ايوب شاف ف لطيفة لي هي الاخرى تتشوف فيه و كتحاول تعرف رااسهاا
من ساسهااا كضور راسها
فالبيت بشوياا حيت كتحس بيه كيف البيضةة شويا ويتهرس...
نطقات بصوت يكااد يسمع
"فين انا "
ايوب جر الكرسي و سااارح.
فيها يلاه ايگلس حس بيهاا تقصحات شااف يدو و بانو ليه شي خصلات من شعرها تخشااو فخاتم لي فصبعو
دغيا زولهم...
"سمحي ليا"
لطيفة مجاوبااتوش...وسكتات
مخليااه هو الاخر ساكت
معارف ميقول .. كيشوف فيها
وساكت حس بصوت تيليفون
جبدو من جيبو و طفاه ..
ورجع شاف فيهاا
"كي بقيتي؟"
لطيفة هزات راسها باه
"حمد لله واخا نعرف فين انا وشنو وقع ليا؟"
ايوب هز راسو باه ومسح على راسو
"نتي دابا فكلينيك صرحة انا فصباح كنت غادي لخدمة تا خرجتي ليا من جنب طريق كنتي كتجري عييت منكلاكصوني عليك ولكن موقفتيش للاسف ضربتك بلوطو ديالي"
ليطفة شافت فيه و هي ذكر مختار...لي كان باغي يتعدا
عليها بلا متحس بدات تتبكي
اما ايوب تخلع صحاب ليه...
وواش على الحادثةة
"عفاك بركة من بكاا عفاك شووفي راه نخلصك و نعوضك غير بلا بكى"
لطيفة عااد مزادت فبكاهاا
وتتنخصص..
."سمح لياا حيت عدبتك معايا"
ايوب:
"كيفاش؟ واش مكتبكيش على حادث؟"
لطيفة كدير ليه براسها لا
"لا نت بالعكس عاونتيني كون كان شي واحد كان ايخليني مليوحة فنص طريق "
ايوب هز راسو باه
"ماشي مشكل هانيةة"
لطيفة بدا الحزن على محياها
ايوب لحظ هدشي
"نتي بيخير؟"
شافت فيه وبتاسمات
"اه حمد لله"
هز راسو باه وسكت ..يلاه ايدوي حس بتيليفون
مرة خرى كيصوني ..
وقف ودوز الابيل
وتم غادي خاارج
"الو زهرة"
زهرة
"ايووب فينك دراري غادي يتغداو راك عارف مكيبغيوش يتغداو بلا بيك"
ايوب تنهد
"واخا انا جااي احبيبةة راني مزال فالخدمة عندي اجتماع "
زهرة
"واخا مهم متعطلش"
ايوب
"كوني هانيةة"
قطع و تنهد ورد تيليفون لجيبو
حل الباب ودخل عند لطيفة
لي كانت كيف جثة فوق البياص
شافت فيه و تنهدات
"وقتاش نقدر نخرج؟؟"
ايوب شاف فيها مطول
دوى فخاطرو
"مكرهتكش نبقا غير نشوف فيك"
لطيفة كتشوف فيه وكتسناه يجاوب...
تنهد
"معرفتش صرحة..
ايوب : ماعرفتش صراحة
فجأة دخل الطبيب بابتسامة ضاهرة على ملامحو .. لابس طابلية بيضة وسناطات ديال القلب على عنقو .. قرب ليها فحصها مزياان
بتاسم ليها : مدام لطيفة على سلامتك الحمد لله ماشي شي حاجة خطيرة
لطيفة هزات فيه راسها : ايمتا نقدر نخرج ؟
دكتور : من دابا تقدري تخرجي غير هو عطي الراحة لراسك وصحتك .. بتاسم مرة اخرى ليها ولأيوب لي كان واقف حاط ايديه على فمو عين فالطبيب وعين فيها ..
خرج وخلاهم بزوج
ايوب قرب عندها وهضر : قاليك تقدري تخرجي من دابا .. عطيني العنوان ديالك نوصلك لدارك وانا غادي نتكلف بكلشي
لطيفة حنات راسها بأسف : انا ماعندي حتى دار
ايوب بملامح مستغربة نوعا ما : كيفاش ؟
لطيفة : انا ماشي من هنا .. جيت باش نقلب على خدمة ونعيش هنا
ايوب تنهد : وفين عائلتك ؟
لطيفة دموعها سبقوها .. بطبعها نية ولي فقلبها على لسانها : راجلي كان باغي يذبحني هو وبا وانا هربت
ايوب مخرج عينيه : كييفاااش ؟؟ واش نتي مزوجة ؟؟
لطيفة حنات راسها : زواج الفاتحة .. مازال ماوصلت باش ندير لاكارط
ايوب : شحال عندك من عام ؟
لطيفة : عاد قفلت 15 عام ..
ايوب زاد خرج عينيه اكثر من صدمتو .. بالرغم من ملامحها البريئة كتبان كبر من سنها : لا حول ولا قوة الا بالله وشنو دابا فين غادي تمشي
لطيفة دموعها نزلو مسحاتهم بكف ايديها بطريقة طفولية خلاتو ساهي فيها : ماعرفتش .. المهم نتا الله يكتر خيرك اسيدي عاونتيني ووقفتي معايا انا غادي نشوف فين نمشي ضروري مانلقا شي خدمة
ايوب : لا ميمكنش نخليك .. غادي تمشي معايا للدار ايلا بغيتي ..
لطيفة تفكرات اخر مرة فاش مشات مع داك الشماتة : لالا شكرا غير بلاااش انا غادي نضبر راسي
ايوب : نيت الواليدة محتاجة لي يعاونها فشغل الدار .. ماتخافيش غادي تعيشي معاها .. ساكنة غير بوحدها
لطيفة هزات راسها بالزربة شافت فيه : بصح ؟
ايوب : اه .. ايلا قبلتي تجلسي معاها تعاونيها وتاخدي خلاصك الواليدة عندي عيانة محتاجااك اش قلتي ؟
لطيفة : اه واخا مانلقاش حسن من هادشي
هز راسو باه وجبد طيلي من جيبو عيط لمو خبرها بالامر وردة بالقبول ..
عاونها تنوض عطاها جلابتها لي كانت لابسة لبساتها وخرجات بانضة ملوية على راسها مخلية شعرها نازل على راحتو رغم انها انزعجت من الامر حيت مامولفاش تبقا بلا فولار الا انها ماعندها مادير
عاونها حتى خرجو وتكلف بمصاريف العلاج .. سنا شي وراق وعطاهم تدويرة حيت طلبو لاكارط ديالها وخرجها ركبات فاللوطو وديمارا ..
كازااا .. الدار البيضاء .. بيضة بناسها وعمراتها .. العاصمة الاقتصادية وبؤرة الاقتصاد المغربي
قداام مبنى طوييل وعالي .. كيضم شقق من السكن الاقتصاادي .. وقف اللوطو قدامها بعد رحلة لا بأس بها من تطوان لكازا مقر سكنتو .. نزل و حل ليها الباب نزلات وتوجهو للمبنى .. كانت الدار فالسفلي ..
شراها لمو تما حيت مكتقدش على الدروج بسباب الروماطيزم والسكر ..
دق فالباب وتسنى ثواني حتى تحل
كانت مرا عامرة شويا لابسة بيجامية بيتية ديال العيالات الكبار فسنها .. لاوية على وجهها فولار ابيض ومحزمة بطابلية لي ما كتخطى حتى وحدة من جداواتنا وامهاتنا واي مرأة مغربية .. رمز احداگة والتاويل والدراع الماضي ..
تقدم وقبل راسها وايديها وسلم عليها بالوجه
ايوب : هاهي الواليدة .. هادي هي البنت لي قلت ليك
المرأة : ايه اوليدي مرحبا بيها .. زيدي ابنيتي دخلي متحشميش
لطيفة وهي حانية راسها : ربي يخليك اخالتي
دخلو نيشان للصالون لي كان صالون مغربي متواضع .. مقاد ومتول بالفراش والطلامط فالاحمر .. فالجنب مفرشة سجادة وحداها مقرأة ديال القرآن مفتوح فالنص وفوقو تسابيح ..
دقائق معدودة كانت مقدمة ليهم الضيافة لي عبارة عن صينية دأتاي متولة مع حلويات مغربية .. مرأة باينة فيها الحداگة والتاويل غير من دارها بي نقية كتشعل ..
واخا كبيرة فالسن الا انه لي نفسو حارة ينوض بالكشايف عليه
ايوب : وا فطيمة را دويت معاك زعما متبقايش تعذبي راسك وتكايسي على صحتك
فطيمة : الله يا وليدي وملي مانوض انا شكون بغيتيه يشقا لياا
ايوب : الله يهديك الواليدة تانتي قلت ليك اجي سكني معايا مابغيتيش عاجبك بوحدك
فطيمة : وقر الشيخ منو اوليدي !!
سكتات وشافت فلطيفة لي حانية راسها وشادة كاسها بيديها .. قربات ليها الطبسيل دالحلوة ..
كولي ابنيتي دوزي كاسك
لطيفة : الله يخلف اخالتي
فطيمة شافت فايوب باش يشرح ليها شكون هاد البنت حيت لحد الان قال ليها غير غايجيب شي بنت تعاونها فشغل الدار
ايوب نضف حلقو وهضر : الواليدة هادي لطيفة ! البارح كنت صايگ وضربتها بطوموبيل .. البنت ماعندها حتى حد هنا فكازا وقلت علاش لا نجيبها هنا منها تعاونك ومنها تخدم على راسها حتى يحن الله
فطيمة وهي كتشووف فلطيفة كتعبر فيها : الله يا بنيتي على سلامتك .. مرحباا ابنيتي انا نديرك بحااال بنتي وربي شاهد عليا
ايوب باس على راسها : هادا المضمون فيك الحنانة .. يالاه انخليكم دابا خاص نمشي
فطيمة : سير اولدي الله يرضي عليك وسلم على زهرة
ايوب هز براسو وشاف فلطيفة لي مازال حانية راسها : رتاحي .. الدار فحال داركم .. ماغاديش نغبر بزاف واخا
هزات راسها باه ونزلاتو خلاتو ساهي فيها ..
تنهد وخرج فحالو .. جبد الطيلي لي غادي يطرطق بلي زابيل .. دوز ابيل كيتسنى يجاوب
حتى سمع الغوات ديال الدراري الصغار
ايوب : امالكم ؟
.... : واا فييينك قلت ليك الدراري مابغاوش ياكلو بلا بيك ومن قبيلة وهوما كيبكيو
ايوب تنهد : واها ازهرة هانا جاي .. راه كنت فتطوان على حساب الخدمة
زهرة : واجي دغيا عافاك
ايوب : واخا .. قطع وتوجه للسوبر ماركت تقدا شنو خاص وشي اغراض للدراري وتوجه للدار
قدام مبنى فحي راقي نزل بعدما بلاصا الطوموبيل هز لي صاشي وطلع فلاسانسور للدار لي كيفما وصل الباب كيسمع صوت الغوات والحرب ناايضة
جيد الساروت من جيبو وفتح الباب حتى كيضرب فيه ريحة بشعة البول ديال الدراري .. الدار مقلوبة سفاها على علاها .. الحوايج مليوحين فكل قنت
الصالون مرون بالالعاب والحوايج
طل فالكوزينة مقلوبة بالماعن موسخين
مشا للبيت ديال الدراري كضرب فيه ريحة البول مجهدة لقاهم فوق الناموسية بزوج كيلعبو واخد مالابسش سروالو ولاخر حوايجو موسخين بالماكلة
تلاحو عليه بزوج عنقوه وهو مخصر سيفتو من الريحة لي كيشم ..
ايوب نزل باسهم بالسيف : شكون دار هاد الحالة ؟
الدراري هزو صبعهم كل واحد كيشير للاخر
ايوب خصر سيفتو : ياك هضرت معاكم ديجا وقلت ليبيتيز لا ؟ ولا ماغاديش تاخدو دكشي لي كيعجبكم
هيتم : لااا بابا سيتوبلي بغيت شوكولا
ايوب : نتا بعدا حل داك الفم
هيتم حل فمو وشدو ايوب من فكو كيشوف سنانو المسوسين
تنهد وهو كيشوف حالة ولادو المهملة .. دا دوك لي صاشي حطهم فالكوزينة ورجع كيشمر على كمامو جر معاه الدراري التوأم هيتم وهارون للدوش ..
دوش ليهم وهو كيلعب معاهم فرحان بيهم .. ناسي او متناسي ديك لي برا .. ماسولش فيها حيت متأكد غادي تكون كيف ديما مخشية فالبيت شادة طيليفون ومخلية ولادها ودارها حالتهم
سالا ليهم الدوش وخرجهم لبس كل واخد فيهم وهوما كيفركلو ويلعبو ماخلاوهش يلبسهم فخاطرو ..
داهم لمطبخ حط ليهم ياكلوو مطمعهم انه غادي يعطيهم دكشي لي بغاو ايلا كلاو وجلسو بعقلهم ..
توجه لبيت النعاس ديالو .. حل الباب ودخل لقاها كيف ديما شادة الفون وكتفرنس مقابلة الگروبات والتفاهات ..
حيد قاميجتو ولاحها حداها حتى هزات راسها شافت فيه وحيدات الكيت
زهرة بتاسمت : جيتي
ايوب بعصبية : هانا جيييت !! فين نجي ؟؟ للمرض والعصاااب .. اش هاد. الحالة فهااد الدار ؟!؟؟
زهرة عقدات حواجبها المقادين بشكل رقييق مرققاهم بزااف .. سميمرة شوياا وملامحها صغار .. شعرها قصير دايرة ليه ليميش جامعاه اللور بفيليل .. كانت لابسة سيرڤيط فالكرونة مزيرة عليها : مالك كتغوت عليا انا راه ولادك لي دايرين ديك الحالة
ايوب زاد غوت اكثر : ولاادي اناا ونتي مصدقينهم عليييك ؟؟؟. اشنو خدمتك نتي كاااع فهاد الدار لي ماتقاابليش ولادك ودارك ؟
زهرة حطات الفون من ايديها وناضت عندو وقفات مقابلة معاه مدات ايديها ضوراتها على عنقو ودوات بهمس كتحلون : وا صافي احبيبي سمح ليا عارف شغل الدار مكيساليش وزيد عليها الدراري فحال الجنون مكيخليو حتى حاجة فبلاصتها ..
ايوب شاف فيها مطولا وتنهد .. تفك من ايديها ومشا وهو كيتمتم : كيحساب ليك هاد العفن اتغطيه ليك بالتقحبين ديالك
دخل للدوش وخبط الباب موراه مخليها كتشوف .. مدات ايديها عاودات جمعات شعرها وخرجات تبالي بدارها شويا سبقات الصالون جمعاتو وطرفاتو ومشات لبيت الدراري نفس الشي سيقات ورشات معطر فالدار بعدما حلات الشراجم تتهوا
مشات للكوزينة لقات ولادها كياكلو جالسين ومتبتين
زهرة : كتشوفوه كتوليو كي الملائكة
خلاتهم ومشات غسلات دوك الماعن بالزربة وسيقات ديك الكوزينة لي معلكة .. سالات كلشي وخرجات نيشان للبيت .. لقاتو متكي لابس سروال وعريان من الفوق .. حاط ايديه على راسو ومغمض عينيه
وقفات حدا راسو
زهرة : ماباغيش تعشى ؟
ايوب : ماخاصنيش
زهرة : وا نوض شوف الدراري باغيينك
ايوب : طفي الضو باغي ننعس
زهرة : والله يهديك ايوب مقلق مني انا والدراري شنو دارو ليك ؟
ايوب مسو فعينو وماتمسوش فولادو عزاز عليه بزااف ومكيبغيش يشوفهم مقلقين .. ناض بلا هواه وهو كيصوط توجه لعند الدراري عاطيهم الخاطر كيوكلهم ويلعب معاهم .. حتى سالاو وداهم ينعسو
عند لطيفة ..
بعدما خرج ايوب عطاتها فطيمة حوايج زهرة كانت مخلياهم دخلات دوشات ولبساتهم جاوها مزييرين حيت زهرة ضعف منها .. كان اليل وصل لنصو ولطيفة مازال ماجاها نعاس كتفكر فحياتها كيفاش تقلبات فجأة 180 درجة بلا متحس ولا دير ليها حساب ..
بقات كتقلب من هنا لهنا حتى استسلمات للنوم اخيرا
داتو عينو وهو بين ولادو منعسهم على درعانو بزوج .. ناض بشوياا من وسطهم غطاهم وطفا الضو وخرج .. توجه لبيت النعاس لي غير دخل ضربات فيه ريحتها
ضرب عليها كانت متكية فوق السرير بشوميز دونوي فالحمر شادة طيلي كيف ديما وكضحك
تمشا وهو عينو عليها تخشااا حداها وهي ماحاساش بيه حتى واش كاين .. رما عينو على طيلي فايديها لقاها كتفرج فلايف ديال شي بنت ..
ماتسوقش او حاول انه ميتسوقش كيفاش مرتو ناعسة حداه فكامل انوتثها وريحتها ضاربة فنيفو وميتأترش .. ضور وجهو وعطاها بالضهر وغمض عينيه كيسمعها كضحك على شي حوايج تاافهين .. هاملاه ! هاملاه بزاف
هاملة دارها وولادها ومقابلة الخوا الخاوي
بعد مدة سمعها سكتات ضرو راسو اش كدير دار لقاها تقادات فبلاصتها ونعسات
ماقدش يصبر ويزيد يتحكم فراسو كتر خشا راسو فعنقها وحط ايدو على خصرها مقربها ليه كتر ونغامس فبحر قبلاتو السخوونة ليها حتى حس بيها كدفعو من فوقها
زهرة : ايووب لا عافاك عيانة مافياش
ايوب انفاسو متسارعة كيهضر بهمس : باغيك
زهرة كتقاوم لمساتو : ايووووب وعافاك لا
ايوب بهمس اكثر كيضغط على جسمها تحت منو : ههششش صبري تسالاا
قرب وجهو يقبلها بعدات وجهها بطريقة خلاتو يتمنى الارض تنشق ويدخل وسطها ..
حس بكرامتو ورجووولتو فالتراااب ..
بلا مايزيد ولا حرف ناض من فوق منها مشا كيقلب على تيشورط ديالو بين الحوايج لي كلهم مرونين .. جبدو لبسو بالزربة .. هز سوارتو وطيليفونو وخرج خابط الباب موراه مخليها كتعيط عليه
جلسات فوق الفراش وهي كتاكل فضفارها بغيض .. ماكانتش باغة توصل لهدشي
تنهدات وخدات طيليفونها صونات ليه زوج مرات كيقطع المرة التالتة طفااه ! بقات طالعة نازلة كتلف الوقت كتسناه يرجع حتى داتها عينيها ..
فجهة اخرى كان صايگ مزير على الڤولون بكفوو كيبرد فيه اعصابوو
اهمالها ليه طلع ليه فراسو !
رفضها مضاجعتو فكل مرة هانو وقاسو فرجولتو !
وشكون هادا لي يرضاها على راسوو .. الراجل اسمى حاجة عندو هي رجولتو .. والا تهانت تهان كلو
تقدر حنا تجينا عادي .. انه الزوجة ماتقدرش على الممارسة اولا مايكونش عندها الخاطر .. ولكن الراجل لا كتجيه اهانة ليه ولرجولتو مدام هي مراتو وحلالو ماكايناش شي قوة لي تخليها ترفض
انانيين بعض الشيء .. كيشوفو غير راسهم وكيعرفو غير غريزتهم .. قليييل لي كتلقايه متفهم ان المرأة راها دم ولحم .. حتى هي كتعيى من شغل الدار ومقابلة الدراري وتقدر تكون حتى خدامة ..
غادي فالطريق صايگ وتايه ..
معصب ومجروح
مكسور ومغبون
مراتو حلالو لي كل مرة رافضاه ..
مشكل خلاه يرفع الراية البيضاء ويحط شطارتو
وشحااال من مرة واجهها لكنها كتنكر
شحال من مرة حتى وصلو للطلاق لكنها كترجع ليه كتبكي وكتحلف ماقادراش تفارقو
تايه بين زوج النقط
واش كاتبغيه اولا ؟
حتى مسألة انه يكون بديل عارف ومتأكد انها ماكاينااش ..
بين افكارو لقا راسو غادي فالطريق لا إراديا .. طريق مو !
وشكون فينا كره ينعس على حجر الحنانة ويرمي كل مشاكلو وراه ويشكي ليها ويهز حملو يحطو ليها تقسمو معاه ..
هادي هي الام ! ..
وقف قدام العمارة كيشوف الضو طافي
داز الحال !
غادي تكون نعساات
جات فبالو لطيفة اوطوماتيكيا جات فعينو صورتها بشعرها الاسود المسبسب وعيونها الحرشين وشوفتها القتااالة ..
بعد تفكير طويل وتردد حل الباب ونزل كيجبد السوارت ..
ضورو فالقفل زوج مرات تحل الباب ودخل بشويااا باش ميفيقهمش ..
ضرب فالصالون بان ليه جسم انثوي ناعس بكل اريحية فوق السداري .. ماحسش برجليه لي داتو خطوة خطوة حتى وصل لعندها ..
شمس بناني & وئام العمراني
جلس قدامها طاوي ركبة وموقف الاخرى كيشوف فتقاسيم وجهها باينين من الضو الخافتلي داخل من الشرجم .. تردد يمد ايدو لكن غلبو فضولو انه يتحسس بشرة وجهها لي كانت رطيطبة واخا محروقة شويا بالشمس
بلا مايحس مشا بيه صبعو الكبير لشفارها الطوال كيدوز عليهم بشويا
بعد ما وعى على راسو جمع ايدو على شكل قبضة وناض راجع باللور مشا نيشان للبيت لاخر لي كان ديالو هو وزهرة كينعسو فيه فاش كيجيو ضيااف
حلو البوانيي دخل وتلاح على السرير ممدد .. ضور عينيه على البيت بتنهيدة
حتى بلاصة ما سلمات من مشاكلهم وصداعهم كل ليلة
غمض عينيه كيحاول يستسلم للنوم لكن صورتها ماغابتش عن بالو
صورة لطيفة وهي مرمية فالارض ودماياتها ضايرين بيها
صورة عينيها لي كيهضرو قبل فمها
صورتها وهي ناعسة بهدوء تاام
هدشي كامل جا قدام عينو
بعد صراع طويل استسلم للنوم اخيرا
صباح يوم الاحد .. صوت الماطر غادين جايين برا والدراري صغار كيلعبو قدام الباب .. كأي عمارة من السكن الاقتصادي .. بيبان الجيران محلولين كيسيقو وكلها ملهي فشغلو .. كان صباح مليء بالنشاط والحيوية من طرف الحاجة فطيمة لي فاقت بكري اليوم توجد الفطور للطيفة لي مازال معتابراها ضيفة
هي الاخرى سمعات الحس ناضت شمرات على كمامها تعاونها ولو ان فطيمة رفضات بسبة انها مازال مريضة الا انها اصرت تعاونها
لطيفة عجنات الخبز دالدار و وجدات ملاوي وفطيمة حريشات معمرين بالجبن وقوة واتاي حطو الفطور فوق الطبلة جلسو مشات فطيمة تصلي وخلات لطيفة كتشوف فالطبلة مازال حشمانة بعض الشيء
سالات الصلاة وناضت جلسات كتكب اتاي المشحر برزتو .. مدات ليها كاس
ابنيتي راني بحال مك والدار راها داركم ماتحشميش
لطيفة : ربي يخليك اخالتي ..
فطيمة بتاسمت ليها .. من الشوفة الاولى رتاحت ليها ودخلات خاطرها ببرائتها وبتسامتها لي مكتفارقش وجهها رغم الحزن لي عايشاه
مدو ايدهم يباشرو فالفطور حتى بان ليهم ايوب خارج كيتفوه بشعرو المشعكك نازل على جبهتو وعينيه المارو المجبدين بالنعاس وشفايفو منفوخين ..
مشا نيشان للحمام غسل ايدو ووجهو وسنانو وخرج لاوي فوطة على عنقو باس لمو راسها وجلس حداها مبتاسم ل لطيفة
ايوب بصوت مدعدع بالنعاس : صباح النور
فطيمة : صباح الخير والرباح ايمتا جيتي اوليدي ؟
ايوب فضل ما يقول ليها والو : البارح الواليدة كانت عندي شي خدمة قريبة ساليتها وجيت ننعس
فطيمة : فيها خير اوليدي
ايوب شاف فلطيفة : رتاحيتي شوياا ؟
هزات راسها بآه مع ابتسامة خفيفة كتخليه ديما طامع فمزيد .. ضحيكة مثلا !
فطيمة شافت فيه كيشوف فالطبلة فهماتو !
كيبغي يفطر بأتاي بالنعناع ديما
فطيمة : ميحسابليش نتا هنا وانا عارفني مكنشربش النعناع انا انوض نوجد لوليدي براد على حقو وطريقو
جات نايضة شدها من ايديها وباسها ليها
ايوب : لا الواليدة بلا مانعذبك
فطيمة : لاواه اوليدي وتبقا بلا فطور
لطيفة لي كانت غير كتشوف بيناتهم دغياا جمعات الوقفة مشات للكوزينة دارت الما يطيب وجبدات براد صغير دارت فيه اتاي شللاتو اكتر من مرة وزادت السكر تسنات حتى طاب الما وكباتو عليه حطاتو يتشحر ومشات جابت النعناع كتغسل فيه .. قادات البراز فصينية اخرى مع كيسان وداتهم حطاتهم ليه قدامو ومشات جلسات بلا متهضر ولا تتكلم
خلاتو ساهي فيها وحال فمو
فطيمة : الله يرضي عليك ابنيتي .. عظاامك خفااف تبارك الله
قربات الصينية حداها كتكب اتاي وكتهز البراد الفووق حتى كيدير الكاس رزة فوقو. .
مدات ليه كاس داقو وهو كيتمدق .. هز عينيه فلطيفة
الله يعطيك الصحة كيف كنبغيه تماما
لطيفة بابتسامة : بصحتك
فطرو فجو صامت نوعا ما غير كليمات قلال كيضورو بين ايوب وفطيمة من بعد سالاو وهزات لطيفة الطبلة جمعاتها داتها للكوزينة خلاتهم متبعين ليها العين بزوج
فطيمة : هاد البنت تبارك الله عليها .. الدراع ماضي والفم ساكت ومقبوولة تبارك الله
ايوب هز راسو باه
فطيمة : قول ليا اوليدي الطفلة ماعندها لا والي ولا تالي ؟ فين عائلتها واحبابها
ايوب : الواليدة البنت ماعندها حد .. على ما قالت ليا مزوجة وراجلها جرا عليها
فطيمة حطات ايديها على فمها بصدمة كتهضر بشويا : وماشي ديالك اوليدي
تجيب طفلة هربانة من راجلها ومن قال غدا ولا بعدو يجيب لينا البوليس
ايوب : البوليس راه خاصينو هو لي مزوج بنت قد بنتو .. شي هادي لي كتشوفيها دابا راه عندها 15 عام .. باقة قااصر
فطيمة : استغفر الله !
ايوب : ونزيدك راه مزوجين زواج الفاتحة .. راك عارفة الناس دالبادية
فطيمة : الله ياربي مسيكنة باقة سنان الحليب الله يحن عليها وصافي
ايوب : امين ..
سكتو فاش شافوها جايا بعدما غسلات الماعن ديال الفطور نشفاتهم وقاداتهم بلايصهم
ماشي دارهم ! ومامولفاش ! لكن دماغها خفيف غير شافت فطيمة كيفاش كتشقى حفضات دغيا كل حاجة بلاصتها .. ارائكم بنات .. يتبع