| يا تعبي العشگته | ' باللهجة العراقية '

| البارت السابع |

#يا تعبي العشگته
#بقلم الراوية
#البارت السابع

بسم الله الرحمن الرحيم

| صلوا على النبي ⁦♥️⁩ |

.

لين..

حچت حچايتها و أني انداريت عليها و گلت

- شعجب ؟

رجعت خصلة من شعرها و گالـت بنبرة هادئة

- ظليت افكر..و صليـت استخارة
و حسيت نفسي مرتاحة

لو بغير وقت چان اخذت و انطيت وياها
بس ما اعرف شـصار بيه..خايفة و حيل من الورقة و الزلم
ردت بس اشوف عمـاد و احچي وياه..مستحيل اظل ساكتـه

- براحتچ..و رب العالمـين يقدم الي بي خير

عگدت حاجبها و گالت بتساؤل و هي ادحگ بوجهي

- لين شبيچ ؟ احسچ مو على بعضچ

- ما بـيه بس شوية تعبانـه من الدراسة

ظلت ساكته و ما حچت شي
راحت طيبة و صبت الغدا
اكلت شوية حسيت نفسي مسدوده
أخذت كتبي و گلت اروح لـ روان
منها انطيها واجبها و الاهم اشوفو لـ سلطان
دحست الورقة الي ما تجرأت و فتحت شنو مظمونها بالكنتور مالتي
و رحت استأذنـت من امي
بس گبلها سألتها عن عماد..و گالت خابرتو فد شوية يجي

وگفتلي امـي عند الباب و طلعت
رحت دگـيت باب اهل سلطان و شوية انفتح الباب
ابتسمت من شفت سلطان هو الي فتحلي الباب
سلمت و هو ردلي بصوت ناصي

- شلـون صرت ؟

- زين

جاوبـني بهدوء و مشى گدامي و اني رجعت گلت و احاول اجاري خطواتو

- رحت للطبيب

- تؤ..صرت احسن

طبينا للصالة و سلمت عليهم
روان تلگتـني و گالت نگعد بالغرفة
دحگـت لـ سلطان مدد على القنفة و امو بصفو

- سلطان إذا تريد اكو دكتور زين امي تراجعو علمود وجع معدتك

دحـگ عليه ثواني قليلة و گال

- ماكو داعـي گتلچ صرت احسن

ما حبيت اضغـط عليه
فـ استأذنت و رحنا للغرفة
انطيت روان كل الدروس الي اخذنها الـيوم
ترددت و حيل و اني بين أريد اگوللها و بين لا..

روان تفهمنـي من نظراتي و شافت الحيرة بعيوني فـ سألت

- لين شبيچ ؟ شو مو على بعضچ
حتى ما اصريتي نظل بالصالة

ذبيت حسـرة و گلت و أني اتقرب عليـها

- روان اني حيل خايفة

عگدت حاجبها و گالت

- من شنو ؟ بس لا على موضوع طيبة

هزيت رأسي بـ لا و گلت

- لا مو هيچ..بعدين نسيت اگلچ طيبة موافقة على ضرغام

ابتسمت روان و گالت

- والله ؟

- اي والله..و تنتظر عمـاد يجي تا تنطي الموافقه
بس مو هذا الشاغل بالي..روان خالي تهدد

حچيت آخر كلامي و هي تقربت عليه و صرنا وجهه بوجه و حچيتلها كل الصار
و مع كل حچاية تفتح عينها على وسعها..و من وصلت لمن حط الورقة بصدري لطمت على صدرها و گالت

- يمةه يولي لين شلون گدرتي تتحملين ؟؟
زين خالچ ما يدري

هزيت راسي بـ لا و جاوبتهت و أني احس الغصة خنگتني

- بعدو ما جا..انتظر رجعتو من الشغل

- و الورقة ما عرفتي شنو بيها ؟

- لا..الزلمه گالي لا تفتحينها بيهـا حچي كبار

حطت ايدها على حلگـها و هي ادحـگ عليه
و أني جريت حسرة و گلت و عيوني غورگت

- حيل خفت من تقرب مني
الله لا يـحط احد بهالموقف.. انسان مقرف

حچيت حچايتي و عضيت على شفتي
دحگـت للساعة و گبل تعدلت بگعـدتي ما ردت ابچي..و خصوصاً گـدام احد.
اخذت كتبي و گلت

- اني لازم اروح..اريد اقرأ

- نقرأ سويه ؟

- مالي واهس..اني تفكـيري مو صافي اگوم أثر عليچ

ظلت روان ادحگلي بنظرات قلقة..تريد مني انو انطق كلمة و ابرد قلبها
ابتسمت و گلت

- لا تخافين خالي يحلها

- الله عليـچ اي شي يصير گوليلي

هزيت رأسي بـ اي و طلـعنا من الغرفة
من صـرنا بالحوش شفـت سلطان واگف..منطينه ظهرو..لابس تراك بيتي بالون الأسود
من عشاق الون الأسود..اغلب ملابسو بهذا الون
دحـگت لـ روان و تسألت بصوت ناصي

- شبـي ؟

- ما ادري والله

جاوبتني و رجعت گالت و هي تلتفت عليه

- سلطان بيك شي

اندار عليـنا و هز راسو بـ لا و گال بنبرة هادئة

- لا ما بـيه

راحت عليه و سألتو باستغراب

- عجـل ليش واگف هين ؟
خوما اكو شي

رفع التلفون و گـال

- چنـت احچي بالتلفون

- خوما معدتك بعدها توجعـك

- لا احسن..

ختم كلامو بـ ابتسامة الها..حسيتها مثـل نسمة ربيعية على گلبي.. ما خلاني اتمتع بيها سرعان ما تحرك بخطوات مدروسة و طب جوه.. و اني ظليت اتبعو بنظراتي الا ان فات جوه
انداريت علـى روان و گلتلها مخاوفي

- اخوچ بي شي غريب

- ما اعرف لين والله.. حسيتو تعبان
يمكن من الدوام

ما ادري حسيت البي مو بسبب الدوام..گلـبي چان يگلي هالتعب مو مرض جسدي..لا نفسي
سلمت على روان و طلعت..

من وصلت للبيت لگيت عمـاد جاي يتغدا...

- ويـن چنتي ؟

استقبلني بالسؤال و أني اتحمحمت و گلت

- چنت بيت خالتي .. أنطيت روان الواجب

گام من الصينية و أني وديت كـتبي للغرفة
شفت طيبة الي گالـت گبل

- حچيت وياه

- اي و شنو گال ؟؟

- گال بس فشلتينا گدام عمامچ

هزيت رأسي بـاي..اوف چان الشاغل بالي موضوع طيبة و يا ريتني ظليت عليـه
رحـت ناحية الكنتور و طلعت الورقة و حطيتها بجيبي و أني اسمع طيبة التگول باستياء

- يعني شگد بارده انتي ؟؟ شبيچ لين شصاير
شو چنتي متحمسه للوضع كلشي صار عندچ عادي ؟؟

صديت عليها و گلت

- يعني شتريديني اسـوي ؟؟
اگوم ارگصلچ لو شنوو !

رفعت تك حاجب و گالت

- لا والله صايرلچ شي..تعاي گولي شبيچ

- دعوفيني

حچيتها و طلعت من الغرفة..
سألت امي على عمـاد و گالت بغرفتو..
كالعادة ما دگـيت الباب گبل طبيت
من فتت رفع راسو من على موبايلو و گال بعصبية

- ما عندچ ذوق دگـي الباب
عبالك مداهمه

ما جاوبتو رحت گعدت يمو..بالاول ترددت بس لازم يعرف
ناوشتو الورقة و هو رفع حواجبو و گال بسخرية

- بس لا رسائل غرامية

و بنفس النبرة گـلت

- لا عمري تهديديه

من حچيت حسيت ملامحو تشنجنت..گبل سحب الورقة و فتحها..ادحگ لايدو رجفت من فتح الورقة رفعت عيني ودحگت لـ عيونو گامت تلتهم الاحرفو نظراتو تتحرك على المكتـوب.

- شكـو

سألتو بنبرة خافته..و هو گبل طبگ الورقة و گال و كانو هسا تذكر وجودي بالغـرف

- خوماا قريتيها ؟

- لا..الزلمه النطانياها گال لا تقرينها

- ليش سلموها بيدچ ؟

حچاها بقلق واضح على نبرتو....و أني گلت بكذبة صغيره

- اي..من جيت من المدرسة وگفني زلمه
و انطانيها

- ابو حاجب مطبور ؟

هزيت راسي بـ اي..ما ردت احچيلو الصار.. ما اريد ازيد رعب فوگ خوفو
ادحگلو گوه كاتم غضبو من سالفة التهديد
الجتي لا على البال و لا على الخـاطر

- علمود الدين مو ؟

هز راسو بـ أي و دنگ و هو يمسح على شعرو..اصابعو تمشط خـصلات شعرو السود

- انت ما عندك فلوس الدين ؟

- دينهم يكسر الظهر..اني شورطني و اشتريت البضاعة منهم..گالولي جماعة السوگ لا تأخذ منهم هذولة ناس شرانين بس اني ما درت بال

- زين شگد الطلب ؟

ضحك و دحگلي و رفع ايدو و گال

- خمسة

- خمس ورقات ؟

هز راسو و گال

- خمس ملايين

- اييي سهلات روح ادفعهن و سد حلوگـهم

- ليـن منين اجيب ؟
كلهـا تشتري بالدين و السوگ واگف..من غير قساط السيـارة و إيـجار المحل

ظليت ساكـته و ادحـگلو و اني حايـره و مقهـوره
عليـه..قبل فترة اشترى سيـارة بالاقسـاط
و ورا كم يـوم احتاج فلوس و باعها..و خسـر بيـها
فلوس البيعه انطاهن للشخص الي يريدهن و لحد هسا يـدفع بالاقساط و من هيـن  المحل و إيجـارو الغـالي لأن موقعو زين صاير بنص السوگ..

- زين ما تعرف احد يگدر يدينك ؟

- يعني ادين تا انطي الـطلب ؟

- ايي شبيـها..خوما تظل هيچ

- لين انتي ما تعرفين شي..روحـي التهي بدراستچ

- لا مـا اروح..
همي من همك..

صفن بوجـهي لحظات و مسح وجهـو
و صد عني..و اني سكتت و صديت للجهة الثانيه
كلمة طلعت سهواً مني..محد بينا متعود انو نفضح خوفنا لو حبنا و تعلقنا بالأخر
ظلينـا اثنينه ساكتـين احـاول الگه حل..ورا ما طردت خجلي من بالي
هزيـت رجـلي بتوتر و هو صاح بيه لأن دم سنونو هاي الحركة

- بطلـي

گبل بطلـت و هو اندار و بس اسمع تنهيداتو
و كانـو گاعد يحارب او چان بسباق طويل

- زين هذولة ليش يهددون ؟ يعني ليش ما يجون ويحچون وياك بالهداوه

صد عليه و ابتسـم و جـاوبني
ببساطه عكس حجم فعلتو

- لأن من ضربوني رحـت أشتكيت عليهم
و ظلوا كم يـوم بالسـجن و هسا حبو يردون حگهم

گـلتلو و أني اگول بداخلي والله همزين حل بيهم و خصوصاً ابو طبره الچنو ثور

- ما تنلام بيـهم..بس هسا المهم موضوعـنا
شـلون تحـل الوضع

- ما ادري

جاوبني باختصار..و گام شگگ الورقـه و لمها بيدو و گال

- راح احاول احچي وياهم..حتلو رجعت البضاعة

- بس صار فـترة..يعني يمكن ما يقبلون

- والله ان قبلو او لا..شسويلهم منين اجيبـلهم فلـوس !

طلع من الغرفة و طلعت ورا و گلت

- اگول لأمي

- اني احچي وياها

- زين بـشنو هددوك ؟

اندار عليـه و دحگ عليه ثواني و گال

- بشي تافهه..سوالف عصـابات

ختم كلامـو بضحكـه و طب للصالة
و أني لحگتو
گعد يم امي و گام يسولفلها..بس أكيد ما جاب سالفة التهـديد هو دحگلي بنظرة انو ما تجيبين طاري هالشي
فـ سكتت..مع انو انبني ضميري

چان يـوم خميس و حمدت الله انو باچر جمعة
من هيـن ما اريد اداوم لأن بعدني خايفة لا هذوله يتعرضـولي و من هين ما الي واهس

مر اليوم و طيبة كـل شوية تسألني شبيچ ؟
و أني اگوللها ما بيه
ثانـي يـوم بالليل جوي عمـامي
ما چان عندي واهس اطلعلهم..گوه بدلت و طلعت
حدو المهر و طيبة طلعت فطينه گالت 5 ملايين
و امي و خالي يگولون لا 3 لو 2 و نـص
لأن عمام

اني گاعـده بالزاوية و ادحگـلهم و قررت ما ادخـل
الا إذا استعدى الأمر..بس من شفت عمـي علاء اعترض علـى المهر
اني گلت بصوت عالي نسبياً و ادحـگ عليه

- عمي علاء انت شنو ضـارك ؟ خوما حاط من فلوسك

- لين احترمي

صاحت بيه امي واني گبل وگفت عـلى حيلي و گلت

- اني ما سويت شي يقلل من احترامي
هو ليش معـترض إذا عمي جابر و ضرغام راضيين ؟
اذا توي بعدنا گلـنا بسم الله و عمي مدخل بالصـغيره و الچبيـره

- عمي و الو حق

حچاها بهاء و أني صديت عليه و هو يخزر بيه
شلون شكول عابت..

كتفت أيديه و گلت حاولت اكون هادئه

- الو حق باشياء..و اشيائات لا
يعني اذا القاضـي راضي ليش هو يعتـرض

- لين طبي جوه

حچاها عمـاد و هو خزرني
شفت امي و نظراتها المو راضيه على كلامي..و حتى طيبـه
گلت بگلبـي مو صوچهم صوچي اني الي محروگ دمي عليها

طبيت للغرفة و رگعت الباب ورايـه..
و ظليـت گاعده و اني اهز رجلـي بانزعـاج
متحسف على خمس ملايين..و هو ما يشوف الناس و العالم شگد تدفع

تقريباً فوگ النـص ساعة و سمعت صوتهم راحوا
ضحكت و أني اقارن جيتهم ذاك اليوم و جيتهم هسا
هذيچ الجيـه عبالـك يريدون ياخـذون فصليه گبل جيبها تا نعقد

شوية و انفتـح الباب فاتـت طيبة
چـانت لابسه فستان طويل لونو ازرق فاتـح و حجاب اسود
گعدت على التخـت و دحـگتلي و اني گلت

- هاا ولو

- اي راحوا

حچـتها و سكتت ثواني قبل لا تـگول

- سوو خمس ملايـين
و المؤخر 15

- هه و مكيفه 15 ؟ ماماتي العالم تحط مؤخر يكسر الظهر چان طلبتي 20

دحگتلي و رفعت تك حاجـب و گالت باستياء

- يعني مفاوله تريديني اطلگ

- منو جاب سيرة الطلاگ ؟ بس گاعـد احچيلچ عن الواقع..بعدين شبيچ انتي صرتي مرتو تا تطلگين ؟

ما عجبـها كلامي
و أني گلت بگلبي تنجازون..بس لو أني بمكانها لا سمح الله و الله اكسر ظهرهم و خشمهم و احط مؤخر 25

گمـت غيرت هدومي
و طلعت للصالة بس فتت امي استلمتني
دگ حچي و رزايل و عيب و أني مو هيـچ ربيتچ
و أني گاعده و اهز راسي بـ أي و يفوت الحچي من هين و يطلـع من هين
لأن اعرف نفسي من احچـي الحق اطلع اني أكبر غلـطانه..

عبالها الزمن واگف على زمنها..ما تـدري الدنيا تغيرت
و كلشي تغير..الذهب عالي و تجـهيزات العـروس
يا دوب يكـفيها..و اذا نقص شي عدها تعال يا عمـاد حط من جيبـك و هو ما عندو شي
و حتى احنا راتـب تقاعـد ما عدنا.. يعني بلكي يگدر يساعـدنا

مرات اگول يا ريت ابـويه من چـان عايش اشتغل شغلة حكوميـه و صار عندو تقاعـد..بـس الله يرحمـو
ظل عطال بطال و مـرات يشتغل اعمـال حره
على حسب كـلام امي

امي مـن شافتني ساكتـه و ما اجادلها صاحت بيه
و أني گبـل انداريـت عليها و گـلت بعـصبية

- يمه بـدل رزايلچ المعتـاده ما ادوريلچ على حل علمود اخـوچ و الديانه الحاگتـو

هي گبل سكتت و عماد گال و هو يگف على حيلو

- صمي حلگـچ لو بالنعال
صوتچ ما يعلـى على امچ

خزرتو و هو عاط بيه نزلـي عينچ
چنت حاظنه كوشه ذبيـتها و گمت و اني اگول

- تدرون شـي اني صوچي المحروگ گلـبي و دمي عليكم
و انت عمـاد تعرف ليـش رب العالمين ما گاعد يرزقك من ورا سوالـفك ما عفت واحد اذا ما خمشـتو و تكاونـت و اولهم اني بنت اختـك

طلـعت من الصالة و سمعتو گام يسب بيـه
و امي تهدأ بـي و تگلو عوفها ناقصـها تربية
ضحكت باستهزاء و رجعـتلهم و گلت و أني ادحـگ لأمـي

- والله اذا ناقصتني تربية او مو مربـية
فـ هاي تربيتچ أنتـي..فـ لـومي نفسچ و لا تلوميني

حچيت حچـيتي و اثنينهم ظلوا يدحگولي
اني عفتهم و فتت للغرفة و گمت اسمع الموشح المعتـاد لأمـي و هي تقسم و تحچي و بدت من ابوية و هي نـازله
طگيت الباب قفل..و دحگت لـ طيبة الگـالت و هي تگف يمي

- شحچيتي و گبـت العيطه

- تعيرني بدون تربية و هي الي ربتنا..فـ گلـتلها هاي تربيتچ

حچيتها و هي فتحت عيونها على وسعها و گالت

- يعني شلون وي السـانچ ؟؟
تدريـن بيها تنقهر

- عجـل أني ما انقهر من تگلي بدون تربية ؟!
من احچيلهم عن مخاوفي علمودهم.. من انطي رايي و محد يسمعني عبالك وحده جاهل
من احچي احچايه لو الامة تنگلب..من يبينون انو ثقتهم بيه معدومه
ما انقهـر ؟

گمت احچي و اني اصيح..عيوني غورقت و رفعت ايدي و گلت و أني احاول ما ابچي

- من امچ تگلي چنت اتوقعها منچ انو تخونين ثقتنا
انتي خنتي ثقتهم و رحتي صاحبـتي و سودتي وجوهنا و هسا كلها تحچي وياچ و محترمتچ و رأيچ مهم..شسويتي و امچ ظلت ساكته ليش ؟؟ لأن تحبچ
لأن تفضلچ عليه..هه والله غير حقـها غير اني من جيت على الدنيا كسحت ابوية و خليتو يموت

ظلت متصنمه بمكانها
و أني رحت دحست نفسي بفراشي..و أني اسحب النفس و اگول و ايدي تضغط على الحاف

- لا تشوفيني ساكـته و ما دايره بال يعني الوضع عادي
ترا والله اغلـس بمزاجي..عبالچ ما يحـز بنفسي انو اشوفهم يحبوچ أكثر مني.. ما يحز بنفسي من امي تظل ترزل و تحچي عليـه..من تسبني و تسب ابوية المات و خلص منها و من اخوها

- كافـي لين
ترا والله امي تحبچ..بس انتي ما تتحكمين بالسانچ
و شفتي شنو سويتي توي و من حچيتي على عمي علاء

صديت عليها و ضحكت بسخرية و گلت

- حچيت اي بس حطيت شي بجيبي لو علمودي ؟
غير علمودچ انتي..تعرفين عمـاد مطلوب و غارق بالديون ردت المهر هالگد تا ما تعتازين شي و يگومون يحيرون بيچ

تقدمت و هي تعگد حاجبها و گالت

- ليش خالي شگد مطلوب ؟

- هه حقچ ما تعرفين.. إذا ما ماكله همهم و لا تعرفين أنو خالچ تهدد إذا ما يدفع الفلوس
و شلون وصلو التهديـد ؟؟ عن طريقي من جروني من نص الشارع عبالك طلي و صعدوني بالسيارة
و تحرش بيه كل هذا و ظليت ساكته تا محد يخـاف عليه..بس ليش اظل ساكتـه على ناس يشوفوني بدون تربية

گعدت يمي و ادحگ لوجها القلق و الصدمة بعيونها

- شنوو تحرشوا بيچ.. لين منو هذولة

- ما عليچ طيبة..التهي بنفسچ

حچيتها و دفعتها و رجعت غطيت راسي
شوية و حسيتها طلعت..و ما هي الا دقايق معدوده حتى حسيت الباب انفتح
و صوت امي التولو انرفع الغطا عن راسي
دحگت چان عماد.. رفعني من كتفي و گال بصوت يرجف من العصبية

- احچي صحيح عزيز و جماعتو تحرشوا بيچ

دحگت لطيبة و صحت بيها

- يعني محد ياكل نعل الا تروحين تحچينها گدامهم

فر وجهي عليه و گال و هو يحاول يهدا

- لين صدگ تحرشو بيچ ؟ و الله ما اذيچ و لا اسوي شي بس احچيلي الصار

عيونو و نبرتو الخايفة و امي الگعدت يمي و هي تبچي
خلى صوتي يختفي بسبب العبره الخنگتني
هزيت رأسي بـاي و هو بتردد گال و كانو ما يريد يگول كلمتو

- تحرش جسدي

هزيت رأسي بـ أي بدون ما احط عيني بعينو
و هو على غفلة گام و اشتغل مسباتو و فشارو
و گبل طلع و لحگتو طيبة و هي تصيحلو
امي سحبتني لحظنها و هي تبچي و تگول سوده عليه بنيتي
ما بادلتها الحظن..و حسيت دمعتي جمدت بطرف عيني و ما تقبل تنزل
جتي طيبة و هي تگول و تبچي

- طلع ما لحگت بي يمه شلون هسا

دحـگتلها و هي جتي يمي و حظنتني
و اني مثل الجماد گاعده..ما اعرف هذا حب لو عطف لو خوف منهم

.

روان..

گاعده ادحگ على التلفزيون و بحظني چيس حب شمسي..اتفرج على فيـلم مصري لـ أحمد حلمـي
كل شوية اضحك
و سلطان گاعد و مخلي بحظنو ملازم و مركز حـيل..بس من تصير لقطة لو سالفة تضحك من سوالف حلـمي يضحك و يگول ما راح يخليني اركز اليوم
أمي نعست وراحت نامت..

- روان..اكو ملزمة بالسيارة تگـدرين تجيبينها ؟؟

گالي سـلطان بدون ما يرفع راسو و أني وخرت الجيس و گلت

- اي عمري

طلـعت و اخـذت السويچ
چانت الساعة قريـب الـ11.. فتحت السيـارة و لگيتها جيت افـوت بس صوت الباب جذب انتباهي

تقدمت للباب و صحت منو.. إذا چانت بنية افتحلها و إذا ولد اصيحلو لـ سلـطان

- أني..اني لمـار

وصلـني صوتـها و استغربت و تفاجئت من جـيتها علينا و بهـذا الوكت
رحت فتحت الباب و صارت گـدامي عيونها حمر و الحجاب لافتو و مايل بصفحة
و لابسه دشداشة مال بيـت و عليها صاية

- سلطـان هيـن ؟

هـزيت راسي بـ اي و فاتت و أني گلت

- شبيچ ؟

- كلشي بيه

حچتـها و گامت  تبچي
انقهرت عليها و شلون حالها
طببتها للهول..سلـطان چان مدنـگ و گال بدون ما يرفع راسـو

- ها لگيتيها ؟

- اي..سلطان

حچيتـها و رفع راسو..شفت الصدمة انرسمت على ملامحو من شـاف لمـار
گـام على حيـلو و گال

- لمار ؟ شجابچ

تقدمت عليه و اني واگفة بمكاني
بچت و هي تحچيلو بصوت يقطع الگلـب

- سلطـان الله يخليك ما عندي غيرك
ابوية المايخاف من الله يريد يزوجني و أني مو راضيـه

حطت ايـدها على ايدو
و هو وخرها و گال بنبرة حسيتها بارده
ملامحو الچانت مصدومه رجعت طبيعية و هو يگول

- و اني شنو بيدي اسوي !
احنا مو تعاوفنا ؟

- ما عندي غيرك والله..الزلمه أكبر مني بـ خمسطعش سنـة و اني ما اريدو

- يعني شسويـلچ يا بنت الحلال
انتـي الما چنتي راضيـه نعقد و هسا جايه ندمانه

- يعـني بطلت تحبني ؟؟

مع ما حچتها تشنجت ملامحو لـ سلطان
شگد ما يحاول ينكـر محبتو الها و انو نساها بس ما يگـدر..مرات اگـول همين اكو هيـچ حب !
يتغاضى عن كـل سيائتها بس لأنو يحبها
هي من عائلة سمعتها مو حلـوه.. الأب هاجرهن من هنَ صغـار و رايح متزوج بغير منطقـة

بـس الله فوگانا ما شفنا علـى البنات شـي
خصوصـاً لـمار بس سمعة امهـن لحگتهن
اما هـديل فـ معروفه بالمدرسة بـ ام السـان و ما عدها احتـرام لا لمعـلمة و لا لطالبـه
بس ظل كـلام ليـن بالي من حچت عنها انو تتفاخـر و هما يعـرفون شنـو..

ظليـت ادحـگ لـ سلطان و شلون وضعو انگلـب..
سمعت امـي صاحت و گبـل رحت عليـها
اخـاف لا تجي و تشـوف لمـار هين تروح تسوي مشكلة..

طبيت لـغرفتها و گلتلها

- ها يمه..محتـاجه شي

- لا يمه بس حسيـتكم گاعدين خوما صاير شي

- ها لا يـمه ماكو اني ادحگ على التلفزيون..و سلطان ملتهي بالملازم

- عجل جيبيلي گـلاص مي

هزيت راسي بـ أي و طلعت و أني اگـول الحمدلله ما حست بشي
رحت للمطبخ علما جبتلها مـي ما لگيتها
هبطت و طلعت للممر و صارت بوجهي
توترت و أني اگوللها

- يمه وين چنتي ؟

- ردت اروح للحمام..بس اريد اشوف سلطان بس ما لگيـتو بالصالة

- ها والله ما ادري.. يجوز طلع بـرا

حچيتها و أني اگول بداخلي وين طلع..
انطيتها المي و راحت للحمام
و أني گبل فتت للصالة..دحگت ما لگيتهم
دحگت من الشباك و ماكو.. شلت هم هذولة وين راحوا ؟؟

انتظرت امي تطلع و تفوت للغرفة.. شوية و فاتت و سدت الباب وراها..
رحت فتحت باب الغرفة مالتو ما لگيتو
و رجعت للصالة و منها للكيلديور..و لگيتهم

ذبيت حسـرة و گلت

- امي ادورلـك

- خوما بيها شي ؟

- لا بس استغربتك ماكو بالصالة

حچـيتها و دحگـت لـمار الي عدلت حجـابها و گالت بدون ما ادحگ علينا

- اني اروح

- اي

حچاها سلطان و هي رجعت تحچي بنبرة باكـية

- يعني ما راح تساعدني ؟
سلطان والله العظيم إذا صرت الو امووت

اني ظليت ادحگلها و هي استحت و نزلت رأسها و كملت

- اعرف چان رفضي شي تافهه..بس والله العظيم خفت لا تنعاد تجربة ابوية و امي..

- لمار روحي الوكت تأخر.. بعدين نحچي

حچاها و هي هـزت رأسها بـ أي دحگت عليه
و لبـست حذائهـا و طلعت

هو ظل واگف لحظات بمكانو
گبل لا يلبس حذائو و هو يگول

- راح امشي وراها علما تصل لأهلها

- خوش

طلع وراها و أني ظليـت واگفة بالحوش انتظرو
تقريباً عشر دقايق و جا..من طب وگفت و سألتو سؤال ظل يدور بالي

- سلـطان..انت تحبها ؟

دحـگ عليه و ظل صافن
جر حسرة و تقدم گعد على الممشى و مسح شعرو و گال

- مـادري..بس الاعـرفو اكو شعور بداخلي ناحيتها

رجعت گعدت يمو و گلتلو

- تدري نظراتك الها نظرات حب !

دحگ عليه و گال باستغراب

- شمدريچ ؟ شلون عرفتي

استحيت اگولو بس بالاخير گلت و أني اشوف نظراتو المتسائلة

- نفـس نظـرات لين الك
بس لين تحسـها أعمق

ابتسم ابتسامة صغيره و گال بهدوء

- ليش منتبه عليها

هزيت رأسي بـ أي..و اردفت بتردد

- انت راح ترجع علاقتك بيها ؟

- ما اعرف..حاير

- بالحب ماكو اختيـار ثالث
لو اي لو لا

ضحك هو و گال و ايدو تمسح على شعري

- لا تگليلي هاي سوالف لين

دنگت و أني اگـول

- ايي

- شنو تنصحيني !

رفعت رأسي الو..و ظليت ادحگـلو باستغراب
هو أكبر مني و هذا قرارو

- شلون تأخذ نصيحة من الاصغر منـك ؟

- مرات الصـغير يكون اذكى و افهم منك

- يعني تريد رأيي ؟

رمش بعيونو و أني ضغطت على ايديه متردده بـكلامي وياه
اخاف احچي و يـزعل..بس هو طلب نصيحة لو رأيي
و أني لازم احچي بدون مجاملة

- ما طـول هيچ
تتذكر كلام لين ؟ گالتك عوفها ما تفيـدك..
هذا رأيي همين

- روان..انتوا ليش تشوفون عليها شي اني ما گـاعد اشوفو ؟ هالگد اني معمي على عيوني

- انت تحبها..فـ تتغاضى عن تصرفاتها المحلوه
يعني تحسها انسانه صافيه

- يعني هي مو صافية

هزيت راسي بلا و گلت موضحه الو

- مو هيـچ اقصد.. كلامها دايما مو على نيتـها
ما احس براحه من تحچي لو اشوفها..لأن انتوا صارلكم سنتين ليش رافضة فكرة الزواج
و هسا تحججت بسالفة ابوها و امـها..و بعـدين يعني دائما يحچون على ابوهـا لأن إنسان مو زين

دنـگ راسو و هو يمسح وجهو و يگول بصوت ناصي

- روان..كل ما اريد اعوفها شي يخليني ارجعلـها
گبل كم يوم تعاوفنا و حتى حچي ما احچي وياها..ما اگلچ نسيتها والله و طلعتها من تفكـيري
مرات افكر بيها بس چنت الهي نفسي..و گـدرت
بس من جتي هـسا..احس رجعت لنـقطة البداية
كل مشاعري اجتاحتني من شفتها..حاولت اكتمهن لو اصير طبيعي بس ما گدرت

دحگ عليه و كمل كلامو

- هالشـي مو بيدي !
ما اعرف حاير ما اريدها تنظلم و ما اريد نرجع مثل قبـل

تقربت منو و گلت بنبرة هادئه

- زيـن اذا انت هالگد متعلق بيها
ليش ما تنطي نفسـك فرصة..يعني حاول تختبرها !

- شلون اختبرها ؟ روان گـاعد اگلـچ ما شفت عليها شي ؟
كل حساباتها عنـدي ماكو اي شي يثير الشـك بداخلي

ظليت ساكـته و أني ادحگلو شلون حاير و احس الدنيا ذاقت بيه..الله يعينو موقفو حيل صـعب
من تكون حاير بين گلـبك و عقلـك
گلبك يريد شي..و عقلك لا..

- روان روحي نامي الوكـت تأخر

حچاها و گام على حيلو و اني گمت وراه
و گلتـلو

- شراح تسـوي

ابتسم بهدوء و گـال

- ربـچ يحلهـا

حچاها و فات واني فتت وراها
طب لغـرفتو و اني رحت نمت بغـرفتي
وين يـلا گـدرت انـام و أني افكر بشنو راح يسوي
بـس لو اني بمكانو ما چـان رجعتلها..بس ظل القرار الو
و هو يعـرف مصلحـتو

الصبـح گعدنا
سويت ريـوگ..گعدنا حول السفرة و ادحـگ عليه شلون مبين علـيه اثار السهـر..

على حيـن غفلة سمعنا صوت سيارات الشرطة
بالفـرع..گام سلطان و امـي تگول يا ستـار شصار
طلع و أني و امـي وگفنا بالحـوش
سلطان طول و امي گلب والده خـافت لبست نعالها و طلعت و أني اگوللها تعاي

ظليت بالحوش وحدي واگفـة..و ايدي على گلبي
ما هي الا لحظات و فاتت امي و هي تولو
و تگـول اويلي عماد شمـسوي

- يمه اخذوا منـوو ؟

- اخذوا عمـاد..واحد مشتكي عليه ورا ما ضـاربو

اني هين عرفت منـو هالشخص
اكيد ليـن حچتلهم على الصار..گعدت على الممشى مال الطـرمه و امي گالت

- اروح لـ ريهام و بناتها هسا أكيد تخبلن

فات سلطان.. و أمي صدت عليه و گالت

- هاا يمه ما عرفتو منو المشتكي عليه

- ابن اختچ رايح ضارب واحد مسگطو تسگط
و هسا ملگوح بالمستشفى

- اويلي ليش ؟ بس لا علمـود دين لو شوف شنو

و باستياء گال سلطان

- ما ادري..بس أنتي تعرفين عمـاد ما يرتاح اذا ما يتكاون و أكيد جلدو حكو وراح تكاون وي احد..بعدين حگو و جا

أني وگفت على حيلي و ضجت..لأن سلطان اتهمو هيچ اتهام
گلت ما ادخل..بس من ما يصير بلكي سلطان يگدر يدخل و يحل الوضع

- ترا عماد حگو يروح يضربو لهل الزلمة

- ليش ؟ و انتي شمعرفچ انو ويا الحگ

حچاها سلطان و أني بتردد گلت
و بداخلي اگول شحچاني

- هو مطلوب دين..و ما عنـدو فلوس يدفعهن
و اول البـارحه من جايه لين بالطريق هذا الزلمة كامشينها و مفوتينها للسيـارة و مهددينها..و

سكتت و أني اشوف الصدمة على ملامحهم
و بنبرة خافته و مستحيه من كلامي گلت

-و حتى متحرشين بيهـا.. أكيد خالها عرف و تخبل

بس حچيت هيچ امي ضربت على صدرها و گامت تولو و هي تگول اويلي عليچ ليونه.. امي ما عدها غير يا ويلي و يا ويلي
اما سلطان فـ بسرعة فات جوه و أني صحتلو
لحظات طلع و هو مبدل امي كمشتو من ايدو و گالت

- وين تريد ؟

- اروح اشوف الموضوع..و اذا صدگ كلامها لـ روان
والله الا اخليهم يخيسون بالسجـون

طلـع سلطان و أمي اندارت عليه و گالت

- شورطچ و حچيتي

حچتها و عدلت حجابها و گالت رايحه لريهام
و أني ظليت بمكاني واگـفة
و كلام امي يتردد بأذني..بس لو ما حاچـيه ما تنحل السالفة بسرعة
لأن لازم سلـطان يعرف

.

السلام عليكم ورحمة الله وبركاته

و هذا بارت التعويض 🤧⁦♥️⁩
على اساس ينشر بالليل بس والله ما صار عندي مجال و النت ضعيف 😬

ف هسا نشـرتو ان شاء الله إذا كدرت اكمل بارت اليوم انشرو بالليل 🔵

شنو توقعاتكم و ارائكم ⁦🥴 ؟

و حبايب عمري طلب صغيرون ممكن متابعة لهذا الحسـاب ⁦❤️⁩
fatimaali18_

و بس والله⁦♥️⁩
مع السلامه ⁦♥️⁩⁦♥️⁩