السلام عليكم و رحمه الله تعالى و بركاته ❤
البارت السادس و الاربعون
🌺 بقلم ؛ حمامة السلام 🕊 ( عاشقة غوكو ❤ ) 🌺
حال مروه
عذبنه الزمن بين المحطات
ولڪينه الدمع واڪف ينتظرنه
بعدنه صغار وڪبرنه من الهموم
وحزن بحزن جبناهه وكبرنه
لا بينا صبر لا نحمل هموم
وعلى عمر المضى شينفع صبرنه
لا يا زمن ارحم دمعة العين
وشوّفنه الفرح بآخر عمرنه
شوّفنه النحبهم ولو لحظات
حتى بشوفهم يفرح عمرنه
مروه
كاعده و اسوي بالكبه و كبالي ياسر
حجيت
- بعدك على سالفه الدوام بالشرطه
- اي
- مناوي تغير رأيك
- لا
- ليش هيجي يا ابني تروح و تشمر روحك هناك شكو دشتغل ويه ابوك مو احسلك
- لا ما اريد
- راح تشيب كلبي اسبوع و اني اقنع بيك و انت مو راضي تعوف هاي السالفه
- و لا راح اعوفه فلا اتعبين روحج
- اريد اعرف ليش
- على شنو ليش
- ليش الا اداوم بالشرطه اذا هلكد معاجبك الشغل ويه ابوك دورلك على شغله ثانيه ملكيت الا الشرطه
و بعد محاجي اندك الباب
جايه اكوم افتح الباب حجه
- ابقي اني اطلع اشوف منو
ياسر
طلعت اشوف منو على باب
فتحت الباب صار بوجهي خالي جلال
- تعال فوت خالوا
- امك جوه
- اي جوه فوت
اباوعله شلون وجه اصفر و بلكوه يمشي
دخل جوه و جان تحجي ماما
- هلا بجلال تعاي فوت
محجه خالوا شي
- جلال شبيك ليش هيجي وجهك احجي صاير شي
بس خالوا ما حجه و ضل واكف يباوع لماما بسكوت
اقتربت ماما من خالوا و حجت
- صاير شي احجي مو وجعتلي كلبي
حجه بعد هالسكوت
- ماما
- شبيه ماما احجي
- ماما ................. اجته جلطه
كلمتين جانن كافيات حتى يخلن بشر ينهار من طوله و يوكع بلكاع
هالكلمتين الي ما استوعبتهن ماما خلته توكع بلكاع بله حراك
رحت ركض يمه و ادك على خدوده و هي فاقده ماكو حس منه حتى نفسه صار ثكيل
اجتي عمتي على صوت الكزاز الي تكسر من وكعت ماما
- مروه كعدي
باوعت عليه عمتي و حجت
- شبيه امك احجي
صفنت بوجهه و ما اعرف شأحجي و شكول
باوعت لخالي و حجت
- شكتله و هيجي وكعت المره
حجيت
- عمه مو وكته تعاي شيليه وياي
شالته عمتي من رجليه و اني من جتافه و مددناه على جودليه
صرت ارش المي على وجهه
حد ما جابت عمتي العطر و قربته منه
جان خالي كاعد يمه و يباوعله بسكوت و الدمعه بطارف عينه
حد ما ماما بدت تفتح عيونه
بعده مصاحيه زين لزمت خالي من ملابسه و صارت تعيط بكل حيله
- كوووووووول بعده عاااااااااااااايشه كووووول يللللللللللللله كوووووول لضل ساكت احجي
اني و عمتي صافنين عليه
- احجي شصاير
- بيبي اجته جلطه
- ياااا و بعده عايشه لووووو ......
- ما ادري
و بعد كل عياط ماما و صريخه خالوا بعده ساكت و مناطق بحرف واحد
- اااااانت لييييييييش سااااااااااااااكت اني مو دا احاجيك كووووول بعده عايشه كووووول يللله كول لضل ساكت احجي
هنا خالي نزل راسه على رجلين ماما و صار يبجي مثل النسوان
هنا عرفت ماما الجواب الي انتظرت تسمعه
لزمت بشعر بخالي و صارت تصيح
- جذذذذب انت جااااااي تجذب عليه احجي لضلك ساكت
جان جوابه
- راااااحت و عافتنه ياا مروه راحت و تركتنه
حطت ماما اديه على شعرهه و صارت اجر بيه خصل خصل و هي تضرب على صدره
عمه تريد تلزم باديه و هي فاقده لا صوت و لا حس بس تزلغ بوجه
كام خالي من يمه و هو يمسح بدموعه
متحمل حالت ماما ابد مشه و طلع لطرمه
- خالوا انتظر وين رايح
- بعد ما اتحمل دقيقه هنا عينك على امك
مشه و طلع و هو يمسح بدموعه
رجعت دخلت جوه و الكه ماما بس تشكك بدشداشته و تبجي بسكوت و عمه بس تريد تلزم بيه
شويه و دخلت سوسن الي توه راجعه وياه الجهال جايبتهم من المدرسه
دخلوا و بوجوهم السؤال المتوقع
- شصاير شبيه ماما
فورا عفتهم و رحت لغرفتي و قفلته بدون ما احجي ويه احد
سوسن
كعدت يم ماما و اني احاول اهدي بيه
رادت تكوم جريته من ايده
- وين رايحه
- عوفيني اريد اروح اشوفه عوفيني
- وين تروحين تشوفين بهاي حالتج كعدي و اهدي و هسه عمه تاخذج
اني و عمه لازمين بيه نريد بس نكعده و هي بس تريد تطلع بملابسه المشككه و شعره المكطع خصل
حد مجرينه ماما و كعدناه بلكاع
- ماما فدوه لتبجين كافي شوفي وجهج و رجليج الي يجرن دم رحمي بحالج ميصير هيجي
- عوفيني بحالي اريد اروح
- على اقل بس بدلي ملابسج و طلعي يله ماما كومي
عمتي سحبته سحب للغرفه
- هسه يا بابا وينك وكت شغل هسه
شويه و طلعت عمتي اجر بماما جر
رجليه يسحلن على كاع و بس تعيط
حجت عمتي
- عينج على جهال زين
- زين عمه زين
راحت عمه و عافتني هنا صافنه مدري شسوي
اباوع لجهال شلون خايفين و صفيه متكومه على روحه بالزاويه
سألتني رسيل
- بيبي شبيه صارله شي ليش ماما جانت تبجي
- بيبي ماتت
- احنه منروح هناك ويه ماما
- بابا من يجي ياخذنه
اباوعلهم شلون الحيره بوجوهم
بعد شلون بهل عمر و شافوا ماما تكطع روحه من البجي
شعره بعده بلكاع
و ياسر اول ما اجيت سواله انسحاب للغرفه
منتهى
لازمه بامه و تبجي بجي مصاير
متخلي احد يقترب منه او ياخذه
اباوع للمره وجه بنفسجي و يخوف
منا الوجع كطع بطني تكطع هسه وكت المغص و يجيني
عاف ايام الله كله و لزكلي بهل اليوم
اريد اوخر مروه عن امه ماكو جلبت بيه
حاضنته بين اديه و مترضه تفاركه
صافنه عليه و على وضعه شكو بيه لو جانت ماما مثل ام مروه
ما فد يوم عاملتنه خوش معامله حرمتني اني و يحيى حتى من الكمه
بس الحمد الله على كل حال انحرمت من امي بس الله رزقني بخوش اخ
حتى الله انطاني خوش رجال و ازوجته صح اني غلطانه من دا اعوفه بس مو بيدي ما اريده يكضي عمره و هو ينتظرني ممجبور ابد يخلص عمره و هو دا ينتظرني
كعدت من صفنتي على صوت عيطه مروه من اخذوا امه من اديه
كل عيطه منه زرفتلي مصاريني عليه
حضنته بين اديه و هي بس تملخ بروحه
فقدت تحس بالوجع و فقدت تحس باي شي
ما اكدر اتخيل ماما تموت صعبه عليه
صح محسيته بيوم تحبني بس اضل امي و ما اكدر اكرهه لو شما تسوي
اول مره احس انو ما اريد اخسر ماما
يمكن لان مفكرت قبل شممكن يصير بيه اذا ماتت ماما
مرات ننسه الموت بس يجي شخص و يذكرنه بيه
شويه و حسيته هدت
وجه احمر و عيونه حمر اديه صارن خيوط متكدر اشيلهن
مصار بس تقريبا 3 سنوات و نص من مات ابوه و هسه ماتت امه
بس هذني ال 3 سنوات و نص خلصن بسرعه
خسرت ابوه و امه بفتره حيل قصيره
سوسن
كاعده و اهز برجلي لما سمعت الباب اندك
كمت فورا و رحت فتحته
- هاي انت عمو
- ليش منتظره احد
- منتظره بابا
- ليش صاير شي
- بيبي توفت
- بيبتج ام ابوج
- لا امه لماما
- و جنت راح اعيط مثل النسوان من فرحتي و صدك لو ميته جان عماتج شهرنه المنطقه شهر بصوتهن
- عمو عيب
- شكو شبيج مو بيدي ما احبه كوه هي
- بس مو تتمناله الموت
- دعوفينه هسه عمتج موجوده
- لا راحت ويه ماما
- محتاحين شي اذا ممحتاجين اني راح لابوج علمود اكله
- علوا لو تروح و تكله
- خوش و سدي الباب زين
- ماشي
راح عمو و اني كلبي راح ينزل لمعدتي من الغصه
فؤاد
رحت بوجهي لمحل يحيى
دخلت لكيته كاعد يحاسب
- السلام عليكم
- و عليكم السلام يا هلا تعال اكعد
- لا و الله مستعجل و اجيتك بشغله
- ان شاء لله خير شنو هاي الشغله
- عمتك ام مروه توفت اليوم
اخذ صفنه بوجهي و حجه
- ماتت بس الصبح مريت عليه و كلشي ما بيه
- صارت بيه جلطه و توفت
- متاكد خاف مخربط بغير وحده
- متاكد و سوسن هي الي كالتلي
- البنات منو وياهن بالبيت
- ما ادري يمكن ياسر وياهن
- خوش لعد
- اني هسه رايح للبيت عندي شغله اسويه انت روح للفاتحه
- ايمته تخلص شغلتك
- شي نص ساعه
- تكدر تبقه يم البنات
- ليش متاخذهن على فاتحه
- ابد ابد مو مال اوديهن للفاتحه و هناك خبصه و يشوفن امهن تملخ بروحهن خل يبقن بالبيت احسللهن اذا اخذهن باجر اخذهن
- خوش لعد
يحيى
سديت المحل و رحت بوجهي للبيت
اول مدخلت للبيت ما احس غير سوسن و شمرت روحه بحضني
- لتبجين كافي
- خفت و اني اشوف ماما هيجي
- تهون تهون هسه مسحي دموعج و اهدي البجي ميفيد
- راح تروح
- لعد اكعد اكابلجن غير اروح
- اخذني وياك
- و منو يبقه يم اخواتج
- ياسر يبقه
- هو وينه ياسر
- بغرفته
- هيانج حجيتيه بعضمه لسانج لو يجي الحر ميطلع منه
- لعد خل ناخذهن ويانه
- وين حتى احير بالفاتحه لو بيهن باجر تروحين زين لا تنقهرين
- بس ردت اشوفه لبيبي
- هسه اكيد اخذوه انتي هسه مسحي دموعج و عينج على اخواتج و ايهاب و مهاب لتخليهم يطلعون هسه عمح فؤاد يجي يمكم
رحت للغرفه لبست دشداشه سوده و طلعت
مبين الاسود ميحب يفاركنه ابد
ممرت فتره من قنعت مروه تنزع الاسود و هسه راح ترجع تلبسه
رحت بوجهي لبيت عمتي خالديه و هناك انصب الجادر مال فاتحه و الناس صايره ملاحم الجاي و الرايح
جعصت روحي بين الجموع و دخلت لعبان نفس مو فاتحه
خاف واحد يريد يبجي تصعد اعصابه من هالحشد الي جاي نوب بعد بيتي الجهال و عياطهم يتعاركون بنص النسوان الي تبجي
دخلت للمطبخ بوخه و حر و ناس مخبوصه بالاكل جيب ودي
و مدري الناس جاي تعزي لو جاي تثرد و تروح
و عيني صارت على فارس اخو مروه
دفعت روحي شويه و فتت يمه
بس شافني فورا حضني
- الله جابك وين جنت
- و الله توني سمعت و اول مسمعت لبست و اجيت
- تعال لضلك واكف تعال فوت جوه
- فتت جوه و اشوف جلال كاعد على كرسي و دا يقيسون بضغطه
منزل راسه للكاع و دموعه تصب على ملابسه
- ايمته ماتت
- الساعه 12 هيجي شي
- و شلون لكيتوه ميته الصبح مو اجيتكم كلشي مبيه
- حتى نوران تحجي نفس الحجي تكول عفت مصطفى يمه علمود اسكته تكول اطبخ و اسمع الولد بس يبجي و ماكو اي صوت لعمه اجيت دخلت لكيته حاطه الشيله على وجهه و بس شلته شفت وجه ازرك و بدت تعيط ويه الجهال حد مملتمين الجوارين بالبيت نزل ضغطه حيل وديناه للمستشفى و هسه نوران دك و تلطم بالمستشفى
- و مروه
- مخلت شي مكطعته اديه اجرحن و رجليه و ازلغن تمشي و هي حافيه
- تهون تهون
- شتهون مصار هواي من مات بابا و هسه انفجعنه بموت الحجيه
- ربي يصبركم
كلمتين بس بيهن وجع ثكيل على القلب
ما بينه وكت لزعل
و خصه الناس هنا
هو هذا الي الي يضوج بالفاتحات تحير بحزنك لو تحير بالناس الي جاي تعزي و تاكل
كلشي مفتهمت بهل يوم جيب ودي مناسف الاكل
حد ما خلص اول يوم انهد حيلي
طبيت للغرفه لكيت مروه منتجيه و دموعه بس يصبن
اتقربت و كعدت كباله
- تردين تبقين اليوم هنا
هزت راسه ب اي
بست راسه و كمت رحت و را ما شفت اخوانه الي انهد حيلهم طول الفاتحه
- منتهي يله خل نرجع
اباوع عليه وجه اصفر و يادوب شايله روحه
- شبيج شو تعبانه
- شويه مريضه
- تردين اوديج لدكتور
- لا ميحتاج شويه و اصير زينه
- لعد خل اشتريلج دوه من الصيدليه
- ميحتاج هسه اصير زينه
- خوش لعد
اول موصلنه للبيت لكيت فؤاد كاعد و بحضنه صفيه
حجه
- هاا شلونه الوضع هناك
- يموت
- وينه مروه
حجه و هي ينطيني صفيه
- عفته هناك
رادت منتهى اطب جوت لزم ايده و حجه
- اوكفي اريد احجي وياج
- فؤاد مال خلك احجي وياك
بعده ممكمله حجيه
راحت فورا طبت جوه
- شبيه
- مريضه و هم تعبت من الفاتحه
- ليش ما اخذته لشي عياده
- و هي تعبانه هسه اروح اوديه للعياده على اقل خليه ترتاح
- يله اني اروح
- مقصرت تسلم
- ولو اشوفك الباجر بالفاتحه
- الله كريم
عفته و طبيت جوه نومت صفيه و غطيت الجهال
رحت اشوف ياسر لكيته نايم
اباوع على منتهى نايمه و التعب مبين من عيونه
طبيت للغرفه اتمدد من التعب
بلكوه كمت سبحت و شمرت روحي اريد انام
شكد تعبانه و شكد ما اكدر انام
هسه هي كاعده اكيد
ليش تغيب عن بالي
ابد
هسه و من الناس نايمه هي ميغمضله جفن و تكعد تبجي
اعرفه شكد جانت متعلقه بامه
جانت مروه المدلله عد اهله
صعبه عليه تفارك ابوه و امه بمده حيل قصيره
ويه ما كدرت اغفه و انام سمعت صوت الاذن
كمت صليت و قريت قرآن و طلعت افتر بالشارع حد ما شويه حسيت روحي ارتاحيت
فتره الصبح و السكون الي بهل جو مستحيل افوته
الهوه البارد و الشوارع الخاليه فرصه ممتعوض
السكون و الناس بعده نايمه و قليل ما طلعوا لشغلهم لذا الشوارع تكون على صامت
نتمنى ادوم هالحظات امد طويل بس الهدوء فتره قصيره تلازم الانسان و بعدين تفاركه و تعوفه لبلاوي الدنيه
يتبع .......
اسفه تاخرت بالبارت عليكم بس جنت اتعارك العفو اتناقش 🙂 مع ناس الله يسامحه تغيرت علينه هواي عفت البارت و كعدت انصح بيه و اخر شي طلع الصوج بيه هو الصدك الصوج بيه اضيع وقتي الثمين انصح بيهم مزعلانه غير على النصيحه الي كاعده بالزاويه و تلطم 🙂 و تاخر البارت بسبب هيجي ناس ميستاهلون أأخر البارت من وراهم