(حطواا جااااام قبل ما تقرااااو)
الحلقة 16 :
تعداو جمعتين تقدمت فيهم ايثار برشا و رغم الوقت الضيق تعلمت برشا حاجات في بريود قصيرة،رجعت تقرا و تتعلم فالسياقة تعدي اغلبية وقت فراغها في الشركة،جوزيف كان معاها لحظة بلحظة الفيلا قليل وين يروحولها ساعات يباتو يخدمو و ما يحسوش بالوقت ليتعدا كلو جدية و تركيز، ديما مع بعضهم ما يتفارقوش خاطر جوزيف يعرف مليح الخطر لممكن تتعرضلو ايثار في غيابو و فعلا جاء النهار لكان خايف منو..
البارح كانت ليلة سبت سهرو برشا يخدمو و روحو للدار روتار ديراكت رقدو من غدوة احد مرتاحين صبحت ايثار راقدة و جوزيف قام على صوت تاليفونو لكان ينوقز على بعضو هز صوتو بالنوم من غير ما يشوف الرقم
-وي شكون
-صباح الخير
-مزال فيها خير بعد الي يكلمك مجهول بهبط عليك من السما و يقيمك من عز نومك
-مانيش مجهول و اتو تتعرف عليا كي تقوم توا و تجي للبلاصة الفولانية وحدك و من غير حتى شي يا سيادة العميل"ماكس" هكا معروف اما خلينا فيك انت،في حقيقتك سي جوزيف
-حل فمك و تكلم..شكون معايا😠
-كالمي روحك عيشك😌اي و حاجة اخرى ما تخليش ايثار تحس عليك و الا تشك في حاجة راهو ما تلوم كان روحك..سلام😏
لا يزي قام منرفز و مرهوج مالنوم يزيد يفيق على تاليفون كيف ما هكا دخلو في حيط و ما فهم منو شي،هز طولو شوية و اتكى عالفرش طالعو العصب من هالحكاية الحولة لهبطت عليه كيف القضاء المستعجل على صباح ربي،شاف الوقت لقاها 6:00 قام دوش و لبس تعدا لبيتها يتفقد فيها لقاها راقدة في سابع نومة مالتعب ضغطت على روحها برشا الفترة لخرى و هذا الكل باش تلاهي روحها على وجيعتها و احزانها لما نجمتش تنساهم و تتجاوزهم و توصل لنيفو لتحب عليه في توقيف الشركات على ساقها خير حتى من قبل..
طلع في كرهبتو و مشا للادراس لوصلتلو على تاليفون الثنية ما يعرفهاش و البلاصة عمرو لا مشالها اما حسب ما سأل و تحرا عليها عرف الي بقعة خالية في غابة..و خذات منو ساعة باش وصل كلمتو فيها ايثار مرتين،قامت ما لقاتوش بعد الي مستانس كل صباح يهد عليها لبيتها و يقومها بالسيف حتى كيف سألت عليه الجماعة فالدار لا حد شافو ولا يعرف عليه وين هزت التاليفون كلمتو
-صباح النور
-صباح الفل عزيزتي😊سافا قمت؟
-اي قمت و ما لقيتكش
-مممم ما اقوى سعدي اكيد توحشتني😛
-جوزيف يزيتشي من ضمارك توا جوست استفقدتك ،وين مشيت ياخي؟
-وين عندي نمشي بربي قمت بكري عملت مارش عالبحر و بعدها ماشي نقابل واحد صاحبي،ما تستناونيش عالفطور قول لسيلين و كيف نروح تو نحكيلك كل شي بالتفصيل
-اوكي سايس روحك
-و ما تخرجش وحدك كلم اسامة والا حد مالأولاد و هوما يوصلوك وين تحب و كان مع الشوفار ما تمشيش وحدك زادا
-اوووف جوزيف ياخي رجعنا للحصرة و الخنقة قتلك ما نحب حد معايا😧
-عيشك ايثار اسمع كلامي نبدا مش معاك نهلوس و انت تعرفني ما وصلت قتلك الكلام هذا كان خايف عليك و فما حاجة و كيما قتلك وين نروح نفهمك كل شي والله لمصلحتك و تعرفني قداه نخاف عليك
-باهي اس اس فلقتلي راسي الهم هذا شيحكي😛
-باهي زيد طول لسانك ماك تحصل
-ههه عيش سلفي الغالي يا ربي
-ممم باهي يا مريت خويا حتى تحصل ومن غير ما تبدا ترتب فالسيرة عاد ماني نعرف تنوميسك
-😂😂 باهي ما نلاهيكش و انت تسوق رد بالك على روحك..باي
كمل طريقو و وصل للبلاصة عاود كلمو نفس الشخص من رقم آخر هز عليه
-وي
-خللي كرهبتك بعيد و ادخل على ساقك و سلاحك نحيه من وراء ظهرك مكش باش تستحقو 😲
-شكونك و منين تعرف عليا المعلومات هاذي الكل
-كل شي في وقتو دجو😌 وين انت واقف توا تدخل شوية مانيش بعيد عليك تمشي ديما القدام حكاية 15 ميترو و تاخو دورتك عاليمين فما صخرة كبيرة برشا آقف وراها هاني جايك..
-باهي اعمل الي تحب توا حسابنا مزال
علق عليه و مشا وين قلو قعد واقف يستنا، ربع ساعة و يسمع في صوت خطوات جاية ناحيتو والظاهر مش واحد كهو..عمال و الصوت يقرب لين يحس فيه وراه..😨
ايثار بعد ما كلمت جوزيف قامت مش في خلوقها و على عصابها هبطت باش تاكل جيعانة قعدت على الطاولة و اول ما حطتلها البون القهوة قدامها و شمت ريحتها قامت تجري شادة فمها دخلت لصالدوبان ترد و تعاود لين قريب عينها تخرج خلطت عليها اثير تجري بعد ما كانت اتبع فيها بعينها مللي هبطت،عاودت طلعتها لبيتها قعدت حذاها لين رقدت و ما طولتش برشا خاطر هرب عليها النوم و قامت ابرك شوية قلقت فالدار و فدت مشات عملت دوش بدلت و خرجت ناسية كلام جوزيف و تنبيهو لقات الشوفار قتلو باش يوصلها للشركة..وصلت دخلت لبيروها تكمل في خدمة بقاتلها مالبارح حست حركة زايدة على العادة الكلهم مريحين و ما فما كان العساس تلفت الحكاية و رجعت ركزت قي الخدمة غطست ساعة من زمان تزرب تحب تكمل الي في يدها و تروح قبل ما يرجع جوزيف و ما يلقاهاش هي هكك مركزة و تسمع في الباب يدق هزت راسها
-وي تفضل
-عسلامة مدام
-اهلا عماد..شمجيبك نهار راحتك اليوم
-نفس السبب لجابك انت،مزالت عندي شوية خدمة جيت حبيت نكملهم و نتعدا للمصنع نعمل كونترول على الجلد لباش يوصلنا اليوم من ايطاليا..
-اي باه يعطيك الصحة..الله غالب لا انا لا جوزيف فضينا باش نمشيو ماذبيا تجيبلنا عينة من كل مودال..
-حاضر مدام..انا في بيرويا تستحق حاجة كلمني
-مرسي عيشك ديجا كملت الي فيدي ماكس نصيف ساعة و نروح..
هالعبد لا مرة رتاحتلو ما تعرش علاه،نظرتو كلها خبث و مكر رجعت تكمل في خدمتها و هو خرج و جبد الباب وراه و مشى لبيروه هز تاليفونو يحكي
-نص ساعة و تخرج كونو في استعداد 😈😰
يسوق هايم و سارح مش فاهم شي مصدوم و حاير مش عارف شنو باش يعمل لازم يهدى و ينظم افكارو باش ينجم يتصرف التصرف الصحيح الكلام لتقال و تحكى توا لازم ينفذو خاطر ما فماش طريقة و كلام آخر غيرو و هاكا الي لازم يصير،مزال مصدوم بالاخبار و الحكايات لسمعها و الحقيقة لعرفها،توا مسؤوليتو كبرت تجاه ايثار لازم يحميها بأي طريقة كانت حتى لو كان على حساب حياتو هو
جاه تاليفون من رقم غريب و لقاه نفس الشخص
-في يدك سبعة دراج ما اكثرش ولازمك توصل للشركة على خاطر الثانية لتوخرها باش تندمك و ادفعك ثمن غالي برشا
-ما فهمتش و فك على بابا يزي ما حكيت معايا بالالغاز ياا... يزي الصدمة لكليتها توا
-(يصيح)تحرق الكياس احرقو و جنح كان لزم انا نقلك هكا و انت جايني هكا..ايثار زعمة تهنينا عليها و قلنا انت الانسان الصحيح لينجم يحميها اوكا توا يخططو باش يخطفوها
ضرب بدو عالفولون
-اووف يا ايثار اووف جاب ربي نبهتها وصيتها شي راسها كاسح
علق عليه عمل اتصالاتو لزملاؤو رغم انو في كونجي و خارج نطاق الخدمة اما الحالة لباش تعرض حياة ايثار للخطر و الا تمسها بأقل حاجة وقتها لازمو يتحرك بأي طريقها خاطرها خط احمر بالنسبة ليه..الثنية حرقها في نص ساعة و تعطل في جرت اكسيدون كان قريب من الشركة و حس انو مفتعل بالذمة ليه هو باش يعطلوه نفس الشئ بالنسبة لزملاؤو لصار عليهم هوما زادا و عطلوهم في آخر لحظة... قلبو يدق باش يخرج من بلاصتو حسو باش ياقف و يطيح ساكت من خوفو عليها تعنيلو برشا،تعنيلو كل شي قتلو الاستراس و العصب هبط مالكرهبة سكرها و مشى لشركة يجري ما وقفش ما خذاش نفس ما قدامو كان ايثار تستنجد بيه وحدها لداخل ما معاها حد كان ربي يعرفها قداه خوافة و سانسيبل قاعد يجري بكل جهدو و قوتو اما حاسس الثنية طوالت و قاعد يجري في بلاصتو..
لمت الحوسة لحلتها في البيرو ريقلت حجابها لبست المونتو متاعها لفت على روحها مالبرد هزت ساكها و خرجت جوزيف يطلب فيها ما حبتش تهز عليه خافت لا يشلق بيها خرجت وحدها و يعمللها حالة هابطة و تطلب في الشوفار باش يقدملها بالكرهبة للباب متع الشركة و شي ما هزش عليها..تحل الاسونسار و ترا في زوز رجال لا يوريك يا جبل ما يهزك ريح ملثمين لابسين فالاكحل ما ترا منهم شي خافت جات تعاود تسكر الباب ياخي واحد منهم عرض ساقو عاود تحل و جبدها بقوة من يدها سكرلها فمها و لاخر يمشي قدامو يتفحص فالطريق مع وصولهم للباب لقاوه محاصر بالحاكم حطلها مسدس في راسها عمال يمشيو و يوخرو مركزين مع الشرطة لكانو موجهين اسلحتهم الكل ليهم كانو يحاولو يهربو مالباب التيلاني اما جوزيف وصل الوقت اذاكا و كان منسق مع زملاؤو و متبع كل شي و على اذاكا دخللهم من تالي ضرب الراجل لكان شاد ايثار و بعد بيها من غير ما يحس لاخر و خللى الشرطة تكمل مهمتها..داخت بين ايديه حملها و حطها فالكرهبة و طار بيها للفيلا و غادي وين كلملها الطبيب لعاين حالتها جوزيف كان واقف وراه يغلي يستنا فيه وقتاه يكمل باش يطمان عليها..قام الطبيب يلم في ماتريالو كتب ورقة الدواء و مد هالو
-حالتها تاعبة شوية اما الحمدلله البيبي لباس و المدام بعد ما تستعمل الدوا هذا بإنتظام و تردو بالكم عليها بقدرة ربي تقوم لباس نبقيك على خير سي جاد و نشالله لباس اي حاجة كلمني..
جاء باش يقلو الي جاد توفى و هو خوه التوأم لسانو رزن و فضل انو يسكت.. يحب هالنهار يوفى تعب و عيا من الصدمات لكلاهم وحدة في جرة الاخرى من غير نفس.. حاسس روحو في دوامة مش باش يخرج منها..شكر الطبيب وصلو لباب و رجع قعد جنبها تكى راسو عالفرش يخزرلها داهش في قوتها و عزيمتها الي رغم كل شي و رغم صغر سنها متحملة مسؤولية و حاجات اكبر حتى من جهامتها و لأعظم من هذا انها حبلة و باش تولي ام شبيها ما حكاتلوش و خبات عليه..رجع يخمم فالاقتراح لتلقاه الصباح كان رفضو مالاول صحيح اما بعد الي صار في الشركة و الي عرفو توا من الطبيب لازم يوافق هذا انسب حل للناس الكل كان ليه هو لا..قعد سارح تخمام يهز و لاخر يجيب لين حسها بدات تفيق،تكلمت بصوت واطي بالسيف يتسمع،بالسيف تحكي و تنطق فالكلام
-نحب ماء 😢
قام فيسع دار من شيرتها هي قيمها شوية يشرب فيها،شربت و رجعت راسها لتالي تكتو عالمخدة
-شبيني دخت شصار
-لباس توا ما اتعبش روحك انت لباس و صغيرك لباس زادا ما تتفجعش
خزرتلو مضيقة عينها حركت راسها شوية تسأل فيه بعينها و تحاول تستوعب الي قالو
-شقلت؟ شبيك جوزيف
-شعندي قتلك..انت لباس و صغيرك زادا..ياخي ما فيبالكش بروحك حبلة و عندك اكثر مالشهر؟
حطت يدها على راسها و غمضت عينها جات قدامها الليلة لعمرها ما باش تنساها و لا باش تتمحى من ذاكرتها لحظة،تذكرت كل تفصيل فيها و كل كلمة تقالت و كل احساس حستو فيقها سؤال جوزيف
-من جاد؟؟ (ضحك على روحو بتمسخير)سامحني على السؤال مش في بلاصتو اصلا شكون غيرو هو راجلك اما قصدي وقتاه صارت الحكاية
-ليلة حنتو و مانيش نادمة و كان تتعاود نفس الاحداث نعاود نعمل نفس الي عملتو و اكثر...ما تتصورش قداش فرحانة جوزيف الحمدلله يااا ربي الحمدلله باش نجني قطعة منو ثمرة حبنا..
كان مركز مع ضحكتها و فرحتها لملات وجها و نورتو،مركز مع لمعت عينها و مع كل تفصيل يترسم على وجها و يتبدل مع كل كلمة تقولها و تعبر عليها تكلم من غير ما يشعر
-ايثار لازم نعرسو
فيسع ما تمحات الفرحة من على وجها و تحولت لمزيج من الغش و لحيرة،مستغربة وفيسع ما دارت في مخها برشا حاجات تستنا في جوزيف يكمل كلامو باش تنجم تفهمهم اكثر
-شتحكي..؟؟ واعي فاش قاعد تقول؟؟
-عندك فيا ثيقة؟؟
-اكثر مللي تتصور
-تنجم تصبر و تعمل لنقلك عليه من غير اسألة
-انجم
-ايثار هذا الكل في صالحك انت اكثر وحدة
-علاه فما غيري عندو مصلحة
-الكلنا
-شكون
-تعرف كل شي مع الايام و في وقتو
-الحكاية عندها علاقة بالاحداث لصارت اليوم؟
-اي و اكثر مللي تتصور
-ايثار انجم نختصرلك كل شي الي انت تعرفت عند عصابة و رئيسها العدو الاول لجاد بيناتهم حسابات و حتى كيف عرف انو توفى مزالو يحبو ينتقمو على خاطر جاد سبق و قتلو خوه يحب يرجع الفازة فيك انت توا..هاكا علاه كيف نقلك ما تكونش وحدك في حتى بلاصة تصير تسمع الكلام..هذا شنجم نوضحلك توا الحكاية حكاية انتقام و اكثر و اكبر..لازم نعرسو باش نحميك و يكون عندي عليك حق و ما تنساش انك حبلة ياخي باش تربيه وحدك ؟هو ولد جاد يعني ولدي انا زادا؟ ما تنساش كلامات العباد و اقرا حساب الوضع لانت فيه توا و نوعدك ما يصير بيناتنا كان الخير و حكاية اني نحاول نتقربلك نحيها من مخك و خلينا صحاب و اتصرف معايا على طبيعتك الي نعرفها ،خليك كيف ما انت توا و ما تتبدلش..خمم و الي يريحك انا معاك فيه😊يلا ارتاح توا و ما تحط شي في بالك كل حاجة و ليها حل العشية نزيدو نحكيو..
غطاها و خرج قعدت تخمم بينها و بين روحها كلام جوزيف كان معقول و اكثر من مقنع،كلو صحيح و هذاكا ل لازمو يصير هو وعدها بأهم حاجة خاطر بعد جاد يستحيل يجي حد آخر و يحط يدو عليها..
خرج للبيسين يحس في روحو تخنق رغم المطر لكانت تصب،نار و شعلت فيه كثر عليه الشي و غرقتو مسؤلية الحمل لهازها على ظهرو،بدبشو تبلانجا في الماء فماش ما تبرد نارو و تطفى شوية الحرب لشعلت فيه و قتلت كل احلامو،قتلت كل احساس حلو فيه كان مخبيه لمستقبلو،للمرا لعشقها....(حطواااا جااااام قبل ما تقراااااو)
[* البنات ركزو مليح خاطر المراوحة بين الماضي و الحاضر باش تسيطر على اغلبية الاحداث..و توا مازلنا في الماضي..
كونو مركزين باش ما تضيعوش و تتدخلو بعضكم،
قراءة ممتعة..😘❤]
في نفس الليلة تلمو العايلة الكل في الفيلا عالعشاء كان جوزيف سبق و استدعاهم الكل في موضوع..
كل شي حاضر و برفاي كيما العادة،
جمعتهم الكل طاولة وحدة تقول عرس تلمو بصغيرهم و كبيرهم حكاو في المواضيع الكل الرجال عالخدمة و المشاريع والنساء ركزو على عرس غسان و لجين الي اخيرا هند وفات بوعدها ليهم و تشجعت هي و غسان و واجهو جدهم و حكاولو على الغلطة لصارت وانو لجين و غسان يحبو بعضهم و هند تحسبو كيف خوها لا اكثر،تفهمهم راشد الي ما رفضش الحكاية و تكفل هو بالباقي و توا قاعدين يحضرو لعرسهم لكان مالمفروض تقام اما تأجل بموت جاد لعندو توا اقل من خمسين يوم و هاكي هي الدنيا الي ما تاقف على فراق حد..تضاربت الاراء و تخالفت وكل حد يقترح حاجة،كملو عشاهم و قامو للصالة باش يواصلو يحكيو في هالموضوع،النساء و الرجال قعدو و تجندو البنات باش يلمو الطاولة الي لمة ثلاثة اجيال بما يقارب ستة عايلات😰
-هنيدة:ياا ايثار وخيتي ما لقيت وقتاش تريح البنات كان نهار اليوم شباش يلمها هالمرمة و هك الماعوووون يااا ميمتي هذا الكل و مزال ماعون الديسار
-ايثار:ههه الله غالب والله جات على غفلة و زيد البنات تعبو و كل وحدة جاتها حاجة قعدت معايا كان منى و مسيكنة ياسر عليها وحدها
-هند:ههههه الي يسمعك تقول باش تغسلو انت وحدك😂برا بركا نعرفوك تكره غسيلو الماعون تو نغسلو انا كي قدر عليا ربي
-اثير:تو نتعاونو الي هذي حاجة كل شي يتحرك و يتنضم في نصيف ساعة مدام الجماعة كملو كلامهم و هضمو لكلاوه شوية نهزولهم الديسار
-ايثار: دانا بالله عيش وخيتي باش نتعبك تاليفوني خليتو الفوق في بيتي اعمل تنقيزة جيبهولي..
جوزيف كان في بيتو حل الباب على اساس هابط حذا الجماعة و خلاهم كيف جاه تاليفون مالخدمة، اول ما حط ساقو برا البيت شافها طالعة فالدروج مللي كلم اسامة العشية و قلو باش تجيو الدار الكل كان متوقع جايانها رغم البعد لبيناتهم، يجهل تفكيرها و فاش تخمم و كيفاه موقفها منو،اول ما دخلو العشية و شافها ما نجمش يبعد عينو عليها كانت هادية على وجها نوع مالبرود ليعرف اسبابو مليح ستفقد فيها دانا المهبولة المقربعة لديما ببلادتها و كلامها لما يوفاش،ديما بحسها و تنبيرها و طولة لسانها و هرجها شخلاها محبوبة في كل العايلة و ما تحلا قعداتهم و لمتهم كان ما تكون هي اول الحاضرين..توحش فيها كل شي ما حكاوش برشا اما بالحق سكنت قلبو و روحو و حبو ليها كبير و صادق..من قلبو يتمنى توفى هالاحداث و الضروف لقاعدين يتعداو بيها الناس الكل على خير و بعدها هو كان سبق و خذا عهد على روحو انو ما تكون كان ليه..دوب شافها قلبو رعش و تقبض في نفس الوقت من شيرة متوحشها و من شيرة مسخفتو و مأنبو ضميرو عللي عملو فيها و خايف اكثر من ردة فعلها من هالخبر لباش تسمعو و باش يهبط عليها كيف الصاعقة و متأكد انو باش يصدمها و يجرحها و يعذبها اكثر مللي يتخيل،،كانت هادية فوق اللازمة شخلا العايلة الكل يسألو فيها على السبب و هي لا مرة عطاتهم الصحيح خزرلها قداه من مرة على امل تهز فيه عينها حتى بالغالط و تخزرلو...شافها طالعة فالدروج فيسع رجع للبيت و قعد يطل عليها مالباب هي دخلت لبيت ايثار و هو خلط عليها يجري، دخل و سكر الباب بالمفتاح فجعها لين تهزت و تحطت دارت لقاتو هو تصدمت و تربثت و خافت من اسامة لكان يشلق بغيابها الا ما يقيم قيامتها تكلمت بصوت مقطع تخلطو عليها الاحاسيس الكل و سيطرو عليها لدرجة صعب عليها حتى النفس😨
-جوزيف حل الباب شقاعد تعمل!هبلت ياخي
-مانيش حال
كان يقدم بالشوية يرا في الخوف و الربثة على وجها عينها تملات دموع مش مالخوف اما يعرف انو قلبها تعبى و ابسط كلمة تسمعها والا اقل ضرف باش تتعرضلو هي وقتها باش تنهار و تبكي و تصيح،باش تلومو و تحاسبو و تفرغ الي في قلبها الكل،قربلها متوحش يعنقها و يحس بدفى حضنها و حنية يدها على شعرو..عمال تمشي و توخر كل ما يقدملها هو خطوة مش خايفة منو اما مصدومة ماللي قاعد يعمل فيه كيفاه نجم يغيب المدة هذي الكل لا كلام ولا سلام خلاها معلقة من غير ما يخسر عليها حتى تاليفون والا جرد ميساج يفسرلها فيه الي عملو و على شنو ناوي،،قاعدة تكابر و تعاند و تتحدى في روحها مش وقت ضعفها توا و ما لازمهاش تضعف تحصرت فالحيط لوراها عرفت انو ما فماش منو هروب غمضت عينها كبست عليهم و سلمت امرها لله قعدة مدة مش طويلة ما حست بشي ما مسهاش تحسابو خرج طمانة شوية ،و وقت حلتهم تلاقت عينهم في نظرة طويلة سرحو معاها و رجعت بيهم ذاكرتهم لوقت كانو مع بعضهم،لكلامهم لكان ما يوفاش،هبالو وقت يجيها الفجاري ويقعد تحت شباك بيتها يحكيو بالاشارات و تبدا هي خايفة لا يشلق بيهم حد،لهفتو عليها كيف يراها صدفة مع العايلة و ياكلها بعينو..عينو كانت ذابلة و عينها مليانة دموع...
قلبو كيف قلبها كان يدق بقوة و خوف و لهفة و قريب يخرج من بلاصتو،الرعشة لسرات في بدنهم خلاتهم يحسو بحلاوة حبهم و هوما بعاد،،قربلها اكثر لصق فيها وزاد على ما بيها،جمدت في بلاصتها كابسة روحها و ما حاولتش حتى تتحرك مش عارفة شنو باش تعمل ولا كيفاه تتصرف،حط راسو على كتفها يستنشق في ريحة بارفانها لترهوجو بيها
-دانا توحشتك اكثر مللي تتخيل و قتلني وحشك،، نعرف جرحتلك قلبك و وجعتك،بكيتلك عينك و سهرتك ليالي تخمم فيا،نعرف قداه تحبني و حبك ليا متعبك،نعرفك قداه تعشقني و قداه صابرة عليا و معايا..اسبابي و ضروفي برشا ما انجم نفسرلك منها شي خاطر انا بيدي ساعات نحس روحي ضايع فيهم..انا على يقين انو وجودك معايا في الوقت الحالي و حتى فالمستقبل القريب باش يكون عذاب ليا و ليك انت اكثر، خاطرك ما تعرف تفاصيل حتى شي..نعشقك دانا دخلت حياتي مت فيك و احتليت كياني في وقت قصير،ما وعدتك بشي وانت تعرف الحاجة هذي اما وعدت روحي و نشالله ربي يقدرني و نوفي بيه،،مكش باش تحس بوجيعتي و قهرتي توا و انا نقلك حاول شوف حياتك انا باش نوصلك لازمني نتعدا جبال الضروف الي في طريقي و مستعد نتجاوزهم و قاعد نحاول على حساب كل شي و الي مصبرني على هالضروف و المشاكل هو الامل القليل الي مازالي بإني نلقاك في آخر هالطريق صبرت و قاعدة تستنا فيا،طريقي ممكن طويل و محفوف بالخطر اكيد اما ما عندي حتى فكرة قداه باش يدوم و لوين باش يوصل بيا و لا وقتاه و كيفاه باش يوفى و تكون النهاية،،كل شي مجهول و بيد ربي سبحانو،طريق مجبور و من واجبي اني نمشي فيه..مانيش باش نزيد نفسر و نحكي اكثر من هكا خاطر نتصور فهمت المطلوب..شوف حياتك يااا روحي😢 يا قلبي💔هكا حب ربي و هكا باش يصير..نشالله تتفهمني و تتفهم ضروفي😔..
حكى الي لازم يتحكى و فسر الي من واجبو يفسرو ومش باش يكون اكثر من هكا..قلبو موجوع.. موجوع لدرجة دموعو هبطت على روبتها و بقا تراسها ظاهر على كتفها،عنقها بكل عشقو ليها كان كلامو هادي و رزين بعدها خزر في عينها بعد ما مسح دموع وجيعتو و قهرتو بكف يدو و بزربة،،قعد يمللي في عينو على خاطر هذي آخر مرة يكون ليهم فيها حق انهم ياقفوها بالقرب هذا عدا يدو بحنية على خدها باس جبينها بمعزة و غطس في بوسة طويلة هادية في شفايفها عاود عنقها بقوة قريب يكسرها ضلوعها
-سامحني ياا روحي..نشالله تسامحني
قلها هالكلمتين و خلاها واقفة محنطة في بلاصتها و هبط حذا الجماعة،،فاقت من سرحتها وحست بسخانة دمعتها هابطة حارة على خدها مسحتهم هزت تاليفون ايثار و هبطت رجعت للكوجينة حذا البنات للقاتهم براسك كملو الحركة عاونتهم و حاولت تدخل معاهم فالجو فماش ما تلاهي روحها و ما تخممش فللي صار..
الديسار و القهاوي حاضرين هزوهم للصالة وين كانو ملمومين خرج جوزيف للاولاد لكانو قاعدين البرة جنب البيسين
-اا لولاد يجيكم الديسار هنا والا تحبو لداخل
-اسامة:يرحم بوك قلهم يجيبو هنا والله فلقولي راسي لداخل
-سامر:والله راسي زنزن على قارو و قدام بابا و هك الشايب الواحد يتحنط مش لعب
-اسامة: فرخ تحشم من جدك و بوك و ما قدرتنيش انا خوك الكبير
-سامر: والله الله غالب عليا و عليك وخي ما قلك حد دللني و خرطني عليك و الا راني ما نهزش فيك عيني..جبتها لروحك ما ضربك حد على يدك😂😛
-جوزيف:ههههه اضرب لا قعد 😂😂والله و عطى هالك يا اسامة علمو و اوحل فيه ربايتك الزفتة هذي وين وصلتك😂
-اسامة :تكيف بابا تكيف مش منك 😒😑
جات ايثار هازة بلاتو القهاوي و وراها اثير بالغلة و البنات كل وحدة حاجة
-ايثار: اسامة تحب قهوة
-اسامة: اي ما نقولش لا من يدياتك الملاح اما حاجتي بهك الكوكتال لوراك نعشقو اصل😂(يقصد في اثير)
-غسان:انا عطوني القلاس و سيبوني يا جماعة و مذابيكم ما يدور بيا حد(على لجين)
-جوزيف: هههه شخليتولنا يا جماعة
-غيث: يا للا على الصبايا مقديين زايد مع بنات آل راشد ليقلك
-عادل:غيث وخي نعرفو اسلوبك هذا و ما ولا كلامك يغزل الحرير كان ما قاعد تكمبص لحاجة😕
-غيث:ههههه😋 اي هك حافظ السيستام عدوولة
-مجد: نورتونا يا صبايا تفضلو والله عدنا برشا على قعيدة هكا يعطيك الصحة دجو باللهي مرة كل ويكاند استدعانا حتى بالكذب و لا يهمك
-ايثار: مرحبا بيكم والله ماذبيا اما انتوما كل حد تلقاه لاهي في حاجة..اوما في بالكم مالا من غير ما نبقى كل عشية سبت نكلم فيكم بالواحد افهمو رواحكم العشية تكونو الكل هنا حتى كان ما جاوش الكبار ايجاو انتوما نقعدو شباب في بعضنا و اقعدو حتى باتو...
-اثير:اي والله محلاها لمتنا،هزتنا الدنيا ولهاتنا على بعضنا في الوقت الي لازم نتقربو فيه اكثر( غمزت اسامة لكان مركز معاها من غير ما يشلق حد و هو عاد وين تلقاوه قام يصيح على غفلة و شاد قلبو لين فجعهم الكل)😂😂
-اسامة:اااااااه يا قلبي يا ميمتي باش نموت😂
و فيسع طيش روحو حسب روحو داخ تلمو بيه الكل كان اثير لقعدة في بلاصتها تتسكك بالضحك عليهم و هوما مش فاهمين شي😂...
اول ما شدو جوزيف خاطر كان قاعد بجنبو هو مسلو وجهو و هو قام فيسع و مشى وين كانت اثير قاعظة مقابلتو قعد على ركبتو حل يديه على طولهم يغنيلها و هي تضحك بالدموع على الجماعة لتفجعو😂😄😅
-نحبك يا مجنون يا ساحر العيون بغرامك مفتون..
الاولاد كملو يغنيو معاه و جوزيف قام يسب فيه
-ياعمبوك و بو تراب بوك يا ساقط ياواطي فجعتنا بلاهي شوف اختك لين وجها صفار عليك
-غيث:ياا جماعة فاتتنا لقطة..هي مولاة المول و قاعدة تتكشخ😒و احنا قلوبنا طايحة برا يكب سعدك يا ولد عايشة اكثر ماهو مكبوب😡
-اسامة:هههه ملا دغف😂و انت جوزيف تفجعت على دانا اختي اكثر من فجعتها هي عليا😂😂
-جوزيف: يحرزلك مخلطين و لا راك ريت شنو عمتلك
-اسامة(خمج مخو😂)اوووه ربي يعفو الشر برا و بعيد وخي غالط فيا راك
-جوزيف: زيد حل فمك زيد تفوه 😂
كانو قاعدين الكل على مخادد كبار جنب البيسين، الحال شتاء و الدنيا باردة قامو غيث و مجد شعلو النار في برميل مقصوص لقاوه وراء الاستوديو مجعول خصيصا لقعدة هكا و حطوه في وسطهم
-عادل:ههه ايثار وخيتي تكب سعدو البيسين و طفات وهرتو ولا فيها برميل جملة وحدة😂😂
-مجد: ياا حسرة عليك، سعدك هو المكبوب بلاهي شوف اك الوهرة و النقشة لفيه البرميل يعطيه الصحة لصنعو
-اثير :هاكا عملو بابا الله يرحمو و حسب ما حكالنا من ايامات المرحوم سي الياس وقت كان مزال حي،كانو يتلمو هكا البرا ويحطوه بيناتهم في ايامات البرد
-عادل: توا أحنا شلزنا قاعدين في هالبرد و الريح يصرفق فينا من كل شيرة تقول حاكمين علينا مش كان دخلنا الداخل للدفى خير😕
-اسامة: اما تدخل متاعك يا خويا محلاها قعدة التمرميد و ما عزها😋قعدة كيف ما هكا خويا ضو هادي، نسمة ترد الروح تصرفق فيك من كل شيرة،متغطي، نار تشعل قدامك ،قهوة سخونة و سيقارو و الاهم من هذا الكل الحب الكلو راكش حذاك ،ضحك و تفدليك..والله ما يعطي هالك كان المولى ...
-جوزيف: سيبو اذاكا ما يفهمش فالرومنسية و الاحساس بالمغامرة😄
-هنيدة:جوك عاد انت جوزيف يذكروك بأيامات التدريب
-جوزيف:اي والله كلامك صحيح
-دانا: ايثار اي شقولك كان تمشيلنا حويجة😉
-ايثار: دااناااا😒 ريض
-اثير: ايا عاد والله وقتها بالضبط
الاولاد مبهمين مش فاهمين شي تكلم جوزيف لكان قاتلو الفضول كيف الجماعة الكل
-شبيكم البنات شفما
-اثير: هههه ايثار اختي عندها صويت ولا اروع
-البنات والله ماعيني
كبشو فيها الكل ولات خذات بخاطرهم و غناتلهم "كده يا قلبي" لشيرين
💕كده يا قلبي يا حته مني
يا كل حاجة حلوة فيا
كده هتمشي وتسبني وحدي
في الحياة والدنيا ديا
يعني ايه
يعني خلاص انا مش هشوفك تاني
مش هلمسك
مش هحكي ليك عن حاجة تاعباني
كنت روحي لما كان جوايا روح
عمري ما اتخيلت انك يوم تروح
مش فاضلي مني غير حبة جروح
مع السلامة يا حبيبي وفي أمان
عمري ما هقول يوم عليك ماضي وكان
عمري ما انسى مهما طال بيا الزمان💕
غنات بكل احساسها لتفاعلو معاه الناس الكل صوتها لكان بالحق يسحر و تفاجؤو بيه خاطر حد ما كان يعرف هالموهبة لعندها.. الكلهم مشى تفكيرهم لنفس الشخص،نفس الانسان لغاب عليهم و فارقهم على بكري ،الكلهم حسو بيها و بكل معاني الغناية وبكل دمعة هبطت على خدها و هي تغني،كانت مغمضة عينها و متفاعلة ،كل كلمة خرجت كانت من اعماق قلبها صادقة و مليانة مشاعر،كانت تغني و تحاول تسيطر على الخنقة لشدتها قي حلقها مالبكا كملت خزرتلهم كان الهدوء مخيم عليهم كان صوتها لداعبتو نسمات الليلة هاكي لكان جوها ممزوج بين الضحكة و الفرحة و بالوجيعة و الدموع، القعدة هاكي عاشوها بكل لحظاتها لتلاعبت بآحاسيسهم و مشاعرهم و بدلتها مع كل موقف و مع كل حكاية تعداو بيها..البنات الكل بكاو و حتى لولاد زادا لكانت عينهم مزغلة و حمرة..
اسامة حب يدخل التفدليك و يتجاوز بيه الموضوع و يبدل الجو لتملى بالحزن و وجيعة الماضي لمزال و باش يقعد يتبع فيهم و عايش معاهم لحظة بلحظة
-ياا معلم وين كان خذا الكل و احنا وين تي هو عدنا شيرين و ما فيبالناش والله برافو خمسة و خميس عليك ...جوزيف كان مطبس راسو هزو تبسم بوجيعة بانت في عينو
-الاولاد هيا ندخلو وقيت، هك الشايب تو عادك بيه رخف راسو و قلنا باش نرقد وانا لازمني نحكي معاهم الكل في موضوع بحضورو..
قامو الكل و دخلو قعدو حذاهم حكيو شوية و بعد تكلم راشد
-جوزيف وصلنا منك تاليفون الناس الكل،لباس ولدي؟صارت حاجة؟
-لباس بابا😊كلمتكم الناس الكل حبيت نعلمكم بحاجة و يكون في بالك..باش ندخل في الموضوع ديراكت و من غير مقدمات..انا و ايثار قررنا نعرسو و ماذبيا الجمعة الجاية..😰😣
طيشلهم هالكلمتين و سكت،و بسكاتو خيم الصمت على الصالة،شاف على وجهم كل الملامح من الصدمة و الحيرة و الاسألة لكانت متنوعة و هو ينجم يتخيلها لذهول للحزن و خيبة الامل..الملامح هذي الكل الي لا توحي لا برفض للموضوع و لا قبولو،كسر السكوت صوت فيصل عمو...
-شو يا ولدي ما عدناش الحق ندخلو هذي حياتكم الخاصة و انتوما احرار فيها اما مدامك ستدعيتنا بالذمة و تحب تسمع راينا انا ما نقلك كان جاد توفى الله يرحمو و بنتنا ايثار قعدت لا مطلقة لا معلقة مصيرها مجهول و حتى الي خطبوها الكل رفضتهم و قالت جاد بيه نموت و بيه نحيا و منو نخلق تعبنا و سلمنا. انت خوه و توأمو وانا من رايي خذيتو القرار الصحيح و مساندكم فيه..ااا جماعة شنو رايكم....
-عايشة: ماكمش صغار تباركالله تعرفو ما يصلح بيكم و ما يساعدكم و تنجمو تميزو بين الصحيح و الغلط كان انتوما مرتاحين و مقتنعين ببعضكم فازي ربي يتمم على خير و احنا معاكم في كل شي..
-راشد: الاكيد انكم ما وصلتو خذيتو القرار هذا كان ما انتوما متأكدين و مقتنعين و عارفين انو العرس مش لعب صغار و تباركالله واعيين و تعرفو مليح الي يناسبكم..ما نقلكم كان ربي يتمم على خير ولدي..اما الي ما فهمتوش كيفاه وصلت وحدك قنعت ايثار بالحكاية بعد الي احنا ب صغيرنا و كبيرنا حكينا معاها و كسرنا ريوسنا و هي شي عدات البريود لفاتت الكل في بيتها بين هك الاربعة حيوط!😕 جوزيف طبعك هذا نعرفو مليح و متعدي عليا..بوك زادا كان هكا مقربع اما وقت الجد ما ياخو كان القرار الصحيح رغم كل شي و رغم كل الضروف و العباد الي ضدو و مخالفتو الراي،عندي ثيقة فيك..اما متأكد عندكم اسبابكم😕على راحتك و كان فما حاجة لازمنا نعرفوها تو يجي وقتها..😊
-جوزيف:عيشكم كنتو متفهمين و نشالله ما يصير كان الخير..
-سيلين :ايثار عشقت جاد و جاد تنفس ايثار و مستحيل تحب بعدو ..فاهمتك وليدي..هاز حمل ثقيل ربي معاك و ينصرك..
كانت قاعدة بجنبو قالتلو هالكلمتين حطت يدها على يدو و كبست عليهم...
-دعواتي معاك يا وليدي...😊