| يا تعبي العشگته | ' باللهجة العراقية '

| البارت الثاني |

#يا تعبي العشگته
#بقلم الراوية
#البارت الثاني

بسم الله الرحمن الرحيم

| صلوا على النبي ⁦♥️⁩ |

.

لين..

بلعت ريگي من سمعت صوتو العصبي
رجعت انداريت لـ خالي الي بمساعدة الناس خلو يگوم على حيلو
زلمه چبير بالعمر يصحولو ابو فاروق خلاهم يوخرون عنو..

يمكن هسا يلا انتبهت لـ نفسي و لوگفتي بنص الزلم
و حجابي الي مال بصفحة..

دحگت لـ عماد الي خزرني و هو يأشر بعينو على بيتنا..
مشيت خطوات بطيئة ليورا و افلت اخوية عامر..
رحت گبل لبيتنا.. امي چانت يم الباب وهي تضرب على خدها..من فتت گبل ضربتني على ظهري و هي تگول

- فضحتينا الله ياخذچ

- يعني اشوف عميد بنص الشارع كامشينو ثيران هايجه و وين اليوجعك و ما ادخل

ضربت على خدودها و هي تگول و ترفع ايديها فوگ

- ربي شسويت اني بدنيتك.. فوتي شوو فوتي

عگدت حاجبي و تليت ايدي من ايدها و فتت جوه و اني ادردم..چانت طيبة واگفة يم الباب
دحگتلها و گالت

- ارتاحيتي هسا.. لأزم تحطين خشمچ بكلشي يلا ترتاحين

ما حچيت شي بس خزرتها..
انداريت للباب من فات عماد الي يعرج و كامش ايدو واحد من جوارينه

ودعو و طلع.. امي و طيبة راحن عليه و هن يگودن بي و امي نازله دگ ادعية و ان شاء الله بالكسر و ربي يحرمكم العافية

لحگتهم للصالة و گعد على القنفة
طيبة جابتلو معقم و گعدت تمسح وجهو و هو كل شوية ينتر بيها لأن يتأذى
گعدت گدامو على القنفة و گلت

- منو هذوله

- انتي شعليچ

صاح بعصبية و أني رفعت ايدي و صحت بي

- ايي لا تصيح..چان طلعت صوتك عليهم لو بس عليه

أني حچيت هيچ لو هو وخر طيبة من گدامو
و اجا ناحيتي..كمشني من زندي و خلاني اگف على حيلي.. امي كمشتو تا يوخر عني
بس ما فاد وياه و هو يهز بيه و بعصبية يحچي

- انتي بالذات تنچبين و تسكتين
سوياتچ و طلعتچ بنص الزلم لا حسبالچ افوتها لچه

دفعتو بيدي الثانيه و اني اصيح

- تعرف مو صوچك..لا والله صوچي اني الخفت عليك و طلعت اشوف شبيك

- اسم الله شكو شصاير

اندارينا كلنا على صوت ام سلطان الي فاتت للصالة يمكن عافو الباب الخارجي مفتوح و ما شاء فاتت عبالك مداهمه
صديت عنها و أني اكتم غيضي من خالي الي گال

- هلا ام سلطان تفضلي

امي راحت عليها و سلمت.. گعدت و هي ادحگ عليه و گالت

- يمه جبتلچ جنطتچ نسيتيها..زين عماد شصاير
هذوله منو الي ضربوك

رحت عليها و اخذت الجنطه و طلعت امي صاحت وين
انداريت عليها و گلت

- للمدرسة..خاله روان راحت ؟

- اي يمه راحت سلطان وصلها

هزيت رأسي بـ أي و طلعت
من اشتعلوا اهلو..من اني وياها ما يوصلنا
الأخ يستغل الفرص شافني مو وياها فـ وصلها

طلعت و شفت الطريق ما بي طلاب الوكت تأخر
بس اروح متأخره للمدرسة و لا اگابل عماد

فوگ ما چنت خايفة عليه و اريد ادافعلو
احصلي رزالة منو..همزين جتي ام سلطان چان الله و اعلم شصار

وصلت للمدرسة متأخره
و گوه فوتتني المدرسة للصف..گعدت بمكاني يم روان الي گالت بهمس

- عبالي ما راح اداومين

و بدون ما ادحگ عليها گلت

- و استغليتي الوضع و جيتي وي سلطان
شگد نحيسه

- والله سلطان گال امشي اوصلچ..و من گلتلو عليچ گال يجوز ما ادوام

ما جاوبتها و ركزت بالمدرسه الي گاعد تشرح..

بالفرصه طلعت للساحة..و وياي روان
گعدت على دچه و بيدي نستلة و عصير..لأن ما متريگه و راسي گام يوجعني

رفعت رأسي على صوت ضحكات..يجرنها جر
شفتها لـ هديل و تك القندرة مالتها اماني
يدحگن عليه و يضحكن..ما درتلهن بال
و هنّ من شافني ما مهتمه بيهن
جني صوبي..و بدون ما ارفع راسي گلت لـ روان

- ما عليچ بيهن..اشگ حلگچ اذا حچيتي كلمة

هزت رأسها بـ اي
وصلن عدنا و اني ما زلت مستمرة أكل

- شلونچن بنـات

حچتها و هي تجر بـكلامها
يا الله شگد غثيثة و ترنفز و ترفع الضغط

- زينين

حچيتها بدون ما ادحگلها و بنبرة بارده

- ايي عفية..اگول روان
اليوم سلطان وصلچ مـو ؟

سألت سؤالها..و قبل لا ترد روان انـي گلت
و نظراتي عليها

- ايي وصلنا

رفعت تك حاجب و گالت

- و انتي وياها ؟

ابتسمت و أني اگول باستفزاز

- ايي غير احنا جوارين
و هو ابن خالة امي

لوت شفتها و هي تكتف أيديها لصدرها

- عجل ليش يگول لـمار ما گاعد احچي وياها ؟

ابتسمت و أني اغمزلها و اگول

- غير حتى ما تغار اختچ.. بعدين ترا علاقتي بـ سلطان قوية..و بينا ميانه زفره

مع ما ختمت كلامي ضربت بكوعي ايد روان و هي گبل افتهمت قصدي و گالت بضحكة متوتره

- اي اي..غير ربينا سوه

تخصرت هديل و گالت و هي تقلص عيونها السود
هي صح حلوه بس عيونها عبالك دگم قميص..
عكس اختها لمار حلوه بشكل..بس طبعها زفت..

- و منو يگول كلامـچ صحيح ؟
يجوز تحچين هيچ حتى تغيضيني و تغيضين اختي

وگفت و اني اهز راسي بـ لا و اگول

- تؤ تؤ..شلون اغيضچن و انتي بنت الحجي الفاضل العابد اخاف يروح يشور بينا و حوبتچن تطلع بينا..يمـه عود يصير بيه شي اني وين انطي وجهي

مع ما كملت كلامي تقدمت عليه و هي تضغط على حنچي بقوة..روان حاولت تدفعها بس أني ما تحركت من مكاني..بس دفعتني على الدچه و اني اسند نفسي بيدي حتى ما اوگع
غمضت عيوني من حسيت باظافرها تجرح خدي و يم شفتي
و مثل فحيح الافعى گالت

- انچبي لين..و لا تجيبين طاري ابويه على لسانچ لأنو اشرف منچ و من كل عشيرتچ

هزيت رأسي بـاي و هي وخرت ايدها من وجهي بنتره
و أني بس ابتعدت ايدها..گبل عطت و اني الزم وجهي و اصيح و ابچي

فتحت عيونها على وسعهن و هي تلتفت و تشوف البنات بالساحة يدحگن عليها..

كمشت ايد روان و گلت

- امشي روان.. امشي محد يگدر يأخذ حقنا الا المديره

حاولت تكمشني تا ما اروح بس اني تجاهلتها
و مشيت للمديرة و أني حاطه ايدي على حنچيو اضغط عليه تا يصير احمر بالزايد
و بنات چانن شاهدات على تهجمها عليه
حسيتهن ورانا يمشن

وصلت للمديرة و گبل گمت ابچي و اشوفها حنچي گبل صاحت گالت خلي تجي هديل..

البنات صارن عش نحل يم الباب
فاتت هديل و هي ادحگلي بنظرات نارية
و اني من بين دموعي دحگتلها بشماته

- احچوا شصاير ؟ يعني انتن ما نخلص من مشاكلچن

- ست والله چنت گاعد اكل بالساحة و هي چتي و گامت تحچي و سألتني عن شخص و گلتلها اي اعرفو و هي تهجمت

- والله چذابة ست..مو هيچ السالفة

صاحت هديل..و المديرة نترت بيها و سكتت و هي تنصي رأسها

شبكت أيديها بعضهن و گالت بشبة عصبية

- و ليش تمدين ايدچ عليها ؟

- ست تگول..

بس حچت هيچ و سكتت و هي اتمتم..
دحگت لـ روان بنظرة تعرفها زين يعني احچي
و گبل روان گالت

- ست اني چنت حاظره بوكت السالفة اگدر احچي

هزت المديرة راسها و گالت

- احچي بنتي

- ست جتي هديل و حچت وي لين على فد شخص..و من گالت اي اعرفو گالتلها انتي تريدين تقهريني..گالتلها شلون اقهرچن و ابوچ اخاف يزعل علينا لأن هو جوارينا و اهلنا و اهلها ربع

فتحت هديل عيونها على وسعهن..بس يا ربي والله شگد ما تفتح يظلن دگم

- سـت والله چذب

- عجل ما طول چذب و چذب احچي انتي ؟
هاا يلا

هي سكتت و اني ظليت ادحگلها
حقها ما تحچي تخاف لا تفضح اختها

- هي استفزتني بكلامها.. و انفعلت و تهجمت عليها..
و هي ظلت بمكانها ما دافعت عن نفسها

حچتها و هي ادحگلي بخزرة
و أني گبل گلت

- ست اني ما دافعت عن نفسي لأن هي دفعتني و البنات برا شاهدات
و لو حاولت ادافع عن نفسي راح تكبر المشكلة اكثر.. ضربة مني و ضربة منها و توصل لأهلنا
و اجيت عليچ لأن انتي مثل امنا و راح تسدين الموضوع و كل الأطراف راضية

ابتسمت المديرة لحظات و رجعت مسحت ضحكتها
مديرتنا تحب الي يمدحها..تنفش ريشها نفش

و بحذر گالت هديل

- ست ترا اني والله ما ضربتها..

- ما ضربتيها و حنچها مجروح و أحمر

البنات الواگفات يم الباب وحده منهن گالت

- ست ترا والله هديل دفعتها لـ لين احنا چنا واگفات

هي حچت و الباقيات تولن اي ست شفناها و اي ست صحيح
جيت اندار عليهن و ابوسهن من راسهن لأن وگفن وياي..

المديرة من شافت هوستهن صاحت بيهن و گالت روحن منا..
وراها گالت الـ هديل اعتذري منها
و هديل گالت غصب عنها

- اعتذر منچ لين

و اني گلت بهدوء

- و اني اتقبل اعتذارچ و مسامحتچ ست هي عصبت و ما گدرت تتحكم بغضبها.

ابتسمت المديرة و گالت

- عفية بنتي..الله يبارك بيچ

و اندارت على هديل و كملت

- و انتي هديل مو كل يومين و الثالث جيتي متكاونه
ترا راح اوصل هالحچي لأهلچ..

هزت رأسها بـ اي و گالت

- بعد ما تنعاد

- يلا عجل..روحن من هين
و اياني اياچن اسمع بعد متكاونات عيب ماما انتن كبار..

هي طلعت و اني وگفت ثواني و گلت
خلي اتلوگ الها شوية
ابتسمت و گلت و أني احس بنظرات روان عليه مستغربة

- شكراً ست..والله عرفت حقي ما راح يروح
و انتي موجوده..لأن ادري بيچ تمشين وي الحق..صدگوا من گالوا ست فهميه احسن مديرة بالمحافظة

تعدلت بگعدتها و هي ترفع نظراتها الطبية بـ غرور و تگول

- ما سويت شي.. يلا بنتي روحي لدرسچ

سلمنا و طلعت..مع ما طلعت باب الغرفة
سحبت نفس و دحگت لـ روان الگالت بنبرة خافته و مصدومه

- خرب يومچ..والله اخذتي حقچ و انتي العلتي

رفعت تك حاجب و تخصرت گدامها و گلت

- لا والله ؟؟ اني الي بديت ؟؟

- لا لا.. يمعوده هي

دحگتلها و گالت

- اي عفية بنيتي

كملت طريقي و توجهت للصف و هي مشت وراية..
من فتت صارت گدامي على الرحلة مالتها هديل
رفعتلها تك حاجب..و رحت گعدت بمكاني و جتي يمي روان

اني ما عندي اي مشكلة وياها..بس هي تكرهني هيچ بدون سبب..حتى گبل لا سالفة سلطان و لمار
من الثالث بيناتنا عداوة و ناس ما اطيق ناس

من صار وكت الطلعة..طلعت اني و روان
على اساس نرجع مشي بس گالت

- سلطان گال اني ارجعچ

كتفت أيديه و گلت بضحكة

- يعني راح اشوفو

تنهدت هي و تقربت عليه و گالت بنبرة هادئه

- لين ليش ما اطلعينو من بالچ

ابتسمت و أني اگول

- ما اريد..

يمكن عبالها الوضع بهاي السهولة
احب شخص و هيچ فجاة اذب كل مشاعري اتجاهو ورا ظهري..

ظلينا ننتظر دقايق و ماكو هو..فـ قررنا نرجع مشي
بيوتنا قريبه يعني تقريباً ربع ساعة مشي
عدينا فرع المدرسة و لمحت سيارتو لـ سلطان
كمشت ايد روان و گلت

- جا اخوچ

هي دحگت لوين گاعد ادحگ و ضحكت و گالت

- عفية عيون شهالبعد و شفتي..

- غير شادة بوصلة بگلبي

لحظات قليلة و وصل عدنا
شفت نظرات الاستغراب بعيونو..سلم و أني صعدت بدون ما انطق كلمة

- عبالي بس روان..

حچاها و روان جاوبتو

- خطية لين جايه عليه و لاگيتني ماكو

هز راسو بـ أي.و هو يدحگلي من المراية
عگد حواجبو من ركز بوجهي..و أني صديت على الشباك حتى ما يشوف مكان اظافرها للعتوي هديل
لأن ثار شخط يم شفتي

طول الطريق چان يحچي هو و روان..و أني ساكته
صح اريد أشارك بالحديث لأن مرات يحچون شي واريد اسولف بي
بس كل ما أتذكر طردتو ليه اسكت.. على أساس زعلانه و حركات..

وصلنا للبيت و طبگ السيارة گدتم بيتهم
توي نريد ننزل گال

- لين شبي وجهچ ؟

دحگت عليه و رجعت دحگت لـ روان
حسيتها گاعد تحذرني انو احچي و اگول هديل ضربتني
بس اني تجاهلتها و گلت

- هديل ضربتني

رفع حاجبو عبالك ما عرفها و أني بضحكة گلت

- هديل اخت لمار.. بس لا تخاف اخذت حقي

و حدرت من السيارة..قبل لا اشوف ردة فعلو
فتحت باب بيتنا و فتت..طبيت للمطبخ و لگيت امي گاعد تسوي غدا سلمت و ما جاوبت و أني اسمعها ادردم بسخط

ما حچيت شي..فتت للغرفة و غيرت ملابسي و غسلت
و طلعت للصالة..چان بس عماد گاعد شكلو ما راح للشغل..

گعدت على القنفة و انتبهت لصورة والدي الي منزلتها امي و حاطتها على الطبلة

- شصار و حدرتها ؟

- طبگت عدها..

تنهدت و رحت عليها..رفعتها و رجعت علگتها

انداريت عليه من گال

- شبـي وجهچ ؟

- غفيت بالصف على الرحلة..و بيها هيچ مثل النتؤات و صوبتني على خدي

رفع حاجبو و گال

- يعني ما متكاونه ؟

ضحكت و گلت

- لا يمعود.. ماكو خصوم بالايام

ضحك و گال بصوت ناصي

- والله محد يگدرلچ

ابتسمت و طلعت للمطبخ..گمت اساعد بأمي
بس كالعادة ما ترضى بشغلي
أني حمارة و بجدارة بالطبخ و شغل البيت..كل الي اعرف اسوي الكنس و غسل المواعين

دائماً اشوف البنات الي بعمري شاطرات بالطبخ لو بالتنظيف
الا أني..حرام كلشي ما اعرف اسوي
لا فلحت بدراسة..و لا فلحت بطبخ و شغل بيت..و حتى مكياج و شغلات البنات ما اعرف

احس نفسي نفر زايد بهالدنيا..بس فاحلة بشي واحد هو تطقس الأخبار و الكوانات غير شي ما اعرف..

- يمه شسوي ؟

سألت امي و اندارت عليه و گالت

- لا تسوين شي كلشي كملت

- هسا دعلميني..باچر عگبة بيت عيالي كلشي ما اعرف اسوي

حچيتها و هي رفعت تك حاجب و گالت

- و هذا يا مگرود ياخذچ

- يعني فوک ما تگولين..اني ما انطيچ الا لواحد عندو خدم و حشم حتى ما تتعبين و تشقين

هزت ايدها و بسخرية گالت

- ظلي احلمي ظلي..نفسچ حلمت و آخر شي اخذت ابوچ شوفني نجوم اليل بعز الظهر

- ميت لا تحچين عليه

حچيتها بجدية و اني اعگد حواجبي و هي اندارت لشغلها و گالت

- ايي الف رحمة و نور على گبرو

ضجت حيل من سمعت نبرة امي الي عبالك تستهزء
تعودت عليها..او بالاحرى كلنا تعودنا على تقليدها و استهزاء بالمرحوم والدي
شگد نگوللها ميت ما تجوز عليه بس الرحمة و هي اطنشنا
صح من تزوجتو ما شافت بس الفگر و التعب و الشقى بس هاي حالتو
رغم عمامي حالتهم زينه..بس هو چان عكسهم

شوية و جتي طيبة من الدوام..طبت للغرفة و اخذت هدوم و فاتت للحمام
أني چنت گاعده اعزل بالكتب مالتي
دحگت و شفت تلفونها..اعرف ميصير العب بشي مو الي بس صابني فضول..اريد اشوف شناشر سليطين

اخذت تلفونها و لگيت رمز بي..تنهدت و اني ما اعرف الرمز
توي حاطتو بمكانو دگ
شفت اسم ريام و يمو نقطتين
گلت عيب يمكن وحده من صديقاتها خلي اجاوب..

فتحت خط و گلت الو
بس ما وصلني رد..عگدت حاجبي و گلت

- الو.. اني اختها لـ طيبة هي بالحمام
محتاجه شي

و همين ماكو رد.. اخر شي انسد الخط بوجهي

- گبور عبالك راح نحسدها على صوتها

حچيتها و أني ارجع التلفون لمكانو..كملت تعزيل كتبي و فاتت طيبة و هي تنشف بشعرها

و بدون ما ارفع راسي گلت

- دگ تلفونچ و جاوبت بس محد رد

حسيت بضربة المشط على ميز المراية و صوتها و هي تگول

- منوو ؟

و ببساطة گلت

- مسجل بأسم ريام

- و انتـي منو سمحلچ تجاوبين ؟؟

نترت بعصبية و اني رفعت رأسي عليها و گلت باستغراب

- شفت الموبايل دگ و رديت..ما صار شي و هي حتـى ما حچت

- موبايلي بعد ما عليچ بـي..شي مو الچ ما دخلچ بي
أن شاء الله تلگـين ابوية يدگ ما تردين

ابتسمت و بسخرية گلت

- لا تخـافين ابوية ما يدگ
بعدين شدعوه ما صار شي ؟

- ما گاعد اشاقيـچ لين..شي ليه ما عليچ بيه
امي لـو تريدچ تكمشين موبايل چان شيلتچ فـ ليش تكمشين موبايلي

عگدت حاجبي و ما ردت اتلاطش وياها لأن ادري بنفسي اگوم احچي حچي اكبر مني و منها
فـ سكتت و كملت تعزيل كتبي
و هي گبل گعدت و كمشت تلفونها..تنهدت و هزت راسها و ادحگلي مرة و ادحگ للتلفون
هزيت ايدي و گلت بصوت ناصي

- من اشتعلو اهلچ شگد انانية

بس اسمعها تتأفف..دحگتلها بطرف عيني و ما حچيت شي
طلعت من الغرفة ورا ما كملت كتبي
و طيبة طلعت وراية صبينا الغدا و گعدنا كلنا حول السفرة

دحگت لـ عماد الي اكل شوية و گام
و امي گالتو

- يول شو ما اكلت

- مو جوعان..

حچاها و طلع برا على المغسلة غسل و طب
أني ملت على امي و گلت

- يمه منو هذوله الي تكاون وياهم الصبح

- مشتري من عدهم بضاعة و ما دافع الفلوس لحد هسا..فـ جوي تكاونو وياه

- و هو ما يدفعلهم ؟

جرت حسرة و عافت الخاشوگه و گالت

- منين يدفع من گمله..كلها تاخذ منو بالدين
و شغل المحل هالايام واگف

سكتت و ما حچيت شي..بس دحگت لـ عماد الي مبين ضايج
كملنت غدا و غسلت المواعين و طيبة الي عبالك شوف شنو سويتلها ما تحچي وياي سوتلهم چاي
و طلعت..كملت المواعين
و رحت للصالة و لگيت عماد مو هناك
فتت لغرفتي و گما احظر بالواجبات..

مرات ما افتهم شغلة..فـ اسال طيبة
بس هسا من سابع المستحيلات انو احاچيها..حيل ضجت من كلامها
عبالك تقصد انو ما يثقون بيه..
طيبة تختلف عني اختلاف جذري الطبع بالسوالف
هي دايما تسمع كلمات الثناء و المدح..بسبب كلامها و طبعها و انها مبتعده عن المشاكل و السوالف
عكسي اني..الي شگد احصل انتقادات و دائما يگولون صيري مثل اختچ
صيري مثل طيبة..تعلمي منها

بصراحة هي احلى مني..و بيضه عكسي اني حنطيه عيونها كبار و مسحوبات و وجهها عبالك منحوت نحت..و طويله و جسمها مرتب..

اني چنت حنطيه و عيوني كبار و حواجبي ثخينات و سود..و البلوه الكبرى شعري
أني صح واثقة من نفسي و احبها..بس أكبر مشاكلي شعري اسود و كيرلي
اضوج منو و مرات اتمنى اگصو..و فوگ كلشي التقليد الي احصلو من عماد و طيبة..انو شعري منكوش و عبالك شعر نعجه

ظليت اقرأ و أني اعبر سطور..الي ما افهمها اذكر نفسي ما راح ناخذ الشهادة ويانا للگبر

سديت الكتاب و گمت و أني احس راسي صدع من كمية المعلومات الي دخلت لدماغي
دحگت للساعة و شهگت و أني اگول

- لا يربي..صار 45 دقيقة اقرأ

فتحت أيديه و أني اذبهن على الچرباية و اگول بجزع

- والله كافي بعد ما اقرا تعبت نفسيتي تعبت

ثاني يوم الصبح بدلت و تريگت و طلعت..
من صرت يم بيت ام عامر..لگيتها گاعد اتذب الزبل
سلمت عليه و انفتح باب الحوش مال بيت أهل سلطان و طلع بسيارتو

انداريت على ام عامر الگالت بصوت ناصي

- يولي لين

- ها خالة

حچيتها و انداريت عليها و هي حطت ايدها جوه خدها و گالت

- هذا سلطان شگد يستلم راتب

فتحت عيوني على وسعهن و گلت

- شمدريني خالة..

- مو گلت گرايب يمكن تعرفين..

دگ سلطان هورن و اني دحگت عليه و طلع بسيارتو من الفرع

اتجهت للباب و أني اگول

- مع السلامة خالة وراية دوام

طلعت روان و سدت الباب و طلعنا
لويت شفتي و گلت

- اخوچ ما وصلنا اليوم..لو شافني و انهزم

- لا والله گال بس خطية مستعجل

وصلنا للمدرسة
و چان عدنا امتحان..و الحمدلله و بجدارة اخذت 45 من 100 عبالك جيت اهز جتف لو ما رزالت المدرسة و هي تگول عدلي دراجاتچ
اما روان فـ خطية أخذت 30

خلص الدوام و طلعنا و احنا بالطريق..مشت بصفنا سيارة نوعية هوندا دحگت لـ روان و گلت

- احسو مراقبنا لا تردين اذا حچه لو سوه شي

- يمعوده ليش گبل ظنيتي ظن سوء

- اعرف هالسوالف

مع ما حچيتها انفتح الشباك من عند السايق من جهتنا..تجاهلتو و ما دحگت و روان سوت هيچ
بس وگفت من گال بضحكه

- هيي يحلو شبيك تتجاهلنا

گبل صديت عليه..و قبل لا اگول كلمة
فتحت عيوني بصدمة و اني ارفع حاجبي من ضحك و كمل كلامو

- يگلك الما يسأل عليك انت اسال عليه
مو هيچ لو أني غلطان ؟

.

السلام عليكم ورحمة الله وبركاته 💖

شلونكم حبايب عمري

ان شاء الله الكل بخير 💚

اتمنى البارت عجبكم 💙

شنو ارائكم و توقعاتكم 🌚💔

تتوقعون منو الي وكف روان و لين ؟

🌚😂و التخطيط الصهيوني مال لين 😅🙄

طبعاً باجر ماكو بارت من هسا اكوللكم 🤭😬

يمكن يمكن انزل صور الشخصيات 😁
يعني اذا لكيناهم من هسا لباجر

و بس والله
نلتقي على خير احبتي 🧡
و لهذاك الوقت استودعكم الله الذي لا تضيع وداعه 💚