#ليتني_استطيع_فعلها
//// بقلم زينب ماجد ////
الحلقة_19
أغلق النافذة التِي تؤذيك
مهما كان المنظر جميلاً 🖤
............
الحجية:- اصبري ابنيتي بس هالفترة بس تخلص ايامج اخلي سيد جعفر يعقد عليج واخليج ابيتي چنة.
صفنت بوجهه معرفت شنو اجاوب، سيد جعفر جبير اكبر مني ب٢٥ سنة تقريبا اروح اتزوج واحد بكد ابوي، غير امي الحاطه عينها عليه وتتغزل بيه شلون اتزوجه ؟
فجاوبتها:- اني ما ابالي زواج اريد اكمل دراستي
الحجية:-اي كملي دراستج ما اخليه يبطلج
-حجية اني اتمنى اعيش وياج و هنيال التاخذ واحد من ولدج، ماكو مثل اخلاقهم، بس سيد ما اعتبره غير بمثابة ابو
-تصير يبنيتي انا من اخذت المرحوم السيد حسين جان اكبر من ب٢٣ سنه و عشنا الحمدلله يموت عليه و انا اموتن عليه.
بقيت اباوع بوجهه ما حجيت، شحجي اكثر مواقفهم وياي هواي مو مال اكش بوجهه ولا اكدر اگلها امي حاطه عينها ع السيد و تريده
هي فهمتني اني احتاريت، حطت ايدها على جتفي و كالت:- لا تفكرين هسه، منا لما تخلصين عدة الله كريم فكرج مرتاح و تفكرين براحتج
-ان شاءالله علوية
ظليت شوية عدهم بس بالي انشغل حتى ما كمت انتبه لحجيهن و هن يحجن وياي، دزيت ابن ابنهم على اسامه حتى يجي ياخذني، لما كالولي اسامة برا ينتظرج كمت من مكاني و رحت .
طلعت سيارة سيد جعفر بالباب بس هو ماكو، انوب عقلي كام يجرخ مدري شلون، وافكر هو رجال متمكن و عنده خيرات الله كلها و زلمة معروف و محترم، يعني حتى لو اكبر مني يكدر يتحمل مصاريف دراستي و عيشتي اني و اخوي
هاي اني صاحية لو بعقلي شي، اتزوج واحد امي حاطه عينها عليه ؟ ولو هي امي ما مفوتتلها واحد، ماكو احد مباوعتله حتى خالد جانت تريده ، اتذكرت خالد
اني ليش اجذب على نفسي كلش زين اعرف اني احب خالد و مستحيل يحلى بعيني احد غيره، خاصه و هو هسه لا متزوج ولا مرتبط و اتمنى نرتبط بس استحي ابادر و ننتظرته يحس
كل هذا و افكر اتزوج سيد جعفر لو لا ؟
طبعا لا ...
دخلت للبيت و عقلي مشوش بالتفكير، اخر شي كلت لازم اشيل هالفكرة من راسي و من يجي وكتها ارفضها و خلصت قابل اكو احد يكدر يجبرني
سويت صينية حلويات و حبشكلات و كعدنا اني و اسامه نباوع فلم، شوية و شفت اسامة غط بنومه، كمت جبتله فراش فرشته و نومته و نصيت التلفزيون، اباوع احس كلشي ممفتهمه من الفلم عفته و رحت لغرفتي
العب بالموبايل شوية كبل لا انام، دك عليه خالد، باوعت الساعة ١٢ و عشرة، اكو خدمة وره الساعة ١٢ الدولار يكفي مخابرة ساعة و نص، فأكثر الاتصالات جانت تصير ورا ال١٢ .
رديت :- الو
خالد:- هلو ديار شلونج، ما نايمه مو ؟
-هلو خالد، لا والله بعدني ما نايمة
-ضايج حيل و طافرة روحي من الوضعية
-ليش ؟
-تركت الشغل بالقناة
-ليش ؟
-نفاق و واحد يحرك الثاني و يألف عليه حتى يبطل، فحركوني يم المدير صارت مشكلة تركت الشغل.
-الله يعوض الرزق على الله مو على احد
-و النعم بالله بس ديار شغل الأستوديو كلش نازل، وشراكة اني و ولد صديقي يعني اليطلع منه ما يكفيني ربع الشهر، اضطر اطلع بسيارتي تكسي حتى اكفي
-هو انت شعندك لا عائلة ولا بيت على شنو الصرف
-مو كاعد ابيت اهلي و امي كل شهر تاخذ من عدنا ٥٠ اني ورافد و رائد ، بس ما توكف على هاي بناتي يريدن سيارتي جكايري طلعاتي ويا اصدقائي غير مرت رافد واكفه ابلعومي
-ههههه ليش
-والله يمعوده، رجلها نايم ادز بناتي جيب الفين ريوك ، جيب معجون جيب جيب وهي ال٢٥ اذا صرفتيها احسبيها طارت
و من اصير عصبي و احاسب امي تكوم تشد ويا بناتي.
-البنات شعليهم
-سخرة كومن كعدن ولا كأنهن صغار ، من اباوع الوضعية روحي تطفر والله
-ليش ما تتزوج ؟
-ما ناقص دوخة ديار و المرة يحتاجلها صرف، اذا اني روحي هسه كوه مدبرها اتزوج و اورط بنت الناس وياي عليش، غير مرت اب على راس بناتي، الف تفكير افكر بهالموضوع.
- الله يساعدك، حاول ادور على شغل اقارب معارف احد يتوسطلك
-الله كريم سولفيلي انت شوضعج.
-هو هو كلش كلش اذا اطلع حدي لبيت السادة و ارجع لو للامام ما بيه حيل لكلام الناس
- والى متى يظل هذا وضعج ؟
-شلون يعني
-يعني حددي موقفج من هسه، قبل لا تنجحين و تقدمين ع الكلية و ادرجين بالانسيابية مالتج على جامعات بغداد لو على كربلاء
هاي النقطة هم تحدد مصيرج ، تتعلكين ٤ سنوات بمكان واحد
-والله خالد صح مرتاحه اهنا ابيتي بس حيل متقيدة بالوضع يعني كانو المرة اذا مات رجلها لازم تموت شتسوي ينتقدوها، تطلع اطب تضحك تمشي حرام بينما هم يحجون عليها يشيلون غيبتها يطعنون بيها حلال.
-هذا تناقض البشر على غيره نبي وهو بذاته شيطان
-متت يعني لازم الزم الاسود ما انزعه فد كم سنه، زين اني راح ادخل اول كلية و هذا اهم حدث بحياتي ما اريد افرح بنفسي البس اشوف روحي
-لا طبعا حقج
-دايخة، اليوم الحجية حجت وياي حجاية هم كمت افكر بيها
-شنو هي ؟
-تريدني لأبنها سيد جعفر
-يابه رجال لحيته ماكلها الشيب تحجين صدك انت
-بس رجال متمكن و اكدر اعيش براسه
-ايابه يربج صدك لو كالو المرة اول ما تباوع بالرجال جيبه، يعني تاخذينه بس على فلوسه ؟!
- ميهمني المقابل المهم اعيش، المرحوم سلمان جانت حالته خاصة و قبلت حتى اعيش و عشت
-لا لا لا اوكفي مو هيج الحجي ديااار، لا تظلين تقنعين نفسج بمقارنات باطلة، وكت اللي اتزوجتي سلمان ما جنتي بهيج ظروف، جنتي مبطله من دراستج و ابوج مهدد حياتكم و تخافين اطلعين الشارع خاف ابوج لزمج انت لو اسامه . لهذا اني بنفسي طرحت عليج فكرة الزواج لان بحاجة انت تبعدين حتى تعيشين
اما اليوم فأنت بخير ، ابوج ما تدرين عنه و ابتعد ..
ومخلصه سادس و تريدين كلية، تقيدين روحج بالزواج ليش
-لعد وين اروح خالد
-بس لا تبجين بوجه الله الحياة مفتوحه كدامج، ان عشتي بكربلاء او ابغداد، و لا تكولين امي و اخوي غصبا على امج تنرد .. جانت ما عدها و الحال كوة، هسه تلعب بالسيارات لعب و خير عدها يعني ماكو حجة ولو هو من الأساس ماكو حجة.
-انت شتكول ابقى هنا لو اعيش ابغداد
-اني ما عايش وياج ولا عايش احساسج ولا اعرف ناسج، انت التقررين هالموضوع و تشوفين وين اليناسبج بس سالفة الزواج كلش شيليها من بالج
-ان شاءالله
كملت اتصال وياه و نمت، الصبح كعدت على اتصال خالد، شلته و اني كوة احجي، كال :- ديار انطيني اسمج الرباعي و المدرسة بسرعة
-طلعت النتائج
-اي و هاي الحاسبة كبالي فاتح بيها انترنت و الموقع كدامي، انطيني بسرعة
كمت على حيلي، بطني صابها المغص حتى من كد ما توترت، حتى اسمي كمت اتخربط بيه، انطيته الاسم و المدرسه و التخصص مالتي ادبي
درج المعلومات، و اني اگله :- هااا بشر
-اصبري جاي يبحث
بقيت اروح وارجع بمكاني عركت ودكات كلبي صارت سريعة متوترة حيل ، صاح :- لااااا
-هااااا
-يلا الحمد لله
-لا تكلي راسبة
-تعوضينها
-بيا درس واكعه
-بس اثنين ، الأسلامية و التاريخ
-كول غيرها والله مجاوبه اصلا جوابي جان اكثره صح والله .... بجيت
ضحك :- اي ولج الاثنين ماخذه بيهن ٩٠
-يعني شنو خالد لا تضحك عليه
ضحك ضحكة طويلةوكال:- ناجحة ناجحة والله
صرخت بصوت عالي و كمت اكمز و ورجعت كعدت ابجي بقوة من الفرح
و هو يضحك و يكلي :- يخبله هو اليفرح يبجي تنلام بيج امج من تكلج لطامه
ضحكت و الدموع بعيني:- خالد والله تعبت بالقراية، شوفلي المعدل الله عليك
:- اي هسه، شوفي انت اقل درجة عندج بالجغرافية ماخذه 52 و اعلى درجة الاسلامية و التاريخ 90
-اي الجغرافية ما احبها مادة جافة
بقى يحسبلي بموبايله، و قسم ..
خالد:- المعدل 74
- 74 يدخلني قانون
-اسألج جماعتي اللي بالمنتديات و ارجعلج جواب .
-اي عفية فدوة
سديت الخط منه و كمت ابوس بأسامه من الفرحة و افتر بالبيت اهوس ( احنا الخططنا الملعب و احنا النلعب بيه هلا هلا هلا )
اندكت الباب، وكفت :- عزا العزاني اني نسيت روحي من الفرحة و كمت اهوس بس لا سمعوني الجيران دخيلك ربي
اسامه انت افتح الباب و اي واحد كله ديار بعدها نايمه و اني الجنت اهوس
فتت جوا، طلعت جيرانه جايبتلنه ثواب، بس لا سمعتني ياربي اعرفها هاي جيرانه تباوع بزرف الابره شبيه ما بيه ما تفوت عليها سالفة
بعدين كلت :- يلا ما اريد اخرب فرحتي بنجاحي ، شتريد تحجي خل تحجي.
الثواب جان شوربة تتسمى شوربة ( اش) او هنا يسمونها (شيلان الزهرة ) يزينوها بزيت و دارسين بس حيل احبها، حطيناه اني و اسامه و تريكنا بيه
رجع اتصل عليه خالد،كال :- ديار يكولون خل تروح تربية او اداب احسن الها لان القانون ما عليه تعيينات هواي، الشباب اللي تخرجوا قانون مفتحيلهم بسطيات ما عدهم شغل مو البنات ... و حتى شغل القانون للبنية بالعراق مو ناجح اقل شي العندة قضية صعبة ما يوكل محامية يوكل محامي
-بس اني اريد قانون كلش ابالي القانون، عفية خالد لا تحبطني
-والله ما جاي احبطج بس النصحوني بيه جاي اكلج بيه انت بعد بكيفج
... كلش دوخني هذا الكلام اني حاطه القانون ابالي بس من كالي هيج خفت لا صدك ما الكا تعيين تالي اتخرج و اكعد بعد كل التعب
خلصت الاتصال وياه، خابرت امي حتى ابشرها،
:- الو ماما شلونج
-هلو ماماتي
-يوم ابشرج نجحت و معدلي ٧٤ افرحي
-يا صلوات يرادلها هلهوله كللللللللللللللللللوش
ضحكت:- هاي وين هلهلتي فضحتينا
-ولج صاعده بالسيارة صلاوات ما دام اخذتي النتيجة خل اجي امر عليج باجر اجيبج لهنا نسوي حفله و نتونس
-لا يوم و سلمان ما صارله ٣ اشهر من مات ما يصير خطية
-لطمت البومة ولج يمه سلمان بقيدج مباوعلج الولد مشا من هاي الدنيا لا ذنب و لا عقاب راح للجنة كبل ، احنا الخطية والذنوب تكت من اثوابنا .. لا تظلين تلطمين خلينا نفرح
-ما ادري تعاي باجر و الله كريم
-اي لعد حظري روحج اني باجر من الصبح جايتج كون اوصل اطلعين مو تظلين تجرجرين ما بيه حيل
-ماشي ماشي بس تعاي
نهيت منها، نظفت بيتي تنظيف تام و صفيت الثلاجة و حظرت الجنط مالتي، و مشيت لبيت الحجية بالليل سلمت عليها و كلت الها :- اني باجر رايحه جايه امي
كالتلي:- الله وياج تحتاجين شي ؟
-لا سلامتج
شويه ورجعت، خابر خالد بالليل كلت اله:- باجر جايه لبغداد
- يا الله تنور بغداد بيج يابه
-منوره بأهلها
-امج تجيبج
-اي والله و تريد.تسوي حفلة بمناسبة نجاحي
-فكرة كلش حلوة
-بس سلمان ما صارله هواي
-يابه الرجال مات و الله يرحمه شقضيتج ديار، كعدتيلج ٣ سنوات بكربلة اخذتي طبايعهم لو تعيشين العمر كله شراح تسوين ، لو ما اطباعنا لا نلبس الاسود و لا نوكف على حزن احد و الحياة تستمر
-والله ما ادري، هو يمكن راح اخليها صدك تسوي حفلة، زين شنو رأيك نسويها عائلية
-عندي عائله و اجيبها ؟
-بناتك و بيت امجد و جيب بتول وياك، و نشوف النا مكان نطلع نتونس بيه
-والله فكرة حلوة يمكن صدك اكول لبتول و نسويها، نروح للجزيرة السياحية
-ااااالله اتمنى اشوفها
-اي لعد صدك نسويها عائلية و نروح الها .
بقينا نتفق على هالطلعة ، خابرت مها كلت الها كيفت طكتلها اصبع و كالت :- جدر الدولمة عليه اسويها حامضه حلوة و لاجعه اخليكم تاكلون حتى الصينية
-راح ابجي مها
ضحكت ... سديته منها خابرت امي كلت الها عزمت بيت خالد و امجد و نروح للجزيرة السياحية
كالت:- اي واخيرا فكت اللطامة و قررت تطلع ، ولج يمه كمت احس بيج صرتي حجية و كل سوالف الحجيات يمج
ضحكت :- غير معاشرة الحجية و ليل نهار تحجي براسي و تنصح
-يبوووه هو العمر نعيشه مره لو مرتين ، منكبه و طامه روحج غدي تعاي هنا تفسحي شوفي العالم تعقدتي يا بتي
بقيت اسولف وياها و نضحك لحد ما نمنا، و اتفقنا بعد باجر نطلع سفرة للجزيرة نتونس
ثاني يوم من للصبح اجت هي و رجعتنا بسيارتها لبغداد. من وصلت هناك شمرت روحي ع النوم لا جن نايمة ابيتي ولا ابد، لزمتها نوم للعصر كعدت هي لابسه نفنوف يصير لونه مشمشي و رجل على رجل و لازمه الموبايل و تحجي ، شافتني، سلمت و نهت الاتصال و حجت
:- يمااااي ولج راح تعلين گلبي ، شكد عمرج يمه ٨٠ ولابسه ثوب اسود و وجهج بيه سبع لطامات و الحاجب و الشوارب مال واحد ارهابي
-غير حزينه تره الميت جان رجلي
-اي و تموتين وراه لو راح ترجعينه بهالملابس ، شو تعاي تعاي
اخذتني وراحت لغرفتها طلعتلي ثوب جوه الركبة لونه وردي ونص ردن:- لبسيه بساااع يلا
لبسته و ووكفت على المرايا و فتحت الي الكماشة و نزلتلي شعري:- هيج يا بتي و عيشي شوفي شلون رجعت الحياة بوجهج بت ١٩ و عايشه بحال عجايز شبيج ... حتى اللي يريد يباوع عليج يشرد ما يكابلج
هي تحجي و اني اباوع بنفسي صدك رجعت صغيرة الوردي گلب وجهي ابيض رغم ما حافة، جابت مشط و مشطتلي فرنسي و نزلتلي زلوف منا و متا و بالكاوية سرحتهن و عدلتهن على وجهي
و حفت وجهي و شواربي، و حواجبي خلتهن بثخنهن بس رتبتلياهن .
اباوع نفسي صرت حلوة حتى تغيرت نفسيتي و فرحت من داخلي، الأسود يكتم ع الگلب
ثاني يوم حظرنا اني و امي برياني لحم و سوينا جدر جبير، لان بتول حجت وياي و كالت حتى امي راح تجي وياي، فمن سمعت هيج خابرت على مها كلت الها جيبي وياج ام امجد .. عيب نروح و محد گايل الها هم يظل ابالها
بتول اتكفلت الحلويات كالت اسوي كنافة وكيك و امي راح ادز على صندوك مال بيبسي منها ..
حظرنا الاكل و خلصنا، لبستني امي بنطرون جينز اسود و قميص اوف وايت و حجاب مشجر لفتلي الحجاب لفة خليجية صار كلش حلو
وسوت لاثار ١٠ دندوشات بشعرها ، فرحت كامت تمشي و تركص وطلعنا بسيارتها و احنا نتواعد ويا بيت خالد و امجد جايين سوا
وصلنا هناك لكيناهم واصلين كبلنا، سلمنا عليهم و وبقينا نتباوس و فرشنا و كعدنا و خلينا الاكل على صفحة .. سوالف حلوة و الكلوب مرتاحة
و الجهال رايحين جايين يلعبون و خالد و امجد واكفين يراقبوهم، ام خالد صايرة ما تغث منطلقه فرحانه و تنكت و تضحك ويا امي
صبينا الاكل صارت سفرة شطولها و احنا كاعدين ، مدري الاكل مدري الكعدة طيبة الخلت الاكل ماكو اطيب منه
خلصنا الاكل لملمنا و حطت بتول الكيكة ام الكريمة بالوسط ، اني عبالي مشتريتها بس طلعت هي خطية بسبب وفاة زوحها صارت تشتغل بالكيك حتى اطلع مصرفها و مصرف جهالها
قطعو الكيكة و خلوها بمواعين سفري و هم يصفكون و امجد يصيح ( حبيبي زيتويو ) هو وجهاله
وخالد حاط بناته بحضنه و يصفك وياهن ، رده ( لا يربك مو عيد ميلاد هذا نجاح غني عدل )
اامجد:- هو النجاح شيتغنى بيه ؟
غنت بتول :- شايف خير و مستاهلها
ام امجد :- يا قابل معرسه البنية
غنى امجد :- الو ها يحبيبي البارحة شلونك ولا لحظة غفيت و داعت عيونك
كلهم غنو وياه لان هالاغنية كلش مشتهره هالفترة كمنا نصفك وياه و نضحك و نغني
كملنا كص الكيك و الاغاني، امجد وصى امه ادير بالها على فطومة لان التوم نايمين و اخذ مها و راح يفتر
ندستني امي:- كومي ويا خالد يعوبه اتونسي
-عيب يوم اكعد ام رافد موحوده تروح اطنكر و تخرب اطلعه
-امداج يالعوبة
وصاحت بصوت عالي:-، دكومي افتري اتمشي بالجزيرة كاعدة بسدي شبيج، سوده عليه كوه غصبتها حتى تطلع ما تقبل ذبحتي مكمطه روحها بالاسود
بقن يلومن عليه، اشرلي خالد جان واكف و قوطية البيبسي ، كمت من يم امي مشيت و هو اجا يمشي
ما عرف شيفتح وياي من موضوع ولا اني، قواطي البيبسي بأيدنا و نمشي
حجه :- البنات اليوم حيل تونسوا
-اي خطية شفتهم
باوعلي:- طالعه حلوة اليوم
ابتسمتله، بس بداخلي بودي اطير من الفرحة ، حسيت روحي صارت فراشة حتى خدودي صخنن من التوتر و الفرحة
ديار:- لو شكد ما ارتاح بكربلاء مثل بغداد ماكو، اجواء بغداد تختلف
- اي تعاي عيشي هنا منو لازمج
-ما ادري
دك موبايله، طلع من جيبة، باوع بيه، صار كدامي شفت الأسم ( ضحى ) ، نهى الاتصال و رجعه لجيبة
-ضحى هاي ؟
-اي
-بعدها تخابرك
-لا بس يعني مرات
حسيت بجوابه ديخفي شي و ما يريد يحجي، سكتت و هو سكت بعد ما حجه، رجع دك جهازه ، رد هو
- ها رافد
-وينكم مخلين هاي مطنكره و عايفينها بالبيت
-اخذت امي و بتول للجزيرة
-شكو شعدكم
-ديار ناجحة و احتفلنا بيها
-ميعاد موجوده ولك؟
-روح رافد بعدين اخابرك
-يالنذل صاير تشتغل من وراي ؟
-مع السلامة
ديار:- الصوت جان عالي سمعته يسأل عن امي ليش
-لا هيج ديسأل
-معجب بيها
ضحك :- هذا رافد ما يبطل سوالفه يحب النسوان
- يشبه امي بالمواصفات يعني
رفع صوته و هو يكهكه :- تقريبا
.... بالاتصال شكد نحجي و نسولف بأريحية و ماكو سالفة ما تخطر على بالنا و نحجي بيها، بس مدري بهاي الكعدة ضيعنا كل السوالف وبقينا نصفن و كل واحد بينا يفكر شيفتح موضوع
بقينا فترة نص ساعة نفتر و رجعنا لأهلهنا، جانو لامين كلشي و كاعدات يسولفن السوالف الاخيرة مال الطلعة و لازمات الجدورة و الغراض باديهن .
بنات خالد ركضن لخالد و اثار جانت تلعب وياهن اجتني تركض
سلمنا على بعض و طلعنا، جانت افكاري متضاربه بهاي الطلعة، فرحت حيل من خالد كالي حلوة بس شغلت بالي ضحى من خابرت و هو حاول يخفي شي رغم هو ما يخفي عني شي و كلشي نحجي لبعض
دنيا ليل و جو بغداد و نهر دجله .. و الوضع روعه خاله راسي على الجامة و افكر، دك موبايل امي بالسيارة صار صوت عالي، باوعت عليه بسرعه
شفت الأسم ( جعجوعتي )
ما ردت، بس غلقت الجهاز ، سألتها :- منو ؟
-مو مهم
ما درت بال رجعت راسي للشباك و صوت حاتم بالسيارة ( تكل للناس بايعني) و الصوت حلو و كلنا مسلطنين عليه و كل واحد سارح بأفكاره
وصلنا البيت سبحنا و بدلنة و كعدنا اني و امي و اسامه ع التلفزيون و اثار نامت ، بقينا نسولف مع بعض
واصناء الكلام كلت الها:- الحجية خطبتني لسيد جعفر تكلي اري........ بسرعه قاطعتني
-شنو شنووو سيد جعفر شنو ترا بكد ابوج
-ما ادري ما قبلت اجاوب كالتلي ورا العدة اجي اخذ رايج
-ممنوع ما تاخذينه
-ليش
-شنو ليش ممنوع و بس
-انت اللي نفسج التكولين الزواج ستر لو نسيتي من سمعتي بخطبتي من سلمان انت السعيتي بيها رغم جنت صغيرة حيل، شنو التغير هسه
-انت تغشمين نفسج انت لو شنو ؟
-قصدج انت مخليه عينج عليه؟
-ديار سدي الموضوع و تشيلينه من بالج نهائي
-اكلج ماما اني ما كلتلج وافقت ولا تغزلتلج بيه او كلت الج احبه كل الكلته الج الحجية خطبتني لابنها بس انت توترتي زيادة عن اللزوم
-اوووي اكوم منج احسن الي سوالفج تكدر العمر
بقيت متعجبه تصرفه، اني ظتوقعتها تكلي ارفضي بس مو هيج تكب بوجهي
عفتها و نمت، ثاني يوم لكيتها شايله وجهه عليه، مو طبيعية .. حجت وياي :- باجر اخذج و نروح لكربلاء
-اني مقررة اظل اسبوع هنا ارتاح
- لا عود غير مرة باجر نروح
-ماما شبيج انت شو مو طبيعية من كلت الج الحجية خطبتني و لهسه انت مثكلة وجهج عليه
-و شكو اثكل وجهي شعندي وياج بس هذا الموضوع تنسينه كلش، من تحجيلج للحجية بيه تكليلها سكتي حجية هذا بكد ابوي
بقيت صافنه بيها و اتسائل :- هاي امي شجاها ؟
ثاني يوم اخذتنا لكربلاء و هي بقت يمنه بس اعصابها مشدودة .. و متوتره و الموبايل موكع من ايدها
للليل، و اندكت الباب،كام اسامه، طلع ، لكاه سيد جعفر، فات اسامه مستعجل
- كومو كومو اجا سيد جعفر فوتو جوا
-اني كرفت الكبالي كله و لملمت ، و امي وكفت عدلت شعرها و ملابسها ، و صاحت :- خل يفوت ابني سيد جعفر مو غريب
خزرته و كمت ادفع بيها:- يمه دفوتي يا يفوت تحجين صدكج انت
فات السيد للكراج، اني ركضت للغرفة، دخل هو للأستقبال و كال :- السلام عليكم
اسامه يصيح بامي، :- يمه ديار تريدج جوه
- لا وليدي صيح ديار سيد جعفر مو غريب هو بمثابة ابوكم
لبست حجابي و خليت العباية على اجتافي و دخلت سلمته عليه، هو كاعد و هي يمه بملابسها الدلع و الشعر مفتوح و دكوللنا :- فوتو ماما اكعدو
اسامه باوعلي و اني اباوعلي، اندكت الباب انداريت و اسامه راح يفتح ، فاتت الحجية للبيت و هي تسأل اسامه بسكوت :- سيد جعفر ابني هم اجا لهنا
اجاها الصوت من ورانا، امي واكفه و ترحب بيها و تكللها فوتي حجية السيد كاعد هنا
بقت مصفصفة المره و مستغربة بوكفت امي مدلعه و سافرة و ماخذه راحتها و تكللها السيد هنا
فاتت للغرفة و هي تكله :- ابني شجاي يصير
-يمه ام ديار زوجتي على سنة الله و رسوله
بقت صافنه بيه ما تعرف شتحجي، بس وجهه يضرب الوان، كعدت بالكاع تعبت، كام هو يريد يلزمها كالتله :- حدك لا تكضني
حجتها و هي مغمضة و تخربطت......يتبع
☆☆☆☆☆
وفيت بالمئة ناقة
#زينب_ماجد