#جوليت وأسرها....

البارت الثامن

البارت الثامن
رواية..جولييت واسرها ..غياهب الإنتقام
بقلمي...نور سمو العراق

💔💔💔💔💔💔💔💔💔💔

بْرٍيَئةّةّ هِيَ لُگنْهِآ #قۆيَةّةّ ، مِآ زَآلُ يَتٌرٍآقصٍ #آلُأمِلُ
فَيَ عٍيَۆنْهِآ رٍغمِ أنْ آلُحٍيَآةّةّ دِآئمِآ #تٌعٍآنْدِهِآ..

.............................

حسيت بلهيب حروفه وتذوقت غموض سيادته لحظة صمت مني وحبس للإنفاس

عكسه تماما مثل عاصفه هوجاء وهو ينطق بهدوء...الووو الووو الوو منو وياي

قفلت الخط بسرعه كبيره وخوووف واضح ودموع متطايره

فاضت مشاعري من الدمع واشتدت عليه العواصف

مذاق الحب والعاطفه الكاسر ماحيها،من ناحيتي لا يحبني،ولا اكسر خاطره...

لزمت اسفل بطني وكعدت من التعب رخيت ضهري علئ جذع النخله اليابس هدئت من ثورتي الي جانت راح تفضح كوولشي...

رفعت عيوني الرب السماء واني امنع دموعي من الهطول ..التمس منه الصبر والصبر جمييل...

ياربي احس باهانه عظمية احس القلق صار جزء من يومي لازم كل يوم يطرق ابوابي ...

ليش موبايل جابر عند جاااسر لييييش معقووله عرف بيه هنا معقوله جابر اعترف عني...

اني لازم اشوف حل لازم ... ميصير اضل هيج متشتته ياريت لو احمي نفسي منهم ...بس وين اروح ؟

ياربي طمني معقوله يجي ياخذني ويموتني ويكتلني اجذب علئ نفسي واكول يمكن موبايله سهوا صار بيد كاسر

وياريت سهوا ياااريت

صفنت بشروود هل اسمين ما يختلف بيهن بس السين والباء..والباقي كله متشابهة...

بس فرق بين السماء والارض واحد مصدر خووف وكسره الية...

وواحد مصدر امان وجبره الية...

جاسر وجابر...اختلاف بالحرف الثالث بس..

الخوف احسه مقيدني ونفسيتي وكرامتي ما تسمح اروح اتوسل بصبرية تخليني عندها...

هاي تاليتج جوليت صفيتي بالشااارع مكسورة ومهضومه وما الج وااالي ومهزومة من قبضة الكاسر...

ضليت كاعده بصف الشجره واستسلمت للامر الواقع خلي يجي وشيريد يسوي،خلي يسووي اني ذنبه ومرته وعرضه وغصبا ما عليه يتقبلني ...ما خايفه منه...

ثواني واتصل الموبايل باووعت جااابر ..رجفت من الخووف مستحيل ارد يمكن عرف بيه.  ياااووويل حالي شلون بيه...

رجع اتصل مره ثانيه ومرتين وتلاثه مجاوبت اتخايل صايره عركه بينهم وجابر اعترف عليه ويجون يموتني لا ياربي رحمتك

معقوله يموت طفلي مثل ما كالت هاله وكال..جابر لماما رضية اي اتذكر كلها لا تاخذينها اله هسه يموتها...

وصلتني رساله منه كاتب...جولييت افتحي خط اني جابر

كتبت بقلب محروگ واصابع ترجف...جذاب انت جاسر ..ما راح اكلك مكاني اله تنطيني الامان وتحلف ما تكتلني اني وطفلي والله حرام عليك شنو ذنبنه

وبعدين لا عبالك اني يم خالة جابر لا خالته طردتني واني رحت بغير مكان

وهااا ترئ،ما خايفه منك ولا راااح اخاااف ترئ مسويت شئ غلطت انهزمت منك لان انت مجرم تريد تموتني وهاله كالت هذا الكلام سمعته منك

حرام عليك والله ليش تكرهني لييش

رجع اتصل فتحت خط بخووف كال...الوو

غمضت عيوني براحه من سمعت صوته سحبت نفس،عميق وحطيت ايدي علئ مكان گلبي راح يطلع من مكانه من الخوف

همس بخفوت...انتي شتحجين خالتي ليش طردتج

بجيت بالم وكأن جابر بلسم لجروحي والوحيد الي اشكيله مرت لحظات واني اصارع بروحي واهديها

محتاجه اشكي وابجي للحظات تمنيته مو جابر تمنيته جاسر الي رد عليه اريد اشوف ردة فعله

كال بخوف..شنو خالتي ليش طردتج

صرخت ببكاء ونحيب...جابر هاي خالتك المخبله طردتني ..

ووو وبعديين ليش،جاسر هو الرد علئ موبايلك ناوين تجلطوني..حسيت الموت رد عليه مو جاسر

تنهد بهدوء كال...جنت عندهم مسوين ثواب واديه تدمرت ورحت غسلت نسيت موبايلي بالاستقبال وهو جاوب

سالته بترقب...زيين عرف بيه اني اتصلت

ضحك كال...والله هو ما حجه أي شيء بس كال اتصل عليك رقم غريب احتمال تكوون ...

سكت ما كمل كلامه ..

استغربت جاوبته..احتمال شنو؟

رد بهدوء...ماكو شئ ماكو شئ هسه كليلي ليش طردت صبرية وانتي حاليا وين

بجيت باسئ علئ حالي..بنهاية البستان فدوه جابر تعالي خايفه حييل ومتت من القهر...

رد بغضب...شبيها هاي تحجي صدك اخذي الموبايل الها احجي وياها

جاوبته بعصبية...مستحييل مستحييل ما اريد اضل يمها جان متت من وره ثورها ومن مات دكولي انتي فكر مات من وراج

جر نفس وزفره كال...يالله ان شاء الله جايج لا ترحين الاي مكان ضلي بالبستان ..

قفلت الخط وحضنت ملابسي بالعلاكه وبجيت بقهر...يالله امي تحس بيه تحس بدموعي تحس بمعاناتي وغربتي خايفه حييل وتبهذلت...

حسيت بوجود شخص قريب مني

رفعت عيوني شفته داوود ...تضاعف عندي الخووف بلعت ريكي واني احضن نفسي

وكفت وشلت ملابسي دا اروح

كال بصوت هامس...ويييين

درت وجهي عليه بغضب...وانت شدخلك شدعوه هلكد فضووولي وخر مني ما فارغتلك

ضحك باستهزاء...اي يحلوو سولفلنه قصتك احتمال نساعدك

رفعت اصبعي بتهديد...شووف يا انت لا تتمرجل عليه ما فارغتلك وما عندي اي مشكله وما اريد مساعدتك

ضحك بصوت عالي...اويييلاة لبوووه والله ارجع واكول هنياله الحبلج..

فتحت عيوني بغضب وبعصبية...تريد اخابره يجي يكسر سنونك ويشوف الحباله علئ اصولها...

تقرب مني اكثر وهو يحجي بخدر...ياريت ويينه

كمل بجديه واستفزاز ...لا والله صدك صدك يعني فعلا هنياله بس اموت واعرف ليش هلكد غبي وتاركج هنا معقووله اعمئ وما يشوف كل هل رووعة الي بوجهج...

ابتسم بخبث...ورغم حامل بس جسمج عذااااب

حسيت بتحطم باجزاء رووحي ياريت لو اكدر انتقم منه ومن كلامه اللاذع ياريت لو جاسر يجي ويادبه ويعلمه شلون يحجي وياي هييج

جان رغم علاقته الجافه بيه بس دائما ينبهني ودائما ما يقبل اكون محد انظار الغيرة ...

جريت نفس غاضب...اذا تعتبرني بنظرك بس جسم فاحب اكولك رجولتك بس اسم...

رفع حاجب بغرور...تردين اشوفج رجولتي

مسحت دموعي ...ميحتاج لان انت اشباه رجال وحرامات اشبهك بحرمه بس ياريت لو تلبس حجاب ولا تكعد تهدد برجولتك ...

حسيت وجهه احتقن وحتدت ملامحه ...اشوفج ان شاء الله بس خلي اعرف موضوعج شنو وان شاء الله الكل حادث حديث...

بس ياريت دكليلي ..انتي ارملة لو مطلقه لو شنوو ..ولو مو مهم عندي بس حاب اعرف

جاوبته بحده ...مو شغلك وزوجي علئ كولة ابن عمه يعادل الف رجال...وهااا ترئ زعله حااد لا تتعرض الحرمته...

رد بضحكه.  ههههههههههههاي خفت كللللللش،

بس وينه عنج ليش شامرج هنا شنو السبب حاب اعرف سالت عمتي صبريه مجاوبت و دكول كرابتي من بعيد...غير نعرف شلون انتي گرابتنه من بعيد...

درت وجهي ومشيت شفت الفلاحيين يمشون سرعت بمشيتي حتئ الحك بيهم واحتمي بيهم سرا من داوود...

كعدت قريب من النهر لان النهر عالم تجي وتروح منه ومو فارغ اني اخاف اكعد بمكان فارغ اخاف من هل كلب يستغل الوضع...

رجعت بذاكرتي للماضي...

جنت هسه متزوجه وعلاقتي بالكل بااارده

اجت نوال تركض وهي تطك بعلجها وشايله موبايلهل كالت...تعالي تعالي شوفي شجبت الج

استغرب كلتلها...شنوو؟

فتحت الموبايل من علئ مقطع...تعالي شوفي شام تجنن تجنن مو طبيعية..

اخذت الموبايل منها بتلعثم باوعت للفيديو بروح معصوره شفتها جانت لابسه كووت كابوي طوويل وبنطرون اسود وتشيرت اسود ولابسه كاب وردي

ومبين بدمشق لان معالم المنطقه واضحه جانت تلعب ببنتها زغل وهو يصور بيها ويضحك

وهي دكوله ...عنجد بيكفي ليه عم تصورنا

جاوبها بحب ممزوج بضحكه...لان احببكم

ضحكت بروعتها وجمالها وهي تنزل راسها لبنتها...ونحنا كتير بنحبك مو هيك غزوله

جانت طفله يمكن عمرها 3 سنوات هزت راسها بأي

همست الها وهي تحجي وياها بحب...يلا ائوولي بابا نحنا بنحبك كتيير مشان يدللنا اكتر هههه

جاوبها وهو يصور...ادللكم حتئ لو متحبوني ههه

اخذت الموبايل مني نوال وهي تجر نفس كالت...اني اعتذر يمكن ضوجتج بس مو قصدي صدكيني بس حبيت تشوفينها

همست..حلوه حييل هي ويين ماتت لو وين

رفعت اكتافها بمعنئ ما ادري...

جريت نفس...يعني هو ميحجي عنها

جاوبت...لا ميعرف ميته عايشه هو ميعرف بس اني اكول اكيد ماتت لان اخوها وابوها ماتو من قبل الدواعش يمكن قتلوها او اخذوها اسيره الله اعلم ...

جريت نفس...لعد شلون غزل طلعت ما بيها شئ

ردت ..غزل جانت عدنا هو جابها النه لان جدها راد يشوفها  وهو هم جان يراجع علمود تاخذ الجنسيه العراقية ضلت اسبوع وبعدها ضل يتصل بيها متجاوب...

وبصراحه ما اعرف قصتهم روحي اله هو يسولف الج اني شدخلني بعدين تكصوني دكولون فتانه

تركتني وراحت بدون ما افهم منا ولا شئ وحيرتني اكثر ...بس هي مثل ما كالت اكيد ماتت لذلك هو ما حب غير شام...

والعرفته متزوجها عن حب

حسيت بيد شخص علئ كتفي كمزت من مكاني واني اباوع الها شفتها بنيه شابه كالت بهدوء...لا تخافين بس صبريه دكول خلي ترجع ساعة عصبية

مسحت دموعي همست...ما اريد هسه يجون اهلي ياخذوني ..» جنت اقصد جابر »

خلت وراحت ...تقريبا مرت ساعتين ونص واني كاعده قريب من الشط

غوربت الدنيا والشمس غابت بالغيوم واحتل مكانها القمر...

انتبهت علئ صوت الهورن مالت السيارة باوعت شفتها سيارة جابر الفرحه تخللت لداخل روحي

ابتسمت تلقائيا ووكفت بصعوبه هو نزل من السياره وتقرب مني من شفته بجيت بصوت عالي ومسموع

هو خطيه احتار جريت نفس بحذر كال...علئ كيفج علئ كيفج اهدئي شووويه وخلينه نتفاهم يالله تعالي ...

مشيت وياه واني لسه اشهك وابجي واحجي علئ صبريه ...

شفتها اجت من بعيد العبايه مفتووحه والنعال كوه داخل برجليها...

وثوبها طاير لنص الساق كالت من بعيد...هاااا العياره خابرتي جابر ..شني خايفه منه لو اسحلج انتي وياه

باوعتله بقهر...شوفها جابر مات الثور لو طلعته من عيوني بس هيج تغلط عليه اني ما اريد يمها أخذني الغير مكان...

هزت ايدها بقهر...لا فدووه جكليت بروح اعزازج ضلي يمي...عشتوو انوب هي الما راضيه

هو ضحك كلها...خاله علئ كيفج خلوني اتفاهم وياكم

باوعتلي بغضب ..عوود انقهرت عليج واجيت اخذج طلعتي ما تستاهلين

جابر اخذنه ثنينه ودخلنه البيتها كعدنه بحديقتها الزاهيه

كعدت سولفت اله السالفه كلها شلون مات الثور وشلون تبده الحليب وشلون طردتني بس ما كلتله هي دكول عني فكر واني جسحت الثور

كالت بقهر وحزن ...كول حل وياج اتزوج عليج ابو اللول تقبلها هاي فوك ما مات ثوري انوب هيج دكول

باوعلي بعتب كال...ليش،هيج تحجين مو عيب

رديت بنحيب...تغلط عليه دكول الفكر وجسحتي الثور ومن شفتج ما شفت خير موتتني بس تغلط وتريد احلب البقره واني اخاف منها ...

رغم  والله اسألها دا اقطف الفاكهه الها وهماتين كل الخضراوات اقطفها الها...

غمت كصتها...امداني هم كالت اقطف فاكهه ولك جوبير اخذنهه مني لا ابتلي بيها تنعوص عليه وانه ما احب هيج

ضحك كال...هسه اراضي منو جولييت لو صبريه

ردت صبريه وهي تنفث بجكارتها...لا راضي جكليت وين اني خالتك حتئ ما كلت البقية بحياتك وان شاء الله اعوضج جم مليون لثورج

وترئ انت السبب بموتت الثور لان انت جبت جكليت وطفرت من الثور اكو وحده طفرت كدام الثور...

وهاا ترئ ثوري حساس وتحسس منها لان شردت منه

دك صدره...عمي ثورج اني اخسره وشتردين حاضر

ردت بزعل...كللها لا تعيرني لان ابو اللول تزوج عليه

ضحك...يالله جولي كومي بوسي راس خالتي صبرية ترئ كلبها طيب بس بيها طنات...

صرخت بوجهه...شني مخبله اني

رد عليها ...لا حشاج جولييت هي مخبله مو صح جولي

هزيت راسي بقبول ووكفت بست راسها واعتذرت منها علئ،شنو اعتذر ما ادري ...

ضلينه شويه نسولف ونحجي وتالي هو كال حيروح طلعت وراه سالته عن جاسر

كال...كل عشيرتج رجعت ومحد يتعرض الهم بس اهلج يريد يسلمون عاصم

جريت نفس ...زين اهلي ويين

تنهد...والله محد يعرف وبيت عمج من سالناهم كالو احنه بمكان وهم بمكان ما نعرف وين

رفعت اديه بالدعاء...ربي يحميهم وين ما جانوو

باوعلي بغموض...اخوج قاتل ويستاهل القتل العين بالعين والسن بالسن والبادي اظلم وترئ دمه مهدور

حسيت بطلقه استقرت بين ثنايا الروح من كال دمه مهدور اخويه رغم قاتل بس يعز عليه ينقتل للاسف

خطيه وصاني علئ صحتي وانطاني فلوس مقبلت اخذهن كال...من جاسر

استغربت وخفت...شلون من جاسر ..انت دليته بمكاني

ابتسم...لا بس هو انطه فلوس بثواب بنته واهله للفقراء واني كتله اعرف عائله محتاجه.. انتي وطفلج عائلته وبحاجه لهل فلوس اخذيهن...

همست...الله عليك من جاسر

رد بطمأنينة...اي والله وداعة امي من جاسر

ارتاحيت واخذت الفلوس هو راح لزمت الفلوس وجريت  نفس حطيتهم علئ صدري مستحيل اصرفهم...مشتاقتله بكد شوقي الامي،والله...

بس هو ميحبني ولا بحياته حبني...

ربي يهدي عليه ويحنن كلبه...

...................................

بعد مرور عشر ايام...

ريهام..

اليوم ابويه عزم ولد اخو مسوي ثواب العمو وفلاح وبنت جاسر...

خطيه امي مقصرت راحت تسوكت وطبخنه وشوينه سمج..

اجو بس صلاح وجعفر ورضيه وبنات فلاح واجتي اشواق اختهم..

بس جاسر ونوال وام فلاح ما اجوو ما اعرف ليش ...

اجت خطيه اشواق ورضيه هماتين ساعدنه غسلن الفاكهه والخضروات

وقار جانت كاعده علئ الكرسي وتنضف بالخضره بيدها الصاحيه

كعدت يمها اشواق باستها كالت...احنه بنات مهيوب ولا عدنه حظ وقورة ايدها راحت بشربة مي واني صار شكد متزوجه وما عندي طفل ..

درت وجهي عليها ابتسمت بحزن...المؤمن مبتلئ ...ان شاء الله ربي يعوضكم

همست وجرت نفس حزين...امييين

رجعت باست وقار بخدها...شلونج خيتي مرتاحه هنا

باوعتلها بنظرات فارغه همست...طبعا لاااا رغم محد مقصر وياي بس هذا مو مكاني مشتاقه لابويه مووت ليش لو ابويه هنا يقبل اضل هلكد ومسال عني ليش امي مكلفت نفسها وسالت عني

ردت اشواق.. امي بيا ضيم ترئ والله حيرتها حيره منا ابن اختها كتل ابوي واخويه وبنت جاسر ومنا هل كلبه جولييت انهزمت وجاسر متخبل كل شويه وتعارك كوه لازمينه

واكيد تدري بيج عند بيت عمو ابو جابر بالحفظ والصون ودكول خطيه هنا تتعب نفسيتها لان بعدها السالفة حاميه

دخل جابر وبيده جكارته صاح...ريهاااام نريد مي

شاف اشواق ضحك كلها...هلا بشوشو اتزوجتي،بعد ما شفناج والله فد اشتاقلج اتذكر طفولتي كلها وياج

ابتسمت ...اوووف جابر تذكر مره من جنه نداوم مدرسه وصديقتي كتلتني وانت وصلاح كتلتوها وتالي راحت جابت ولد عمها وصارت بالطابوك كل ما اذكر هذا الموقف اموت ضحك

جاوبها بقهر..بالله زلم احنه زلم صدك جذب عركه مال زعاطيط ندخل ونكتل البنيه رجوله هاي بالله

رفعت اكتافها بعدم معرفه..والله مدري كول الروحك  .بس يالله جنه زعاطيط

ضحك ...اي والله متندم علئ،هل عركه هسه كون الكه البنيه واخذها فصلية..بعرضي ادللها دلال واكفر عن ذنبي من وراج ..بس ترئ جانت حلوه

اني ابتسمت...حرام جابر

تافئف بضيق...اهووو شنو زنيت رحمه ل الله

تقربت منه وهي ترسم علئ محياها ابتسامه...ولا يهمك ان شاء الله اشوفلك الاحسن منها...

سحب الكرسي وكعد مقابيل وقار سحب نفس من جكارته ونفخه كال...والله احب كعدت النسوان يطلعن جدك السادس عشر ويذكرن البارود مال ثورة العشرين

شالت وقار الطاسه الي بيها الخضره بيدها الصاحيه وكفت متوترة من كعدت جابر مقابيلها..

ما سيطرت علئ ايدها اجت توكع منها الطاسه وكف جابر بسرعه اخذها منها وخلاها علئ السنك ..

هي ضلت واكفه بصمت حسيت بيها راح تبجي حيل حساسه وهذا الموضوع كووولش تتحسس منه

وحقها لان جانت كامله والكمال لله لكن بسبب فلاح هي خسرت اصابعها ...هي قدر بس احنه لازم نخلي سبب

اتذكر من جنه صغار ب 2007 اجه فلاح هو شايل علاكه بيها مكعبات و لعبات وبيها مثل الكطوف مالت الجكاير ...

كال...هذا واحد شمرهن والعالم ضلت تاخذ بيهن العاب مال امريكان جان بيها الامريكان محتلين العراق...

شافهن جاسر كله هاي لعبات مكعبات تتسفط وتصير فد شكل هندسي

وبعدها اخذ هذا الي يصير مثل الكطف مالة الجكاره كال...هذا صاعق يتخله بالقنبلة وتنفجر

فلاح صاح علئ نوال كلها...نوال تعالي اشمري بالزباله

اخذتهن نوال وراحت بناتها جانن صغار يزحفن ووحده تمشي ضلت تصرخ تريدهن خلتهن يمهن يلعبن بيها..

اجت وقار تلعب وياهن واخذ مسمار وضلت تفتح بالهذا الي يشبه الكطف ...

ما اسمعنه اله دووويه قوويه شفت وقار اصابع ايدها تكطمت واللحم لزك بالحايط

ضلينه نصررخ بصووت وهي فقدت الوعي ووكعت والدم لطخ ملابسها

اجو اخوانها وابوها يركضون تخبلو عليها وعمي ضل يدك علئ راسه اتذكره لهسه. بووويه وقار بويه عزيزتي ماتت ...

اخذوها للمستشفى لكن للاسف هي فقدت جميع اصابعها ما عدا الخنصر ..

ومن ذاك اليوم ووقار انطوت علئ نفسها وتعبت حالتها وبطلت من مدرستها

حس بيها جابر تحسست ضل شويه يضحك ويشاقه ما حب يحسسها بعجزها وبعدها طلع من المطبخ واحنه ضلينه نحظر...

كملنه الاكل ورحنه صبينه خطيه جابر وجعفر ما قصروا هم سفطوا الاكل بالسفره...

كعدنه كلنه بالسفره ...واني كعدت بصف جابر وابويه هو وصلاح جانوا مقابيلي...

ابويه رفع ايده وقره الفاتحه علئ الثواب وهداه لوجهه الله تعالي وبعدها هداه للاموات...

ضلينه ناكل واني بيه طبيعة من اكل اذا وكعت تمنايه ارفعها وابوسها وبوجود ولد عمي وخجلي منهم كل شويه ووكع التمن واني اخذها وابوسها...

اني عبالك بغير عالم بس اني وربي والتمن والحرام الكل ما موجود

فزيت علئ صرخه من جابر وهو يكول...هييي شنو ترئ تعبت منج صارت بيه حاله نفسية تاكلين وتبوسين بالتمن هذا مو دين هذا هووس..

باوعت للكل بصدمه وخجل صارت عيني بعين صلاح بلعت ريكي بفشله

وابويه تعصب وهو ينهر جابر بغضب..شبييك لك احترم نفسك ريهام دامني اشم الهوه ما تتدخل بيها ولا تصيح عليها

جر نفس بتوتر ...يابه مو قصدي،بس والله وترتني ما شافتها تاكل وتبوس بالتمن وتستغفر

خزرة بحده كال....اششش   خليني محترمك واسكت واحسابك بعديين..

رمشت بعيوني بفشله وخجل وكفت بهدوء...يالله بالعافية عليكم وان شاء الله ثواب واصل اني رايحه اسوي جاي

ابوي اشرلي بعيونه...اكعدي بوويه اكعدي امج هي تسوي جاي

مستحيل اكسر كلمة ابويه رغم مجروحه بس رضا الله من رضا الوالدين امتثلت للامر الواقع وكعدت..

ابويه ضحك بفشله من موقفنا اني وجابر كال..عندي رهومه الله يحفظها متعمقه بالدين كلش

صلاح جاوبه وهو عينه بالماعون يقلب بالخاشوگه بلا مبالاة كال..الدين سمح والدين دين المعاملة هذا هووس

ضجت حييل حبيت ادافع عن نفسي رغم دائما افضل السكوت همست...اني اتعلمت من توكع النعمه ابوسها حتئ ربي يدومها علينه التمن وكع مني ورجعت بسته

باوعلي وابتسم ببتسامه بارده....اي ما بيها شئ الله يديمها بس الدين يسر  ميصير تفرضين تعقيدات علئ حياتج بسبب الهوس بالدين يسري امورج ولا تعقديها حرام الغلو بالدين

نزلت عيوني بهدوء...اني ما ابالغ مجرد احكام وشروط دا اطبقهن..غض البصر ..احترام الوالدين ..احترام النعمة...تطبيق اصول الدين وفروعه شنو الي دا ابالغ بي

رد بحنان...ميخالف بس حاولي تسهلين امورج

همست...ان شاء الله

خليت وطلعت من الاستقبال...ضجت حييل من جابر ..

شويه وحسيت بشخص حضني باوعت بخوف شفته جابر تنهدت بهدوء ...

كال...اعتذر يكلبي والله مو قصدي بس اني منا متوتر وانتي وترتيني

ابتسمت بحزن...بس فشلتني يا جابر يالله ولا يهمك عادي متقبله كلامك انت اخوويه وتمون

كرص خدي بحب...والله فديتج اصلا هنيالنه عليج اخلاق وادب وديانه محظوظين بيج والله

بسته بخده..واني محظوظه بيك بس مره ثانيه احترمني

اشر على عيونه كال...بعيوني اوامر ثانيه ست رهوومه

ضحكت...لا حبيبي ما يأمر عليك ظالم. 

شويه واندك الباب...

راح جابر فتحه طلع جاسر...

اني غسلت المواعين اني والبنات وبعدها راحت اخذت الاكل الزايد للدجاح...

شفت جعفر وصلاح واكفين ديغسلون بالطارمه

سمعت جعفر يكول الصلاح...ترئ حلوه ريهام صح ابوي خطبها اليه بس احسها ما ترهملي ههههه

جاوبه باستغراب وهدوء...ليش...ولو ليش أسأل نفسي انت واحد فاسق فاجر سكير حرامات بيك ريهام...

رد بصدق...اي والله حرامات بيه...بس تصدك احسها من جماعة الزرقاوي ههههه لك بس تحجي بالدين

ضحك صلاح باستهزاء وكمل غسل

كال جعفر...بس حلوو ما عندها ذنوب واذا عندها ذنوب تلكاهن قليلات تاخذهن بعلاگة وتروح عاد مو مثلي ينرادلي لوري احمل بيها ذنوبي  ههه

رجع كمل بتنهيده...بس ترئ اني ما شارب هوواي بالاسبوع مرتين وهسه من مات ابويه لحد الان واني مشربت ...

صلاح ضربه علئ صدره بقهر...لك انت شارب خمر اكثر من سيئات بني ادم ...

وبعدين انت تذكر شكد قهرت ابووي شكد حزن من وراك يعني انت ابد ما تووب

جر نفس بحزن عمييق...متحسف قهرت ابوي والله شكد ندمان ومقهور والله رغم جان قاسي وياي بس جمرة نااار تسعر بصدري

ابوووي تاج راسي راح بين يوم وليلة والله اذا ما جاسر اخذ ثارة اني اخذه حتئ لو دكولون سكير خلوني سكير وعربيد اكتل واشرب وادخل سجن

هو اني مشوهه سمعتكم مشوهه

هز ايده صلاح ودار وجهه ديدخل اني بسرعه صرت ورة الباب مردت يشوفني

رحت لكن الدجاج دا اوكل بالدجاج كولش،احب اداريهن

همست سكييير...لعد شكد تافهه

رجعت احاسب نفسي...اللهم اغفر لي زلات لساني
.

...........................

جابر...

دخل جاسر البيتنا...

كعد علئ القنفه وهو مهموم ومتضايق ...

همست بهدوء.. شبييك؟

ضحك باستهزاء...شبية؟ عجيب والله..سلامتك ما بيه شئ

جريت نفس...والله حقك محد يتحمل ...

اجه ابوي كعد بصف جاسر وطبطب علئ كتفه...الله يعينك عمي اخلي البنات يصبلك عشا

جاوب بمرارة...لا ما اريد طلعت روحي من الشارع والبيت ...نوال اببد ما متحملها

ابوي كال...ليش شبيها

جر نفس...لازمه عده غير تستقر كل شويه ودخلت عليه الغرفتي وتحجي عن جزلييت وتحجي عن اهلها يابه اكلها ميصير انتي مره حامل وبالعده حتئ صوتج حرمه

وهي يطب منا ويطلع منا لا فهم ولا علم ...

ابوي جان يسبح بسبحته تنهد بضيق..ان شاء الله تولد بالسلامه ونشوف الها حل

رد بهدوء...ان شاء الله

ابوي تنهد...عمي لا تعب نفسك اكثر من طاقتك وانت شنو ما سمعت خبر من بيت عمهم عن عاصم عن مرتك

رد بغضب...لا تذكرني بذيج الحيوانه اكرهه كره العمئ بس خلي الكاها بس خلي اشووف وينها والله لامسح بيها العرراق

ما شفت هيج وحده صلفه وحقيرة ووكحه انهزمت وطلعت ...بس الي عرفته من بيت عمها هي مو ويه اهلها...

واكيد واحد قريب مني ساعدها لان لا العقل يقبلها ولا المنطق وين راحت مثلا

اتصل موبايلي،شفتها جولييت طلعت بره ...

فتحت خط كلت...هااا جولييت شكو...

جاوبتني بحسره...تعبت جابر فدوه جسلي نبض جاسر يا اما ارجع اله يا اما يرجعني لامي

ما اكدر اضل هنا ما احس بالامان تعبانه حييل ومحتاره

تنفست بضيق...جولييت صبري شووويه هسه الوضع ممستقر

وكع الموبايل من ايدي علئ الصوت الغاضب الي اجاني بصدمة...جولييت عندك؟

نهاية البارت...يتبع

كونوا انتم كونوا بخير...احبكم💔

نور سمو العراق..😘

المسؤؤل عن التعليقات هي وئام الشيخلي والفائز هي 👇👇👇

البارت هديه الها...

لكن اني بما ان اقره كل تعليقاتكم عجبوني هل تعليقين ولا تخيير عن باقي التعليقات لان كلها حلوه..

لا تنسو التصويت والمشاركة بكم نكتمل 🌹