلية.
اعترض وهو يقف بحزم وملامح جادة، اخذ دي او يهدده انه سيكسر كل عظمة في جسده بعد ان يخرجوا من هنا. كما ان ادريان قلب عيناه في ملل ولم يهتم لهم.
ادريان : عند صاحبي فين؟
سأل بثبات .
فرج : اقولك فين ومتزعلش!
اكمل سخريته وضحكه، اما سيهون وبيكيهون قد انفجروا من الضحك.
سيهون : ياجدعان خرجوني من هنا ياجدعان انا بضحك في مواقف مش ولابد.
ضحك ادريان علي إجابة فرج ونظر لرجاله فبدأوا بالضحك برهبة حتي ارتفع صوت ضحكهم، اما اكسو نظروا لبعضهم وبدأوا بالضحك لا يعرفون لماذا ولكن فضلوا مشاركتهم.
سوهو : ياااه الواحد مضحكش كدة من زمان يالة يا ادريان انا عارف انك طيب سيبه بقا علشان ميموتش في ايدك.
اقترب من ادريان وهو يمثل الضحك وحاول اقناعه ولكن قاطعه ادريان بحركة انخلع لها قلب سوهو ليضع يده علي صدره بفزع.
امسك ادريان عكازة وقام بضرب به رأس فرج بعنف. شُج رأس الأخير ولكنه استمر بالضحك ليخرج ادريان سكين حاد من جيبه وقام بتوجيهها لرقبة فرج.
سوهو : ادريان متتهورش الحوار مش مستاهل.
ادريان : وصل الرسالة دي لجيسيكا انها لو وقعت في ايدي مش هعتقها وهخليها تندم علي اليوم اللي اتولدت فيه!!
ختم حديثه بأنه زين جسد الأخير بسكينه بجرح من نهاية رقبة فرج حتى منتصف صدره.
واشار لأحد الرجال فامسك كرسي خشبي وكسره علي رأس فرج، ليشهق البقية في فزع.
اما لاي لم يتحمل المنظر وفقد الوعي، حدث كل هذا في وقت دخول تشانيول الغرفة مع احد الرجال بعد عودته من المرحاض.
عندما رأي ما حدث صرخ وقفز ليحتضن الرجل في رعب.
بيكيهون : ده... ده ضربه بالكرسي.
سيهون : هو مات صح؟
ادريان : فكوه وسيبوا الباب الخلفي مفتوح واول ما يصحي عرفوني.
امر رجاله ليمسك عكازه ويعدل جسده للخروج.
شيومين : يصحى!! هو انت عندك امل انه يصحى!
دي او : تعالى هنا انت رايح فين انت لو سبته كدة هينزف لحد مايموت.
حذره وهي يمسك بذراعه يمنعه من الخروج.
ادريان : هه ده خدش بسيط ميعملش حاجة متقلقش هتلاقيه صاحي بعد شوية.
تشانيول : شقيت الراجل نصين وكسرت دماغه ورجالتك اعتدوا عليه وتقولي جرح بسيط.
صرخ بعدم تصديق ولكن ادريان لم يهتم وتوجه للخارج ومن خلفه رجاله، توجه الفرقة بهدوء وهم لا يستطيعون المشي، وشيومين وكاي حملوا لاي.
تشين : انا كنت فاكر اللي عملناه في لي سومان ده تعذيب. اقسم بالله احنا كنا بندلعه طلاق تلاته كنا بنلعب معاه.
اردف بعد دخولهم الغرفة وبدأ شعور الخوف وعدم الامان يتملكهم.
سوهو : قولتلكوا نروح للبوليس نسلم نفسنا محدش سمع كلامي، الواد ده لو عرف ان مفيش بضاعة اصلاً ممكن يقتلنا ويرمينا في البحر.
سيهون : لا ياسوهو متقولش كدة، ادريان طيب وكمان ده صاحب كاري يعني امان.
شيومين : بص مسمعش صوت اهلك تمام؟ مرة تدافعلي عن جيسكيا ودلوقتي ادريان وكاري وكلهم معرفة قذرة اصلاً وهنروح في ستين داهية بسببهم.
ختم حديثه فور دخول ادريان.
ادريان : يالة يا شباب اجهزوا.
دي او : نجهز لأيه؟
سأل بشدة ويظهر علي ملامحه انه لا يطيق ادريان.
ادريان : علشان هتجيبوا اصحابكوا النهاردة!
تشانيول : احنا؟
اشار لنفسه بصدمة.
ادريان :اها تاخدوا اصحابكوا وانا اخد البضاعة وجيسيكا مش ده كان اتفاقنا!
كاي : دقيقة ياجماعة نفهم انت عايز تبعتنا احنا نروح نجيب جيسيكا والعيال لوحدنااا.
ادريان :لا طبعاً هبعت معاكم رجالتي.
شيومين : يا اخ ادريان انت حاطت علينا أمال عالية جداً ومش عارفة اجبهالك ازاي بس أمال ذات نفسها بتموت لما بتسمع افكارك دي.
بيكيهون : طب ما تبعتلها قوات الدفاع الخاص اللي برة دي وبلاش احنا بالله عليك.
ادريان : انا بكلم جد دلوقتي! ومش عايز كلام كتير اللي قولته يتنفذ
دي او : هو ايه اللي مش عاوز كلام كتير وسع كدة انت بتتكلم كدة ليه اصلاً انت نسيت ان في واحدة اللي حاطة عليك ومشقلبة حالك كدة ولا افكرك.
صرخ وهو يدفع تشانيول من امامه ليواجه ادريان.
ادريان : والله نفس الواحدة دي ضيعت مستقبلكوا وهتدخلكوا السجن.
تشانيول : بيعلي عليك يادي او مترحمهوش وريله مقامه.
اخذ يحفز دي او ويشجعه
دي او : خليك في حالك بدل ما اخليك تحصل فرج.
بيكيهون : ياجماعة اهدوا خلاص مش بعد ده كله هنعاير بعض انا عايز اسأل سؤال واحد دلوقتي انت يامان راجل طول بعرض لسة في بداية شبابك مستقبلك الأجرامي مشرف ، عندك ملهى ليلي اخر عظمة، وكتيبة رجالة تسد عين الشمس قدامك كام سنة وتبقى زعيم مافيا قد الدنيا وترفع راسنا قدام المجرمين في المجال، عندك فلوس وعربيات واكيد في بنات حاطة عنيها عليك ده كفاية الممرضة اللي شوفناها معاك دي تداوي جراحك النفسية مش الجسمانية بس.
ادريان : ايوة بعد الخطبة دي عايز ايه؟
بيكيهون : السؤال هنا شاغل بالك بجيسيكا ليه ما تموف اون وتنسى. عندك كاي مثلا ارتبط بأتنين بنات، نص كوريا هيموتوا عليهم وسابهم وماشي مع صاحبه مونيكيو لدرجة شكينا فيه انه شاذ.
كاي : متغلطش في مونيكيو لوسمحت انا بحذرك.
بيكيهون :شوفت بقولك شاذ والله. في اي حتة واخده معاه ولا كأنه مراته.
المهم سوهو ده مثلا، شايف نفسه ليدر الليدرات كلهم عنده فلوس تشتري رئيس كوريا نفسها هيموت علي ريد فيلفت واحدة فيهم تعبره ابداً كلب ولا يسوى بالنسبة ليهم يعني الكلب بتاع تشانيول عنده كرامة عن سوهو ده ما احترامي طبعاً.
سخر منه لينظر له سوهو من اعلي لأسفل باستحقار.
بيكيهون : احكيلك عن مين ولا مين عن استاذ لاي بتاعنا ايوة الفسيخة المرمية هناك ده ميعرفش ستات غير امه وعمته بس اقصي احلامه يرتبط. يعني ده لو واحدة قالتله يا بيبي هيجيله سكتة قلبية اصلاً طلع قبل كدة وقال انه مستعد يشتغل رقاصة للي هيتجوزها.
كاي :انت عمال تتكلم ولا كأنك الطاهرة الشريفة ما تايون مسيطالك وفضحاك ولا نسيت دي.
ادريان : تايون؟!
بيكيهون: ايوة دي الاكس بتاعتي، ارتبطنا في ساعة طيش بس انا راجل مش بحب الألتزامات فزحلقتها وشايفني اهو مبتسم وسعيد ومتفائل بالحياة ولا عندي اي مشكلة.
فتح ذراعيه بساعدة وهو يصق نفسه، اقترب شيومين من ادريان هامساً له.
شيومين : اللي قدامك ده، لو طلعنا من الحوارات دي علي خير الإكس بتاعته هتلبسه ٣ قضايا تدخله السجن مدي الحياة منهم قضية تحرش ودعوى للفسق والفجور .
سمعه ادريان لينظر لبيكيهون بسخرية.
دي او : بعيداً عن الهري اللي الحيوان ده قاله. هو عنده حق فكك من البت دي علشان حوارتها كلها مشاكل وشوف نفسك.
ادريان :هه شكرا ياجماعة علي النصايح دي، بس انا عارف انا بعمل ايه كويس!
حاول ان ينهي الحديث معهم ولكن بيكيهون اعترض
بيكيهون : عارف انت بتعمل ايه كويس، يعني انا بقالي ساعة واقف احكيلك عن فضايح الفرقة وخوازيقهم وانت جاي تقولي انا عارف انا بعمل ايه كويس انت عبيط يا بني! هل انت عبييط؟
تشانيول : سيبه يا بيكيهون الواد ده مش وش نعمة اقسم بالله، ده انا اول ما شوفت الممرضة اللي معاك كنت هموت عليها خليك ورا جيسيكا خليها تنفعك.
قاطعهم دخول احد الرجال للغرفة بسرعة.
- القتيل صحي يا ريس!
تشانيول : قتيل! يقصد لاي ولا ايه؟
ادريان : حلو يالة اجهزوا! سوهو خد اصحابك وهيكون معايا رجالتي هتمشوا ورا فرج.
تشانيول : هو رأي يحترم وكل حاجة بس انا مش هحترمه!
ادريان : بس انا معتقدش اننا طلبنا رأيك.
دي او : متتكلمش معاه كدة انا الوحيد اللي اكلمه كدة مش انت!
اجاب بحدة ليشهق تشانيول من الصدمة لدرجة انه ذرف دموع الفرحة وهو لا يصدق ان دي او دافع عنه.
سوهو : بعيداً عن المحن ده تشان عنده حق انت ياحبيبي قلبك ميت مستغني عن نفسك وعمرك انا بعد ما شوفت عربيتك بتعمل شقلبظات علي الطريق قطعت الخلف يعني مبقتش نافع يعني انت جريت وراها بالعربية عملت فيك كدة اومال احنا رايحين نقابلها فيس تو فيس هتعمل فينا ايه!؟
اخذ يعترض وادريان لا يطيق نفسه لأن الوقت يمضي وهم يماطلون ولا يريدون التحرك فأتبع الطريقة السائدة السير تحت تهديد السلاح.
ركبوا السيارة بالأكراه وهناك اكثر من عشر اسلحة موجهة نحو رؤوسهم حتى دي او لم يستطع الأعتراض.
سوهو : ياسطا ممكن طلب؟ ممكن تشغلنا البوم ريد فيلفت الجديد.
قطع الصمت لينظر له الجميع بقرف حتي السائق.
سوهو :ايه يا شباب مالكوا قولت يطري القاعدة شوية بس، شكلكوا مضايقين خلاص سيب الاخبار انت حر.
ختم كلامه بأبتسامة محرجة ومن ثم اعاد نظره للنافذة بيأس. استيقظ لاي قبل خروجهم وكان يجلس بين احد الرجال وهناك سلاح موجه لأذنه يكاد يخترق طبلة اذنه.
كان صوت المذياع الخاص بالسيارة هو الذي يقطع الصمت بينهم فهم لا يعرفون وجهتهم او ماذا يفعلون حتي لكن سيتبعون خطة ادريان رغماً عنهم.
المذيع : ومن الاخبار الخاصة بالمشاهير المتداولة حديثاً هي اصدار اغنية بلاك بينك الجديدة التي تخطت التوقعات وتحكي عن الثقة بالنفس وتخطي المصاعب و عدم الاهتمام بالكارهين.
سيهون : اه يا فُجار ياولاد الابالسة سامع يا كاي يا حبيبي اول ما سيبت البت جيني من هنا وهي ماشية تحط علي الكل وتقولك كارهين هي تقصدك بس مكسوفة.
كاي :ما تخليك في حالك وانت شبه الولية الحرباية كدة.
المذيع :ومن الاخبار المتداولة وسببت ضجة منذ ساعات هي القبض علي اعضاء فرقة اكسو السابقين .
ختم المذيع جملته حتى صرخ من في السيارة بصوتاً واحد : ايه!!
دي او : علي الزفت ده!
المذيع : وقد تم اثبات القبض عليهم في احدي المناطق المتطرفة لمدينة سيول بعد الابلاغ عن حالة شغب. وقد اضطر الضباط الى صعق احدهم بالكهرباء بعد محاولته الهرب من الشرطة واعتداء احد الفتيات التي كانت معهم علي احد الضباط بالضرب وجاري اتخاذ كافة الاجراءات القانونية بحقهم.
بيكيهون : يعني هما اتقبض عليهم اهو يعني هما كويسين احنا رايحين نعمل ايه بقا؟
سأل بحماسة وقد تناسى الموقف،. وسوهو من الصدمة وعدم التصديق اخذ يبكي ويمسح وجهه في ملابس الرجل الذي بجانبه وهو يقوم بأحتضانه
سوهو : ربنا اتقبل دعايا علشان انا غلبان ومُبتلى انا كنت مُبتلى اهئ اهئ عيالي رجعوا كويسين.
تشانيول :لولولولولي الحوار خلص وقف ياسطا قدام اي محل عصير قصب والنبي لأعزمكوا علي حسابي.
شيومين : خلاص بم انهم اتقبض عليهم نسلم نفسنا احنا بقا.
كاي : نسلم نفسنا؟!
شيومين :اومال فاكرنا هنفضل هربانين طول العمر يعني.
تشين : عنده حق وقف يا سطا علي جنب او لف وودينا علي القسم حد يتصل بمراتي يطمنها ياجدعان اني رااجع..
شيومين :حبيبي احنا رايحين القسم مش رايحين لمراتك اصحى.
دي او : ايه ياسطا ما تقف مش سامع ولا اطرشت ايه مالك الشبكة واقعة عندك..
كان الرجال لا يهتمون بالهرج الذي حدث من الاعضاء وفرحتهم المبالغة فهم يتبعون اوامر ادريان.
- محدش هيتحرك من مكانه الباشا قال اننا رايحين نقبض علي جيسيكا واللي معاها.
شيومين : ايوة يا حبيبي اللي معاها اتقبض عليهم وهي كمان اكيد اتقبض عليها مش هيمسكوهم ويسبوها هي يعني شغل مخك.
- دي الاوامر ولاذم تتنفذ مسمعش حس حد.
دي او :اوامر مين يالة دي اوامر امك دي!
صرخ بشدة وفقدان صبر ليوجه البقية اسلحتهم في غضب ولكن ليس لدي او كما هو متوقع بل للاي.
الذي اخذ ينظر من حوله ليجد نفسه محاوط بخمس اسلحة.
لاي : ايه يا ريس في ايه بس؟ هو كل ما يهزقكوا تجولي انا نفيش غيري! ايه بتبصولي كدة ليه في حاجة علي هدومي
- اي كلمة وهتودع صاحبك!
حذر موجهاً الحديث لدي او لكن استمر بالنظر علي لاي.
لاي : انا مستعد اودعه من دلوقتي والله وسع كدة بالاحضان يا حبيبي في امان الله انت. هو انت مسافر ولا ايه؟
ادرف يحاول الوصول لدي او يودعه.
بيكيهون : يقصد اننا هنودعك انت يا لاي.
لاي : ايه ده هو انا اللي هسافر هتودوني فين؟
شيومين : ارجوكوا خرجوني من هنا انا عندي مرارة واحدة ومعنديش استعداد اخسرها.
كان معهم سيارتان و١٠ رجال لاحظوا دخول فرج احد البنايات وهو يسير ببطأ ويضع يده علي رأسه الذي مازال ينزف.
وضع دي او معهم الخطة وقام بأمساك سلاحه ومعه شيومين وتم تقسيم الرجال وصعدوا البناية اما البقية تسللوا من الخلف لمنع هروب اي احد.
دي او : احنا هنطلع وانتوا مع الرجالة ورا ألمح كلب فيكوا مش في مكانه هصفيه من فوق. والكلبين دول
"اردف قاصداً لاي وتشانيول "حد فيكوا يطلع من العربية هيلاقي رصاصة في نص دماغه امين.
تحرك ومعه تشين وسوهو والبقية انتظروا بالاسفل.
بيكيهون : تشانيول اركب انت ولاي وجهزوا العربية علشان لو حصل حاجة نهرب احنا.
تشانيول : وهنسيب دي او؟
بيكيهون : ياعم ما نسيبه هو حد قادر عليه.
وقف الجميع منتظرين في ملل، فقام سيهون بتشغيل موسيقي حتي يمر الوقت. في نفس اللخظة التي صعد دي او والرجال بحذر وقام بأقتحام احدى الشقق ليجدها فارغة.
فأكمل مسيرته للطوابق العليا حتي وصل للطابق الرابع وجد الشقة فارغة، لكنه اخذ يبحث في الغرف بحذر ولكن وجد المكان فارغ، اكمل الرجال بحثهم ولكن تشين وقف في الشرفة حتي وجد الباب الخلفي يفتح وهناك من يتسلل فنده علي دي او.
كانت جيسكيا ومعها رجلين لكن الخمسة الموكلين بالمراقبة انشغلوا بالاغاني ولم يلاحظوا.
سوهو : انتوا يا شوية حيوانات! يا اطرش منك له يا حيواااان.
تشين :دي او نزل.. احييه هيغتصبهم!
اخذ ينادي ولكن لم يستمع له احد. فنزل دي او بغضب ومن خلفه البقية. حتي وصل للسيارة كان تشانيول يجلس مكان السائق.
دي او : انت يا اعمي منك له البنت هربت وانتوا واقفين.
سيهون :بنت مين اللي هربت فين!!
صعد للسيارة وقام بجذب لاي والقاه علي الارض بشدة وادار السيارة وتشانيول تغير لون وجهه من الرعب.
تشانيول : طب استأذن انا بقي شكلك مجنون دلوقتي.
دي او : اثبت مكانك مش هرجع من غير ما امسك البت دي.
تشانيول : انا عايز اروح الحمام لوسمحت.
اردف برعب ولكن دي او لم يهتم وقاد السيارة بسرعة جنونية ولم يهتم بالبقية.
************************************
مدام الحوار بقى في ايد دي او دلوقتي فلا تقلقوا 😂
بم ان عيد ميلادي قرب فهنزل بارت في نفس اليوم ان شاء الله 😎😂😂
عيدميلادي علي اسم اغنية لأكسو شغلوا روح كونان اللي جواكوا واعرفوه 😎😂
في امان الله ❤️❤️🌸