في قلبي حروب دامية

البارت السابع و الثلاثون

السلام عليكم و رحمه الله تعالى و بركاته ❤

البارت السابع و الثلاثون

🌺 بقلم ؛ حمامة السلام 🕊 ( عاشقة غوكو ❤ ) 🌺

مروه

لزمت الجدر وين ما نايمين الجهال و شمرته على جودليه

للحضه حسيت الدنيه وكفت بيه

اسمع صريخ جهالي و اني جسمي متجمد

اريد اتحرك احس اطرافي كله تيبست

حد ما فزيت على صوت صرخه رقيه

اباوعله كاعده بالزاويه تبجي

عمتي ماكو طلعت بسرعه

ركضت فورا على جهال كشفتهم اريد افتهم منو احترك وين احتركوا نوب اثنيهم يعيطون

الخوف و الرجفه مخلتني اندل دربي

لكيت ايهاب متبدي عليه المي يم رجله و مهاب كلشي مصايرله

صرت افتح بالكماط على سريع

اشوف رجله صايره حمره و بس يصرخ و مهاب بصفه هم يبجي مع انو ممحترك

حرت شسوي

اقتربت من رقيه و حجيت وياه

- ديري بالج على اخوج هسه اني رايحه اودي ايهاب للعياده الي هنا و اجي

- ماما لا تعوفيني اخاف

- لا تخافين حبيبتي صيري سباعيه و سكتي اخوج يله مسحي دموعج

- و اذا رجعت بيبي تريد تاذيني

- مترجع انتي ضلي هنا يم اخوج و معليج بيه و اني هسه ادزلج عمه تبقه وياج

رحت وديت ابني على عياده عفته هناك و رحت لعمه

ادك بالباب و حيل مضل بيه بس ارجف لو جاي على وجه و محترك لو واكع بغير مكان من جسمه نوب صغير

فتحت عمه الباب

- هاااي شبيج تبجين

- عمه روحي للبيت الجهال وحدهم

- ليش وين موليه و عايفه جهالج

- بالعياده ايهاب احترك بالمي

- شلون احترك فهميني

- عمه معندي وكت من ارجع اني افهمج

رحت للعياده و را ما حجيت ويه عمه و ضليت انتظر لما لفوا رجل ايهاب 

ضل يبجي و فحطان بجي اريده بس يسكت

نوب من حطوله الدوه على رجله روحه و فاحت من البجي

نوب اني هم ابجي وياه من خوفتي عليه

ضليت بالعايده شوي لما اطمنت على وضعه نوب من خرعتي نسيت اجيب الفلوس

رحت للبيت اودي ايهاب و اخذ الفلوس

حطيته على جربايه و غطيته و اني دموعي يصبن صب

طلعت من الفلوس الي يتركلياهن يحيى و جايه اطلع

طلع عمتي بوجهي

اول ما شفته اذكرت المنظر و هي تشمر على جهال

ما حسيت غير هجمت عليه و اجر بشعره

- اليووووم اله اكطعج تحركين جهالي مووو

- عووووفيني لو ضابه جهالج جان مصار هيجي

اكطع بشعره و اضرب برجلي على جسمه و هي لازمه التوثيه و تضرب على جسمي

نسيت الوجع و اذكرت شلون حاركه جهالي

اجتي عمتي حنان على صوت عياطنه و هي اجر بيه

- يا عمه شجاج شبيج

- خليني اكتله لهاي تريد تموت جهالي اذا ما اكتله

- روحي مني عابت هالخلقه على من حور جهالج هو اكو احد يباوعلج لو يباوع لجهالج

- خل يجي يحيى و يعرف امه شمسويه بجهاله راح احجيله كلشي كل يوم ساكته على اهاناتج بس هسه مراح .......

بعدني ممكمله حجيه حسيت بمغص يكطع بطني حيل

وكعت بين ادين عمه اتلوه من الوجع

اشوفه شلون دخلت لغرفته و تقفل الباب

لزمتني عمه و حجت

- شبيج شصارلج

- بطني عمه بطني

- كومي خل اخذج للغرفه كومي

كامت تجر بيه و اني اتلوه من الوجع

سطحتني على جربايه و اني حيل مضل بيه ابجي من وجع بطني لو حالي لو على حال جهالي

- فهميني شصاير كلشي مفتهمت شي من رقيه

- صدك وينه رقيه جيبلياه خل اشوفه

- نامت هسه انتي احجيلي شصاير

- تعاركت ويه عمتي و ....

- و شنو

- شالت جدريه المي و شمرته على جهال

- صخام بيه كون شلون سوته خاف كلبته بالغلط

- لا مو بالغلط عمه شالته و شمرته على جهال

- و هسه ايهاب شلونه

- الحمد الله عمه بس ودي هاي الفلوس للعياده و جيبي الدوه المكتوب بالورقه

انطيته الورقه و هي صافنه عليه

- و يحيى

- من يرجع احاجيه

- لا تكليله امك حركت الجهال

- لعد شكله

- كليله حادث و سدي الموضوع

- عمه شنو حادث اني دقيقه ما ابقه بهل بيت ويه هاي المره بعد

- تريدين تبقين بله رجال

- شنو

- اذا تكليله على صار اليوم راح تلكي بالسجن لو مسويله مصيبه بامه مراح يسكت كلشي و لا جهاله تريدين جهالج يبقون بليه رجال و بليه لكمه هاااا انتي كولي لو بيده جان عزل من زمان بس فلوس معنده تحملي لما يجمع فلوس و اطلعون من هالبيت ترا هو دا يجمع فلوس علمود يشتري بيت بس صبري يا عيني لتخليني جهالج يتربون بله اب و بله لكمه حتى اهلج حالهم حالنه بيت صغيره لكمه قليل مين يعينوج اذا صدك تفكرين بجهالج سدي الموضوع لخاطر ميتربون جهالج بله رجال

- ترا راح يعرف بعدين

- من يعرف نشوف وكته شنسوي ترا ما يرحم امه كلشي و لا جهاله كفي الشر و سكتي

- اشوف عمه هسه روحي ودي الفلوس و جيبي العلاج

- تمام

راحت عمتي و ضليت متمدده افكر بحجيه

صدك حجيه صح بس ما اكدر اسكت على عملته

حرت شلون اتصرف

ما حسيت غير احد كمزه على بطني

عطت عيطه من الوجع

حتى مكدرت اشوف منو

ما اسمع غير صوت رقيه

- شبيج ماما

- تعاي يا بعد روح امج

- شلون صار ايهاب

- لا تخافين زين سبع مثلج كلشي مصارله

- ماما خل نروح منا بيبي راح تكتلنه

- وين نروح

- لمكان بعيد عن بيبي

- خل بابا يصير عنده فلوس و ياخذنه بعيد

- ايمته يصير عنده فلوس

- ما ادري بس لازم نصبر و نتحمل

- بس بيبي مراح تعوفنه راح تاذينه

- ما اخليه تاذيكم انتو بس ضلوا يمي

نومت رقيه يمهي و بصفه ايهاب و مهاب

اما سوسن جانت رايحه يم هدى تلعب

ضلت بطني توجعني وجع مو طبيعي و بس ازوع

منا الضرب الي اكلته بالتوثيه على بطني كلب معدتي خوش كلبه

كمت صليت و رجعت كعدت يم جهالي

تمددت و الوجع مفاكني و ايهاب بس يبجي

دمرني و منا الوجع ماخذله فره على كل جسمي

حد ما كدرت انومه غفيت شويه

سمعت صوته و هو يرجع يبجي

ردت اشيله

ادين عبرت على جسمي و اخذت ايهاب

درت وجهي لكيت يحيى واكف و يهز بيه

ردت احجي حط اصابعه على حلكي و حجه

- لا تحجين بس ارتاحي و نامي اهم شي انتو بخير

- منو حجالك

- عمه حجتلي انتي هسه نامي اكيد تعبانه

اجتي سوسن نامت بصفي و هو كعد يم راسي ايد شايل ايهاب و الخ تتحرك على شعري

بس شاله سكت بين اديه و نام

شكد جنت معصبه اليوم بس من شفته ارتاحيت حسيت بالامان شويه كدرت اهده

ضل يهز بايهاب حد ما اتاكد منه نام حطه على جربايه و غطاه

اجه يمي خله راسي على رجليه و ضل يحرك باصابعه يم اذني

كل حركه منه اعشقه

اي شي منه يخليني اهده و انسه كل هالوجع

حجيت

- ايمته نطلع من هالبيت

- ليش صاير شي

- ليش لازم يصير شي حتى نعزل

- بعدني دا اجمع بالفلوس بس لحد هسه ميكفن اشتري تاير سياره عتيك اذا نصهن دا يطيرن على جهالو نص على شغلات البيت شيبقه منهن

- ما اريد اضل هنا

- لعد وين نروح زحمه نكعد يم احد و احنه شكرثنه

- ما اردي بس ما اريد اضل هنا

- احجي شصاير

- كلشي مصا ......

- مروه احجي

بعد محاجبه اندك الباب مال حوش

- منو بهاي الساعه

- ابقي هنا يم الجهال و لا اطلعين

- تمام 

كام من يمي و اني ادورلي حجه اسد هالموضوع

يحيى

جانت الساعه 12 بليل من اندك الباب كمت اخذت المفتاح و فتحت القفل

اول مجريت السركي و فتحت الباب صارت كبالي منتهى

ضليت صافن عليه و على حاله

عبايته مطينه من فوك ليجوه وجهه بنفسجي و عيونه حمر

جريته من ايده و طببته جوه

- شنو هاي حالج و ليش جايه بعز الليل

حطت اديه على رجليه و حجت و هي مدنكه

- يحيى طلكني من هشام

صرت احس بدموعه على رجليه

بعدني محاجي طلعت مروه من الغرفه و باوعت لمنتهى

و حجت

- شصاير منتهى

بس جان عوزه واحد يسأله حتى طكت بالبجي

نزلت راسه لرجليه و كعدت تبجي

حجيت

- تعاي كومي سبحي حالج حاله صاير وراهه افتهم منج

انداريت على مروه و حجيت

- تعاي اخذيه للحمام

كومته مروه و هي فحطانه من البجي

انتجيت على حايط اتأفف مصيبه ورا الخ

ايمته نرتاح

ايمته الضيم يفك ادينه عنه

ايمته و ايمته

و هاي ايمته منعرف شوكت تخلص

حطيت راسي على اديه و نزلت راسي

ساعه 2 بليل

حسيت بيه اجتي كعدت كبالي

- هسه احسن

هزت راسه بمعنى اي

- شصاير و جايه بهل لليل و تصيحين طلكني

- بعد ما اتحمل اعيش وياه

- ليش

- يشرب و نسوان و يجي يضربني تحملت هواي منه بس اليوم

- شصار اليوم

- اخر فتره صار يجيب بنات لليل للبيت و يضلن ينامن وياه منا لصبح و ....

- و شنو كملي

- حد ما كام يجيب زلم للبيت و يريد مني اصبلهم السم و اخدمهم

تحجي و دموعه يصبن وجهه ازرك و شفايفه منفوخه

- هو سوه بيج هيجي موو

- اي

اقتربت منه بست راسه و حجيت

- الي تردي يصيرلج روحي نامي و ارتاحي و ميصير الا الي يطيب خاطرج

اشرت لمروه تكومه للغرفه و كمت جاي اطلع

سألتني مروه

- وين رايح

- برأيج وين يعني غير لهشام

- فدوه لسوي شي و بهل ليل اكعد و الصبح عود روح

- سدي الباب وراي

حطيته المفتاح على ميز بعدني مطالع حسيته تحضني من ورا

- فدوه لتروح و تعوفني

انداريتله و حجيت

- لا تخافين الصبح راجعلج

طلعت و رحت

مروه

طلع يحيى و ضليت اني الوب بمكاني لا يسوي بالرجال شي و يتورط بسالفه

دخلت جوه يم منتهى و هي بس تبجي

- كافي بجي شوفي عيونج انفخن من البجي

محجت شي ضلت بس تضرب على رجليه و تبجي

شويه و حجت

- وين راح يحيى

- على زوجج

- ليش موكفتي

- عساس محاولت مسمع حجيه و طلع

- لو جايه و حاجيه كلشي من البدايه

- يعني جان يسوي بيج كل هذا من زمان

- اي

- و ليش محجيتي شي

- مردت اسوي مشكله و اضوج يحيى هو فوك هاي همه براسه نوب اجي اني عليه

- هسه كومي نامي و ارتاحي

- شرتاح و يحيى بره لا يصير شي

-  لا ان شاء لله كلشي ماكو هسه انتي كومي

كامت رات للغرفه

فرشتله جودليه حطت راسه عليه و نامت

ضليت كاعده اباوع لجهال نوب ارجع اباوع لمنتهى

كمت صليت و دعيت تمر هالشغله على خير

مكفت سالفه حرك ايهاب هسه منتهى

بقيت حايره اكول ليحيى على الي سوته امه لو لا

ضليت لصبح و اني صافنه على حالي حايره احجي لو اسكت

اذا حجيت ما اعرف شنو هي رده فعله

و اذا محجيت يجي يوم و يعرف

حد ما سمعت صوت الباب رحت كمزت فورا من الغرفه

جايه احجي طلع عمر جاي من الجيش

- ماكو هلا مرت اخوي شنو ممشتاقيلي

تتأففت و حجيت

- هلا بيك

رحت للحديقه كاعده و انتظر يحيى

سمعت صوت ايهاب و هو يبجي

كعدت اريد اسكت بيه و اساسا كلبي يبجي وياه من الخوف

صارت الدنيه عصر و يحيى ماكو

سمعت صوت عمتي بالغرفه

من خوفي رحت ركض للغرفه اشوفه شلون تعيط على منتهى

- شدا اسوين هنا

- احجي ويه بتي

- شتحجين وياها

- صايره هواي تدخلين

- طلعي من الغرفه

- و اذا مطلعت شسوين

- احجي ليحيى على سوايتج و انتي جربي شراح يسوي بيج

- مسويه

- و ليش ما اسويه اني اخليج تاذين جهالي و تفلتين بعملتج

- وكع الجدر مني بالغلط

- و اجه على جهالي بالغلط عذرج اقبح من جرمج

- لا اطولين لسانج زايد اني عمتج و تحترميني غصب

- لا احترمج و لا شي ما دان مديتي ايدج على جهال بعد مبقه اي احترام بيناتنه تتهمين بتي انه بواكه و فوكاهه تحركين ابني شلون راح تفسرين الي سويتي  بعد اذا انفجرت هالسالفه عليج مو شغلتي انتي البديتي يا عمتي و هسه امشي طلعي من الغرفه ترا الي خلك اتعارك وياج

راحت عمتي و عافتني

كلبي كام يرجف من الخوف لا صار بيحيى شي

حد ما صارت الدنيه لليل

كاعده بناري حد منفتح الباب دخل يحيى

كمزت من مكاني رحت فورا بحضنه و اني ابجي

- هاي وين ضليت

- شبيج تبجين مصار شي

اباوع عليه سالم كلشي مبيه

- وين تأخرت

- راح يطلكه

- و رضه

- و غصبن ما عليه يرضه هي بكيفه قابل روحي اخذي هاي الورقه لمنتهى خل تشوفه

راد يطلع

حجيت

- وين رايح

- لفؤاد رايح

- بهل وكت دبقه

- ما اكدر البيت خنكه اذا اضل راح انجبر اسئل منتهى على هواي شغلات و هي بهاي الحاله

- تمام بس انتبه على روحك

- ديري بالج على جهال

- خوش

طلع و عافني كلبي شويه ارتاح بشوفته سالم

رحت للغرفه شفت منتهى كاعده و بحضنه رقيه و سوسن

كعدت يمه و حجيت

- فرحي راح يطلكج

- شنو

- هشام راح يطلكج

- دا تحجين صدك راح يطلكني

- اي يحيى كالي

ما اشوف غير دموعه نزلت

- يااا هاي شبيج مفرحتي

- شفرح و الناس راح تلغي

- خليه تلغي عوفيهم يحجون

- لو يحجون بيه بس الحجي كله راح يمس يحيى

- ترا هو ميهتم الحجي الناس بكد ميهتملج

- ادري بس .....

- بس شنو هاااا

حطيت ايده على راسه

- انسي

وخرت الجهال منه و خليته تتمدد و تنام

اخذت الجهال ينامون شويه و اخذتني النومه من التعب

يحيى

رجعت لوجه الصبح للبيت

لكيت ماما كاعده

ردت اطب حجت

- انتظر اريد احجي وياك

يتبع .......

فدوه دعواتكم لصاحب الروايه محتاج تدعون لخاله

طبعا من يوم يومهم ابطال الروايه ممرتاحين